1. பாராஜிககண்ட³ம் (பி⁴க்கு²னீவிப⁴ங்க³வண்ணனா)

யோ பி⁴க்கூ²னம் விப⁴ங்க³ஸ்ஸ, ஸங்க³ஹிதோ அனந்தரம்;

பி⁴க்கு²னீனம் விப⁴ங்க³ஸ்ஸ, தஸ்ஸ ஸம்வண்ணனாக்கமோ.

பத்தோ யதோ ததோ தஸ்ஸ, அபுப்³ப³பத³வண்ணனம்;

காதும் பாராஜிகே தாவ, ஹோதி ஸம்வண்ணனா அயம்.

1. பட²மபாராஜிகஸிக்கா²பத³வண்ணனா

656. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி…பே… ஸாள்ஹோ மிகா³ரனத்தாதி ஏத்த² ஸாள்ஹோதி தஸ்ஸ நாமம்; மிகா³ரமாதுயா பன நத்தா ஹோதி, தேன வுத்தம் – ‘‘மிகா³ரனத்தா’’தி. நவகம்மிகந்தி நவகம்மாதி⁴ட்டா²யிகம். பண்டி³தாதி பண்டி³ச்சேன ஸமன்னாக³தா. ப்³யத்தாதி வேய்யத்திகேன ஸமன்னாக³தா. மேதா⁴வினீதி பாளிக்³க³ஹணே ஸதிபுப்³ப³ங்க³மாய பஞ்ஞாய அத்த²க்³க³ஹணே பஞ்ஞாபுப்³ப³ங்க³மாய ஸதியா ஸமன்னாக³தா. த³க்கா²தி சே²கா; அவிரஜ்ஜி²த்வா ஸீக⁴ம் கத்தப்³ப³காரினீதி அத்தோ². அனலஸாதி ஆலஸியவிரஹிதா. தத்ருபாயாயாதி தேஸு தேஸு கம்மேஸு உபாயபூ⁴தாய. வீமம்ஸாயாதி கத்தப்³ப³கம்முபபரிக்கா²ய. ஸமன்னாக³தாதி ஸம்பயுத்தா. அலம் காதுந்தி ஸமத்தா² தம் தம் கம்மம் காதும். அலம் ஸம்விதா⁴துந்தி ஏவஞ்ச ஏவஞ்ச இத³ம் ஹோதூதி ஏவம் ஸம்வித³ஹிதும்பி ஸமத்தா². கதாகதம் ஜானிதுந்தி கதஞ்ச அகதஞ்ச ஜானிதும். தேதி தே உபோ⁴; ஸா ச ஸுந்த³ரீனந்தா³ ஸோ ச ஸாள்ஹோதி அத்தோ². ப⁴த்தக்³கே³தி பரிவேஸனட்டா²னே. நிகூடேதி கோணஸதி³ஸம் கத்வா த³ஸ்ஸிதே க³ம்பீ⁴ரே. விஸ்ஸரோ மே ப⁴விஸ்ஸதீதி விரூபோ மே ஸரோ ப⁴விஸ்ஸதி; விப்பகாரஸத்³தோ³ ப⁴விஸ்ஸதீதி அத்தோ². பதிமானேந்தீதி அபேக்க²மானா. க்யாஹந்தி கிம் அஹம். ஜராது³ப்³ப³லாதி ஜராய து³ப்³ப³லா. சரணகி³லானாதி பாத³ரோகே³ன ஸமன்னாக³தா.

657-8. அவஸ்ஸுதாதி காயஸம்ஸக்³க³ராகே³ன அவஸ்ஸுதா; திந்தா கிலின்னாதி அத்தோ². பத³பா⁴ஜனே பனஸ்ஸ தமேவ ராக³ம் க³ஹேத்வா ‘‘ஸாரத்தா’’திஆதி³ வுத்தம். தத்த² ஸாரத்தாதி வத்த²ம் விய ரங்க³ஜாதேன காயஸம்ஸக்³க³ராகே³ன ஸுட்டு² ரத்தா. அபேக்க²வதீதி தஸ்ஸேவ ராக³ஸ்ஸ வஸேன தஸ்மிம் புரிஸே பவத்தாய அபேக்கா²ய ஸமன்னாக³தா. படிப³த்³த⁴சித்தாதி தேன ராகே³ன தஸ்மிம் புரிஸே ப³ந்தி⁴த்வா ட²பிதசித்தா விய. ஏஸ நயோ து³தியபத³விப⁴ங்கே³பி. புரிஸபுக்³க³லஸ்ஸாதி புரிஸஸங்கா²தஸ்ஸ புக்³க³லஸ்ஸ. அத⁴க்க²கந்தி அக்க²கானம் அதோ⁴. உப்³ப⁴ஜாணுமண்ட³லந்தி ஜாணுமண்ட³லானம் உபரி. பத³பா⁴ஜனே பன பத³படிபாடியா ஏவ ‘‘ஹேட்ட²க்க²கம் உபரிஜாணுமண்ட³ல’’ந்தி வுத்தம். ஏத்த² ச உப்³ப⁴கப்பரம்பி உப்³ப⁴ஜாணுமண்ட³லேனேவ ஸங்க³ஹிதம். ஸேஸம் மஹாவிப⁴ங்கே³ வுத்தனயேனேவ வேதி³தப்³ப³ம். புரிமாயோ உபாதா³யாதி ஸாதா⁴ரணபாராஜிகேஹி பாராஜிகாயோ சதஸ்ஸோ உபாதா³யாதி அத்தோ². உப்³ப⁴ஜாணுமண்ட³லிகாதி இத³ம் பன இமிஸ்ஸா பாராஜிகாய நாமமத்தம், தஸ்மா பத³பா⁴ஜனே ந விசாரிதம்.

659. ஏவம் உத்³தி³ட்ட²ஸிக்கா²பத³ம் பதா³னுக்கமேன விப⁴ஜித்வா இதா³னி அவஸ்ஸுதாதி³பே⁴தே³ன ஆபத்திபே⁴த³ம் த³ஸ்ஸேதும் ‘‘உப⁴தோஅவஸ்ஸுதே’’திஆதி³மாஹ. தத்த² உப⁴தோஅவஸ்ஸுதேதி உப⁴தோஅவஸ்ஸவே; பி⁴க்கு²னியா சேவ புரிஸஸ்ஸ ச காயஸம்ஸக்³க³ராகே³ன அவஸ்ஸுதபா⁴வே ஸதீதி அத்தோ². காயேன காயம் ஆமஸதீதி பி⁴க்கு²னீ யதா²பரிச்சி²ன்னேன காயேன புரிஸஸ்ஸ யம்கிஞ்சி காயம் புரிஸோ வா யேன கேனசி காயேன பி⁴க்கு²னியா யதா²பரிச்சி²ன்னம் காயம் ஆமஸதி, உப⁴யதா²பி பி⁴க்கு²னியா பாராஜிகம். காயேன காயபடிப³த்³த⁴ந்தி வுத்தப்பகாரேனேவ அத்தனோ காயேன புரிஸஸ்ஸ காயபடிப³த்³த⁴ம். ஆமஸதீதி ஏத்த² ஸயம் வா ஆமஸது, தஸ்ஸ வா ஆமஸனம் ஸாதி³யது, து²ல்லச்சயமேவ. காயபடிப³த்³தே⁴ன காயந்தி அத்தனோ வுத்தப்பகாரகாயபடிப³த்³தே⁴ன புரிஸஸ்ஸ காயம். ஆமஸதீதி இதா⁴பி ஸயம் வா ஆமஸது, தஸ்ஸ வா ஆமஸனம் ஸாதி³யது, து²ல்லச்சயமேவ. அவஸேஸபதே³ஸுபி இமினாவ நயேன வினிச்ச²யோ வேதி³தப்³போ³.

ஸசே பன பி⁴க்கு² சேவ பி⁴க்கு²னீ ச ஹோதி, தத்ர சே பி⁴க்கு²னீ ஆமஸதி, பி⁴க்கு² நிச்சலோ ஹுத்வா சித்தேன ஸாதி³யதி, பி⁴க்கு² ஆபத்தியா ந காரேதப்³போ³. ஸசே பி⁴க்கு² ஆமஸதி, பி⁴க்கு²னீ நிச்சலா ஹுத்வா சித்தேனேவ அதி⁴வாஸேதி, காயங்க³ம் அசோபயமானாபி பாராஜிகக்கே²த்தே பாராஜிகேன, து²ல்லச்சயக்கே²த்தே து²ல்லச்சயேன, து³க்கடக்கே²த்தே து³க்கடேன காரேதப்³பா³. கஸ்மா? ‘‘காயஸம்ஸக்³க³ம் ஸாதி³யேய்யா’’தி வுத்தத்தா. அயம் அட்ட²கதா²ஸு வினிச்ச²யோ. ஏவம் பன ஸதி கிரியாஸமுட்டா²னதா ந தி³ஸ்ஸதி, தஸ்மா தப்³ப³ஹுலனயேன ஸா வுத்தாதி வேதி³தப்³பா³.

660. உப்³ப⁴க்க²கந்தி அக்க²கானம் உபரி. அதோ⁴ஜாணுமண்ட³லந்தி ஜாணுமண்ட³லானம் ஹேட்டா². ஏத்த² ச அதோ⁴கப்பரம்பி அதோ⁴ஜாணுமண்ட³லேனேவ ஸங்க³ஹிதம்.

662. ஏகதோஅவஸ்ஸுதேதி ஏத்த² கிஞ்சாபி ஏகதோதி அவிஸேஸேன வுத்தம், ததா²பி பி⁴க்கு²னியா ஏவ அவஸ்ஸுதே ஸதி அயம் ஆபத்திபே⁴தோ³ வுத்தோதி வேதி³தப்³போ³.

தத்ராயம் ஆதி³தோ பட்டா²ய வினிச்ச²யோ – பி⁴க்கு²னீ காயஸம்ஸக்³க³ராகே³ன அவஸ்ஸுதா, புரிஸோபி ததே²வ. அத⁴க்க²கே உப்³ப⁴ஜாணுமண்ட³லே காயப்பதே³ஸே காயஸம்ஸக்³க³ஸாதி³யனே ஸதி பி⁴க்கு²னியா பாராஜிகம். பி⁴க்கு²னியா காயஸம்ஸக்³க³ராகோ³, புரிஸஸ்ஸ மேது²னராகோ³ வா கே³ஹஸ்ஸிதபேமம் வா ஸுத்³த⁴சித்தம் வா ஹோது, து²ல்லச்சயமேவ. பி⁴க்கு²னியா மேது²னராகோ³, புரிஸஸ்ஸ காயஸம்ஸக்³க³ராகோ³ வா மேது²னராகோ³ வா க³ஹேஸ்ஸிதபேமம் வா ஸுத்³த⁴சித்தம் வா ஹோது, து³க்கடம். பி⁴க்கு²னியா கே³ஹஸ்ஸிதபேமம், புரிஸஸ்ஸ வுத்தேஸு சதூஸு யம் வா தம் வா ஹோது, து³க்கடமேவ. பி⁴க்கு²னியா ஸுத்³த⁴சித்தம், புரிஸஸ்ஸ வுத்தேஸு சதூஸு யம் வா தம் வா ஹோது, அனாபத்தி.

ஸசே பன பி⁴க்கு² சேவ ஹோதி பி⁴க்கு²னீ ச உபி⁴ன்னம் காயஸம்ஸக்³க³ராகோ³, பி⁴க்கு²ஸ்ஸ ஸங்கா⁴தி³ஸேஸோ, பி⁴க்கு²னியா பாராஜிகம். பி⁴க்கு²னியா காயஸம்ஸக்³க³ராகோ³, பி⁴க்கு²ஸ்ஸ மேது²னராகோ³ வா கே³ஹஸ்ஸிதபேமம் வா, பி⁴க்கு²னியா து²ல்லச்சயம், பி⁴க்கு²ஸ்ஸ து³க்கடம். உபி⁴ன்னம் மேது²னராகோ³ வா கே³ஹஸ்ஸிதபேமம் வா, உபி⁴ன்னம்பி து³க்கடமேவ. யஸ்ஸ யத்த² ஸுத்³த⁴சித்தம், தஸ்ஸ தத்த² அனாபத்தி. உபி⁴ன்னம்பி ஸுத்³த⁴சித்தம், உபி⁴ன்னம்பி அனாபத்தி.

663. அனாபத்தி அஸஞ்சிச்சாதிஆதீ³ஸு விரஜ்ஜி²த்வா வா ஆமஸந்தியா அஞ்ஞவிஹிதாய வா ‘‘அயம் புரிஸோ வா இத்தீ² வா’’தி அஜானந்தியா வா தேன பு²ட்டா²யபி தம் ப²ஸ்ஸம் அஸாதி³யந்தியா வா ஆமஸனேபி ஸதி அனாபத்தி. ஸேஸம் ஸப்³ப³த்த² உத்தானமேவ.

பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், த்³விவேத³னந்தி.

பட²மபாராஜிகம்.

2. து³தியபாராஜிகஸிக்கா²பத³வண்ணனா

664. து³தியே பாராஜிகே – கச்சி நோ ஸாதி கச்சி நு ஸா. அவண்ணோதி அகு³ணோ. அகித்தீதி நிந்தா³. அயஸோதி பரிவாரவிபத்தி; பரம்முக²க³ரஹா வா.

665. வஜ்ஜபடிச்சா²தி³காதி இத³ம்பி இமிஸ்ஸா பாராஜிகாய நாமமத்தமேவ, தஸ்மா பத³பா⁴ஜனே ந விசாரிதம். ஸேஸமேத்த² உத்தானமேவ.

666. ஸா வா ஆரோசேதீதி யா பாராஜிகம் ஆபன்னா, ஸா ஸயம் ஆரோசேதி. அட்ட²ன்னம் பாராஜிகானம் அஞ்ஞதரந்தி பி⁴க்கூ²ஹி ஸாதா⁴ரணானம் சதுன்னம் அஸாதா⁴ரணானஞ்ச சதுன்னமேவ அஞ்ஞதரம். இத³ஞ்ச பாராஜிகம் பச்சா² பஞ்ஞத்தம், தஸ்மா ‘‘அட்ட²ன்ன’’ந்தி விப⁴ங்கே³ வுத்தம். புரிமேன பன ஸத்³தி⁴ம் யுக³ளத்தா இமஸ்மிம் ஓகாஸே ட²பிதந்தி வேதி³தப்³ப³ம். து⁴ரம் நிக்கி²த்தமத்தேதி து⁴ரே நிக்கி²த்தமத்தே. வித்தா²ரகதா² பனேத்த² ஸப்பாணகவக்³க³ம்ஹி து³ட்டு²ல்லஸிக்கா²பதே³ வுத்தனயேனேவ வேதி³தப்³பா³. தத்ர ஹி பாசித்தியம், இத⁴ பாராஜிகந்தி அயமேவ விஸேஸோ. ஸேஸம் தாதி³ஸமேவ. வஜ்ஜபடிச்சா²தி³காதி இத³ம்பிஇமிஸ்ஸா பாராஜிகாய நாமமத்தா²மேவ, தஸ்மா பத³பா⁴ஜனே ந விசாரிதம். ஸேஸமேத்த² உத்தானமேவ.

து⁴ரனிக்கே²பஸமுட்டா²னம் – காயவாசாசித்ததோ ஸமுட்டா²தி, அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

து³தியபாராஜிகம்.

3. ததியபாராஜிகஸிக்கா²பத³வண்ணனா

669. ததியே – த⁴ம்மேனாதி பூ⁴தேன வத்து²னா. வினயேனாதி சோதே³த்வா ஸாரேத்வா. பத³பா⁴ஜனம் பனஸ்ஸ ‘‘யேன த⁴ம்மேன யேன வினயேன உக்கி²த்தோ ஸுஉக்கி²த்தோ ஹோதீ’’தி இமம்அதி⁴ப்பாயமத்தம் த³ஸ்ஸேதும் வுத்தம். ஸத்து²ஸாஸனேனாதி ஞத்திஸம்பதா³ய சேவ அனுஸாவனஸம்பதா³ய ச. பத³பா⁴ஜனே பனஸ்ஸ ‘‘ஜினஸாஸனேன பு³த்³த⁴ஸாஸனேனா’’தி வேவசனமத்தமேவ வுத்தம். ஸங்க⁴ம் வா க³ணம் வாதிஆதீ³ஸு யேன ஸங்கே⁴ன கம்மம் கதம், தம் ஸங்க⁴ம் வா தத்த² ஸம்ப³ஹுலபுக்³க³லஸங்கா²தம் க³ணம் வா, ஏகபுக்³க³லம் வா தம் கம்மம் வா ந ஆதி³யதி, ந அனுவத்ததி, ந தத்த² ஆத³ரம் ஜனேதீதி அத்தோ². ஸமானஸம்வாஸகா பி⁴க்கூ² வுச்சந்தி ஸஹாயா, ஸோ தேஹி ஸத்³தி⁴ம் நத்தீ²தி ஏத்த² ‘‘ஏககம்மம் ஏகுத்³தே³ஸோ ஸமஸிக்க²தா’’தி அயம் தாவ ஸம்வாஸோ; ஸமானோ ஸம்வாஸோ ஏதேஸந்தி ஸமானஸம்வாஸகா.ஏவரூபா பி⁴க்கூ² பி⁴க்கு²ஸ்ஸ தஸ்மிம் ஸம்வாஸே ஸஹ அயனபா⁴வேன ஸஹாயாதி வுச்சந்தி. இதா³னி யேன ஸம்வாஸேன தே ஸமானஸம்வாஸகாதி வுத்தா, ஸோ ஸம்வாஸோ தஸ்ஸ உக்கி²த்தகஸ்ஸ தேஹி ஸத்³தி⁴ம் நத்தி². யேஹி ச ஸத்³தி⁴ம் தஸ்ஸ ஸோ ஸம்வாஸோ நத்தி², ந தேன தே பி⁴க்கூ² அத்தனோ ஸஹாயா கதா ஹோந்தி. தஸ்மா வுத்தம் ‘‘ஸமானஸம்வாஸகா பி⁴க்கூ² வுச்சந்தி ஸஹாயா, ஸோ தேஹி ஸத்³தி⁴ம் நத்தி², தேன வுச்சதி அகதஸஹாயோ’’தி. ஸேஸம் ஸங்க⁴பே⁴த³ஸிக்கா²பதா³தீ³ஸு வுத்தனயத்தா உத்தானத்த²மேவ.

ஸமனுபா⁴ஸனஸமுட்டா²னம் – காயவாசாசித்ததோ ஸமுட்டா²தி, அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ததியபாராஜிகம்.

4. சதுத்த²பாராஜிகஸிக்கா²பத³வண்ணனா

675. சதுத்தே² – அவஸ்ஸுதாதி லோகஸ்ஸாத³மித்தஸந்த²வவஸேன காயஸம்ஸக்³க³ராகே³ன அவஸ்ஸுதா. து³தியபதே³பி ஏஸேவ நயோ. புரிஸபுக்³க³லஸ்ஸ ஹத்த²க்³க³ஹணம் வாதிஆதீ³ஸு பன யம் புரிஸபுக்³க³லேன ஹத்தே² க³ஹணம் கதம், தம் புரிஸபுக்³க³லஸ்ஸ ஹத்த²க்³க³ஹணந்தி வுத்தம். ஏஸேவ நயோ ஸங்கா⁴டிகண்ணக்³க³ஹணேபி. ஹத்த²க்³க³ஹணந்தி ஏத்த² ச ஹத்த²க்³க³ஹணஞ்ச அஞ்ஞம்பி அபாராஜிகக்கே²த்தே க³ஹணஞ்ச ஏகஜ்ஜ²ம் கத்வா ஹத்த²க்³க³ஹணந்தி வுத்தந்தி வேதி³தப்³ப³ம். தேனேவஸ்ஸ பத³பா⁴ஜனே ‘‘ஹத்த²க்³க³ஹணம் வா ஸாதி³யேய்யாதி ஹத்தோ² நாம கப்பரம் உபாதா³ய யாவ அக்³க³னகா², ஏதஸ்ஸ அஸத்³த⁴ம்மஸ்ஸ படிஸேவனத்தா²ய உப்³ப⁴க்க²கம் அதோ⁴ஜாணுமண்ட³லம் க³ஹணம் ஸாதி³யதி, ஆபத்தி து²ல்லச்சயஸ்ஸா’’தி வுத்தம். ஏத்த² ச அஸத்³த⁴ம்மோதி காயஸம்ஸக்³கோ³ வேதி³தப்³போ³, ந மேது²னத⁴ம்மோ. ந ஹி மேது²னஸ்ஸ ஸாமந்தா து²ல்லச்சயம் ஹோதி. ‘‘விஞ்ஞூ படிப³லோ காயஸம்ஸக்³க³ம் ஸமாபஜ்ஜிதுந்தி வசனம்பி சேத்த² ஸாத⁴கம்.

‘‘திஸ்ஸித்தி²யோ மேது²னம் தம் ந ஸேவே,

தயோ புரிஸே தயோ ச அனரியபண்ட³கே;

ந சாசரே மேது²னம் ப்³யஞ்ஜனஸ்மிம்,

சே²ஜ்ஜா ஸியா மேது²னத⁴ம்மபச்சயா;

பஞ்ஹா மேஸா குஸலேஹி சிந்திதா’’தி. (பரி. 481);

இமாய பரிவாரே வுத்தாய ஸேத³மோசககா³தா²ய விருஜ்ஜ²தீதி சே? ந; மேது²னத⁴ம்மஸ்ஸ புப்³ப³பா⁴க³த்தா. பரிவாரேயேவ ஹி ‘‘மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³’’தி ‘‘வண்ணாவண்ணோ காயஸம்ஸக்³கோ³ து³ட்டு²ல்லவாசா அத்தகாமபாரிசரியாக³மனுப்பாத³ன’’ந்தி ஏவம் ஸுக்கவிஸ்ஸட்டி²ஆதீ³னி பஞ்ச ஸிக்கா²பதா³னி மேது²னத⁴ம்மஸ்ஸ புப்³ப³பா⁴கோ³தி வுத்தானி. தஸ்மா காயஸம்ஸக்³கோ³ மேது²னத⁴ம்மஸ்ஸ புப்³ப³பா⁴க³த்தா பச்சயோ ஹோதி. இதி சே²ஜ்ஜா ஸியா மேது²னத⁴ம்மபச்சயாதி ஏத்த² இமினா பரியாயேன அத்தோ² வேதி³தப்³போ³. ஏதேனுபாயேன ஸப்³ப³பதே³ஸு வினிச்ச²யோ வேதி³தப்³போ³. அபிச ‘‘ஸங்கேதம் வா க³ச்சே²ய்யா’’தி ஏதஸ்ஸ பத³பா⁴ஜனே ‘‘இத்த²ன்னாமம் ஆக³ச்சா²’’தி. ஏவம்னாமகம் டா²னம் ஆக³ச்சா²தி அத்தோ².

676. அட்ட²மம் வத்து²ம் பரிபூரேந்தீ அஸ்ஸமணீ ஹோதீதி அனுலோமதோ வா படிலோமதோ வா ஏகந்தரிகாய வா யேன தேன நயேன அட்ட²மம் வத்து²ம் பரிபூரேந்தீயேவ அஸ்ஸமணீ ஹோதி. யா பன ஏகம் வா வத்து²ம் ஸத்த வா வத்தூ²னி ஸதக்க²த்தும்பி பூரேதி, நேவ அஸ்ஸமணீ ஹோதி. ஆபன்னா ஆபத்தியோ தே³ஸேத்வா முச்சதி. அபிசேத்த² க³ணனூபிகா ஆபத்தி வேதி³தப்³பா³. வுத்தஞ்ஹேதம் ‘‘அத்தா²பத்தி தே³ஸிதா க³ணனூபிகா, அத்தா²பத்தி தே³ஸிதா ந க³ணனூபிகா’’தி. தத்ராயம் வினிச்ச²யோ – இதா³னி நாபஜ்ஜிஸ்ஸாமீதி து⁴ரனிக்கே²பம் கத்வா தே³ஸிதா க³ணனூபிகா தே³ஸிதக³ணனம் உபேதி பாராஜிகஸ்ஸ அங்க³ம் ந ஹோதி. தஸ்மா யா ஏகம் ஆபன்னா து⁴ரனிக்கே²பம் கத்வா தே³ஸேத்வா புன கிலேஸவஸேன ஆபஜ்ஜதி, புன தே³ஸேதி, ஏவம் அட்ட² வத்தூ²னி பூரேந்தீபி பாராஜிகா ந ஹோதி. யா பன ஆபஜ்ஜித்வா புனபி அஞ்ஞம் வத்து²ம் ஆபஜ்ஜிஸ்ஸாமீதி ஸஉஸ்ஸாஹாவ தே³ஸேதி, தஸ்ஸா ஸா ஆபத்தி நக³ணனூபிகா, தே³ஸிதாபி அதே³ஸிதா ஹோதி, தே³ஸிதக³ணனம் ந க³ச்ச²தி, பாராஜிகஸ்ஸேவ அங்க³ம் ஹோதி. அட்ட²மே வத்து²ம்ஹி பரிபுண்ணமத்தே பாராஜிகா ஹோதி. ஸேஸம் உத்தானமேவாதி.

து⁴ரனிக்கே²பஸமுட்டா²னம் – காயவாசாசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், த்³விவேத³னந்தி.

சதுத்த²பாராஜிகம்.

உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா சத்தாரோ இமே ச சத்தாரோதி ஏவம் பாதிமோக்கு²த்³தே³ஸமக்³கே³ன உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி ஏவமேத்த² அத்தோ² த³ட்ட²ப்³போ³. ஸேஸம் மஹாவிப⁴ங்கே³ வுத்தனயமேவாதி.

ஸமந்தபாஸாதி³காய வினயஸம்வண்ணனாய பி⁴க்கு²னீவிப⁴ங்கே³

பாராஜிககண்ட³வண்ணனா நிட்டி²தா.

பாராஜிககண்ட³ம் நிட்டி²தம்.