3. திஸரணக³மனியத்தே²ரஅபதா³னம்

106. ‘‘நக³ரே சந்த³வதியா [ப³ந்து⁴மதியா (அட்ட².)], மாதுஉபட்டா²கோ [மாதுபட்டா²யகோ (ஸீ.), மாதுபட்டா²னகோ (ஸ்யா.)] அஹும்;

அந்தா⁴ மாதா பிதா மய்ஹம், தே போஸேமி அஹம் ததா³.

107. ‘‘ரஹோக³தோ நிஸீதி³த்வா, ஏவம் சிந்தேஸஹம் ததா³;

போஸேந்தோ மாதாபிதரோ, பப்³ப³ஜ்ஜம் ந லபா⁴மஹம்.

108. ‘‘மஹந்த⁴காரபிஹிதா [தமந்த⁴காரபிஹிதா (ஸ்யா.)], திவித⁴க்³கீ³ஹி ட³ய்ஹரே;

ஏதாதி³ஸே ப⁴வே [ப⁴யே (ஸீ.)] ஜாதே, நத்தி² கோசி வினாயகோ.

109. ‘‘பு³த்³தோ⁴ லோகே ஸமுப்பன்னோ, தி³ப்பதி [தி³ப்³ப³தி (க.)] [ஜினஸாஸனம் (ஸீ.)] தா³னி ஸாஸனம்;

ஸக்கா உத்³த⁴ரிதும் அத்தா, புஞ்ஞகாமேன ஜந்துனா.

110. ‘‘உக்³க³ய்ஹ தீணி ஸரணே, பரிபுண்ணானி கோ³பயிம்;

தேன கம்மேன ஸுகதேன, படிமோக்கா²மி து³க்³க³திம்.

111. ‘‘நிஸபோ⁴ நாம ஸமணோ, பு³த்³த⁴ஸ்ஸ அக்³க³ஸாவகோ;

தமஹம் உபக³ந்த்வான, ஸரணக³மனம் க³ஹிம்.

112. ‘‘வஸ்ஸஸதஸஹஸ்ஸானி, ஆயு விஜ்ஜதி தாவதே³;

தாவதா ஸரணக³மனம், பரிபுண்ணம் அகோ³பயிம்.

113. ‘‘சரிமே வத்தமானம்ஹி, ஸரணம் தம் அனுஸ்ஸரிம்;

தேன கம்மேன ஸுகதேன, தாவதிம்ஸம் அக³ச்ச²ஹம்.

114. ‘‘தே³வலோகக³தோ ஸந்தோ, புஞ்ஞகம்மஸமாஹிதோ;

யம் தே³ஸம் [யம் யம் தே³ஸம் (ஸ்யா.)] உபபஜ்ஜாமி [உபக³ச்சா²மி (ஸீ.)], அட்ட² ஹேதூ லபா⁴மஹம்.

115. ‘‘தி³ஸாஸு பூஜிதோ ஹோமி, திக்க²பஞ்ஞோ ப⁴வாமஹம்;

ஸப்³பே³ தே³வானுவத்தந்தி, அமிதபோ⁴க³ம் லபா⁴மஹம்.

116. ‘‘ஸுவண்ணவண்ணோ ஸப்³ப³த்த², படிகந்தோ ப⁴வாமஹம்;

மித்தானம் அசலோ ஹோமி, யஸோ அப்³பு⁴க்³க³தோ மமம்.

117. ‘‘அஸீதிக்க²த்து தே³விந்தோ³, தே³வரஜ்ஜமகாரயிம்;

தி³ப்³ப³ஸுக²ம் அனுப⁴விம், அச்ச²ராஹி புரக்க²தோ.

118. ‘‘பஞ்சஸத்ததிக்க²த்துஞ்ச, சக்கவத்தீ அஹோஸஹம்;

பதே³ஸரஜ்ஜம் விபுலம், க³ணனாதோ அஸங்கி²யம்.

119. ‘‘பச்சி²மே ப⁴வே ஸம்பத்தே, புஞ்ஞகம்மஸமாஹிதோ;

புரே ஸாவத்தி²யம் ஜாதோ, மஹாஸாலே ஸுஅட்³ட⁴கே.

120. ‘‘நக³ரா நிக்க²மித்வான, தா³ரகேஹி புரக்க²தோ;

ஹஸகி²ட்³ட³ஸமங்கீ³ஹம் [ஸாஹம் கி²ட்³ட³ஸமங்கீ³ (ஸ்யா.)], ஸங்கா⁴ராமம் உபாக³மிம்.

121. ‘‘தத்த²த்³த³ஸாஸிம் [தத்த²த்³த³ஸாஹம் (க.)] ஸமணம், விப்பமுத்தம் நிரூபதி⁴ம்;

ஸோ மே த⁴ம்மமதே³ஸேஸி, ஸரணஞ்ச அதா³ஸி மே.

122. ‘‘ஸோஹம் ஸுத்வான ஸரணம், ஸரணம் மே அனுஸ்ஸரிம்;

ஏகாஸனே நிஸீதி³த்வா, அரஹத்தமபாபுணிம்.

123. ‘‘ஜாதியா ஸத்தமே வஸ்ஸே, அரஹத்தமபாபுணிம்;

உபஸம்பாத³யி பு³த்³தோ⁴, கு³ணமஞ்ஞாய சக்கு²மா.

124. ‘‘அபரிமேய்யே இதோ கப்பே, ஸரணானி அக³ச்ச²ஹம்;

ததோ மே ஸுகதம் கம்மம், ப²லம் த³ஸ்ஸேஸி மே இத⁴.

125. ‘‘ஸுகோ³பிதம் மே ஸரணம், மானஸம் ஸுப்பணீஹிதம்;

அனுபோ⁴த்வா யஸம் ஸப்³ப³ம், பத்தோம்ஹி அசலம் பத³ம்.

126. ‘‘யேஸம் ஸோதாவதா⁴னத்தி², ஸுணோத² மம பா⁴ஸதோ;

அஹம் [அத்த²ம் (ஸ்யா.)] வோ கத²யிஸ்ஸாமி, ஸாமம் தி³ட்ட²ம் பத³ம் மம.

127. ‘‘‘பு³த்³தோ⁴ லோகே ஸமுப்பன்னோ, வத்ததே ஜினஸாஸனம்;

அமதா வாதி³தா பே⁴ரீ, ஸோகஸல்லவினோத³னா.

128. ‘‘‘யதா²ஸகேன தா²மேன, புஞ்ஞக்கே²த்தே அனுத்தரே;

அதி⁴காரம் கரேய்யாத², பஸ்ஸயிஸ்ஸத² நிப்³பு³திம்.

129. ‘‘‘பக்³க³ய்ஹ தீணி ஸரணே, பஞ்சஸீலானி கோ³பிய;

பு³த்³தே⁴ சித்தம் பஸாதே³த்வா, து³க்க²ஸ்ஸந்தம் கரிஸ்ஸத².

130. ‘‘‘ஸம்மா த⁴ம்மம் பா⁴வேத்வான [மமோபமம் கரித்வான (ஸீ. ஸ்யா.)], ஸீலானி பரிகோ³பிய;

அசிரம் அரஹத்தம் வோ, ஸப்³பே³பி பாபுணிஸ்ஸத².

131. ‘‘‘தேவிஜ்ஜோ இத்³தி⁴பத்தோம்ஹி, சேதோபரியகோவிதோ³;

ஸாவகோ தே மஹாவீர, ஸரணோ [சரணே (ஸீ. ஸ்யா.)] வந்த³தி ஸத்து²னோ’.

132. ‘‘அபரிமேய்யே இதோ கப்பே, ஸரணம் பு³த்³த⁴ஸ்ஸ க³ச்ச²ஹம்;

து³க்³க³திம் நாபி⁴ஜானாமி, ஸரணம் க³மனே ப²லம்.

133. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா திஸரணக³மனியோ தே²ரோ இமா கா³தா²யோ அபா⁴ஸித்தா²தி.

திஸரணக³மனியத்தே²ரஸ்ஸாபதா³னம் ததியம்.