9. அபாயிம்ஹவக்³கோ³

81. அபாயிம்ஹ அனச்சிம்ஹ, அகா³யிம்ஹ ருதி³ம்ஹ ச;

விஸஞ்ஞிகரணிம் பித்வா [பீத்வா (ஸீ. ஸ்யா. பீ.)], தி³ட்டா² நாஹும்ஹ வானராதி.

ஸுராபானஜாதகம் பட²மம்.

82. அதிக்கம்ம ரமணகம், ஸதா³மத்தஞ்ச தூ³ப⁴கம்;

ஸ்வாஸி பாஸாணமாஸீனோ, யஸ்மா ஜீவம் ந மோக்க²ஸீதி.

மித்தவிந்த³கஜாதகம் து³தியம்.

83. மித்தோ ஹவே ஸத்தபதே³ன ஹோதி, ஸஹாயோ பன த்³வாத³ஸகேன ஹோதி;

மாஸட்³ட⁴மாஸேன ச ஞாதி ஹோதி, ததுத்தரிம் அத்தஸமோபி ஹோதி;

ஸோஹம் கத²ம் அத்தஸுக²ஸ்ஸ ஹேது, சிரஸந்து²தம் [சிரஸந்த⁴வம் (க.), சிரஸத்து²னம் (பீ.)] காளகண்ணிம் ஜஹேய்யந்தி.

காலகண்ணிஜாதகம் ததியம்.

84. ஆரோக்³யமிச்சே² பரமஞ்ச லாப⁴ம், ஸீலஞ்ச வுத்³தா⁴னுமதம் ஸுதஞ்ச;

த⁴ம்மானுவத்தீ ச அலீனதா ச, அத்த²ஸ்ஸ த்³வாரா பமுகா² ச²ளேதேதி.

அத்த²ஸ்ஸத்³வாரஜாதகம் சதுத்த²ம்.

85. ஆயதிம் தோ³ஸம் நாஞ்ஞாய, யோ காமே படிஸேவதி;

விபாகந்தே ஹனந்தி நம், கிம்பக்கமிவ ப⁴க்கி²தந்தி.

கிம்பக்கஜாதகம் பஞ்சமம்.

86. ஸீலம் கிரேவ கல்யாணம், ஸீலம் லோகே அனுத்தரம்;

பஸ்ஸ கோ⁴ரவிஸோ நாகோ³, ஸீலவாதி ந ஹஞ்ஞதீதி.

ஸீலவீமம்ஸகஜாதகம் ச²ட்ட²ம்.

87. யஸ்ஸ மங்க³லா ஸமூஹதாஸே [ஸமூஹதா (ஸீ. ஸ்யா. பீ. ஸு. நி. 362], உப்பாதா [உப்பாதா³ (பீ.)] ஸுபினா ச லக்க²ணா ச;

ஸோ [ஸ (ஸீ. பீ. க.)] மங்க³லதோ³ஸவீதிவத்தோ, யுக³யோகா³தி⁴க³தோ ந ஜாதுமேதீதி.

மங்க³லஜாதகம் ஸத்தமம்.

88. கல்யாணிமேவ முஞ்சேய்ய, ந ஹி முஞ்சேய்ய பாபிகம்;

மோக்கோ² கல்யாணியா ஸாது⁴, முத்வா தப்பதி பாபிகந்தி.

ஸாரம்ப⁴ஜாதகம் அட்ட²மம்.

89. வாசாவ கிர தே ஆஸி, ஸண்ஹா ஸகி²லபா⁴ணினோ;

திணமத்தே அஸஜ்ஜித்தோ², நோ ச நிக்க²ஸதம் ஹரந்தி.

குஹகஜாதகம் நவமம்.

90. யோ புப்³பே³ கதகல்யாணோ, கதத்தோ² நாவபு³ஜ்ஜ²தி;

பச்சா² கிச்சே ஸமுப்பன்னே, கத்தாரம் நாதி⁴க³ச்ச²தீதி.

அகதஞ்ஞுஜாதகம் த³ஸமம்.

அபாயிம்ஹவக்³கோ³ நவமோ.

தஸ்ஸுத்³தா³னம் –

அபாயிம்ஹ ச தூ³ப⁴கம் ஸத்தபத³ம், ச²ளத்³வர ச ஆயதினா ச புன;

அஹிஸீலவ மங்க³லி பாபிகஸ்ஸா, ஸதம்னிக்க² கதத்த²வரேன த³ஸாதி.