2. ரதனஸிக்கா²பத³வண்ணனா

502-3. து³தியே – விஸ்ஸரித்வாதி பமுஸ்ஸித்வா. புண்ணபத்தம் நாம ஸததோ பஞ்ச கஹாபணா. க்யாஹம் கரிஸ்ஸாமீதி கிம் அஹம் கரிஸ்ஸாமி. ஆப⁴ரணம் ஓமுஞ்சித்வாதி மஹாலதம் நாம நவகோடிஅக்³க⁴னகம் அலங்காரம் அபனேத்வா.

504. அந்தேவாஸீதி பரிசாரகோ.

506. அபரிக்கி²த்தஸ்ஸ உபசாரோதி ஏத்த² உபசாரோ நாம ஆராமஸ்ஸ த்³வே லேட்³டு³பாதா – ‘‘ஆவஸத²ஸ்ஸ பன ஸுப்பபாதோ வா முஸலபாதோ வா’’தி மஹாபச்சரியம் வுத்தம். உக்³க³ண்ஹாதி ஆபத்தி பாசித்தியஸ்ஸாதி ஏத்த² ஜாதரூபரஜதம் அத்தனோ அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா நிஸ்ஸக்³கி³யம் பாசித்தியம், ஸங்க⁴க³ணபுக்³க³லசேதியனவகம்மானம் அத்தா²ய து³க்கடம், அவஸேஸம் முத்தாதி³ரதனம் அத்தனோ வா ஸங்கா⁴தீ³னம் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா து³க்கடம். கப்பியவத்து² வா அகப்பியவத்து² வா ஹோது, அந்தமஸோ மாது கண்ணபிளந்த⁴னதாளபண்ணம்பி கி³ஹிஸந்தகம் ப⁴ண்டா³கா³ரிகஸீஸேன படிஸாமேந்தஸ்ஸ பாசித்தியமேவ.

ஸசே பன மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம் ஹோதி, அத்தனோ அத்தா²ய க³ஹேத்வா படிஸாமேதப்³ப³ம். ‘‘இத³ம் படிஸாமேத்வா தே³ஹீ’’தி வுத்தே பன ‘‘ந வட்டதீ’’தி படிக்கி²பிதப்³ப³ம். ஸசே ‘‘படிஸாமேஹீ’’தி பாதேத்வா க³ச்ச²ந்தி, பலிபோ³தோ⁴ நாம ஹோதி, படிஸாமேதும் வட்டதி. விஹாரே கம்மம் கரோந்தா வட்³ட⁴கீஆத³யோ வா ராஜவல்லபா⁴ வா அத்தனோ உபகரணப⁴ண்ட³ம் வா ஸயனப⁴ண்ட³ம் வா ‘‘படிஸாமேத்வா தே³தா²’’தி வத³ந்தி, ச²ந்தே³னபி ப⁴யேனபி ந காதப்³ப³மேவ, கு³த்தட்டா²னம் பன த³ஸ்ஸேதும் வட்டதி. ப³லக்காரேன பாதேத்வா க³தேஸு ச படிஸாமேதும் வட்டதி.

அஜ்ஜா²ராமே வா அஜ்ஜா²வஸதே² வாதி ஏத்த² ஸசே மஹாவிஹாரஸதி³ஸோ மஹாராமோ ஹோதி, தத்த² பாகாரபரிக்கி²த்தே பரிவேணே யத்த² பி⁴க்கூ²ஹி வா ஸாமணேரேஹி வா க³ஹிதம் ப⁴விஸ்ஸதீதி ஸங்கா உப்பஜ்ஜதி, தாதி³ஸே ஏவ டா²னே உக்³க³ண்ஹித்வா வா உக்³க³ண்ஹாபேத்வா வா ட²பேதப்³ப³ம். மஹாபோ³தி⁴த்³வாரகோட்ட²கஅம்ப³ங்க³ணஸதி³ஸேஸு பன மஹாஜனஸஞ்சரணட்டா²னேஸு ந க³ஹேதப்³ப³ம், பலிபோ³தோ⁴ ந ஹோதி. குருந்தி³யம் பன வுத்தம் ‘‘ஏகோ மக்³க³ம் க³ச்ச²ந்தோ நிமனுஸ்ஸட்டா²னே கிஞ்சி ப⁴ண்ட³ம் பஸ்ஸதி, ஆகிண்ணமனுஸ்ஸேபி ஜாதே மனுஸ்ஸா தமேவ பி⁴க்கு²ம் ஆஸங்கந்தி, தஸ்மா மக்³கா³ ஓக்கம்ம நிஸீதி³தப்³ப³ம். ஸாமிகேஸு ஆக³தேஸு தம் ஆசிக்கி²தப்³ப³ம். ஸசே ஸாமிகே ந பஸ்ஸதி பதிரூபம் கரிஸ்ஸதீ’’தி.

ரூபேன வா நிமித்தேன வா ஸஞ்ஞாணம் கத்வாதி ஏத்த² ரூபம் நாம அந்தோப⁴ண்டி³காய ப⁴ண்ட³ம்; தஸ்மா ப⁴ண்டி³கம் முஞ்சித்வா க³ணேத்வா ஏத்தகா கஹாபணா வா ஜாதரூபரஜதம் வாதி ஸல்லக்கே²தப்³ப³ம். நிமித்தந்தி லஞ்ச²னாதி³; தஸ்மா லஞ்சி²தாய ப⁴ண்டி³காய மத்திகாலஞ்ச²னந்தி வா லாகா²லஞ்ச²னந்தி வா நீலபிலோதிகாய ப⁴ண்டி³கா கதாதி வா ஸேதபிலோதிகாய கதாதி வா ஏவமாதி³ ஸப்³ப³ம் ஸல்லக்கே²தப்³ப³ம்.

பி⁴க்கூ² பதிரூபாதி லஜ்ஜினோ குக்குச்சகா. லோலஜாதிகானஞ்ஹி ஹத்தே² ட²பேதும் ந லப⁴தி. யோ பன நேவ தம்ஹா ஆவாஸா பக்கமதி, ந ஸாமிகே பஸ்ஸதி, தேனாபி அத்தனோ சீவராதி³மூலம் ந காதப்³ப³ம்; தா²வரம் பன ஸேனாஸனம் வா சேதியம் வா போக்க²ரணீ வா காரேதப்³பா³. ஸசே தீ³க⁴ஸ்ஸ அத்³து⁴னோ அச்சயேன ஸாமிகோ ஆக³ச்ச²தி, ‘‘உபாஸக தவ ஸந்தகேன இத³ம் நாம கதம், அனுமோதா³ஹீ’’தி வத்தப்³போ³. ஸசே அனுமோத³தி, இச்சேதம் குஸலம்; நோ சே அனுமோத³தி, ‘‘மம த⁴னம் தே³தா²’’தி சோதே³தியேவ, அஞ்ஞம் ஸமாத³பேத்வா தா³தப்³ப³ம்.

507. ரதனஸம்மதம் விஸ்ஸாஸம் க³ண்ஹாதீதிஆதீ³ஸு ஆமாஸமேவ ஸந்தா⁴ய வுத்தம். அனாமாஸம் ந வட்டதியேவ. ஸேஸமேத்த² உத்தானமேவ. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ரதனஸிக்கா²பத³ம் து³தியம்.