7. மேத்தாபா⁴வனாஸுத்தம்

27. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘யானி கானிசி, பி⁴க்க²வே, ஓபதி⁴கானி புஞ்ஞகிரியவத்தூ²னி ஸப்³பா³னி தானி மேத்தாய சேதோவிமுத்தியா கலம் நாக்³க⁴ந்தி ஸோளஸிம். மேத்தாயேவ தானி சேதோவிமுத்தி அதி⁴க்³க³ஹேத்வா பா⁴ஸதே ச தபதே ச விரோசதி ச.

‘‘ஸேய்யதா²பி, பி⁴க்க²வே, யா காசி தாரகரூபானம் பபா⁴ ஸப்³பா³ தா சந்தி³யா பபா⁴ய கலம் நாக்³க⁴ந்தி ஸோளஸிம், சந்த³பபா⁴யேவ தா அதி⁴க்³க³ஹேத்வா பா⁴ஸதே ச தபதே ச விரோசதி ச; ஏவமேவ கோ², பி⁴க்க²வே, யானி கானிசி ஓபதி⁴கானி புஞ்ஞகிரியவத்தூ²னி ஸப்³பா³னி தானி மேத்தாய சேதோவிமுத்தியா கலம் நாக்³க⁴ந்தி ஸோளஸிம், மேத்தாயேவ தானி சேதோவிமுத்தி அதி⁴க்³க³ஹேத்வா பா⁴ஸதே ச தபதே ச விரோசதி ச.

‘‘ஸேய்யதா²பி, பி⁴க்க²வே, வஸ்ஸானம் பச்சி²மே மாஸே ஸரத³ஸமயே வித்³தே⁴ விக³தவலாஹகே தே³வே [நபே⁴ (ஸீ.)] ஆதி³ச்சோ நப⁴ம் அப்³பு⁴ஸ்ஸக்கமானோ [அப்³பு⁴க்³க³மமானோ (க. அட்ட².)] ஸப்³ப³ம் ஆகாஸக³தம் [ஆகாஸம் (ஸ்யா.)] தமக³தம் அபி⁴விஹச்ச [அபி⁴ஹச்ச (ஸ்யா.)] பா⁴ஸதே ச தபதே ச விரோசதி ச; ஏவமேவ கோ², பி⁴க்க²வே, யானி கானிசி ஓபதி⁴கானி புஞ்ஞகிரியவத்தூ²னி ஸப்³பா³னி தானி மேத்தாய சேதோவிமுத்தியா கலம் நாக்³க⁴ந்தி ஸோளஸிம், மேத்தாயேவ தானி சேதோவிமுத்தி அதி⁴க்³க³ஹேத்வா பா⁴ஸதே ச தபதே ச விரோசதி ச.

‘‘ஸேய்யதா²பி, பி⁴க்க²வே, ரத்தியா பச்சூஸஸமயம் ஓஸதி⁴தாரகா பா⁴ஸதே ச தபதே ச விரோசதி ச; ஏவமேவ கோ², பி⁴க்க²வே, யானி கானிசி ஓபதி⁴கானி புஞ்ஞகிரியவத்தூ²னி ஸப்³பா³னி தானி மேத்தாய சேதோவிமுத்தியா கலம் நாக்³க⁴ந்தி ஸோளஸிம், மேத்தாயேவ தானி சேதோவிமுத்தி அதி⁴க்³க³ஹேத்வா பா⁴ஸதே ச தபதே ச விரோசதி சா’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘யோ ச மேத்தம் பா⁴வயதி, அப்பமாணம் படிஸ்ஸதோ;

தனூ [தனு (ஸீ.)] ஸம்யோஜனா ஹோந்தி, பஸ்ஸதோ உபதி⁴க்க²யம்.

‘‘ஏகம்பி சே பாணமது³ட்ட²சித்தோ, மேத்தாயதி குஸலோ தேன ஹோதி;

ஸப்³பே³ ச பாணே மனஸானுகம்பம், பஹூதமரியோ பகரோதி புஞ்ஞம்.

‘‘யே [யோ (ஸீ.)] ஸத்தஸண்ட³ம் பத²விம் விஜித்வா, ராஜிஸயோ [ராஜீஸயோ (ஸீ.)] யஜமானானுபரியகா³;

அஸ்ஸமேத⁴ம் புரிஸமேத⁴ம், ஸம்மாபாஸம் வாஜபேய்யம் நிரக்³க³ளம்.

‘‘மேத்தஸ்ஸ சித்தஸ்ஸ ஸுபா⁴விதஸ்ஸ, கலம்பி தே நானுப⁴வந்தி ஸோளஸிம்;

சந்த³ப்பபா⁴ தாரக³ணாவ ஸப்³பே³.

‘‘யோ ந ஹந்தி ந கா⁴தேதி, ந ஜினாதி ந ஜாபயே;

மேத்தம்ஸோ ஸப்³ப³பூ⁴தேஸு, வேரம் தஸ்ஸ ந கேனசீ’’தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. ஸத்தமம்.

ததியோ வக்³கோ³ நிட்டி²தோ.

தஸ்ஸுத்³தா³னம் –

சித்தம் மேத்தம் [ஜா²யீ (ஸீ. ஸ்யா.), ஜா²யி (பீ. க.)] உபோ⁴ அத்தே², புஞ்ஜம் வேபுல்லபப்³ப³தம்;

ஸம்பஜானமுஸாவாதோ³, தா³னஞ்ச மேத்தபா⁴வனா [மேத்தபா⁴வஞ்ச (ஸீ. ஸ்யா. பீ.), மேத்தவாசஞ்ச (க.)].

ஸத்திமானி ச [ஸத்திமானித⁴ (ஸீ. க.)] ஸுத்தானி, புரிமானி ச வீஸதி;

ஏகத⁴ம்மேஸு ஸுத்தந்தா, ஸத்தவீஸதிஸங்க³ஹாதி.

ஏககனிபாதோ நிட்டி²தோ.