10. ஸஸபண்டி³தசரியா

125. ‘‘புனாபரம் யதா³ ஹோமி, ஸஸகோ பவனசாரகோ;

திணபண்ணஸாகப²லப⁴க்கோ², பரஹேட²னவிவஜ்ஜிதோ.

126. ‘‘மக்கடோ ச ஸிங்கா³லோ ச, ஸுத்தபோதோ சஹம் ததா³;

வஸாம ஏகஸாமந்தா, ஸாயம் பாதோ ச தி³ஸ்ஸரே [ஸாயம் பாதோ பதி³ஸ்ஸரே (க.)].

127. ‘‘அஹம் தே அனுஸாஸாமி, கிரியே கல்யாணபாபகே;

‘பாபானி பரிவஜ்ஜேத², கல்யாணே அபி⁴னிவிஸ்ஸத²’.

128. ‘‘உபோஸத²ம்ஹி தி³வஸே, சந்த³ம் தி³ஸ்வான பூரிதம்;

ஏதேஸம் தத்த² ஆசிக்கி²ம், தி³வஸோ அஜ்ஜுபோஸதோ².

129. ‘‘தா³னானி படியாதே³த², த³க்கி²ணேய்யஸ்ஸ தா³தவே;

த³த்வா தா³னம் த³க்கி²ணேய்யே, உபவஸ்ஸது²போஸத²ம்.

130. ‘‘தே மே ஸாதூ⁴தி வத்வான, யதா²ஸத்தி யதா²ப³லம்;

தா³னானி படியாதே³த்வா, த³க்கி²ணேய்யம் க³வேஸிஸும் [க³வேஸய்யும் (க.)].

131. ‘‘அஹம் நிஸஜ்ஜ சிந்தேஸிம், தா³னம் த³க்கி²ணனுச்ச²வம்;

‘யதி³ஹம் லபே⁴ த³க்கி²ணேய்யம், கிம் மே தா³னம் ப⁴விஸ்ஸதி.

132. ‘‘‘ந மே அத்தி² திலா முக்³கா³, மாஸா வா தண்டு³லா க⁴தம்;

அஹம் திணேன யாபேமி, ந ஸக்கா திண தா³தவே.

133. ‘‘‘யதி³ கோசி ஏதி த³க்கி²ணேய்யோ, பி⁴க்கா²ய மம ஸந்திகே;

த³ஜ்ஜாஹம் ஸகமத்தானம், ந ஸோ துச்சோ² க³மிஸ்ஸதி’.

134. ‘‘மம ஸங்கப்பமஞ்ஞாய, ஸக்கோ ப்³ராஹ்மணவண்ணினா;

ஆஸயம் மே உபாக³ச்சி², தா³னவீமம்ஸனாய மே.

135. ‘‘தமஹம் தி³ஸ்வான ஸந்துட்டோ², இத³ம் வசனமப்³ரவிம்;

‘ஸாது⁴ கோ²ஸி அனுப்பத்தோ, கா⁴ஸஹேது மமந்திகே.

136. ‘‘‘அதி³ன்னபுப்³ப³ம் தா³னவரம், அஜ்ஜ த³ஸ்ஸாமி தே அஹம்;

துவம் ஸீலகு³ணூபேதோ, அயுத்தம் தே பரஹேட²னம்.

137. ‘‘‘ஏஹி அக்³கி³ம் பதீ³பேஹி, நானாகட்டே² ஸமானய;

அஹம் பசிஸ்ஸமத்தானம், பக்கம் த்வம் ப⁴க்க²யிஸ்ஸஸி’.

138. ‘‘‘ஸாதூ⁴’தி ஸோ ஹட்ட²மனோ, நானாகட்டே² ஸமானயி;

மஹந்தம் அகாஸி சிதகம், கத்வா அங்கா³ரக³ப்³ப⁴கம்.

139. ‘‘அக்³கி³ம் தத்த² பதீ³பேஸி, யதா² ஸோ கி²ப்பம் மஹா ப⁴வே;

போ²டேத்வா ரஜக³தே க³த்தே, ஏகமந்தம் உபாவிஸிம்.

140. ‘‘யதா³ மஹாகட்ட²புஞ்ஜோ, ஆதி³த்தோ த⁴மத⁴மாயதி [து⁴மது⁴மாயதி (ஸீ.), த⁴மமாயதி (க.)];

தது³ப்பதித்வா பபதிம், மஜ்ஜே² ஜாலஸிக²ந்தரே.

141. ‘‘யதா² ஸீதோத³கம் நாம, பவிட்ட²ம் யஸ்ஸ கஸ்ஸசி;

ஸமேதி த³ரத²பரிளாஹம், அஸ்ஸாத³ம் தே³தி பீதி ச.

142. ‘‘ததே²வ ஜலிதம் அக்³கி³ம், பவிட்ட²ஸ்ஸ மமம் ததா³;

ஸப்³ப³ம் ஸமேதி த³ரத²ம், யதா² ஸீதோத³கம் விய.

143. ‘‘ச²விம் சம்மம் மம்ஸம் ந்ஹாரும், அட்டி²ம் ஹத³யப³ந்த⁴னம்;

கேவலம் ஸகலம் காயம், ப்³ராஹ்மணஸ்ஸ அதா³ஸஹ’’ந்தி.

ஸஸபண்டி³தசரியம் த³ஸமம்.

அகித்திவக்³கோ³ பட²மோ.

தஸ்ஸுத்³தா³னம் –

அகித்திப்³ராஹ்மணோ ஸங்கோ², குருராஜா த⁴னஞ்சயோ;

மஹாஸுத³ஸ்ஸனோ ராஜா, மஹாகோ³விந்த³ப்³ராஹ்மணோ.

நிமி சந்த³குமாரோ ச, ஸிவி வேஸ்ஸந்தரோ ஸஸோ;

அஹமேவ ததா³ ஆஸிம், யோ தே தா³னவரே அதா³.

ஏதே தா³னபரிக்கா²ரா, ஏதே தா³னஸ்ஸ பாரமீ;

ஜீவிதம் யாசகே த³த்வா, இமம் பாரமி பூரயிம்.

பி⁴க்கா²ய உபக³தம் தி³ஸ்வா, ஸகத்தானம் பரிச்சஜிம்;

தா³னேன மே ஸமோ நத்தி², ஏஸா மே தா³னபாரமீதி.

தா³னபாரமினித்³தே³ஸோ நிட்டி²தோ.