10. ஸோண்ணகோந்தரிகத்தே²ரஅபதா³னம்

157. ‘‘மனோபா⁴வனியம் பு³த்³த⁴ம், அத்தத³ந்தம் ஸமாஹிதம்;

இரியமானம் ப்³ரஹ்மபதே², சித்தவூபஸமே ரதம்.

158. ‘‘நித்திண்ணஓக⁴ம் ஸம்பு³த்³த⁴ம், ஜா²யிம் ஜா²னரதம் முனிம்;

உபதித்த²ம் ஸமாபன்னம், இந்தி³வரத³லப்பப⁴ம்.

159. ‘‘அலாபு³னோத³கம் க³ய்ஹ, பு³த்³த⁴ஸேட்ட²ம் உபாக³மிம்;

பு³த்³த⁴ஸ்ஸ பாதே³ தோ⁴வித்வா, அலாபு³கமதா³ஸஹம்.

160. ‘‘ஆணாபேஸி ச ஸம்பு³த்³தோ⁴, பது³முத்தரனாமகோ;

‘இமினா த³கமாஹத்வா, பாத³மூலே ட²பேஹி மே’.

161. ‘‘ஸாதூ⁴திஹம் படிஸ்ஸுத்வா, ஸத்து²கா³ரவதாய ச;

த³கம் அலாபு³னாஹத்வா, பு³த்³த⁴ஸேட்ட²ம் உபாக³மிம்.

162. ‘‘அனுமோதி³ மஹாவீரோ, சித்தம் நிப்³பா³பயம் மம;

‘இமினாலாபு³தா³னேன, ஸங்கப்போ தே ஸமிஜ்ஜ²து’.

163. ‘‘பன்னரஸேஸு கப்பேஸு, தே³வலோகே ரமிம் அஹம்;

திம்ஸதிக்க²த்தும் ராஜா ச, சக்கவத்தீ அஹோஸஹம்.

164. ‘‘தி³வா வா யதி³ வா ரத்திம், சங்கமந்தஸ்ஸ திட்ட²தோ;

ஸோவண்ணம் கோந்தரம் க³ய்ஹ, திட்ட²தே புரதோ மம.

165. ‘‘பு³த்³த⁴ஸ்ஸ த³த்வானலாபு³ம், லபா⁴மி ஸோண்ணகோந்தரம்;

அப்பகம்பி கதம் காரம், விபுலம் ஹோதி தாதி³ஸு.

166. ‘‘ஸதஸஹஸ்ஸிதோ கப்பே, யம்லாபு³மத³தி³ம் ததா³;

து³க்³க³திம் நாபி⁴ஜானாமி, அலாபு³ஸ்ஸ இத³ம் ப²லம்.

167. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

168. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

169. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஸோண்ணகோந்தரிகோ தே²ரோ இமா

கா³தா²யோ அபா⁴ஸித்தா²தி.

ஸோண்ணகோந்தரிகத்தே²ரஸ்ஸாபதா³னம் த³ஸமம்.

ஸகிம்ஸம்மஜ்ஜகவக்³கோ³ தேசத்தாலீஸமோ.