8. அந்த⁴கரணஸுத்தம்

87. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘தயோமே, பி⁴க்க²வே, அகுஸலவிதக்கா அந்த⁴கரணா அசக்கு²கரணா அஞ்ஞாணகரணா பஞ்ஞானிரோதி⁴கா விகா⁴தபக்கி²கா அனிப்³பா³னஸம்வத்தனிகா. கதமே தயோ? காமவிதக்கோ, பி⁴க்க²வே, அந்த⁴கரணோ அசக்கு²கரணோ அஞ்ஞாணகரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோ. ப்³யாபாத³விதக்கோ, பி⁴க்க²வே, அந்த⁴கரணோ அசக்கு²கரணோ அஞ்ஞாணகரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோ. விஹிம்ஸாவிதக்கோ, பி⁴க்க²வே, அந்த⁴கரணோ அசக்கு²கரணோ அஞ்ஞாணகரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோ. இமே கோ², பி⁴க்க²வே, தயோ அகுஸலவிதக்கா அந்த⁴கரணா அசக்கு²கரணா அஞ்ஞாணகரணா பஞ்ஞானிரோதி⁴கா விகா⁴தபக்கி²கா அனிப்³பா³னஸம்வத்தனிகா.

‘‘தயோமே, பி⁴க்க²வே, குஸலவிதக்கா அனந்த⁴கரணா சக்கு²கரணா ஞாணகரணா பஞ்ஞாவுத்³தி⁴கா அவிகா⁴தபக்கி²கா நிப்³பா³னஸம்வத்தனிகா. கதமே தயோ? நேக்க²ம்மவிதக்கோ, பி⁴க்க²வே, அனந்த⁴கரணோ சக்கு²கரணோ ஞாணகரணோ பஞ்ஞாவுத்³தி⁴கோ அவிகா⁴தபக்கி²கோ நிப்³பா³னஸம்வத்தனிகோ. அப்³யாபாத³விதக்கோ, பி⁴க்க²வே, அனந்த⁴கரணோ சக்கு²கரணோ ஞாணகரணோ பஞ்ஞாவுத்³தி⁴கோ அவிகா⁴தபக்கி²கோ நிப்³பா³னஸம்வத்தனிகோ. அவிஹிம்ஸாவிதக்கோ, பி⁴க்க²வே, அனந்த⁴கரணோ சக்கு²கரணோ ஞாணகரணோ பஞ்ஞாவுத்³தி⁴கோ அவிகா⁴தபக்கி²கோ நிப்³பா³னஸம்வத்தனிகோ. இமே கோ², பி⁴க்க²வே, தயோ குஸலவிதக்கா அனந்த⁴கரணா சக்கு²கரணா ஞாணகரணா பஞ்ஞாவுத்³தி⁴கா அவிகா⁴தபக்கி²கா நிப்³பா³னஸம்வத்தனிகா’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘தயோ விதக்கே குஸலே விதக்கயே, தயோ பன அகுஸலே நிராகரே;

ஸ வே விதக்கானி விசாரிதானி, ஸமேதி வுட்டீ²வ ரஜம் ஸமூஹதம்;

ஸ வே விதக்கூபஸமேன சேதஸா, இதே⁴வ ஸோ ஸந்திபத³ம் ஸமஜ்ஜ²கா³’’தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. அட்ட²மம்.