7. மஹானாமஸிக்கா²பத³வண்ணனா

303. ஸத்தமஸிக்கா²பதே³ – மஹானாமோ நாம ப⁴க³வதோ சூளபிதுபுத்தோ மாஸமத்தேன மஹல்லகதரோ த்³வீஸு ப²லேஸு பதிட்டி²தோ அரியஸாவகோ. பே⁴ஸஜ்ஜம் உஸ்ஸன்னம் ஹோதீதி வஜதோ ஆஹரித்வா ட²பிதஸப்பி ப³ஹு ஹோதி.

306. ஸாதி³தப்³பா³தி தஸ்மிம் ஸமயே ரோகோ³ நத்தீ²தி ந படிக்கி²பிதப்³பா³; ரோகே³ ஸதி விஞ்ஞாபேஸ்ஸாமீதி அதி⁴வாஸேதப்³பா³. ஏத்தகேஹி பே⁴ஸஜ்ஜேஹி பவாரேமீதி நாமவஸேன ஸப்பிதேலாதீ³ஸு த்³வீஹி தீஹி வா பரிமாணவஸேன பத்தே²ன நாளியா ஆள்ஹகேனாதி வா.அஞ்ஞம் பே⁴ஸஜ்ஜம் விஞ்ஞாபேதீதி ஸப்பினா பவாரிதோ தேலம் விஞ்ஞாபேதி, ஆள்ஹகேன பவாரிதோ தோ³ணம். ந பே⁴ஸஜ்ஜேன கரணீயேனாதி மிஸ்ஸகப⁴த்தேனபி சே யாபேதும் ஸக்கோதி, ந பே⁴ஸஜ்ஜகரணீயம் நாம ஹோதி.

310. பவாரிதானந்தி யே அத்தனோ புக்³க³லிகாய பவாரணாய பவாரிதா; தேஸம் பவாரிதானுரூபேன விஞ்ஞத்தியா அனாபத்தி. ஸங்க⁴வஸேன பவாரிதேஸு பன பமாணம் ஸல்லக்கே²தப்³ப³மேவாதி. ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

மஹானாமஸிக்கா²பத³ம் ஸத்தமம்.