4. பவாரணாக்க²ந்த⁴கம்

அபா²ஸுகவிஹாரகதா²

209. பவாரணாக்க²ந்த⁴கே – நேவ ஆலபேய்யாம ந ஸல்லபேய்யாமாதி ஏத்த² ஆலாபோ நாம பட²மவசனம்; ஸல்லாபோ பச்சி²மவசனம். ஹத்த²விலங்க⁴கேனாதி ஹத்து²க்கே²பகேன. பஸுஸம்வாஸந்தி பஸூனம் விய ஸம்வாஸம். பஸவோபி ஹி அத்தனோ உப்பன்னம் ஸுக²து³க்க²ம் அஞ்ஞமஞ்ஞஸ்ஸ ந ஆரோசேந்தி, படிஸந்தா²ரம் ந கரோந்தி, ததா² ஏதேபி ந அகம்ஸு; தஸ்மா நேஸம் ஸம்வாஸோ ‘‘பஸுஸம்வாஸோ’’தி வுச்சதி. ஏஸ நயோ ஸப்³ப³த்த². ந பி⁴க்க²வே மூக³ப்³ப³தம் தித்தி²யஸமாதா³னந்தி ‘‘இமம் தேமாஸம் ந கதே²தப்³ப³’’ந்தி ஏவரூபம் வதஸமாதா³னம் ந காதப்³ப³ம்; அத⁴ம்மகதிகா ஹேஸா. அஞ்ஞமஞ்ஞானுலோமதாதி அஞ்ஞமஞ்ஞம் வத்தும் அனுலோமபா⁴வோ. ‘‘வத³ந்து மம் ஆயஸ்மந்தோ’’தி ஹி வத³ந்தம் ஸக்கா ஹோதி கிஞ்சி வத்தும்; ந இதரம். ஆபத்திவுட்டா²னதா வினயபுரேக்கா²ரதாதி ஆபத்தீஹி வுட்டா²னபா⁴வோ வினயம் புரதோ கத்வா சரணபா⁴வோ. ‘‘வத³ந்து மம் ஆயஸ்மந்தோ’’தி ஹி ஏவம் வத³ந்தோ ஆபத்தீஹி வுட்ட²ஹிஸ்ஸதி, வினயஞ்ச புரக்க²த்வா விஹரிஸ்ஸதீதி வுச்சதி.

210. ஸுணாது மே ப⁴ந்தே ஸங்கோ⁴ அஜ்ஜ பவாரணா, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யாதி அயம் ஸப்³ப³ஸங்கா³ஹிகா நாம ஞத்தி; ஏவஞ்ஹி வுத்தே தேவாசிகம் த்³வேவாசிகம் ஏகவாசிகஞ்ச பவாரேதும் வட்டதி. ஸமானவஸ்ஸிகம் ந வட்டதி. ‘‘தேவாசிகம் பவாரேய்யா’’தி வுத்தே பன தேவாசிகமேவ வட்டதி, அஞ்ஞம் ந வட்டதி. ‘‘த்³வேவாசிகம் பவாரேய்யா’’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஞ்ச ஸமானவஸ்ஸிகஞ்ச ந வட்டதி. ‘‘ஏகவாசிகம் பவாரேய்யா’’தி வுத்தே பன ஏகவாசிக-த்³வேவாசிக-தேவாசிகானி வட்டந்தி, ஸமானவஸ்ஸிகமேவ ந வட்டதி. ‘‘ஸமானவஸ்ஸிக’’ந்தி வுத்தே ஸப்³ப³ம் வட்டதி.

211. அச்ச²ந்தீதி நிஸின்னாவ ஹோந்தி, ந உட்ட²ஹந்தி. தத³மந்தராதி தத³ந்தரா; தாவதகம் காலந்தி அத்தோ².

பவாரணாபே⁴த³கதா²

212. சாதுத்³த³ஸிகா ச பன்னரஸிகா சாதி ஏத்த² சாதுத்³த³ஸிகாய ‘‘அஜ்ஜ பவாரணா சாதுத்³த³ஸீ’’தி ஏவம் புப்³ப³கிச்சம் காதப்³ப³ம், பன்னரஸிகாய ‘‘அஜ்ஜ பவாரணா பன்னரஸீ’’தி.

பவாரணகம்மேஸு ஸசே ஏகஸ்மிம் விஹாரே பஞ்சஸு பி⁴க்கூ²ஸு வஸந்தேஸு ஏகஸ்ஸ பவாரணம் ஆஹரித்வா சத்தாரோ க³ணஞத்திம் ட²பேத்வா பவாரேந்தி, சதூஸு தீஸு வா வஸந்தேஸு ஏகஸ்ஸ பவாரணம் ஆஹரித்வா தயோ வா த்³வே வா ஸங்க⁴ஞத்திம் ட²பேத்வா பவாரேந்தி, ஸப்³ப³மேதம் அத⁴ம்மேனவக்³க³ம் பவாரணகம்மம்.

ஸசே பன ஸப்³பே³பி பஞ்ச ஜனா ஏகதோ ஸன்னிபதித்வா க³ணஞத்திம் ட²பேத்வா பவாரேந்தி, சத்தாரோ தயோ வா த்³வே வா வஸந்தா ஏகதோ ஸன்னிபதித்வா ஸங்க⁴ஞத்திம் ட²பேத்வா பவாரேந்தி, ஸப்³ப³மேதம் அத⁴ம்மேனஸமக்³க³ம் பவாரணகம்மம்.

ஸசே பஞ்சஸு ஜனேஸு ஏகஸ்ஸ பவாரணம் ஆஹரித்வா சத்தாரோ ஸங்க⁴ஞத்திம் ட²பேத்வா பவாரேந்தி, சதூஸு தீஸு வா ஏகஸ்ஸ பவாரணம் ஆஹரித்வா தயோ வா த்³வே வா க³ணஞத்திம் ட²பேத்வா பவாரேந்தி, ஸப்³ப³மேதம் த⁴ம்மேனவக்³க³ம் பவாரணகம்மம்.

ஸசே பன ஸப்³பே³பி பஞ்ச ஜனா ஏகதோ ஸன்னிபதித்வா ஸங்க⁴ஞத்திம் ட²பேத்வா பவாரேந்தி, சத்தாரோ வா தயோ வா ஏகதோ ஸன்னிபதித்வா க³ணஞத்திம் ட²பேத்வா பவாரேந்தி, த்³வே அஞ்ஞமஞ்ஞம் பவாரேந்தி, ஏககோ வஸந்தோ அதி⁴ட்டா²னபவாரணம் கரோதி, ஸப்³ப³மேதம் த⁴ம்மேனஸமக்³க³ம் நாம பவாரணகம்மந்தி.

பவாரணாதா³னானுஜானனகதா²

213. தி³ன்னா ஹோதி பவாரணாதி ஏத்த² ஏவம் தி³ன்னாய பவாரணாய பவாரணாஹாரகேன ஸங்க⁴ம் உபஸங்கமித்வா ஏவம் பவாரேதப்³ப³ம் – ‘‘திஸ்ஸோ ப⁴ந்தே பி⁴க்கு² ஸங்க⁴ம் பவாரேதி தி³ட்டே²ன வா ஸுதேன வா பரிஸங்காய வா, வத³து தம் ப⁴ந்தே ஸங்கோ⁴ அனுகம்பம் உபாதா³ய, பஸ்ஸந்தோ படிகரிஸ்ஸதி. து³தியம்பி…பே… ததியம்பி ப⁴ந்தே திஸ்ஸோ பி⁴க்கு² ஸங்க⁴ம் பவாரேதி…பே… படிகரிஸ்ஸதீ’’தி. ஸசே பன வுட்³ட⁴தரோ ஹோதி, ‘‘ஆயஸ்மா ப⁴ந்தே திஸ்ஸோ’’தி வத்தப்³ப³ம்; ஏவஞ்ஹி தேன தஸ்ஸத்தா²ய பவாரிதம் ஹோதீதி.

பவாரணம் தே³ந்தேன ச²ந்த³ம்பி தா³துந்தி ஏத்த² ச²ந்த³தா³னம் உபோஸத²க்க²ந்த⁴கே வுத்தனயேனேவ வேதி³தப்³ப³ம். இதா⁴பி ச ச²ந்த³தா³னம் அவஸேஸகம்மத்தா²ய. தஸ்மா ஸசே பவாரணம் தே³ந்தோ ச²ந்த³ம் தே³தி, வுத்தனயேன ஆஹடாய பவாரணாய தேன ச பி⁴க்கு²னா ஸங்கே⁴ன ச பவாரிதமேவ ஹோதி. அத² பவாரணமேவ தே³தி, ந ச²ந்த³ம், தஸ்ஸ ச பவாரணாய ஆரோசிதாய ஸங்கே⁴ன ச பவாரிதே ஸப்³பே³ஸம் ஸுப்பவாரிதம் ஹோதி, அஞ்ஞம் பன கம்மம் குப்பதி. ஸசே ச²ந்த³மேவ தே³தி ந பவாரணம், ஸங்க⁴ஸ்ஸ பவாரணா ச ஸேஸகம்மானி ச ந குப்பந்தி, தேன பன பி⁴க்கு²னா அப்பவாரிதம் ஹோதி. பவாரணதி³வஸே பன ப³ஹிஸீமாயம் பவாரணம் அதி⁴ட்ட²ஹித்வா ஆக³தேனபி ச²ந்தோ³ தா³தப்³போ³, தேன ஸங்க⁴ஸ்ஸ பவாரணகம்மம் ந குப்பதி.

218. அஜ்ஜ மே பவாரணாதி ஏத்த² ஸசே சாதுத்³த³ஸிகா ஹோதி, ‘‘அஜ்ஜ மே பவாரணா சாதுத்³த³ஸீ’’தி ஸசே பன்னரஸிகா ‘‘அஜ்ஜ மே பவாரணா பன்னரஸீ’’தி ஏவம் அதி⁴ட்டா²தப்³ப³ம்.

219. தத³ஹுபவாரணாய ஆபத்திந்திஆதி³ வுத்தனயமேவ.

அனாபத்திபன்னரஸகாதி³கதா²

222. புன பவாரேதப்³ப³ந்தி புன புப்³ப³கிச்சம் கத்வா ஞத்திம் ட²பேத்வா ஸங்க⁴த்தே²ரதோ பட்டா²ய பவாரேதப்³ப³ம். ஸேஸம் உபோஸத²க்க²ந்த⁴கவண்ணனாயம் வுத்தனயேனேவ வேதி³தப்³ப³ம்.

228. ஆக³ந்துகேஹி ஆவாஸிகானம் அனுவத்திதப்³ப³ந்தி ‘‘அஜ்ஜ பவாரணா சாதுத்³த³ஸீ’’தி ஏததே³வ புப்³ப³கிச்சம் காதப்³ப³ம். பன்னரஸிகவாரேபி ஏஸேவ நயோ. ஆவாஸிகேஹி நிஸ்ஸீமம் க³ந்த்வா பவாரேதப்³ப³ந்தி அஸ்ஸாவஸானே அயம் பாளிமுத்தகவினிச்ச²யோ – ஸசே புரிமிகாய பஞ்ச பி⁴க்கூ² வஸ்ஸம் உபக³தா, பச்சி²மிகாயபி பஞ்ச, புரிமேஹி ஞத்திம் ட²பேத்வா பவாரிதே பச்சி²மேஹி தேஸம் ஸந்திகே பாரிஸுத்³தி⁴உபோஸதோ² காதப்³போ³, ந ஏகஸ்மிம் உபோஸத²க்³கே³ த்³வே ஞத்தியோ ட²பேதப்³பா³. ஸசேபி பச்சி²மிகாய உபக³தா சத்தாரோ தயோ த்³வே ஏகோ வா ஹோதி, ஏஸேவ நயோ. அத² புரிமிகாய சத்தாரோ பச்சி²மிகாயபி சத்தாரோ தயோ த்³வே ஏகோ வா ஏஸேவ நயோ. அதா²பி புரிமிகாய தயோ, பச்சி²மிகாயபி தயோ த்³வே வா, ஏஸேவ நயோ. இத³ஞ்ஹேத்த² லக்க²ணம் – ஸசே புரிமிகாய உபக³தேஹி பச்சி²மிகாய உபக³தா தோ²கதரா சேவ ஹோந்தி ஸமஸமா ச, ஸங்க⁴பவாரணாய க³ணம் பூரேந்தி, ஸங்க⁴பவாரணாவஸேன ஞத்தி ட²பேதப்³பா³தி.

ஸசே பன புரிமிகாய தயோ, பச்சி²மிகாய ஏகோ ஹோதி, தேன ஸத்³தி⁴ம் தே சத்தாரோ ஹோந்தி, சதுன்னம் ஸங்க⁴ஞத்திம் ட²பேத்வா பவாரேதும் ந வட்டதி. க³ணஞத்தியா பன ஸோ க³ணபூரகோ ஹோதி, தஸ்மா க³ணவஸேன ஞத்திம் ட²பேத்வா புரிமேஹி பவாரேதப்³ப³ம். இதரேன தேஸம் ஸந்திகே பாரிஸுத்³தி⁴உபோஸதோ² காதப்³போ³. ஸசே புரிமிகாய த்³வே பச்சி²மிகாய த்³வே வா ஏகோ வா ஹோதி, ஏஸேவ நயோ. ஸசே புரிமிகாய ஏகோ, பச்சி²மிகாயபி ஏகோ ஹோதி, ஏகேன ஏகஸ்ஸ ஸந்திகே பவாரேதப்³ப³ம், ஏகேன பாரிஸுத்³தி⁴உபோஸதோ² காதப்³போ³. ஸசே பன புரிமவஸ்ஸூபக³தேஹி பச்சி²மவஸ்ஸூபக³தா ஏகேனபி அதி⁴கதரா ஹோந்தி, பட²மம் பாதிமோக்க²ம் உத்³தி³ஸித்வா பச்சா² தோ²கதரேஹி தேஸம் ஸந்திகே பவாரேதப்³ப³ம்.

கத்திகசாதுமாஸினியா பவாரணாய பன ஸசே பட²மம் வஸ்ஸூபக³தேஹி மஹாபவாரணாய பவாரிதேஹி பச்சா² உபக³தா அதி⁴கதரா வா ஸமஸமா வா ஹோந்தி, பவாரணாஞத்திம் ட²பேத்வா பவாரேதப்³ப³ம். தேஹி பவாரிதே பச்சா² இதரேஹி பாரிஸுத்³தி⁴உபோஸதோ² காதப்³போ³. அத² மஹாபவாரணாய பவாரிதா ப³ஹூ பி⁴க்கூ² ஹோந்தி, பச்சி²மவஸ்ஸூபக³தா தோ²கதரா வா ஏகோ வா, பாதிமோக்கே² உத்³தி³ட்டே² பச்சா² தேஸம் ஸந்திகே தேன பவாரேதப்³ப³ம்.

233. ந ச பி⁴க்க²வே அப்பவாரணாய பவாரேதப்³ப³ம், அஞ்ஞத்ர ஸங்க⁴ஸாமக்³கி³யாதி ஏத்த² கோஸம்ப³கஸாமக்³கீ³ஸதி³ஸாவ ஸாமக்³கீ³ வேதி³தப்³பா³. ‘‘அஜ்ஜ பவாரணா ஸாமக்³கீ³’’தி ஏவஞ்சேத்த² புப்³ப³கிச்சம் காதப்³ப³ம். யே பன கிஸ்மிஞ்சிதே³வ அப்பமத்தகே பவாரணம் ட²பேத்வா ஸமக்³கா³ ஹோந்தி, தேஹி பவாரணாயமேவ பவாரணா காதப்³பா³. ஸாமக்³கீ³பவாரணம் கரோந்தேஹி ச பட²மபவாரணம் ட²பேத்வா பாடிபத³தோ பட்டா²ய யாவ கத்திகசாதுமாஸினீ புண்ணமா, ஏத்த²ந்தரே காதப்³பா³, ததோ பச்சா² வா புரே வா ந வட்டதி.

த்³வேவாசிகாதி³பவாரணாகதா²

234. த்³வேவாசிகம் பவாரேதுந்தி ஏத்த² ஞத்திம் ட²பேந்தேனாபி ‘‘யதி³ ஸங்க⁴ஸ்ஸ பத்தகல்லம் ஸங்கோ⁴ த்³வேவாசிகம் பவாரேய்யா’’தி வத்தப்³ப³ம், ஏகவாசிகே ‘‘ஏகவாசிகம் பவாரேய்யா’’தி, ஸமானவஸ்ஸிகேபி ‘‘ஸமானவஸ்ஸிகம் பவாரேய்யா’’தி வத்தப்³ப³ம், ஏத்த² ச ப³ஹூபி ஸமானவஸ்ஸா ஏகதோ பவாரேதும் லப⁴ந்தி.

பவாரணாட²பனகதா²

236. பா⁴ஸிதாய லபிதாய அபரியோஸிதாயாதி ஏத்த² ஸப்³ப³ஸங்கா³ஹிகஞ்ச புக்³க³லிகஞ்சாதி து³வித⁴ம் பவாரணாட²பனம். தத்த² ஸப்³ப³ஸங்கா³ஹிகே ‘‘ஸுணாது மே ப⁴ந்தே ஸங்கோ⁴…பே… ஸங்கோ⁴ தேவாசிகம் பவாரே’’ இதி ஸுகாரதோ யாவ ரேகாரோ, தாவ பா⁴ஸிதா லபிதா அபரியோஸிதாவ ஹோதி பவாரணா. ஏத்த²ந்தரே ஏகபதே³பி ட²பேந்தேன ட²பிதா ஹோதி பவாரணா. ‘ய்ய’காரே பன பத்தே பரியோஸிதா ஹோதி, தஸ்மா ததோ பட்டா²ய ட²பேந்தேன ட²பிதாபி அட்ட²பிதா ஹோதி. புக்³க³லிகட²பனே பன – ‘‘ஸங்க⁴ம் ப⁴ந்தே பவாரேமி…பே… ததியம்பி ப⁴ந்தே ஸங்க⁴ம் பவாரேமி தி³ட்டே²ன வா…பே… பஸ்ஸந்தோ படீ’’தி ஸங்காரதோ யாவ அயம் ஸப்³ப³பச்சி²மோ ‘டி’காரோ தாவ பா⁴ஸிதா லபிதா அபரியோஸிதாவ ஹோதி பவாரணா, ஏத்த²ந்தரே ஏகபதே³பி ட²பேந்தேன ட²பிதா ஹோதி பவாரணா, ‘‘கரிஸ்ஸாமீ’’தி வுத்தே பன பரியோஸிதா ஹோதி, தஸ்மா ‘‘கரிஸ்ஸாமீ’’தி ஏதஸ்மிம் பதே³ பத்தே ட²பிதாபி அட்ட²பிதா ஹோதி. ஏஸ நயோ த்³வேவாசிகஏகவாசிகஸமானவஸ்ஸிகாஸுபி. ஏதாஸுபி ஹி டிகாராவஸானம்யேவ ட²பனகே²த்தந்தி.

237. அனுயுஞ்ஜியமானோதி ‘‘கிம்ஹி நம் ட²பேஸீ’’தி பரதோ வுத்தனயேன புச்சி²யமானோ. ஓமத்³தி³த்வாதி ஏதானி ‘‘அலம் பி⁴க்கு² மா ப⁴ண்ட³ன’’ந்திஆதீ³னி வசனானி வத்வா, வசனோமத்³த³னா ஹி இத⁴ ஓமத்³த³னாதி அதி⁴ப்பேதா. அனுத்³த⁴ம்ஸிதம் படிஜானாதீதி ‘‘அமூலகேன பாராஜிகேன அனுத்³த⁴ம்ஸிதோ அயம் மயா’’தி ஏவம் படிஜானாதி. யதா²த⁴ம்மந்தி ஸங்கா⁴தி³ஸேஸேன அனுத்³த⁴ம்ஸனே பாசித்தியம்; இதரேஹி து³க்கடம். நாஸேத்வாதி லிங்க³னாஸனாய நாஸேத்வா.

238. ஸாஸ்ஸ யதா²த⁴ம்மம் படிகதாதி ஏத்தகமேவ வத்வா பவாரேதா²தி வத்தப்³பா³, அஸுகா நாம ஆபத்தீதி இத³ம் பன ந வத்தப்³ப³ம், ஏதஞ்ஹி கலஹஸ்ஸ முக²ம் ஹோதி.

வத்து²ட²பனாதி³கதா²

239. இத³ம் வத்து² பஞ்ஞாயதி ந புக்³க³லோதி ஏத்த² சோரா கிர அரஞ்ஞவிஹாரே போக்க²ரணிதோ மச்சே² க³ஹேத்வா பசித்வா கா²தி³த்வா அக³மம்ஸு. ஸோ தம் விப்பகாரம் தி³ஸ்வா ஆராமே வா கிஞ்சி து⁴த்தேன கதம் விப்பகாரம் தி³ஸ்வா ‘‘பி⁴க்கு²ஸ்ஸ இமினா கம்மேன ப⁴விதப்³ப³’’ந்தி ஸல்லக்கே²த்வா ஏவமாஹ. வத்து²ம் ட²பேத்வா ஸங்கோ⁴ பவாரேய்யாதி ‘‘யதா³ தம் புக்³க³லம் ஜானிஸ்ஸாம, ததா³ நம் சோதே³ஸ்ஸாம. இதா³னி பன ஸங்கோ⁴ பவாரேதூ’’தி அயமேத்த² அத்தோ². இதா³னேவ நம் வதே³ஹீதி ஸசே இமினா வத்து²னா கஞ்சி புக்³க³லம் பரிஸங்கஸி, இதா³னேவ நம் அபதி³ஸாஹீதி அத்தோ². ஸசே அபதி³ஸதி, தம் புக்³க³லம் அனுவிஜ்ஜித்வா பவாரேதப்³ப³ம்; நோ சே அபதி³ஸதி, உபபரிக்கி²த்வா ஜானிஸ்ஸாமாதி பவாரேதப்³ப³ம்.

அயம் புக்³க³லோ பஞ்ஞாயதி ந வத்தூ²தி ஏத்த² ஏகோ பி⁴க்கு² மாலாக³ந்த⁴விலேபனேஹி சேதியம் வா பூஜேஸி, அரிட்ட²ம் வா பிவி, தஸ்ஸ தத³னுரூபோ ஸரீரக³ந்தோ⁴ அஹோஸி; ஸோ தம் க³ந்த⁴ம் ஸந்தா⁴ய ‘‘இமஸ்ஸ பி⁴க்கு²னோ ஏவரூபோ ஸரீரக³ந்தோ⁴’’தி வத்து²ம் பகாஸேந்தோ ஏவமாஹ. புக்³க³லம் ட²பேத்வா ஸங்கோ⁴ பவாரேய்யாதி ஏதம் புக்³க³லம் ட²பேத்வா ஸங்கோ⁴ பவாரேது. இதா³னேவ நம் வதே³ஹீதி யம் த்வம் புக்³க³லம் ட²பேஸி, தஸ்ஸ புக்³க³லஸ்ஸ இதா³னேவ தோ³ஸம் வத³. ஸசே அயமஸ்ஸ தோ³ஸோதி வத³தி, தம் புக்³க³லம் ஸோதே⁴த்வா பவாரேதப்³ப³ம். அத² நாஹம் ஜானாமீதி வத³தி, உபபரிக்கி²த்வா ஜானிஸ்ஸாமாதி பவாரேதப்³ப³ம்.

இத³ம் வத்து² ச புக்³க³லோ ச பஞ்ஞாயதீதி புரிமனயேனேவ சோரேஹி மச்சே² க³ஹேத்வா பசித்வா பரிபு⁴த்தட்டா²னஞ்ச க³ந்தா⁴தீ³ஹி நஹானட்டா²னஞ்ச தி³ஸ்வா ‘‘பப்³ப³ஜிதஸ்ஸ கம்ம’’ந்தி மஞ்ஞமானோ ஸோ ஏவமாஹ. இதா³னேவ நம் வதே³ஹீதி இதா³னேவ தேன வத்து²னா பரிஸங்கிதம் புக்³க³லம் வதே³ஹி; இத³ம் பன உப⁴யம்பி தி³ஸ்வா தி³ட்ட²காலதோ பட்டா²ய வினிச்சி²னித்வாவ பவாரேதப்³ப³ம். கல்லம் வசனாயாதி கல்லம் சோத³னாய; சோதே³தும் வட்டதீதி அத்தோ². கஸ்மா? பவாரணதோ புப்³பே³ அவினிச்சி²தத்தா பச்சா² ச தி³ஸ்வா சோதி³தத்தாதி. உக்கோடனகம் பாசித்தியந்தி இத³ஞ்ஹி உப⁴யம் புப்³பே³ பவாரணாய தி³ஸ்வா வினிச்சி²னித்வாவ பி⁴க்கூ² பவாரேந்தி, தஸ்மா புன தம் உக்கோடேந்தஸ்ஸ ஆபத்தி.

ப⁴ண்ட³னகாரகவத்து²கதா²

240. த்³வே தயோ உபோஸதே² சாதுத்³த³ஸிகே காதுந்தி ஏத்த² சதுத்த²பஞ்சமா த்³வே, ததியோ பன பகதியாபி சதுத்³த³ஸிகோயேவாதி. தஸ்மா ததியசதுத்தா² வா ததியசதுத்த²பஞ்சமா வா த்³வே தயோ சாதுத்³த³ஸிகா காதப்³பா³. அத² சதுத்தே² கதே ஸுணந்தி, பஞ்சமோ சாதுத்³த³ஸிகோ காதப்³போ³. ஏவம்பி த்³வே சாதுத்³த³ஸிகா ஹோந்தி. ஏவம் கரோந்தா ப⁴ண்ட³னகாரகானம் தேரஸே வா சாதுத்³த³ஸே வா இமே பன்னரஸீபவாரணம் பவாரேஸ்ஸந்தி. ஏவம் பவாரேந்தேஹி ச ப³ஹிஸீமாய ஸாமணேரே ட²பேத்வா ‘‘தே ஆக³ச்ச²ந்தீ’’தி ஸுத்வா லஹும் லஹும் ஸன்னிபதித்வா பவாரேதப்³ப³ம். ஏதமத்த²ம் த³ஸ்ஸேதும் ‘‘தே சே பி⁴க்க²வே…பே… ததா² கரோந்தூ’’தி வுத்தம்.

அஸம்விஹிதாதி ஸம்வித³ஹனரஹிதா ஆக³மனஜானனத்தா²ய அகதஸம்வித³ஹிதா; அவிஞ்ஞாதாவ ஹுத்வாதி அத்தோ². தேஸம் விக்கி²த்வாதி ‘‘கிலந்தத்த² முஹுத்தம் விஸ்ஸமதா²’’திஆதி³னா நயேன ஸம்மோஹம் கத்வாதி அத்தோ². நோ சே லபே⁴தா²தி நோ சே ப³ஹிஸீமம் க³ந்தும் லபே⁴ய்யும்; ப⁴ண்ட³னகாரகானம் ஸாமணேரேஹி ச த³ஹரபி⁴க்கூ²ஹி ச நிரந்தரம் அனுப³த்³தா⁴வ ஹோந்தி. ஆக³மே ஜுண்ஹேதி யம் ஸந்தா⁴ய ஆக³மே ஜுண்ஹே பவாரேய்யாமாதி ஞத்திம் ட²பேஸும், தஸ்மிம் ஆக³மே ஜுண்ஹே கோமுதி³யா சாதுமாஸினியா அகாமா பவாரேதப்³ப³ம், அவஸ்ஸம் பவாரேதப்³ப³ம், ந ஹி தம் அதிக்கமித்வா பவாரேதும் லப்³ப⁴தி. தேஹி சே பி⁴க்க²வே பி⁴க்கூ²ஹி பவாரியமானேதி ஏவம் சாதுமாஸினியா பவாரியமானே.

பவாரணாஸங்க³ஹகதா²

241. அஞ்ஞதரோ பா²ஸுவிஹாரோதி தருணஸமதோ² வா தருணவிபஸ்ஸனா வா. பரிபா³ஹிரா ப⁴விஸ்ஸாமாதி அனிப³த்³த⁴ரத்திட்டா²னதி³வாட்டா²னாதி³பா⁴வேன பா⁴வனானுயோக³ம் ஸம்பாதே³தும் அஸக்கோந்தா பா³ஹிரா ப⁴விஸ்ஸாம. ஸப்³பே³ஹேவ ஏகஜ்ஜ²ம் ஸன்னிபதிதப்³ப³ந்தி இமினா ச²ந்த³தா³னம் படிக்கி²பதி. பி⁴ன்னஸ்ஸ ஹி ஸங்க⁴ஸ்ஸ ஸமக்³க³கரணகாலே திணவத்தா²ரகஸமதே² இமஸ்மிஞ்ச பவாரணாஸங்க³ஹேதி இமேஸு தீஸு டா²னேஸு ச²ந்த³ம் தா³தும் ந வட்டதி. பவாரணாஸங்க³ஹோ நாமாயம் விஸ்ஸட்ட²கம்மட்டா²னானம் தா²மக³தஸமத²விபஸ்ஸனானம் ஸோதாபன்னாதீ³னஞ்ச ந தா³தப்³போ³. தருணஸமத²விபஸ்ஸனாலாபி⁴னோ பன ஸப்³பே³ வா ஹோந்து, உபட்³டா⁴ வா, ஏகபுக்³க³லோ வா ஏகஸ்ஸபி வஸேன தா³தப்³போ³யேவ. தி³ன்னே பவாரணாஸங்க³ஹே அந்தோவஸ்ஸே பரிஹாரோவ ஹோதி, ஆக³ந்துகா தேஸம் ஸேனாஸனம் க³ஹேதும் ந லப⁴ந்தி. தேஹிபி சி²ன்னவஸ்ஸேஹி ந ப⁴விதப்³ப³ம், பவாரேத்வா பன அந்தராபி சாரிகம் பக்கமிதும் லப⁴ந்தீதி த³ஸ்ஸனத்த²ம் ‘‘தேஹி சே பி⁴க்க²வே’’திஆதி³மாஹ. ஸேஸம் ஸப்³ப³த்த² உத்தானமேவாதி.

பவாரணாக்க²ந்த⁴கவண்ணனா நிட்டி²தா.