5. புத்தஸுத்தம்

74. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘தயோமே, பி⁴க்க²வே, புத்தா ஸந்தோ ஸம்விஜ்ஜமானா லோகஸ்மிம். கதமே தயோ? அதிஜாதோ, அனுஜாதோ, அவஜாதோதி.

‘‘கத²ஞ்ச, பி⁴க்க²வே, புத்தோ அதிஜாதோ ஹோதி? இத⁴, பி⁴க்க²வே, புத்தஸ்ஸ மாதாபிதரோ ஹோந்தி ந பு³த்³த⁴ம் ஸரணம் க³தா, ந த⁴ம்மம் ஸரணம் க³தா, ந ஸங்க⁴ம் ஸரணம் க³தா; பாணாதிபாதா அப்படிவிரதா, அதி³ன்னாதா³னா அப்படிவிரதா, காமேஸுமிச்சா²சாரா அப்படிவிரதா, முஸாவாதா³ அப்படிவிரதா, ஸுராமேரயமஜ்ஜபமாத³ட்டா²னா அப்படிவிரதா, து³ஸ்ஸீலா பாபத⁴ம்மா. புத்தோ ச நேஸம் ஹோதி பு³த்³த⁴ம் ஸரணம் க³தோ, த⁴ம்மம் ஸரணம் க³தோ, ஸங்க⁴ம் ஸரணம் க³தோ; பாணாதிபாதா படிவிரதோ, அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ, ஸுராமேரயமஜ்ஜபமாத³ட்டா²னா படிவிரதோ, ஸீலவா கல்யாணத⁴ம்மோ. ஏவம் கோ², பி⁴க்க²வே, புத்தோ அதிஜாதோ ஹோதி.

‘‘கத²ஞ்ச, பி⁴க்க²வே, புத்தோ அனுஜாதோ ஹோதி? இத⁴, பி⁴க்க²வே, புத்தஸ்ஸ மாதாபிதரோ ஹோந்தி பு³த்³த⁴ம் ஸரணம் க³தா, த⁴ம்மம் ஸரணம் க³தா, ஸங்க⁴ம் ஸரணம் க³தா; பாணாதிபாதா படிவிரதா, அதி³ன்னாதா³னா படிவிரதா, காமேஸுமிச்சா²சாரா படிவிரதா, முஸாவாதா³ படிவிரதா, ஸுராமேரயமஜ்ஜபமாத³ட்டா²னா படிவிரதா, ஸீலவந்தோ கல்யாணத⁴ம்மா. புத்தோபி நேஸம் ஹோதி பு³த்³த⁴ம் ஸரணம் க³தோ, த⁴ம்மம் ஸரணம் க³தோ, ஸங்க⁴ம் ஸரணம் க³தோ; பாணாதிபாதா படிவிரதோ, அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ, ஸுராமேரயமஜ்ஜபமாத³ட்டா²னா படிவிரதோ, ஸீலவா கல்யாணத⁴ம்மோ. ஏவம் கோ², பி⁴க்க²வே, புத்தோ அனுஜாதோ ஹோதி.

‘‘கத²ஞ்ச, பி⁴க்க²வே, புத்தோ அவஜாதோ ஹோதி? இத⁴, பி⁴க்க²வே, புத்தஸ்ஸ மாதாபிதரோ ஹோந்தி பு³த்³த⁴ம் ஸரணம் க³தா, த⁴ம்மம் ஸரணம் க³தா, ஸங்க⁴ம் ஸரணம் க³தா; பாணாதிபாதா படிவிரதா, அதி³ன்னாதா³னா படிவிரதா, காமேஸுமிச்சா²சாரா படிவிரதா, முஸாவாதா³ படிவிரதா, ஸுராமேரயமஜ்ஜபமாத³ட்டா²னா படிவிரதா, ஸீலவந்தோ கல்யாணத⁴ம்மா. புத்தோ ச நேஸம் ஹோதி ந பு³த்³த⁴ம் ஸரணம் க³தோ, ந த⁴ம்மம் ஸரணம் க³தோ, ந ஸங்க⁴ம் ஸரணம் க³தோ; பாணாதிபாதா அப்படிவிரதோ, அதி³ன்னாதா³னா அப்படிவிரதோ, காமேஸுமிச்சா²சாரா அப்படிவிரதோ, முஸாவாதா³ அப்படிவிரதோ, ஸுராமேரயமஜ்ஜபமாத³ட்டா²னா அப்படிவிரதோ, து³ஸ்ஸீலோ பாபத⁴ம்மோ. ஏவம் கோ², பி⁴க்க²வே, புத்தோ அவஜாதோ ஹோதி. இமே கோ², பி⁴க்க²வே, தயோ புத்தா ஸந்தோ ஸம்விஜ்ஜமானா லோகஸ்மி’’ந்தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘அதிஜாதம் அனுஜாதம், புத்தமிச்ச²ந்தி பண்டி³தா;

அவஜாதம் ந இச்ச²ந்தி, யோ ஹோதி குலக³ந்த⁴னோ.

‘‘ஏதே கோ² புத்தா லோகஸ்மிம், யே ப⁴வந்தி உபாஸகா;

ஸத்³தா⁴ ஸீலேன ஸம்பன்னா, வத³ஞ்ஞூ வீதமச்ச²ரா;

சந்தோ³ அப்³ப⁴க⁴னா முத்தோ, பரிஸாஸு விரோசரே’’தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. பஞ்சமம்.