44. ஏகவிஹாரிவக்³கோ³

1. ஏகவிஹாரிகத்தே²ரஅபதா³னம்

1. ‘‘இமம்ஹி ப⁴த்³த³கே கப்பே, ப்³ரஹ்மப³ந்து⁴ மஹாயஸோ;

கஸ்ஸபோ நாம கோ³த்தேன, உப்பஜ்ஜி வத³தம் வரோ.

2. ‘‘நிப்பபஞ்சோ நிராலம்போ³, ஆகாஸஸமமானஸோ;

ஸுஞ்ஞதாப³ஹுலோ தாதீ³, அனிமித்தரதோ வஸீ.

3. ‘‘அஸங்க³சித்தோ நிக்லேஸோ [நில்லேபோ (ஸ்யா. க.)], அஸம்ஸட்டோ² குலே க³ணே;

மஹாகாருணிகோ வீரோ, வினயோபாயகோவிதோ³.

4. ‘‘உய்யுத்தோ பரகிச்சேஸு, வினயந்தோ ஸதே³வகே;

நிப்³பா³னக³மனம் மக்³க³ம், க³திம் பங்கவிஸோஸனம்.

5. ‘‘அமதம் பரமஸ்ஸாத³ம், ஜராமச்சுனிவாரணம்;

மஹாபரிஸமஜ்ஜே² ஸோ, நிஸின்னோ லோகதாரகோ.

6. ‘‘கரவீகருதோ [கரவீகருதோ³ (ஸ்யா. பீ. க.)] நாதோ², ப்³ரஹ்மகோ⁴ஸோ ததா²க³தோ;

உத்³த⁴ரந்தோ மஹாது³க்³கா³, விப்பனட்டே² அனாயகே.

7. ‘‘தே³ஸேந்தோ விரஜம் த⁴ம்மம், தி³ட்டோ² மே லோகனாயகோ;

தஸ்ஸ த⁴ம்மம் ஸுணித்வான, பப்³ப³ஜிம் அனகா³ரியம்.

8. ‘‘பப்³ப³ஜித்வா ததா³பாஹம், சிந்தேந்தோ ஜினஸாஸனம்;

ஏககோவ வனே ரம்மே, வஸிம் ஸம்ஸக்³க³பீளிதோ.

9. ‘‘ஸக்காயவூபகாஸோ மே, ஹேதுபூ⁴தோ மமாப⁴வீ [மமாக³மீ (ஸ்யா. பீ.)];

மனஸோ வூபகாஸஸ்ஸ, ஸம்ஸக்³க³ப⁴யத³ஸ்ஸினோ.

10. ‘‘கிலேஸா ஜா²பிதா மய்ஹம், ப⁴வா ஸப்³பே³ ஸமூஹதா;

நாகோ³வ ப³ந்த⁴னம் சே²த்வா, விஹராமி அனாஸவோ.

11. ‘‘ஸ்வாக³தம் வத மே ஆஸி, மம பு³த்³த⁴ஸ்ஸ ஸந்திகே;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனம்.

12. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஏகவிஹாரிகோ தே²ரோ இமா கா³தா²யோ

அபா⁴ஸித்தா²தி.

ஏகவிஹாரிகத்தே²ரஸ்ஸாபதா³னம் பட²மம்.

2. ஏகஸங்கி²யத்தே²ரஅபதா³னம்

13. ‘‘விபஸ்ஸினோ ப⁴க³வதோ, மஹாபோ³தி⁴மஹோ அஹு;

மஹாஜனா ஸமாக³ம்ம, பூஜேந்தி போ³தி⁴முத்தமம்.

14. ‘‘ந ஹி தம் ஓரகம் மஞ்ஞே, பு³த்³த⁴ஸேட்டோ² ப⁴விஸ்ஸதி;

யஸ்ஸாயம் ஈதி³ஸா போ³தி⁴, பூஜனீயா [ஈதி³ஸோ போ³தி⁴, பூஜனீயோ (ஸ்யா.)] ச ஸத்து²னோ.

15. ‘‘ததோ ஸங்க²ம் க³ஹேத்வான, போ³தி⁴ருக்க²முபட்ட²ஹிம்;

த⁴மந்தோ ஸப்³ப³தி³வஸம், அவந்தி³ம் போ³தி⁴முத்தமம்.

16. ‘‘ஆஸன்னகே கதம் கம்மம், தே³வலோகம் அபாபயீ;

களேவரம் மே பதிதம், தே³வலோகே ரமாமஹம்.

17. ‘‘ஸட்டி²துரியஸஹஸ்ஸானி, துட்ட²ஹட்டா² பமோதி³தா;

ஸதா³ மய்ஹம் உபட்ட²ந்தி, பு³த்³த⁴பூஜாயித³ம் ப²லம்.

18. ‘‘ஏகஸத்ததிமே கப்பே, ராஜா ஆஸிம் ஸுத³ஸ்ஸனோ;

சாதுரந்தோ விஜிதாவீ, ஜம்பு³மண்ட³ஸ்ஸ இஸ்ஸரோ.

19. ‘‘ததோ அங்க³ஸதா துரியா [தூரா (ஸீ. க.)], பரிவாரேந்தி மம் ஸதா³;

அனுபோ⁴மி ஸகம் கம்மம், உபட்டா²னஸ்ஸித³ம் ப²லம்.

20. ‘‘யம் யம் யோனுபபஜ்ஜாமி, தே³வத்தம் அத² மானுஸம்;

மாதுகுச்சி²க³தஸ்ஸாபி, வஜ்ஜரே பே⁴ரியோ ஸதா³.

21. ‘‘உபட்டி²த்வான ஸம்பு³த்³த⁴ம், அனுபு⁴த்வான ஸம்பதா³;

ஸிவம் ஸுகே²மம் அமதம், பத்தோம்ஹி அசலம் பத³ம்.

22. ‘‘ஏகனவுதிதோ கப்பே, யம் கம்மமகரிம் ததா³;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

23. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

24. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

25. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஏகஸங்கி²யோ தே²ரோ இமா கா³தா²யோ

அபா⁴ஸித்தா²தி.

ஏகஸங்கி²யத்தே²ரஸ்ஸாபதா³னம் து³தியம்.

3. பாடிஹீரஸஞ்ஞகத்தே²ரஅபதா³னம்

26. ‘‘பது³முத்தரோ நாம ஜினோ, ஆஹுதீனம் படிக்³க³ஹோ;

வஸீஸதஸஹஸ்ஸேஹி, நக³ரம் பாவிஸீ ததா³.

27. ‘‘நக³ரம் பவிஸந்தஸ்ஸ, உபஸந்தஸ்ஸ தாதி³னோ;

ரதனானி பஜ்ஜோதிம்ஸு [பனாதி³ம்ஸு (பீ.)], நிக்³கோ⁴ஸோ ஆஸி தாவதே³.

28. ‘‘பு³த்³த⁴ஸ்ஸ ஆனுபா⁴வேன, பே⁴ரீ வஜ்ஜுமக⁴ட்டிதா;

ஸயம் வீணா பவஜ்ஜந்தி, பு³த்³த⁴ஸ்ஸ பவிஸதோ புரம்.

29. ‘‘பு³த்³த⁴ஸேட்ட²ம் நமஸ்ஸாமி [ந பஸ்ஸாமி (ஸீ.)], பது³முத்தரமஹாமுனிம்;

பாடிஹீரஞ்ச பஸ்ஸித்வா, தத்த² சித்தம் பஸாத³யிம்.

30. ‘‘அஹோ பு³த்³தோ⁴ அஹோ த⁴ம்மோ, அஹோ நோ ஸத்து²ஸம்பதா³;

அசேதனாபி துரியா, ஸயமேவ பவஜ்ஜரே.

31. ‘‘ஸதஸஹஸ்ஸிதோ கப்பே, யம் ஸஞ்ஞமலபி⁴ம் ததா³;

து³க்³க³திம் நாபி⁴ஜானாமி, பு³த்³த⁴ஸஞ்ஞாயித³ம் ப²லம்.

32. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

33. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

34. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா பாடிஹீரஸஞ்ஞகோ தே²ரோ இமா கா³தா²யோ

அபா⁴ஸித்தா²தி.

பாடிஹீரஸஞ்ஞகத்தே²ரஸ்ஸாபதா³னம் ததியம்.

4. ஞாணத்த²விகத்தே²ரஅபதா³னம்

35. ‘‘கணிகாரம்வ ஜலிதம், தீ³பருக்க²ம்வ ஜோதிதம்;

கஞ்சனம்வ விரோசந்தம், அத்³த³ஸம் த்³விபது³த்தமம்.

36. ‘‘கமண்ட³லும் ட²பேத்வான, வாகசீரஞ்ச குண்டி³கம்;

ஏகம்ஸம் அஜினம் கத்வா, பு³த்³த⁴ஸேட்ட²ம் த²விம் அஹம்.

37. ‘‘‘தமந்த⁴காரம் வித⁴மம், மோஹஜாலஸமாகுலம்;

ஞாணாலோகம் த³ஸ்ஸேத்வான, நித்திண்ணோஸி மஹாமுனி.

38. ‘‘‘ஸமுத்³த⁴ரஸிமம் லோகம், ஸப்³பா³வந்தமனுத்தரம்;

ஞாணே தே உபமா நத்தி², யாவதாஜக³தோக³தி [யாவதா ச க³தோக³தி (பீ. க.)].

39. ‘‘‘தேன ஞாணேன ஸப்³ப³ஞ்ஞூ, இதி பு³த்³தோ⁴ பவுச்சதி;

வந்தா³மி தம் மஹாவீரம், ஸப்³ப³ஞ்ஞுதமனாவரம்’.

40. ‘‘ஸதஸஹஸ்ஸிதோ கப்பே, பு³த்³த⁴ஸேட்ட²ம் த²விம் அஹம்;

து³க்³க³திம் நாபி⁴ஜானாமி, ஞாணத்த²வாயித³ம் ப²லம்;

41. ‘‘கிலேஸா ஜா²பிதா மய்ஹம்…பே… விஹராமி அனாஸவோ;

42. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

43. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஞாணத்த²விகோ தே²ரோ இமா கா³தா²யோ

அபா⁴ஸித்தா²தி.

ஞாணத்த²விகத்தே²ரஸ்ஸாபதா³னம் சதுத்த²ம்.

5. உச்சு²க²ண்டி³கத்தே²ரஅபதா³னம்

44. ‘‘நக³ரே ப³ந்து⁴மதியா, த்³வாரபாலோ அஹோஸஹம்;

அத்³த³ஸம் விரஜம் பு³த்³த⁴ம், ஸப்³ப³த⁴ம்மான பாரகு³ம்.

45. ‘‘உச்சு²க²ண்டி³கமாதா³ய, பு³த்³த⁴ஸேட்ட²ஸ்ஸதா³ஸஹம்;

பஸன்னசித்தோ ஸுமனோ, விபஸ்ஸிஸ்ஸ மஹேஸினோ.

46. ‘‘ஏகனவுதிதோ கப்பே, யம் உச்சு²மத³தி³ம் ததா³;

து³க்³க³திம் நாபி⁴ஜானாமி, உச்சு²க²ண்ட³ஸ்ஸித³ம் ப²லம்.

47. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

48. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

49. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா உச்சு²க²ண்டி³கோ தே²ரோ இமா கா³தா²யோ

அபா⁴ஸித்தா²தி.

உச்சு²க²ண்டி³கத்தே²ரஸ்ஸாபதா³னம் பஞ்சமம்.

6. களம்ப³தா³யகத்தே²ரஅபதா³னம்

50. ‘‘ரோமஸோ நாம ஸம்பு³த்³தோ⁴, வஸதே பப்³ப³தந்தரே;

களம்ப³ம் தஸ்ஸ பாதா³ஸிம், பஸன்னோ ஸேஹி பாணிபி⁴.

51. ‘‘சதுன்னவுதிதோ கப்பே, யம் தா³னமத³தி³ம் ததா³;

து³க்³க³திம் நாபி⁴ஜானாமி, களம்ப³ஸ்ஸ இத³ம் ப²லம்.

52. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

53. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

54. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா களம்ப³தா³யகோ தே²ரோ இமா கா³தா²யோ

அபா⁴ஸித்தா²தி.

களம்ப³தா³யகத்தே²ரஸ்ஸாபதா³னம் ச²ட்ட²ம்.

7. அம்பா³டகதா³யகத்தே²ரஅபதா³னம்

55. ‘‘விபினே பு³த்³த⁴ம் தி³ஸ்வான, ஸயம்பு⁴ம் அபராஜிதம்;

அம்பா³டகம் க³ஹேத்வான, ஸயம்பு⁴ஸ்ஸ அதா³ஸஹம்.

56. ‘‘ஏகதிம்ஸே இதோ கப்பே, யம் ப²லமத³தி³ம் ததா³;

து³க்³க³திம் நாபி⁴ஜானாமி, ப²லதா³னஸ்ஸித³ம் ப²லம்.

57. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

58. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

59. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா அம்பா³டகதா³யகோ தே²ரோ இமா கா³தா²யோ

அபா⁴ஸித்தா²தி.

அம்பா³டகதா³யகத்தே²ரஸ்ஸாபதா³னம் ஸத்தமம்.

8. ஹரீதகதா³யகத்தே²ரஅபதா³னம்

60. ‘‘ஹரீதகம் ஆமலகம், அம்ப³ஜம்பு³விபீ⁴தகம்;

கோலம் ப⁴ல்லாதகம் பி³ல்லம், ஸயமேவ ஹராமஹம்.

61. ‘‘தி³ஸ்வான பப்³பா⁴ரக³தம், ஜா²யிம் ஜா²னரதம் முனிம்;

ஆபா³தே⁴ன ஆபீளேந்தம், அது³தீயம் மஹாமுனிம்.

62. ‘‘ஹரீதகம் க³ஹேத்வான, ஸயம்பு⁴ஸ்ஸ அதா³ஸஹம்;

கா²த³மத்தம்ஹி பே⁴ஸஜ்ஜே, ப்³யாதி⁴ பஸ்ஸம்பி⁴ [பஸ்ஸத்³தி⁴ (க.)] தாவதே³.

63. ‘‘பஹீனத³ரதோ² பு³த்³தோ⁴, அனுமோத³மகாஸி மே;

‘பே⁴ஸஜ்ஜதா³னேனிமினா, ப்³யாதி⁴வூபஸமேன ச.

64. ‘‘‘தே³வபூ⁴தோ மனுஸ்ஸோ வா, ஜாதோ வா அஞ்ஞஜாதியா;

ஸப்³ப³த்த² ஸுகி²தோ ஹோது, மா ச தே ப்³யாதி⁴மாக³மா’.

65. ‘‘இத³ம் வத்வான ஸம்பு³த்³தோ⁴, ஸயம்பூ⁴ அபராஜிதோ;

நப⁴ம் அப்³பு⁴க்³க³மீ தீ⁴ரோ, ஹம்ஸராஜாவ அம்ப³ரே.

66. ‘‘யதோ ஹரீதகம் தி³ன்னம், ஸயம்பு⁴ஸ்ஸ மஹேஸினோ;

இமம் ஜாதிம் உபாதா³ய, ப்³யாதி⁴ மே நுபபஜ்ஜத².

67. ‘‘அயம் பச்சி²மகோ மய்ஹம், சரிமோ வத்ததே ப⁴வோ;

திஸ்ஸோ விஜ்ஜா ஸச்சி²கதா, கதம் பு³த்³த⁴ஸ்ஸ ஸாஸனம்.

68. ‘‘சதுன்னவுதிதோ கப்பே, பே⁴ஸஜ்ஜமத³தி³ம் ததா³;

து³க்³க³திம் நாபி⁴ஜானாமி, பே⁴ஸஜ்ஜஸ்ஸ இத³ம் ப²லம்.

69. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

70. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.