5. சம்மக்க²ந்த⁴கம்

ஸோணகோளிவிஸவத்து²கதா²

242. சம்மக்க²ந்த⁴கே – இஸ்ஸரியாதி⁴பச்சந்தி இஸ்ஸரபா⁴வேன ச அதி⁴பதிபா⁴வேன ச ஸமன்னாக³தம். ரஜ்ஜந்தி ராஜபா⁴வம், ரஞ்ஞா கத்தப்³ப³கிச்சம் வா. ஸோணோ நாம கோளிவிஸோதி ஏத்த² ஸோணோதி தஸ்ஸ நாமம்; கோளிவிஸோதி கோ³த்தம். பாத³தலேஸு லோமானீதி ரத்தேஸு பாத³தலேஸு ஸுகு²மானி அஞ்ஜனவண்ணானி கம்மசித்தீகதானி லோமானி ஜாதானி ஹோந்தி. ஸோ கிர புப்³பே³ அஸீதிஸஹஸ்ஸானம் புரிஸானம் ஜேட்ட²புரிஸோ ஹுத்வா தேஹி ஸத்³தி⁴ம் பச்சேகபு³த்³த⁴ஸ்ஸ வஸனட்டா²னே பண்ணஸாலம் கத்வா அத்தனோ ஸஸ்ஸிரிகம் உண்ணபாவாரகம் பச்சேகபு³த்³த⁴ஸ்ஸ பாதே³ஹி அக்கமனட்டா²னே பாத³புஞ்ச²னிகம் கத்வா ட²பேஸி. தேமாஸம் பன ஸப்³பே³வ பச்சேகபு³த்³த⁴ம் உபட்ட²ஹிம்ஸு. அயம் தஸ்ஸ ச தேஸஞ்ச அஸீதியா கா³மிகஸஹஸ்ஸானம் புப்³ப³யோகோ³.

அஸீதிகா³மிகஸஹஸ்ஸானீதி தேஸு கா³மேஸு வஸந்தானம் குலபுத்தானம் அஸீதிஸஹஸ்ஸானி. கேனசிதே³வ கரணீயேனாதி கேனசி கரணீயேன விய; ந பனஸ்ஸ கிஞ்சி கரணீயம் அத்தி² அஞ்ஞத்ர தஸ்ஸ த³ஸ்ஸனா. ராஜா கிர தானிபி அஸீதிகுலபுத்தஸஹஸ்ஸானி ஸன்னிபாதாபேந்தோ ‘‘ஏவம் அபரிஸங்கந்தோ ஸோணோ ஆக³மிஸ்ஸதீ’’தி ஸன்னிபாதாபேஸி. தி³ட்ட²த⁴ம்மிகே அத்தே²தி ‘‘கஸிவணிஜ்ஜாதீ³னி த⁴ம்மேன கத்தப்³பா³னி, மாதாபிதரோ த⁴ம்மேன போஸிதப்³பா³’’தி ஏவமாதி³னா நயேன இத⁴லோகஹிதே அத்தே² அனுஸாஸித்வா. ஸோ நோ ப⁴க³வாதி ஸோ அம்ஹாகம் ப⁴க³வா தும்ஹே ஸம்பராயிகே அத்தே² அனுஸாஸிஸ்ஸதீதி அத்தோ².

ப⁴க³வந்தம் படிவேதே³மீதி ப⁴க³வந்தம் ஜானாபேமி. பாடிகாய நிமுஜ்ஜித்வாதி ஸோபானஸ்ஸ ஹேட்டா² அட்³ட⁴சந்த³பாஸாணே நிமுஜ்ஜித்வா. யஸ்ஸ தா³னி ப⁴ந்தே ப⁴க³வா காலம் மஞ்ஞதீதி யஸ்ஸ தேஸம் ஹிதகிரியத்த²ஸ்ஸ ப⁴க³வா காலம் ஜானாதி. விஹாரபச்சா²யாயந்தி விஹாரபச்சந்தே சா²யாயம். ஸமன்னாஹரந்தீதி பஸாத³வஸேன புனப்புனம் மனஸி கரோந்தி. பி⁴ய்யோஸோமத்தாயாதி பி⁴ய்யோஸோமத்தாய புன விஸிட்ட²தரம் த³ஸ்ஸேஹீதி அத்தோ². அந்தரதா⁴யதீதி அத³ஸ்ஸனம் ஹோதி.

ஸோணஸ்ஸ பப்³ப³ஜ்ஜாகதா²

243. லோஹிதேன பு²டோ ஹோதீதி லோஹிதேன மக்கி²தோ ஹோதி. க³வாகா⁴தனந்தி யத்த² கா³வோ ஹஞ்ஞந்தி, தாதி³ஸோதி அத்தோ². குஸலோ நாம வீணாய வாத³னகுஸலோ. வீணாய தந்திஸ்ஸரேதி வீணாய தந்தியா ஸரே. அச்சாயதாதி அதிஆயதா க²ரமுச்சி²தா. ஸரவதீதி ஸரஸம்பன்னா. கம்மஞ்ஞாதி கம்மக்க²மா. அதிஸிதி²லாதி மந்த³முச்ச²னா. ஸமே கு³ணே பதிட்டி²தாதி மஜ்ஜி²மே ஸரே ட²பேத்வா முச்சி²தா. வீரியஸமதம் அதி⁴ட்ட²ஹாதி வீரியஸம்பயுத்தஸமதம் அதி⁴ட்டா²ஹி, வீரியம் ஸமதே²ன யோஜேஹீதி அத்தோ². இந்த்³ரியானஞ்ச ஸமதம் படிவிஜ்ஜா²தி ஸத்³தா⁴தீ³னம் இந்த்³ரியானம் ஸமதம் ஸமபா⁴வம். தத்த² ஸத்³த⁴ம் பஞ்ஞாய, பஞ்ஞஞ்ச ஸத்³தா⁴ய, வீரியம் ஸமாதி⁴னா, ஸமாதி⁴ஞ்ச வீரியேன யோஜயமானோ இந்த்³ரியானம் ஸமதம் படிவிஜ்ஜ². தத்த² ச நிமித்தம் க³ண்ஹாஹீதி தஸ்மிம் ஸமதே² ஸதி, யேன ஆதா³ஸே முக²பி³ம்பே³னேவ நிமித்தேன உப்பஜ்ஜிதப்³ப³ம், தம் ஸமத²னிமித்தம் விபஸ்ஸனானிமித்தம் மக்³க³னிமித்தம் ப²லனிமித்தஞ்ச க³ண்ஹாஹி, நிப்³ப³த்தேஹீதி அத்தோ².

244. அஞ்ஞம் ப்³யாகரேய்யந்தி அரஹா அஹந்தி ஜானாபேய்யம். ச² டா²னானீதி ச² காரணானி. அதி⁴முத்தோ ஹோதீதி படிவிஜ்ஜி²த்வா பச்சக்க²ம் கத்வா டி²தோ ஹோதி. நேக்க²ம்மாதி⁴முத்தோதிஆதி³ ஸப்³ப³ம் அரஹத்தவஸேன வுத்தம். அரஹத்தஞ்ஹி ஸப்³ப³கிலேஸேஹி நிக்க²ந்தத்தா நேக்க²ம்மம், தேஹேவ பவிவித்தத்தா பவிவேகோ, ப்³யாபஜ்ஜாபா⁴வதோ அப்³யாபஜ்ஜம், உபாதா³னஸ்ஸ க²யந்தே உப்பன்னத்தா உபாதா³னக்க²யோ, தண்ஹாக்க²யந்தே உப்பன்னத்தா தண்ஹக்க²யோ, ஸம்மோஹாபா⁴வதோ அஸம்மோஹோதி ச வுச்சதி.

கேவலம் ஸத்³தா⁴மத்தகந்தி படிவேத⁴ரஹிதம் கேவலம் படிவேத⁴பஞ்ஞாய அஸம்மிஸ்ஸம் ஸத்³தா⁴மத்தகம். படிசயந்தி புனப்புனம் கரணேன வுட்³டி⁴ம். வீதராக³த்தாதி மக்³க³ப்படிவேதே⁴ன ராக³ஸ்ஸ விக³தத்தாயேவ நேக்க²ம்மஸங்கா²தம் அரஹத்தம் படிவிஜ்ஜி²த்வா டி²தோ ஹோதி. ப²லஸமாபத்திவிஹாரேனேவ விஹரதி, தன்னின்னமானஸோயேவ ஹோதீதி அத்தோ². ஸேஸபதே³ஸுபி ஏஸேவ நயோ.

லாப⁴ஸக்காரஸிலோகந்தி சதுபச்சயலாப⁴ஞ்ச தேஸம்யேவ ஸுகதபா⁴வஞ்ச வண்ணப⁴ணனஞ்ச. நிகாமயமானோதி இச்ச²மானோ பத்த²யமானோ. பவிவேகாதி⁴முத்தோதி விவேகே அதி⁴முத்தோ அஹந்தி ஏவம் அரஹத்தம் ப்³யாகரோதீதி அத்தோ².

ஸீலப்³ப³தபராமாஸந்தி ஸீலஞ்ச வதஞ்ச பராமஸித்வா க³ஹிதக³ஹணமத்தம். ஸாரதோ பச்சாக³ச்ச²ந்தோதி ஸாரபா⁴வேன ஜானந்தோ. அப்³யாபஜ்ஜாதி⁴முத்தோதி அப்³யாபஜ்ஜம் அரஹத்தம் ப்³யாகரோதீதி அத்தோ². இமினாவ நயேன ஸப்³ப³வாரேஸு அத்தோ² வேதி³தப்³போ³.

பு⁴ஸாதி ப³லவந்தோ. நேவஸ்ஸ சித்தம் பரியாதி³யந்தீதி ஏதஸ்ஸ கீ²ணாஸவஸ்ஸ சித்தம் க³ஹேத்வா டா²தும் ந ஸக்கோந்தி. அமிஸ்ஸீகதந்தி அமிஸ்ஸகதம். கிலேஸாஹி ஆரம்மணேன ஸத்³தி⁴ம் சித்தம் மிஸ்ஸம் கரோந்தி, தேஸம் அபா⁴வா அமிஸ்ஸீகதம். டி²தந்தி பதிட்டி²தம். ஆனேஞ்ஜப்பத்தந்தி அசலனப்பத்தம். வயஞ்சஸ்ஸானுபஸ்ஸதீதி தஸ்ஸ சித்தஸ்ஸ உப்பாத³ம்பி வயம்பி பஸ்ஸதி.

நேக்க²ம்மம் அதி⁴முத்தஸ்ஸாதி அரஹத்தம் படிவிஜ்ஜி²த்வா டி²தஸ்ஸ. ஸேஸபதே³ஹிபி அரஹத்தமேவ கதி²தம். உபாதா³னக்க²யஸ்ஸாதி உபயோக³த்தே² ஸாமிவசனம். அஸம்மோஹஞ்ச சேதஸோதி சித்தஸ்ஸ ச அஸம்மோஹம் அதி⁴முத்தஸ்ஸ. தி³ஸ்வா ஆயதனுப்பாத³ந்தி ஆயதனானம் உப்பாத³ஞ்ச வயஞ்ச தி³ஸ்வா. ஸம்மா சித்தம் விமுச்சதீதி ஸம்மா ஹேதுனா நயேன இமாய விபஸ்ஸனாய படிபத்தியா ப²லஸமாபத்திவஸேன சித்தம் விமுச்சதி, நிப்³பா³னாரம்மணே அதி⁴முச்சதி. ஸந்தசித்தஸ்ஸாதி நிப்³பு³தசித்தஸ்ஸ. தாதி³னோதி இட்டா²னிட்டே² அனுனயபடிகே⁴ஹி அகம்பியத்தா தாதீ³, தஸ்ஸ தாதி³னோ.

தி³கு³ணாதி³உபாஹனபடிக்கே²பகதா²

245. அஞ்ஞம் ப்³யாகரோந்தீதி அரஹத்தம் ப்³யாகரோந்தி. அத்தோ² ச வுத்தோதி யேன அரஹாதி ஞாயதி, ஸோ அத்தோ² வுத்தோ. ஸுத்தத்தோ² பன ஸுத்தவண்ணனதோயேவ க³ஹேதப்³போ³. அத்தா ச அனுபனீதோதி அஹம் அரஹாதி ஏவம் ப்³யஞ்ஜனவஸேன அத்தா ந உபனீதோ. அத² ச பனிதே⁴கச்சே மோக⁴புரிஸாதி அஞ்ஞே பன துச்ச²புரிஸா ஹஸமானா விய அஸந்தமேவ அஞ்ஞம் வசனமத்தேன ஸந்தம் கத்வா ப்³யாகரோந்தி. ஏகபலாஸிகந்தி ஏகபடலம். அஸீதிஸகடவாஹேதி ஏத்த² த்³வே ஸகடபா⁴ரா ஏகோ வாஹோதி வேதி³தப்³போ³. ஸத்தஹத்தி²கஞ்ச அனீகந்தி ஏத்த² ச² ஹத்தி²னியோ ஏகோ ச ஹத்தீ²தி இத³மேகம் அனீகம். ஈதி³ஸானி ஸத்த அனீகானி ஸத்தஹத்தி²கம் அனீகம் நாம. தி³கு³ணாதி த்³விபடலா. திகு³ணாதி திபடலா. க³ணங்கு³ணூபாஹனாதி சதுபடலதோ பட்டா²ய வுச்சதி.

ஸப்³ப³னீலிகாதி³படிக்கே²பகதா²

246. ஸப்³ப³னீலிகாதி ஸப்³பா³வ நீலிகா. ஏஸ நயோ ஸப்³ப³பீதிகாதீ³ஸுபி. தத்த² ச நீலிகா உமாபுப்ப²வண்ணா ஹோதி, பீதிகா கணிகாரபுப்ப²வண்ணா, லோஹிதிகா ஜயஸுமனபுப்ப²வண்ணா, மஞ்ஜிட்டி²கா மஞ்ஜிட்ட²வண்ணா ஏவ, கண்ஹா அத்³தா³ரிட்ட²கவண்ணா, மஹாரங்க³ரத்தா ஸதபதி³பிட்டி²வண்ணா, மஹானாமரத்தா ஸம்பி⁴ன்னவண்ணா ஹோதி பண்டு³பலாஸவண்ணா. குருந்தி³யம் பன ‘‘பது³மபுப்ப²வண்ணா’’தி வுத்தா. ஏதாஸு யம்கிஞ்சி லபி⁴த்வா ரஜனம் சோளகேன புஞ்சி²த்வா வண்ணம் பி⁴ந்தி³த்வா தா⁴ரேதும் வட்டதி. அப்பமத்தகேபி பி⁴ன்னே வட்டதியேவ.

நீலகவத்³தி⁴காதி யாஸம் வத்³தா⁴யேவ நீலா. ஏஸேவ நயோ ஸப்³ப³த்த². ஏதாபி வண்ணபே⁴த³ம் கத்வா தா⁴ரேதப்³பா³. க²ல்லகப³த்³தா⁴தி பண்ஹிபிதா⁴னத்த²ம் தலே க²ல்லகம் ப³ந்தி⁴த்வா கதா. புடப³த்³தா⁴தி யோனகஉபாஹனா வுச்சதி, யா யாவஜங்க⁴தோ ஸப்³ப³பாத³ம் படிச்சா²தே³தி. பாலிகு³ண்டி²மாதி பலிகு³ண்டி²த்வா கதா; யா உபரி பாத³மத்தமேவ படிச்சா²தே³தி, ந ஜங்க⁴ம். தூலபுண்ணிகாதி தூலபிசுனா பூரேத்வா கதா. தித்திரபத்திகாதி தித்திரபத்தஸதி³ஸா விசித்தப³த்³தா⁴. மேண்ட³விஸாணவத்³தி⁴காதி கண்ணிகட்டா²னே மேண்ட³கஸிங்க³ஸண்டா²னே வத்³தே⁴ யோஜேத்வா கதா. அஜவிஸாணவத்³தி⁴காதீ³ஸுபி ஏஸேவ நயோ. விச்சி²காளிகாபி தத்தே²வ விச்சி²கனங்கு³ட்ட²ஸண்டா²னே வத்³தே⁴ யோஜேத்வா கதா. மோரபிஞ்ச²பரிஸிப்³பி³தாதி தலேஸு வா வத்³தே⁴ஸு வா மோரபிஞ்சே²ஹி ஸுத்தகஸதி³ஸேஹி பரிஸிப்³பி³தா. சித்ராதி விசித்ரா; ஏதாஸு யம்கிஞ்சி லபி⁴த்வா, ஸசே தானி க²ல்லகாதீ³னி அபனேத்வா ஸக்கா ஹோந்தி வளஞ்ஜிதும், வளஞ்ஜேதப்³பா³. தேஸு பன ஸதி வளஞ்ஜந்தஸ்ஸ து³க்கடம். ஸீஹசம்மபரிக்க²டா நாம பரியந்தேஸு சீவரே அனுவாதம் விய ஸீஹசம்மம் யோஜேத்வா கதா. லூவகசம்மபரிக்க²டாதி பக்கி²பி³ளாலசம்மபரிக்க²டா. ஏதாஸுபி யா காசி லபி⁴த்வா தம் சம்மம் அபனேத்வா தா⁴ரேதப்³பா³.

247. ஓமுக்கந்தி படிமுஞ்சித்வா அபனீதம். நவாதி அபரிபு⁴த்தா.

அஜ்ஜா²ராமேஉபாஹனபடிக்கே²பகதா²

248. அபி⁴ஜீவனிகஸ்ஸாதி யேன ஸிப்பேன அபி⁴ஜீவந்தி, ஜீவிகம் கப்பேந்தி, தஸ்ஸ காரணாதி அத்தோ². இத⁴ கோ² தம் பி⁴க்க²வேதி ஏத்த² தந்தி நிபாதமத்தம், இத⁴ கோ² பி⁴க்க²வே ஸோபே⁴ய்யாதா²தி அத்தோ². யம் தும்ஹேதி யே தும்ஹே. அத² வா யதி³ தும்ஹேதி வுத்தம் ஹோதி. யதி³ஸத்³த³ஸ்ஸ ஹி அத்தே² அயம் நிபாதோ. ஆசரியேஸூதிஆதி³ம்ஹி பப்³ப³ஜ்ஜாசரியோ, உபஸம்பதா³சரியோ, நிஸ்ஸயாசாரியோ, உத்³தே³ஸாசரியோதி இமே சத்தாரோபி இத⁴ ஆசரியா ஏவ. அவஸ்ஸிகஸ்ஸ ச²ப்³ப³ஸ்ஸோ ஆசரியமத்தோ. ஸோ ஹி சதுவஸ்ஸகாலே தம் நிஸ்ஸாய வச்ச²தி; ஏவம் ஏகவஸ்ஸஸ்ஸ ஸத்தவஸ்ஸோ, து³வஸ்ஸஸ்ஸ அட்ட²வஸ்ஸோ, திவஸ்ஸஸ்ஸ நவவஸ்ஸோ, சதுவஸ்ஸஸ்ஸ த³ஸவஸ்ஸோ. இமேபி ஆசரியமத்தா ஏவ. உபஜ்ஜா²யஸ்ஸ ஸந்தி³ட்ட²ஸம்ப⁴த்தா பன ஸஹாயபி⁴க்கூ², யே வா பன கேசி த³ஸஹி வஸ்ஸேஹி மஹந்ததரா தே ஸப்³பே³பி உபஜ்ஜா²யமத்தா நாம. ஏத்தகேஸு பி⁴க்கூ²ஸு அனுபாஹனேஸு சங்கமந்தேஸு ஸஉபாஹனஸ்ஸ சங்கமதோ ஆபத்தி.

249. பாத³கீ²லாபா³தோ⁴ நாம பாத³தோ கீ²லஸதி³ஸம் மம்ஸம் நிக்க²ந்தம் ஹோதி.

251. திணபாது³காதி யேன கேனசி திணேன கதபாது³கா. ஹிந்தாலபாது³காதி க²ஜ்ஜூரீபத்தேஹி கதபாது³கா; ஹிந்தாலபத்தேஹிபி ந வட்டதியேவ. கமலபாது³காதி கமலதிணம் நாம அத்தி², தேன கதபாது³கா; உஸீரபாது³காதிபி வத³ந்தி. கம்ப³லபாது³காதி உண்ணாஹி கதபாது³கா. அஸங்கமனீயாதி பூ⁴மியம் ஸுப்பதிட்டி²தா நிச்சலா அஸம்ஹாரியா.

252. அங்க³ஜாதம் சு²பந்தீதி அங்க³ஜாதேனேவ அங்க³ஜாதம் சு²பந்தி. ஓகா³ஹேத்வா மாரேந்தீதி அந்தோ உத³கே த³ள்ஹம் க³ஹேத்வா மாரேந்தி.

யானாதி³படிக்கே²பகதா²

253. இத்தி²யுத்தேனாதி தே⁴னுயுத்தேன. புரிஸந்தரேனாதி புரிஸஸாரதி²னா. புரிஸயுத்தேனாதி கோ³ணயுத்தேன. இத்த²ந்தரேனாதி இத்தி²ஸாரதி²னா. க³ங்கா³மஹியாயாதி க³ங்கா³மஹகீளிகாய. புரிஸயுத்தம் ஹத்த²வட்டகந்தி ஏத்த² புரிஸயுத்தம் இத்தி²ஸாரதி² வா ஹோது, புரிஸஸாரதி² வா வட்டதி. ஹத்த²வட்டகம் பன இத்தி²யோ வா வட்டேந்து புரிஸா வா, வட்டதியேவ. யானுக்³கா⁴தேனாதி யானம் அபி⁴ருஹந்தஸ்ஸ ஸப்³போ³ காயோ சலதி தப்பச்சயா. ஸிவிகந்தி பீட²கஸிவிகம். பாடங்கிந்தி வம்ஸே லக்³கே³த்வா கதம் படபோதலிகம்.

254. உச்சாஸயனமஹாஸயனனானீதி ஏத்த² உச்சாஸயனந்தி பமாணாதிக்கந்தம் மஞ்சம். மஹாஸயனந்தி அகப்பியத்த²ரணம், ஆஸந்தீ³ஆதீ³ஸு ஆஸந்தீ³தி பமாணாதிக்கந்தாஸனம். பல்லங்கோதி பாதே³ஸு வாளரூபானி ட²பேத்வா கதோ. கோ³னகோதி தீ³க⁴லோமகோ மஹாகோஜவோ; சதுரங்கு³லாதி⁴கானி கிர தஸ்ஸ லோமானி. சித்தகாதி வானசித்ரோ உண்ணாமயத்த²ரணோ. படிகாதி உண்ணாமயோ ஸேதத்த²ரணோ. படலிகாதி க⁴னபுப்ப²கோ உண்ணாமயலோஹிதத்த²ரணோ; யோ ஆமலகபட்டோதிபி வுச்சதி. தூலிகாதி பகதிதூலிகாயேவ. விகதிகாதி ஸீஹப்³யக்³கா⁴தி³ரூபவிசித்ரோ உண்ணாமயத்த²ரணோ. உத்³த³லோமீதி ஏகதோ உக்³க³தலோமம் உண்ணாமயத்த²ரணம்; ‘‘உத்³த⁴லோமீ’’திபி பாடோ². ஏகந்தலோமீதி உப⁴தோ உக்³க³தலோமம் உண்ணாமயத்த²ரணம். கட்டிஸ்ஸந்தி ரதனபரிஸிப்³பி³தம் கோஸேய்யகட்டிஸ்ஸமயம் பச்சத்த²ரணம். கோஸேய்யந்தி ரதனபரிஸிப்³பி³தம் கோஸியஸுத்தமயம் பச்சத்த²ரணம்; ஸுத்³த⁴கோஸேய்யம் பன வட்டதி.

குத்தகந்தி ஸோளஸன்னம் நாடகித்தீ²னம் ட²த்வா நச்சனயோக்³க³ம் உண்ணாமயஅத்த²ரணம். ஹத்த²த்த²ரஅஸ்ஸத்த²ராதி ஹத்தி²அஸ்ஸபிட்டீ²ஸு அத்த²ரணகஅத்த²ரணா ஏவ. ரத²த்த²ரேபி ஏஸேவ நயோ. அஜினப்பவேணீதி அஜினசம்மேஹி மஞ்சப்பமாணேன ஸிப்³பி³த்வா கதா பவேணீ. கத³லீமிக³பவரபச்சத்த²ரணந்தி கத³லீமிக³சம்மம் நாம அத்தி², தேன கதம் பவரபச்சத்த²ரணம், உத்தமபச்சத்த²ரணந்தி அத்தோ². தம் கிர ஸேதவத்த²ஸ்ஸ உபரி கத³லீமிக³சம்மம் பத்த²ரித்வா ஸிப்³பி³த்வா கரோந்தி. ஸஉத்தரச்ச²த³ந்தி ஸஹ உத்தரச்ச²த³னேன; உபரிப³த்³தே⁴ன ரத்தவிதானேன ஸத்³தி⁴ந்தி அத்தோ². ஸேதவிதானம்பி ஹேட்டா² அகப்பியபச்சத்த²ரணே ஸதி ந வட்டதி, அஸதி பன வட்டதி. உப⁴தோலோஹிதகூபதா⁴னந்தி ஸீஸூபதா⁴னஞ்ச பாதூ³பதா⁴னஞ்சாதி மஞ்சஸ்ஸ உப⁴தோலோஹிதகூபதா⁴னம், ஏதம் ந கப்பதி. யம் பன ஏகமேவ உபதா⁴னம் உபோ⁴ஸு பஸ்ஸேஸு ரத்தம் வா ஹோதி, பது³மவண்ணம் வா சித்ரம் வா, ஸசே பமாணயுத்தம், வட்டதி. மஹாஉபதா⁴னம் பன படிக்கி²த்தம்.

ஸப்³ப³சம்மபடிக்கே²பாதி³கதா²

255. தீ³பிச்சா²போதி தீ³பிபோதகோ. ஓகு³ம்பி²யந்தீதி பி⁴த்தித³ண்ட³காதீ³ஸு வேடே²த்வா ப³ந்த⁴ந்தி.

256. அபி⁴னிஸீதி³துந்தி அபி⁴னிஸ்ஸாய நிஸீதி³தும்; அபஸ்ஸயம் கத்வா நிஸீதி³துந்தி அத்தோ². கி³லானேன பி⁴க்கு²னா ஸஉபாஹனேனாதி ஏத்த² கி³லானோ நாம யோ ந ஸக்கோதி அனுபாஹனோ கா³மம் பவிஸிதும்.

257. குரரக⁴ரேதி ஏவம்னாமகே நக³ரே; ஏதேனஸ்ஸ கோ³சரகா³மோ வுத்தோ. பபதகே பப்³ப³தேதி பபதனாமகே பப்³ப³தே; ஏதேனஸ்ஸ நிவாஸனட்டா²னம் வுத்தம். ஸோணோதி தஸ்ஸ நாமம். கோடிஅக்³க⁴னகம் பன கண்ணபிளந்த⁴னகம் தா⁴ரேதி, தஸ்மா ‘‘குடிகண்ணோ’’தி வுச்சதி; கோடிகண்ணோதி அத்தோ². பாஸாதி³கந்தி பஸாத³ஜனகம். பஸாத³னீயந்தி இத³ம் தஸ்ஸேவ அத்த²வேவசனம். உத்தமத³மத²ஸமத²ந்தி உத்தமம் த³மத²ஞ்ச ஸமத²ஞ்ச பஞ்ஞஞ்ச ஸமாதி⁴ஞ்ச காயூபஸமஞ்ச சித்தூபஸமஞ்சாதிபி அத்தோ². த³ந்தந்தி ஸப்³பே³ஸம் விஸூகாயிகவிப்ப²ந்தி³தானம் உபச்சி²ன்னத்தா த³ந்தம்; கீ²ணகிலேஸந்தி அத்தோ². கு³த்தந்தி ஸம்வரகு³த்தியா கு³த்தம். ஸந்திந்த்³ரியந்தி யதிந்த்³ரியம். நாக³ந்தி ஆகு³விரஹிதம். திண்ணம் மே வஸ்ஸானம் அச்சயேனாதி மம பப்³ப³ஜ்ஜாதி³வஸதோ பட்டா²ய திண்ணம் வஸ்ஸானம் அச்சயேன. உபஸம்பத³ம் அலத்த²ந்தி அஹம் உபஸம்பத³ம் அலபி⁴ம். கண்ஹுத்தராதி கண்ஹமத்திகுத்தரா; உபரி வட்³டி⁴தகண்ஹமத்திகாதி அத்தோ². கோ³கண்டகஹதாதி கு³ன்னம் கு²ரேஹி அக்கந்தபூ⁴மிதோ ஸமுட்டி²தேஹி கோ³கண்டகேஹி உபஹதா. தே கிர கோ³கண்டகே ஏகபடலிகா உபாஹனா ரக்கி²தும் ந ஸக்கோந்தி; ஏவம் க²ரா ஹோந்தி. ஏரகூ³, மோரகூ³, மஜ்ஜாரூ, ஜந்தூதி இமா சதஸ்ஸோபி திணஜாதியோ; ஏதேஹி கடஸாரகே ச தட்டிகாயோ ச கரோந்தி. ஏத்த² ஏரகூ³தி ஏரகதிணம்; தம் ஓளாரிகம். மோரகூ³திணம் தம்ப³ஸீஸம் முது³கம் ஸுக²ஸம்ப²ஸ்ஸம், தேன கததட்டிகா நிபஜ்ஜித்வா வுட்டி²தமத்தே புன உத்³து⁴மாதா ஹுத்வா திட்ட²தி. மஜ்ஜாருனா ஸாடகேபி கரோந்தி. ஜந்துஸ்ஸ மணிஸதி³ஸோ வண்ணோ ஹோதி. ஸேனாஸனம் பஞ்ஞபேஸீதி பி⁴ஸிம் வா கடஸாரகம் வா பஞ்ஞபேஸி; பஞ்ஞபேத்வா ச பன ஸோணஸ்ஸ ஆரோசேதி – ‘‘ஆவுஸோ ஸத்தா² தயா ஸத்³தி⁴ம் ஏகாவாஸே வஸிதுகாமோ, க³ந்த⁴குடியம்யேவ தே ஸேனாஸனம் பஞ்ஞத்த’’ந்தி.

258. அயம் க்²வஸ்ஸ காலோதி அயம் கோ² காலோ ப⁴வேய்ய. பரித³ஸ்ஸீதி பரித³ஸ்ஸேஸி. ‘‘இத³ஞ்சித³ஞ்ச வதே³ய்யாஸீதி யம் மே உபஜ்ஜா²யோ ஜானாபேஸி, தஸ்ஸ அயம் காலோ ப⁴வேய்ய, ஹந்த³ தா³னி ஆரோசேமி தம் ஸாஸன’’ந்தி அயமேத்த² அதி⁴ப்பாயோ.

259. வினயத⁴ரபஞ்சமேனாதி அனுஸ்ஸாவனாசரியபஞ்சமேன. அனுஜானாமி பி⁴க்க²வே ஸப்³ப³பச்சந்திமேஸு ஜனபதே³ஸு கு³ணங்கு³ணூபாஹனந்தி ஏத்த² மனுஸ்ஸசம்மம் ட²பேத்வா யேன கேனசி சம்மேன உபாஹனா வட்டதி. உபாஹனகோஸகஸத்த²கோஸககுஞ்சிககோஸகேஸுபி ஏஸேவ நயோ. சம்மானி அத்த²ரணானீதி ஏத்த² பன யம்கிஞ்சி ஏளகசம்மம் அஜசம்மஞ்ச அத்த²ரித்வா நிபஜ்ஜிதும் வா நிஸீதி³தும் வா வட்டதி. மிக³சம்மே ஏணீமிகோ³ வாதமிகோ³ பஸத³மிகோ³ குரங்க³மிகோ³ மிக³மாதுகோ ரோஹிதமிகோ³தி ஏதேஸம்யேவ சம்மானி வட்டந்தி. அஞ்ஞேஸம் பன –

மக்கடோ காளஸீஹோ ச, ஸரபோ⁴ கத³லீமிகோ³;

யே ச வாளமிகா³ கேசி, தேஸம் சம்மம் ந வட்டதி.

தத்த² வாளமிகா³தி ஸீஹப்³யக்³க⁴அச்ச²தரச்சா²; ந கேவலஞ்ச ஏதேஸம்யேவ, யேஸம் பன சம்மம் வட்டதீதி வுத்தம், தே ட²பேத்வா அவஸேஸா அந்தமஸோ கோ³மஹிம்ஸஸஸபி³ளாராத³யோபி ஸப்³பே³ இமஸ்மிம் அத்தே² வாளமிகா³த்வேவ வேதி³தப்³பா³. ஏதேஸஞ்ஹி ஸப்³பே³ஸம் சம்மம் ந வட்டதி. ந தாவ தம் க³ணனூபக³ம் யாவ ந ஹத்த²ம் க³ச்ச²தீதி யாவ ஆஹரித்வா வா ந தி³ன்னம், தும்ஹாகம் ப⁴ந்தே சீவரம் உப்பன்னந்தி பஹிணித்வா வா நாரோசிதம், தாவ க³ணனம் ந உபேதி. ஸசே அனதி⁴ட்டி²தம், வட்டதி; அதி⁴ட்டி²தஞ்ச க³ணனம் ந உபேதீதி அத்தோ². யதா³ பன ஆனேத்வா வா தி³ன்னம் ஹோதி, உப்பன்னந்தி வா ஸுதம், ததோ பட்டா²ய த³ஸாஹமேவ பரிஹாரம் லப⁴தீதி.

சம்மக்க²ந்த⁴கவண்ணனா நிட்டி²தா.