8. ஸிங்கா³லஸுத்தம்

242. ஏவம் மே ஸுதம் – ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஸிங்கா³லகோ [ஸிகா³லகோ (ஸீ.)] க³ஹபதிபுத்தோ காலஸ்ஸேவ உட்டா²ய ராஜக³ஹா நிக்க²மித்வா அல்லவத்தோ² அல்லகேஸோ பஞ்ஜலிகோ புது²தி³ஸா [புது²த்³தி³ஸா (ஸீ. ஸ்யா. பீ.)] நமஸ்ஸதி – புரத்தி²மம் தி³ஸம் த³க்கி²ணம் தி³ஸம் பச்சி²மம் தி³ஸம் உத்தரம் தி³ஸம் ஹேட்டி²மம் தி³ஸம் உபரிமம் தி³ஸம்.

243. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பாவிஸி. அத்³த³ஸா கோ² ப⁴க³வா ஸிங்கா³லகம் க³ஹபதிபுத்தம் காலஸ்ஸேவ வுட்டா²ய ராஜக³ஹா நிக்க²மித்வா அல்லவத்த²ம் அல்லகேஸம் பஞ்ஜலிகம் புது²தி³ஸா நமஸ்ஸந்தம் – புரத்தி²மம் தி³ஸம் த³க்கி²ணம் தி³ஸம் பச்சி²மம் தி³ஸம் உத்தரம் தி³ஸம் ஹேட்டி²மம் தி³ஸம் உபரிமம் தி³ஸம். தி³ஸ்வா ஸிங்கா³லகம் க³ஹபதிபுத்தம் ஏதத³வோச – ‘‘கிம் நு கோ² த்வம், க³ஹபதிபுத்த, காலஸ்ஸேவ உட்டா²ய ராஜக³ஹா நிக்க²மித்வா அல்லவத்தோ² அல்லகேஸோ பஞ்ஜலிகோ புது²தி³ஸா நமஸ்ஸஸி – புரத்தி²மம் தி³ஸம் த³க்கி²ணம் தி³ஸம் பச்சி²மம் தி³ஸம் உத்தரம் தி³ஸம் ஹேட்டி²மம் தி³ஸம் உபரிமம் தி³ஸ’’ந்தி? ‘‘பிதா மம், ப⁴ந்தே, காலம் கரோந்தோ ஏவம் அவச – ‘தி³ஸா, தாத, நமஸ்ஸேய்யாஸீ’தி. ஸோ கோ² அஹம், ப⁴ந்தே, பிதுவசனம் ஸக்கரோந்தோ க³ரும் கரோந்தோ மானேந்தோ பூஜேந்தோ காலஸ்ஸேவ உட்டா²ய ராஜக³ஹா நிக்க²மித்வா அல்லவத்தோ² அல்லகேஸோ பஞ்ஜலிகோ புது²தி³ஸா நமஸ்ஸாமி – புரத்தி²மம் தி³ஸம் த³க்கி²ணம் தி³ஸம் பச்சி²மம் தி³ஸம் உத்தரம் தி³ஸம் ஹேட்டி²மம் தி³ஸம் உபரிமம் தி³ஸ’’ந்தி.

ச² தி³ஸா

244. ‘‘ந கோ², க³ஹபதிபுத்த, அரியஸ்ஸ வினயே ஏவம் ச² தி³ஸா [ச²த்³தி³ஸா (ஸீ. பீ.)] நமஸ்ஸிதப்³பா³’’தி. ‘‘யதா² கத²ம் பன, ப⁴ந்தே, அரியஸ்ஸ வினயே ச² தி³ஸா [ச²த்³தி³ஸா (ஸீ. பீ.)] நமஸ்ஸிதப்³பா³? ஸாது⁴ மே, ப⁴ந்தே, ப⁴க³வா ததா² த⁴ம்மம் தே³ஸேது, யதா² அரியஸ்ஸ வினயே ச² தி³ஸா [ச²த்³தி³ஸா (ஸீ. பீ.)] நமஸ்ஸிதப்³பா³’’தி.

‘‘தேன ஹி, க³ஹபதிபுத்த ஸுணோஹி ஸாது⁴கம் மனஸிகரோஹி பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² ஸிங்கா³லகோ க³ஹபதிபுத்தோ ப⁴க³வதோ பச்சஸ்ஸோஸி. ப⁴க³வா ஏதத³வோச –

‘‘யதோ கோ², க³ஹபதிபுத்த, அரியஸாவகஸ்ஸ சத்தாரோ கம்மகிலேஸா பஹீனா ஹோந்தி, சதூஹி ச டா²னேஹி பாபகம்மம் ந கரோதி, ச² ச போ⁴கா³னம் அபாயமுகா²னி ந ஸேவதி, ஸோ ஏவம் சுத்³த³ஸ பாபகாபக³தோ ச²த்³தி³ஸாபடிச்சா²தீ³ [படிச்சா²தீ³ ஹோதி (ஸ்யா.)] உபோ⁴லோகவிஜயாய படிபன்னோ ஹோதி. தஸ்ஸ அயஞ்சேவ லோகோ ஆரத்³தோ⁴ ஹோதி பரோ ச லோகோ. ஸோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி.

சத்தாரோகம்மகிலேஸா

245. ‘‘கதமஸ்ஸ சத்தாரோ கம்மகிலேஸா பஹீனா ஹோந்தி? பாணாதிபாதோ கோ², க³ஹபதிபுத்த, கம்மகிலேஸோ, அதி³ன்னாதா³னம் கம்மகிலேஸோ, காமேஸுமிச்சா²சாரோ கம்மகிலேஸோ, முஸாவாதோ³ கம்மகிலேஸோ. இமஸ்ஸ சத்தாரோ கம்மகிலேஸா பஹீனா ஹோந்தீ’’தி. இத³மவோச ப⁴க³வா, இத³ம் வத்வான [இத³ம் வத்வா (ஸீ. பீ.) ஏவமீதி³ஸேஸு டா²னேஸு] ஸுக³தோ அதா²பரம் ஏதத³வோச ஸத்தா² –

‘‘பாணாதிபாதோ அதி³ன்னாதா³னம், முஸாவாதோ³ ச வுச்சதி;

பரதா³ரக³மனஞ்சேவ, நப்பஸம்ஸந்தி பண்டி³தா’’தி.

சதுட்டா²னம்

246. ‘‘கதமேஹி சதூஹி டா²னேஹி பாபகம்மம் ந கரோதி? ச²ந்தா³க³திம் க³ச்ச²ந்தோ பாபகம்மம் கரோதி, தோ³ஸாக³திம் க³ச்ச²ந்தோ பாபகம்மம் கரோதி, மோஹாக³திம் க³ச்ச²ந்தோ பாபகம்மம் கரோதி, ப⁴யாக³திம் க³ச்ச²ந்தோ பாபகம்மம் கரோதி. யதோ கோ², க³ஹபதிபுத்த, அரியஸாவகோ நேவ ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி; இமேஹி சதூஹி டா²னேஹி பாபகம்மம் ந கரோதீ’’தி. இத³மவோச ப⁴க³வா, இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘ச²ந்தா³ தோ³ஸா ப⁴யா மோஹா, யோ த⁴ம்மம் அதிவத்ததி;

நிஹீயதி யஸோ தஸ்ஸ [தஸ்ஸ யேஸோ (ப³ஹூஸு, வினயேபி)], காளபக்கே²வ சந்தி³மா.

‘‘ச²ந்தா³ தோ³ஸா ப⁴யா மோஹா, யோ த⁴ம்மம் நாதிவத்ததி;

ஆபூரதி யஸோ தஸ்ஸ [தஸ்ஸ யேஸோ (ப³ஹூஸு, வினயேபி)], ஸுக்கபக்கே²வ [ஜுண்ஹபக்கே²வ (க.)] சந்தி³மா’’தி.

ச² அபாயமுகா²னி

247. ‘‘கதமானி ச² போ⁴கா³னம் அபாயமுகா²னி ந ஸேவதி? ஸுராமேரயமஜ்ஜப்பமாத³ட்டா²னானுயோகோ³ கோ², க³ஹபதிபுத்த, போ⁴கா³னம் அபாயமுக²ம், விகாலவிஸிகா²சரியானுயோகோ³ போ⁴கா³னம் அபாயமுக²ம், ஸமஜ்ஜாபி⁴சரணம் போ⁴கா³னம் அபாயமுக²ம், ஜூதப்பமாத³ட்டா²னானுயோகோ³ போ⁴கா³னம் அபாயமுக²ம், பாபமித்தானுயோகோ³ போ⁴கா³னம் அபாயமுக²ம், ஆலஸ்யானுயோகோ³ [ஆலஸானுயோகோ³ (ஸீ. ஸ்யா. பீ.)] போ⁴கா³னம் அபாயமுக²ம்.

ஸுராமேரயஸ்ஸ ச² ஆதீ³னவா

248. ‘‘ச² கோ²மே, க³ஹபதிபுத்த, ஆதீ³னவா ஸுராமேரயமஜ்ஜப்பமாத³ட்டா²னானுயோகே³. ஸந்தி³ட்டி²கா த⁴னஜானி [த⁴னஞ்ஜானி (ஸீ. பீ.)], கலஹப்பவட்³ட⁴னீ, ரோகா³னம் ஆயதனம், அகித்திஸஞ்ஜனனீ, கோபீனனித³ம்ஸனீ, பஞ்ஞாய து³ப்³ப³லிகரணீத்வேவ ச²ட்ட²ம் பத³ம் ப⁴வதி. இமே கோ², க³ஹபதிபுத்த, ச² ஆதீ³னவா ஸுராமேரயமஜ்ஜப்பமாத³ட்டா²னானுயோகே³.

விகாலசரியாய ச² ஆதீ³னவா

249. ‘‘ச² கோ²மே, க³ஹபதிபுத்த, ஆதீ³னவா விகாலவிஸிகா²சரியானுயோகே³. அத்தாபிஸ்ஸ அகு³த்தோ அரக்கி²தோ ஹோதி, புத்ததா³ரோபிஸ்ஸ அகு³த்தோ அரக்கி²தோ ஹோதி, ஸாபதேய்யம்பிஸ்ஸ அகு³த்தம் அரக்கி²தம் ஹோதி, ஸங்கியோ ச ஹோதி பாபகேஸு டா²னேஸு [தேஸு தேஸு டா²னேஸு (ஸ்யா.)], அபூ⁴தவசனஞ்ச தஸ்மிம் ரூஹதி, ப³ஹூனஞ்ச து³க்க²த⁴ம்மானம் புரக்க²தோ ஹோதி. இமே கோ², க³ஹபதிபுத்த, ச² ஆதீ³னவா விகாலவிஸிகா²சரியானுயோகே³.

ஸமஜ்ஜாபி⁴சரணஸ்ஸ ச² ஆதீ³னவா

250. ‘‘ச² கோ²மே, க³ஹபதிபுத்த, ஆதீ³னவா ஸமஜ்ஜாபி⁴சரணே. க்வ [குவம் (க. ஸீ. பீ.)] நச்சம், க்வ கீ³தம், க்வ வாதி³தம், க்வ அக்கா²னம், க்வ பாணிஸ்ஸரம், க்வ கும்ப⁴து²னந்தி. இமே கோ², க³ஹபதிபுத்த, ச² ஆதீ³னவா ஸமஜ்ஜாபி⁴சரணே.

ஜூதப்பமாத³ஸ்ஸ ச² ஆதீ³னவா

251. ‘‘ச² கோ²மே, க³ஹபதிபுத்த, ஆதீ³னவா ஜூதப்பமாத³ட்டா²னானுயோகே³. ஜயம் வேரம் பஸவதி, ஜினோ வித்தமனுஸோசதி, ஸந்தி³ட்டி²கா த⁴னஜானி, ஸபா⁴க³தஸ்ஸ [ஸபா⁴யே தஸ்ஸ (க.)] வசனம் ந ரூஹதி, மித்தாமச்சானம் பரிபூ⁴தோ ஹோதி, ஆவாஹவிவாஹகானம் அபத்தி²தோ ஹோதி – ‘அக்க²து⁴த்தோ அயம் புரிஸபுக்³க³லோ நாலம் தா³ரப⁴ரணாயா’தி. இமே கோ², க³ஹபதிபுத்த, ச² ஆதீ³னவா ஜூதப்பமாத³ட்டா²னானுயோகே³.

பாபமித்ததாய ச² ஆதீ³னவா

252. ‘‘ச² கோ²மே, க³ஹபதிபுத்த, ஆதீ³னவா பாபமித்தானுயோகே³. யே து⁴த்தா, யே ஸோண்டா³, யே பிபாஸா, யே நேகதிகா, யே வஞ்சனிகா, யே ஸாஹஸிகா. த்யாஸ்ஸ மித்தா ஹோந்தி தே ஸஹாயா. இமே கோ², க³ஹபதிபுத்த, ச² ஆதீ³னவா பாபமித்தானுயோகே³.

ஆலஸ்யஸ்ஸ ச² ஆதீ³னவா

253. ‘‘ச² கோ²மே, க³ஹபதிபுத்த, ஆதீ³னவா ஆலஸ்யானுயோகே³. அதிஸீதந்தி கம்மம் ந கரோதி, அதிஉண்ஹந்தி கம்மம் ந கரோதி, அதிஸாயந்தி கம்மம் ந கரோதி, அதிபாதோதி கம்மம் ந கரோதி, அதிசா²தோஸ்மீதி கம்மம் ந கரோதி, அதிதா⁴தோஸ்மீதி கம்மம் ந கரோதி. தஸ்ஸ ஏவம் கிச்சாபதே³ஸப³ஹுலஸ்ஸ விஹரதோ அனுப்பன்னா சேவ போ⁴கா³ நுப்பஜ்ஜந்தி, உப்பன்னா ச போ⁴கா³ பரிக்க²யம் க³ச்ச²ந்தி. இமே கோ², க³ஹபதிபுத்த, ச² ஆதீ³னவா ஆலஸ்யானுயோகே³’’தி. இத³மவோச ப⁴க³வா, இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘ஹோதி பானஸகா² நாம,

ஹோதி ஸம்மியஸம்மியோ;

யோ ச அத்தே²ஸு ஜாதேஸு,

ஸஹாயோ ஹோதி ஸோ ஸகா².

‘‘உஸ்ஸூரஸேய்யா பரதா³ரஸேவனா,

வேரப்பஸவோ [வேரப்பஸங்கோ³ (ஸீ. ஸ்யா. பீ.)] ச அனத்த²தா ச;

பாபா ச மித்தா ஸுகத³ரியதா ச,

ஏதே ச² டா²னா புரிஸம் த⁴ம்ஸயந்தி.

‘‘பாபமித்தோ பாபஸகோ²,

பாபஆசாரகோ³சரோ;

அஸ்மா லோகா பரம்ஹா ச,

உப⁴யா த⁴ம்ஸதே நரோ.

‘‘அக்கி²த்தி²யோ வாருணீ நச்சகீ³தம்,

தி³வா ஸோப்பம் பாரிசரியா அகாலே;

பாபா ச மித்தா ஸுகத³ரியதா ச,

ஏதே ச² டா²னா புரிஸம் த⁴ம்ஸயந்தி.

‘‘அக்கே²ஹி தி³ப்³ப³ந்தி ஸுரம் பிவந்தி,

யந்தித்தி²யோ பாணஸமா பரேஸம்;

நிஹீனஸேவீ ந ச வுத்³த⁴ஸேவீ [வுத்³தி⁴ஸேவீ (ஸ்யா.), பு³த்³தி⁴ஸேவீ (க.)],

நிஹீயதே காளபக்கே²வ சந்தோ³.

‘‘யோ வாருணீ அத்³த⁴னோ அகிஞ்சனோ,

பிபாஸோ பிவம் பபாக³தோ [பிபாஸோஸி அத்த²பாக³தோ (ஸ்யா.), பிபாஸோபி ஸமப்பபாக³தோ (க.)];

உத³கமிவ இணம் விகா³ஹதி,

அகுலம் [ஆகுலம் (ஸ்யா. க.)] காஹிதி கி²ப்பமத்தனோ.

‘‘ந தி³வா ஸோப்பஸீலேன, ரத்திமுட்டா²னதே³ஸ்ஸினா [ரத்தினுட்டா²னத³ஸ்ஸினா (ஸீ. பீ.), ரத்தினுட்டா²னஸீலினா (?)];

நிச்சம் மத்தேன ஸோண்டே³ன, ஸக்கா ஆவஸிதும் க⁴ரம்.

‘‘அதிஸீதம் அதிஉண்ஹம், அதிஸாயமித³ம் அஹு;

இதி விஸ்ஸட்ட²கம்மந்தே, அத்தா² அச்சேந்தி மாணவே.

‘‘யோத⁴ ஸீதஞ்ச உண்ஹஞ்ச, திணா பி⁴ய்யோ ந மஞ்ஞதி;

கரம் புரிஸகிச்சானி, ஸோ ஸுக²ம் [ஸுகா² (ஸப்³ப³த்த²) அட்ட²கதா² ஓலோகேதப்³பா³] ந விஹாயதீ’’தி.

மித்தபதிரூபகா

254. ‘‘சத்தாரோமே, க³ஹபதிபுத்த, அமித்தா மித்தபதிரூபகா வேதி³தப்³பா³. அஞ்ஞத³த்து²ஹரோ அமித்தோ மித்தபதிரூபகோ வேதி³தப்³போ³, வசீபரமோ அமித்தோ மித்தபதிரூபகோ வேதி³தப்³போ³, அனுப்பியபா⁴ணீ அமித்தோ மித்தபதிரூபகோ வேதி³தப்³போ³, அபாயஸஹாயோ அமித்தோ மித்தபதிரூபகோ வேதி³தப்³போ³.

255. ‘‘சதூஹி கோ², க³ஹபதிபுத்த, டா²னேஹி அஞ்ஞத³த்து²ஹரோ அமித்தோ மித்தபதிரூபகோ வேதி³தப்³போ³.

‘‘அஞ்ஞத³த்து²ஹரோ ஹோதி, அப்பேன ப³ஹுமிச்ச²தி;

ப⁴யஸ்ஸ கிச்சம் கரோதி, ஸேவதி அத்த²காரணா.

‘‘இமேஹி கோ², க³ஹபதிபுத்த, சதூஹி டா²னேஹி அஞ்ஞத³த்து²ஹரோ அமித்தோ மித்தபதிரூபகோ வேதி³தப்³போ³.

256. ‘‘சதூஹி கோ², க³ஹபதிபுத்த, டா²னேஹி வசீபரமோ அமித்தோ மித்தபதிரூபகோ வேதி³தப்³போ³. அதீதேன படிஸந்த²ரதி [படிஸந்த⁴ரதி (க.)], அனாக³தேன படிஸந்த²ரதி, நிரத்த²கேன ஸங்க³ண்ஹாதி, பச்சுப்பன்னேஸு கிச்சேஸு ப்³யஸனம் த³ஸ்ஸேதி. இமேஹி கோ², க³ஹபதிபுத்த, சதூஹி டா²னேஹி வசீபரமோ அமித்தோ மித்தபதிரூபகோ வேதி³தப்³போ³.

257. ‘‘சதூஹி கோ², க³ஹபதிபுத்த, டா²னேஹி அனுப்பியபா⁴ணீ அமித்தோ மித்தபதிரூபகோ வேதி³தப்³போ³. பாபகம்பிஸ்ஸ [பாபகம்மம்பிஸ்ஸ (ஸ்யா.)] அனுஜானாதி, கல்யாணம்பிஸ்ஸ அனுஜானாதி, ஸம்முகா²ஸ்ஸ வண்ணம் பா⁴ஸதி, பரம்முகா²ஸ்ஸ அவண்ணம் பா⁴ஸதி. இமேஹி கோ², க³ஹபதிபுத்த, சதூஹி டா²னேஹி அனுப்பியபா⁴ணீ அமித்தோ மித்தபதிரூபகோ வேதி³தப்³போ³.

258. ‘‘சதூஹி கோ², க³ஹபதிபுத்த, டா²னேஹி அபாயஸஹாயோ அமித்தோ மித்தபதிரூபகோ வேதி³தப்³போ³. ஸுராமேரய மஜ்ஜப்பமாத³ட்டா²னானுயோகே³ ஸஹாயோ ஹோதி, விகால விஸிகா² சரியானுயோகே³ ஸஹாயோ ஹோதி, ஸமஜ்ஜாபி⁴சரணே ஸஹாயோ ஹோதி, ஜூதப்பமாத³ட்டா²னானுயோகே³ ஸஹாயோ ஹோதி. இமேஹி கோ², க³ஹபதிபுத்த, சதூஹி டா²னேஹி அபாயஸஹாயோ அமித்தோ மித்தபதிரூபகோ வேதி³தப்³போ³’’தி.

259. இத³மவோச ப⁴க³வா, இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘அஞ்ஞத³த்து²ஹரோ மித்தோ, யோ ச மித்தோ வசீபரோ [வசீபரமோ (ஸ்யா.)];

அனுப்பியஞ்ச யோ ஆஹ, அபாயேஸு ச யோ ஸகா².

ஏதே அமித்தே சத்தாரோ, இதி விஞ்ஞாய பண்டி³தோ;

ஆரகா பரிவஜ்ஜேய்ய, மக்³க³ம் படிப⁴யம் யதா²’’தி.

ஸுஹத³மித்தோ

260. ‘‘சத்தாரோமே, க³ஹபதிபுத்த, மித்தா ஸுஹதா³ வேதி³தப்³பா³. உபகாரோ [உபகாரகோ (ஸ்யா.)] மித்தோ ஸுஹதோ³ வேதி³தப்³போ³, ஸமானஸுக²து³க்கோ² மித்தோ ஸுஹதோ³ வேதி³தப்³போ³, அத்த²க்கா²யீ மித்தோ ஸுஹதோ³ வேதி³தப்³போ³, அனுகம்பகோ மித்தோ ஸுஹதோ³ வேதி³தப்³போ³.

261. ‘‘சதூஹி கோ², க³ஹபதிபுத்த, டா²னேஹி உபகாரோ மித்தோ ஸுஹதோ³ வேதி³தப்³போ³. பமத்தம் ரக்க²தி, பமத்தஸ்ஸ ஸாபதேய்யம் ரக்க²தி, பீ⁴தஸ்ஸ ஸரணம் ஹோதி, உப்பன்னேஸு கிச்சகரணீயேஸு தத்³தி³கு³ணம் போ⁴க³ம் அனுப்பதே³தி. இமேஹி கோ², க³ஹபதிபுத்த, சதூஹி டா²னேஹி உபகாரோ மித்தோ ஸுஹதோ³ வேதி³தப்³போ³.

262. ‘‘சதூஹி கோ², க³ஹபதிபுத்த, டா²னேஹி ஸமானஸுக²து³க்கோ² மித்தோ ஸுஹதோ³ வேதி³தப்³போ³. கு³ய்ஹமஸ்ஸ ஆசிக்க²தி, கு³ய்ஹமஸ்ஸ பரிகூ³ஹதி, ஆபதா³ஸு ந விஜஹதி, ஜீவிதம்பிஸ்ஸ அத்தா²ய பரிச்சத்தம் ஹோதி. இமேஹி கோ², க³ஹபதிபுத்த, சதூஹி டா²னேஹி ஸமானஸுக²து³க்கோ² மித்தோ ஸுஹதோ³ வேதி³தப்³போ³.

263. ‘‘சதூஹி கோ², க³ஹபதிபுத்த, டா²னேஹி அத்த²க்கா²யீ மித்தோ ஸுஹதோ³ வேதி³தப்³போ³. பாபா நிவாரேதி, கல்யாணே நிவேஸேதி, அஸ்ஸுதம் ஸாவேதி, ஸக்³க³ஸ்ஸ மக்³க³ம் ஆசிக்க²தி. இமேஹி கோ², க³ஹபதிபுத்த, சதூஹி டா²னேஹி அத்த²க்கா²யீ மித்தோ ஸுஹதோ³ வேதி³தப்³போ³.

264. ‘‘சதூஹி கோ², க³ஹபதிபுத்த, டா²னேஹி அனுகம்பகோ மித்தோ ஸுஹதோ³ வேதி³தப்³போ³. அப⁴வேனஸ்ஸ ந நந்த³தி, ப⁴வேனஸ்ஸ நந்த³தி, அவண்ணம் ப⁴ணமானம் நிவாரேதி, வண்ணம் ப⁴ணமானம் பஸம்ஸதி. இமேஹி கோ², க³ஹபதிபுத்த, சதூஹி டா²னேஹி அனுகம்பகோ மித்தோ ஸுஹதோ³ வேதி³தப்³போ³’’தி.

265. இத³மவோச ப⁴க³வா, இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘உபகாரோ ச யோ மித்தோ, ஸுகே² து³க்கே² [ஸுக²து³க்கோ² (ஸ்யா. க.)] ச யோ ஸகா² [யோ ச மித்தோ ஸுகே² து³க்கே² (ஸீ. பீ.)];

அத்த²க்கா²யீ ச யோ மித்தோ, யோ ச மித்தானுகம்பகோ.

‘‘ஏதேபி மித்தே சத்தாரோ, இதி விஞ்ஞாய பண்டி³தோ;

ஸக்கச்சம் பயிருபாஸேய்ய, மாதா புத்தம் வ ஓரஸம்;

பண்டி³தோ ஸீலஸம்பன்னோ, ஜலம் அக்³கீ³வ பா⁴ஸதி.

‘‘போ⁴கே³ ஸம்ஹரமானஸ்ஸ, ப⁴மரஸ்ஸேவ இரீயதோ;

போ⁴கா³ ஸன்னிசயம் யந்தி, வம்மிகோவுபசீயதி.

‘‘ஏவம் போ⁴கே³ ஸமாஹத்வா [ஸமாஹரித்வா (ஸ்யா.)], அலமத்தோ குலே கி³ஹீ;

சதுதா⁴ விப⁴ஜே போ⁴கே³, ஸ வே மித்தானி க³ந்த²தி.

‘‘ஏகேன போ⁴கே³ பு⁴ஞ்ஜேய்ய, த்³வீஹி கம்மம் பயோஜயே;

சதுத்த²ஞ்ச நிதா⁴பேய்ய, ஆபதா³ஸு ப⁴விஸ்ஸதீ’’தி.

ச²த்³தி³ஸாபடிச்சா²த³னகண்ட³ம்

266. ‘‘கத²ஞ்ச, க³ஹபதிபுத்த, அரியஸாவகோ ச²த்³தி³ஸாபடிச்சா²தீ³ ஹோதி? ச² இமா, க³ஹபதிபுத்த, தி³ஸா வேதி³தப்³பா³. புரத்தி²மா தி³ஸா மாதாபிதரோ வேதி³தப்³பா³, த³க்கி²ணா தி³ஸா ஆசரியா வேதி³தப்³பா³, பச்சி²மா தி³ஸா புத்ததா³ரா வேதி³தப்³பா³, உத்தரா தி³ஸா மித்தாமச்சா வேதி³தப்³பா³, ஹேட்டி²மா தி³ஸா தா³ஸகம்மகரா வேதி³தப்³பா³, உபரிமா தி³ஸா ஸமணப்³ராஹ்மணா வேதி³தப்³பா³.

267. ‘‘பஞ்சஹி கோ², க³ஹபதிபுத்த, டா²னேஹி புத்தேன புரத்தி²மா தி³ஸா மாதாபிதரோ பச்சுபட்டா²தப்³பா³ – ப⁴தோ நே [நேஸம் (ப³ஹூஸு)] ப⁴ரிஸ்ஸாமி, கிச்சம் நேஸம் கரிஸ்ஸாமி, குலவம்ஸம் ட²பேஸ்ஸாமி, தா³யஜ்ஜம் படிபஜ்ஜாமி, அத² வா பன பேதானம் காலங்கதானம் த³க்கி²ணம் அனுப்பத³ஸ்ஸாமீதி. இமேஹி கோ², க³ஹபதிபுத்த, பஞ்சஹி டா²னேஹி புத்தேன புரத்தி²மா தி³ஸா மாதாபிதரோ பச்சுபட்டி²தா பஞ்சஹி டா²னேஹி புத்தம் அனுகம்பந்தி. பாபா நிவாரேந்தி, கல்யாணே நிவேஸேந்தி, ஸிப்பம் ஸிக்கா²பேந்தி, பதிரூபேன தா³ரேன ஸம்யோஜேந்தி, ஸமயே தா³யஜ்ஜம் நிய்யாதே³ந்தி [நிய்யாதேந்தி (க. ஸீ.)]. இமேஹி கோ², க³ஹபதிபுத்த, பஞ்சஹி டா²னேஹி புத்தேன புரத்தி²மா தி³ஸா மாதாபிதரோ பச்சுபட்டி²தா இமேஹி பஞ்சஹி டா²னேஹி புத்தம் அனுகம்பந்தி. ஏவமஸ்ஸ ஏஸா புரத்தி²மா தி³ஸா படிச்ச²ன்னா ஹோதி கே²மா அப்படிப⁴யா.

268. ‘‘பஞ்சஹி கோ², க³ஹபதிபுத்த, டா²னேஹி அந்தேவாஸினா த³க்கி²ணா தி³ஸா ஆசரியா பச்சுபட்டா²தப்³பா³ – உட்டா²னேன உபட்டா²னேன ஸுஸ்ஸுஸாய பாரிசரியாய ஸக்கச்சம் ஸிப்பபடிக்³க³ஹணேன [ஸிப்பம் படிக்³க³ஹணேன (ஸ்யா.), ஸிப்பஉக்³க³ஹணேன (க.)]. இமேஹி கோ², க³ஹபதிபுத்த, பஞ்சஹி டா²னேஹி அந்தேவாஸினா த³க்கி²ணா தி³ஸா ஆசரியா பச்சுபட்டி²தா பஞ்சஹி டா²னேஹி அந்தேவாஸிம் அனுகம்பந்தி – ஸுவினீதம் வினேந்தி, ஸுக்³க³ஹிதம் கா³ஹாபேந்தி, ஸப்³ப³ஸிப்பஸ்ஸுதம் ஸமக்கா²யினோ ப⁴வந்தி, மித்தாமச்சேஸு படியாதே³ந்தி [படிவேதே³ந்தி (ஸ்யா.)], தி³ஸாஸு பரித்தாணம் கரோந்தி. இமேஹி கோ², க³ஹபதிபுத்த, பஞ்சஹி டா²னேஹி அந்தேவாஸினா த³க்கி²ணா தி³ஸா ஆசரியா பச்சுபட்டி²தா இமேஹி பஞ்சஹி டா²னேஹி அந்தேவாஸிம் அனுகம்பந்தி. ஏவமஸ்ஸ ஏஸா த³க்கி²ணா தி³ஸா படிச்ச²ன்னா ஹோதி கே²மா அப்படிப⁴யா.

269. ‘‘பஞ்சஹி கோ², க³ஹபதிபுத்த, டா²னேஹி ஸாமிகேன பச்சி²மா தி³ஸா ப⁴ரியா பச்சுபட்டா²தப்³பா³ – ஸம்மானனாய அனவமானனாய [அவிமானனாய (ஸ்யா. பீ.)] அனதிசரியாய இஸ்ஸரியவோஸ்ஸக்³கே³ன அலங்காரானுப்பதா³னேன. இமேஹி கோ², க³ஹபதிபுத்த, பஞ்சஹி டா²னேஹி ஸாமிகேன பச்சி²மா தி³ஸா ப⁴ரியா பச்சுபட்டி²தா பஞ்சஹி டா²னேஹி ஸாமிகம் அனுகம்பதி – ஸுஸம்விஹிதகம்மந்தா ச ஹோதி, ஸங்க³ஹிதபரிஜனா [ஸுஸங்க³ஹிதபரிஜனா (ஸீ. ஸ்யா. பீ.)] ச, அனதிசாரினீ ச, ஸம்ப⁴தஞ்ச அனுரக்க²தி, த³க்கா² ச ஹோதி அனலஸா ஸப்³ப³கிச்சேஸு. இமேஹி கோ², க³ஹபதிபுத்த, பஞ்சஹி டா²னேஹி ஸாமிகேன பச்சி²மா தி³ஸா ப⁴ரியா பச்சுபட்டி²தா இமேஹி பஞ்சஹி டா²னேஹி ஸாமிகம் அனுகம்பதி. ஏவமஸ்ஸ ஏஸா பச்சி²மா தி³ஸா படிச்ச²ன்னா ஹோதி கே²மா அப்படிப⁴யா.

270. ‘‘பஞ்சஹி கோ², க³ஹபதிபுத்த, டா²னேஹி குலபுத்தேன உத்தரா தி³ஸா மித்தாமச்சா பச்சுபட்டா²தப்³பா³ – தா³னேன பேய்யவஜ்ஜேன [வியவஜ்ஜேன (ஸ்யா. க.)] அத்த²சரியாய ஸமானத்ததாய அவிஸம்வாத³னதாய. இமேஹி கோ², க³ஹபதிபுத்த, பஞ்சஹி டா²னேஹி குலபுத்தேன உத்தரா தி³ஸா மித்தாமச்சா பச்சுபட்டி²தா பஞ்சஹி டா²னேஹி குலபுத்தம் அனுகம்பந்தி – பமத்தம் ரக்க²ந்தி, பமத்தஸ்ஸ ஸாபதேய்யம் ரக்க²ந்தி, பீ⁴தஸ்ஸ ஸரணம் ஹோந்தி, ஆபதா³ஸு ந விஜஹந்தி, அபரபஜா சஸ்ஸ படிபூஜேந்தி. இமேஹி கோ², க³ஹபதிபுத்த, பஞ்சஹி டா²னேஹி குலபுத்தேன உத்தரா தி³ஸா மித்தாமச்சா பச்சுபட்டி²தா இமேஹி பஞ்சஹி டா²னேஹி குலபுத்தம் அனுகம்பந்தி. ஏவமஸ்ஸ ஏஸா உத்தரா தி³ஸா படிச்ச²ன்னா ஹோதி கே²மா அப்படிப⁴யா.

271. ‘‘பஞ்சஹி கோ², க³ஹபதிபுத்த, டா²னேஹி அய்யிரகேன [அயிரகேன (ஸீ. ஸ்யா. பீ.)] ஹேட்டி²மா தி³ஸா தா³ஸகம்மகரா பச்சுபட்டா²தப்³பா³ – யதா²ப³லம் கம்மந்தஸம்விதா⁴னேன ப⁴த்தவேதனானுப்பதா³னேன கி³லானுபட்டா²னேன அச்ச²ரியானம் ரஸானம் ஸம்விபா⁴கே³ன ஸமயே வோஸ்ஸக்³கே³ன. இமேஹி கோ², க³ஹபதிபுத்த, பஞ்சஹி டா²னேஹி அய்யிரகேன ஹேட்டி²மா தி³ஸா தா³ஸகம்மகரா பச்சுபட்டி²தா பஞ்சஹி டா²னேஹி அய்யிரகம் அனுகம்பந்தி – புப்³பு³ட்டா²யினோ ச ஹோந்தி, பச்சா² நிபாதினோ ச, தி³ன்னாதா³யினோ ச, ஸுகதகம்மகரா ச, கித்திவண்ணஹரா ச. இமேஹி கோ², க³ஹபதிபுத்த, பஞ்சஹி டா²னேஹி அய்யிரகேன ஹேட்டி²மா தி³ஸா தா³ஸகம்மகரா பச்சுபட்டி²தா இமேஹி பஞ்சஹி டா²னேஹி அய்யிரகம் அனுகம்பந்தி. ஏவமஸ்ஸ ஏஸா ஹேட்டி²மா தி³ஸா படிச்ச²ன்னா ஹோதி கே²மா அப்படிப⁴யா.

272. ‘‘பஞ்சஹி கோ², க³ஹபதிபுத்த, டா²னேஹி குலபுத்தேன உபரிமா தி³ஸா ஸமணப்³ராஹ்மணா பச்சுபட்டா²தப்³பா³ – மேத்தேன காயகம்மேன மேத்தேன வசீகம்மேன மேத்தேன மனோகம்மேன அனாவடத்³வாரதாய ஆமிஸானுப்பதா³னேன. இமேஹி கோ², க³ஹபதிபுத்த, பஞ்சஹி டா²னேஹி குலபுத்தேன உபரிமா தி³ஸா ஸமணப்³ராஹ்மணா பச்சுபட்டி²தா ச²ஹி டா²னேஹி குலபுத்தம் அனுகம்பந்தி – பாபா நிவாரேந்தி, கல்யாணே நிவேஸேந்தி, கல்யாணேன மனஸா அனுகம்பந்தி, அஸ்ஸுதம் ஸாவேந்தி, ஸுதம் பரியோதா³பேந்தி, ஸக்³க³ஸ்ஸ மக்³க³ம் ஆசிக்க²ந்தி. இமேஹி கோ², க³ஹபதிபுத்த, பஞ்சஹி டா²னேஹி குலபுத்தேன உபரிமா தி³ஸா ஸமணப்³ராஹ்மணா பச்சுபட்டி²தா இமேஹி ச²ஹி டா²னேஹி குலபுத்தம் அனுகம்பந்தி. ஏவமஸ்ஸ ஏஸா உபரிமா தி³ஸா படிச்ச²ன்னா ஹோதி கே²மா அப்படிப⁴யா’’தி.

273. இத³மவோச ப⁴க³வா. இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘மாதாபிதா தி³ஸா புப்³பா³, ஆசரியா த³க்கி²ணா தி³ஸா;

புத்ததா³ரா தி³ஸா பச்சா², மித்தாமச்சா ச உத்தரா.

‘‘தா³ஸகம்மகரா ஹேட்டா², உத்³த⁴ம் ஸமணப்³ராஹ்மணா;

ஏதா தி³ஸா நமஸ்ஸேய்ய, அலமத்தோ குலே கி³ஹீ.

‘‘பண்டி³தோ ஸீலஸம்பன்னோ, ஸண்ஹோ ச படிபா⁴னவா;

நிவாதவுத்தி அத்த²த்³தோ⁴, தாதி³ஸோ லப⁴தே யஸம்.

‘‘உட்டா²னகோ அனலஸோ, ஆபதா³ஸு ந வேத⁴தி;

அச்சி²ன்னவுத்தி மேதா⁴வீ, தாதி³ஸோ லப⁴தே யஸம்.

‘‘ஸங்கா³ஹகோ மித்தகரோ, வத³ஞ்ஞூ வீதமச்ச²ரோ;

நேதா வினேதா அனுனேதா, தாதி³ஸோ லப⁴தே யஸம்.

‘‘தா³னஞ்ச பேய்யவஜ்ஜஞ்ச, அத்த²சரியா ச யா இத⁴;

ஸமானத்ததா ச த⁴ம்மேஸு, தத்த² தத்த² யதா²ரஹம்;

ஏதே கோ² ஸங்க³ஹா லோகே, ரத²ஸ்ஸாணீவ யாயதோ.

‘‘ஏதே ச ஸங்க³ஹா நாஸ்ஸு, ந மாதா புத்தகாரணா;

லபே⁴த² மானம் பூஜம் வா, பிதா வா புத்தகாரணா.

‘‘யஸ்மா ச ஸங்க³ஹா [ஸங்க³ஹே (க.) அட்ட²கதா²யம் இச்சி²தபாடோ²] ஏதே, ஸம்மபேக்க²ந்தி [ஸமவேக்க²ந்தி (ஸீ. பீ. க.)] பண்டி³தா;

தஸ்மா மஹத்தம் பப்போந்தி, பாஸம்ஸா ச ப⁴வந்தி தே’’தி.

274. ஏவம் வுத்தே, ஸிங்கா³லகோ க³ஹபதிபுத்தோ ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே! அபி⁴க்கந்தம், ப⁴ந்தே! ஸேய்யதா²பி, ப⁴ந்தே, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய ‘சக்கு²மந்தோ ரூபானி த³க்க²ந்தீ’தி. ஏவமேவம் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி த⁴ம்மஞ்ச பி⁴க்கு²ஸம்க⁴ஞ்ச. உபாஸகம் மம் ப⁴க³வா தா⁴ரேது, அஜ்ஜதக்³கே³ பாணுபேதம் ஸரணம் க³த’’ந்தி.

ஸிங்கா³லஸுத்தம் [ஸிங்கா³லோவாத³ஸுத்தந்தம் (பீ.)] நிட்டி²தம் அட்ட²மம்.