2. ஹத்தி²னாக³வக்³கோ³

1. மாதுபோஸகசரியா

1. ‘‘யதா³ அஹோஸிம் பவனே, குஞ்ஜரோ மாதுபோஸகோ;

ந ததா³ அத்தி² மஹியா, கு³ணேன மம ஸாதி³ஸோ.

2. ‘‘பவனே தி³ஸ்வா வனசரோ, ரஞ்ஞோ மம் படிவேத³யி;

‘தவானுச்ச²வோ மஹாராஜ, க³ஜோ வஸதி கானனே.

3. ‘‘‘ந தஸ்ஸ பரிக்கா²யத்தோ², நபி ஆளககாஸுயா;

ஸஹ க³ஹிதே [ஸமம் க³ஹிதே (ஸீ.)] ஸோண்டா³ய, ஸயமேவ இதே⁴ஹி’தி.

4. ‘‘தஸ்ஸ தம் வசனம் ஸுத்வா, ராஜாபி துட்ட²மானஸோ;

பேஸேஸி ஹத்தி²த³மகம், சே²காசரியம் ஸுஸிக்கி²தம்.

5. ‘‘க³ந்த்வா ஸோ ஹத்தி²த³மகோ, அத்³த³ஸ பது³மஸ்ஸரே;

பி⁴ஸமுளாலம் [பி⁴ஸமூலம் (க.)] உத்³த⁴ரந்தம், யாபனத்தா²ய மாதுயா.

6. ‘‘விஞ்ஞாய மே ஸீலகு³ணம், லக்க²ணம் உபதா⁴ரயி;

‘ஏஹி புத்தா’தி பத்வான, மம ஸோண்டா³ய அக்³க³ஹி.

7. ‘‘யம் மே ததா³ பாகதிகம், ஸரீரானுக³தம் ப³லம்;

அஜ்ஜ நாக³ஸஹஸ்ஸானம், ப³லேன ஸமஸாதி³ஸம்.

8. ‘‘யதி³ஹம் தேஸம் பகுப்பேய்யம், உபேதானம் க³ஹணாய மம்;

படிப³லோ ப⁴வே தேஸம், யாவ ரஜ்ஜம்பி மானுஸம்.

9. ‘‘அபி சாஹம் ஸீலரக்கா²ய, ஸீலபாரமிபூரியா;

ந கரோமி சித்தே அஞ்ஞத²த்தம், பக்கி²பந்தம் மமாளகே.

10. ‘‘யதி³ தே மம் தத்த² கோட்டேய்யும், ப²ரஸூஹி தோமரேஹி ச;

நேவ தேஸம் பகுப்பேய்யம், ஸீலக²ண்ட³ப⁴யா மமா’’தி.

மாதுபோஸகசரியம் பட²மம்.

2. பூ⁴ரித³த்தசரியா

11. ‘‘புனாபரம் யதா³ ஹோமி, பூ⁴ரித³த்தோ மஹித்³தி⁴கோ;

விரூபக்கே²ன மஹாரஞ்ஞா, தே³வலோகமக³ஞ்ச²ஹம்.

12. ‘‘தத்த² பஸ்ஸித்வாஹம் தே³வே, ஏகந்தம் ஸுக²ஸமப்பிதே;

தம் ஸக்³க³க³மனத்தா²ய, ஸீலப்³ப³தம் ஸமாதி³யிம்.

13. ‘‘ஸரீரகிச்சம் கத்வான, பு⁴த்வா யாபனமத்தகம்;

சதுரோ அங்கே³ அதி⁴ட்டா²ய, ஸேமி வம்மிகமுத்³த⁴னி.

14. ‘‘ச²வியா சம்மேன மம்ஸேன, நஹாருஅட்டி²கேஹி வா;

யஸ்ஸ ஏதேன கரணீயம், தி³ன்னம்யேவ ஹராது ஸோ.

15. ‘‘ஸம்ஸிதோ அகதஞ்ஞுனா, ஆலம்பாயனோ [ஆலம்ப³ணோ (ஸீ.)] மமக்³க³ஹி;

பேளாய பக்கி²பித்வான, கீளேதி மம் தஹிம் தஹிம்.

16. ‘‘பேளாய பக்கி²பந்தேபி, ஸம்மத்³த³ந்தேபி பாணினா;

ஆலம்பாயனே [ஆலம்ப³ணே (ஸீ.)] ந குப்பாமி, ஸீலக²ண்ட³ப⁴யா மம.

17. ‘‘ஸகஜீவிதபரிச்சாகோ³, திணதோ லஹுகோ மம;

ஸீலவீதிக்கமோ மய்ஹம், பத²வீஉப்பதனம் விய.

18. ‘‘நிரந்தரம் ஜாதிஸதம், சஜேய்யம் மம ஜீவிதம்;

நேவ ஸீலம் பபி⁴ந்தே³ய்யம், சதுத்³தீ³பான ஹேதுபி.

19. ‘‘அபி சாஹம் ஸீலரக்கா²ய, ஸீலபாரமிபூரியா;

ந கரோமி சித்தே அஞ்ஞத²த்தம், பக்கி²பந்தம்பி பேளகே’’தி.

பூ⁴ரித³த்தசரியம் து³தியம்.

3. சம்பேய்யனாக³சரியா

20. ‘‘புனாபரம் யதா³ ஹோமி, சம்பேய்யகோ மஹித்³தி⁴கோ;

ததா³பி த⁴ம்மிகோ ஆஸிம், ஸீலப்³ப³தஸமப்பிதோ.

21. ‘‘ததா³பி மம் த⁴ம்மசாரிம், உபவுத்த²ம் உபோஸத²ம்;

அஹிதுண்டி³கோ க³ஹேத்வான, ராஜத்³வாரம்ஹி கீளதி.

22. ‘‘யம் யம் ஸோ வண்ணம் சிந்தயி, நீலம்வ பீதலோஹிதம்;

தஸ்ஸ சித்தானுவத்தந்தோ, ஹோமி சிந்திதஸன்னிபோ⁴.

23. ‘‘த²லம் கரேய்யமுத³கம், உத³கம்பி த²லம் கரே;

யதி³ஹம் தஸ்ஸ பகுப்பேய்யம், க²ணேன சா²ரிகம் கரே.

24. ‘‘யதி³ சித்தவஸீ ஹேஸ்ஸம், பரிஹாயிஸ்ஸாமி ஸீலதோ;

ஸீலேன பரிஹீனஸ்ஸ, உத்தமத்தோ² ந ஸிஜ்ஜ²தி.

25. ‘‘காமம் பி⁴ஜ்ஜதுயம் காயோ, இதே⁴வ விகிரீயது;

நேவ ஸீலம் பபி⁴ந்தே³ய்யம், விகிரந்தே பு⁴ஸம் வியா’’தி.

சம்பேய்யனாக³சரியம் ததியம்.

4. சூளபோ³தி⁴சரியா

26. ‘‘புனாபரம் யதா³ ஹோமி, சூளபோ³தி⁴ ஸுஸீலவா;

ப⁴வம் தி³ஸ்வான ப⁴யதோ, நேக்க²ம்மம் அபி⁴னிக்க²மிம்.

27. ‘‘யா மே து³தியிகா ஆஸி, ப்³ராஹ்மணீ கனகஸன்னிபா⁴;

ஸாபி வட்டே அனபேக்கா², நேக்க²ம்மம் அபி⁴னிக்க²மி.

28. ‘‘நிராலயா சி²ன்னப³ந்தூ⁴, அனபேக்கா² குலே க³ணே;

சரந்தா கா³மனிக³மம், பா³ராணஸிமுபாக³மும்.

29. ‘‘தத்த² வஸாம நிபகா, அஸம்ஸட்டா² குலே க³ணே;

நிராகுலே அப்பஸத்³தே³, ராஜுய்யானே வஸாமுபோ⁴.

30. ‘‘உய்யானத³ஸ்ஸனம் க³ந்த்வா, ராஜா அத்³த³ஸ ப்³ராஹ்மணிம்;

உபக³ம்ம மமம் புச்சி², ‘துய்ஹேஸா கா கஸ்ஸ ப⁴ரியா’.

31. ‘‘ஏவம் வுத்தே அஹம் தஸ்ஸ, இத³ம் வசனமப்³ரவிம்;

‘ந மய்ஹம் ப⁴ரியா ஏஸா, ஸஹத⁴ம்மா ஏகஸாஸனீ’.

32. ‘‘திஸ்ஸா [தஸ்ஸா (ஸீ.)] ஸாரத்தக³தி⁴தோ, கா³ஹாபேத்வான சேடகே;

நிப்பீளயந்தோ ப³லஸா, அந்தேபுரம் பவேஸயி.

33. ‘‘ஓத³பத்தகியா மய்ஹம், ஸஹஜா ஏகஸாஸனீ;

ஆகட்³டி⁴த்வா நயந்தியா, கோபோ மே உபபஜ்ஜத².

34. ‘‘ஸஹ கோபே ஸமுப்பன்னே, ஸீலப்³ப³தமனுஸ்ஸரிம்;

தத்தே²வ கோபம் நிக்³க³ண்ஹிம், நாதா³ஸிம் வட்³டி⁴தூபரி.

35. ‘‘யதி³ நம் ப்³ராஹ்மணிம் கோசி, கோட்டேய்ய திண்ஹஸத்தியா;

நேவ ஸீலம் பபி⁴ந்தே³ய்யம், போ³தி⁴யாயேவ காரணா.

36. ‘‘ந மேஸா ப்³ராஹ்மணீ தே³ஸ்ஸா, நபி மே ப³லம் ந விஜ்ஜதி;

ஸப்³ப³ஞ்ஞுதம் பியம் மய்ஹம், தஸ்மா ஸீலானுரக்கி²ஸ’’ந்தி.

சூளபோ³தி⁴சரியம் சதுத்த²ம்.

5. மஹிம்ஸராஜசரியா

37. ‘‘புனாபரம் யதா³ ஹோமி, மஹிம்ஸோ பவனசாரகோ;

பவட்³ட⁴காயோ ப³லவா, மஹந்தோ பீ⁴மத³ஸ்ஸனோ.

38. ‘‘பப்³பா⁴ரே கி³ரிது³க்³கே³ [வனது³க்³கே³ (ஸீ.)] ச, ருக்க²மூலே த³காஸயே;

ஹோதேத்த² டா²னம் மஹிம்ஸானம், கோசி கோசி தஹிம் தஹிம்.

39. ‘‘விசரந்தோ ப்³ரஹாரஞ்ஞே, டா²னம் அத்³த³ஸ ப⁴த்³த³கம்;

தம் டா²னம் உபக³ந்த்வான, திட்டா²மி ச ஸயாமி ச.

40. ‘‘அதே²த்த² கபிமாக³ந்த்வா, பாபோ அனரியோ லஹு;

க²ந்தே⁴ நலாடே ப⁴முகே, முத்தேதி ஓஹனேதிதம்.

41. ‘‘ஸகிம்பி தி³வஸம் து³தியம், ததியம் சதுத்த²ம்பி ச;

தூ³ஸேதி மம் ஸப்³ப³காலம், தேன ஹோமி உபத்³து³தோ.

42. ‘‘மமம் உபத்³து³தம் தி³ஸ்வா, யக்கோ² மம் இத³மப்³ரவி;

‘நாஸேஹேதம் ச²வம் பாபம், ஸிங்கே³ஹி ச கு²ரேஹி ச’.

43. ‘‘ஏவம் வுத்தே ததா³ யக்கே², அஹம் தம் இத³மப்³ரவிம்;

‘கிம் த்வம் மக்கே²ஸி குணபேன, பாபேன அனரியேன மம்.

44. ‘‘‘யதி³ஹம் தஸ்ஸ பகுப்பேய்யம், ததோ ஹீனதரோ ப⁴வே;

ஸீலஞ்ச மே பபி⁴ஜ்ஜேய்ய, விஞ்ஞூ ச க³ரஹேய்யு மம்.

45. ‘‘‘ஹீளிதா ஜீவிதா வாபி, பரிஸுத்³தே⁴ன மதம் வரம்;

க்யாஹம் ஜீவிதஹேதூபி, காஹாமிம் பரஹேட²னம்’.

46. ‘‘மமேவாயம் மஞ்ஞமானோ, அஞ்ஞேபேவம் கரிஸ்ஸதி;

தேவ தஸ்ஸ வதி⁴ஸ்ஸந்தி, ஸா மே முத்தி ப⁴விஸ்ஸதி.

47. ‘‘ஹீனமஜ்ஜி²மஉக்கட்டே², ஸஹந்தோ அவமானிதம்;

ஏவம் லப⁴தி ஸப்பஞ்ஞோ, மனஸா யதா² பத்தி²த’’ந்தி.

மஹிம்ஸராஜசரியம் பஞ்சமம்.

6. ருருராஜசரியா

48. ‘‘புனாபரம் யதா³ ஹோமி, ஸுதத்தகனகஸன்னிபோ⁴;

மிக³ராஜா ருருனாம, பரமஸீலஸமாஹிதோ.

49. ‘‘ரம்மே பதே³ஸே ரமணீயே, விவித்தே அமனுஸ்ஸகே;

தத்த² வாஸம் உபக³ஞ்சி²ம், க³ங்கா³கூலே மனோரமே.

50. ‘‘அத² உபரி க³ங்கா³ய, த⁴னிகேஹி பரிபீளிதோ;

புரிஸோ க³ங்கா³ய பபதி, ‘ஜீவாமி வா மராமி வா’.

51. ‘‘ரத்திந்தி³வம் ஸோ க³ங்கா³ய, வுய்ஹமானோ மஹோத³கே;

ரவந்தோ கருணம் ரவம், மஜ்ஜே² க³ங்கா³ய க³ச்ச²தி.

52. ‘‘தஸ்ஸாஹம் ஸத்³த³ம் ஸுத்வான, கருணம் பரிதே³வதோ;

க³ங்கா³ய தீரே ட²த்வான, அபுச்சி²ம் ‘கோஸி த்வம் நரோ’.

53. ‘‘ஸோ மே புட்டோ² ச ப்³யாகாஸி, அத்தனோ கரணம் ததா³;

‘த⁴னிகேஹி பீ⁴தோ தஸிதோ, பக்க²ந்தோ³ஹம் மஹானதி³ம்’.

54. ‘‘தஸ்ஸ கத்வான காருஞ்ஞம், சஜித்வா மம ஜீவிதம்;

பவிஸித்வா நீஹரிம் தஸ்ஸ, அந்த⁴காரம்ஹி ரத்தியா.

55. ‘‘அஸ்ஸத்த²காலமஞ்ஞாய, தஸ்ஸாஹம் இத³மப்³ரவிம்;

‘ஏகம் தம் வரம் யாசாமி, மா மம் கஸ்ஸசி பாவத³’.

56. ‘‘நக³ரம் க³ந்த்வான ஆசிக்கி², புச்சி²தோ த⁴னஹேதுகோ;

ராஜானம் ஸோ க³ஹேத்வான, உபக³ஞ்சி² மமந்திகம்.

57. ‘‘யாவதா கரணம் ஸப்³ப³ம், ரஞ்ஞோ ஆரோசிதம் மயா;

ராஜா ஸுத்வான வசனம், உஸும் தஸ்ஸ பகப்பயி;

‘இதே⁴வ கா⁴தயிஸ்ஸாமி, மித்தது³ப்³பி⁴ம் [மித்ததூ³பி⁴ம் (ஸீ.)] அனாரியம்’.

58. ‘‘தமஹம் அனுரக்க²ந்தோ, நிம்மினிம் மம அத்தனா;

‘திட்ட²தேஸோ மஹாராஜ, காமகாரோ ப⁴வாமி தே’.

59. ‘‘அனுரக்கி²ம் மம ஸீலம், நாரக்கி²ம் மம ஜீவிதம்;

ஸீலவா ஹி ததா³ ஆஸிம், போ³தி⁴யாயேவ காரணா’’தி.

ருருராஜசரியம் ச²ட்ட²ம்.

7. மாதங்க³சரியா

60. ‘‘புனாபரம் யதா³ ஹோமி, ஜடிலோ உக்³க³தாபனோ;

மாதங்கோ³ நாம நாமேன, ஸீலவா ஸுஸமாஹிதோ.

61. ‘‘அஹஞ்ச ப்³ராஹ்மணோ ஏகோ, க³ங்கா³கூலே வஸாமுபோ⁴;

அஹம் வஸாமி உபரி, ஹேட்டா² வஸதி ப்³ராஹ்மணோ.

62. ‘‘விசரந்தோ அனுகூலம்ஹி, உத்³த⁴ம் மே அஸ்ஸமத்³த³ஸ;

தத்த² மம் பரிபா⁴ஸேத்வா, அபி⁴ஸபி முத்³த⁴பா²லனம்.

63. ‘‘யதி³ஹம் தஸ்ஸ பகுப்பேய்யம், யதி³ ஸீலம் ந கோ³பயே;

ஓலோகேத்வானஹம் தஸ்ஸ, கரேய்யம் சா²ரிகம் விய.

64. ‘‘யம் ஸோ ததா³ மம் அபி⁴ஸபி, குபிதோ து³ட்ட²மானஸோ;

தஸ்ஸேவ மத்த²கே நிபதி, யோகே³ன தம் பமோசயிம்.

65. ‘‘அனுரக்கி²ம் மம ஸீலம், நாரக்கி²ம் மம ஜீவிதம்;

ஸீலவா ஹி ததா³ ஆஸிம், போ³தி⁴யாயேவ காரணா’’தி.

மாதங்க³சரியம் ஸத்தமம்.

8. த⁴ம்மதே³வபுத்தசரியா

66. ‘‘புனாபரம் யதா³ ஹோமி, மஹாபக்கோ² மஹித்³தி⁴கோ;

த⁴ம்மோ நாம மஹாயக்கோ², ஸப்³ப³லோகானுகம்பகோ.

67. ‘‘த³ஸகுஸலகம்மபதே², ஸமாத³பேந்தோ மஹாஜனம்;