4. பஞ்சஸீலஸமாதா³னியத்தே²ரஅபதா³னம்

134. ‘‘நக³ரே சந்த³வதியா, ப⁴தகோ ஆஸஹம் ததா³;

பரகம்மாயனே யுத்தோ, பப்³ப³ஜ்ஜம் ந லபா⁴மஹம்.

135. ‘‘மஹந்த⁴காரபிஹிதா, திவித⁴க்³கீ³ஹி ட³ய்ஹரே;

கேன நு கோ² உபாயேன, விஸம்யுத்தோ ப⁴வே அஹம்.

136. ‘‘தே³ய்யத⁴ம்மோ ச மே நத்தி², வராகோ ப⁴தகோ அஹம்;

யம்னூனாஹம் பஞ்சஸீலம், ரக்கே²ய்யம் பரிபூரயம்.

137. ‘‘அனோமத³ஸ்ஸிஸ்ஸ முனினோ, நிஸபோ⁴ நாம ஸாவகோ;

தமஹம் உபஸங்கம்ம, பஞ்சஸிக்கா²பத³க்³க³ஹிம்.

138. ‘‘வஸ்ஸஸதஸஹஸ்ஸானி, ஆயு விஜ்ஜதி தாவதே³;

தாவதா பஞ்சஸீலானி, பரிபுண்ணானி கோ³பயிம்.

139. ‘‘மச்சுகாலே ச ஸம்பத்தே, தே³வா அஸ்ஸாஸயந்தி மம்;

‘ரதோ² ஸஹஸ்ஸயுத்தோ தே, மாரிஸாயம் [மாரிஸஸ்ஸ (க.)] உபட்டி²தோ’.

140. ‘‘வத்தந்தே சரிமே சித்தே, மம ஸீலம் அனுஸ்ஸரிம்;

தேன கம்மேன ஸுகதேன, தாவதிம்ஸம் அக³ச்ச²ஹம்.

141. ‘‘திம்ஸக்க²த்துஞ்ச தே³விந்தோ³, தே³வரஜ்ஜமகாரயிம்;

தி³ப்³ப³ஸுக²ம் [தி³ப்³ப³ம் ஸுக²ம் (ஸீ.)] அனுப⁴விம், அச்ச²ராஹி புரக்க²தோ.

142. ‘‘பஞ்சஸத்ததிக்க²த்துஞ்ச, சக்கவத்தீ அஹோஸஹம்;

பதே³ஸரஜ்ஜம் விபுலம், க³ணனாதோ அஸங்கி²யம்.

143. ‘‘தே³வலோகா சவித்வான, ஸுக்கமூலேன சோதி³தோ;

புரே வேஸாலியம் ஜாதோ, மஹாஸாலே ஸுஅட்³ட⁴கே.

144. ‘‘வஸ்ஸூபனாயிகே காலே, தி³ப்பந்தே [தி³ப்³ப³ந்தி (க.)] ஜினஸாஸனே;

மாதா ச மே பிதா சேவ, பஞ்சஸிக்கா²பத³க்³க³ஹும்.

145. ‘‘ஸஹ ஸுத்வானஹம் ஸீலம், மம ஸீலம் அனுஸ்ஸரிம்;

ஏகாஸனே நிஸீதி³த்வா, அரஹத்தமபாபுணிம்.

146. ‘‘ஜாதியா பஞ்சவஸ்ஸேன, அரஹத்தமபாபுணிம்;

உபஸம்பாத³யி பு³த்³தோ⁴, கு³ணமஞ்ஞாய சக்கு²மா.

147. ‘‘பரிபுண்ணானி கோ³பேத்வா, பஞ்சஸிக்கா²பதா³னஹம்;

அபரிமேய்யே இதோ கப்பே, வினிபாதம் ந க³ச்ச²ஹம்.

148. ‘‘ஸ்வாஹம் யஸமனுப⁴விம், தேஸம் ஸீலான வாஹஸா;

கப்பகோடிம்பி கித்தேந்தோ, கித்தயே ஏகதே³ஸகம்.

149. ‘‘பஞ்சஸீலானி கோ³பேத்வா, தயோ ஹேதூ லபா⁴மஹம்;

தீ³கா⁴யுகோ மஹாபோ⁴கோ³, திக்க²பஞ்ஞோ ப⁴வாமஹம்.

150. ‘‘ஸம்கித்தேந்தோ ச [பகித்தேந்தோவ (ஸீ.), பகித்தேந்தே ச (ஸ்யா.)] ஸப்³பே³ஸம், அபி⁴மத்தஞ்ச போரிஸம்;

ப⁴வாப⁴வே ஸம்ஸரித்வா, ஏதே டா²னே லபா⁴மஹம்.

151. ‘‘அபரிமேய்யஸீலேஸு, வத்தந்தா ஜினஸாவகா;

ப⁴வேஸு யதி³ ரஜ்ஜேய்யும், விபாகோ கீதி³ஸோ ப⁴வே.

152. ‘‘ஸுசிண்ணம் மே பஞ்சஸீலம், ப⁴தகேன தபஸ்ஸினா [விபஸ்ஸினா (ஸீ.)];

தேன ஸீலேனஹம் அஜ்ஜ, மோசயிம் ஸப்³ப³ப³ந்த⁴னா.

153. ‘‘அபரிமேய்யே இதோ கப்பே, பஞ்சஸீலானி கோ³பயிம்;

து³க்³க³திம் நாபி⁴ஜானாமி, பஞ்சஸீலானித³ம் ப²லம்.

154. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா பஞ்சஸீலஸமாதா³னியோ தே²ரோ இமா கா³தா²யோ அபா⁴ஸித்தா²தி.

பஞ்சஸீலஸமாதா³னியத்தே²ரஸ்ஸாபதா³னம் சதுத்த²ம்.