8. வருணவக்³கோ³

71. யோ புப்³பே³ கரணீயானி, பச்சா² ஸோ காதுமிச்ச²தி;

வருணகட்ட² [வரணகட்ட² (ஸீ. பீ.)] ப⁴ஞ்ஜோவ, ஸ பச்சா² மனுதப்பதீதி.

வருணஜாதகம் பட²மம்.

72. அகதஞ்ஞுஸ்ஸ போஸஸ்ஸ, நிச்சம் விவரத³ஸ்ஸினோ;

ஸப்³ப³ம் சே பத²விம் [பட²விம் (ஸீ. ஸ்யா. பீ.)] த³ஜ்ஜா, நேவ நம் அபி⁴ராத⁴யேதி.

ஸீலவஹத்தி²ஜாதகம் து³தியம்.

73. ஸச்சம் கிரேவமாஹம்ஸு, நரா ஏகச்சியா இத⁴;

கட்ட²ம் நிப்லவிதம் [விப்லாவிதம் (ஸீ. பீ.)] ஸேய்யோ, ந த்வேவேகச்சியோ நரோதி.

ஸச்சம்கிரஜாதகம் ததியம்.

74. ஸாதூ⁴ ஸம்ப³ஹுலா ஞாதீ, அபி ருக்கா² அரஞ்ஞஜா;

வாதோ வஹதி ஏகட்ட²ம், ப்³ரஹந்தம்பி வனப்பதிந்தி.

ருக்க²த⁴ம்மஜாதகம் சதுத்த²ம்.

75. அபி⁴த்த²னய பஜ்ஜுன்ன, நிதி⁴ம் காகஸ்ஸ நாஸய;

காகம் ஸோகாய ரந்தே⁴ஹி, மஞ்ச ஸோகா பமோசயாதி.

மச்ச²ஜாதகம் பஞ்சமம்.

76. அஸங்கியோம்ஹி கா³மம்ஹி, அரஞ்ஞே நத்தி² மே ப⁴யம்;

உஜும் மக்³க³ம் ஸமாரூள்ஹோ, மேத்தாய கருணாய சாதி.

அஸங்கியஜாதகம் ச²ட்ட²ம்.

77. உஸபா⁴ ருக்கா² கா³வியோ க³வா ச, அஸ்ஸோ கம்ஸோ ஸிங்கா³லீ [ஸிகா³ஸீ (ஸீ. ஸ்யா. பீ.)] ச கும்போ⁴;

போக்க²ரணீ ச அபாகசந்த³னம், லாபூ³னி ஸீத³ந்தி ஸிலா ப்லவந்தி.

மண்டூ³கியோ கண்ஹஸப்பே கி³லந்தி, காகம் ஸுபண்ணா பரிவாரயந்தி;

தஸா வகா ஏளகானம் ப⁴யாஹி, விபரியாஸோ [விபரியாயோ (ஸ்யா. க.)] வத்ததி நயித⁴ மத்தீ²தி.

மஹாஸுபினஜாதகம் ஸத்தமம்.

78. உபோ⁴ க²ஞ்ஜா உபோ⁴ குணீ, உபோ⁴ விஸமசக்கு²கா [சக்கு²லா (ஸீ. பீ.)];

உபி⁴ன்னம் பிளகா [பீளகா (ஸ்யா.)] ஜாதா, நாஹம் பஸ்ஸாமி இல்லிஸந்தி.

இல்லிஸஜாதகம் அட்ட²மம்.

79. யதோ விலுத்தா ச ஹதா ச கா³வோ, த³ட்³டா⁴னி கே³ஹானி ஜனோ ச நீதோ;

அதா²க³மா புத்தஹதாய புத்தோ, க²ரஸ்ஸரம் டி³ண்டி³மம் [தே³ண்டி³மம் (ஸீ. ஸ்யா. பீ.), டி³ந்தி³மம் (க.)] வாத³யந்தோதி.

க²ரஸ்ஸரஜாதகம் நவமம்.

80. யம் தே பவிகத்தி²தம் புரே, அத² தே பூதிஸரா ஸஜந்தி பச்சா²;

உப⁴யம் ந ஸமேதி பீ⁴மஸேன, யுத்³த⁴கதா² ச இத³ஞ்ச தே விஹஞ்ஞந்தி.

பீ⁴மஸேனஜாதகம் த³ஸமம்.

வருணவக்³கோ³ [வரணவக்³கோ³ (ஸீ. பீ.)] அட்ட²மோ.

தஸ்ஸுத்³தா³னம் –

வருணா அகதஞ்ஞூவரே து ஸச்சவரம், ஸவனப்பதினா ச அபி⁴த்த²னய;

கருணாய ஸிலாப்லவ இல்லிஸதோ, புன டி³ண்டி³மபூதிஸரேன த³ஸாதி.