7. மஹாஸமயஸுத்தம்

331. ஏவம் மே ஸுதம் – ஏகம் ஸமயம் ப⁴க³வா ஸக்கேஸு விஹரதி கபிலவத்து²ஸ்மிம் மஹாவனே மஹதா பி⁴க்கு²ஸங்கே⁴ன ஸத்³தி⁴ம் பஞ்சமத்தேஹி பி⁴க்கு²ஸதேஹி ஸப்³பே³ஹேவ அரஹந்தேஹி; த³ஸஹி ச லோகதா⁴தூஹி தே³வதா யேபு⁴ய்யேன ஸன்னிபதிதா ஹோந்தி ப⁴க³வந்தம் த³ஸ்ஸனாய பி⁴க்கு²ஸங்க⁴ஞ்ச. அத² கோ² சதுன்னம் ஸுத்³தா⁴வாஸகாயிகானம் தே³வதானம் [தே³வானம் (ஸீ. ஸ்யா. பீ.)] ஏதத³ஹோஸி – ‘‘அயம் கோ² ப⁴க³வா ஸக்கேஸு விஹரதி கபிலவத்து²ஸ்மிம் மஹாவனே மஹதா பி⁴க்கு²ஸங்கே⁴ன ஸத்³தி⁴ம் பஞ்சமத்தேஹி பி⁴க்கு²ஸதேஹி ஸப்³பே³ஹேவ அரஹந்தேஹி; த³ஸஹி ச லோகதா⁴தூஹி தே³வதா யேபு⁴ய்யேன ஸன்னிபதிதா ஹோந்தி ப⁴க³வந்தம் த³ஸ்ஸனாய பி⁴க்கு²ஸங்க⁴ஞ்ச. யம்னூன மயம்பி யேன ப⁴க³வா தேனுபஸங்கமேய்யாம; உபஸங்கமித்வா ப⁴க³வதோ ஸந்திகே பச்சேகம் கா³த²ம் [பச்சேககா³த²ம் (ஸீ. ஸ்யா. பீ.), பச்சேககா³தா² (க. ஸீ.)] பா⁴ஸேய்யாமா’’தி.

332. அத² கோ² தா தே³வதா ஸேய்யதா²பி நாம ப³லவா புரிஸோ ஸமிஞ்ஜிதம் வா பா³ஹம் பஸாரேய்ய பஸாரிதம் வா பா³ஹம் ஸமிஞ்ஜேய்ய, ஏவமேவ ஸுத்³தா⁴வாஸேஸு தே³வேஸு அந்தரஹிதா ப⁴க³வதோ புரதோ பாதுரஹேஸும். அத² கோ² தா தே³வதா ப⁴க³வந்தம் அபி⁴வாதே³த்வா ஏகமந்தம் அட்ட²ம்ஸு. ஏகமந்தம் டி²தா கோ² ஏகா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘மஹாஸமயோ பவனஸ்மிம், தே³வகாயா ஸமாக³தா;

ஆக³தம்ஹ இமம் த⁴ம்மஸமயம், த³க்கி²தாயே அபராஜிதஸங்க⁴’’ந்தி.

அத² கோ² அபரா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘தத்ர பி⁴க்க²வோ ஸமாத³ஹம்ஸு, சித்தமத்தனோ உஜுகம் அகம்ஸு [உஜுகமகம்ஸு (ஸீ. ஸ்யா. பீ.)];

ஸாரதீ²வ நேத்தானி க³ஹேத்வா, இந்த்³ரியானி ரக்க²ந்தி பண்டி³தா’’தி.

அத² கோ² அபரா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘சே²த்வா கீ²லம் சே²த்வா பலிக⁴ம், இந்த³கீ²லம் ஊஹச்ச [உஹச்ச (க.)] மனேஜா;

தே சரந்தி ஸுத்³தா⁴ விமலா, சக்கு²மதா ஸுத³ந்தா ஸுஸுனாகா³’’தி.

அத² கோ² அபரா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘யேகேசி பு³த்³த⁴ம் ஸரணம் க³தாஸே, ந தே க³மிஸ்ஸந்தி அபாயபூ⁴மிம்;

பஹாய மானுஸம் தே³ஹம், தே³வகாயம் பரிபூரேஸ்ஸந்தீ’’தி.

தே³வதாஸன்னிபாதா

333. அத² கோ² ப⁴க³வா பி⁴க்கூ² ஆமந்தேஸி – ‘‘யேபு⁴ய்யேன, பி⁴க்க²வே, த³ஸஸு லோகதா⁴தூஸு தே³வதா ஸன்னிபதிதா ஹோந்தி [( ) ஸீ. இபோத்த²கேஸு நத்தி²], ததா²க³தம் த³ஸ்ஸனாய பி⁴க்கு²ஸங்க⁴ஞ்ச. யேபி தே, பி⁴க்க²வே, அஹேஸும் அதீதமத்³தா⁴னம் அரஹந்தோ ஸம்மாஸம்பு³த்³தா⁴, தேஸம்பி ப⁴க³வந்தானம் ஏதம்பரமாயேவ [ஏதபரமாயேவ (ஸீ. ஸ்யா. பீ.)] தே³வதா ஸன்னிபதிதா அஹேஸும் ஸேய்யதா²பி மய்ஹம் ஏதரஹி. யேபி தே, பி⁴க்க²வே, ப⁴விஸ்ஸந்தி அனாக³தமத்³தா⁴னம் அரஹந்தோ ஸம்மாஸம்பு³த்³தா⁴, தேஸம்பி ப⁴க³வந்தானம் ஏதம்பரமாயேவ தே³வதா ஸன்னிபதிதா ப⁴விஸ்ஸந்தி ஸேய்யதா²பி மய்ஹம் ஏதரஹி. ஆசிக்கி²ஸ்ஸாமி, பி⁴க்க²வே, தே³வகாயானம் நாமானி; கித்தயிஸ்ஸாமி, பி⁴க்க²வே, தே³வகாயானம் நாமானி; தே³ஸேஸ்ஸாமி, பி⁴க்க²வே, தே³வகாயானம் நாமானி. தம் ஸுணாத², ஸாது⁴கம் மனஸிகரோத², பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும்.

334. ப⁴க³வா ஏதத³வோச –

‘‘ஸிலோகமனுகஸ்ஸாமி, யத்த² பு⁴ம்மா தத³ஸ்ஸிதா;

யே ஸிதா கி³ரிக³ப்³ப⁴ரம், பஹிதத்தா ஸமாஹிதா.

‘‘புதூ²ஸீஹாவ ஸல்லீனா, லோமஹம்ஸாபி⁴ஸம்பு⁴னோ;

ஓதா³தமனஸா ஸுத்³தா⁴, விப்பஸன்னமனாவிலா’’ [விப்பஸன்னாமனாவிலா (பீ. க.)].

பி⁴ய்யோ பஞ்சஸதே ஞத்வா, வனே காபிலவத்த²வே;

ததோ ஆமந்தயீ ஸத்தா², ஸாவகே ஸாஸனே ரதே.

‘‘தே³வகாயா அபி⁴க்கந்தா, தே விஜானாத² பி⁴க்க²வோ’’;

தே ச ஆதப்பமகரும், ஸுத்வா பு³த்³த⁴ஸ்ஸ ஸாஸனம்.

தேஸம் பாதுரஹு ஞாணம், அமனுஸ்ஸானத³ஸ்ஸனம்;

அப்பேகே ஸதமத்³த³க்கு²ம், ஸஹஸ்ஸம் அத² ஸத்தரிம்.

ஸதம் ஏகே ஸஹஸ்ஸானம், அமனுஸ்ஸானமத்³த³ஸும்;

அப்பேகேனந்தமத்³த³க்கு²ம், தி³ஸா ஸப்³பா³ பு²டா அஹும்.

தஞ்ச ஸப்³ப³ம் அபி⁴ஞ்ஞாய, வவத்தி²த்வான [வவக்கி²த்வான (ஸீ. ஸ்யா. பீ.), அவேக்கி²த்வான (டீகா)] சக்கு²மா;

ததோ ஆமந்தயீ ஸத்தா², ஸாவகே ஸாஸனே ரதே.

‘‘தே³வகாயா அபி⁴க்கந்தா, தே விஜானாத² பி⁴க்க²வோ;

யே வோஹம் கித்தயிஸ்ஸாமி, கி³ராஹி அனுபுப்³ப³ஸோ.

335. ‘‘ஸத்தஸஹஸ்ஸா தே யக்கா², பு⁴ம்மா காபிலவத்த²வா.

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘ச²ஸஹஸ்ஸா ஹேமவதா, யக்கா² நானத்தவண்ணினோ;

இத்³தி⁴மந்தோ ஜுதீமந்தோ [ஜுதீமந்தோ (ஸீ. பீ.)], வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘ஸாதாகி³ரா திஸஹஸ்ஸா, யக்கா² நானத்தவண்ணினோ;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘இச்சேதே ஸோளஸஸஹஸ்ஸா, யக்கா² நானத்தவண்ணினோ;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘வேஸ்ஸாமித்தா பஞ்சஸதா, யக்கா² நானத்தவண்ணினோ;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘கும்பீ⁴ரோ ராஜக³ஹிகோ, வேபுல்லஸ்ஸ நிவேஸனம்;

பி⁴ய்யோ நம் ஸதஸஹஸ்ஸம், யக்கா²னம் பயிருபாஸதி;

கும்பீ⁴ரோ ராஜக³ஹிகோ, ஸோபாகா³ ஸமிதிம் வனம்.

336. ‘‘புரிமஞ்ச தி³ஸம் ராஜா, த⁴தரட்டோ² பஸாஸதி.

க³ந்த⁴ப்³பா³னம் அதி⁴பதி, மஹாராஜா யஸஸ்ஸிஸோ.

‘‘புத்தாபி தஸ்ஸ ப³ஹவோ, இந்த³னாமா மஹப்³ப³லா;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘த³க்கி²ணஞ்ச தி³ஸம் ராஜா, விரூள்ஹோ தம் பஸாஸதி [தப்பஸாஸதி (ஸ்யா.)];

கும்ப⁴ண்டா³னம் அதி⁴பதி, மஹாராஜா யஸஸ்ஸிஸோ.

‘‘புத்தாபி தஸ்ஸ ப³ஹவோ, இந்த³னாமா மஹப்³ப³லா;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘பச்சி²மஞ்ச தி³ஸம் ராஜா, விரூபக்கோ² பஸாஸதி;

நாகா³னஞ்ச அதி⁴பதி, மஹாராஜா யஸஸ்ஸிஸோ.

‘‘புத்தாபி தஸ்ஸ ப³ஹவோ, இந்த³னாமா மஹப்³ப³லா;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘உத்தரஞ்ச தி³ஸம் ராஜா, குவேரோ தம் பஸாஸதி;

யக்கா²னஞ்ச அதி⁴பதி, மஹாராஜா யஸஸ்ஸிஸோ.

‘‘புத்தாபி தஸ்ஸ ப³ஹவோ, இந்த³னாமா மஹப்³ப³லா;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘புரிமம் தி³ஸம் த⁴தரட்டோ², த³க்கி²ணேன விரூள்ஹகோ;

பச்சி²மேன விரூபக்கோ², குவேரோ உத்தரம் தி³ஸம்.

‘‘சத்தாரோ தே மஹாராஜா, ஸமந்தா சதுரோ தி³ஸா;

த³த்³த³ல்லமானா [த³த்³த³ள்ஹமானா (க.)] அட்ட²ம்ஸு, வனே காபிலவத்த²வே.

337. ‘‘தேஸம் மாயாவினோ தா³ஸா, ஆகு³ம் [ஆகூ³ (ஸ்யா.), ஆகு³ (ஸீ. பீ.) ஏவமுபரிபி] வஞ்சனிகா ஸடா².

மாயா குடேண்டு³ விடேண்டு³ [வேடேண்டு³ (ஸீ. ஸ்யா. பீ.)], விடுச்ச [விடூ ச (ஸ்யா.)] விடுடோ ஸஹ.

‘‘சந்த³னோ காமஸேட்டோ² ச, கின்னிக⁴ண்டு³ [கின்னுக⁴ண்டு³ (ஸீ. ஸ்யா. பீ.)] நிக⁴ண்டு³ ச;

பனாதோ³ ஓபமஞ்ஞோ ச, தே³வஸூதோ ச மாதலி.

‘‘சித்தஸேனோ ச க³ந்த⁴ப்³போ³, நளோராஜா ஜனேஸபோ⁴ [ஜனோஸபோ⁴ (ஸ்யா.)];

ஆகா³ பஞ்சஸிகோ² சேவ, திம்ப³ரூ ஸூரியவச்சஸா [ஸுரியவச்சஸா (ஸீ. பீ.)].

‘‘ஏதே சஞ்ஞே ச ராஜானோ, க³ந்த⁴ப்³பா³ ஸஹ ராஜுபி⁴;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

338. ‘‘அதா²கு³ம் நாக³ஸா நாகா³, வேஸாலா ஸஹதச்ச²கா.

கம்ப³லஸ்ஸதரா ஆகு³ம், பாயாகா³ ஸஹ ஞாதிபி⁴.

‘‘யாமுனா த⁴தரட்டா² ச, ஆகூ³ நாகா³ யஸஸ்ஸினோ;

ஏராவணோ மஹானாகோ³, ஸோபாகா³ ஸமிதிம் வனம்.

‘‘யே நாக³ராஜே ஸஹஸா ஹரந்தி, தி³ப்³பா³ தி³ஜா பக்கி² விஸுத்³த⁴சக்கூ²;

வேஹாயஸா [வேஹாஸயா (ஸீ. பீ.)] தே வனமஜ்ஜ²பத்தா, சித்ரா ஸுபண்ணா இதி தேஸ நாமம்.

‘‘அப⁴யம் ததா³ நாக³ராஜானமாஸி, ஸுபண்ணதோ கே²மமகாஸி பு³த்³தோ⁴;

ஸண்ஹாஹி வாசாஹி உபவ்ஹயந்தா, நாகா³ ஸுபண்ணா ஸரணமகம்ஸு பு³த்³த⁴ம்.

339. ‘‘ஜிதா வஜிரஹத்தே²ன, ஸமுத்³த³ம் அஸுராஸிதா.

பா⁴தரோ வாஸவஸ்ஸேதே, இத்³தி⁴மந்தோ யஸஸ்ஸினோ.

‘‘காலகஞ்சா மஹாபி⁴ஸ்மா [காலகஞ்ஜா மஹாபி⁴ம்ஸா (ஸீ. பீ.)], அஸுரா தா³னவேக⁴ஸா;

வேபசித்தி ஸுசித்தி ச, பஹாராதோ³ நமுசீ ஸஹ.

‘‘ஸதஞ்ச ப³லிபுத்தானம், ஸப்³பே³ வேரோசனாமகா;

ஸன்னய்ஹித்வா ப³லிஸேனம் [ப³லீஸேனம் (ஸ்யா.)], ராஹுப⁴த்³த³முபாக³மும்;

ஸமயோதா³னி ப⁴த்³த³ந்தே, பி⁴க்கூ²னம் ஸமிதிம் வனம்.

340. ‘‘ஆபோ ச தே³வா பத²வீ, தேஜோ வாயோ ததா³க³மும்.

வருணா வாரணா [வாருணா (ஸ்யா.)] தே³வா, ஸோமோ ச யஸஸா ஸஹ.

‘‘மேத்தா கருணா காயிகா, ஆகு³ம் தே³வா யஸஸ்ஸினோ;

த³ஸேதே த³ஸதா⁴ காயா, ஸப்³பே³ நானத்தவண்ணினோ.

‘‘இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘வேண்டு³தே³வா ஸஹலி ச [வேண்ஹூச தே³வா ஸஹலீச (ஸீ. பீ.)], அஸமா ச து³வே யமா;

சந்த³ஸ்ஸூபனிஸா தே³வா, சந்த³மாகு³ம் புரக்க²த்வா.

‘‘ஸூரியஸ்ஸூபனிஸா [ஸுரியஸ்ஸூபனிஸா (ஸீ. ஸ்யா. பீ.)] தே³வா, ஸூரியமாகு³ம் புரக்க²த்வா;

நக்க²த்தானி புரக்க²த்வா, ஆகு³ம் மந்த³வலாஹகா.

‘‘வஸூனம் வாஸவோ ஸேட்டோ², ஸக்கோபாகா³ புரிந்த³தோ³;

த³ஸேதே த³ஸதா⁴ காயா, ஸப்³பே³ நானத்தவண்ணினோ.

‘‘இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘அதா²கு³ம் ஸஹபூ⁴ தே³வா, ஜலமக்³கி³ஸிகா²ரிவ;

அரிட்ட²கா ச ரோஜா ச, உமாபுப்ப²னிபா⁴ஸினோ.

‘‘வருணா ஸஹத⁴ம்மா ச, அச்சுதா ச அனேஜகா;

ஸூலேய்யருசிரா ஆகு³ம், ஆகு³ம் வாஸவனேஸினோ;

த³ஸேதே த³ஸதா⁴ காயா, ஸப்³பே³ நானத்தவண்ணினோ.

‘‘இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘ஸமானா மஹாஸமனா, மானுஸா மானுஸுத்தமா;

கி²ட்³டா³பதோ³ஸிகா ஆகு³ம், ஆகு³ம் மனோபதோ³ஸிகா.

‘‘அதா²கு³ம் ஹரயோ தே³வா, யே ச லோஹிதவாஸினோ;

பாரகா³ மஹாபாரகா³, ஆகு³ம் தே³வா யஸஸ்ஸினோ;

த³ஸேதே த³ஸதா⁴ காயா, ஸப்³பே³ நானத்தவண்ணினோ.

‘‘இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘ஸுக்கா கரம்பா⁴ [கரும்ஹா (ஸீ. ஸ்யா. பீ.)] அருணா, ஆகு³ம் வேக⁴னஸா ஸஹ;

ஓதா³தக³ய்ஹா பாமோக்கா², ஆகு³ம் தே³வா விசக்க²ணா.

‘‘ஸதா³மத்தா ஹாரக³ஜா, மிஸ்ஸகா ச யஸஸ்ஸினோ;

த²னயம் ஆக³ பஜ்ஜுன்னோ, யோ தி³ஸா அபி⁴வஸ்ஸதி.

‘‘த³ஸேதே த³ஸதா⁴ காயா, ஸப்³பே³ நானத்தவண்ணினோ;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘கே²மியா துஸிதா யாமா, கட்ட²கா ச யஸஸ்ஸினோ;

லம்பீ³தகா லாமஸேட்டா², ஜோதினாமா ச ஆஸவா;

நிம்மானரதினோ ஆகு³ம், அதா²கு³ம் பரனிம்மிதா.

‘‘த³ஸேதே த³ஸதா⁴ காயா, ஸப்³பே³ நானத்தவண்ணினோ;

இத்³தி⁴மந்தோ ஜுதிமந்தோ, வண்ணவந்தோ யஸஸ்ஸினோ;

மோத³மானா அபி⁴க்காமும், பி⁴க்கூ²னம் ஸமிதிம் வனம்.

‘‘ஸட்டே²தே தே³வனிகாயா, ஸப்³பே³ நானத்தவண்ணினோ;

நாமன்வயேன ஆக³ச்சு²ம் [ஆக³ஞ்சு²ம் (ஸீ. ஸ்யா. பீ.)], யே சஞ்ஞே ஸதி³ஸா ஸஹ.

‘‘‘பவுட்ட²ஜாதிமகி²லம் [பவுத்த²ஜாதிம் அகி²லம் (ஸீ. பீ.)], ஓக⁴திண்ணமனாஸவம்;

த³க்கே²மோக⁴தரம் நாக³ம், சந்த³ம்வ அஸிதாதிக³ம்’.

341. ‘‘ஸுப்³ரஹ்மா பரமத்தோ ச [பரமத்தோ² ச (க.)], புத்தா இத்³தி⁴மதோ ஸஹ.

ஸனங்குமாரோ திஸ்ஸோ ச, ஸோபாக³ ஸமிதிம் வனம்.

‘‘ஸஹஸ்ஸம் ப்³ரஹ்மலோகானம், மஹாப்³ரஹ்மாபி⁴திட்ட²தி;

உபபன்னோ ஜுதிமந்தோ, பி⁴ஸ்மாகாயோ யஸஸ்ஸிஸோ.

‘‘த³ஸேத்த² இஸ்ஸரா ஆகு³ம், பச்சேகவஸவத்தினோ;

தேஸஞ்ச மஜ்ஜ²தோ ஆக³, ஹாரிதோ பரிவாரிதோ.

342. ‘‘தே ச ஸப்³பே³ அபி⁴க்கந்தே, ஸஇந்தே³ [ஸிந்தே³ (ஸ்யா.)] தே³வே ஸப்³ரஹ்மகே.