4. அனந்தகாயபஞ்ஹோ

4. அத² கோ² மிலிந்த³ஸ்ஸ ரஞ்ஞோ ஏதத³ஹோஸி ‘‘பண்டி³தோ கோ² அயம் பி⁴க்கு² படிப³லோ மயா ஸத்³தி⁴ம் ஸல்லபிதும், ப³ஹுகானி ச மே டா²னானி புச்சி²தப்³பா³னி ப⁴விஸ்ஸந்தி, யாவ அபுச்சி²தானி யேவ தானி டா²னானி ப⁴விஸ்ஸந்தி, அத² ஸூரியோ அத்த²ம் க³மிஸ்ஸதி, யம்னூனாஹம் ஸ்வே அந்தேபுரே ஸல்லபேய்ய’’ந்தி. அத² கோ² ராஜா தே³வமந்தியம் ஏதத³வோச ‘‘தேன ஹி, த்வம் தே³வமந்திய, ப⁴த³ந்தஸ்ஸ ஆரோசேய்யாஸி ‘ஸ்வே அந்தேபுரே ரஞ்ஞா ஸத்³தி⁴ம் ஸல்லாபோ ப⁴விஸ்ஸதீ’’’தி. இத³ம் வத்வா மிலிந்தோ³ ராஜா உட்டா²யாஸனா தே²ரம் நாக³ஸேனம் ஆபுச்சி²த்வா ரத²ம் அபி⁴ரூஹித்வா ‘‘நாக³ஸேனோ நாக³ஸேனோ’’தி ஸஜ்ஜா²யம் கரோந்தோ பக்காமி.

அத² கோ² தே³வமந்தியோ ஆயஸ்மந்தம் நாக³ஸேனம் ஏதத³வோச ‘‘ராஜா, ப⁴ந்தே, மிலிந்தோ³ ஏவமாஹ ‘ஸ்வே அந்தேபுரே ரஞ்ஞா ஸத்³தி⁴ம் ஸல்லாபோ ப⁴விஸ்ஸதீ’’’தி. ‘‘ஸுட்டூ²’’தி தே²ரோ அப்³பா⁴னுமோதி³. அத² கோ² தஸ்ஸா ரத்தியா அச்சயேன தே³வமந்தியோ ச அனந்தகாயோ ச மங்குரோ ச ஸப்³ப³தி³ன்னோ ச யேன மிலிந்தோ³ ராஜா தேனுபஸங்கமிம்ஸு, உபஸங்கமித்வா ராஜானம் மிலிந்த³ம் ஏதத³வோசும் ‘‘ஆக³ச்ச²து, மஹாராஜ, ப⁴த³ந்தோ நாக³ஸேனோ’’தி? ‘‘ஆம ஆக³ச்ச²தூ’’தி. ‘‘கித்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’’தி? ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’’தி.

அத² கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி, து³தியம்பி கோ² ராஜா ஆஹ ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’’தி. து³தியம்பி கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி. ததியம்பி கோ² ராஜா ஆஹ ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’’தி. ததியம்பி கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி. ‘‘ஸப்³போ³ பனாயம் ஸக்காரோ படியாதி³தோ, அஹம் ப⁴ணாமி ‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’தி. அயம், ப⁴ணே ஸப்³ப³தி³ன்னோ, அஞ்ஞதா² ப⁴ணதி, கிம் நு மயம் நப்படிப³லா பி⁴க்கூ²னம் போ⁴ஜனம் தா³து’’ந்தி? ஏவம் வுத்தே ஸப்³ப³தி³ன்னோ மங்கு அஹோஸி.

அத² கோ² தே³வமந்தியோ ச அனந்தகாயோ ச மங்குரோ ச யேனாயஸ்மா நாக³ஸேனோ தேனுபஸங்கமிம்ஸு, உபஸங்கமித்வா ஆயஸ்மந்தம் நாக³ஸேனம் ஏதத³வோசும் ‘‘ராஜா, ப⁴ந்தே, மிலிந்தோ³ ஏவமாஹ ‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ம் ஆக³ச்ச²தூ’’’தி. அத² கோ² ஆயஸ்மா நாக³ஸேனோ புப்³ப³ண்ஹஸமயம் நிவாஸேத்வா பத்தசீவரமாதா³ய அஸீதியா பி⁴க்கு²ஸஹஸ்ஸேஹி ஸத்³தி⁴ம் ஸாக³லம் பாவிஸி.

அத² கோ² அனந்தகாயோ ஆயஸ்மந்தம் நாக³ஸேனம் நிஸ்ஸாய க³ச்ச²ந்தோ ஆயஸ்மந்தம் நாக³ஸேனம் ஏதத³வோச ‘‘ப⁴ந்தே நாக³ஸேன, யம் பனேதம் ப்³ரூஸி ‘நாக³ஸேனோ’தி, கதமோ ஏத்த², நாக³ஸேனோ’’தி? தே²ரோ ஆஹ ‘‘கோ பனேத்த² ‘நாக³ஸேனோ’தி மஞ்ஞஸீ’’தி? ‘‘யோ ஸோ, ப⁴ந்தே, அப்³ப⁴ந்தரே வாதோ ஜீவோ பவிஸதி ச நிக்க²மதி ச, ஸோ ‘நாக³ஸேனோ’தி மஞ்ஞாமீ’’தி. ‘‘யதி³ பனேஸோ வாதோ நிக்க²மித்வா நப்பவிஸேய்ய, பவிஸித்வா ந நிக்க²மேய்ய, ஜீவேய்ய நு கோ² ஸோ புரிஸோ’’தி? ‘‘ந ஹி ப⁴ந்தே’’தி. ‘‘யே பனிமே ஸங்க²த⁴மகா ஸங்க²ம் த⁴மேந்தி, தேஸம் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘யே பனிமே வம்ஸத⁴மகா வம்ஸம் த⁴மேந்தி, தேஸம் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘யே பனிமே ஸிங்க³த⁴மகா ஸிங்க³ம் த⁴மேந்தி, தேஸம் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘அத² கிஸ்ஸ பன தேன ந மரந்தீ’’தி. ‘‘நாஹம் படிப³லோ தயா வாதி³னா ஸத்³தி⁴ம் ஸல்லபிதும், ஸாது⁴, ப⁴ந்தே, அத்த²ம் ஜப்பேஹீ’’தி. ‘‘நேஸோ ஜீவோ, அஸ்ஸாஸபஸ்ஸாஸா நாமேதே காயஸங்கா²ரா’’தி தே²ரோ அபி⁴த⁴ம்மகத²ம் கதே²ஸி. அத² அனந்தகாயோ உபாஸகத்தம் படிவேதே³ஸீதி.

அனந்தகாயபஞ்ஹோ சதுத்தோ².