9. ஸீலலக்க²ணபஞ்ஹோ

9. ராஜா ஆஹ ‘‘ப⁴ந்தே நாக³ஸேன, யம் பனேதம் ப்³ரூஸி ‘அஞ்ஞேஹி ச குஸலேஹி த⁴ம்மேஹீ’தி, கதமே தே குஸலா த⁴ம்மா’’தி? ‘‘ஸீலம், மஹாராஜ, ஸத்³தா⁴ வீரியம் ஸதி ஸமாதி⁴, இமே தே குஸலா த⁴ம்மா’’தி. ‘‘கிம்லக்க²ணம், ப⁴ந்தே, ஸீல’’ந்தி? ‘‘பதிட்டா²னலக்க²ணம், மஹாராஜ, ஸீலம் ஸப்³பே³ஸம் குஸலானம் த⁴ம்மானம், இந்த்³ரியப³லபோ³ஜ்ஜ²ங்க³மக்³க³ங்க³ஸதிபட்டா²னஸம்மப்பதா⁴னஇத்³தி⁴பாத³ஜா²னவிமோக்க²ஸ- மாதி⁴ஸமாபத்தீனம் ஸீலம் பதிட்ட²ம், ஸீலே பதிட்டி²தோ கோ², மஹாராஜ, யோகா³வசரோ ஸீலம் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியந்தி, ஸப்³பே³ குஸலா த⁴ம்மா ந பரிஹாயந்தீ’’தி. ‘‘ஓபம்மம் கரோஹீ’’தி. ‘‘யதா², மஹாராஜ, யே கேசி பீ³ஜகா³மபூ⁴தகா³மா வுட்³டி⁴ம் விரூள்ஹிம் வேபுல்லம் ஆபஜ்ஜந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய வுட்³டி⁴ம் விரூள்ஹிம் வேபுல்லம் ஆபஜ்ஜந்தி. ஏவமேவ கோ², மஹாராஜ, யோகா³வசரோ ஸீலம் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரிய’’ந்தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, யே கேசி ப³லகரணீயா கம்மந்தா கயிரந்தி, ஸப்³பே³ தே பத²விம் நிஸ்ஸாய பத²வியம் பதிட்டா²ய கயிரந்தி. ஏவமேவ கோ², மஹாராஜ, யோகா³வசரோ ஸீலம் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரிய’’ந்தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, நக³ரவட்³ட⁴கீ நக³ரம் மாபேதுகாமோ பட²மம் நக³ரட்டா²னம் ஸோதா⁴பேத்வா கா²ணுகண்டகம் அபகட்³டா⁴பேத்வா பூ⁴மிம் ஸமம் காராபேத்வா ததோ அபரபா⁴கே³ வீதி²சதுக்கஸிங்கா⁴டகாதி³பரிச்சே²தே³ன விப⁴ஜித்வா நக³ரம் மாபேதி. ஏவமேவ கோ², மஹாராஜ, யோகா³வசரோ ஸீலம் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரிய’’ந்தி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, லங்க⁴கோ ஸிப்பம் த³ஸ்ஸேதுகாமோ பத²விம் க²ணாபேத்வா ஸக்க²ரகத²லம் அபகட்³டா⁴பேத்வா பூ⁴மிம் ஸமம் காராபேத்வா முது³காய பூ⁴மியா ஸிப்பம் த³ஸ்ஸேதி. ஏவமேவ கோ², மஹாராஜ, யோகா³வசரோ ஸீலம் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியந்தி. பா⁴ஸிதம்பேதம், மஹாராஜ, ப⁴க³வதா –

‘‘‘ஸீலே பதிட்டா²ய நரோ ஸபஞ்ஞோ, சித்தம் பஞ்ஞஞ்ச பா⁴வயம்;

ஆதாபீ நிபகோ பி⁴க்கு², ஸோ இமம் விஜடயே ஜட’ந்தி [பஸ்ஸ ஸம். நி. 1.23].

‘‘‘அயம் பதிட்டா² த⁴ரணீவ பாணினம், இத³ஞ்ச மூலம் குஸலாபி⁴வுட்³டி⁴யா;

முக²ஞ்சித³ம் ஸப்³ப³ஜினானுஸாஸனே, யோ ஸீலக்க²ந்தோ⁴ வரபாதிமோக்கி²யோ’’’தி.

‘‘கல்லோஸி, ப⁴ந்தே நாக³ஸேனா’’தி.

ஸீலலக்க²ணபஞ்ஹோ நவமோ.