5. ஜனவஸப⁴ஸுத்தம்

நாதிகியாதி³ப்³யாகரணம்

273. ஏவம் மே ஸுதம் – ஏகம் ஸமயம் ப⁴க³வா நாதிகே [நாதி³கே (ஸீ. ஸ்யா. பீ.)] விஹரதி கி³ஞ்ஜகாவஸதே². தேன கோ² பன ஸமயேன ப⁴க³வா பரிதோ பரிதோ ஜனபதே³ஸு பரிசாரகே அப்³ப⁴தீதே காலங்கதே உபபத்தீஸு ப்³யாகரோதி காஸிகோஸலேஸு வஜ்ஜிமல்லேஸு சேதிவம்ஸேஸு [சேதியவம்ஸேஸு (க.)] குருபஞ்சாலேஸு மஜ்ஜ²ஸூரஸேனேஸு [மச்ச²ஸுரஸேனேஸு (ஸ்யா.), மச்ச²ஸூரஸேனேஸு (ஸீ. பீ.)] – ‘‘அஸு அமுத்ர உபபன்னோ, அஸு அமுத்ர உபபன்னோ [உபபன்னோதி (க.)]. பரோபஞ்ஞாஸ நாதிகியா பரிசாரகா அப்³ப⁴தீதா காலங்கதா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. ஸாதி⁴கா நவுதி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ, ஸகிதே³வ [ஸகிம்தே³வ (க.)] இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தி. ஸாதிரேகானி பஞ்சஸதானி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’’தி.

274. அஸ்ஸோஸும் கோ² நாதிகியா பரிசாரகா – ‘‘ப⁴க³வா கிர பரிதோ பரிதோ ஜனபதே³ஸு பரிசாரகே அப்³ப⁴தீதே காலங்கதே உபபத்தீஸு ப்³யாகரோதி காஸிகோஸலேஸு வஜ்ஜிமல்லேஸு சேதிவம்ஸேஸு குருபஞ்சாலேஸு மஜ்ஜ²ஸூரஸேனேஸு – ‘அஸு அமுத்ர உபபன்னோ, அஸு அமுத்ர உபபன்னோ. பரோபஞ்ஞாஸ நாதிகியா பரிசாரகா அப்³ப⁴தீதா காலங்கதா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. ஸாதி⁴கா நவுதி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தி. ஸாதிரேகானி பஞ்சஸதானி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’தி. தேன ச நாதிகியா பரிசாரகா அத்தமனா அஹேஸும் பமுதி³தா பீதிஸோமனஸ்ஸஜாதா ப⁴க³வதோ பஞ்ஹவேய்யாகரணம் [பஞ்ஹாவேய்யாகரணம் (ஸ்யா. க.)] ஸுத்வா.

275. அஸ்ஸோஸி கோ² ஆயஸ்மா ஆனந்தோ³ – ‘‘ப⁴க³வா கிர பரிதோ பரிதோ ஜனபதே³ஸு பரிசாரகே அப்³ப⁴தீதே காலங்கதே உபபத்தீஸு ப்³யாகரோதி காஸிகோஸலேஸு வஜ்ஜிமல்லேஸு சேதிவம்ஸேஸு குருபஞ்சாலேஸு மஜ்ஜ²ஸூரஸேனேஸு – ‘அஸு அமுத்ர உபபன்னோ, அஸு அமுத்ர உபபன்னோ. பரோபஞ்ஞாஸ நாதிகியா பரிசாரகா அப்³ப⁴தீதா காலங்கதா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. ஸாதி⁴கா நவுதி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தி. ஸாதிரேகானி பஞ்சஸதானி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’தி. தேன ச நாதிகியா பரிசாரகா அத்தமனா அஹேஸும் பமுதி³தா பீதிஸோமனஸ்ஸஜாதா ப⁴க³வதோ பஞ்ஹவேய்யாகரணம் ஸுத்வா’’தி.

ஆனந்த³பரிகதா²

276. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘இமே கோ² பனாபி அஹேஸும் மாக³த⁴கா பரிசாரகா ப³ஹூ சேவ ரத்தஞ்ஞூ ச அப்³ப⁴தீதா காலங்கதா. ஸுஞ்ஞா மஞ்ஞே அங்க³மக³தா⁴ அங்க³மாக³த⁴கேஹி [அங்க³மாக³தி⁴கேஹி (ஸ்யா.)] பரிசாரகேஹி அப்³ப⁴தீதேஹி காலங்கதேஹி. தே கோ² பனாபி [தேன கோ² பனாபி (ஸ்யா.)] அஹேஸும் பு³த்³தே⁴ பஸன்னா த⁴ம்மே பஸன்னா ஸங்கே⁴ பஸன்னா ஸீலேஸு பரிபூரகாரினோ. தே அப்³ப⁴தீதா காலங்கதா ப⁴க³வதா அப்³யாகதா; தேஸம்பிஸ்ஸ ஸாது⁴ வேய்யாகரணம், ப³ஹுஜனோ பஸீதே³ய்ய, ததோ க³ச்சே²ய்ய ஸுக³திம். அயம் கோ² பனாபி அஹோஸி ராஜா மாக³தோ⁴ ஸேனியோ பி³ம்பி³ஸாரோ த⁴ம்மிகோ த⁴ம்மராஜா ஹிதோ ப்³ராஹ்மணக³ஹபதிகானம் நேக³மானஞ்சேவ ஜானபதா³னஞ்ச. அபிஸ்ஸுத³ம் மனுஸ்ஸா கித்தயமானரூபா விஹரந்தி – ‘ஏவம் நோ ஸோ த⁴ம்மிகோ த⁴ம்மராஜா ஸுகா²பேத்வா காலங்கதோ, ஏவம் மயம் தஸ்ஸ த⁴ம்மிகஸ்ஸ த⁴ம்மரஞ்ஞோ விஜிதே பா²ஸு [பா²ஸுகம் (ஸ்யா.)] விஹரிம்ஹா’தி. ஸோ கோ² பனாபி அஹோஸி பு³த்³தே⁴ பஸன்னோ த⁴ம்மே பஸன்னோ ஸங்கே⁴ பஸன்னோ ஸீலேஸு பரிபூரகாரீ. அபிஸ்ஸுத³ம் மனுஸ்ஸா ஏவமாஹம்ஸு – ‘யாவ மரணகாலாபி ராஜா மாக³தோ⁴ ஸேனியோ பி³ம்பி³ஸாரோ ப⁴க³வந்தம் கித்தயமானரூபோ காலங்கதோ’தி. ஸோ அப்³ப⁴தீதோ காலங்கதோ ப⁴க³வதா அப்³யாகதோ. தஸ்ஸபிஸ்ஸ ஸாது⁴ வேய்யாகரணம் ப³ஹுஜனோ பஸீதே³ய்ய, ததோ க³ச்சே²ய்ய ஸுக³திம். ப⁴க³வதோ கோ² பன ஸம்போ³தி⁴ மக³தே⁴ஸு. யத்த² கோ² பன ப⁴க³வதோ ஸம்போ³தி⁴ மக³தே⁴ஸு, கத²ம் தத்ர ப⁴க³வா மாக³த⁴கே பரிசாரகே அப்³ப⁴தீதே காலங்கதே உபபத்தீஸு ந ப்³யாகரேய்ய. ப⁴க³வா சே கோ² பன மாக³த⁴கே பரிசாரகே அப்³ப⁴தீதே காலங்கதே உபபத்தீஸு ந ப்³யாகரேய்ய, தீ³னமனா [நின்னமனா (ஸ்யா.), தீ³னமானா (ஸீ. பீ.)] தேனஸ்ஸு மாக³த⁴கா பரிசாரகா; யேன கோ² பனஸ்ஸு தீ³னமனா மாக³த⁴கா பரிசாரகா கத²ம் தே ப⁴க³வா ந ப்³யாகரேய்யா’’தி?

277. இத³மாயஸ்மா ஆனந்தோ³ மாக³த⁴கே பரிசாரகே ஆரப்³ப⁴ ஏகோ ரஹோ அனுவிசிந்தேத்வா ரத்தியா பச்சூஸஸமயம் பச்சுட்டா²ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே – ‘ப⁴க³வா கிர பரிதோ பரிதோ ஜனபதே³ஸு பரிசாரகே அப்³ப⁴தீதே காலங்கதே உபபத்தீஸு ப்³யாகரோதி காஸிகோஸலேஸு வஜ்ஜிமல்லேஸு சேதிவம்ஸேஸு குருபஞ்சாலேஸு மஜ்ஜ²ஸூரஸேனேஸு – ‘‘அஸு அமுத்ர உபபன்னோ, அஸு அமுத்ர உபபன்னோ. பரோபஞ்ஞாஸ நாதிகியா பரிசாரகா அப்³ப⁴தீதா காலங்கதா பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. ஸாதி⁴கா நவுதி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தி. ஸாதிரேகானி பஞ்சஸதானி நாதிகியா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணாதி. தேன ச நாதிகியா பரிசாரகா அத்தமனா அஹேஸும் பமுதி³தா பீதிஸோமனஸ்ஸஜாதா ப⁴க³வதோ பஞ்ஹவேய்யாகரணம் ஸுத்வா’’தி. இமே கோ² பனாபி, ப⁴ந்தே, அஹேஸும் மாக³த⁴கா பரிசாரகா ப³ஹூ சேவ ரத்தஞ்ஞூ ச அப்³ப⁴தீதா காலங்கதா. ஸுஞ்ஞா மஞ்ஞே அங்க³மக³தா⁴ அங்க³மாக³த⁴கேஹி பரிசாரகேஹி அப்³ப⁴தீதேஹி காலங்கதேஹி. தே கோ² பனாபி, ப⁴ந்தே, அஹேஸும் பு³த்³தே⁴ பஸன்னா த⁴ம்மே பஸன்னா ஸங்கே⁴ பஸன்னா ஸீலேஸு பரிபூரகாரினோ, தே அப்³ப⁴தீதா காலங்கதா ப⁴க³வதா அப்³யாகதா. தேஸம்பிஸ்ஸ ஸாது⁴ வேய்யாகரணம், ப³ஹுஜனோ பஸீதே³ய்ய, ததோ க³ச்சே²ய்ய ஸுக³திம். அயம் கோ² பனாபி, ப⁴ந்தே, அஹோஸி ராஜா மாக³தோ⁴ ஸேனியோ பி³ம்பி³ஸாரோ த⁴ம்மிகோ த⁴ம்மராஜா ஹிதோ ப்³ராஹ்மணக³ஹபதிகானம் நேக³மானஞ்சேவ ஜானபதா³னஞ்ச. அபிஸ்ஸுத³ம் மனுஸ்ஸா கித்தயமானரூபா விஹரந்தி – ‘ஏவம் நோ ஸோ த⁴ம்மிகோ த⁴ம்மராஜா ஸுகா²பேத்வா காலங்கதோ. ஏவம் மயம் தஸ்ஸ த⁴ம்மிகஸ்ஸ த⁴ம்மரஞ்ஞோ விஜிதே பா²ஸு விஹரிம்ஹா’தி. ஸோ கோ² பனாபி, ப⁴ந்தே, அஹோஸி பு³த்³தே⁴ பஸன்னோ த⁴ம்மே பஸன்னோ ஸங்கே⁴ பஸன்னோ ஸீலேஸு பரிபூரகாரீ. அபிஸ்ஸுத³ம் மனுஸ்ஸா ஏவமாஹம்ஸு – ‘யாவ மரணகாலாபி ராஜா மாக³தோ⁴ ஸேனியோ பி³ம்பி³ஸாரோ ப⁴க³வந்தம் கித்தயமானரூபோ காலங்கதோ’தி. ஸோ அப்³ப⁴தீதோ காலங்கதோ ப⁴க³வதா அப்³யாகதோ; தஸ்ஸபிஸ்ஸ ஸாது⁴ வேய்யாகரணம், ப³ஹுஜனோ பஸீதே³ய்ய, ததோ க³ச்சே²ய்ய ஸுக³திம். ப⁴க³வதோ கோ² பன, ப⁴ந்தே, ஸம்போ³தி⁴ மக³தே⁴ஸு. யத்த² கோ² பன, ப⁴ந்தே, ப⁴க³வதோ ஸம்போ³தி⁴ மக³தே⁴ஸு, கத²ம் தத்ர ப⁴க³வா மாக³த⁴கே பரிசாரகே அப்³ப⁴தீதே காலங்கதே உபபத்தீஸு ந ப்³யாகரேய்ய? ப⁴க³வா சே கோ² பன, ப⁴ந்தே, மாக³த⁴கே பரிசாரகே அப்³ப⁴தீதே காலங்கதே உபபத்தீஸு ந ப்³யாகரேய்ய தீ³னமனா தேனஸ்ஸு மாக³த⁴கா பரிசாரகா; யேன கோ² பனஸ்ஸு தீ³னமனா மாக³த⁴கா பரிசாரகா கத²ம் தே ப⁴க³வா ந ப்³யாகரேய்யா’’தி. இத³மாயஸ்மா ஆனந்தோ³ மாக³த⁴கே பரிசாரகே ஆரப்³ப⁴ ப⁴க³வதோ ஸம்முகா² பரிகத²ம் கத்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

278. அத² கோ² ப⁴க³வா அசிரபக்கந்தே ஆயஸ்மந்தே ஆனந்தே³ புப்³ப³ண்ஹஸமயம் நிவாஸேத்வா பத்தசீவரமாதா³ய நாதிகம் பிண்டா³ய பாவிஸி. நாதிகே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ பாதே³ பக்கா²லேத்வா கி³ஞ்ஜகாவஸத²ம் பவிஸித்வா மாக³த⁴கே பரிசாரகே ஆரப்³ப⁴ அட்டி²ம் கத்வா [அட்டி²கத்வா (ஸீ. ஸ்யா. பீ.)] மனஸிகத்வா ஸப்³ப³ம் சேதஸா [ஸப்³ப³சேதஸா (பீ.)] ஸமன்னாஹரித்வா பஞ்ஞத்தே ஆஸனே நிஸீதி³ – ‘‘க³திம் நேஸம் ஜானிஸ்ஸாமி அபி⁴ஸம்பராயம், யம்க³திகா தே ப⁴வந்தோ யம்அபி⁴ஸம்பராயா’’தி. அத்³த³ஸா கோ² ப⁴க³வா மாக³த⁴கே பரிசாரகே ‘‘யம்க³திகா தே ப⁴வந்தோ யம்அபி⁴ஸம்பராயா’’தி. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ கி³ஞ்ஜகாவஸதா² நிக்க²மித்வா விஹாரபச்சா²யாயம் பஞ்ஞத்தே ஆஸனே நிஸீதி³.

279. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘உபஸந்தபதி³ஸ்ஸோ [உபஸந்தபதிஸோ (க.)] ப⁴ந்தே ப⁴க³வா பா⁴திரிவ ப⁴க³வதோ முக²வண்ணோ விப்பஸன்னத்தா இந்த்³ரியானம். ஸந்தேன நூனஜ்ஜ ப⁴ந்தே ப⁴க³வா விஹாரேன விஹாஸீ’’தி? ‘‘யதே³வ கோ² மே த்வம், ஆனந்த³, மாக³த⁴கே பரிசாரகே ஆரப்³ப⁴ ஸம்முகா² பரிகத²ம் கத்வா உட்டா²யாஸனா பக்கந்தோ, ததே³வாஹம் நாதிகே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ பாதே³ பக்கா²லேத்வா கி³ஞ்ஜகாவஸத²ம் பவிஸித்வா மாக³த⁴கே பரிசாரகே ஆரப்³ப⁴ அட்டி²ம் கத்வா மனஸிகத்வா ஸப்³ப³ம் சேதஸா ஸமன்னாஹரித்வா பஞ்ஞத்தே ஆஸனே நிஸீதி³ம் – ‘க³திம் நேஸம் ஜானிஸ்ஸாமி அபி⁴ஸம்பராயம், யம்க³திகா தே ப⁴வந்தோ யம்அபி⁴ஸம்பராயா’தி. அத்³த³ஸம் கோ² அஹம், ஆனந்த³, மாக³த⁴கே பரிசாரகே ‘யம்க³திகா தே ப⁴வந்தோ யம்அபி⁴ஸம்பராயா’’’தி.

ஜனவஸப⁴யக்கோ²

280. ‘‘அத² கோ², ஆனந்த³, அந்தரஹிதோ யக்கோ² ஸத்³த³மனுஸ்ஸாவேஸி – ‘ஜனவஸபோ⁴ அஹம் ப⁴க³வா; ஜனவஸபோ⁴ அஹம் ஸுக³தா’தி. அபி⁴ஜானாஸி நோ த்வம், ஆனந்த³, இதோ புப்³பே³ ஏவரூபம் நாமதே⁴ய்யம் ஸுதம் [ஸுத்வா (பீ.)] யதி³த³ம் ஜனவஸபோ⁴’’தி?

‘‘ந கோ² அஹம், ப⁴ந்தே, அபி⁴ஜானாமி இதோ புப்³பே³ ஏவரூபம் நாமதே⁴ய்யம் ஸுதம் யதி³த³ம் ஜனவஸபோ⁴தி, அபி ச மே, ப⁴ந்தே, லோமானி ஹட்டா²னி ‘ஜனவஸபோ⁴’தி நாமதே⁴ய்யம் ஸுத்வா. தஸ்ஸ மய்ஹம், ப⁴ந்தே, ஏதத³ஹோஸி – ‘ந ஹி நூன ஸோ ஓரகோ யக்கோ² ப⁴விஸ்ஸதி யதி³த³ம் ஏவரூபம் நாமதே⁴ய்யம் ஸுபஞ்ஞத்தம் யதி³த³ம் ஜனவஸபோ⁴’’தி. ‘‘அனந்தரா கோ², ஆனந்த³, ஸத்³த³பாதுபா⁴வா உளாரவண்ணோ மே யக்கோ² ஸம்முகே² பாதுரஹோஸி. து³தியம்பி ஸத்³த³மனுஸ்ஸாவேஸி – ‘பி³ம்பி³ஸாரோ அஹம் ப⁴க³வா; பி³ம்பி³ஸாரோ அஹம் ஸுக³தாதி. இத³ம் ஸத்தமம் கோ² அஹம், ப⁴ந்தே, வேஸ்ஸவணஸ்ஸ மஹாராஜஸ்ஸ ஸஹப்³யதம் உபபஜ்ஜாமி, ஸோ ததோ சுதோ மனுஸ்ஸராஜா ப⁴விதும் பஹோமி [ஸோ ததோ சுதோ மனுஸ்ஸராஜா, அமனுஸ்ஸராஜா தி³வி ஹோமி (ஸீ. பீ.)].

இதோ ஸத்த ததோ ஸத்த, ஸம்ஸாரானி சதுத்³த³ஸ;

நிவாஸமபி⁴ஜானாமி, யத்த² மே வுஸிதம் புரே.

281. ‘தீ³க⁴ரத்தம் கோ² அஹம், ப⁴ந்தே, அவினிபாதோ அவினிபாதம் ஸஞ்ஜானாமி, ஆஸா ச பன மே ஸந்திட்ட²தி ஸகதா³கா³மிதாயா’தி. ‘அச்ச²ரியமித³ம் ஆயஸ்மதோ ஜனவஸப⁴ஸ்ஸ யக்க²ஸ்ஸ, அப்³பு⁴தமித³ம் ஆயஸ்மதோ ஜனவஸப⁴ஸ்ஸ யக்க²ஸ்ஸ. ‘‘தீ³க⁴ரத்தம் கோ² அஹம், ப⁴ந்தே, அவினிபாதோ அவினிபாதம் ஸஞ்ஜானாமீ’’தி ச வதே³ஸி, ‘‘ஆஸா ச பன மே ஸந்திட்ட²தி ஸகதா³கா³மிதாயா’’தி ச வதே³ஸி, குதோனிதா³னம் பனாயஸ்மா ஜனவஸபோ⁴ யக்கோ² ஏவரூபம் உளாரம் விஸேஸாதி⁴க³மம் ஸஞ்ஜானாதீதி? ந அஞ்ஞத்ர, ப⁴க³வா, தவ ஸாஸனா, ந அஞ்ஞத்ர [அஞ்ஞத்த² (ஸீ. பீ.)], ஸுக³த, தவ ஸாஸனா; யத³க்³கே³ அஹம், ப⁴ந்தே, ப⁴க³வதி ஏகந்திகதோ [ஏகந்ததோ (ஸ்யா.), ஏகந்தக³தோ (பீ.)] அபி⁴ப்பஸன்னோ, தத³க்³கே³ அஹம், ப⁴ந்தே, தீ³க⁴ரத்தம் அவினிபாதோ அவினிபாதம் ஸஞ்ஜானாமி, ஆஸா ச பன மே ஸந்திட்ட²தி ஸகதா³கா³மிதாய. இதா⁴ஹம், ப⁴ந்தே, வேஸ்ஸவணேன மஹாராஜேன பேஸிதோ விரூள்ஹகஸ்ஸ மஹாராஜஸ்ஸ ஸந்திகே கேனசிதே³வ கரணீயேன அத்³த³ஸம் ப⁴க³வந்தம் அந்தராமக்³கே³ கி³ஞ்ஜகாவஸத²ம் பவிஸித்வா மாக³த⁴கே பரிசாரகே ஆரப்³ப⁴ அட்டி²ம் கத்வா மனஸிகத்வா ஸப்³ப³ம் சேதஸா ஸமன்னாஹரித்வா நிஸின்னம் – ‘‘க³திம் நேஸம் ஜானிஸ்ஸாமி அபி⁴ஸம்பராயம், யம்க³திகா தே ப⁴வந்தோ யம்அபி⁴ஸம்பராயா’’தி. அனச்ச²ரியம் கோ² பனேதம், ப⁴ந்தே, யம் வேஸ்ஸவணஸ்ஸ மஹாராஜஸ்ஸ தஸ்ஸம் பரிஸாயம் பா⁴ஸதோ ஸம்முகா² ஸுதம் ஸம்முகா² படிக்³க³ஹிதம் – ‘‘யம்க³திகா தே ப⁴வந்தோ யம்அபி⁴ஸம்பராயா’’தி. தஸ்ஸ மய்ஹம், ப⁴ந்தே, ஏதத³ஹோஸி – ப⁴க³வந்தஞ்ச த³க்கா²மி, இத³ஞ்ச ப⁴க³வதோ ஆரோசேஸ்ஸாமீதி. இமே கோ² மே, ப⁴ந்தே, த்³வேபச்சயா ப⁴க³வந்தம் த³ஸ்ஸனாய உபஸங்கமிதும்’.

தே³வஸபா⁴

282. ‘புரிமானி, ப⁴ந்தே, தி³வஸானி புரிமதரானி தத³ஹுபோஸதே² பன்னரஸே வஸ்ஸூபனாயிகாய புண்ணாய புண்ணமாய ரத்தியா கேவலகப்பா ச தே³வா தாவதிம்ஸா ஸுத⁴ம்மாயம் ஸபா⁴யம் ஸன்னிஸின்னா ஹோந்தி ஸன்னிபதிதா. மஹதீ ச தி³ப்³ப³பரிஸா [தி³ப்³பா³ பரிஸா (ஸீ. பீ.)] ஸமந்ததோ நிஸின்னா ஹோந்தி [நிஸின்னா ஹோதி (ஸீ.), ஸன்னிஸின்னா ஹோந்தி ஸன்னிபதிதா (க.)], சத்தாரோ ச மஹாராஜானோ சதுத்³தி³ஸா நிஸின்னா ஹோந்தி. புரத்தி²மாய தி³ஸாய த⁴தரட்டோ² மஹாராஜா பச்சி²மாபி⁴முகோ² [பச்சா²பி⁴முகோ² (க.)] நிஸின்னோ ஹோதி தே³வே புரக்க²த்வா; த³க்கி²ணாய தி³ஸாய விரூள்ஹகோ மஹாராஜா உத்தராபி⁴முகோ² நிஸின்னோ ஹோதி தே³வே புரக்க²த்வா; பச்சி²மாய தி³ஸாய விரூபக்கோ² மஹாராஜா புரத்தா²பி⁴முகோ² நிஸின்னோ ஹோதி தே³வே புரக்க²த்வா; உத்தராய தி³ஸாய வேஸ்ஸவணோ மஹாராஜா த³க்கி²ணாபி⁴முகோ² நிஸின்னோ ஹோதி தே³வே புரக்க²த்வா. யதா³, ப⁴ந்தே, கேவலகப்பா ச தே³வா தாவதிம்ஸா ஸுத⁴ம்மாயம் ஸபா⁴யம் ஸன்னிஸின்னா ஹோந்தி ஸன்னிபதிதா, மஹதீ ச தி³ப்³ப³பரிஸா ஸமந்ததோ நிஸின்னா ஹோந்தி, சத்தாரோ ச மஹாராஜானோ சதுத்³தி³ஸா நிஸின்னா ஹோந்தி. இத³ம் நேஸம் ஹோதி ஆஸனஸ்மிம்; அத² பச்சா² அம்ஹாகம் ஆஸனம் ஹோதி. யே தே, ப⁴ந்தே, தே³வா ப⁴க³வதி ப்³ரஹ்மசரியம் சரித்வா அது⁴னூபபன்னா தாவதிம்ஸகாயம், தே அஞ்ஞே தே³வே அதிரோசந்தி வண்ணேன சேவ யஸஸா ச. தேன ஸுத³ம், ப⁴ந்தே, தே³வா தாவதிம்ஸா அத்தமனா ஹோந்தி பமுதி³தா பீதிஸோமனஸ்ஸஜாதா ‘‘தி³ப்³பா³ வத போ⁴ காயா பரிபூரேந்தி, ஹாயந்தி அஸுரகாயா’’தி. அத² கோ², ப⁴ந்தே, ஸக்கோ தே³வானமிந்தோ³ தே³வானம் தாவதிம்ஸானம் ஸம்பஸாத³ம் விதி³த்வா இமாஹி கா³தா²ஹி அனுமோதி³ –

‘‘மோத³ந்தி வத போ⁴ தே³வா, தாவதிம்ஸா ஸஹிந்த³கா [ஸஇந்த³கா (ஸீ.)];

ததா²க³தம் நமஸ்ஸந்தா, த⁴ம்மஸ்ஸ ச ஸுத⁴ம்மதம்.

நவே தே³வே ச பஸ்ஸந்தா, வண்ணவந்தே யஸஸ்ஸினே [யஸஸ்ஸினோ (ஸ்யா.)];

ஸுக³தஸ்மிம் ப்³ரஹ்மசரியம், சரித்வான இதா⁴க³தே.

தே அஞ்ஞே அதிரோசந்தி, வண்ணேன யஸஸாயுனா;

ஸாவகா பூ⁴ரிபஞ்ஞஸ்ஸ, விஸேஸூபக³தா இத⁴.

இத³ம் தி³ஸ்வான நந்த³ந்தி, தாவதிம்ஸா ஸஹிந்த³கா;

ததா²க³தம் நமஸ்ஸந்தா, த⁴ம்மஸ்ஸ ச ஸுத⁴ம்மத’’ந்தி.

‘தேன ஸுத³ம், ப⁴ந்தே, தே³வா தாவதிம்ஸா பி⁴ய்யோஸோமத்தாய அத்தமனா ஹோந்தி பமுதி³தா பீதிஸோமனஸ்ஸஜாதா ‘‘தி³ப்³பா³ வத, போ⁴, காயா பரிபூரேந்தி, ஹாயந்தி அஸுரகாயா’’தி. அத² கோ², ப⁴ந்தே, யேனத்தே²ன தே³வா தாவதிம்ஸா ஸுத⁴ம்மாயம் ஸபா⁴யம் ஸன்னிஸின்னா ஹோந்தி ஸன்னிபதிதா, தம் அத்த²ம் சிந்தயித்வா தம் அத்த²ம் மந்தயித்வா வுத்தவசனாபி தம் [வுத்தவசனா நாமித³ம் (க.)] சத்தாரோ மஹாராஜானோ தஸ்மிம் அத்தே² ஹோந்தி. பச்சானுஸிட்ட²வசனாபி தம் [பச்சானுஸிட்ட²வசனா நாமித³ம் (க.)] சத்தாரோ மஹாராஜானோ தஸ்மிம் அத்தே² ஹோந்தி, ஸகேஸு ஸகேஸு ஆஸனேஸு டி²தா அவிபக்கந்தா [அதி⁴பக்கந்தா (க.)].

தே வுத்தவாக்யா ராஜானோ, படிக்³க³ய்ஹானுஸாஸனிம்;

விப்பஸன்னமனா ஸந்தா, அட்ட²ம்ஸு ஸம்ஹி ஆஸனேதி.

283. ‘அத² கோ², ப⁴ந்தே, உத்தராய தி³ஸாய உளாரோ ஆலோகோ ஸஞ்ஜாயி, ஓபா⁴ஸோ பாதுரஹோஸி அதிக்கம்மேவ தே³வானம் தே³வானுபா⁴வம். அத² கோ², ப⁴ந்தே, ஸக்கோ தே³வானமிந்தோ³ தே³வே தாவதிம்ஸே ஆமந்தேஸி – ‘‘யதா² கோ², மாரிஸா, நிமித்தானி தி³ஸ்ஸந்தி, உளாரோ ஆலோகோ ஸஞ்ஜாயதி, ஓபா⁴ஸோ பாதுப⁴வதி, ப்³ரஹ்மா பாதுப⁴விஸ்ஸதி. ப்³ரஹ்முனோ ஹேதம் புப்³ப³னிமித்தம் பாதுபா⁴வாய யதி³த³ம் ஆலோகோ ஸஞ்ஜாயதி ஓபா⁴ஸோ பாதுப⁴வதீதி.

‘‘யதா² நிமித்தா தி³ஸ்ஸந்தி, ப்³ரஹ்மா பாதுப⁴விஸ்ஸதி;

ப்³ரஹ்முனோ ஹேதம் நிமித்தம், ஓபா⁴ஸோ விபுலோ மஹா’’தி.

ஸனங்குமாரகதா²

284. ‘அத² கோ², ப⁴ந்தே, தே³வா தாவதிம்ஸா யதா²ஸகேஸு ஆஸனேஸு நிஸீதி³ம்ஸு – ‘‘ஓபா⁴ஸமேதம் ஞஸ்ஸாம, யம்விபாகோ ப⁴விஸ்ஸதி, ஸச்சி²கத்வாவ நம் க³மிஸ்ஸாமா’’தி. சத்தாரோபி மஹாராஜானோ யதா²ஸகேஸு ஆஸனேஸு நிஸீதி³ம்ஸு – ‘‘ஓபா⁴ஸமேதம் ஞஸ்ஸாம யம்விபாகோ ப⁴விஸ்ஸதி, ஸச்சி²கத்வாவ நம் க³மிஸ்ஸாமா’’தி. இத³ம் ஸுத்வா தே³வா தாவதிம்ஸா ஏகக்³கா³ ஸமாபஜ்ஜிம்ஸு – ‘‘ஓபா⁴ஸமேதம் ஞஸ்ஸாம, யம்விபாகோ ப⁴விஸ்ஸதி, ஸச்சி²கத்வாவ நம் க³மிஸ்ஸாமா’’தி.

‘யதா³, ப⁴ந்தே, ப்³ரஹ்மா ஸனங்குமாரோ தே³வானம் தாவதிம்ஸானம் பாதுப⁴வதி, ஓளாரிகம் அத்தபா⁴வம் அபி⁴னிம்மினித்வா பாதுப⁴வதி. யோ கோ² பன, ப⁴ந்தே, ப்³ரஹ்முனோ பகதிவண்ணோ அனபி⁴ஸம்ப⁴வனீயோ ஸோ தே³வானம் தாவதிம்ஸானம் சக்கு²பத²ஸ்மிம். யதா³, ப⁴ந்தே, ப்³ரஹ்மா ஸனங்குமாரோ தே³வானம் தாவதிம்ஸானம் பாதுப⁴வதி, ஸோ அஞ்ஞே தே³வே அதிரோசதி வண்ணேன சேவ யஸஸா ச. ஸேய்யதா²பி, ப⁴ந்தே, ஸோவண்ணோ விக்³க³ஹோ மானுஸம் விக்³க³ஹம் அதிரோசதி; ஏவமேவ கோ², ப⁴ந்தே, யதா³ ப்³ரஹ்மா ஸனங்குமாரோ தே³வானம் தாவதிம்ஸானம் பாதுப⁴வதி, ஸோ அஞ்ஞே தே³வே அதிரோசதி வண்ணேன சேவ யஸஸா ச. யதா³, ப⁴ந்தே, ப்³ரஹ்மா ஸனங்குமாரோ தே³வானம் தாவதிம்ஸானம் பாதுப⁴வதி, ந தஸ்ஸம் பரிஸாயம் கோசி தே³வோ அபி⁴வாதே³தி வா பச்சுட்டே²தி வா ஆஸனேன வா நிமந்தேதி. ஸப்³பே³வ துண்ஹீபூ⁴தா பஞ்ஜலிகா பல்லங்கேன நிஸீத³ந்தி – ‘‘யஸ்ஸதா³னி தே³வஸ்ஸ பல்லங்கம் இச்சி²ஸ்ஸதி ப்³ரஹ்மா ஸனங்குமாரோ, தஸ்ஸ தே³வஸ்ஸ பல்லங்கே நிஸீதி³ஸ்ஸதீ’’தி.

‘யஸ்ஸ கோ² பன, ப⁴ந்தே, தே³வஸ்ஸ ப்³ரஹ்மா ஸனங்குமாரோ பல்லங்கே நிஸீத³தி, உளாரம் ஸோ லப⁴தி தே³வோ வேத³படிலாப⁴ம்; உளாரம் ஸோ லப⁴தி தே³வோ ஸோமனஸ்ஸபடிலாப⁴ம். ஸேய்யதா²பி, ப⁴ந்தே, ராஜா க²த்தியோ முத்³தா⁴வஸித்தோ அது⁴னாபி⁴ஸித்தோ ரஜ்ஜேன, உளாரம் ஸோ லப⁴தி வேத³படிலாப⁴ம், உளாரம் ஸோ லப⁴தி ஸோமனஸ்ஸபடிலாப⁴ம். ஏவமேவ கோ², ப⁴ந்தே, யஸ்ஸ தே³வஸ்ஸ ப்³ரஹ்மா ஸனங்குமாரோ பல்லங்கே நிஸீத³தி, உளாரம் ஸோ லப⁴தி தே³வோ வேத³படிலாப⁴ம், உளாரம் ஸோ லப⁴தி தே³வோ ஸோமனஸ்ஸபடிலாப⁴ம். அத², ப⁴ந்தே, ப்³ரஹ்மா ஸனங்குமாரோ ஓளாரிகம் அத்தபா⁴வம் அபி⁴னிம்மினித்வா குமாரவண்ணீ [குமாரவண்ணோ (ஸ்யா. க.)] ஹுத்வா பஞ்சஸிகோ² தே³வானம் தாவதிம்ஸானம் பாதுரஹோஸி. ஸோ வேஹாஸம் அப்³பு⁴க்³க³ந்த்வா ஆகாஸே அந்தலிக்கே² பல்லங்கேன நிஸீதி³. ஸேய்யதா²பி, ப⁴ந்தே, ப³லவா புரிஸோ ஸுபச்சத்த²தே வா பல்லங்கே ஸமே வா பூ⁴மிபா⁴கே³ பல்லங்கேன நிஸீதே³ய்ய; ஏவமேவ கோ², ப⁴ந்தே, ப்³ரஹ்மா ஸனங்குமாரோ வேஹாஸம் அப்³பு⁴க்³க³ந்த்வா ஆகாஸே அந்தலிக்கே² பல்லங்கேன நிஸீதி³த்வா தே³வானம் தாவதிம்ஸானம் ஸம்பஸாத³ம் விதி³த்வா இமாஹி கா³தா²ஹி அனுமோதி³ –

‘‘மோத³ந்தி வத போ⁴ தே³வா, தாவதிம்ஸா ஸஹிந்த³கா;

ததா²க³தம் நமஸ்ஸந்தா, த⁴ம்மஸ்ஸ ச ஸுத⁴ம்மதம்.

‘‘நவே தே³வே ச பஸ்ஸந்தா, வண்ணவந்தே யஸஸ்ஸினே;

ஸுக³தஸ்மிம் ப்³ரஹ்மசரியம், சரித்வான இதா⁴க³தே.

‘‘தே அஞ்ஞே அதிரோசந்தி, வண்ணேன யஸஸாயுனா;

ஸாவகா பூ⁴ரிபஞ்ஞஸ்ஸ, விஸேஸூபக³தா இத⁴.

‘‘இத³ம் தி³ஸ்வான நந்த³ந்தி, தாவதிம்ஸா ஸஹிந்த³கா;

ததா²க³தம் நமஸ்ஸந்தா, த⁴ம்மஸ்ஸ ச ஸுத⁴ம்மத’’ந்தி.

285. ‘இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த²; இமமத்த²ம், ப⁴ந்தே, ப்³ரஹ்முனோ ஸனங்குமாரஸ்ஸ பா⁴ஸதோ அட்ட²ங்க³ஸமன்னாக³தோ ஸரோ ஹோதி விஸ்ஸட்டோ² ச விஞ்ஞேய்யோ ச மஞ்ஜு ச ஸவனீயோ ச பி³ந்து³ ச அவிஸாரீ ச க³ம்பீ⁴ரோ ச நின்னாதீ³ ச. யதா²பரிஸம் கோ² பன, ப⁴ந்தே, ப்³ரஹ்மா ஸனங்குமாரோ ஸரேன விஞ்ஞாபேதி; ந சஸ்ஸ ப³ஹித்³தா⁴ பரிஸாய கோ⁴ஸோ நிச்ச²ரதி. யஸ்ஸ கோ² பன, ப⁴ந்தே, ஏவம் அட்ட²ங்க³ஸமன்னாக³தோ ஸரோ ஹோதி, ஸோ வுச்சதி ‘‘ப்³ரஹ்மஸ்ஸரோ’’தி.

‘அத² கோ², ப⁴ந்தே, ப்³ரஹ்மா ஸனங்குமாரோ தேத்திம்ஸே அத்தபா⁴வே அபி⁴னிம்மினித்வா தே³வானம் தாவதிம்ஸானம் பச்சேகபல்லங்கேஸு பல்லங்கேன [பச்சேகபல்லங்கேன (க.)] நிஸீதி³த்வா தே³வே தாவதிம்ஸே ஆமந்தேஸி – ‘‘தம் கிம் மஞ்ஞந்தி, போ⁴ந்தோ தே³வா தாவதிம்ஸா, யாவஞ்ச ஸோ ப⁴க³வா ப³ஹுஜனஹிதாய படிபன்னோ ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானம். யே ஹி கேசி, போ⁴, பு³த்³த⁴ம் ஸரணம் க³தா த⁴ம்மம் ஸரணம் க³தா ஸங்க⁴ம் ஸரணம் க³தா ஸீலேஸு பரிபூரகாரினோ தே காயஸ்ஸ பே⁴தா³ பரம் மரணா அப்பேகச்சே பரனிம்மிதவஸவத்தீனம் தே³வானம் ஸஹப்³யதம் உபபஜ்ஜந்தி, அப்பேகச்சே நிம்மானரதீனம் தே³வானம் ஸஹப்³யதம் உபபஜ்ஜந்தி, அப்பேகச்சே துஸிதானம் தே³வானம் ஸஹப்³யதம் உபபஜ்ஜந்தி, அப்பேகச்சே யாமானம் தே³வானம் ஸஹப்³யதம் உபபஜ்ஜந்தி, அப்பேகச்சே தாவதிம்ஸானம் தே³வானம் ஸஹப்³யதம் உபபஜ்ஜந்தி, அப்பேகச்சே சாதுமஹாராஜிகானம் தே³வானம் ஸஹப்³யதம் உபபஜ்ஜந்தி. யே ஸப்³ப³னிஹீனம் காயம் பரிபூரேந்தி, தே க³ந்த⁴ப்³ப³காயம் பரிபூரேந்தீ’’’தி.

286. ‘இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த²; இமமத்த²ம், ப⁴ந்தே, ப்³ரஹ்முனோ ஸனங்குமாரஸ்ஸ பா⁴ஸதோ கோ⁴ஸோயேவ தே³வா மஞ்ஞந்தி – ‘‘ய்வாயம் மம பல்லங்கே ஸ்வாயம் ஏகோவ பா⁴ஸதீ’’தி.

ஏகஸ்மிம் பா⁴ஸமானஸ்மிம், ஸப்³பே³ பா⁴ஸந்தி நிம்மிதா;

ஏகஸ்மிம் துண்ஹிமாஸீனே, ஸப்³பே³ துண்ஹீ ப⁴வந்தி தே.

ததா³ஸு தே³வா மஞ்ஞந்தி, தாவதிம்ஸா ஸஹிந்த³கா;

ய்வாயம் மம பல்லங்கஸ்மிம், ஸ்வாயம் ஏகோவ பா⁴ஸதீதி.

‘அத² கோ², ப⁴ந்தே, ப்³ரஹ்மா ஸனங்குமாரோ ஏகத்தேன அத்தானம் உபஸம்ஹரதி, ஏகத்தேன அத்தானம் உபஸம்ஹரித்வா ஸக்கஸ்ஸ தே³வானமிந்த³ஸ்ஸ பல்லங்கே பல்லங்கேன நிஸீதி³த்வா தே³வே தாவதிம்ஸே ஆமந்தேஸி –

பா⁴விதஇத்³தி⁴பாதோ³

287. ‘‘‘தம் கிம் மஞ்ஞந்தி, போ⁴ந்தோ தே³வா தாவதிம்ஸா, யாவ ஸுபஞ்ஞத்தா சிமே தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ இத்³தி⁴பாதா³ பஞ்ஞத்தா இத்³தி⁴பஹுதாய [இத்³தி⁴ப³ஹுலீகதாய (ஸ்யா.)] இத்³தி⁴விஸவிதாய [இத்³தி⁴விஸேவிதாய (ஸ்யா.)] இத்³தி⁴விகுப்³ப³னதாய. கதமே சத்தாரோ? இத⁴ போ⁴ பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. வீரியஸமாதி⁴ப்பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. சித்தஸமாதி⁴ப்பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. வீமம்ஸாஸமாதி⁴ப்பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. இமே கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ இத்³தி⁴பாதா³ பஞ்ஞத்தா இத்³தி⁴பஹுதாய இத்³தி⁴விஸவிதாய இத்³தி⁴விகுப்³ப³னதாய.

‘‘‘யே ஹி கேசி போ⁴ அதீதமத்³தா⁴னம் ஸமணா வா ப்³ராஹ்மணா வா அனேகவிஹிதம் இத்³தி⁴வித⁴ம் பச்சனுபோ⁴ஸும், ஸப்³பே³ தே இமேஸம்யேவ சதுன்னம் இத்³தி⁴பாதா³னம் பா⁴விதத்தா ப³ஹுலீகதத்தா. யேபி ஹி கேசி போ⁴ அனாக³தமத்³தா⁴னம் ஸமணா வா ப்³ராஹ்மணா வா அனேகவிஹிதம் இத்³தி⁴வித⁴ம் பச்சனுபோ⁴ஸ்ஸந்தி, ஸப்³பே³ தே இமேஸம்யேவ சதுன்னம் இத்³தி⁴பாதா³னம் பா⁴விதத்தா ப³ஹுலீகதத்தா. யேபி ஹி கேசி போ⁴ ஏதரஹி ஸமணா வா ப்³ராஹ்மணா வா அனேகவிஹிதம் இத்³தி⁴வித⁴ம் பச்சனுபோ⁴ந்தி, ஸப்³பே³ தே இமேஸம்யேவ சதுன்னம் இத்³தி⁴பாதா³னம் பா⁴விதத்தா ப³ஹுலீகதத்தா. பஸ்ஸந்தி நோ போ⁴ந்தோ தே³வா தாவதிம்ஸா மமபிமம் ஏவரூபம் இத்³தா⁴னுபா⁴வ’’ந்தி? ‘‘ஏவம் மஹாப்³ரஹ்மே’’தி. ‘‘அஹம்பி கோ² போ⁴ இமேஸம்யேவ சதுன்னஞ்ச இத்³தி⁴பாதா³னம் பா⁴விதத்தா ப³ஹுலீகதத்தா ஏவம் மஹித்³தி⁴கோ ஏவம்மஹானுபா⁴வோ’’தி. இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த². இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்வா தே³வே தாவதிம்ஸே ஆமந்தேஸி –

திவிதோ⁴ ஓகாஸாதி⁴க³மோ

288. ‘‘‘தம் கிம் மஞ்ஞந்தி, போ⁴ந்தோ தே³வா தாவதிம்ஸா, யாவஞ்சித³ம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன தயோ ஓகாஸாதி⁴க³மா அனுபு³த்³தா⁴ ஸுக²ஸ்ஸாதி⁴க³மாய. கதமே தயோ? இத⁴ போ⁴ ஏகச்சோ ஸம்ஸட்டோ² விஹரதி காமேஹி ஸம்ஸட்டோ² அகுஸலேஹி த⁴ம்மேஹி. ஸோ அபரேன ஸமயேன அரியத⁴ம்மம் ஸுணாதி, யோனிஸோ மனஸி கரோதி, த⁴ம்மானுத⁴ம்மம் படிபஜ்ஜதி. ஸோ அரியத⁴ம்மஸ்ஸவனம் ஆக³ம்ம யோனிஸோமனஸிகாரம் த⁴ம்மானுத⁴ம்மப்படிபத்திம் அஸம்ஸட்டோ² விஹரதி காமேஹி அஸம்ஸட்டோ² அகுஸலேஹி த⁴ம்மேஹி. தஸ்ஸ அஸம்ஸட்ட²ஸ்ஸ காமேஹி அஸம்ஸட்ட²ஸ்ஸ அகுஸலேஹி த⁴ம்மேஹி உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். ஸேய்யதா²பி, போ⁴, பமுதா³ பாமோஜ்ஜம் [பாமுஜ்ஜம் (பீ. க.)] ஜாயேத², ஏவமேவ கோ², போ⁴, அஸம்ஸட்ட²ஸ்ஸ காமேஹி அஸம்ஸட்ட²ஸ்ஸ அகுஸலேஹி த⁴ம்மேஹி உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். அயம் கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பட²மோ ஓகாஸாதி⁴க³மோ அனுபு³த்³தோ⁴ ஸுக²ஸ்ஸாதி⁴க³மாய.

‘‘‘புன சபரம், போ⁴, இதே⁴கச்சஸ்ஸ ஓளாரிகா காயஸங்கா²ரா அப்படிப்பஸ்ஸத்³தா⁴ ஹோந்தி, ஓளாரிகா வசீஸங்கா²ரா அப்படிப்பஸ்ஸத்³தா⁴ ஹோந்தி, ஓளாரிகா சித்தஸங்கா²ரா அப்படிப்பஸ்ஸத்³தா⁴ ஹோந்தி. ஸோ அபரேன ஸமயேன அரியத⁴ம்மம் ஸுணாதி, யோனிஸோ மனஸி கரோதி, த⁴ம்மானுத⁴ம்மம் படிபஜ்ஜதி. தஸ்ஸ அரியத⁴ம்மஸ்ஸவனம் ஆக³ம்ம யோனிஸோமனஸிகாரம் த⁴ம்மானுத⁴ம்மப்படிபத்திம் ஓளாரிகா காயஸங்கா²ரா படிப்பஸ்ஸம்ப⁴ந்தி, ஓளாரிகா வசீஸங்கா²ரா படிப்பஸ்ஸம்ப⁴ந்தி, ஓளாரிகா சித்தஸங்கா²ரா படிப்பஸ்ஸம்ப⁴ந்தி. தஸ்ஸ ஓளாரிகானம் காயஸங்கா²ரானம் படிப்பஸ்ஸத்³தி⁴யா ஓளாரிகானம் வசீஸங்கா²ரானம் படிப்பஸ்ஸத்³தி⁴யா ஓளாரிகானம் சித்தஸங்கா²ரானம் படிப்பஸ்ஸத்³தி⁴யா உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். ஸேய்யதா²பி, போ⁴, பமுதா³ பாமோஜ்ஜம் ஜாயேத², ஏவமேவ கோ² போ⁴ ஓளாரிகானம் காயஸங்கா²ரானம் படிப்பஸ்ஸத்³தி⁴யா ஓளாரிகானம் வசீஸங்கா²ரானம் படிப்பஸ்ஸத்³தி⁴யா ஓளாரிகானம் சித்தஸங்கா²ரானம் படிப்பஸ்ஸத்³தி⁴யா உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். அயம் கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன து³தியோ ஓகாஸாதி⁴க³மோ அனுபு³த்³தோ⁴ ஸுக²ஸ்ஸாதி⁴க³மாய.

‘‘‘புன சபரம், போ⁴, இதே⁴கச்சோ ‘இத³ம் குஸல’ந்தி யதா²பூ⁴தம் நப்பஜானாதி, ‘இத³ம் அகுஸல’ந்தி யதா²பூ⁴தம் நப்பஜானாதி. ‘இத³ம் ஸாவஜ்ஜம் இத³ம் அனவஜ்ஜம், இத³ம் ஸேவிதப்³ப³ம் இத³ம் ந ஸேவிதப்³ப³ம், இத³ம் ஹீனம் இத³ம் பணீதம், இத³ம் கண்ஹஸுக்கஸப்படிபா⁴க³’ந்தி யதா²பூ⁴தம் நப்பஜானாதி. ஸோ அபரேன ஸமயேன அரியத⁴ம்மம் ஸுணாதி, யோனிஸோ மனஸி கரோதி, த⁴ம்மானுத⁴ம்மம் படிபஜ்ஜதி. ஸோ அரியத⁴ம்மஸ்ஸவனம் ஆக³ம்ம யோனிஸோமனஸிகாரம் த⁴ம்மானுத⁴ம்மப்படிபத்திம், ‘இத³ம் குஸல’ந்தி யதா²பூ⁴தம் பஜானாதி, ‘இத³ம் அகுஸல’ந்தி யதா²பூ⁴தம் பஜானாதி. இத³ம் ஸாவஜ்ஜம் இத³ம் அனவஜ்ஜம், இத³ம் ஸேவிதப்³ப³ம் இத³ம் ந ஸேவிதப்³ப³ம், இத³ம் ஹீனம் இத³ம் பணீதம், இத³ம் கண்ஹஸுக்கஸப்படிபா⁴க³’ந்தி யதா²பூ⁴தம் பஜானாதி. தஸ்ஸ ஏவம் ஜானதோ ஏவம் பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. தஸ்ஸ அவிஜ்ஜாவிராகா³ விஜ்ஜுப்பாதா³ உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். ஸேய்யதா²பி, போ⁴, பமுதா³ பாமோஜ்ஜம் ஜாயேத², ஏவமேவ கோ², போ⁴, அவிஜ்ஜாவிராகா³ விஜ்ஜுப்பாதா³ உப்பஜ்ஜதி ஸுக²ம், ஸுகா² பி⁴ய்யோ ஸோமனஸ்ஸம். அயம் கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ததியோ ஓகாஸாதி⁴க³மோ அனுபு³த்³தோ⁴ ஸுக²ஸ்ஸாதி⁴க³மாய. இமே கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன தயோ ஓகாஸாதி⁴க³மா அனுபு³த்³தா⁴ ஸுக²ஸ்ஸாதி⁴க³மாயா’’தி. இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த², இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்வா தே³வே தாவதிம்ஸே ஆமந்தேஸி –

சதுஸதிபட்டா²னம்

289. ‘‘‘தம் கிம் மஞ்ஞந்தி, போ⁴ந்தோ தே³வா தாவதிம்ஸா, யாவ ஸுபஞ்ஞத்தா சிமே தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ ஸதிபட்டா²னா பஞ்ஞத்தா குஸலஸ்ஸாதி⁴க³மாய. கதமே சத்தாரோ? இத⁴, போ⁴, பி⁴க்கு² அஜ்ஜ²த்தம் காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். அஜ்ஜ²த்தம் காயே காயானுபஸ்ஸீ விஹரந்தோ தத்த² ஸம்மா ஸமாதி⁴யதி, ஸம்மா விப்பஸீத³தி. ஸோ தத்த² ஸம்மா ஸமாஹிதோ ஸம்மா விப்பஸன்னோ ப³ஹித்³தா⁴ பரகாயே ஞாணத³ஸ்ஸனம் அபி⁴னிப்³ப³த்தேதி. அஜ்ஜ²த்தம் வேத³னாஸு வேத³னானுபஸ்ஸீ விஹரதி…பே… ப³ஹித்³தா⁴ பரவேத³னாஸு ஞாணத³ஸ்ஸனம் அபி⁴னிப்³ப³த்தேதி. அஜ்ஜ²த்தம் சித்தே சித்தானுபஸ்ஸீ விஹரதி…பே… ப³ஹித்³தா⁴ பரசித்தே ஞாணத³ஸ்ஸனம் அபி⁴னிப்³ப³த்தேதி. அஜ்ஜ²த்தம் த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். அஜ்ஜ²த்தம் த⁴ம்மேஸு த⁴ம்மானுபஸ்ஸீ விஹரந்தோ தத்த² ஸம்மா ஸமாதி⁴யதி, ஸம்மா விப்பஸீத³தி. ஸோ தத்த² ஸம்மா ஸமாஹிதோ ஸம்மா விப்பஸன்னோ ப³ஹித்³தா⁴ பரத⁴ம்மேஸு ஞாணத³ஸ்ஸனம் அபி⁴னிப்³ப³த்தேதி. இமே கோ², போ⁴, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன சத்தாரோ ஸதிபட்டா²னா பஞ்ஞத்தா குஸலஸ்ஸாதி⁴க³மாயா’’தி. இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த². இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்வா தே³வே தாவதிம்ஸே ஆமந்தேஸி –

ஸத்த ஸமாதி⁴பரிக்கா²ரா

290. ‘‘‘தம் கிம் மஞ்ஞந்தி, போ⁴ந்தோ தே³வா தாவதிம்ஸா, யாவ ஸுபஞ்ஞத்தா சிமே தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸத்த ஸமாதி⁴பரிக்கா²ரா ஸம்மாஸமாதி⁴ஸ்ஸ பரிபா⁴வனாய ஸம்மாஸமாதி⁴ஸ்ஸ பாரிபூரியா. கதமே ஸத்த? ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி. யா கோ², போ⁴, இமேஹி ஸத்தஹங்கே³ஹி சித்தஸ்ஸ ஏகக்³க³தா பரிக்க²தா, அயம் வுச்சதி, போ⁴, அரியோ ஸம்மாஸமாதி⁴ ஸஉபனிஸோ இதிபி ஸபரிக்கா²ரோ இதிபி. ஸம்மாதி³ட்டி²ஸ்ஸ போ⁴, ஸம்மாஸங்கப்போ பஹோதி, ஸம்மாஸங்கப்பஸ்ஸ ஸம்மாவாசா பஹோதி, ஸம்மாவாசஸ்ஸ ஸம்மாகம்மந்தோ பஹோதி. ஸம்மாகம்மந்தஸ்ஸ ஸம்மாஆஜீவோ பஹோதி, ஸம்மாஆஜீவஸ்ஸ ஸம்மாவாயாமோ பஹோதி, ஸம்மாவாயாமஸ்ஸ ஸம்மாஸதி பஹோதி, ஸம்மாஸதிஸ்ஸ ஸம்மாஸமாதி⁴ பஹோதி, ஸம்மாஸமாதி⁴ஸ்ஸ ஸம்மாஞாணம் பஹோதி, ஸம்மாஞாணஸ்ஸ ஸம்மாவிமுத்தி பஹோதி. யஞ்ஹி தம், போ⁴, ஸம்மா வத³மானோ வதே³ய்ய – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹி அபாருதா அமதஸ்ஸ த்³வாரா’தி இத³மேவ தம் ஸம்மா வத³மானோ வதே³ய்ய. ஸ்வாக்கா²தோ ஹி, போ⁴, ப⁴க³வதா த⁴ம்மோ ஸந்தி³ட்டி²கோ, அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹி அபாருதா அமதஸ்ஸ த்³வாரா [த்³வாராதி (ஸ்யா. க.)].

‘‘‘யே ஹி கேசி, போ⁴, பு³த்³தே⁴ அவேச்சப்பஸாதே³ன ஸமன்னாக³தா, த⁴ம்மே அவேச்சப்பஸாதே³ன ஸமன்னாக³தா, ஸங்கே⁴ அவேச்சப்பஸாதே³ன ஸமன்னாக³தா, அரியகந்தேஹி ஸீலேஹி ஸமன்னாக³தா, யே சிமே ஓபபாதிகா த⁴ம்மவினீதா ஸாதிரேகானி சதுவீஸதிஸதஸஹஸ்ஸானி மாக³த⁴கா பரிசாரகா அப்³ப⁴தீதா காலங்கதா திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா. அத்தி² சேவேத்த² ஸகதா³கா³மினோ.

‘‘அத்தா²யம் [அதா²யம் (ஸீ. ஸ்யா.)] இதரா பஜா, புஞ்ஞாபா⁴கா³தி மே மனோ;

ஸங்கா²தும் நோபி ஸக்கோமி, முஸாவாத³ஸ்ஸ ஓத்தப்ப’’ந்தி.

291. ‘இமமத்த²ம், ப⁴ந்தே, ப்³ரஹ்மா ஸனங்குமாரோ பா⁴ஸித்த², இமமத்த²ம், ப⁴ந்தே, ப்³ரஹ்முனோ ஸனங்குமாரஸ்ஸ பா⁴ஸதோ வேஸ்ஸவணஸ்ஸ மஹாராஜஸ்ஸ ஏவம் சேதஸோ பரிவிதக்கோ உத³பாதி³ – ‘‘அச்ச²ரியம் வத போ⁴, அப்³பு⁴தம் வத போ⁴, ஏவரூபோபி நாம உளாரோ ஸத்தா² ப⁴விஸ்ஸதி, ஏவரூபம் உளாரம் த⁴ம்மக்கா²னம், ஏவரூபா உளாரா விஸேஸாதி⁴க³மா பஞ்ஞாயிஸ்ஸந்தீ’’தி. அத², ப⁴ந்தே, ப்³ரஹ்மா ஸனங்குமாரோ வேஸ்ஸவணஸ்ஸ மஹாராஜஸ்ஸ சேதஸா சேதோபரிவிதக்கமஞ்ஞாய வேஸ்ஸவணம் மஹாராஜானம் ஏதத³வோச – ‘‘தம் கிம் மஞ்ஞதி ப⁴வம் வேஸ்ஸவணோ மஹாராஜா அதீதம்பி அத்³தா⁴னம் ஏவரூபோ உளாரோ ஸத்தா² அஹோஸி, ஏவரூபம் உளாரம் த⁴ம்மக்கா²னம், ஏவரூபா உளாரா விஸேஸாதி⁴க³மா பஞ்ஞாயிம்ஸு. அனாக³தம்பி அத்³தா⁴னம் ஏவரூபோ உளாரோ ஸத்தா² ப⁴விஸ்ஸதி, ஏவரூபம் உளாரம் த⁴ம்மக்கா²னம், ஏவரூபா உளாரா விஸேஸாதி⁴க³மா பஞ்ஞாயிஸ்ஸந்தீ’’’தி.

292. ‘‘‘இமமத்த²ம், ப⁴ந்தே, ப்³ரஹ்மா ஸனங்குமாரோ தே³வானம் தாவதிம்ஸானம் அபா⁴ஸி, இமமத்த²ம் வேஸ்ஸவணோ மஹாராஜா ப்³ரஹ்முனோ ஸனங்குமாரஸ்ஸ தே³வானம் தாவதிம்ஸானம் பா⁴ஸதோ ஸம்முகா² ஸுதம் [ஸுத்வா (ஸீ. பீ.)] ஸம்முகா² படிக்³க³ஹிதம் ஸயம் பரிஸாயம் ஆரோசேஸி’’.

இமமத்த²ம் ஜனவஸபோ⁴ யக்கோ² வேஸ்ஸவணஸ்ஸ மஹாராஜஸ்ஸ ஸயம் பரிஸாயம் பா⁴ஸதோ ஸம்முகா² ஸுதம் ஸம்முகா² படிக்³க³ஹிதம் [படிக்³க³ஹேத்வா (ஸீ. பீ.)] ப⁴க³வதோ ஆரோசேஸி. இமமத்த²ம் ப⁴க³வா ஜனவஸப⁴ஸ்ஸ யக்க²ஸ்ஸ ஸம்முகா² ஸுத்வா ஸம்முகா² படிக்³க³ஹேத்வா ஸாமஞ்ச அபி⁴ஞ்ஞாய ஆயஸ்மதோ ஆனந்த³ஸ்ஸ ஆரோசேஸி, இமமத்த²மாயஸ்மா ஆனந்தோ³ ப⁴க³வதோ ஸம்முகா² ஸுத்வா ஸம்முகா² படிக்³க³ஹேத்வா ஆரோசேஸி பி⁴க்கூ²னம் பி⁴க்கு²னீனம் உபாஸகானம் உபாஸிகானம். தயித³ம் ப்³ரஹ்மசரியம் இத்³த⁴ஞ்சேவ பீ²தஞ்ச வித்தா²ரிகம் பா³ஹுஜஞ்ஞம் புது²பூ⁴தம் யாவ தே³வமனுஸ்ஸேஹி ஸுப்பகாஸிதந்தி.

ஜனவஸப⁴ஸுத்தம் நிட்டி²தம் பஞ்சமம்.