ஸோளஸமஹாவாரோ

பஞ்ஞத்திவாரவண்ணனா

விஸுத்³த⁴பரிவாரஸ்ஸ, பரிவாரோதி ஸாஸனே;

த⁴ம்மக்க²ந்த⁴ஸரீரஸ்ஸ, க²ந்த⁴கானம் அனந்தரா.

ஸங்க³ஹம் யோ ஸமாருள்ஹோ, தஸ்ஸ புப்³பா³க³தம் நயம்;

ஹித்வா தா³னி கரிஸ்ஸாமி, அனுத்தானத்த²வண்ணனம்.

1. தத்த² யம் தேன ப⁴க³வதா…பே… பஞ்ஞத்தந்தி ஆதி³னயப்பவத்தாய தாவ புச்சா²ய அயம் ஸங்கே²பத்தோ² – யோ ஸோ ப⁴க³வா ஸாஸனஸ்ஸ சிரட்டி²திகத்த²ம் த⁴ம்மஸேனாபதினா ஸத்³த⁴ம்மகா³ரவப³ஹுமானவேக³ஸமுஸ்ஸிதம் அஞ்ஜலிம் ஸிரஸ்மிம் பதிட்டா²பேத்வா யாசிதோ த³ஸ அத்த²வஸே படிச்ச வினயபஞ்ஞத்திம் பஞ்ஞபேஸி, தேன ப⁴க³வதா தஸ்ஸ தஸ்ஸ ஸிக்கா²பத³ஸ்ஸ பஞ்ஞத்திகாலம் ஜானதா, தஸ்ஸா தஸ்ஸா ஸிக்கா²பத³பஞ்ஞத்தியா த³ஸ அத்த²வஸே பஸ்ஸதா; அபிச புப்³பே³னிவாஸாதீ³ஹி ஜானதா, தி³ப்³பே³ன சக்கு²னா பஸ்ஸதா, தீஹி விஜ்ஜாஹி ச²ஹி வா பன அபி⁴ஞ்ஞாஹி ஜானதா, ஸப்³ப³த்த² அப்படிஹதேன ஸமந்தசக்கு²னா பஸ்ஸதா, ஸப்³ப³த⁴ம்மஜானனஸமத்தா²ய பஞ்ஞாய ஜானதா, ஸப்³ப³ஸத்தானம் சக்கு²விஸயாதீதானி திரோகுட்டாதி³க³தானி சாபி ரூபானி அதிவிஸுத்³தே⁴ன மம்ஸசக்கு²னா ச பஸ்ஸதா, அத்தஹிதஸாதி⁴காய ஸமாதி⁴பத³ட்டா²னாய படிவேத⁴பஞ்ஞாய ஜானதா, பரஹிதஸாதி⁴காய கருணாபத³ட்டா²னாய தே³ஸனாபஞ்ஞாய பஸ்ஸதா, அரஹதா ஸம்மாஸம்பு³த்³தே⁴ன ‘‘யம் பட²மம் பாராஜிகம் பஞ்ஞத்தம், தம் கத்த² பஞ்ஞத்தம், கம் ஆரப்³ப⁴ பஞ்ஞத்தம், கிஸ்மிம் வத்து²ஸ்மிம் பஞ்ஞத்தம், அத்தி² தத்த² பஞ்ஞத்தி…பே… கேனாப⁴த’’ந்தி.

2. புச்சா²விஸ்ஸஜ்ஜனே பன ‘‘யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பட²மம் பாராஜிக’’ந்தி இத³ம் கேவலம் புச்சா²ய ஆக³தஸ்ஸ ஆதி³பத³ஸ்ஸ பச்சுத்³த⁴ரணமத்தமேவ, ‘‘கத்த² பஞ்ஞத்தந்தி வேஸாலியா பஞ்ஞத்தம்; கம் ஆரப்³பா⁴தி ஸுதி³ன்னம் கலந்த³புத்தம் ஆரப்³பா⁴’’தி ஏவமாதி³னா பன நயேன புனபி ஏத்த² ஏகேகம் பத³ம் புச்சி²த்வாவ விஸ்ஸஜ்ஜிதம். ஏகா பஞ்ஞத்தீதி ‘‘யோ பன பி⁴க்கு² மேது²னம் த⁴ம்மம் படிஸேவேய்ய பாராஜிகோ ஹோதி அஸம்வாஸோ’’தி அயம் ஏகா பஞ்ஞத்தி. த்³வே அனுபஞ்ஞத்தியோதி ‘‘அந்தமஸோ திரச்சா²னக³தாயபீ’’தி ச, ‘‘ஸிக்க²ம் அபச்சக்கா²யா’’தி ச மக்கடிவஜ்ஜிபுத்தகவத்தூ²னம் வஸேன வுத்தா – இமா த்³வே அனுபஞ்ஞத்தியோ. ஏத்தாவதா ‘‘அத்தி² தத்த² பஞ்ஞத்தி அனுபஞ்ஞத்தி அனுப்பன்னபஞ்ஞத்தீ’’தி இமிஸ்ஸா புச்சா²ய த்³வே கோட்டா²ஸா விஸ்ஸஜ்ஜிதா ஹோந்தி. ததியம் விஸ்ஸஜ்ஜேதும் பன ‘‘அனுப்பன்னபஞ்ஞத்தி தஸ்மிம் நத்தீ²’’தி வுத்தம். அயஞ்ஹி அனுப்பன்னபஞ்ஞத்தி நாம அனுப்பன்னே தோ³ஸே பஞ்ஞத்தா; ஸா அட்ட²க³ருத⁴ம்மவஸேன பி⁴க்கு²னீனம்யேவ ஆக³தா, அஞ்ஞத்ர நத்தி². தஸ்மா வுத்தம் ‘‘அனுப்பன்னபஞ்ஞத்தி தஸ்மிம் நத்தீ²’’தி. ஸப்³ப³த்த²பஞ்ஞத்தீதி மஜ்ஜி²மதே³ஸே சேவ பச்சந்திமஜனபதே³ஸு ச ஸப்³ப³த்த²பஞ்ஞத்தி. வினயத⁴ரபஞ்சமேன க³ணேன ‘‘உபஸம்பதா³, கு³ணங்கு³ணூபாஹனா, து⁴வனஹானம், சம்மத்த²ரண’’ந்தி இமானி ஹி சத்தாரி ஸிக்கா²பதா³னி மஜ்ஜி²மதே³ஸேயேவ பஞ்ஞத்தி. ஏத்தே²வ ஏதேஹி ஆபத்தி ஹோதி, ந பச்சந்திமஜனபதே³ஸு. ஸேஸானி ஸப்³பா³னேவ ஸப்³ப³த்த²பஞ்ஞத்தி நாம.

ஸாதா⁴ரணபஞ்ஞத்தீதி பி⁴க்கூ²னஞ்சேவ பி⁴க்கு²னீனஞ்ச ஸாதா⁴ரணபஞ்ஞத்தி; ஸுத்³த⁴பி⁴க்கூ²னமேவ ஹி ஸுத்³த⁴பி⁴க்கு²னீனம் வா பஞ்ஞத்தம் ஸிக்கா²பத³ம் அஸாதா⁴ரணபஞ்ஞத்தி நாம ஹோதி. இத³ம் பன பி⁴க்கு²ம் ஆரப்³ப⁴ உப்பன்னே வத்து²ஸ்மிம் ‘‘யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்ய, அந்தமஸோ திரச்சா²னக³தேனபி பாராஜிகா ஹோதி அஸம்வாஸா’’தி பி⁴க்கு²னீனம்பி பஞ்ஞத்தம், வினீதகதா²மத்தமேவ ஹி தாஸம் நத்தி², ஸிக்கா²பத³ம் பன அத்தி², தேன வுத்தம் ‘‘ஸாதா⁴ரணபஞ்ஞத்தீ’’தி. உப⁴தோபஞ்ஞத்தியம்பி ஏஸேவ நயோ. ப்³யஞ்ஜனமத்தமேவ ஹி ஏத்த² நானம், பி⁴க்கூ²னம் பி⁴க்கு²னீனம்பி ஸாதா⁴ரணத்தா ஸாதா⁴ரணபஞ்ஞத்தி, உபி⁴ன்னம்பி பஞ்ஞத்தத்தா உப⁴தோபஞ்ஞத்தீதி. அத்தே² பன பே⁴தோ³ நத்தி².

நிதா³னோக³த⁴ந்தி ‘‘யஸ்ஸ ஸியா ஆபத்தி ஸோ ஆவிகரேய்யா’’தி ஏத்த² ஸப்³பா³பத்தீனம் அனுபவிட்ட²த்தா நிதா³னோக³த⁴ம்; நிதா³னே அனுபவிட்ட²ந்தி அத்தோ². து³தியேன உத்³தே³ஸேனாதி நிதா³னோக³த⁴ம் நிதா³னபரியாபன்னம்பி ஸமானம் ‘‘தத்ரிமே சத்தாரோ பாராஜிகா த⁴ம்மா’’திஆதி³னா து³தியேனேவ உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனந்தி ஸீலவிபத்திஆதீ³னம். பட²மா ஹி த்³வே ஆபத்திக்க²ந்தா⁴ ஸீலவிபத்தி நாம, அவஸேஸா பஞ்ச ஆசாரவிபத்தி நாம. மிச்சா²தி³ட்டி² ச அந்தக்³கா³ஹிகதி³ட்டி² ச தி³ட்டி²விபத்தி நாம, ஆஜீவஹேது பஞ்ஞத்தானி ச² ஸிக்கா²பதா³னி ஆஜீவவிபத்தி நாம. இதி இமாஸம் சதுன்னம் விபத்தீனம் இத³ம் பாராஜிகம் ஸீலவிபத்தி நாம ஹோதி.

ஏகேன ஸமுட்டா²னேனாதி த்³வங்கி³கேன ஏகேன ஸமுட்டா²னேன. ஏத்த² ஹி சித்தம் அங்க³ம் ஹோதி, காயேன பன ஆபத்திம் ஆபஜ்ஜதி. தேன வுத்தம் ‘‘காயதோ ச சித்ததோ ச ஸமுட்டா²தீ’’தி. த்³வீஹி ஸமதே²ஹி ஸம்மதீதி ‘‘ஆபன்னோஸீ’’தி ஸம்முகா² புச்சி²யமானோ ‘‘ஆம ஆபன்னோம்ஹீ’’தி படிஜானாதி, தாவதே³வ ப⁴ண்ட³னகலஹவிக்³க³ஹா வூபஸந்தா ஹோந்தி, ஸக்கா ச ஹோதி தம் புக்³க³லம் அபனேத்வா உபோஸதோ² வா பவாரணா வா காதும். இதி ஸம்முகா²வினயேன ச படிஞ்ஞாதகரணேன சாதி த்³வீஹி ஸமதே²ஹி ஸம்மதி, ந ச தப்பச்சயா கோசி உபத்³த³வோ ஹோதி. யம் பன உபரி பஞ்ஞத்திவக்³கே³ ‘‘ந கதமேன ஸமதே²ன ஸம்மதீ’’தி வுத்தம், தம் ஸமத²ம் ஓதாரேத்வா அனாபத்தி காதும் ந ஸக்காதி இமமத்த²ம் ஸந்தா⁴ய வுத்தம்.

பஞ்ஞத்தி வினயோதி ‘‘யோ பன பி⁴க்கூ²’’திஆதி³னா நயேன வுத்தமாதிகா பஞ்ஞத்தி வினயோதி அத்தோ². விப⁴த்தீதி பத³பா⁴ஜனம் வுச்சதி; விப⁴த்தீதி ஹி விப⁴ங்க³ஸ்ஸேவேதம் நாமம். அஸம்வரோதி வீதிக்கமோ. ஸம்வரோதி அவீதிக்கமோ. யேஸம் வத்ததீதி யேஸம் வினயபிடகஞ்ச அட்ட²கதா² ச ஸப்³பா³ பகு³ணாதி அத்தோ². தே தா⁴ரேந்தீதி தே ஏதம் பட²மபாராஜிகம் பாளிதோ ச அத்த²தோ ச தா⁴ரேந்தி; ந ஹி ஸக்கா ஸப்³ப³ம் வினயபிடகம் அஜானந்தேன ஏதஸ்ஸ அத்தோ² ஜானிதுந்தி. கேனாப⁴தந்தி இத³ம் பட²மபாராஜிகம் பாளிவஸேன ச அத்த²வஸேன ச யாவ அஜ்ஜதனகாலம் கேன ஆனீதந்தி. பரம்பராப⁴தந்தி பரம்பராய ஆனீதம்.

3. இதா³னி யாய பரம்பராய ஆனீதம், தம் த³ஸ்ஸேதும் ‘‘உபாலி தா³ஸகோ சேவா’’திஆதி³னா நயேன போராணகேஹி மஹாதே²ரேஹி கா³தா²யோ ட²பிதா. தத்த² யம் வத்தப்³ப³ம், தம் நிதா³னவண்ணனாயமேவ வுத்தம். இமினா நயேன து³தியபாராஜிகாதி³புச்சா²விஸ்ஸஜ்ஜனேஸுபி வினிச்ச²யோ வேதி³தப்³போ³தி.

மஹாவிப⁴ங்கே³ பஞ்ஞத்திவாரவண்ணனா நிட்டி²தா.

கதாபத்திவாராதி³வண்ணனா

157. இதோ பரம் ‘‘மேது²னம் த⁴ம்மம் படிஸேவந்தோ கதி ஆபத்தியோ ஆபஜ்ஜதீ’’தி ஆதி³ப்பபே⁴தோ³ கதாபத்திவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ சதுன்னம் விபத்தீனம் கதி விபத்தியோ ப⁴ஜந்தீ’’தி ஆதி³ப்பபே⁴தோ³ விபத்திவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா’’தி ஆதி³ப்பபே⁴தோ³ ஸங்க³ஹவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்ட²ஹந்தீ’’தி ஆதி³ப்பபே⁴தோ³ ஸமுட்டா²னவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ சதுன்னம் அதி⁴கரணானம் கதமம் அதி⁴கரண’’ந்தி ஆதி³ப்பபே⁴தோ³ அதி⁴கரணவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ஸத்தன்னம் ஸமதா²னம் கதிஹி ஸமதே²ஹி ஸம்மந்தீ’’தி ஆதி³ப்பபே⁴தோ³ ஸமத²வாரோ, தத³னந்தரோ ஸமுச்சயவாரோ சாதி இமே ஸத்த வாரா உத்தானத்தா² ஏவ.

188. ததோ பரம் ‘‘மேது²னம் த⁴ம்மம் படிஸேவனபச்சயா பாராஜிகம் கத்த² பஞ்ஞத்த’’ந்திஆதி³னா நயேன புன பச்சயவஸேன ஏகோ பஞ்ஞத்திவாரோ, தஸ்ஸ வஸேன புரிமஸதி³ஸா ஏவ கதாபத்திவாராத³யோ ஸத்த வாராதி ஏவம் அபரேபி அட்ட² வாரா வுத்தா, தேபி உத்தானத்தா² ஏவ. இதி இமே அட்ட², புரிமா அட்டா²தி மஹாவிப⁴ங்கே³ ஸோளஸ வாரா த³ஸ்ஸிதா. ததோ பரம் தேனேவ நயேன பி⁴க்கு²னிவிப⁴ங்கே³பி ஸோளஸ வாரா ஆக³தாதி ஏவமிமே உப⁴தோவிப⁴ங்கே³ த்³வத்திம்ஸ வாரா பாளினயேனேவ வேதி³தப்³பா³. ந ஹேத்த² கிஞ்சி புப்³பே³ அவினிச்சி²தம் நாம அத்தி².

மஹாவிப⁴ங்கே³ ச பி⁴க்கு²னிவிப⁴ங்கே³ ச

ஸோளஸமஹாவாரவண்ணனா நிட்டி²தா.