6. பாடிதே³ஸனீயகண்ட³ம்

1. பட²மபாடிதே³ஸனீயஸிக்கா²பத³வண்ணனா

பாடிதே³ஸனீயா த⁴ம்மா, கு²த்³த³கானம் அனந்தரா;

ட²பிதா யே அயம் தா³னி, தேஸம் ப⁴வதி வண்ணனா.

552. பட²மபாடிதே³ஸனீயே தாவ படிக்கமனகாலேதி பிண்டா³ய சரித்வா படிஆக³மனகாலே. ஸப்³பே³வ அக்³க³ஹேஸீதி ஸப்³ப³மேவ அக்³க³ஹேஸி. பவேதே⁴ந்தீதி கம்பமானா. அபேஹீதி அபக³ச்ச².

553-5. கா³ரய்ஹம் ஆவுஸோதிஆதி³ படிதே³ஸேதப்³பா³காரத³ஸ்ஸனம். ரதி²காதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸிங்கா⁴டகந்தி சதுக்கோணம் வா திகோணம் வா மக்³க³ஸமோதா⁴னட்டா²னம். க⁴ரந்தி குலக⁴ரம். ஏதேஸு யத்த² கத்த²சி ட²த்வா க³ண்ஹந்தஸ்ஸ க³ஹணே து³க்கடம், அஜ்ஜோ²ஹாரே அஜ்ஜோ²ஹாரக³ணனாய பாடிதே³ஸனீயம். ஹத்தி²ஸாலாதீ³ஸு க³ண்ஹந்தஸ்ஸாபி ஏஸேவ நயோ. பி⁴க்கு²னீ ரதி²காய ட²த்வா தே³தி, பி⁴க்கு² ஸசேபி அந்தராராமாதீ³ஸு ட²த்வா க³ண்ஹாதி, ஆபத்தியேவ. ‘‘அந்தரக⁴ரம் பவிட்டா²யா’’தி ஹி வசனதோ பி⁴க்கு²னியா அந்தரக⁴ரே ட²த்வா த³த³மானாய வஸேனேத்த² ஆபத்தி வேதி³தப்³பா³, பி⁴க்கு²ஸ்ஸ டி²தட்டா²னம் பன அப்பமாணம். தஸ்மா ஸசேபி வீதி²ஆதீ³ஸு டி²தோ பி⁴க்கு² அந்தராராமாதீ³ஸு ட²த்வா த³த³மானாய பி⁴க்கு²னியா க³ண்ஹாதி, அனாபத்தியேவ.

யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸாதி இத³ம் ஆமிஸேன அஸம்பி⁴ன்னம் ஸந்தா⁴ய வுத்தம், ஸம்பி⁴ன்னே பன ஏகரஸே பாடிதே³ஸனீயமேவ. ஏகதோ உபஸம்பன்னாயாதி பி⁴க்கு²னீனம் ஸந்திகே உபஸம்பன்னாய. பி⁴க்கூ²னம் ஸந்திகே உபஸம்பன்னாய பன யதா²வத்து²கமேவ.

556. தா³பேதி ந தே³தீதி அஞ்ஞாதிகா அஞ்ஞேன கேனசி தா³பேதி தம் க³ண்ஹந்தஸ்ஸ அனாபத்தி. உபனிக்கி²பித்வா தே³தீதி பூ⁴மியம் ட²பேத்வா ‘‘இத³ம் அய்ய தும்ஹாகம் த³ம்மீ’’தி தே³தி, ஏவம் தி³ன்னம் ‘‘ஸாது⁴ ப⁴கி³னீ’’தி ஸம்படிச்சி²த்வா தாய ஏவ வா பி⁴க்கு²னியா அஞ்ஞேன வா கேனசி படிக்³க³ஹாபேத்வா பு⁴ஞ்ஜிதும் வட்டதி. ஸிக்க²மானாய ஸாமணேரியாதி ஏதாஸம் த³த³மானானம் க³ண்ஹந்தஸ்ஸ அனாபத்தி. ஸேஸமேத்த² உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

பட²மபாடிதே³ஸனீயம்.

2. து³தியபாடிதே³ஸனீயஸிக்கா²பத³வண்ணனா

558. து³தியே – அபஸக்க தாவ ப⁴கி³னீதிஆதி³ அபஸாதே³தப்³பா³காரத³ஸ்ஸனம்.

561. அத்தனோ ப⁴த்தம் தா³பேதி ந தே³தீதி ஏத்த² ஸசேபி அத்தனோ ப⁴த்தம் தே³தி, இமினா ஸிக்கா²பதே³ன அனாபத்தியேவ, புரிமஸிக்கா²பதே³ன ஆபத்தி. அஞ்ஞேஸம் ப⁴த்தம் தே³தி ந தா³பேதீதி ஏத்த² ஸசேபி தா³பேய்ய, இமினா ஸிக்கா²பதே³ன ஆபத்தி ப⁴வேய்ய. தே³ந்தியா பன நேவ இமினா ந புரிமேன ஆபத்தி. ஸேஸமேத்த² உத்தானமேவ. கதி²னஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

து³தியபாடிதே³ஸனீயம்.

3. ததியபாடிதே³ஸனீயஸிக்கா²பத³வண்ணனா

562. ததியே – உப⁴தோபஸன்னந்தி த்³வீஹி பஸன்னம் உபாஸகேனபி உபாஸிகாயபி. தஸ்மிம் கிர குலே உபோ⁴பி தே ஸோதாபன்னாயேவ. போ⁴கே³ன ஹாயதீதி ஏதி³ஸஞ்ஹி குலம் ஸசேபி அஸீதிகோடித⁴னம் ஹோதி, போ⁴கே³ஹி ஹாயதியேவ. கஸ்மா? யஸ்மா தத்த² நேவ உபாஸிகா ந உபாஸகோ போ⁴கே³ ரக்க²தி.

569. க⁴ரதோ நீஹரித்வா தே³ந்தீதி ஆஸனஸாலம் வா விஹாரம் வா ஆனேத்வா தே³ந்தி. ஸசேபி அனாக³தே பி⁴க்கு²ம்ஹி பட²மம்யேவ நீஹரித்வா த்³வாரே ட²பேத்வா பச்சா² ஸம்பத்தஸ்ஸ தே³ந்தி, வட்டதி. பி⁴க்கு²ம் பன தி³ஸ்வா அந்தோகே³ஹதோ நீஹரித்வா தி³ய்யமானம் ந வட்டதீதி மஹாபச்சரியம் வுத்தம். ஸேஸமேத்த² உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம் திசித்தம், திவேத³னந்தி.

ததியபாடிதே³ஸனீயம்.

4. சதுத்த²பாடிதே³ஸனீயஸிக்கா²பத³வண்ணனா

570. சதுத்தே² – அவருத்³தா⁴ ஹோந்தீதி படிவிருத்³தா⁴ ஹோந்தி.

573. பஞ்சன்னம் படிஸம்விதி³தந்தி பஞ்சஸு ஸஹத⁴ம்மிகேஸு யம்கிஞ்சி பேஸேத்வா கா²த³னீயம் போ⁴ஜனீயம் ஆஹரிஸ்ஸாமாதி படிஸம்விதி³தம் கதம்பி அப்படிஸம்விதி³தமேவாதி அத்தோ². ஆராமம் ஆராமூபசாரம் ட²பேத்வாதி ஆரஞ்ஞகஸேனாஸனாராமஞ்ச தஸ்ஸ உபசாரஞ்ச ட²பேத்வா; உபசாரதோ நிக்க²ந்தம் அந்தராமக்³கே³ பி⁴க்கு²ம் தி³ஸ்வா வா கா³மம் ஆக³தஸ்ஸ வா படிஸம்விதி³தம் கதம்பி அப்படிஸம்விதி³தமேவ ஹோதீதி வேதி³தப்³ப³ம். ஸசே ஸாஸங்கம் ஹோதி ஸாஸங்கந்தி ஆசிக்கி²தப்³ப³ந்தி கஸ்மா ஆசிக்கி²தப்³ப³ம்? ஆராமே சோரே வஸந்தே அம்ஹாகம் நாரோசேந்தீதி வசனபடிமோசனத்த²ம். சோரா வத்தப்³பா³ மனுஸ்ஸா இதூ⁴பசரந்தீதி கஸ்மா வத்தப்³ப³ம்? அத்தனோ உபட்டா²கேஹி அம்ஹே க³ண்ஹாபேந்தீதி வசனபடிமோசனத்த²ம்.

யாகு³யா படிஸம்விதி³தே தஸ்ஸா பரிவாரோ ஆஹரிய்யதீதி யாகு³யா படிஸம்விதி³தம் கத்வா ‘‘கிம் ஸுத்³த⁴யாகு³யா தி³ன்னாய பூவப⁴த்தாதீ³னிபி ஏதிஸ்ஸா யாகு³யா பரிவாரம் கத்வா த³ஸ்ஸாமா’’தி ஏவம் யம் கிஞ்சி ஆஹரந்தி, ஸப்³ப³ம் படிஸம்விதி³தமேவ ஹோதி. ப⁴த்தேன படிஸம்விதி³தேதிஆதீ³ஸுபி ஏஸேவ நயோ. அஸுகம் நாம குலம் படிஸம்விதி³தம் கத்வா கா²த³னீயாதீ³னி க³ஹேத்வா க³ச்ச²தீதி ஸுத்வா அஞ்ஞானிபி தேன ஸத்³தி⁴ம் அத்தனோ தே³ய்யத⁴ம்மம் ஆஹரந்தி, வட்டதி. யாகு³யா படிஸம்விதி³தம் கத்வா பூவம் வா ப⁴த்தம் வா ஆஹரந்தி, ஏதம்பி வட்டதீதி குருந்தி³யம் வுத்தம்.

575. கி³லானஸ்ஸாதி அப்படிஸம்விதி³தேபி கி³லானஸ்ஸ அனாபத்தி. படிஸம்விதி³தே வா கி³லானஸ்ஸ வா ஸேஸகந்தி ஏகஸ்ஸத்தா²ய படிஸம்விதி³தம் கத்வா ஆஹடம், தஸ்ஸ ஸேஸகம் அஞ்ஞஸ்ஸாபி பு⁴ஞ்ஜிதும் வட்டதி. சதுன்னம் பஞ்சன்னம் வா படிஸம்விதி³தம் கத்வா ப³ஹும் ஆஹடம் ஹோதி, அஞ்ஞேஸம்பி தா³தும் இச்ச²ந்தி, ஏதம்பி படிஸம்விதி³தஸேஸகமேவ, ஸப்³பே³ஸம்பி வட்டதி. அத² அதி⁴கமேவ ஹோதி, ஸன்னிதி⁴ம் மோசேத்வா ட²பிதம் து³தியதி³வஸேபி வட்டதி. கி³லானஸ்ஸ ஆஹடாவஸேஸேபி ஏஸேவ நயோ. யம் பன அப்படிஸம்விதி³தமேவ கத்வா ஆப⁴தம், தம் ப³ஹிஆராமம் பேஸேத்வா படிஸம்விதி³தம் காரேத்வா ஆஹராபேதப்³ப³ம், பி⁴க்கூ²ஹி வா க³ந்த்வா அந்தராமக்³கே³ க³ஹேதப்³ப³ம். யம்பி விஹாரமஜ்ஜே²ன க³ச்ச²ந்தா வா வனசரகாத³யோ வா வனதோ ஆஹரித்வா தே³ந்தி, புரிமனயேனேவ படிஸம்விதி³தம் காரேதப்³ப³ம். தத்த²ஜாதகந்தி ஆராமே ஜாதகமேவ; மூலகா²த³னீயாதி³ம் அஞ்ஞேன கப்பியம் கத்வா தி³ன்னம் பரிபு⁴ஞ்ஜதோ அனாபத்தி. ஸசே பன தம் கா³மம் ஹரித்வா பசித்வா ஆஹரந்தி, ந வட்டதி. படிஸம்விதி³தம் காரேதப்³ப³ம். ஸேஸமேத்த² உத்தானமேவ.

கதி²னஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சதுத்த²பாடிதே³ஸனீயம்.

ஸமந்தபாஸாதி³காய வினயஸம்வண்ணனாய

பாடிதே³ஸனீயவண்ணனா நிட்டி²தா.

பாடிதே³ஸனீயகண்ட³ம் நிட்டி²தம்.