1. முஸாவாத³வக்³கோ³

1. முஸாவாத³ஸிக்கா²பத³வண்ணனா

யேஸம் நவஹி வக்³கே³ஹி, ஸங்க³ஹோ ஸுப்பதிட்டி²தோ;

கு²த்³த³கானம் அயம் தா³னி, தேஸம் ப⁴வதி வண்ணனா.

1. தத்த² முஸாவாத³வக்³க³ஸ்ஸ தாவ பட²மஸிக்கா²பதே³ ஹத்த²கோதி தஸ்ஸ தே²ரஸ்ஸ நாமம். ஸக்யானம் புத்தோதி ஸக்யபுத்தோ. பு³த்³த⁴காலே கிர ஸக்யகுலதோ அஸீதி புரிஸஸஹஸ்ஸானி பப்³ப³ஜிம்ஸு, தேஸம் ஸோ அஞ்ஞதரோதி. வாத³க்கி²த்தோதி ‘‘வாத³ம் கரிஸ்ஸாமீ’’தி ஏவம் பரிவிதக்கிதேன வாதே³ன பரவாதி³ஸந்திகம் கி²த்தோ பக்கி²த்தோ பஹிதோ பேஸிதோதி அத்தோ². வாத³ம்ஹி வா ஸகேன சித்தேன கி²த்தோ. யத்ர யத்ர வாதோ³ தத்ர தத்ரேவ ஸந்தி³ஸ்ஸதீதிபி வாத³க்கி²த்தோ. அவஜானித்வா அவஜானாதீதி அத்தனோ வாதே³ கஞ்சி தோ³ஸம் ஸல்லக்கே²ந்தோ ‘‘நாயம் மம வாதோ³’’தி அவஜானித்வா புன கதே²ந்தோ கதே²ந்தோ நித்³தோ³ஸதம் ஸல்லக்கே²த்வா ‘‘மமேவ அயம் வாதோ³’’தி படிஜானாதி. படிஜானித்வா அவஜானாதீதி கிஸ்மிஞ்சிதே³வ வசனே ஆனிஸம்ஸம் ஸல்லக்கே²ந்தோ ‘‘அயம் மம வாதோ³’’தி படிஜானித்வா புன கதே²ந்தோ கதே²ந்தோ தத்த² தோ³ஸம் ஸல்லக்கே²த்வா ‘‘நாயம் மம வாதோ³’’தி அவஜானாதி. அஞ்ஞேனஞ்ஞம் படிசரதீதி அஞ்ஞேன காரணேன அஞ்ஞம் காரணம் படிசரதி படிச்சா²தே³தி அஜ்ஜோ²த்த²ரதி, ‘‘ரூபம் அனிச்சம் ஜானிதப்³ப³தோ’’தி வத்வா புன ‘‘ஜாதித⁴ம்மதோ’’திஆதீ³னி வத³தி. குருந்தி³யம் பன ‘‘ஏதஸ்ஸ படிச்சா²த³னஹேதும் அஞ்ஞம் ப³ஹும் கதே²தீ’’தி வுத்தம். தத்ராயம் அதி⁴ப்பாயோ – யம் தம் படிஜானனஞ்ச அவஜானனஞ்ச, தஸ்ஸ படிச்சா²த³னத்த²ம் ‘‘கோ ஆஹ, கிம் ஆஹ, கிஸ்மிம் ஆஹா’’தி ஏவமாதி³ ப³ஹும் பா⁴ஸதீதி. புன மஹாஅட்ட²கதா²யம் ‘‘அவஜானித்வா படிஜானந்தோ படிஜானித்வா அவஜானந்தோ ஏவ ச அஞ்ஞேனஞ்ஞம் படிசரதீ’’தி வுத்தம். ஸம்பஜானமுஸா பா⁴ஸதீதி ஜானந்தோ முஸா பா⁴ஸதி. ஸங்கேதம் கத்வா விஸம்வாதே³தீதி புரேப⁴த்தாதீ³ஸு ‘‘அஸுகஸ்மிம் நாம காலே அஸுகஸ்மிம் நாம பதே³ஸே வாதோ³ ஹோதூ’’தி ஸங்கேதம் கத்வா ஸங்கேததோ புரே வா பச்சா² வா க³ந்த்வா ‘‘பஸ்ஸத² போ⁴, தித்தி²யா ந ஆக³தா பராஜிதா’’தி பக்கமதி.

2. ஸம்பஜானமுஸாவாதே³தி ஜானித்வா ஜானந்தஸ்ஸ ச முஸா ப⁴ணனே.

3. விஸம்வாத³னபுரேக்கா²ரஸ்ஸாதி விஸம்வாத³னசித்தம் புரதோ கத்வா வத³ந்தஸ்ஸ. வாசாதி மிச்சா²வாசாபரியாபன்னவசனஸமுட்டா²பிகா சேதனா. கி³ராதி தாய சேதனாய ஸமுட்டா²பிதஸத்³த³ம் த³ஸ்ஸேதி. ப்³யப்பதோ²தி வசனபதோ²; வாசாயேவ ஹி அஞ்ஞேஸம்பி தி³ட்டா²னுக³திமாபஜ்ஜந்தானம் பத²பூ⁴ததோ ப்³யப்பதோ²தி வுச்சதி. வசீபே⁴தோ³தி வசீஸஞ்ஞிதாய வாசாய பே⁴தோ³; பபே⁴த³க³தா வாசா ஏவ ஏவம் வுச்சதி. வாசஸிகா விஞ்ஞத்தீதி வசீவிஞ்ஞத்தி. ஏவம் பட²மபதே³ன ஸுத்³த⁴சேதனா, மஜ்ஜே² தீஹி தம்ஸமுட்டா²பிதஸத்³த³ஸஹிதா சேதனா, அந்தே ஏகேன விஞ்ஞத்திஸஹிதா சேதனா ‘‘கதி²தா’’தி வேதி³தப்³பா³. அனரியவோஹாராதி அனரியானம் பா³லபுது²ஜ்ஜனானம் வோஹாரா.

ஏவம் ஸம்பஜானமுஸாவாத³ம் த³ஸ்ஸேத்வா இதா³னி அந்தே வுத்தானம் ஸம்பஜானமுஸாவாத³ஸங்கா²தானம் அனரியவோஹாரானம் லக்க²ணம் த³ஸ்ஸேந்தோ ‘‘அதி³ட்ட²ம் தி³ட்ட²ம் மே’’திஆதி³மாஹ. தத்த² அதி³ட்ட²ம் தி³ட்ட²ம் மேதி ஏவம் வத³தோ வசனம் தம்ஸமுட்டா²பிகா வா சேதனா ஏகோ அனரியவோஹாரோதி இமினா நயேன அத்தோ² வேதி³தப்³போ³. அபிசேத்த² சக்கு²வஸேன அக்³க³ஹிதாரம்மணம் அதி³ட்ட²ம், ஸோதவஸேன அக்³க³ஹிதம் அஸுதம், கா⁴னாதி³வஸேன முனித்வா தீஹி இந்த்³ரியேஹி ஏகாப³த்³த⁴ம் விய கத்வா பத்வா அக்³க³ஹிதம் அமுதம், அஞ்ஞத்ர பஞ்சஹி இந்த்³ரியேஹி ஸுத்³தே⁴ன விஞ்ஞாணேனேவ அக்³க³ஹிதம் அவிஞ்ஞாதந்தி வேதி³தப்³ப³ம். பாளியம் பன ‘‘அதி³ட்ட²ம் நாம ந சக்கு²னா தி³ட்ட²’’ந்தி ஏவம் ஓளாரிகேனேவ நயேன தே³ஸனா கதாதி. தி³ட்டா²தீ³ஸு ச அத்தனாபி பரேனபி தி³ட்ட²ம் தி³ட்ட²மேவ. ஏவம் ஸுதமுதவிஞ்ஞாதானீதி அயமேகோ பரியாயோ. அபரோ நயோ யம் அத்தனா தி³ட்ட²ம் தி³ட்ட²மேவ தம். ஏஸ நயோ ஸுதாதீ³ஸு. யம் பன பரேன தி³ட்ட²ம், தம் அத்தனா ஸுதட்டா²னே திட்ட²தி. ஏவம் முதாதீ³னிபி.

4. இதா³னி தேஸம் அனரியவோஹாரானம் வஸேன ஆபத்திம் ஆரோபேத்வா த³ஸ்ஸேந்தோ ‘‘தீஹாகாரேஹீ’’திஆதி³மாஹ. தஸ்ஸத்தோ² ‘‘தீஹி ஆகாரேஹி பட²மம் ஜா²னம் ஸமாபஜ்ஜிந்தி ஸம்பஜானமுஸா ப⁴ணந்தஸ்ஸ ஆபத்தி பாராஜிகஸ்ஸா’’தி ஏவமாதி³சதுத்த²பாராஜிகபாளிவண்ணனாயம் வுத்தனயேனேவ வேதி³தப்³போ³. கேவலஞ்ஹி தத்த² ‘‘பட²மம் ஜா²னம் ஸமாபஜ்ஜி’’ந்தி இத⁴ ‘‘அதி³ட்ட²ம் தி³ட்ட²ம் மே’’தி, தத்த² ச ‘‘ஆபத்தி பாராஜிகஸ்ஸா’’தி ‘‘இத⁴ ஆபத்தி பாசித்தியஸ்ஸா’’தி ஏவம் வத்து²மத்தே ஆபத்திமத்தே ச விஸேஸோ, ஸேஸம் ஏகலக்க²ணமேவாதி.

9. தீஹாகாரேஹி தி³ட்டே² வேமதிகோதிஆதீ³னம்பி அத்தோ² ‘‘தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ தி³ட்டே² வேமதிகோ’’தி ஏவமாதி³து³ட்ட²தோ³ஸபாளிவண்ணனாயம் வுத்தனயேனேவ வேதி³தப்³போ³. பாளிமத்தமேவ ஹி ஏத்த² விஸேஸோ, அத்தே² பன ஸதே²ரவாதே³ கிஞ்சி நானாகரணம் நத்தி².

11. ஸஹஸா ப⁴ணதீதி அவீமம்ஸித்வா அனுபதா⁴ரேத்வா வா வேகே³ன தி³ட்ட²ம்பி ‘‘அதி³ட்ட²ம் மே’’தி ப⁴ணதி. அஞ்ஞம் ப⁴ணிஸ்ஸாமீதி அஞ்ஞம் ப⁴ணதீதி மந்த³த்தா ஜளத்தா பக்க²லந்தோ ‘‘சீவர’’ந்தி வத்தப்³பே³ ‘‘சீர’’ந்தி ஆதி³ம் ப⁴ணதி. யோ பன ஸாமணேரேன ‘‘அபி ப⁴ந்தே மய்ஹம் உபஜ்ஜா²யம் பஸ்ஸித்தா²’’தி வுத்தோ கேளிம் குருமானோ ‘‘தவ உபஜ்ஜா²யோ தா³ருஸகடம் யோஜேத்வா க³தோ ப⁴விஸ்ஸதீ’’தி வா ஸிங்கா³லஸத்³த³ம் ஸுத்வா ‘‘கஸ்ஸாயம் ப⁴ந்தே ஸத்³தோ³’’தி வுத்தோ ‘‘மாதுயா தே யானேன க³ச்ச²ந்தியா கத்³த³மே லக்³க³சக்கம் உத்³த⁴ரந்தானம் அயம் ஸத்³தோ³’’தி வா ஏவம் நேவ த³வா ந ரவா அஞ்ஞம் ப⁴ணதி, ஸோ ஆபத்திம் ஆபஜ்ஜதியேவ. அஞ்ஞா பூரணகதா² நாம ஹோதி, ஏகோ கா³மே தோ²கம் தேலம் லபி⁴த்வா விஹாரம் ஆக³தோ ஸாமணேரம் ப⁴ணதி – ‘‘த்வம் அஜ்ஜ குஹிம் க³தோ, கா³மோ ஏகதேலோ அஹோஸீ’’தி வா பச்சி²காய ட²பிதம் பூவக²ண்ட³ம் லபி⁴த்வா ‘‘அஜ்ஜ கா³மே பச்சி²காஹி பூவே சாரேஸு’’ந்தி வா, அயம் முஸாவாதோ³வ ஹோதி. ஸேஸம் உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

முஸாவாத³ஸிக்கா²பத³ம் பட²மம்.

2. ஓமஸவாத³ஸிக்கா²பத³வண்ணனா

12. து³தியஸிக்கா²பதே³ ஓமஸந்தீதி ஓவிஜ்ஜ²ந்தி. கு²ம்ஸேந்தீதி அக்கோஸந்தி. வம்பே⁴ந்தீதி பத⁴ம்ஸேந்தி.

13. பூ⁴தபுப்³ப³ந்தி இத³ம் வத்து²ம் ப⁴க³வா ஓமஸவாத³க³ரஹணத்த²ம் ஆஹரி. நந்தி³விஸாலோ நாமாதி நந்தீ³தி தஸ்ஸ ப³லீப³த்³த³ஸ்ஸ நாமம், விஸாணானி பனஸ்ஸ விஸாலானி, தஸ்மா ‘‘நந்தி³விஸாலோ’’தி வுச்சதி. போ³தி⁴ஸத்தோ தேன ஸமயேன நந்தி³விஸாலோ நாம ஹோதி. ப்³ராஹ்மணோ தம் யாகு³ப⁴த்தாதீ³ஹி அதிவிய போஸேஸி. அத² ஸோ ப்³ராஹ்மணம் அனுகம்பமானோ ‘‘க³ச்ச² த்வ’’ந்திஆதி³மாஹ. தத்தே²வ அட்டா²ஸீதி அஹேதுகபடிஸந்தி⁴காலேபி பரகு²ம்ஸனம் அமனாபதோயேவ பச்சேஸி, தஸ்மா ப்³ராஹ்மணஸ்ஸ தோ³ஸம் த³ஸ்ஸேதுகாமோ அட்டா²ஸி. ஸகடஸதம் அதிப³த்³த⁴ம் பவட்டேஸீதி படிபாடியா ட²பேத்வா ஹேட்டா²ருக்கே² த³த்வா ஏகாப³த்³த⁴ம் கத்வா முக்³க³மாஸவாலுகாதீ³ஹி புண்ணம் ஸகடஸதம் பவட்டேந்தோ, கிஞ்சாபி புப்³பே³ பதிட்டி²தாரப்பதே³ஸம் புன அரே பத்தே பவட்டிதம் ஹோதி, போ³தி⁴ஸத்தோ பன புரிமஸகடேன பதிட்டி²தட்டா²னே பச்சி²மஸகடம் பதிட்டா²பேதும் ஸகடஸதப்பமாணம் பதே³ஸம் பவட்டேஸி. போ³தி⁴ஸத்தானஞ்ஹி ஸிதி²லகரணம் நாம நத்தி². தேன சத்தமனோ அஹூதி தேன ப்³ராஹ்மணஸ்ஸ த⁴னலாபே⁴ன அத்தனோ கம்மேன ச ஸோ நந்தி³விஸாலோ அத்தமனோ அஹோஸி.

15. அக்கோஸேனபீதி ஏத்த² பன யஸ்மா பரதோ ‘‘த்³வே அக்கோஸா – ஹீனோ ச அக்கோஸோ உக்கட்டோ² ச அக்கோஸோ’’தி விப⁴ஜிதுகாமோ, தஸ்மா யதா² புப்³பே³ ‘‘ஹீனேனபி அக்கோஸேன கு²ம்ஸேந்தீ’’தி வுத்தம்; ஏவம் அவத்வா ‘‘அக்கோஸேன’’ இச்சேவமாஹ. வேனஜாதீதி தச்ச²கஜாதி; வேணுகாரஜாதீதிபி வத³ந்தி. நேஸாத³ஜாதீதி மிக³லுத்³த³காதி³ஜாதி.

ரத²காரஜாதீதி சம்மகாரஜாதி. புக்குஸஜாதீதி புப்ப²ச²ட்³ட³கஜாதி. அவகண்ணகாதி³ தா³ஸானம் நாமம் ஹோதி; தஸ்மா ஹீனம். ஓஞ்ஞாதந்தி அவஞ்ஞாதம்; ‘‘உஞ்ஞாத’’ந்திபி பட²ந்தி. அவஞ்ஞாதந்தி வம்பே⁴த்வா ஞாதம். ஹீளிதந்தி ஜிகு³ச்சி²தம். பரிபூ⁴தந்தி கிமேதேனாதிதி பரிப⁴வகதம். அசித்தீகதந்தி ந க³ருகதம்.

கோட்ட²ககம்மந்தி தச்ச²ககம்மம். முத்³தா³தி ஹத்த²முத்³தா³க³ணனா. க³ணனாதி அச்சி²த்³த³காதி³அவஸேஸக³ணனா. லேகா²தி அக்க²ரலேகா². மது⁴மேஹாபா³தோ⁴ வேத³னாய அபா⁴வதோ ‘‘உக்கட்டோ²’’தி வுத்தோ. பாடிகங்கா²தி இச்சி²தப்³பா³. யகாரேன வா ப⁴காரேன வாதி யகாரப⁴காரே யோஜேத்வா யோ அக்கோஸோ. காடகோடசிகாய வாதி ‘‘காட’’ந்தி புரிஸனிமித்தம், ‘‘கோடசிகா’’தி இத்தி²னிமித்தம்; ஏதேஹி வா யோ அக்கோஸோ, ஏஸோ ஹீனோ நாம அக்கோஸோதி.

16. இதா³னி தேஸம் ஜாதிஆதீ³னம் பபே⁴த³வஸேன ஆபத்திம் ஆரோபேத்வா த³ஸ்ஸேந்தோ ‘‘உபஸம்பன்னோ உபஸம்பன்ன’’ந்திஆதி³மாஹ. தத்த² கு²ம்ஸேதுகாமோ வம்பே⁴துகாமோ மங்குகத்துகாமோதி அக்கோஸிதுகாமோ பத⁴ம்ஸிதுகாமோ க³ரஹிதுகாமோ நித்தேஜம் கத்துகாமோதி அத்தோ². ஹீனேன ஹீனந்தி ஹீனேன ஜாதிவசனேன ஹீனஜாதிகம். ஏதேன உபாயேன ஸப்³ப³பதே³ஸு அத்தோ² வேதி³தப்³போ³.

ஏத்த² ச ஹீனேன ஹீனம் வத³ந்தோ கிஞ்சாபி ஸச்சம் வத³தி, ஓமஸிதுகாமதாய பனஸ்ஸ வாசாய வாசாய பாசித்தியம். உக்கட்டே²ன ஹீனம் வத³ந்தோ ச கிஞ்சாபி அலிகம் ப⁴ணதி, ஓமஸிதுகாமதாய பன இமினாவ ஸிக்கா²பதே³ன பாசித்தியம் ஆபஜ்ஜதி, ந புரிமேன. யோபி ‘‘அதிசண்டா³லோஸி, அதிப்³ராஹ்மணோஸி, து³ட்ட²சண்டா³லோஸி, து³ட்ட²ப்³ராஹ்மணோஸீ’’திஆதீ³னி வத³தி, ஸோபி ஆபத்தியா காரேதப்³போ³.

26. ஸந்தி இதே⁴கச்சேதி வாரே பன பரிஹரித்வா வுத்தபா⁴வேன து³க்கடம். ஏஸேவ நயோ யே நூன…பே… ந மயந்தி வாரேஸுபி. அனுபஸம்பன்னே பன சதூஸுபி வாரேஸு து³க்கடமேவ. சோரோஸி க³ண்டி²பே⁴த³கோஸீதிஆதி³வசனேஹி பன உபஸம்பன்னேபி அனுபம்பன்னேபி ஸப்³ப³வாரேஸு து³க்கடமேவ. த³வகம்யதாய பன உபஸம்பன்னேபி அனுபஸம்பன்னேபி ஸப்³ப³வாரேஸு து³ப்³பா⁴ஸிதம். த³வகம்யதா நாம கேளிஹஸாதி⁴ப்பாயதா. இமஸ்மிஞ்ச ஸிக்கா²பதே³ ட²பேத்வா பி⁴க்கு²ம் பி⁴க்கு²னீஆத³யோ ஸப்³ப³ஸத்தா அனுபஸம்பன்னட்டா²னே டி²தாதி வேதி³தப்³பா³.

35. அத்த²புரேக்கா²ரஸ்ஸாதிஆதீ³ஸு பாளியா அத்த²ம் வண்ணயந்தோ அத்த²புரேக்கா²ரோ; பாளிம் வாசேந்தோ த⁴ம்மபுரேக்கா²ரோ; அனுஸிட்டி²யம் ட²த்வா ‘‘இதா³னிபி சண்டா³லோஸி, பாபம் மா அகாஸி, மா தமோ தமபராயணோ அஹோஸீ’’திஆதி³னா நயேன கதே²ந்தோ அனுஸாஸனீபுரேக்கா²ரோ நாமாதி வேதி³தப்³போ³. ஸேஸம் உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி. கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி. து³ப்³பா⁴ஸிதாபத்தி பனேத்த² வாசாசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், அகுஸலசித்தம், த்³விவேத³னம் ஸுகா² ச மஜ்ஜ²த்தா சாதி.

ஓமஸவாத³ஸிக்கா²பத³ம் து³தியம்.

3. பேஸுஞ்ஞஸிக்கா²பத³வண்ணனா

36. ததியஸிக்கா²பதே³ – ப⁴ண்ட³னஜாதானந்தி ஸஞ்ஜாதப⁴ண்ட³னானம். ப⁴ண்ட³னந்தி கலஹஸ்ஸ புப்³ப³பா⁴கோ³, ‘‘இமினா ச இமினா ச இத³ம் கதம்; ஏவம் வுத்தே ஏவம் வக்கா²மா’’திஆதி³கம் ஸகஸகபக்கே² ஸம்மந்தனம். கலஹோதி ஆபத்திகா³மிகோ காயவாசாவீதிக்கமோ. விவாதோ³தி விக்³கா³ஹிககதா². தம் விவாத³ம் ஆபன்னானம் விவாதா³பன்னானம். பேஸுஞ்ஞந்தி பிஸுணவாசம், பியபா⁴வஸ்ஸ ஸுஞ்ஞகரணவாசந்தி வுத்தம் ஹோதி.

37. பி⁴க்கு²பேஸுஞ்ஞேதி பி⁴க்கூ²னம் பேஸுஞ்ஞே; பி⁴க்கு²தோ ஸுத்வா பி⁴க்கு²னா பி⁴க்கு²ஸ்ஸ உபஸம்ஹடபேஸுஞ்ஞேதி அத்தோ².

38. த்³வீஹாகாரேஹீதி த்³வீஹி காரணேஹி. பியகம்யஸ்ஸ வாதி ‘‘ஏவம் அஹம் ஏதஸ்ஸ பியோ ப⁴விஸ்ஸாமீ’’தி அத்தனோ பியபா⁴வம் பத்த²யமானஸ்ஸ வா. பே⁴தா³தி⁴ப்பாயஸ்ஸ வாதி ‘‘ஏவமயம் ஏதேன ஸத்³தி⁴ம் பி⁴ஜ்ஜிஸ்ஸதீ’’தி பரஸ்ஸ பரேன பே⁴த³ம் இச்ச²ந்தஸ்ஸ வா. ஜாதிதோபீதிஆதி³ ஸப்³ப³ம் புரிமஸிக்கா²பதே³ வுத்தனயமேவ. இதா⁴பி பி⁴க்கு²னிம் ஆதி³ம் கத்வா ஸப்³பே³ அனுபஸம்பன்னா நாம.

ந பியகம்யஸ்ஸ ந பே⁴தா³தி⁴ப்பாயஸ்ஸாதி ஏகம் அக்கோஸந்தம் ஏகஞ்ச க²மந்தம் தி³ஸ்வா ‘‘அஹோ நில்லஜ்ஜோ, ஈதி³ஸம்பி நாம ப⁴வந்தம் புன வத்தப்³ப³ம் மஞ்ஞிஸ்ஸதீ’’தி ஏவம் கேவலம் பாபக³ரஹிதாய ப⁴ணந்தஸ்ஸ அனாபத்தி. ஸேஸம் உத்தானத்த²மேவ. திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

பேஸுஞ்ஞஸிக்கா²பத³ம் ததியம்.

4. பத³ஸோத⁴ம்மஸிக்கா²பத³வண்ணனா

44. சதுத்த²ஸிக்கா²பதே³ – அப்பதிஸ்ஸாதி அப்பதிஸ்ஸவா. உபாஸகாதி வுத்தே வசனம்பி ந ஸோதுகாமா; அனாத³ராதி அத்தோ². அப்பதிஸ்ஸயா வா அனீசவுத்தினோதி அத்தோ². அஸபா⁴க³வுத்திகாதி விஸபா⁴க³ஜீவிகா, யதா² பி⁴க்கூ²ஸு வத்திதப்³ப³ம்; ஏவம் அப்பவத்தவுத்தினோதி அத்தோ².

45. பத³ஸோ த⁴ம்மம் வாசேய்யாதி ஏகதோ பத³ம் பத³ம் த⁴ம்மம் வாசேய்ய; கோட்டா²ஸம் கோட்டா²ஸம் வாசேய்யாதி அத்தோ². யஸ்மா பன தம் கோட்டா²ஸனாமகம் பத³ம் சதுப்³பி³த⁴ம் ஹோதி, தஸ்மா தம் த³ஸ்ஸேதும் ‘‘பத³ம் அனுபத³ம் அன்வக்க²ரம் அனுப்³யஞ்ஜன’’ந்தி பத³பா⁴ஜனம் வுத்தம். தத்த² பத³ந்தி ஏகோ கா³தா²பாதோ³ அதி⁴ப்பேதோ. அனுபத³ந்தி து³தியபாதோ³. அன்வக்க²ரந்தி ஏகேகமக்க²ரம். அனுப்³யஞ்ஜனந்தி புரிமப்³யஞ்ஜனேன ஸதி³ஸம் பச்சா²ப்³யஞ்ஜனம். யம் கிஞ்சி வா ஏகமக்க²ரம் அன்வக்க²ரம், அக்க²ரஸமூஹோ அனுப்³யஞ்ஜனம், அக்க²ரானுப்³யஞ்ஜனஸமூஹோ பத³ம். பட²மபத³ம் பத³மேவ, து³தியம் அனுபத³ந்தி ஏவமேத்த² நானாகரணம் வேதி³தப்³ப³ம்.

இதா³னி பத³ம் நாம ஏகதோ பட்ட²பேத்வா ஏகதோ ஓஸாபேந்தீதி கா³தா²ப³ந்த⁴ம் த⁴ம்மம் வாசேந்தோ ‘‘மனோபுப்³ப³ங்க³மா த⁴ம்மா’’தி ஏகமேகம் பத³ம் ஸாமணேரேன ஸத்³தி⁴ம் ஏகதோ ஆரபி⁴த்வா ஏகதோயேவ நிட்டா²பேதி. ஏவம் வாசேந்தஸ்ஸ பத³க³ணனாய பாசித்தியா வேதி³தப்³பா³. அனுபத³ம் நாம பாடேக்கம் பட்ட²பேத்வா ஏகதோ ஓஸாபேந்தீதி தே²ரேன ‘‘மனோபுப்³ப³ங்க³மா த⁴ம்மா’’தி வுத்தே ஸாமணேரோ தம் பத³ம் அபாபுணித்வா ‘‘மனோஸேட்டா² மனோமயா’’தி து³தியபத³ம் ஏகதோ ப⁴ணதி, இமே பாடேக்கம் பட்ட²பேத்வா ஏகதோ ஓஸாபேந்தி நாம. ஏவம் வாசேந்தஸ்ஸாபி அனுபத³க³ணனாய பாசித்தியா. அன்வக்க²ரம் நாம ரூபம் அனிச்சந்தி வுச்சமானோ ‘‘ரூ’’தி ஓபாதேதீதி ‘‘ரூபம் அனிச்சந்தி ப⁴ண ஸாமணேரா’’தி வுச்சமானோ ரூகாரமத்தமேவ ஏகதோ வத்வா திட்ட²தி. ஏவம் வாசேந்தஸ்ஸாபி அன்வக்க²ரக³ணனாய பாசித்தியா. கா³தா²ப³ந்தே⁴பி ச ஏஸ நயோ லப்³ப⁴தியேவ. அனுப்³யஞ்ஜனம் நாம ரூபம் அனிச்சந்தி வுச்சமானோ வேத³னா அனிச்சாதி ஸத்³த³ம் நிச்சா²ரேதீதி ‘‘ரூபம், பி⁴க்க²வே, அனிச்சம், வேத³னா அனிச்சா’’தி இமம் ஸுத்தம் வாசயமானோ தே²ரேன ‘‘ரூபம் அனிச்ச’’ந்தி வுச்சமானோ ஸாமணேரோ ஸீக⁴பஞ்ஞதாய ‘‘வேத³னா அனிச்சா’’தி இமம் அனிச்சபத³ம் தே²ரஸ்ஸ ‘‘ரூபம் அனிச்ச’’ந்தி ஏதேன அனிச்சபதே³ன ஸத்³தி⁴ம் ஏகதோ ப⁴ணந்தோ வாசம் நிச்சா²ரேதி. ஏவம் வாசேந்தஸ்ஸாபி அனுப்³யஞ்ஜனக³ணனாய பாசித்தியா. அயம் பனேத்த² ஸங்கே²போ – இமேஸு பதா³தீ³ஸு யம் யம் ஏகதோ ப⁴ணதி தேன தேன ஆபத்திம் ஆபஜ்ஜதீதி.

பு³த்³த⁴பா⁴ஸிதோதி ஸகலம் வினயபிடகம் அபி⁴த⁴ம்மபிடகம் த⁴ம்மபத³ம் சரியாபிடகம் உதா³னம் இதிவுத்தகம் ஜாதகம் ஸுத்தனிபாதோ விமானவத்து² பேதவத்து² ப்³ரஹ்மஜாலாதீ³னி ச ஸுத்தானி. ஸாவகபா⁴ஸிதோதி சதுபரிஸபரியாபன்னேஹி ஸாவகேஹி பா⁴ஸிதோ அனங்க³ணஸம்மாதி³ட்டி²அனுமானஸுத்தசுளவேத³ல்லமஹாவேத³ல்லாதி³கோ. இஸிபா⁴ஸிதோதி பா³ஹிரபரிப்³பா³ஜகேஹி பா⁴ஸிதோ ஸகலோ பரிப்³பா³ஜகவக்³கோ³, பா³வரியஸ்ஸ அந்தேவாஸிகானம் ஸோளஸன்னம் ப்³ராஹ்மணானம் புச்சா²தி ஏவமாதி³. தே³வதாபா⁴ஸிதோதி தே³வதாஹி பா⁴ஸிதோ; ஸோ தே³வதாஸம்யுத்ததே³வபுத்தஸம்யுத்தமாரஸம்யுத்தப்³ரஹ்மஸம்யுத்தஸக்கஸம்யுத்தாதி³வஸேன வேதி³தப்³போ³.

அத்தூ²பஸஞ்ஹிதோதி அட்ட²கதா²னிஸ்ஸிதோ. த⁴ம்மூபஸஞ்ஹிதோதி பாளினிஸ்ஸிதோ; உப⁴யேனாபி விவட்டூபனிஸ்ஸிதமேவ வத³தி. கிஞ்சாபி விவட்டூபனிஸ்ஸிதம் வத³தி, திஸ்ஸோ ஸங்கீ³தியோ ஆருள்ஹத⁴ம்மம்யேவ பன பத³ஸோ வாசேந்தஸ்ஸ ஆபத்தி. விவட்டூபனிஸ்ஸிதேபி நானாபா⁴ஸாவஸேன கா³தா²ஸிலோகப³ந்தா⁴தீ³ஹி அபி⁴ஸங்க²தே அனாபத்தி. திஸ்ஸோ ஸங்கீ³தியோ அனாருள்ஹேபி குலும்ப³ஸுத்தம் ராஜோவாத³ஸுத்தம் திக்கி²ந்த்³ரியம் சதுபரிவட்டம் நந்தோ³பனந்த³ந்தி ஈதி³ஸே ஆபத்தியேவ. அபலாலத³மனம்பி வுத்தம், மஹாபச்சரியம்பன படிஸித்³த⁴ம். மேண்ட³கமிலிந்த³பஞ்ஹேஸு தே²ரஸ்ஸ ஸகபடிபா⁴னே அனாபத்தி, யம் ரஞ்ஞோ ஸஞ்ஞாபனத்த²ம் ஆஹரித்வா வுத்தம், தத்த² ஆபத்தி. வண்ணபிடகஅங்கு³லிமாலபிடகரட்ட²பாலக³அஜதஆளவகக³ஜ்ஜிதகு³ள்ஹமக்³க³கு³ள்ஹவேஸ்ஸந்தரகு³ள்ஹவினயவேத³ல்லபிடகானி பன அபு³த்³த⁴வசனானியேவாதி வுத்தம். ஸீலூபதே³ஸோ நாம த⁴ம்மஸேனாபதினா வுத்தோதி வத³ந்தி, தஸ்மிம் ஆபத்தியேவ. அஞ்ஞானிபி மக்³க³கதா²ஆரம்மணகதா²பு³த்³தி⁴கத³ண்ட³க ஞாணவத்து²அஸுப⁴கதா²தீ³னி அத்தி², தேஸு ஸத்ததிம்ஸ போ³தி⁴பக்கி²யத⁴ம்மா விப⁴த்தா, து⁴தங்க³பஞ்ஹே படிபதா³ விப⁴த்தா; தஸ்மா தேஸு ஆபத்தீதி வுத்தம். மஹாபச்சரியாதீ³ஸு பன ஸங்கீ³திம் அனாருள்ஹேஸு ராஜோவாத³திக்கி²ந்த்³ரியசதுபரிவட்டனந்தோ³பனந்த³குலும்ப³ஸுத்தேஸுயேவ ஆபத்தீதி வத்வா அவஸேஸேஸு யம் பு³த்³த⁴வசனதோ ஆஹரித்வா வுத்தம், ததே³வ ஆபத்திவத்து² ஹோதி, ந இதரந்தி அயமத்தோ² பரிக்³க³ஹிதோ.

48. ஏகதோ உத்³தி³ஸாபேந்தோதி அனுபஸம்பன்னேன ஸத்³தி⁴ம் ஏகதோ உத்³தே³ஸம் க³ண்ஹந்தோபி ஏகதோ வத³தி அனாபத்தீதி அத்தோ².

தத்ராயம் வினிச்ச²யோ – உபஸம்பன்னோ ச அனுபஸம்பன்னோ ச நிஸீதி³த்வா உத்³தி³ஸாபேந்தி. ஆசரியோ நிஸின்னானம் ப⁴ணாமீதி தேஹி ஸத்³தி⁴ம் ஏகதோ வத³தி, ஆசரியஸ்ஸ ஆபத்தி. அனுபஸம்பன்னேன ஸத்³தி⁴ம் க³ண்ஹந்தஸ்ஸ அனாபத்தி. த்³வேபி டி²தா க³ண்ஹந்தி, ஏஸேவ நயோ. த³ஹரபி⁴க்கு² நிஸின்னோ, ஸாமணேரோ டி²தோ, நிஸின்னஸ்ஸ ப⁴ணாமீதி ப⁴ணதோ அனாபத்தி. ஸசே த³ஹரோ திட்ட²தி, இதரோ நிஸீத³தி, டி²தஸ்ஸ ப⁴ணாமீதி ப⁴ணதோபி அனாபத்தி. ஸசே ப³ஹூனம் பி⁴க்கூ²னம் அந்தரே ஏகோ ஸாமணேரோ நிஸின்னோ ஹோதி, தஸ்மிம் நிஸின்னே பத³ஸோ த⁴ம்மம் வாசேந்தஸ்ஸ ஆசரியஸ்ஸ அசித்தகாபத்தி. ஸசே ஸாமணேரோ உபசாரம் முஞ்சித்வா டி²தோ வா நிஸின்னோ வா ஹோதி, யேஸம் வாசேதி, தேஸு அபரியாபன்னத்தா ஏகேன தி³ஸாபா⁴கே³ன பலாயனகக³ந்த²ம் நாம க³ண்ஹாதீதி ஸங்க்²யம் க³ச்ச²தி, தஸ்மா அனாபத்தி. ஏகதோ ஸஜ்ஜா²யம் கரோந்தோபி அனுபஸம்பன்னேன ஸத்³தி⁴ம் உபஸம்பன்னோ ஏகதோ ஸஜ்ஜா²யம் கரோந்தோ தேன ஸத்³தி⁴ம்யேவ ப⁴ணதி, அனாபத்தி. அனுபஸம்பன்னஸ்ஸ ஸந்திகே உத்³தே³ஸம் க³ண்ஹந்தஸ்ஸபி தேன ஸத்³தி⁴ம் ஏகதோ ப⁴ணந்தஸ்ஸ அனாபத்தி. அயம்பி ஹி ஏகதோ ஸஜ்ஜா²யம் கரோதிச்சேவ ஸங்க்²யம் க³ச்ச²தி.

யேபு⁴ய்யேன பகு³ணம் க³ந்த²ம் ப⁴ணந்தம் ஓபாதேதீதி ஸசே ஏககா³தா²ய ஏகோ பாதோ³ ந ஆக³ச்ச²தி, ஸேஸம் ஆக³ச்ச²தி, அயம் யேபு⁴ய்யேன பகு³ணக³ந்தோ² நாம. ஏதேன நயேன ஸுத்தேபி வேதி³தப்³போ³. தம் ஓபாதேந்தஸ்ஸ ஏவம் ப⁴ணாஹீதி ஏகதோபி ப⁴ணந்தஸ்ஸ அனாபத்தி. ஓஸாரேந்தம் ஓபாதேதீதி ஸுத்தம் உச்சாரேந்தம் பரிஸமஜ்ஜே² பரிஸங்கமானம் ஏவம் வதே³ஹீதி தேன ஸத்³தி⁴ம் ஏகதோபி வத³ந்தஸ்ஸ அனாபத்தி. யம் பன மஹாபச்சரியாதீ³ஸு ‘‘மயா ஸத்³தி⁴ம் மா வதா³’’தி வுத்தோ யதி³ வத³தி, ‘‘அனாபத்தீ’’தி வுத்தம், தம் மஹாஅட்ட²கதா²யம் நத்தி², நத்தி²பா⁴வோயேவ சஸ்ஸ யுத்தோ. கஸ்மா? கிரியஸமுட்டா²னத்தா. இதரதா² ஹி கிரியாகிரியம் ப⁴வேய்ய. ஸேஸம் உத்தானத்த²மேவ.

பத³ஸோத⁴ம்மஸமுட்டா²னம் – வாசதோ ச வாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம், திவேத³னந்தி.

பத³ஸோத⁴ம்மஸிக்கா²பத³ம் சதுத்த²ம்.

5. ஸஹஸேய்யஸிக்கா²பத³வண்ணனா

49. பஞ்சமஸிக்கா²பதே³ – முட்ட²ஸ்ஸதீ அஸம்பஜானாதி புப்³ப³பா⁴கே³ ஸதிஸம்பஜஞ்ஞஸ்ஸ அகரணவஸேனேதம் வுத்தம், ப⁴வங்கோ³திண்ணகாலே பன குதோ ஸதிஸம்பஜஞ்ஞந்தி! விகூஜமானாதி விப்பலபமானா. காகச்ச²மானாதி நாஸாய காகஸத்³த³ம் விய நிரத்த²கஸத்³த³ம் முஞ்சமானா. உபாஸகாதி பட²மதரம் உட்டி²தஉபாஸகா.

50. ஏதத³வோசுந்தி ‘‘ப⁴க³வதா ஆவுஸோ ராஹுல ஸிக்கா²பத³ம் பஞ்ஞத்த’’ந்தி பி⁴க்கூ² ஸிக்கா²பத³கா³ரவேனேவ ஏதம் அவோசும். பகதியா பன தே ப⁴க³வதி ச கா³ரவேன ஆயஸ்மதோ ச ராஹுலஸ்ஸ ஸிக்கா²காமதாய தஸ்ஸ ஆயஸ்மதோ வஸனட்டா²னம் ஆக³தஸ்ஸ சூளமஞ்சகம் வா அபஸ்ஸேனம் வா யம் அத்தி² தம் பஞ்ஞபேத்வா சீவரம் வா உத்தராஸங்க³ம் வா உஸ்ஸீஸகரணத்தா²ய தே³ந்தி. தத்ரித³ம் தஸ்ஸாயஸ்மதோ ஸிக்கா²காமதாய – பி⁴க்கூ² கிர தம் தூ³ரதோவ ஆக³ச்ச²ந்தம் தி³ஸ்வா முட்டி²ஸம்முஞ்ஜனிஞ்ச கசவரச²ட்³ட³னகஞ்ச ப³ஹி கி²பந்தி. அத²ஞ்ஞேஹி ‘‘ஆவுஸோ கேனித³ம் பாதித’’ந்தி வுத்தே அஞ்ஞே ஏவம் வத³ந்தி – ‘‘ப⁴ந்தே, ராஹுலோ இமஸ்மிம் பதே³ஸே ஸஞ்சரி, தேன நு கோ² பாதித’’ந்தி. ஸோ பனாயஸ்மா ‘‘ந மய்ஹம் ப⁴ந்தே இத³ம் கம்ம’’ந்தி ஏகதி³வஸம்பி அவத்வா தம் படிஸாமேத்வா பி⁴க்கூ² க²மாபேத்வா க³ச்ச²தி. வச்சகுடியா ஸேய்யம் கப்பேஸீதி தம்யேவ ஸிக்கா²காமதம் அனுப்³ரூஹந்தோ த⁴ம்மஸேனாபதிமஹாமோக்³க³ல்லானஆனந்த³த்தே²ராதீ³னம் ஸந்திகம் அக³ந்த்வா ப⁴க³வதோ வளஞ்ஜனகவச்சகுடியம் ஸேய்யம் கப்பேஸி. ஸா கிர குடி கவாடப³த்³தா⁴ க³ந்த⁴பரிப⁴ண்ட³கதா ஸமோஸரிதபுப்ப²தா³மா சேதியட்டா²னமிவ திட்ட²தி, அபரிபோ⁴கா³ அஞ்ஞேஸம்.

51. உத்தரிதி³ரத்ததிரத்தந்தி ப⁴க³வா ஸாமணேரானம் ஸங்க³ஹகரணத்தா²ய திரத்தம் பரிஹாரம் அதா³ஸி. ந ஹி யுத்தம் குலதா³ரகே பப்³பா³ஜேத்வா நானுக்³க³ஹேதுந்தி. ஸஹஸேய்யந்தி ஏகதோ ஸேய்யம். ஸேய்யாதி காயப்பஸாரணஸங்கா²தம் ஸயனம்பி வுச்சதி, யஸ்மிம் ஸேனாஸனே ஸயந்தி, தம்பி. தத்த² ஸேனாஸனம் தாவ த³ஸ்ஸேதும் ‘‘ஸேய்யா நாம ஸப்³ப³ச்ச²ன்னா’’திஆதி³ வுத்தம். காயப்பஸாரணம் த³ஸ்ஸேதும் அனுபஸம்பன்னே நிபன்னே பி⁴க்கு² நிபஜ்ஜதீ’’திஆதி³ வுத்தம். தஸ்மா அயமேத்த² அத்தோ² – ‘‘ஸேனாஸனஸங்கா²தம் ஸேய்யம் பவிஸித்வா காயப்பஸாரணஸங்கா²தம் ஸேய்யம் கப்பேய்ய வித³ஹேய்ய ஸம்பாதே³ய்யா’’தி. ஸப்³ப³ச்ச²ன்னாதிஆதி³னா பன தஸ்ஸா ஸேனாஸனஸங்கா²தாய ஸேய்யாய லக்க²ணம் வுத்தம். தஸ்மா யம் ஸேனாஸனம் உபரி பஞ்சஹி ச²த³னேஹி அஞ்ஞேன வா கேனசி ஸப்³ப³மேவ படிச்ச²ன்னம், அயம் ஸப்³ப³ச்ச²ன்னா நாம ஸேய்யா. அட்ட²கதா²ஸு பன பாகடவோஹாரம் க³ஹேத்வா வாசுக்³க³தவஸேன ‘‘ஸப்³ப³ச்ச²ன்னா நாம பஞ்சஹி ச²த³னேஹி ச²ன்னா’’தி வுத்தம். கிஞ்சாபி வுத்தம்? அத² கோ² து³ஸ்ஸகுடியம் வஸந்தஸ்ஸாபி ந ஸக்கா அனாபத்தி காதும், தஸ்மா யம் கிஞ்சி படிச்சா²த³னஸமத்த²ம் இத⁴ ச²த³னஞ்ச பரிச்ச²ன்னஞ்ச வேதி³தப்³ப³ம். பஞ்சவித⁴ச்ச²த³னேயேவ ஹி க³ய்ஹமானே பத³ரச்ச²ன்னேபி ஸஹஸேய்யா ந ப⁴வேய்ய. யம் பன ஸேனாஸனம் பூ⁴மிதோ பட்டா²ய யாவ ச²த³னம் ஆஹச்ச பாகாரேன வா அஞ்ஞேன வா கேனசி அந்தமஸோ வத்தே²னாபி பரிக்கி²த்தம், அயம் ஸப்³ப³பரிச்ச²ன்னா நாம ஸேய்யா. ச²த³னம் அனாஹச்ச ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாராதி³னா பரிக்கி²த்தாபி ஸப்³ப³பரிச்ச²ன்னாயேவாதி குருந்த³ட்ட²கதா²யம் வுத்தம். யஸ்ஸா பன உபரி ப³ஹுதரம் டா²னம் ச²ன்னம், அப்பம் அச்ச²ன்னம், ஸமந்ததோ வா ப³ஹுதரம் பரிக்கி²த்தம், அப்பம் அபரிக்கி²த்தம், அயம் யேபு⁴ய்யேன ச²ன்னா யேபு⁴ய்யேன பரிச்ச²ன்னா நாம. இமினா ஹி லக்க²ணேன ஸமன்னாக³தோ ஸசேபி ஸத்தபூ⁴மகோ பாஸாதோ³ ஏகூபசாரோ ஹோதி, ஸதக³ப்³ப⁴ம் வா சதுஸ்ஸாலம் வா, ஏகஸேய்யாஇச்சேவ ஸங்க்²யம் க³ச்ச²தி. தம் ஸந்தா⁴ய வுத்தம் ‘‘சதுத்தே² தி³வஸே அத்த²ங்க³தே ஸூரியே அனுபஸம்பன்னே நிபன்னே பி⁴க்கு² நிபஜ்ஜதி, ஆபத்தி பாசித்தியஸ்ஸா’’திஆதி³.

தத்த² ச நிபஜ்ஜனமத்தேனேவ பாசித்தியம். ஸசே பன ஸம்ப³ஹுலா ஸாமணேரா, ஏகோ பி⁴க்கு², ஸாமணேரக³ணனாய பாசித்தியா. தே சே உட்டா²யுட்டா²ய நிபஜ்ஜந்தி, தேஸம் பயோகே³ பயோகே³ பி⁴க்கு²ஸ்ஸ ஆபத்தி. பி⁴க்கு²ஸ்ஸ உட்டா²யுட்டா²ய நிபஜ்ஜனே பன பி⁴க்கு²ஸ்ஸேவ பயோகே³ன பி⁴க்கு²ஸ்ஸ ஆபத்தி. ஸசே பன ஸம்ப³ஹுலா பி⁴க்கூ² ஏகோ ஸாமணேரோ ஸப்³பே³ஸம் ஆபத்திம் கரோதி, தஸ்ஸ உட்டா²யுட்டா²ய நிபஜ்ஜனேனபி பி⁴க்கூ²னம் ஆபத்தியேவ. உப⁴யேஸம் ஸம்ப³ஹுலபா⁴வேபி ஏஸேவ நயோ.

அபிசேத்த² ஏகாவாஸாதி³கம்பி சதுக்கம் வேதி³தப்³ப³ம். யோ ஹி ஏகஸ்மிம் ஆவாஸே ஏகேனேவ அனுபஸம்பன்னேன ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸ சதுத்த²தி³வஸதோ பட்டா²ய தே³வஸிகா ஆபத்தி. யோபி ஏகஸ்மிம்யேவ ஆவாஸே நானாஅனுபஸம்பன்னேஹி ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸபி. யோபி நானாஆவாஸேஸு ஏகேனேவ அனுபஸம்பன்னேன ஸத்³தி⁴ம் திரத்தம் ஸஹஸேய்யம் கப்பேதி, தஸ்ஸபி. யோபி நானாஆவாஸேஸு நானாஅனுபஸம்பன்னேஹி ஸத்³தி⁴ம் யோஜனஸதம்பி க³ந்த்வா ஸஹஸேய்யம் கப்பேதி, தஸ்ஸபி சதுத்த²தி³வஸதோ பட்டா²ய தே³வஸிகா ஆபத்தி.

அயஞ்ச ஸஹஸேய்யாபத்தி நாம ‘‘பி⁴க்கு²ம் ட²பேத்வா அவஸேஸோ அனுபஸம்பன்னோ நாமா’’தி வசனதோ திரச்சா²னக³தேனபி ஸத்³தி⁴ம் ஹோதி, தத்ர திரச்சா²னக³தஸ்ஸ பரிச்சே²தோ³ மேது²னத⁴ம்மாபத்தியா வுத்தனயேனேவ வேதி³தப்³போ³. தஸ்மா ஸசேபி கோ³தா⁴பி³ளாலமங்கு³ஸாதீ³ஸு கோசி பவிஸித்வா பி⁴க்கு²னோ வஸனஸேனாஸனே ஏகூபசாரட்டா²னே ஸயதி, ஸஹஸேய்யாவ ஹோதி.

யதி³ பன த²ம்பா⁴னம் உபரி கதபாஸாத³ஸ்ஸ உபரிமதலேன ஸத்³தி⁴ம் அஸம்ப³த்³த⁴பி⁴த்திகஸ்ஸ பி⁴த்தியா உபரி டி²தஸுஸிரதுலாஸீஸஸ்ஸ ஸுஸிரேன பவிஸித்வா துலாய அப்³ப⁴ந்தரே ஸயித்வா தேனேவ ஸுஸிரேன நிக்க²மித்வா க³ச்ச²தி, ஹேட்டா²பாஸாதே³ ஸயிதபி⁴க்கு²ஸ்ஸ அனாபத்தி. ஸசே ச²த³னே சி²த்³த³ம் ஹோதி, தேன பவிஸித்வா அந்தோச²த³னே வஸித்வா தேனேவ பக்கமதி, நானூபசாரே உபரிமதலே ச²த³னப்³ப⁴ந்தரே ஸயிதஸ்ஸ ஆபத்தி, ஹேட்டி²மதலே ஸயிதஸ்ஸ அனாபத்தி. ஸசே அந்தோபாஸாதே³னேவ ஆரோஹித்வா ஸப்³ப³தலானி பரிபு⁴ஞ்ஜந்தி, ஏகூபசாரானி ஹோந்தி, தேஸு யத்த² கத்த²சி ஸயிதஸ்ஸ ஆபத்தி.

ஸபா⁴ஸங்கே²பேன கதே அட்³ட⁴குட்டகஸேனாஸனே ஸயிதஸ்ஸ வாளஸங்கா⁴டாதீ³ஸு கபோதாத³யோ பவிஸித்வா ஸயந்தி, ஆபத்தியேவ. பரிக்கே²பஸ்ஸ ப³ஹிக³தே நிப்³ப³கோஸப்³ப⁴ந்தரே ஸயந்தி, அனாபத்தி. பரிமண்ட³லம் வா சதுரஸ்ஸம் வா ஏகச்ச²த³னாய க³ப்³ப⁴மாலாய ஸதக³ப்³ப⁴ம் சேபி ஸேனாஸனம் ஹோதி, தத்ர சே ஏகேன ஸாதா⁴ரணத்³வாரேன பவிஸித்வா விஸும் பாகாரேன அபரிச்சி²ன்னக³ப்³பூ⁴பசாரே ஸப்³ப³க³ப்³பே⁴ பவிஸந்தி, ஏகக³ப்³பே⁴பி அனுபஸம்பன்னே நிபன்னே ஸப்³ப³க³ப்³பே⁴ஸு நிபன்னானம் ஆபத்தி. ஸசே ஸபமுகா² க³ப்³பா⁴ ஹோந்தி, பமுக²ஸ்ஸ உபரி அச்ச²ன்னம் உச்சவத்து²கம் சேபி ஹோதி, பமுகே² ஸயிதோ க³ப்³பே⁴ ஸயிதானம் ஆபத்திம் ந கரோதி. ஸசே பன க³ப்³ப⁴ச்ச²த³னேனேவ ஸத்³தி⁴ம் ஸம்ப³த்³த⁴ச்ச²த³னம் ஹோதி, தத்ர ஸயிதோ ஸப்³பே³ஸம் ஆபத்திம் கரோதி. கஸ்மா? ஸப்³ப³ச்ச²ன்னத்தா ஸப்³ப³பரிச்ச²ன்னத்தா ச, க³ப்³ப⁴பரிக்கே²போயேவ ஹிஸ்ஸ பரிக்கே²போதி. ஏதேனேவ ஹி நயேன அட்ட²கதா²ஸு லோஹபாஸாத³பரிக்கே²பஸ்ஸ சதூஸு த்³வாரகோட்ட²கேஸு ஆபத்தி வுத்தா.

யம் பன அந்த⁴கட்ட²கதா²யம் ‘‘அபரிக்கி²த்தே பமுகே² அனாபத்தீதி பூ⁴மியம் வினா ஜக³தியா பமுக²ம் ஸந்தா⁴ய கதி²ன’’ந்தி வுத்தம், தம் அந்த⁴கரட்டே² பாடேக்கஸன்னிவேஸா ஏகச்ச²த³னா க³ப்³ப⁴பாளியோ ஸந்தா⁴ய வுத்தம். யஞ்ச தத்த² ‘‘பூ⁴மியம் வினா ஜக³தியா’’தி வுத்தம், தம் நேவ அட்ட²கதா²ஸு அத்தி²; ந பாளியா ஸமேதி. த³ஸஹத்து²ப்³பே³தா⁴பி ஹி ஜக³தி பரிக்கே²பஸங்க்²யம் ந க³ச்ச²தி. தஸ்மா யம்பி தத்த² து³தியஸிக்கா²பதே³ ஜக³தியா பமாணம் வத்வா ‘‘ஏதம் ஏகூபசாரம் பரிச்ச²ன்னம் நாம ஹோதீ’’தி வுத்தம், தம் ந க³ஹேதப்³ப³ம். யேபி ஏகஸாலத்³விஸாலதிஸாலசதுஸ்ஸாலஸன்னிவேஸா மஹாபாஸாதா³ ஏகஸ்மிம் ஓகாஸே பாதே³ தோ⁴வித்வா பவிட்டே²ன ஸக்கா ஹோந்தி ஸப்³ப³த்த² அனுபரிக³ந்தும், தேஸுபி ஸஹஸேய்யாபத்தியா ந முச்சதி. ஸசே தஸ்மிம் தஸ்மிம் டா²னே உபசாரம் பரிச்சி²ந்தி³த்வா கதா ஹோந்தி, ஏகூபசாரட்டா²னேயேவ ஆபத்தி.

த்³வீஹி த்³வாரேஹி யுத்தஸ்ஸ ஸுதா⁴ச²த³னமண்ட³பஸ்ஸ மஜ்ஜே² பாகாரம் கரோந்தி, ஏகேன த்³வாரேன பவிஸித்வா ஏகஸ்மிம் பரிச்சே²தே³ அனுபஸம்பன்னோ ஸயதி, ஏகஸ்மிம் பி⁴க்கு², அனாபத்தி. பாகாரே கோ³தா⁴தீ³னம் பவிஸனமத்தம்பி சி²த்³த³ம் ஹோதி, ஏகஸ்மிஞ்ச பரிச்சே²தே³ கோ³தா⁴ ஸயந்தி, அனாபத்தியேவ. ந ஹி சி²த்³தே³ன கே³ஹம் ஏகூபசாரம் நாம ஹோதி. ஸசே பாகாரமஜ்ஜே² சி²ந்தி³த்வா த்³வாரம் யோஜேந்தி, ஏகூபசாரதாய ஆபத்தி. தம் த்³வாரம் கவாடேன பித³ஹித்வா ஸயந்தி, ஆபத்தியேவ. ந ஹி த்³வாரபித³ஹனேன கே³ஹம் நானூபசாரம் நாம ஹோதி, த்³வாரம் வா அத்³வாரம். கவாடஞ்ஹி ஸம்வரணவிவரணேஹி யதா²ஸுக²ம் வளஞ்ஜனத்தா²ய கதம், ந வளஞ்ஜனூபச்சே²த³னத்தா²ய. ஸசே பன தம் த்³வாரம் புன இட்ட²காஹி பித³ஹந்தி, அத்³வாரம் ஹோதி, புரிமே நானூபசாரபா⁴வேயேவ திட்ட²தி. தீ³க⁴பமுக²ம் சேதியக⁴ரம் ஹோதி. ஏகம் கவாடம் அந்தோ, ஏகம் ப³ஹி, த்³வின்னம் கவாடானம் அந்தரே அனுபஸம்பன்னோ அந்தோசேதியக⁴ரே ஸயந்தஸ்ஸ ஆபத்திம் கரோதி, ஏகூபசாரத்தா.

தத்ர யஸ்ஸ ‘‘ஸியா அயம் ஏகூபசாரனானூபசாரதா நாம உதோ³ஸிதஸிக்கா²பதே³ வுத்தா, இத⁴ பன ‘ஸேய்யா நாம ஸப்³ப³ச்ச²ன்னா ஸப்³ப³பரிச்ச²ன்னா யேபு⁴ய்யேன ச²ன்னா யேபு⁴ய்யேன பரிச்ச²ன்னா’தி ஏத்தகமேவ வுத்தம், பிஹிதத்³வாரோ ச க³ப்³போ⁴ ஸப்³ப³பரிச்ச²ன்னோவ ஹோதி. தஸ்மா தத்த² அந்தோ ஸயிதேனேவ ஸத்³தி⁴ம் ஆபத்தி, ப³ஹி ஸயிதேன அனாபத்தீ’’தி. ஸோ ஏவம் வத்தப்³போ³ – ‘‘அபிஹிதத்³வாரே பன கஸ்மா ப³ஹி ஸயிதேன ஆபத்தீ’’தி? பமுக²ஸ்ஸ க³ப்³பே⁴ன ஸத்³தி⁴ம் ஸப்³ப³ச்ச²ன்னத்தா. ‘‘கிம் பன க³ப்³பே⁴ பிஹிதே ச²த³னம் வித்³த⁴ஸ்தம் ஹோதீ’’தி? ந வித்³த⁴ஸ்தம், க³ப்³பே⁴ன ஸத்³தி⁴ம் பமுக²ஸ்ஸ ஸப்³ப³பரிச்ச²ன்னதா ந ஹோதி. ‘‘கிம் பரிக்கே²போ வித்³த⁴ஸ்தோ’’தி? அத்³தா⁴ வக்க²தி ‘‘ந வித்³த⁴ஸ்தோ, கவாடேன உபசாரோ பரிச்ச²ன்னோ’’தி. ஏவம் தூ³ரம்பி க³ந்த்வா புன ஏகூபசாரனானூபசாரதம்யேவ பச்சாக³மிஸ்ஸதி.

அபிச யதி³ ப்³யஞ்ஜனமத்தேயேவ அத்தோ² ஸுவிஞ்ஞேய்யோ ஸியா, ஸப்³ப³ச்ச²ன்னாதி வசனதோ பஞ்சன்னம் அஞ்ஞதரேன ச²த³னேன ச²ன்னா ஏவ ஸேய்யா ஸியா, ந அஞ்ஞேன. ஏவஞ்ச ஸதி பத³ரச்ச²ன்னாதீ³ஸு அனாபத்தி ஸியா. ததோ யத³த்த²ம் ஸிக்கா²பத³ம் பஞ்ஞத்தம், ஸ்வேவ அத்தோ² பரிஹாயேய்ய. பரிஹாயது வா மா வா, கத²ம் அவுத்தம் க³ஹேதப்³ப³ந்தி; கோ வா வத³தி ‘‘அவுத்தம் க³ஹேதப்³ப³’’ந்தி? வுத்தஞ்ஹேதம் அனியதேஸு – ‘‘படிச்ச²ன்னம் நாம ஆஸனம் குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கோட்ட²லிகாய வா யேன கேனசி படிச்ச²ன்னம் ஹோதீ’’தி. தஸ்மா யதா² தத்த² யேன கேனசி படிச்ச²ன்னம் படிச்ச²ன்னமேவ, ஏவமிதா⁴பி க³ஹேதப்³ப³ம். தஸ்மா ஸேனாஸனம் கு²த்³த³கம் வா ஹோது மஹந்தம் வா அஞ்ஞேன ஸத்³தி⁴ம் ஸம்ப³த்³த⁴ம் வா அஸம்ப³த்³த⁴ம் வா தீ³க⁴ம் வா வட்டம் வா சதுரஸ்ஸம் வா ஏகபூ⁴மகம் வா, அனேகபூ⁴மகம் வா, யம் யம் ஏகூபசாரம் ஸப்³ப³த்த² யேன கேனசி படிச்சா²த³னேன ஸப்³ப³ச்ச²ன்னே ஸப்³ப³பரிச்ச²ன்னே யேபு⁴ய்யேன வா ச²ன்னே யேபு⁴ய்யேன வா பரிச்ச²ன்னே ஸஹஸேய்யாபத்தி ஹோதீதி.

53. உபட்³ட⁴ச்ச²ன்னே உபட்³ட⁴பரிச்ச²ன்னே ஆபத்தி து³க்கடஸ்ஸாதி ஏத்த² ஸப்³ப³ச்ச²ன்னே உபட்³ட⁴பரிச்ச²ன்னேதி ஏவமாதீ³ஸுபி மஹாபச்சரியம் து³க்கடமேவாதி வுத்தம். மஹாஅட்ட²கதா²யம் பன ‘‘ஸப்³ப³ச்ச²ன்னே யேபு⁴ய்யேனபரிச்ச²ன்னே பாசித்தியம், ஸப்³ப³ச்ச²ன்னே உபட்³ட⁴பரிச்ச²ன்னே பாசித்தியம், யேபு⁴ய்யேனச²ன்னே உபட்³ட⁴பரிச்ச²ன்னே பாசித்தியம், ஸப்³ப³பரிச்ச²ன்னே யேபு⁴ய்யேனச²ன்னே பாசித்தியம், ஸப்³ப³பரிச²ன்னே உபட்³ட⁴ச்ச²ன்னே பாசித்தியம், யேபு⁴ய்யேனபரிச்ச²ன்னே உபட்³ட⁴ச்ச²ன்னே பாசித்தியம், பாளியம் வுத்தபாசித்தியேன ஸத்³தி⁴ம் ஸத்த பாசித்தியானீ’’தி வுத்தம். ‘‘ஸப்³ப³ச்ச²ன்னே சூளகபரிச்ச²ன்னே து³க்கடம், யேபு⁴ய்யேனச²ன்னே சூளகபரிச்ச²ன்னே து³க்கடம், ஸப்³ப³பரிச்ச²ன்னே சூளகச்ச²ன்னே து³க்கடம், யேபு⁴ய்யேனபரிச்ச²ன்னே சூளகச்ச²ன்னே து³க்கடம், பாளியம் து³க்கடேன ஸஹ பஞ்ச து³க்கடானீ’’தி வுத்தம்.

‘‘உபட்³ட⁴ச்ச²ன்னே சூளகபரிச்ச²ன்னே அனாபத்தி, உபட்³ட⁴பரிச்ச²ன்னே சூளகச்ச²ன்னே அனாபத்தி, சூளகச்ச²ன்னே சூளகபரிச்ச²ன்னே அனாபத்தி, ஸப்³ப³ச்ச²ன்னே ஸப்³ப³அபரிச்ச²ன்னேதி ச ஏத்த² ஸேனம்ப³மண்ட³பவண்ணம் ஹோதீ’’தி வுத்தம். இமினாபேதம் வேதி³தப்³ப³ம் – ‘‘யதா² ஜக³தி பரிக்கே²பஸங்க²ய ந க³ச்ச²தீ’’தி. ஸேஸம் உத்தானத்த²மேவ.

ஏளகலோமஸமுட்டா²னம் – காயதோ ச காயசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ஸஹஸேய்யஸிக்கா²பத³ம் பஞ்சமம்.

6. து³தியஸஹஸேய்யஸிக்கா²பத³வண்ணனா

55. து³தியஸஹஸேய்யஸிக்கா²பதே³ – ஆவஸதா²கா³ரந்தி ஆக³ந்துகானம் வஸனாகா³ரம். பஞ்ஞத்தம் ஹோதீதி புஞ்ஞகாமதாய கத்வா ட²பிதம் ஹோதி. யேன ஸா இத்தீ² தேனுபஸங்கமீதி அஸுகஸ்மிம் நாம டா²னே ஆவஸதா²கா³ரம் பஞ்ஞத்தம் அத்தீ²தி மனுஸ்ஸானம் ஸுத்வா உபஸங்கமி. க³ந்த⁴க³ந்தி⁴னீதி அக³ருகுங்குமாதீ³னம் க³ந்தா⁴னம் க³ந்தோ⁴ க³ந்த⁴க³ந்தோ⁴, ஸோ அஸ்ஸா அத்தீ²தி க³ந்த⁴க³ந்தி⁴னீ. ஸாடகம் நிக்கி²பித்வாதி அப்பேவ நாமஸ்ஸ இமம்பி விப்பகாரம் பஸ்ஸந்தஸ்ஸ ராகோ³ உப்பஜ்ஜேய்யாதி சிந்தேத்வா ஏவமகாஸி. ஓக்கி²பித்வாதி அதோ⁴ கி²பித்வா. அச்சயோதி அபராதோ⁴. மம் அச்சக³மாதி மம் அதிக்கம்ம அபி⁴ப⁴வித்வா பவத்தோ. ஸேஸம் பட²மஸிக்கா²பதே³ வுத்தனயேனேவ வேதி³தப்³ப³ம். அயமேவ ஹி விஸேஸோ – பட²மஸிக்கா²பதே³ சதுத்த²தி³வஸே ஆபத்தி இத⁴ பட²மதி³வஸேபி. யக்கீ²பேதீஹி தி³ஸ்ஸமானகரூபாஹி திரச்சா²னக³தித்தி²யா ச மேது²னத⁴ம்மவத்து²பூ⁴தாய ஏவ து³க்கடம். ஸேஸாஹி அனாபத்தி. ஸமுட்டா²னாதீ³னி பட²மஸதி³ஸானேவாதி.

து³தியஸஹஸேய்யஸிக்கா²பத³ம் ச²ட்ட²ம்.

7. த⁴ம்மதே³ஸனாஸிக்கா²பத³வண்ணனா

60. ஸத்தமஸிக்கா²பதே³ – க⁴ரணீதி க⁴ரஸாமினீ. நிவேஸனத்³வாரேதி நிவேஸனஸ்ஸ மஹாத்³வாரே. க⁴ரஸுண்ஹாதி தஸ்மிம் க⁴ரே ஸுண்ஹா. ஆவஸத²த்³வாரேதி ஓவரகத்³வாரே. விஸ்ஸட்டே²னாதி ஸுனிக்³க³தேன ஸத்³தே³ன. விவடேனாதி ஸுட்டு² பகாஸேன அஸம்வுதேன. த⁴ம்மோ தே³ஸேதப்³போ³தி அயம் ஸரணஸீலாதி³பே⁴தோ³ த⁴ம்மோ கதே²தப்³போ³. அஞ்ஞாதுந்தி ஆஜானிதும். விஞ்ஞுனா புரிஸவிக்³க³ஹேனாதி விஞ்ஞுனா புரிஸேன, புரிஸவிக்³க³ஹம் க³ஹேத்வாபி டி²தேன ந யக்கே²ன ந பேதேன ந திரச்சா²னக³தேன.

66. அனாபத்தி விஞ்ஞுனா புரிஸவிக்³க³ஹேனாதி விஞ்ஞுனா புரிஸவிக்³க³ஹேன ஸத்³தி⁴ம் டி²தாய ப³ஹும்பி த⁴ம்மம் தே³ஸேந்தஸ்ஸ அனாபத்தி. ச²ப்பஞ்சவாசாஹீதி ச²ஹி பஞ்சஹி வாசாஹி யோ தே³ஸேதி, தஸ்ஸபி அனாபத்தி. தத்த² ஏகோ கா³தா²பாதோ³ ஏகவாசாதி ஏவம் ஸப்³ப³த்த² வாசாபமாணம் வேதி³தப்³ப³ம். ஸசே அட்ட²கத²ம் த⁴ம்மபத³ம் ஜாதகாதி³வத்து²ம் வா கதே²துகாமோ ஹோதி, ச²ப்பஞ்சபத³மத்தமேவ கதே²தும் வட்டதி. பாளியா ஸத்³தி⁴ம் கதே²ந்தேன ஏகபத³ம் பாளிதோ பஞ்ச அட்ட²கதா²தோதி ஏவம் ச² பதா³னி அனதிக்காமேத்வாவ கதே²தப்³போ³. பத³ஸோத⁴ம்மே வுத்தப்பபே⁴தோ³ ஹி இதா⁴பி ஸப்³போ³ த⁴ம்மோயேவ. தஸ்மிம் தே³ஸேதீதி தஸ்மிம் க²ணே தே³ஸேதி. ஸம்பதா³னத்தே² வா ஏதம் பு⁴ம்மவசனம். தஸ்ஸா தே³ஸேதீதி அத்தோ². அஞ்ஞிஸ்ஸா மாதுகா³மஸ்ஸாதி ஏகிஸ்ஸா தே³ஸேத்வா புன ஆக³தாக³தாய அஞ்ஞிஸ்ஸாபி தே³ஸேதீதி ஏவம் ஏகாஸனே நிஸின்னோ மாதுகா³மஸதஸஹஸ்ஸன்னம்பி தே³ஸேதீதி அத்தோ². மஹாபச்சரியட்ட²கதா²யம் வுத்தம் ஸமம் நிஸின்னானம் மாதுகா³மானம் ‘‘தும்ஹாகம் ஏகேகிஸ்ஸா ஏகேகம் கா³த²ம் தே³ஸேஸ்ஸாமி, தம் ஸுணாதா²தி தே³ஸேதி, அனாபத்தி. பட²மம் ஏகேகிஸ்ஸா ஏகேகம் கா³த²ம் கதே²ஸ்ஸாமீதி ஆபோ⁴க³ம் கத்வா ஜானாபேத்வா கதே²தும் வட்டதி, ந பச்சா²தி. பஞ்ஹம் புச்ச²தி பஞ்ஹம் புட்டோ² கதே²தீதி மாதுகா³மோ ‘‘தீ³க⁴னிகாயோ நாம ப⁴ந்தே கிமத்த²ம் தீ³பேதீ’’தி புச்ச²தி. ஏவம் பஞ்ஹம் புட்டோ² பி⁴க்கு² ஸப்³ப³ம் சேபி தீ³க⁴னிகாயம் கதே²தி, அனாபத்தி. ஸேஸமேத்த² உத்தானத்த²மேவ.

பத³ஸோத⁴ம்மஸமுட்டா²னம் – வாசதோ ச வாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம், திவேத³னந்தி.

த⁴ம்மதே³ஸனாஸிக்கா²பத³ம் ஸத்தமம்.

8. பூ⁴தாரோசனஸிக்கா²பத³வண்ணனா

67. அட்ட²மஸிக்கா²பதே³ – வத்து²கதா²ய தாவ யம் வத்தப்³ப³ம் ஸியா, தம் ஸப்³ப³ம் சதுத்த²பாராஜிகவண்ணனாயம் வுத்தனயமேவ. அயமேவ ஹி விஸேஸோ – தத்த² அபூ⁴தம் ஆரோசேஸும், இத⁴ பூ⁴தம். பூ⁴தம்பி புது²ஜ்ஜனா ஆரோசேஸும், ந அரியா. அரியானஞ்ஹி பயுத்தவாசா நாம நத்தி², அத்தனோ கு³ணே ஆரோசயமானே பன அஞ்ஞே ந படிஸேதே⁴ஸும், ததா²உப்பன்னே ச பச்சயே ஸாதி³யிம்ஸு, ததா²உப்பன்னபா⁴வம் அஜானந்தா.

‘‘அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸு’’ந்திஆதி³ம்ஹி பன யே உத்தரிமனுஸ்ஸத⁴ம்மஸ்ஸ வண்ணம் பா⁴ஸிம்ஸு, தே ஆரோசேஸுந்தி வேதி³தப்³ப³ம். ‘‘கச்சி பன வோ பி⁴க்க²வே பூ⁴த’’ந்தி புச்சி²தே பன ஸப்³பே³பி ‘‘பூ⁴தம் ப⁴க³வா’’தி படிஜானிம்ஸு. அரியானம்பி ஹி அப்³ப⁴ந்தரே பூ⁴தோ உத்தரிமனுஸ்ஸத⁴ம்மோதி. அத² ப⁴க³வா அரியமிஸ்ஸகத்தா ‘‘மோக⁴புரிஸா’’தி அவத்வா ‘‘கத²ஞ்ஹி நாம தும்ஹே பி⁴க்க²வே’’தி வத்வா ‘‘உத³ரஸ்ஸ காரணா’’திஆதி³மாஹ. தத்த² யஸ்மா அரியா அஞ்ஞேஸம் ஸுத்வா ‘‘அய்யோ கிர, ப⁴ந்தே, ஸோதாபன்னோ’’திஆதி³னா நயேன பஸன்னேஹி மனுஸ்ஸேஹி புச்சி²யமானா அபஞ்ஞத்தே ஸிக்கா²பதே³ அனாதீ³னவத³ஸ்ஸினோ ஸுத்³த⁴சித்ததாய அத்தனோ ச பரேஸஞ்ச விஸேஸாதி⁴க³மம் படிஜானிம்ஸு. ஏவம் படிஜானந்தேஹி ச தேஹி யம் அஞ்ஞே உத³ரஸ்ஸ காரணா உத்தரிமனுஸ்ஸத⁴ம்மஸ்ஸ வண்ணம் பா⁴ஸித்வா பிண்ட³பாதம் உப்பாதே³ஸும், தம் ஸுத்³த⁴சித்ததாய ஸாதி³யந்தேஹிபி உத³ரஸ்ஸ காரணா உத்தரிமனுஸ்ஸத⁴ம்மஸ்ஸ வண்ணோ பா⁴ஸிதோ விய ஹோதி. தஸ்மா ஸப்³ப³ஸங்கா³ஹிகேனேவ நயேன ‘‘கத²ஞ்ஹி நாம தும்ஹே, பி⁴க்க²வே, உத³ரஸ்ஸ காரணா கி³ஹீனம் அஞ்ஞமஞ்ஞம் உத்தரிமனுஸ்ஸத⁴ம்மஸ்ஸ வண்ணம் பா⁴ஸிஸ்ஸதா²’’தி ஆஹ. ஸேஸம் சதுத்த²பாராஜிகவத்து²ஸதி³ஸமேவ. ஸிக்கா²பத³விப⁴ங்கே³பி கேவலம் தத்த² பாராஜிகஞ்சேவ து²ல்லச்சயஞ்ச இத⁴ பூ⁴தத்தா பாசித்தியஞ்சேவ து³க்கடஞ்ச அயம் விஸேஸோ. ஸேஸம் வுத்தனயமேவ.

77. ‘‘உபஸம்பன்னஸ்ஸ பூ⁴தம் ஆரோசேதீ’’தி உத்தரிமனுஸ்ஸத⁴ம்மமேவ ஸந்தா⁴ய வுத்தம். பரினிப்³பா³னகாலே ஹி அந்தரா வா அதிகட்³டி⁴யமானேன உபஸம்பன்னஸ்ஸ பூ⁴தம் ஆரோசேதும் வட்டதி. ஸுதபரியத்திஸீலகு³ணம் பன அனுபஸம்பன்னஸ்ஸாபி ஆரோசேதும் வட்டதி. ஆதி³கம்மிகஸ்ஸ அனாபத்தி. ‘‘உம்மத்தகஸ்ஸா’’தி இத³ம் பன இத⁴ ந வுத்தம். கஸ்மா? தி³ட்டி²ஸம்பன்னானம் உம்மாத³ஸ்ஸ வா சித்தக்கே²பஸ்ஸ வா அபா⁴வாதி. மஹாபச்சரியம்பி ஹி விசாரிதம் ‘‘ஜா²னலாபீ⁴ பன பரிஹீனே ஜா²னே உம்மத்தகோ ப⁴வேய்ய, தஸ்ஸபி பூ⁴தாரோசனபச்சயா அனாபத்தி ந வத்தப்³பா³, பூ⁴தஸ்ஸேவ அபா⁴வதோ’’தி. ஸேஸம் உத்தானமேவ.

பூ⁴தாரோசனம் நாமேதம் புப்³பே³ அவுத்தேஹி தீஹி ஸமுட்டா²னேஹி ஸமுட்டா²தி – காயதோ வாசதோ காயவாசதோ சாதி. கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், குஸலாப்³யாகதசித்தேஹி த்³விசித்தம், ஸுக²மஜ்ஜ²த்தவேத³னாஹி த்³விவேத³னந்தி.

பூ⁴தாரோசனஸிக்கா²பத³ம் அட்ட²மம்.

9. து³ட்டு²ல்லாரோசனஸிக்கா²பத³வண்ணனா

78. நவமஸிக்கா²பதே³ – து³ட்டு²ல்லா நாம ஆபத்தி சத்தாரி ச பாராஜிகானி தேரஸ ச ஸங்கா⁴தி³ஸேஸாதி இமிஸ்ஸா பாளியா ‘‘பாராஜிகானி து³ட்டு²ல்லஸத்³த³த்த²த³ஸ்ஸனத்த²ம் வுத்தானி, ஸங்கா⁴தி³ஸேஸம் பன இத⁴ அதி⁴ப்பேத’’ந்தி அட்ட²கதா²ஸு வுத்தம். தத்ராயம் விசாரணா – ஸசே பாராஜிகம் ஆரோசேந்தஸ்ஸ பாசித்தியம் ந ப⁴வேய்ய, யதா² ஸமானேபி பி⁴க்கு²-பி⁴க்கு²னீனம் உபஸம்பன்னஸத்³தே³ யத்த² பி⁴க்கு²னீ அனதி⁴ப்பேதா ஹோதி, தத்த² பி⁴க்கு²ம் ட²பேத்வா அவஸேஸோ அனுபஸம்பன்னோதி வுச்சதி; ஏவமித⁴ ஸமானேபி பாராஜிகஸங்கா⁴தி³ஸேஸானம் து³ட்டு²ல்லஸத்³தே³ யதி³ பாராஜிகம் அனதி⁴ப்பேதம், ‘‘து³ட்டு²ல்லா நாம ஆபத்தி தேரஸ ஸங்கா⁴தி³ஸேஸா’’தி ஏததே³வ வத்தப்³ப³ம் ஸியா. தத்த² ப⁴வேய்ய ‘‘யோ பாராஜிகம் ஆபன்னோ, ஸோ பி⁴க்கு²பா⁴வதோ சுதோ, தஸ்மா தஸ்ஸ ஆபத்திம் ஆரோசேந்தோ து³க்கடம் ஆபஜ்ஜதீ’’தி. ஏவம் ஸதி அக்கோஸந்தோபி து³க்கடம் ஆபஜ்ஜேய்ய, பாசித்தியமேவ ச ஆபஜ்ஜதி. வுத்தஞ்ஹேதம் – ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே அஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வத³தி, ஆபத்தி ஓமஸவாத³ஸ்ஸா’’தி (பாரா. 389). ஏவம் பாளியா விசாரியமானாய பாராஜிகம் ஆரோசேந்தஸ்ஸாபி பாசித்தியமேவ தி³ஸ்ஸதி. கிஞ்சாபி தி³ஸ்ஸதி, அத² கோ² ஸப்³ப³அட்ட²கதா²ஸு வுத்தத்தா அட்ட²கதா²சரியாவ ஏத்த² பமாணம், ந அஞ்ஞா விசாரணா. புப்³பே³பி ச ஆவோசும்ஹ – ‘‘பு³த்³தே⁴ன த⁴ம்மோ வினயோ ச வுத்தோ, யோ தஸ்ஸ புத்தேஹி ததே²வ ஞாதோ’’திஆதி³ (பாரா. அட்ட². 1.க³ந்தா²ரம்ப⁴கதா²). அட்ட²கதா²சரியா ஹி பு³த்³த⁴ஸ்ஸ அதி⁴ப்பாயம் ஜானந்தி.

இமினாபி சேதம் பரியாயேன வேதி³தப்³ப³ம். அஞ்ஞத்ர பி⁴க்கு²ஸம்முதியாதி ஹி வுத்தம். பி⁴க்கு²ஸம்முதியா ச ஆரோசனம் ஆயதிம் ஸம்வரத்தா²ய புன ததா²ரூபம் ஆபத்திம் அனாபஜ்ஜனத்தா²ய ப⁴க³வதா அனுஞ்ஞாதம், ந தஸ்ஸ பி⁴க்கு²னோ அவண்ணமத்தப்பகாஸனத்தா²ய, ஸாஸனே சஸ்ஸ பதிட்டா²னிஸேத⁴னத்தா²ய, ந ச பாராஜிகம் ஆபன்னஸ்ஸ புன ததா²ரூபாய ஆபத்தியா அனாபஜ்ஜனேன பி⁴க்கு²பா⁴வோ நாம அத்தி². தஸ்மா ‘‘பாராஜிகானி து³ட்டு²ல்லஸத்³த³த்த²த³ஸ்ஸனத்த²ம் வுத்தானி, ஸங்கா⁴தி³ஸேஸம் பன இதா⁴தி⁴ப்பேத’’ந்தி யம் அட்ட²கதா²ஸு வுத்தம், தம் ஸுவுத்தமேவ.

80. அத்தி² பி⁴க்கு²ஸம்முதி ஆபத்திபரியந்தாதிஆதீ³ஸு பன யா அயம் பி⁴க்கு²ஸம்முதி வுத்தா, ஸா ந கத்த²சி ஆக³தா, இத⁴ வுத்தத்தாயேவ பன அபி⁴ண்ஹாபத்திகம் பி⁴க்கு²ம் தி³ஸ்வா ஏவமேஸ பரேஸு ஹிரோத்தப்பேனாபி ஆயதிம் ஸம்வரம் ஆபஜ்ஜிஸ்ஸதீதி தஸ்ஸ பி⁴க்கு²னோ ஹிதேஸிதாய திக்க²த்தும் அபலோகேத்வா ஸங்கே⁴ன காதப்³பா³தி வேதி³தப்³பா³தி.

82. அது³ட்டு²ல்லம் ஆபத்திம் ஆரோசேதி ஆபத்தி து³க்கடஸ்ஸாதி பஞ்சபி ஆபத்திக்க²ந்தே⁴ ஆரோசேந்தஸ்ஸ து³க்கடம். மஹாபச்சரியம் பன பாராஜிகம் ஆரோசேந்தஸ்ஸாபி து³க்கடமேவ வுத்தம். அனுபஸம்பன்னஸ்ஸ து³ட்டு²ல்லம் வா அது³ட்டு²ல்லம் வா அஜ்ஜா²சாரந்தி ஏத்த² ஆதி³தோ பஞ்ச ஸிக்கா²பதா³னி து³ட்டு²ல்லோ நாம அஜ்ஜா²சாரோ, ஸேஸானி அது³ட்டு²ல்லோ. ஸுக்கவிஸ்ஸட்டி²காயஸம்ஸக்³க³து³ட்டு²ல்லஅத்தகாமா பனஸ்ஸ அஜ்ஜா²சாரோ நாமாதி வுத்தம்.

83. வத்து²ம் ஆரோசேதீதி ‘‘அயம் ஸுக்கவிஸ்ஸட்டி²ம் ஆபன்னோ, து³ட்டு²ல்லம் ஆபன்னோ, அத்தகாமம் ஆபன்னோ’’ காயஸம்ஸக்³க³ம் ஆபன்னோதி ஏவம் வத³ந்தஸ்ஸ அனாபத்தி. ஆபத்திம் ஆரோசேதீதி ஏத்த² ‘‘அயம் பாராஜிகம் ஆபன்னோ, ஸங்கா⁴தி³ஸேஸம் து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம் ஆபன்னோ’’தி வத³தி அனாபத்தி. ‘‘அயம் அஸுசிம் மோசேத்வா ஸங்கா⁴தி³ஸேஸம் ஆபன்னோ’’திஆதி³னா பன நயேன வத்து²னா ஸத்³தி⁴ம் ஆபத்திம் க⁴டேத்வா ஆரோசேந்தஸ்ஸேவ ஆபத்தி. ஸேஸமேத்த² உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

து³ட்டு²ல்லாரோசனஸிக்கா²பத³ம் நவமம்.

10. பத²வீக²ணனஸிக்கா²பத³வண்ணனா

86. த³ஸமஸிக்கா²பதே³ – ஜாதா ச பத²வீ அஜாதா ச பத²வீதி இமேஹி பதே³ஹி ஜாதபத²விஞ்ச அஜாதபத²விஞ்ச த³ஸ்ஸேதி. அப்பபாஸாணாதீ³ஸு அப்பா பாஸாணா ஏத்தா²தி அப்பபாஸாணாதி ஏவமத்தோ² த³ட்ட²ப்³போ³. தத்த² முட்டி²ப்பமாணதோ உபரி பாஸாணாதி வேதி³தப்³பா³, முட்டி²ப்பமாணா ஸக்க²ரா. கத²லாதி கபாலக²ண்டா³னி. மரும்பா³தி கடஸக்க²ரா. வாலிகாதி வாலுகாயேவ. யேபு⁴ய்யேன பம்ஸுகாதி தீஸு கோட்டா²ஸேஸு த்³வே கோட்டா²ஸா பம்ஸு, ஏகோ பாஸாணாதீ³ஸு அஞ்ஞதரோ. அத³ட்³டா⁴பீதி உத்³த⁴னபத்தபசனகும்ப⁴காராவாபாதி³வஸேன ததா² ததா² அத³ட்³டா⁴. ஸா பன விஸும் நத்தி², ஸுத்³த⁴பம்ஸுஆதீ³ஸு அஞ்ஞதராவ வேதி³தப்³பா³. யேபு⁴ய்யேனஸக்க²ராதி ப³ஹுதரா ஸக்க²ரா. ஹத்தி²குச்சி²யம் கிர ஏகபச்சி²பூரம் ஆஹராபேத்வா தோ³ணியம் தோ⁴வித்வா பத²வியா யேபு⁴ய்யேன ஸக்க²ரபா⁴வம் ஞத்வா ஸயம் பி⁴க்கூ² போக்க²ரணிம் க²ணிம்ஸு. யானி பன மஜ்ஜே² ‘‘அப்பபம்ஸு அப்பமத்திகா’’தி த்³வே பதா³னி, தானி யேபு⁴ய்யேனபாஸாணாதி³பஞ்சகமேவ பவிஸந்தி தேஸம்யேவ ஹி த்³வின்னம் பபே⁴த³த³ஸ்ஸனமேதம். ஸயம் க²ணதி ஆபத்தி பாசித்தியஸ்ஸாதி ஏத்த² பஹாரே பஹாரே பாசித்தியம் வேதி³தப்³ப³ம். ஸகிம் ஆணத்தோ ப³ஹுகம்பி க²ணதீதி ஸசேபி ஸகலதி³வஸம் க²ணதி, ஆணாபகஸ்ஸ ஏகம்யேவ பாசித்தியம். ஸசே பன குஸிதோ ஹோதி, புனப்புனம் ஆணாபேதப்³போ³. தம் ஆணாபேத்வா க²ணாபேந்தஸ்ஸ வாசாய வாசாய பாசித்தியம். அயம் தாவ பாளிவண்ணனா.

அயம் பன பாளிமுத்தகவினிச்ச²யோ – ‘‘போக்க²ரணிம் க²ணா’’தி வத³தி, வட்டதி. க²தாயேவ ஹி போக்க²ரணீ நாம ஹோதி, தஸ்மா அயம் கப்பியவோஹாரோ. ஏஸ நயோ ‘‘வாபிம் தளாகம் ஆவாடம் க²ணா’’திஆதீ³ஸுபி. ‘‘இமம் ஓகாஸம் க²ண, இமஸ்மிம் ஓகாஸே போக்க²ரணிம் க²ணா’’தி வத்தும் பன ந வட்டதி. ‘‘கந்த³ம் க²ண, மூலம் க²ணா’’தி அனியாமேத்வா வத்தும் வட்டதி. ‘‘இமம் வல்லிம் க²ண, இமஸ்மிம் ஓகாஸே கந்த³ம் வா மூலம் வா க²ணா’’தி வத்தும் ந வட்டதி. போக்க²ரணிம் ஸோதே⁴ந்தேஹி யோ குடேஹி உஸ்ஸிஞ்சிதும் ஸக்கா ஹோதி தனுககத்³த³மோ, தம் அபனேதும் வட்டதி, ப³ஹலம் ந வட்டதி. ஆதபேன ஸுக்க²கத்³த³மோ ப²லதி, தத்ர யோ ஹேட்டா² பத²வியா அஸம்ப³த்³தோ⁴, தமேவ அபனேதும் வட்டதி. உத³கேன க³தட்டா²னே உத³கபப்படகோ நாம ஹோதி, வாதப்பஹாரேன சலதி, தம் அபனேதும் வட்டதி.

போக்க²ரணீஆதீ³னம் தடம் பி⁴ஜ்ஜித்வா உத³கஸாமந்தா பததி, ஸசே ஓமகசாதுமாஸம் ஓவட்ட²ம், சி²ந்தி³தும் வா பி⁴ந்தி³தும் வா வட்டதி, சாதுமாஸதோ உத்³த⁴ம் ந வட்டதி. ஸசே பன உத³கேயேவ பததி, தே³வே அதிரேகசாதுமாஸம் ஓவட்டே²பி உத³கேயேவ உத³கஸ்ஸ பதிதத்தா வட்டதி. பாஸாணபிட்டி²யம் ஸோண்டி³ம் க²ணந்தி, ஸசே தத்த² பட²மமேவ ஸுகு²மரஜம் பததி, தஞ்சே தே³வேன ஓவட்ட²ம் ஹோதி, சாதுமாஸச்சயேன அகப்பியபத²வீஸங்க்²யம் க³ச்ச²தி. உத³கே பரியாதி³ண்ணே ஸோண்டி³ம் ஸோதே⁴ந்தேஹி தம் விகோபேதும் ந வட்டதி. ஸசே பட²மமேவ உத³கேன பூரதி, பச்சா² ரஜம் பததி, தம் விகோபேதும் வட்டதி. தத்த² ஹி தே³வே வஸ்ஸந்தேபி உத³கேயேவ உத³கம் பததீதி. பிட்டி²பாஸாணே ஸுகு²மரஜம் ஹோதி, தே³வே பு²ஸாயந்தே அல்லீயதி, தம்பி சாதுமாஸச்சயேன விகோபேதும் ந வட்டதி. ஸசே பன அகதபப்³பா⁴ரே வம்மிகோ உட்டி²தோ ஹோதி, யதா²ஸுக²ம் விகோபேதும் வட்டதி. ஸசே அப்³போ⁴காஸே உட்ட²ஹதி, ஓமகசாதுமாஸம் ஓவட்டோ²யேவ வட்டதி. ருக்கா²தீ³ஸு ஆருள்ஹஉபசிகாமத்திகாயபி ஏஸேவ நயோ. க³ண்டு³ப்பாத³கூ³த²மூஸிகுக்கரகோ³கண்டகாதீ³ஸுபி ஏஸேவ நயோ.

கோ³கண்டகோ நாம கா³வீனம் கு²ரச்சி²ன்னகத்³த³மோ வுச்சதி. ஸசே பன ஹேட்டி²மதலேன பூ⁴மிஸம்ப³ந்தோ⁴ ஹோதி, ஏகதி³வஸம்பி ந வட்டதி. கஸிதட்டா²னேபி நங்க³லச்சி²ன்னமத்திகாபிண்ட³ம் க³ண்ஹந்தஸ்ஸ ஏஸேவ நயோ. புராணஸேனாஸனம் ஹோதி அச்ச²த³னம் வா வினட்ட²ச்ச²த³னம் வா, அதிரேகசாதுமாஸம் ஓவட்ட²ம் ஜாதபத²வீஸங்க்²யமேவ க³ச்ச²தி. ததோ அவஸேஸம் ச²த³னிட்ட²கம் வா கோ³பானஸீஆதி³கம் உபகரணம் வா ‘‘இட்ட²கம் க³ண்ஹாமி கோ³பனஸிம் பி⁴த்திபாத³ம் பத³ரத்த²ரணம் பாஸாணத்த²ம்ப⁴ம் க³ண்ஹாமீ’’தி ஸஞ்ஞாய க³ண்ஹிதும் வட்டதி. தேன ஸத்³தி⁴ம் மத்திகா பததி, அனாபத்தி. பி⁴த்திமத்திகம் க³ண்ஹந்தஸ்ஸ பன ஆபத்தி. ஸசே யா யா அதிந்தா தம் தம் க³ண்ஹாதி, அனாபத்தி.

அந்தோகே³ஹே மத்திகாபுஞ்ஜோ ஹோதி, தஸ்மிம் ஏகதி³வஸம் ஓவட்டே² கே³ஹம் சா²தே³ந்தி, ஸசே ஸப்³போ³ திந்தோ சாதுமாஸச்சயேன ஜாதபத²வீயேவ. அத²ஸ்ஸ உபரிபா⁴கோ³யேவ திந்தோ, அந்தோ அதிந்தோ, யத்தகம் திந்தம் தம் கப்பியகாரகேஹி கப்பியவோஹாரேன அபனாமேத்வா ஸேஸம் யதா²ஸுக²ம் வளஞ்ஜேதும் வட்டதி. உத³கேன தேமேத்வா ஏகாப³த்³தா⁴யேவ ஹி ஜாதபத²வீ ஹோதி, ந இதராதி.

அப்³போ⁴காஸே மத்திகாபாகாரோ ஹோதி, அதிரேகசாதுமாஸம் சே ஓவட்டோ² ஜாதபத²வீஸங்க்²யம் க³ச்ச²தி. தத்த² லக்³க³பம்ஸும் பன அல்லஹத்தே²ன சு²பித்வா க³ஹேதும் வட்டதி. ஸசே இட்ட²கபாகாரோ ஹோதி, யேபு⁴ய்யேனகத²லட்டா²னே திட்ட²தி, யதா²ஸுக²ம் விகோபேதும் வட்டதி. அப்³போ⁴காஸே டி²தமண்ட³பத்த²ம்ப⁴ம் இதோ சிதோ ச ஸஞ்சாலேத்வா பத²விம் விகோபேந்தேன க³ஹேதும் ந வட்டதி, உஜுகமேவ உத்³த⁴ரிதும் வட்டதி. அஞ்ஞம்பி ஸுக்க²ருக்க²ம் வா ஸுக்க²கா²ணுகம் வா க³ண்ஹந்தஸ்ஸ ஏஸேவ நயோ. நவகம்மத்த²ம் பாஸாணம் வா ருக்க²ம் வா த³ண்ட³கேஹி உச்சாலேத்வா பவட்டேந்தா க³ச்ச²ந்தி, தத்த² பத²வீ பி⁴ஜ்ஜதி, ஸசே ஸுத்³த⁴சித்தா பவட்டேந்தி, அனாபத்தி. அத² பன தேன அபதே³ஸேன பத²விம் பி⁴ந்தி³துகாமாயேவ ஹோந்தி, ஆபத்தி. ஸாகா²தீ³னி கட்³ட⁴ந்தானம்பி பத²வியம் தா³ரூனி பா²லேந்தானம்பி ஏஸேவ நயோ.

பத²வியம் அட்டி²ஸூசிகண்டகாதீ³ஸுபி யம்கிஞ்சி ஆகோடேதும் வா பவேஸேதும் வா ந வட்டதி. பஸ்ஸாவதா⁴ராய வேகே³ன பத²விம் பி⁴ந்தி³ஸ்ஸாமீதி ஏவம் பஸ்ஸாவம்பி காதும் ந வட்டதி, கரோந்தஸ்ஸ பி⁴ஜ்ஜதி, ஆபத்தி. விஸமபூ⁴மிம் ஸமம் கரிஸ்ஸாமீதி ஸம்முஞ்ஜனியா க⁴ம்ஸிதும்பி ந வட்டதி, வத்தஸீஸேனேவ ஹி ஸம்மஜ்ஜிதப்³ப³ம். கேசி கத்தரயட்டி²யா பூ⁴மிம் கோட்டேந்தி, பாத³ங்கு³ட்ட²கேன விலிக²ந்தி, ‘‘சங்கமிதட்டா²னம் த³ஸ்ஸேஸ்ஸாமா’’தி புனப்புனம் பூ⁴மிம் பி⁴ந்த³ந்தா சங்கமந்தி, ஸப்³ப³ம் ந வட்டதி. வீரியஸம்பக்³க³ஹத்த²ம் பன ஸமணத⁴ம்மம் கரோந்தேன ஸுத்³த⁴சித்தேன சங்கமிதும் வட்டதி, ‘‘ஹத்த²ம் தோ⁴விஸ்ஸாமா’’தி பத²வியம் க⁴ம்ஸந்தி, ந வட்டதி. அக⁴ம்ஸந்தேன பன அல்லஹத்த²ம் பத²வியம் ட²பேத்வா ரஜம் க³ஹேதும் வட்டதி. கேசி கண்டு³கச்சு²ஆதீ³ஹி ஆபா³தி⁴கா சி²ன்னதடாதீ³ஸு அங்க³பச்சங்கா³னி க⁴ம்ஸந்தி ந வட்டதி.

87. க²ணதி வா க²ணாபேதி வாதி அந்தமஸோ பாத³ங்கு³ட்ட²கேனபி ஸம்மஜ்ஜனீஸலாகாயபி ஸயம் வா க²ணதி, அஞ்ஞேன வா க²ணாபேதி. பி⁴ந்த³தி வா பே⁴தா³பேதி வாதி அந்தமஸோ உத³கம்பி ச²ட்³டே³ந்தோ ஸயம் வா பி⁴ந்த³தி, அஞ்ஞேன வா பி⁴ந்தா³பேதி. த³ஹதி வா த³ஹாபேதி வாதி அந்தமஸோ பத்தம்பி பசந்தோ ஸயம் வா த³ஹதி, அஞ்ஞேன வா த³ஹாபேதி. யத்தகேஸு டா²னேஸு அக்³கி³ம் தே³தி வா தா³பேதி வா தத்தகானி பாசித்தியானி. பத்தம் பசந்தேனபி ஹி புப்³பே³ பக்கட்டா²னேயேவ ஹி பசிதப்³போ³. அத³ட்³டா⁴ய பத²வியா அக்³கி³ம் ட²பேதும் ந வட்டதி. பத்தபசனகபாலஸ்ஸ பன உபரி அக்³கி³ம் ட²பேதும் வட்டதி. தா³ரூனம் உபரி ட²பேதி, ஸோ அக்³கி³ தானி த³ஹந்தோ க³ந்த்வா பத²விம் த³ஹதி, ந வட்டதி. இட்ட²ககபாலாதீ³ஸுபி ஏஸேவ நயோ.

தத்ராபி ஹி இட்ட²காதீ³னம்யேவ உபரி ட²பேதும் வட்டதி. கஸ்மா? தேஸம் அனுபாதா³னத்தா. ந ஹி தானி அக்³கி³ஸ்ஸ உபாதா³னஸங்க்²யம் க³ச்ச²ந்தி. ஸுக்க²கா²ணுஸுக்க²ருக்கா²தீ³ஸுபி அக்³கி³ம் தா³தும் ந வட்டதி. ஸசே பன பத²விம் அப்பத்தமேவ நிப்³பா³பேத்வா க³மிஸ்ஸாமீதி தே³தி, வட்டதி. பச்சா² நிப்³பா³பேதும் ந ஸக்கோதி, அவிஸயத்தா அனாபத்தி. திணுக்கம் க³ஹேத்வா க³ச்ச²ந்தோ ஹத்தே² ட³ய்ஹமானே பூ⁴மியம் பாதேதி, அனாபத்தி. பதிதட்டா²னேயேவ உபாதா³னம் த³த்வா அக்³கி³ம் காதும் வட்டதீதி மஹாபச்சரியம் வுத்தம். த³ட்³ட⁴பத²வியா ச யத்தகம் டா²னம் உஸுமாய அனுக³தம், ஸப்³ப³ம் விகோபேதும் வட்டதீதி தத்தே²வ வுத்தம். யோ பன அஜானனகோ பி⁴க்கு² அரணீஸஹிதேன அக்³கி³ம் நிப்³ப³த்தேத்வா ஹத்தே²ன உக்கி²பித்வா ‘‘கிம் கரோமீ’’தி வத³தி, ‘‘ஜாலேஹீ’’தி வத்தப்³போ³, ‘‘ஹத்தோ² ட³ய்ஹதீ’’தி வத³தி, ‘‘யதா² ந ட³ய்ஹதி ததா² கரோஹீ’’தி வத்தப்³போ³. ‘‘பூ⁴மியம் பாதேஹீ’’தி பன ந வத்தப்³போ³. ஸசே ஹத்தே² ட³ய்ஹமானே பாதேதி ‘‘பத²விம் த³ஹிஸ்ஸாமீ’’தி அபாதிதத்தா அனாபத்தி. பதிதட்டா²னே பன அக்³கி³ம் காதும் வட்டதீதி குருந்தி³யம் வுத்தம்.

88. அனாபத்தி இமம் ஜானாதிஆதீ³ஸு ‘‘இமஸ்ஸ த²ம்ப⁴ஸ்ஸ ஆவாடம் ஜான, மஹாமத்திகம் ஜான, து²ஸமத்திகம் ஜான, மஹாமத்திகம் தே³ஹி, து²ஸமத்திகம் தே³ஹி, மத்திகம் ஆஹர, பம்ஸும் ஆஹர, மத்திகாய அத்தோ², பம்ஸுனா அத்தோ², இமஸ்ஸ த²ம்ப⁴ஸ்ஸ ஆவாடம் கப்பியம் கரோஹி, இமம் மத்திகம் கப்பியம் கரோஹி, இமம் பம்ஸும் கப்பியம் கரோஹீ’’தி ஏவமத்தோ² வேதி³தப்³போ³.

அஸஞ்சிச்சாதி பாஸாணருக்கா²தீ³னி வா பவட்டேந்தஸ்ஸ கத்தரத³ண்டே³ன வா ஆஹச்ச ஆஹச்ச க³ச்ச²ந்தஸ்ஸ பத²வீ பி⁴ஜ்ஜதி, ஸா ‘‘தேன பி⁴ந்தி³ஸ்ஸாமீ’’தி ஏவம் ஸஞ்சிச்ச அபி⁴ன்னத்தா அஸஞ்சிச்ச பி⁴ன்னா நாம ஹோதி. இதி அஸஞ்சிச்ச பி⁴ந்த³ந்தஸ்ஸ அனாபத்தி. அஸதியாதி அஞ்ஞவிஹிதோ கேனசி ஸத்³தி⁴ம் கிஞ்சி கதே²ந்தோ பாத³ங்கு³ட்ட²கேன வா கத்தரயட்டி²யா வா பத²விம் விலிக²ந்தோ திட்ட²தி, ஏவம் அஸதியா விலிக²ந்தஸ்ஸ வா பி⁴ந்த³ந்தஸ்ஸ வா அனாபத்தி. அஜானந்தஸ்ஸாதி அந்தோகே³ஹே ஓவட்ட²ம் ச²ன்னம் பத²விம் ‘‘அகப்பியபத²வீ’’தி ந ஜானாதி, ‘‘கப்பியபத²வீ’’தி ஸஞ்ஞாய விகோபேதி, ‘‘க²ணாமி பி⁴ந்தா³மி த³ஹாமீ’’தி வா ந ஜானாதி, கேவலம் ஸங்கோ³பனத்தா²ய க²ணித்தாதீ³னி வா ட²பேதி, ட³ய்ஹமானஹத்தோ² வா அக்³கி³ம் பாதேதி, ஏவம் அஜானந்தஸ்ஸ அனாபத்தி. ஸேஸம் உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி. கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பத²வீக²ணனஸிக்கா²பத³ம் த³ஸமம்.

ஸமத்தோ வண்ணனாக்கமேன முஸாவாத³வக்³கோ³ பட²மோ.