7. ஸேகி²யகண்ட³ம்

1. பரிமண்ட³லவக்³க³வண்ணனா

யானி ஸிக்கி²தஸிக்கே²ன, ஸேகி²யானீதி தாதி³னா;

பா⁴ஸிதானி அயம் தா³னி, தேஸம்பி வண்ணனாக்கமோ.

576. தத்த² பரிமண்ட³லந்தி ஸமந்ததோ மண்ட³லம். நாபி⁴மண்ட³லம் ஜாணுமண்ட³லந்தி உத்³த⁴ம் நாபி⁴மண்ட³லம் அதோ⁴ ஜாணுமண்ட³லம் படிச்சா²தே³ந்தேன ஜாணுமண்ட³லஸ்ஸ ஹேட்டா² ஜங்க⁴ட்டி²கதோ பட்டா²ய அட்ட²ங்கு³லமத்தம் நிவாஸனம் ஓதாரேத்வா நிவாஸேதப்³ப³ம், ததோ பரம் ஓதாரேந்தஸ்ஸ து³க்கடந்தி வுத்தம். யதா² நிஸின்னஸ்ஸ ஜாணுமண்ட³லதோ ஹேட்டா² சதுரங்கு³லமத்தம் படிச்ச²ன்னம் ஹோதீதி மஹாபச்சரியம் வுத்தம்; ஏவம் நிவாஸேந்தஸ்ஸ பன நிவாஸனம் பமாணிகம் வட்டதி. தத்ரித³ம் பமாணம் – தீ³க⁴தோ முட்டி²பஞ்சகம், திரியம் அட்³ட⁴தேய்யஹத்த²ம். தாதி³ஸஸ்ஸ பன அலாபே⁴ திரியம் த்³விஹத்த²பமாணம்பி வட்டதி ஜாணுமண்ட³லபடிச்சா²த³னத்த²ம், நாபி⁴மண்ட³லம் பன சீவரேனாபி ஸக்கா படிச்சா²தே³துந்தி. தத்த² ஏகபட்டசீவரம் ஏவம் நிவத்த²ம்பி நிவத்த²ட்டா²னே ந திட்ட²தி, து³பட்டம் பன திட்ட²தி.

ஓலம்பே³ந்தோ நிவாஸேதி ஆபத்தி து³க்கடஸ்ஸாதி ஏத்த² ந கேவலம் புரதோ ச பச்ச²தோ ச ஓலம்பே³த்வா நிவாஸேந்தஸ்ஸேவ து³க்கடம், யே பனஞ்ஞே ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹினிவத்த²ம் நிவாஸேந்தி ஹத்தி²ஸோண்ட³கம் மச்ச²வாலகம் சதுக்கண்ணகம் தாலவண்டகம் ஸதவலிகம் நிவாஸேந்தீ’’திஆதி³னா (சூளவ. 280) நயேன க²ந்த⁴கே நிவாஸனதோ³ஸா வுத்தா, ததா² நிவாஸேந்தஸ்ஸாபி து³க்கடமேவ. தே ஸப்³பே³ வுத்தனயேன பரிமண்ட³லம் நிவாஸேந்தஸ்ஸ ந ஹோந்தி. அயமேத்த² ஸங்கே²போ, வித்தா²ரதோ பன தத்தே²வ ஆவி ப⁴விஸ்ஸதி.

அஸஞ்சிச்சாதி புரதோ வா பச்ச²தோ வா ஓலம்பே³த்வா நிவாஸேஸ்ஸாமீதி ஏவம் அஸஞ்சிச்ச; அத² கோ² பரிமண்ட³லம்யேவ நிவாஸேஸ்ஸாமீதி விரஜ்ஜி²த்வா அபரிமண்ட³லம் நிவாஸேந்தஸ்ஸ அனாபத்தி. அஸ்ஸதியாதி அஞ்ஞவிஹிதஸ்ஸாபி ததா² நிவாஸேந்தஸ்ஸ அனாபத்தி. அஜானந்தஸ்ஸாதி ஏத்த² நிவாஸனவத்தம் அஜானந்தஸ்ஸ மோக்கோ² நத்தி². நிவாஸனவத்தஞ்ஹி ஸாது⁴கம் உக்³க³ஹேதப்³ப³ம், தஸ்ஸ அனுக்³க³ஹணமேவஸ்ஸ அனாத³ரியம். தம் பன ஸஞ்சிச்ச அனுக்³க³ண்ஹந்தஸ்ஸ யுஜ்ஜதி, தஸ்மா உக்³க³ஹிதவத்தோபி யோ ஆருள்ஹபா⁴வம் வா ஓருள்ஹபா⁴வம் வா ந ஜானாதி, தஸ்ஸ அனாபத்தி. குருந்தி³யம் பன ‘‘பரிமண்ட³லம் நிவாஸேதும் அஜானந்தஸ்ஸ அனாபத்தீ’’தி வுத்தம். யோ பன ஸுக்க²ஜங்கோ⁴ வா மஹாபிண்டி³கமம்ஸோ வா ஹோதி, தஸ்ஸ ஸாருப்பத்தா²ய ஜாணுமண்ட³லதோ அட்ட²ங்கு³லாதி⁴கம்பி ஓதாரேத்வா நிவாஸேதும் வட்டதி.

கி³லானஸ்ஸாதி ஜங்கா⁴ய வா பாதே³ வா வணோ ஹோதி, உக்கி²பித்வா வா ஓதாரேத்வா வா நிவாஸேதும் வட்டதி. ஆபதா³ஸூதி வாளமிகா³ வா சோரா வா அனுப³ந்த⁴ந்தி, ஏவரூபாஸு ஆபதா³ஸு அனாபத்தி. ஸேஸமேத்த² உத்தானமேவ.

பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், து³க்க²வேத³னந்தி. பு²ஸ்ஸதே³வத்தே²ரோ ‘‘அசித்தகம், பண்ணத்திவஜ்ஜம், திவேத³ன’’ந்தி ஆஹ. உபதிஸ்ஸத்தே²ரோ பன ‘‘அனாத³ரியம் படிச்சா’’தி வுத்தத்தா ‘‘லோகவஜ்ஜம், அகுஸலசித்தம், து³க்க²வேத³ன’’ந்தி ஆஹ.

577. பரிமண்ட³லம் பாருபிதப்³ப³ந்தி ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹிபாருதம் பாருபந்தீ’’தி (சூளவ. 280) ஏவம் வுத்தம் அனேகப்பகாரம் கி³ஹிபாருபனம் அபாருபித்வா இத⁴ வுத்தனயேனேவ உபோ⁴ கண்ணே ஸமம் கத்வா பாருபனவத்தம் பூரேந்தேன பரிமண்ட³லம் பாருபிதப்³ப³ம். இமானி ச த்³வே ஸிக்கா²பதா³னி அவிஸேஸேன வுத்தானி. தஸ்மா விஹாரேபி அந்தரக⁴ரேபி பரிமண்ட³லமேவ நிவாஸேதப்³ப³ஞ்ச பாருபிதப்³ப³ஞ்சாதி. ஸமுட்டா²னாதீ³னி பட²மஸிக்கா²பதே³ வுத்தனயேனேவ வேதி³தப்³பா³னி ஸத்³தி⁴ம் தே²ரவாதே³ன.

578. காயம் விவரித்வாதி ஜத்தும்பி உரம்பி விவரித்வா. ஸுப்படிச்ச²ன்னேனாதி ந ஸஸீஸம் பாருதேன; அத² கோ² க³ண்டி²கம் படிமுஞ்சித்வா அனுவாதந்தேன கீ³வம் படிச்சா²தே³த்வா உபோ⁴ கண்ணே ஸமம் கத்வா படிஸம்ஹரித்வா யாவ மணிப³ந்த⁴ம் படிச்சா²தே³த்வா அந்தரக⁴ரே க³ந்தப்³ப³ம். து³தியஸிக்கா²பதே³ – க³லவாடகதோ பட்டா²ய ஸீஸம் மணிப³ந்த⁴தோ பட்டா²ய ஹத்தே² பிண்டி³கமம்ஸதோ ச பட்டா²ய பாதே³ விவரித்வா நிஸீதி³தப்³ப³ம்.

579. வாஸூபக³தஸ்ஸாதி வாஸத்தா²ய உபக³தஸ்ஸ ரத்திபா⁴கே³ வா தி³வஸபா⁴கே³ வா காயம் விவரித்வாபி நிஸீத³தோ அனாபத்தி.

580. ஸுஸம்வுதோதி ஹத்த²ம் வா பாத³ம் வா அகீளாபேந்தோ; ஸுவினீதோதி அத்தோ².

582. ஓக்கி²த்தசக்கூ²தி ஹேட்டா² கி²த்தசக்கு² ஹுத்வா. யுக³மத்தம் பேக்க²மானோதி யுக³யுத்தகோ ஹி த³ந்தோ ஆஜானேய்யோ யுக³மத்தம் பேக்க²தி, புரதோ சதுஹத்த²ப்பமாணம் பூ⁴மிபா⁴க³ம்; இமினாபி ஏத்தகம் பேக்க²ந்தேன க³ந்தப்³ப³ம். யோ அனாத³ரியம் படிச்ச தஹம் தஹம் ஓலோகேந்தோதி யோ தம்தம்தி³ஸாபா⁴க³ம் பாஸாத³ம் கூடாகா³ரம் வீதி²ம் ஓலோகேந்தோ க³ச்ச²தி, ஆபத்தி து³க்கடஸ்ஸ. ஏகஸ்மிம் பன டா²னே ட²த்வா ஹத்தி²அஸ்ஸாதி³பரிஸ்ஸயாபா⁴வம் ஓலோகேதும் வட்டதி. நிஸீத³ந்தேனாபி ஓக்கி²த்தசக்கு²னாவ நிஸீதி³தப்³ப³ம்.

584. உக்கி²த்தகாயாதி உக்கே²பேன; இத்த²ம்பூ⁴தலக்க²ணே கரணவசனம் ஏகதோ வா உப⁴தோ வா உக்கி²த்தசீவரோ ஹுத்வாதி அத்தோ². அந்தோஇந்த³கீ²லதோ பட்டா²ய ந ஏவம் க³ந்தப்³ப³ம். நிஸின்னகாலே பன த⁴மகரணம் நீஹரந்தேனாபி சீவரம் அனுக்கி²பித்வாவ நீஹரிதப்³ப³ந்தி.

பட²மோ வக்³கோ³.

2. உஜ்ஜக்³கி⁴கவக்³க³வண்ணனா

586. உஜ்ஜக்³கி⁴காயாதி மஹாஹஸிதம் ஹஸந்தோ. வுத்தனயேனேவேத்த² கரணவசனம்.

588. அப்பஸத்³தோ³ அந்தரக⁴ரேதி ஏத்த² கித்தாவதா அப்பஸத்³தோ³ ஹோதி? த்³வாத³ஸஹத்தே² கே³ஹே ஆதி³ம்ஹி ஸங்க⁴த்தே²ரோ, மஜ்ஜே² து³தியத்தே²ரோ, அந்தே ததியத்தே²ரோதி ஏவம் நிஸின்னேஸு ஸங்க⁴த்தே²ரோ து³தியேன ஸத்³தி⁴ம் மந்தேதி, து³தியத்தே²ரோ தஸ்ஸ ஸத்³த³ஞ்சேவ ஸுணாதி, கத²ஞ்ச வவத்த²பேதி. ததியத்தே²ரோ பன ஸத்³த³மேவ ஸுணாதி, கத²ம் ந வவத்த²பேதி. ஏத்தாவதா அப்பஸத்³தோ³ ஹோதி. ஸசே பன ததியத்தே²ரோ கத²ம் வவத்த²பேதி, மஹாஸத்³தோ³ நாம ஹோதி.

590. காயம் பக்³க³ஹேத்வாதி நிச்சலம் கத்வா உஜுகேன காயேன ஸமேன இரியாபதே²ன க³ந்தப்³ப³ஞ்சேவ நிஸீதி³தப்³ப³ஞ்ச.

592. பா³ஹும் பக்³க³ஹேத்வாதி நிச்சலம் கத்வா.

594. ஸீஸம் பக்³க³ஹேத்வாதி நிச்சலம் உஜும் ட²பயித்வா.

து³தியோ வக்³கோ³.

3. க²ம்ப⁴கதவக்³க³வண்ணனா

596-8. க²ம்ப⁴கதோ நாம கடியம் ஹத்த²ம் ட²பேத்வா கதக²ம்போ⁴. ஓகு³ண்டி²தோதி ஸஸீஸம் பாருதோ.

600. உக்குடிகாயாதி ஏத்த² உக்குடிகா வுச்சதி பண்ஹியோ உக்கி²பித்வா அக்³க³பாதே³ஹி வா, அக்³க³பாதே³ வா உக்கி²பித்வா பண்ஹீஹியேவ வா பூ⁴மிம் பு²ஸந்தஸ்ஸ க³மனம். கரணவசனம் பனேத்த² வுத்தலக்க²ணமேவ.

601. து³ஸ்ஸபல்லத்தி²காயாதி ஏத்த² ஆயோக³பல்லத்தி²காபி து³ஸ்ஸபல்லத்தி²கா ஏவ.

602. ஸக்கச்சந்தி ஸதிம் உபட்ட²பேத்வா.

603. ஆகிரந்தேபீதி பிண்ட³பாதம் தே³ந்தேபி. பத்தஸஞ்ஞீதி பத்தே ஸஞ்ஞம் கத்வா.

604. ஸமஸூபகோ நாம யத்த² ப⁴த்தஸ்ஸ சதுத்த²பா⁴க³ப்பமாணோ ஸூபோ ஹோதி. முக்³க³ஸூபோ மாஸஸூபோதி ஏத்த² குலத்தா²தீ³ஹி கதஸூபாபி ஸங்க³ஹம் க³ச்ச²ந்தியேவாதி மஹாபச்சரியம் வுத்தம். ரஸரஸேதி ஏத்த² ட²பேத்வா த்³வே ஸூபே அவஸேஸானி ஓலோணீஸாகஸூபேய்யமச்ச²ரஸமம்ஸரஸாதீ³னி ரஸரஸாதி வேதி³தப்³பா³னி. தம் ரஸரஸம் ப³ஹும்பி க³ண்ஹந்தஸ்ஸ அனாபத்தி.

605. ஸமதித்திகந்தி ஸமபுண்ணம் ஸமப⁴ரிதம். தூ²பீகதம் பிண்ட³பாதம் படிக்³க³ண்ஹாதி, ஆபத்தி து³க்கடஸ்ஸாதி ஏத்த² தூ²பீகதோ நாம பத்தஸ்ஸ அந்தோமுக²வட்டிலேக²ம் அதிக்கமித்வா கதோ; பத்தே பக்கி²த்தோ ரசிதோ பூரிதோதி அத்தோ². ஏவம் கதம் அக³ஹேத்வா அந்தோமுக²வட்டிலேகா²ஸமப்பமாணோ க³ஹேதப்³போ³.

தத்த² தூ²பீகதம் நாம ‘‘பஞ்சஹி போ⁴ஜனேஹி கத’’ந்தி அப⁴யத்தே²ரோ ஆஹ. திபிடகசூளனாக³த்தே²ரோ பன ‘‘பிண்ட³பாதோ நாம யாகு³பி ப⁴த்தம்பி கா²த³னீயம்பி சுண்ணபிண்டோ³பி த³ந்தகட்ட²ம்பி த³ஸிகஸுத்தம்பீ’’தி இத³ம் ஸுத்தம் வத்வா த³ஸிகஸுத்தம்பி தூ²பீகதம் ந வட்டதீதி ஆஹ. தேஸம் வாத³ம் ஸுத்வா பி⁴க்கூ² ரோஹணம் க³ந்த்வா சூளஸுமனத்தே²ரம் புச்சி²ம்ஸு – ‘‘ப⁴ந்தே தூ²பீகதபிண்ட³பாதோ கேன பரிச்சி²ன்னோ’’தி? தேஸஞ்ச தே²ரானம் வாத³ம் ஆரோசேஸும். தே²ரோ ஸுத்வா ஆஹ – ‘‘அஹோ, சூளனாகோ³ ஸாஸனதோ ப⁴ட்டோ², அஹம் ஏதஸ்ஸ ஸத்தக்க²த்தும் வினயம் வாசேந்தோ ந கதா³சி ஏவம் அவசம், அயம் குதோ லபி⁴த்வா ஏவம் வத³ஸீ’’தி. பி⁴க்கூ² தே²ரம் யாசிம்ஸு – ‘‘கதே²த² தா³னி, ப⁴ந்தே, கேன பரிச்சி²ன்னோ’’தி? ‘‘யாவகாலிகேனாவுஸோ’’தி தே²ரோ ஆஹ. தஸ்மா யம்கிஞ்சி யாகு³ப⁴த்தம் வா ப²லாப²லம் வா ஆமிஸஜாதிகம் ஸமதித்திகமேவ க³ஹேதப்³ப³ம். தஞ்ச கோ² அதி⁴ட்டா²னுபகே³ன பத்தேன, இதரேன பன தூ²பீகதம்பி வட்டதி. யாமகாலிகஸத்தாஹகாலிகயாவஜீவிகானி பன அதி⁴ட்டா²னுபக³பத்தேபி தூ²பீகதானி வட்டந்தி. த்³வீஸு பத்தேஸு ப⁴த்தம் க³ஹேத்வா ஏகஸ்மிம் பூரேத்வா விஹாரம் பேஸேதும் வட்டதீதி மஹாபச்சரியம் பன வுத்தம். யம் பத்தே பக்கி²பியமானம் பூவஉச்சு²க²ண்ட³ப²லாப²லாதி³ ஹேட்டா² ஓரோஹதி, தம் தூ²பீகதம் நாம ந ஹோதி. பூவவடம்ஸகம் ட²பேத்வா பிண்ட³பாதம் தே³ந்தி, தூ²பீகதமேவ ஹோதி. புப்ப²வடம்ஸகதக்கோலகடுகப²லாதி³வடம்ஸகே பன ட²பேத்வா தி³ன்னம் தூ²பீகதம் ந ஹோதி. ப⁴த்தஸ்ஸ உபரி தா²லகம் வா பத்தம் வா ட²பேத்வா பூரேத்வா க³ண்ஹாதி, தூ²பீகதம் நாம ந ஹோதி. குருந்தி³யம்பி வுத்தம் – ‘‘தா²லகே வா பண்ணே வா பக்கி²பித்வா தம் பத்தமத்த²கே ட²பேத்வா தே³ந்தி, பாடேக்கபா⁴ஜனம் வட்டதீ’’தி.

இத⁴ அனாபத்தியம் கி³லானோ ந ஆக³தோ, தஸ்மா கி³லானஸ்ஸபி தூ²பீகதம் ந வட்டதி. ஸப்³ப³த்த² பன படிக்³க³ஹேதுமேவ ந வட்டதி. படிக்³க³ஹிதம் பன ஸுபடிக்³க³ஹிதமேவ ஹோதி, பரிபு⁴ஞ்ஜிதும் வட்டதீதி.

ததியோ வக்³கோ³.

4. ஸக்கச்சவக்³க³வண்ணனா

606. ஸக்கச்சந்தி ஏத்தா²பி அஸக்கச்சம் படிக்³க³ஹணேயேவ ஆபத்தி, படிக்³க³ஹிதம் பன ஸுபடிக்³க³ஹிதமேவ. ஸக்கச்சந்தி ச பத்தஸஞ்ஞீதி சாதி உப⁴யம் வுத்தனயமேவ.

608. ஸபதா³னந்தி தத்த² தத்த² ஓதி⁴ம் அகத்வா அனுபடிபாடியா. ஸமஸூபகே வத்தப்³ப³ம் வுத்தமேவ.

610. தூ²பகதோதி மத்த²கதோ; வேமஜ்ஜ²தோதி அத்தோ².

611. படிச்சா²தே³த்வா தே³ந்தீதி மாகா⁴தஸமயாதீ³ஸு படிச்ச²ன்னம் ப்³யஞ்ஜனம் கத்வா தே³ந்தி. விஞ்ஞத்தியம் வத்தப்³ப³ம் நத்தி².

614. உஜ்ஜா²னஸஞ்ஞீஸிக்கா²பதே³பி கி³லானோ ந முச்சதி.

615. நாதிமஹந்தோ கப³ளோதி மயூரண்ட³ம் அதிமஹந்தம், குக்குடண்ட³ம் அதிகு²த்³த³கம், தேஸம் வேமஜ்ஜ²ப்பமாணோ. க²ஜ்ஜகேதி ஏத்த² மூலகா²த³னீயாதி³ ஸப்³ப³ம் க³ஹேதப்³ப³ம்.

சதுத்தோ² வக்³கோ³.

5. கப³ளவக்³க³வண்ணனா

617. அனாஹடேதி அனாஹரிதே; முக²த்³வாரம் அஸம்பாபிதேதி அத்தோ².

618. ஸப்³ப³ம் ஹத்த²ந்தி ஸகலஹத்த²ம்.

619. ஸகப³ளேனாதி ஏத்த² த⁴ம்மம் கதே²ந்தோ ஹரீதகம் வா லட்டி²மது⁴கம் வா முகே² பக்கி²பித்வா கதே²தி. யத்தகேன வசனம் அபரிபுண்ணம் ந ஹோதி, தத்தகே முக²ம்ஹி ஸந்தே கதே²தும் வட்டதி.

620. பிண்டு³க்கே²பகந்தி பிண்ட³ம் உக்கி²பித்வா உக்கி²பித்வா.

621. கப³ளாவச்சே²த³கந்தி கப³ளம் அவச்சி²ந்தி³த்வா அவச்சி²ந்தி³த்வா.

622. அவக³ண்ட³காரகந்தி மக்கடோ விய க³ண்டே³ கத்வா கத்வா.

623. ஹத்த²னித்³து⁴னகந்தி ஹத்த²ம் நித்³து⁴னித்வா நித்³து⁴னித்வா.

624. ஸித்தா²வகாரகந்தி ஸித்தா²னி அவகிரித்வா அவகிரித்வா.

625. ஜிவ்ஹானிச்சா²ரகந்தி ஜிவ்ஹம் நிச்சா²ரேத்வா நிச்சா²ரேத்வா.

626. சபுசபுகாரகந்தி சபு சபூதி ஏவம் ஸத்³த³ம் கத்வா கத்வா.

பஞ்சமோ வக்³கோ³.

6. ஸுருஸுருவக்³க³வண்ணனா

627. ஸுருஸுருகாரகந்தி ஸுருஸுரூதி ஏவம் ஸத்³த³ம் கத்வா கத்வா. த³வோதி பரிஹாஸவசனம்; தம் யேன கேனசி பரியாயேன ‘‘கிம் பு³த்³தோ⁴, ஸிலகபு³த்³தோ⁴, படிபு³த்³தோ⁴; கிம் த⁴ம்மோ, கோ³த⁴ம்மோ, அஜத⁴ம்மோ; கிம் ஸங்கோ⁴, மிக³ஸங்கோ⁴, பஸுஸங்கோ⁴’’திஆதி³னா நயேன தீணி ரதனானி ஆரப்³ப⁴ ந காதப்³ப³ந்தி அத்தோ².

628. ஹத்த²னில்லேஹகந்தி ஹத்த²ம் நில்லேஹித்வா நில்லேஹித்வா. பு⁴ஞ்ஜந்தேன ஹி அங்கு³லிமத்தம்பி நில்லேஹிதும் ந வட்டதி. க⁴னயாகு³பா²ணிதபாயாஸாதி³கே பன அங்கு³லீஹி க³ஹேத்வா அங்கு³லியோ முகே² பவேஸேத்வா பு⁴ஞ்ஜிதும் வட்டதி. பத்தனில்லேஹகஓட்ட²னில்லேஹகேஸுபி ஏஸேவ நயோ. தஸ்மா ஏகங்கு³லியாபி பத்தோ ந நில்லேஹிதப்³போ³, ஏகஓட்டோ²பி ஜிவ்ஹாய ந நில்லேஹிதப்³போ³, ஓட்ட²மம்ஸேஹி ஏவ பன க³ஹேத்வா அந்தோ பவேஸேதும் வட்டதி.

631. கோகனதே³தி ஏவம்னாமகே. கோகனத³ந்தி பது³மம் வுச்சதி, ஸோ ச பாஸாதோ³ பது³மஸண்டா²னோ, தேனஸ்ஸ கோகனதோ³த்வேவ நாமம் அகம்ஸு. ந ஸாமிஸேன ஹத்தே²ன பானீயதா²லகந்தி ஏதம் படிக்கூலவஸேன படிக்கி²த்தம், தஸ்மா ஸங்கி⁴கம்பி புக்³க³லிகம்பி கி³ஹிஸந்தகம்பி அத்தனோ ஸந்தகம்பி ஸங்க²ம்பி ஸராவம்பி தா²லகம்பி ந க³ஹேதப்³ப³மேவ, க³ண்ஹந்தஸ்ஸ து³க்கடம். ஸசே பன ஹத்த²ஸ்ஸ ஏகதே³ஸோ ஆமிஸமக்கி²தோ ந ஹோதி, தேன பதே³ஸேன க³ஹேதும் வட்டதி.

632. உத்³த⁴ரித்வா வாதி ஸித்தா²னி உத³கதோ உத்³த⁴ரித்வா ஏகஸ்மிம் டா²னே ராஸிம் கத்வா உத³கம் ச²ட்³டே³தி. பி⁴ந்தி³த்வா வாதி ஸித்தா²னி பி⁴ந்தி³த்வா உத³கக³திகானி கத்வா ச²ட்³டே³தி. படிக்³க³ஹே வாதி படிக்³க³ஹேன படிச்ச²ந்தோ நம் படிக்³க³ஹே ச²ட்³டே³தி. நீஹரித்வாதி ப³ஹி நீஹரித்வா ச²ட்³டே³தி; ஏவம் ச²ட்³டே³ந்தஸ்ஸ அனாபத்தி.

634. ஸேதச்ச²த்தந்தி வத்த²பலிகு³ண்டி²தம் பண்ட³ரச்ச²த்தம். கிலஞ்ஜச்ச²த்தந்தி விலீவச்ச²த்தம். பண்ணச்ச²த்தந்தி தாலபண்ணாதீ³ஹி யேஹி கேஹிசி கதம். மண்ட³லப³த்³த⁴ம் ஸலாகப³த்³த⁴ந்தி இத³ம் பன திண்ணம்பி ச²த்தானம் பஞ்ஜரத³ஸ்ஸனத்த²ம் வுத்தம். தானி ஹி மண்ட³லப³த்³தா⁴னி சேவ ஹோந்தி ஸலாகப³த்³தா⁴னி ச. யம்பி தத்த²ஜாதகத³ண்ட³கேன கதம் ஏகபண்ணச்ச²த்தம் ஹோதி, தம்பி ச²த்தமேவ. ஏதேஸு யம்கிஞ்சி ச²த்தம் பாணிம்ஹி அஸ்ஸாதி ச²த்தபாணி. ஸோ தம் ச²த்தம் தா⁴ரயமானோ வா அம்ஸே வா கத்வா ஊரும்ஹி வா ட²பேத்வா யாவ ஹத்தே²ன ந முச்சதி, தாவஸ்ஸ த⁴ம்மம் தே³ஸேதும் ந வட்டதி, தே³ஸேந்தஸ்ஸ வுத்தனயேன து³க்கடம். ஸசே பனஸ்ஸ அஞ்ஞோ ச²த்தம் தா⁴ரேதி, ச²த்தபாது³காய வா டி²தம் ஹோதி, ஹத்த²தோ அபக³தமத்தே ச²த்தபாணி நாம ந ஹோதி. தஸ்ஸ த⁴ம்மம் தே³ஸேதும் வட்டதி. த⁴ம்மபரிச்சே²தோ³ பனேத்த² பத³ஸோத⁴ம்மே வுத்தனயேனேவ வேதி³தப்³போ³.

635. த³ண்ட³பாணிஸ்ஸாதி ஏத்த² த³ண்டோ³ நாம மஜ்ஜி²மஸ்ஸ புரிஸஸ்ஸ சதுஹத்த²ப்பமாணோ த³ண்ட³பாணிபா⁴வோ பனஸ்ஸ ச²த்தபாணிம்ஹி வுத்தனயேனேவ வேதி³தப்³போ³.

636. ஸத்த²பாணிம்ஹிபி ஏஸேவ நயோ. அஸிம் ஸன்னஹித்வா டி²தோபி ஹி ஸத்த²பாணிஸங்க்²யம் ந க³ச்ச²தி.

637. ஆவுத⁴பாணிஸ்ஸாதி ஏத்த² கிஞ்சாபி வுத்தம் – ‘‘ஆவுத⁴ம் நாம சாபோ கோத³ண்டோ³’’தி, அத² கோ² ஸப்³பா³பி த⁴னுவிகதி ஸத்³தி⁴ம் ஸரவிகதியா ஆவுத⁴ந்தி வேதி³தப்³ப³ம். தஸ்மா ஸத்³தி⁴ம் வா ஸரேன த⁴னும் க³ஹேத்வா ஸுத்³த⁴த⁴னும் வா ஸுத்³த⁴ஸரம் வா ஸஜியத⁴னும் வா நிஜ்ஜியத⁴னும் வா க³ஹேத்வா டி²தஸ்ஸ வா நிஸின்னஸ்ஸ வா த⁴ம்மோ தே³ஸேதும் ந வட்டதி. ஸசே பனஸ்ஸ த⁴னும் கண்டே²பி படிமுக்கம் ஹோதி, யாவ ஹத்தே²ன ந க³ண்ஹாதி, தாவ த⁴ம்மம் தே³ஸேதும் வட்டதியேவாதி.

ச²ட்டோ² வக்³கோ³.

7. பாது³கவக்³க³வண்ணனா

638. அக்கந்தஸ்ஸாதி ச²த்தத³ண்ட³கே அங்கு³லந்தரம் அப்பவேஸேத்வா கேவலம் பாது³கம் அக்கமித்வா டி²தஸ்ஸ. படிமுக்கஸ்ஸாதி படிமுஞ்சித்வா டி²தஸ்ஸ. உபாஹனாயபி ஏஸேவ நயோ. ஓமுக்கோதி பனேத்த² பண்ஹிகப³த்³த⁴ம் ஓமுஞ்சித்வா டி²தோ வுச்சதி.

640. யானக³தஸ்ஸாதி ஏத்த² ஸசேபி த்³வீஹி ஜனேஹி ஹத்த²ஸங்கா⁴டேன க³ஹிதோ, ஸாடகே வா ட²பேத்வா வம்ஸேன வய்ஹதி, அயுத்தே வா வய்ஹாதி³கே யானே, விஸங்க²ரித்வா வா ட²பிதே சக்கமத்தேபி நிஸின்னோ யானக³தோத்வேவ ஸங்க்²யம் க³ச்ச²தி. ஸசே பன த்³வேபி ஏகயானே நிஸின்னா ஹோந்தி, வட்டதி. விஸும் நிஸின்னேஸுபி உச்சே யானே நிஸின்னேன நீசே நிஸின்னஸ்ஸ தே³ஸேதும் வட்டதி, ஸமப்பமாணேபி வட்டதி. புரிமே யானே நிஸின்னேன பச்சி²மே நிஸின்னஸ்ஸ வட்டதி. பச்சி²மே பன உச்சதரேபி நிஸின்னேன தே³ஸேதும் ந வட்டதி.

641. ஸயனக³தஸ்ஸாதி அந்தமஸோ கடஸாரகேபி பகதிபூ⁴மியம்பி நிபன்னஸ்ஸ உச்சேபி மஞ்சபீடே² வா பூ⁴மிபதே³ஸே வா டி²தேன நிஸின்னேன வா தே³ஸேதும் ந வட்டதி. ஸயனக³தேன பன ஸயனக³தஸ்ஸ உச்சதரே வா ஸமப்பமாணே வா நிபன்னேன தே³ஸேதும் வட்டதி. நிபன்னேன ச டி²தஸ்ஸ வா நிஸின்னஸ்ஸ வா தே³ஸேதும் வட்டதி, நிஸின்னேனாபி டி²தஸ்ஸ வா நிஸின்னஸ்ஸ வா வட்டதி. டி²தேன டி²தஸ்ஸேவ வட்டதி.

642. பல்லத்தி²காயாதி ஆயோக³பல்லத்தி²காய வா ஹத்த²பல்லத்தி²காய வா து³ஸ்ஸபல்லத்தி²காய வா யாய காயசி பல்லத்தி²காய நிஸின்னஸ்ஸ அகி³லானஸ்ஸ தே³ஸேதும் ந வட்டதி.

643. வேடி²தஸீஸஸ்ஸாதி து³ஸ்ஸவேட²னேன வா மோளிஆதீ³ஹி வா யதா² கேஸந்தோ ந தி³ஸ்ஸதி; ஏவம் வேடி²தஸீஸஸ்ஸ.

644. ஓகு³ண்டி²தஸீஸஸ்ஸாதி ஸஸீஸம் பாருதஸ்ஸ.

645. ச²மாயம் நிஸின்னேனாதி பூ⁴மியம் நிஸின்னேன. ஆஸனே நிஸின்னஸ்ஸாதி அந்தமஸோ வத்த²ம்பி திணானிபி ஸந்த²ரித்வா நிஸின்னஸ்ஸ.

647. ச²பகஸ்ஸாதி சண்டா³லஸ்ஸ. ச²பகீதி சண்டா³லீ. நிலீனோதி படிச்ச²ன்னோ ஹுத்வா. யத்ர ஹி நாமாதி யோ ஹி நாம. ஸப்³ப³மித³ம் சரிமம் கதந்தி தத்தே²வ பரிபதீதி ‘‘ஸப்³போ³ அயம் லோகோ ஸங்கரம் க³தோ நிம்மரியாதோ³’’தி இமம் வசனம் வத்வா தத்தே²வ தேஸம் த்³வின்னம்பி அந்தரா ருக்க²தோ பதிதோ. பதித்வா ச பன உபி⁴ன்னம்பி புரதோ ட²த்வா இமம் கா³த²ம் அபா⁴ஸி –

‘‘உபோ⁴ அத்த²ம் ந ஜானந்தி…பே… அஸ்மா கும்ப⁴மிவாபி⁴தா³’’தி.

தத்த² உபோ⁴ அத்த²ம் ந ஜானந்தீதி த்³வேபி ஜனா பாளியா அத்த²ம் ந ஜானந்தி. த⁴ம்மம் ந பஸ்ஸரேதி பாளிம் ந பஸ்ஸந்தி. கதமே தே உபோ⁴தி? ‘‘யோ சாயம் மந்தம் வாசேதி, யோ சாத⁴ம்மேனதீ⁴யதீ’’தி. ஏவம் ப்³ராஹ்மணஞ்ச ராஜானஞ்ச உபோ⁴பி அத⁴ம்மிகபா⁴வே ட²பேஸி.

ததோ ப்³ராஹ்மணோ ஸாலீனந்தி கா³த²மாஹ. தஸ்ஸத்தோ² – ஜானாமஹம் போ⁴ ‘‘அயம் அத⁴ம்மோ’’தி; அபி ச கோ² மயா தீ³க⁴ரத்தம் ஸபுத்ததா³ரபரிஜனேன ரஞ்ஞோ ஸந்தகோ ஸாலீனம் ஓத³னோ பு⁴த்தோ. ஸுசிமம்ஸூபஸேசனோதி நானப்பகாரவிகதிஸம்பாதி³தம் ஸுசிமம்ஸூபஸேசனம் மிஸ்ஸீகரணமஸ்ஸாதி ஸுசிமம்ஸூபஸேசனோ. தஸ்மா த⁴ம்மே ந வத்தாமீதி யஸ்மா ஏவம் மயா ரஞ்ஞோ ஓத³னோ பு⁴த்தோ, அஞ்ஞே ச ப³ஹூ லாபா⁴ லத்³தா⁴, தஸ்மா த⁴ம்மே அஹம் ந வத்தாமி உத³ரே ப³த்³தோ⁴ ஹுத்வா, ந த⁴ம்மம் அஜானந்தோ. அயஞ்ஹி த⁴ம்மோ அரியேஹி வண்ணிதோ பஸத்தோ² தோ²மிதோதி ஜானாமி.

அத² நம் ச²பகோ ‘‘தி⁴ரத்தூ²’’திஆதி³னா கா³தா²த்³வயேன அஜ்ஜ²பா⁴ஸி. தஸ்ஸத்தோ² – யோ தயா த⁴னலாபோ⁴ ச யஸலாபோ⁴ ச லத்³தோ⁴, தி⁴ரத்து² தம் த⁴னலாப⁴ம் யஸலாப⁴ஞ்ச ப்³ராஹ்மண. கஸ்மா? யஸ்மா அயம் தயா லத்³தோ⁴ லாபோ⁴ ஆயதிம் அபாயேஸு வினிபாதனஹேதுனா ஸம்பதி ச அத⁴ம்மசரணேன வுத்தி நாம ஹோதி. ஏவரூபா யா வுத்தி ஆயதிம் வினிபாதேன இத⁴ அத⁴ம்மசரணேன வா நிப்பஜ்ஜதி, கிம் தாய வுத்தியா? தேன வுத்தம் –

‘‘தி⁴ரத்து² தம் த⁴னலாப⁴ம், யஸலாப⁴ஞ்ச ப்³ராஹ்மண;

யா வுத்தி வினிபாதேன, அத⁴ம்மசரணேன வா’’தி.

பரிப்³ப³ஜ மஹாப்³ரஹ்மேதி மஹாப்³ராஹ்மண இதோ தி³ஸா ஸீக⁴ம் பலாயஸ்ஸு. பசந்தஞ்ஞேபி பாணினோதி அஞ்ஞேபி ஸத்தா பசந்தி சேவ பு⁴ஞ்ஜந்தி ச; ந கேவலம் த்வஞ்சேவ ராஜா ச. மா த்வம் அத⁴ம்மோ ஆசரிதோ அஸ்மா கும்ப⁴மிவாபி⁴தா³தி ஸசே ஹி த்வம் இதோ அபரிப்³ப³ஜித்வா இமம் அத⁴ம்மம் ஆசரிஸ்ஸஸி, ததோ த்வம் ஸோ அத⁴ம்மோ ஏவம் ஆசரிதோ யதா² உத³ககும்ப⁴ம் பாஸாணோ பி⁴ந்தே³ய்ய; ஏவம் பே⁴ச்ச²தி, தேன மயம் தம் வதா³ம –

‘‘பரிப்³ப³ஜ மஹாப்³ரஹ்மே, பசந்தஞ்ஞேபி பாணினோ;

மா த்வம் அத⁴ம்மோ ஆசரிதோ, அஸ்மா கும்ப⁴மிவாபி⁴தா³’’தி.

உச்சே ஆஸனேதி அந்தமஸோ பூ⁴மிப்பதே³ஸேபி உன்னதட்டா²னே நிஸின்னஸ்ஸ தே³ஸேதும் ந வட்டதி.

648. ந டி²தோ நிஸின்னஸ்ஸாதி ஸசேபி தே²ருபட்டா²னம் க³ந்த்வா டி²தம் த³ஹரபி⁴க்கு²ம் ஆஸனே நிஸின்னோ மஹாதே²ரோ பஞ்ஹம் புச்ச²தி, ந கதே²தப்³ப³ம். கா³ரவேன பன தே²ரம் உட்ட²ஹித்வா புச்ச²தா²தி வத்தும் ந ஸக்கா, பஸ்ஸே டி²தபி⁴க்கு²ஸ்ஸ கதே²மீதி கதே²தும் வட்டதி.

649. ந பச்ச²தோ க³ச்ச²ந்தேனாதி ஏத்த² ஸசே புரதோ க³ச்ச²ந்தோ பச்ச²தோ க³ச்ச²ந்தம் பஞ்ஹம் புச்ச²தி, ந கதே²தப்³ப³ம். பச்சி²மஸ்ஸ பி⁴க்கு²னோ கதே²மீதி கதே²தும் வட்டதி. ஸத்³தி⁴ம் உக்³க³ஹிதத⁴ம்மம் பன ஸஜ்ஜா²யிதும் வட்டதி. ஸமது⁴ரேன க³ச்ச²ந்தஸ்ஸ கதே²தும் வட்டதி.

650. ந உப்பதே²னாதி ஏத்தா²பி ஸசே த்³வேபி ஸகடபதே² ஏகேகசக்கபதே²ன வா உப்பதே²ன வா ஸமது⁴ரம் க³ச்ச²ந்தி, வட்டதி.

651. அஸஞ்சிச்சாதி படிச்ச²ன்னட்டா²னம் க³ச்ச²ந்தஸ்ஸ ஸஹஸா உச்சாரோ வா பஸ்ஸாவோ வா நிக்க²மதி, அஸஞ்சிச்ச கதோ நாம அனாபத்தி.

652. ந ஹரிதேதி ஏத்த² யம்பி ஜீவருக்க²ஸ்ஸ மூலம் பத²வியம் தி³ஸ்ஸமானம் க³ச்ச²தி, ஸாகா² வா பூ⁴மிலக்³கா³ க³ச்ச²தி, ஸப்³ப³ம் ஹரிதஸங்கா²தமேவ. க²ந்தே⁴ நிஸீதி³த்வா அப்பஹரிதட்டா²னே பாதேதும் வட்டதி. அப்பஹரிதட்டா²னம் ஓலோகேந்தஸ்ஸேவ ஸஹஸா நிக்க²மதி, கி³லானட்டா²னே டி²தோ ஹோதி, வட்டதி. அப்பஹரிதே கதோதி அப்பஹரிதம் அலப⁴ந்தேன திணண்டு³பகம் வா பலாலண்டு³பகம் வா ட²பேத்வா கதோபி பச்சா² ஹரிதம் ஓத்த²ரதி, வட்டதியேவ. கே²ளேன சேத்த² ஸிங்கா⁴ணிகாபி ஸங்க³ஹிதாதி மஹாபச்சரியம் வுத்தம்.

653. ந உத³கேதி ஏதம் பரிபோ⁴க³உத³கமேவ ஸந்தா⁴ய வுத்தம், வச்சகுடிஸமுத்³தா³தி³உத³கேஸு பன அபரிபோ⁴கே³ஸு அனாபத்தி. தே³வே வஸ்ஸந்தே ஸமந்ததோ உத³கோகோ⁴ ஹோதி, அனுத³கட்டா²னம் ஓலோகேந்தஸ்ஸேவ நிக்க²மதி, வட்டதி. மஹாபச்சரியம் வுத்தம் – ‘‘ஏதாதி³ஸே காலே அனுத³கட்டா²னம் அலப⁴ந்தேன காதும் வட்டதீ’’தி. ஸேஸம் ஸப்³ப³ஸிக்கா²பதே³ஸு உத்தானத்த²மேவ.

ஸத்தமோ வக்³கோ³.

ஸமுட்டா²னாதி³தீ³பனத்தா²ய பனேத்த² இத³ம் பகிண்ணகம் – உஜ்ஜக்³கி⁴கஉச்சாஸத்³த³படிஸம்யுத்தானி சத்தாரி, ஸகப³ளேன முகே²ன ப்³யாஹரணம் ஏகம், ச²மானீசாஸனடா²னபச்ச²தோக³மனஉப்பத²க³மனபடிஸம்யுத்தானி பஞ்சாதி இமானி த³ஸ ஸிக்கா²பதா³னி ஸமனுபா⁴ஸனஸமுட்டா²னானி காயவாசாசித்ததோ ஸமுட்ட²ஹந்தி, கிரியானி, ஸஞ்ஞாவிமோக்கா²னி, ஸசித்தகானி, லோகவஜ்ஜானி, காயகம்மவசீகம்மானி, அகுஸலசித்தானி, து³க்க²வேத³னானீதி.

ஸூபோத³னவிஞ்ஞத்திஸிக்கா²பத³ம் தே²ய்யஸத்த²ஸமுட்டா²னம் காயசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ச²த்தபாணித³ண்ட³பாணிஸத்த²பாணிஆவுத⁴பாணிபாது³கஉபாஹனயானஸயனபல்லத்தி²கவேடி²தஓகு³ண்டி²தனாமகானி ஏகாத³ஸ ஸிக்கா²பதா³னி த⁴ம்மதே³ஸனஸமுட்டா²னானி வாசாசித்ததோ ஸமுட்ட²ஹந்தி, கிரியாகிரியானி, ஸஞ்ஞாவிமோக்கா²னி, ஸசித்தகானி, லோகவஜ்ஜானி, வசீகம்மானி, அகுஸலசித்தானி, து³க்க²வேத³னானீதி.

அவஸேஸானி தேபண்ணாஸ ஸிக்கா²பதா³னி பட²மபாராஜிகஸமுட்டா²னானீதி.

ஸப்³ப³ஸேகி²யேஸு ஆபா³த⁴பச்சயா அனாபத்தி, தூ²பீகதபிண்ட³பாதே ஸூபப்³யஞ்ஜனேன படிச்சா²த³னே உஜ்ஜா²னஸஞ்ஞிம்ஹீதி தீஸு ஸிக்கா²பதே³ஸு கி³லானோ நத்தீ²தி.

ஸேகி²யவண்ணனா நிட்டி²தா.

ஸேகி²யகண்ட³ம் நிட்டி²தம்.