9. ரதனவக்³கோ³

1. அந்தேபுரஸிக்கா²பத³வண்ணனா

494. ராஜவக்³க³ஸ்ஸ பட²மஸிக்கா²பதே³ – ஓரகோதி பரித்தகோ. உபரிபாஸாத³வரக³தோதி பாஸாத³வரஸ்ஸ உபரிக³தோ. அய்யானம் வாஹஸாதி அய்யானம் காரணா; தேஹி ஜானாபிதத்தா ஜானாமீதி வுத்தம் ஹோதி.

497. பிதரம் பத்தே²தீதி அந்தரம் பஸ்ஸித்வா கா⁴தேதும் இச்ச²தி. ராஜந்தேபுரம் ஹத்தி²ஸம்மத்³த³ந்திஆதீ³ஸு ஹத்தீ²ஹி ஸம்மத்³தோ³ ஏத்தா²தி ஹத்தி²ஸம்மத்³த³ம்; ஹத்தி²ஸம்பா³த⁴ந்தி அத்தோ². அஸ்ஸரத²ஸம்மத்³த³பதே³பி ஏஸேவ நயோ. ‘‘ஸம்மத்த’’ந்தி கேசி பட²ந்தி, தம் ந க³ஹேதப்³ப³ம். ‘‘ரஞ்ஞோ அந்தேபுரே ஹத்தி²ஸம்மத்³த³’’ந்திபி பாடோ², தத்த² ஹத்தீ²னம் ஸம்மத்³த³ம் ஹத்தி²ஸம்மத்³த³ந்தி அத்தோ², ரஞ்ஞோ அந்தேபுரே ஹத்தி²ஸம்மத்³தோ³ அத்தீ²தி வுத்தம் ஹோதி. ஏஸ நயோ ஸேஸபதே³ஸுபி. ரஜனீயானீதி தஸ்மிம் அந்தேபுரே ஏதி³ஸானி ரூபாதீ³னி.

498. முத்³தா⁴வஸித்தஸ்ஸாதி முத்³த⁴னி அவஸித்தஸ்ஸ. அனிக்க²ந்தோ ராஜா இதோதி அனிக்க²ந்தராஜகம், தஸ்மிம் அனிக்க²ந்தராஜகே; ஸயனிக⁴ரேதி அத்தோ². ரதனம் வுச்சதி மஹேஸீ, நிக்³க³தந்தி நிக்க²ந்தம், அனிக்³க³தம் ரதனம் இதோதி அனிக்³க³தரதனகம், தஸ்மிம் அனிக்³க³தரதனகே; ஸயனிக⁴ரேதி அத்தோ². ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

அந்தேபுரஸிக்கா²பத³ம் பட²மம்.

2. ரதனஸிக்கா²பத³வண்ணனா

502-3. து³தியே – விஸ்ஸரித்வாதி பமுஸ்ஸித்வா. புண்ணபத்தம் நாம ஸததோ பஞ்ச கஹாபணா. க்யாஹம் கரிஸ்ஸாமீதி கிம் அஹம் கரிஸ்ஸாமி. ஆப⁴ரணம் ஓமுஞ்சித்வாதி மஹாலதம் நாம நவகோடிஅக்³க⁴னகம் அலங்காரம் அபனேத்வா.

504. அந்தேவாஸீதி பரிசாரகோ.

506. அபரிக்கி²த்தஸ்ஸ உபசாரோதி ஏத்த² உபசாரோ நாம ஆராமஸ்ஸ த்³வே லேட்³டு³பாதா – ‘‘ஆவஸத²ஸ்ஸ பன ஸுப்பபாதோ வா முஸலபாதோ வா’’தி மஹாபச்சரியம் வுத்தம். உக்³க³ண்ஹாதி ஆபத்தி பாசித்தியஸ்ஸாதி ஏத்த² ஜாதரூபரஜதம் அத்தனோ அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா நிஸ்ஸக்³கி³யம் பாசித்தியம், ஸங்க⁴க³ணபுக்³க³லசேதியனவகம்மானம் அத்தா²ய து³க்கடம், அவஸேஸம் முத்தாதி³ரதனம் அத்தனோ வா ஸங்கா⁴தீ³னம் வா அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா து³க்கடம். கப்பியவத்து² வா அகப்பியவத்து² வா ஹோது, அந்தமஸோ மாது கண்ணபிளந்த⁴னதாளபண்ணம்பி கி³ஹிஸந்தகம் ப⁴ண்டா³கா³ரிகஸீஸேன படிஸாமேந்தஸ்ஸ பாசித்தியமேவ.

ஸசே பன மாதாபிதூனம் ஸந்தகம் அவஸ்ஸம் படிஸாமேதப்³ப³ம் கப்பியப⁴ண்ட³ம் ஹோதி, அத்தனோ அத்தா²ய க³ஹேத்வா படிஸாமேதப்³ப³ம். ‘‘இத³ம் படிஸாமேத்வா தே³ஹீ’’தி வுத்தே பன ‘‘ந வட்டதீ’’தி படிக்கி²பிதப்³ப³ம். ஸசே ‘‘படிஸாமேஹீ’’தி பாதேத்வா க³ச்ச²ந்தி, பலிபோ³தோ⁴ நாம ஹோதி, படிஸாமேதும் வட்டதி. விஹாரே கம்மம் கரோந்தா வட்³ட⁴கீஆத³யோ வா ராஜவல்லபா⁴ வா அத்தனோ உபகரணப⁴ண்ட³ம் வா ஸயனப⁴ண்ட³ம் வா ‘‘படிஸாமேத்வா தே³தா²’’தி வத³ந்தி, ச²ந்தே³னபி ப⁴யேனபி ந காதப்³ப³மேவ, கு³த்தட்டா²னம் பன த³ஸ்ஸேதும் வட்டதி. ப³லக்காரேன பாதேத்வா க³தேஸு ச படிஸாமேதும் வட்டதி.

அஜ்ஜா²ராமே வா அஜ்ஜா²வஸதே² வாதி ஏத்த² ஸசே மஹாவிஹாரஸதி³ஸோ மஹாராமோ ஹோதி, தத்த² பாகாரபரிக்கி²த்தே பரிவேணே யத்த² பி⁴க்கூ²ஹி வா ஸாமணேரேஹி வா க³ஹிதம் ப⁴விஸ்ஸதீதி ஸங்கா உப்பஜ்ஜதி, தாதி³ஸே ஏவ டா²னே உக்³க³ண்ஹித்வா வா உக்³க³ண்ஹாபேத்வா வா ட²பேதப்³ப³ம். மஹாபோ³தி⁴த்³வாரகோட்ட²கஅம்ப³ங்க³ணஸதி³ஸேஸு பன மஹாஜனஸஞ்சரணட்டா²னேஸு ந க³ஹேதப்³ப³ம், பலிபோ³தோ⁴ ந ஹோதி. குருந்தி³யம் பன வுத்தம் ‘‘ஏகோ மக்³க³ம் க³ச்ச²ந்தோ நிமனுஸ்ஸட்டா²னே கிஞ்சி ப⁴ண்ட³ம் பஸ்ஸதி, ஆகிண்ணமனுஸ்ஸேபி ஜாதே மனுஸ்ஸா தமேவ பி⁴க்கு²ம் ஆஸங்கந்தி, தஸ்மா மக்³கா³ ஓக்கம்ம நிஸீதி³தப்³ப³ம். ஸாமிகேஸு ஆக³தேஸு தம் ஆசிக்கி²தப்³ப³ம். ஸசே ஸாமிகே ந பஸ்ஸதி பதிரூபம் கரிஸ்ஸதீ’’தி.

ரூபேன வா நிமித்தேன வா ஸஞ்ஞாணம் கத்வாதி ஏத்த² ரூபம் நாம அந்தோப⁴ண்டி³காய ப⁴ண்ட³ம்; தஸ்மா ப⁴ண்டி³கம் முஞ்சித்வா க³ணேத்வா ஏத்தகா கஹாபணா வா ஜாதரூபரஜதம் வாதி ஸல்லக்கே²தப்³ப³ம். நிமித்தந்தி லஞ்ச²னாதி³; தஸ்மா லஞ்சி²தாய ப⁴ண்டி³காய மத்திகாலஞ்ச²னந்தி வா லாகா²லஞ்ச²னந்தி வா நீலபிலோதிகாய ப⁴ண்டி³கா கதாதி வா ஸேதபிலோதிகாய கதாதி வா ஏவமாதி³ ஸப்³ப³ம் ஸல்லக்கே²தப்³ப³ம்.

பி⁴க்கூ² பதிரூபாதி லஜ்ஜினோ குக்குச்சகா. லோலஜாதிகானஞ்ஹி ஹத்தே² ட²பேதும் ந லப⁴தி. யோ பன நேவ தம்ஹா ஆவாஸா பக்கமதி, ந ஸாமிகே பஸ்ஸதி, தேனாபி அத்தனோ சீவராதி³மூலம் ந காதப்³ப³ம்; தா²வரம் பன ஸேனாஸனம் வா சேதியம் வா போக்க²ரணீ வா காரேதப்³பா³. ஸசே தீ³க⁴ஸ்ஸ அத்³து⁴னோ அச்சயேன ஸாமிகோ ஆக³ச்ச²தி, ‘‘உபாஸக தவ ஸந்தகேன இத³ம் நாம கதம், அனுமோதா³ஹீ’’தி வத்தப்³போ³. ஸசே அனுமோத³தி, இச்சேதம் குஸலம்; நோ சே அனுமோத³தி, ‘‘மம த⁴னம் தே³தா²’’தி சோதே³தியேவ, அஞ்ஞம் ஸமாத³பேத்வா தா³தப்³ப³ம்.

507. ரதனஸம்மதம் விஸ்ஸாஸம் க³ண்ஹாதீதிஆதீ³ஸு ஆமாஸமேவ ஸந்தா⁴ய வுத்தம். அனாமாஸம் ந வட்டதியேவ. ஸேஸமேத்த² உத்தானமேவ. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ரதனஸிக்கா²பத³ம் து³தியம்.

3. விகாலகா³மப்பவிஸனஸிக்கா²பத³வண்ணனா

508. ததியே – திரச்சா²னகத²ந்தி அரியமக்³க³ஸ்ஸ திரச்சா²னபூ⁴தம் கத²ம். ராஜகத²ந்தி ராஜபடிஸம்யுத்த கத²ம். சோரகதா²தீ³ஸுபி ஏஸேவ நயோ.

512. ஸந்தம் பி⁴க்கு²ந்தி ஏத்த² யம் வத்தப்³ப³ம், தம் சாரித்தஸிக்கா²பதே³ வுத்தமேவ. ஸசே ஸம்ப³ஹுலா கேனசி கம்மேன கா³மம் பவிஸந்தி, ‘‘விகாலே கா³மப்பவேஸனம் ஆபுச்சா²மீ’’தி ஸப்³பே³ஹி அஞ்ஞமஞ்ஞம் ஆபுச்சி²தப்³ப³ம். தஸ்மிம் கா³மே தம் கம்மம் ந ஸம்பஜ்ஜதீதி அஞ்ஞம் கா³மம் க³ச்ச²ந்தி, கா³மஸதம்பி ஹோது, புன ஆபுச்ச²னகிச்சம் நத்தி². ஸசே பன உஸ்ஸாஹம் படிப்பஸ்ஸம்பே⁴த்வா விஹாரம் க³ச்ச²ந்தா அந்தரா அஞ்ஞம் கா³மம் பவிஸிதுகாமா ஹோந்தி, புன ஆபுச்சி²தப்³ப³மேவ.

குலக⁴ரே வா ஆஸனஸாலாய வா ப⁴த்தகிச்சம் கத்வா தேலபி⁴க்கா²ய வா ஸப்பிபி⁴க்கா²ய வா சரிதுகாமோ ஹோதி, ஸசே பஸ்ஸே பி⁴க்கு² அத்தி², ஆபுச்சி²த்வா க³ந்தப்³ப³ம். அஸந்தே நத்தீ²தி க³ந்தப்³ப³ம். வீதி²ம் ஓதரித்வா பி⁴க்கு²ம் பஸ்ஸதி, ஆபுச்ச²னகிச்சம் நத்தி², அனாபுச்சி²த்வாபி சரிதப்³ப³மேவ. கா³மமஜ்ஜே²ன மக்³கோ³ ஹோதி, தேன க³ச்ச²ந்தஸ்ஸ தேலாதி³பி⁴க்கா²ய சரிஸ்ஸாமீதி சித்தே உப்பன்னே ஸசே பஸ்ஸே பி⁴க்கு² அத்தி², ஆபுச்சி²த்வா சரிதப்³ப³ம். மக்³கா³ அனோக்கம்ம பி⁴க்கா²ய சரந்தஸ்ஸ பன ஆபுச்ச²னகிச்சம் நத்தி², அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³.

515. அந்தராராமந்திஆதீ³ஸு ந கேவலம் அனாபுச்சா² காயப³ந்த⁴னம் அப³ந்தி⁴த்வா ஸங்கா⁴டிம் அபாருபித்வா க³ச்ச²ந்தஸ்ஸபி அனாபத்தி. ஆபதா³ஸூதி ஸீஹோ வா ப்³யக்³கோ⁴ வா ஆக³ச்ச²தி, மேகோ⁴ வா உட்டே²தி, அஞ்ஞோ வா கோசி உபத்³த³வோ உப்பஜ்ஜதி, அனாபத்தி. ஏவரூபாஸு ஆபதா³ஸு ப³ஹிகா³மதோ அந்தோகா³மம் பவிஸிதும் வட்டதி. ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

விகாலகா³மப்பவிஸனஸிக்கா²பத³ம் ததியம்.

4. ஸூசிக⁴ரஸிக்கா²பத³வண்ணனா

517-20. சதுத்தே² – பே⁴த³னமேவ பே⁴த³னகம்; தம் அஸ்ஸ அத்தீ²தி பே⁴த³னகமேவ. அரணிகேதி அரணித⁴னுகே. விதே⁴தி வேத⁴கே. ஸேஸமேத்த² உத்தானமேவ. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஸூசிக⁴ரஸிக்கா²பத³ம் சதுத்த²ம்.

5. மஞ்சஸிக்கா²பத³வண்ணனா

522. பஞ்சமே – சே²த³னகம் வுத்தனயமேவ.

525. சி²ந்தி³த்வா பரிபு⁴ஞ்ஜதீதி ஏத்த² ஸசே ந சி²ந்தி³துகாமோ ஹோதி, பூ⁴மியம் நிக²ணித்வா பமாணம் உபரி த³ஸ்ஸேதி, உத்தானம் வா கத்வா பரிபு⁴ஞ்ஜதி, உக்கி²பித்வா வா துலாஸங்கா⁴டே ட²பேத்வா அட்டம் கத்வா பரிபு⁴ஞ்ஜதி, ஸப்³ப³ம் வட்டதி. ஸேஸமேத்த² உத்தானமேவ. ச²ஸமுட்டா²னம்.

மஞ்சஸிக்கா²பத³ம் பஞ்சமம்.

6. தூலோனத்³த⁴ஸிக்கா²பத³வண்ணனா

526. ச²ட்டே² – தூலம் ஓனத்³த⁴மேத்தா²தி தூலோனத்³த⁴ம்; தூலம் பக்கி²பித்வா உபரி சிமிலிகாய ஓனத்³த⁴ந்தி வுத்தம் ஹோதி. ஸேஸமேத்த² உத்தானமேவ. ச²ஸமுட்டா²னம்.

தூலோனத்³த⁴ஸிக்கா²பத³ம் ச²ட்ட²ம்.

7. நிஸீத³னஸிக்கா²பத³வண்ணனா

531-4. ஸத்தமே – நிஸீத³னம் அனுஞ்ஞாதம் ஹோதீதி கத்த² அனுஞ்ஞாதம்? சீவரக்க²ந்த⁴கே பணீதபோ⁴ஜனவத்து²ஸ்மிம். வுத்தஞ்ஹி தத்த² – ‘‘அனுஜானாமி, பி⁴க்க²வே, காயகு³த்தியா சீவரகு³த்தியா ஸேனாஸனகு³த்தியா நிஸீத³ன’’ந்தி (மஹாவ. 353). ஸேய்யதா²பி புராணாஸிகோட்டோ²தி யதா² நாம புராணசம்மகாரோதி அத்தோ². யதா² ஹி சம்மகாரோ சம்மம் வித்த²தம் கரிஸ்ஸாமீதி இதோ சிதோ ச ஸமஞ்ச²தி, கட்³ட⁴தி; ஏவம் ஸோபி தம் நிஸீத³னம். தேன தம் ப⁴க³வா ஏவமாஹ – ‘‘நிஸீத³னம் நாம ஸத³ஸம் வுச்சதீ’’தி ஸந்த²தஸதி³ஸம் ஸந்த²ரித்வா ஏகஸ்மிம் அந்தே ஸுக³தவித³த்தி²யா வித³த்தி²மத்தே பதே³ஸே த்³வீஸு டா²னேஸு பா²லேத்வா திஸ்ஸோ த³ஸா கரியந்தி, தாஹி த³ஸாஹி ஸத³ஸம் நாம வுச்சதி. ஸேஸமேத்த² உத்தானமேவ. ச²ஸமுட்டா²னம்.

நிஸீத³னஸிக்கா²பத³ம் ஸத்தமம்.

8. கண்டு³படிச்சா²தி³ஸிக்கா²பத³வண்ணனா

537. அட்ட²மே – கண்டு³படிச்சா²தி³ அனுஞ்ஞாதா ஹோதீதி கத்த² அனுஞ்ஞாதா? சீவரக்க²ந்த⁴கே பே³லட்ட²ஸீஸவத்து²ஸ்மிம். வுத்தஞ்ஹி தத்த² – ‘‘அனுஜானாமி, பி⁴க்க²வே, யஸ்ஸ கண்டு³ வா பிளகா வா அஸ்ஸாவோ வா து²ல்லகச்சு² வா ஆபா³தோ⁴ தஸ்ஸ கண்டு³படிச்சா²தி³’’ந்தி (மஹாவ. 354).

539. யஸ்ஸ அதோ⁴னாபி⁴ உப்³ப⁴ஜாணுமண்ட³லந்தி யஸ்ஸ பி⁴க்கு²னோ நாபி⁴யா ஹேட்டா² ஜாணுமண்ட³லானம் உபரி. கண்டூ³தி கச்சு². பிளகாதி லோஹிததுண்டி³கா ஸுகு²மபிளகா. அஸ்ஸாவோதி அரிஸப⁴க³ந்த³ரமது⁴மேஹாதீ³னம் வஸேன அஸுசிபக்³க⁴ரணகம். து²ல்லகச்சு² வா ஆபா³தோ⁴தி மஹாபிளகாபா³தோ⁴ வுச்சதி. ஸேஸமேத்த² உத்தானமேவ. ச²ஸமுட்டா²னம்.

கண்டு³படிச்சா²தி³ஸிக்கா²பத³ம் அட்ட²மம்.

9. வஸ்ஸிகஸாடிகஸிக்கா²பத³வண்ணனா

542. நவமே – வஸ்ஸிகஸாடிகா அனுஞ்ஞாதா ஹோதீதி கத்த² அனுஞ்ஞாதா? சீவரக்க²ந்த⁴கே விஸாகா²வத்து²ஸ்மிம். வுத்தஞ்ஹி தத்த² – ‘‘அனுஜானாமி, பி⁴க்க²வே, வஸ்ஸிகஸாடிக’’ந்தி (மஹாவ. 352). ஸேஸமேத்த² உத்தானமேவ. ச²ஸமுட்டா²னம்.

வஸ்ஸிகஸாடிகஸிக்கா²பத³ம் நவமம்.

10. நந்த³த்தே²ரஸிக்கா²பத³வண்ணனா

547. த³ஸமே – சதுரங்கு³லோமகோதி சதூஹி அங்கு³லேஹி ஊனகப்பமாணோ. ஸேஸம் உத்தானமேவ. ச²ஸமுட்டா²னம்.

நந்த³த்தே²ரஸிக்கா²பத³ம் த³ஸமம்.

ஸமத்தோ வண்ணனாக்கமேன ரதனவக்³கோ³ நவமோ.

உத்³தி³ட்டா² கோ²திஆதி³ வுத்தனயமேவாதி.

ஸமந்தபாஸாதி³காய வினயஸம்வண்ணனாய

கு²த்³த³கவண்ணனா ஸமத்தா.

பாசித்தியகண்ட³ம் நிட்டி²தம்.