10. கோஸம்ப³கக்க²ந்த⁴கம்

கோஸம்ப³கவிவாத³கதா²

451. கோஸம்ப³கக்க²ந்த⁴கே – தம் பி⁴க்கு²ம் ஆபத்தியா அத³ஸ்ஸனே உக்கி²பிம்ஸூதி ஏத்த² அயமனுபுப்³பி³கதா² – த்³வே கிர பி⁴க்கூ² ஏகஸ்மிம் ஆவாஸே வஸந்தி வினயத⁴ரோ ச ஸுத்தந்திகோ ச. தேஸு ஸுத்தந்திகோ பி⁴க்கு² ஏகதி³வஸம் வச்சகுடிம் பவிட்டோ² ஆசமனஉத³காவஸேஸம் பா⁴ஜனே ட²பேத்வாவ நிக்க²மி. வினயத⁴ரோ பச்சா² பவிட்டோ² தம் உத³கம் தி³ஸ்வா நிக்க²மித்வா தம் பி⁴க்கு²ம் புச்சி² – ‘‘ஆவுஸோ, தயா இத³ம் உத³கம் ட²பித’’ந்தி? ‘‘ஆமாவுஸோ’’தி. ‘‘கிம் த்வம் ஏத்த² ஆபத்திபா⁴வம் ந ஜானாஸீ’’தி? ‘‘ஆம, ந ஜானாமீ’’தி. ‘‘ஹோதி, ஆவுஸோ ஏத்த² ஆபத்தீ’’தி? ‘‘ஸசே ஹோதி, தே³ஸிஸ்ஸாமீ’’தி. ‘‘ஸசே பன தே, ஆவுஸோ, அஸஞ்சிச்ச அஸதியா கதம், நத்தி² ஆபத்தீ’’தி. ஸோ தஸ்ஸா ஆபத்தியா அனாபத்திதி³ட்டி² அஹோஸி.

வினயத⁴ரோபி அத்தனோ நிஸ்ஸிதகானம் ‘‘அயம் ஸுத்தந்திகோ ஆபத்திம் ஆபஜ்ஜமானோபி ந ஜானாதீ’’தி ஆரோசேஸி. தே தஸ்ஸ நிஸ்ஸிதகே தி³ஸ்வா ‘‘தும்ஹாகம் உபஜ்ஜா²யோ ஆபத்திம் ஆபஜ்ஜித்வாபி ஆபத்திபா⁴வம் ந ஜானாதீ’’தி ஆஹம்ஸு. தே க³ந்த்வா அத்தனோ உபஜ்ஜா²யஸ்ஸ ஆரோசேஸும். ஸோ ஏவமாஹ – ‘‘அயம் வினயத⁴ரோ புப்³பே³ அனாபத்தீ’’தி வத்வா ‘‘இதா³னி ஆபத்தீ’’தி வத³தி. முஸாவாதீ³ ஏஸோதி. தே க³ந்த்வா ‘‘தும்ஹாகம் உபஜ்ஜா²யோ முஸாவாதீ³’’தி ஏவம் அஞ்ஞமஞ்ஞம் கலஹம் வட்³ட⁴யிம்ஸு. ததோ வினயத⁴ரோ ஓகாஸம் லபி⁴த்வா தஸ்ஸ ஆபத்தியா அத³ஸ்ஸனே உக்கே²பனீயகம்மம் அகாஸி. தேன வுத்தம் – ‘‘தம் பி⁴க்கு²ம் ஆபத்தியா அத³ஸ்ஸனே உக்கி²பிம்ஸூ’’தி.

453. பி⁴ன்னோ பி⁴க்கு²ஸங்கோ⁴ பி⁴ன்னோ பி⁴க்கு²ஸங்கோ⁴தி ஏத்த² ந தாவ பி⁴ன்னோ; அபிச கோ² யதா² தே³வே வுட்டே² ‘‘இதா³னி ஸஸ்ஸம் நிப்ப²ன்ன’’ந்தி வுச்சதி, அவஸ்ஸஞ்ஹி தம் நிப்ப²ஜ்ஜிஸ்ஸதி, ஏவமேவ இமினா காரணேன ஆயதிம் அவஸ்ஸம் பி⁴ஜ்ஜிஸ்ஸதி, ஸோ ச கோ² கலஹவஸேன ந ஸங்க⁴பே⁴த³வஸேன, தஸ்மா ‘‘பி⁴ன்னோ’’தி வுத்தம். ஸம்ப⁴மஅத்த²வஸேன சேத்த² ஆமேடி³தம் வேதி³தப்³ப³ம்.

454. ஏதமத்த²ம் பா⁴ஸித்வா உட்டா²யாஸனா பக்காமீதி கஸ்மா ஏவம் பா⁴ஸித்வா பக்காமி? ஸசே ஹி ப⁴க³வா உக்கே²பகே வா ‘‘அகாரணே தும்ஹேஹி ஸோ பி⁴க்கு² உக்கி²த்தோ’’தி வதே³ய்ய, உக்கி²த்தானுவத்தகே வா ‘‘தும்ஹே ஆபத்திம் ஆபன்னா’’தி வதே³ய்ய, ‘‘ஏதேஸம் ப⁴க³வா பக்கோ², ஏதேஸம் ப⁴க³வா பக்கோ²’’தி வத்வா ஆகா⁴தம் ப³ந்தே⁴ய்யும், தஸ்மா தந்திமேவ ட²பேத்வா ஏதமத்த²ம் பா⁴ஸித்வா உட்டா²யாஸனா பக்காமி.

455. அத்தனா வா அத்தானந்தி ஏத்த² யோ ஸங்கே⁴ன உக்கே²பனீயகதானம் அத⁴ம்மவாதீ³னம் பக்கே² நிஸின்னோ ‘‘தும்ஹே கிம் ப⁴ணதா²’’தி தேஸஞ்ச இதரேஸஞ்ச லத்³தி⁴ம் ஸுத்வா ‘‘இமே அத⁴ம்மவாதி³னோ, இதரே த⁴ம்மவாதி³னோ’’தி சித்தம் உப்பாதே³தி, அயம் தேஸம் மஜ்ஜே² நிஸின்னோவ தேஸம் நானாஸம்வாஸகோ ஹோதி, கம்மம் கோபேதி, இதரேஸம்பி ஹத்த²பாஸம் அனாக³தத்தா கோபேதி. ஏவம் அத்தனா வா அத்தானம் நானாஸம்வாஸகம் கரோதி. ஸமானஸம்வாஸகந்தி ஏத்தா²பி யோ அத⁴ம்மவாதீ³னம் பக்கே² நிஸின்னோ ‘‘அத⁴ம்மவாதி³னோ இமே, இதரே த⁴ம்மவாதி³னோ’’தி தேஸம் மஜ்ஜ²ம் பவிஸதி, யத்த² வா தத்த² வா பன பக்கே² நிஸின்னோ ‘‘இமே த⁴ம்மவாதி³னோ’’தி க³ண்ஹாதி, அயம் அத்தனா வா அத்தானம் ஸமானஸம்வாஸகம் கரோதீதி வேதி³தப்³போ³.

456. காயகம்மம் வசீகம்மந்தி ஏத்த² காயேன பஹரந்தா காயகம்மம் உபத³ம்ஸேந்தி, ப²ருஸம் வத³ந்தா வசீகம்மம் உபத³ம்ஸேந்தீதி வேதி³தப்³பா³. ஹத்த²பராமாஸம் கரோந்தீதி கோத⁴வஸேன ஹத்தே²ஹி அஞ்ஞமஞ்ஞம் பராமஸனம் கரோந்தி. அத⁴ம்மியாயமானேதி அத⁴ம்மியானி கிச்சானி குருமானே. அஸம்மோதி³காவத்தமானாயாதி அஸம்மோதி³காய வத்தமானாய. அயமேவ வா பாடோ². ஸம்மோத³னகதா²ய அவத்தமானாயாதி அத்தோ². ஏத்தாவதா ந அஞ்ஞமஞ்ஞந்தி ஏத்த² த்³வே பந்தியோ கத்வா உபசாரம் முஞ்சித்வா நிஸீதி³தப்³ப³ம், த⁴ம்மியாயமானே பன ஸம்மோதி³காய வத்தமானாய ஆஸனந்தரிகாய நிஸீதி³தப்³ப³ம், ஏகேகம் ஆஸனம் அந்தரம் கத்வா நிஸீதி³தப்³ப³ம்.

457-458. மா ப⁴ண்ட³னந்திஆதீ³ஸு ‘‘அகத்தா²’’தி பாட²ஸேஸம் க³ஹேத்வா ‘‘மா ப⁴ண்ட³னம் அகத்தா²’’தி ஏவமத்தோ² த³ட்ட²ப்³போ³. அத⁴ம்மவாதீ³தி உக்கி²த்தானுவத்தகேஸு அஞ்ஞதரோ. அயம் பன பி⁴க்கு² ப⁴க³வதோ அத்த²காமோ, அயம் கிரஸ்ஸ அதி⁴ப்பாயோ ‘‘இமே பி⁴க்கூ² கோதா⁴பி⁴பூ⁴தா ஸத்து² வசனம் ந க³ண்ஹந்தி, மா ப⁴க³வா ஏதே ஓவத³ந்தோ கிலமித்தா²’’தி தஸ்மா ஏவமாஹ. ப⁴க³வா பன ‘‘பச்சா²பி ஸஞ்ஞம் லபி⁴த்வா ஓரமிஸ்ஸந்தீ’’தி தேஸம் அனுகம்பாய அதீதவத்து²ம் ஆஹரித்வா கதே²ஸி. தத்த² அனத்த²தோதி அனத்தோ² அதோ; ஏதஸ்மா மே புரிஸா அனத்தோ²தி வுத்தம் ஹோதி. அத² வா அனத்த²தோதி அனத்த²தோ³. ஸேஸம் பாகடமேவ.

464. புது²ஸத்³தோ³திஆதி³கா³தா²ஸு பன புது² மஹா ஸத்³தோ³ அஸ்ஸாதி புது²ஸத்³தோ³. ஸமஜனோதி ஸமானோ ஏகஸதி³ஸோ ஜனோ; ஸப்³போ³ சாயம் ப⁴ண்ட³னகாரகோஜனோ ஸமந்ததோ ஸத்³த³னிச்சா²ரணேன புது²ஸத்³தோ³ சேவ ஸதி³ஸோ சாதி வுத்தம் ஹோதி. ந பா³லோ கோசி மஞ்ஞதா²தி தத்த² கோசி ஏகோபி ‘‘அஹம் பா³லோ’’தி ந மஞ்ஞித்த²; ஸப்³பே³பி பண்டி³தமானினோயேவ. நாஞ்ஞம் பி⁴ய்யோ அமஞ்ஞருந்தி கோசி ஏகோபி ‘‘அஹம் பா³லோ’’தி ச ந மஞ்ஞித்த²; பி⁴ய்யோ ச ஸங்க⁴ஸ்மிம் பி⁴ஜ்ஜமானே அஞ்ஞம்பி ஏகம் ‘‘மய்ஹம் காரணா ஸங்கோ⁴ பி⁴ஜ்ஜதீ’’தி இத³ம் காரணம் ந மஞ்ஞித்தா²தி அத்தோ².

பரிமுட்டா²தி பரிமுட்ட²ஸ்ஸதினோ. வாசாகோ³சரபா⁴ணினோதி ராகாரஸ்ஸ ரஸ்ஸாதே³ஸோ கதோ, வாசாகோ³சரா ந ஸதிபட்டா²னாதி³கோ³சரா. பா⁴ணினோ ச கத²ம் பா⁴ணினோ? யாவிச்ச²ந்தி முகா²யாமம் யாவ முக²ம் பஸாரேதும் இச்ச²ந்தி, தாவ பஸாரேத்வா பா⁴ணினோ, ஏகோபி ஸங்க⁴கா³ரவேன முக²ஸங்கோசம் ந கரோதீதி அத்தோ². யேன நீதாதி யேன கலஹேன இமம் நில்லஜ்ஜபா⁴வம் நீதா. ந தம் விதூ³தி ந தம் ஜானந்தி, ‘‘ஏவம் ஸாதீ³னவோ அய’’ந்தி.

யே ச தம் உபனய்ஹந்தீதி தம் ‘‘அக்கோச்சி² மம், அவதி⁴ ம’’ந்திஆதி³கம் ஆகாரம் யே ச உபனய்ஹந்தி. ஸனந்தனோதி போராணோ.

பரேதி பண்டி³தே ட²பேத்வா ததோ அஞ்ஞே ப⁴ண்ட³னகாரகா பரே நாம. தே ஏத்த² ஸங்க⁴மஜ்ஜே² கலஹம் கரோந்தா ‘‘மயம் யமாமஸே உபயமாம; ஸததம் ஸமிதம் மச்சுஸந்திகம் க³ச்சா²மா’’தி ந ஜானந்தி. யே ச தத்த² விஜானந்தீதி யே தத்த² பண்டி³தா ‘‘மயம் மச்சுஸமீபம் க³ச்சா²மா’’தி விஜானந்தி. ததோ ஸம்மந்தி மேத⁴கா³தி ஏவஞ்ஹி தே ஜானந்தா யோனிஸோமனஸிகாரம் உப்பாதே³த்வா மேத⁴கா³னம் கலஹானம் வூபஸமாய படிபஜ்ஜந்தி.

அட்டி²ச்சி²ன்னாதி அயம் கா³தா² ப்³ரஹ்மத³த்தஞ்ச தீ³கா⁴வுகுமாரஞ்ச ஸந்தா⁴ய வுத்தா. தேஸம்பி ஹோதி ஸங்க³தி, கஸ்மா தும்ஹாகம் ந ஹோதி, யேஸம் வோ நேவ மாதாபிதூனம் அட்டீ²னி சி²ன்னானி, ந பாணா ஹதா, ந க³வாஸ்ஸத⁴னானி ஹடானீதி.

ஸசே லபே⁴தா²திஆதி³கா³தா² பண்டி³தஸஹாயஸ்ஸ ச பா³லஸஹாயஸ்ஸ ச வண்ணாவண்ணதீ³பனத்த²ம் வுத்தா. அபி⁴பு⁴ய்ய ஸப்³பா³னி பரிஸ்ஸயானீதி பாகடபரிஸ்ஸயே ச படிச்ச²ன்னபரிஸ்ஸயே ச அபி⁴ப⁴வித்வா தேன ஸத்³தி⁴ம் அத்தமனோ ஸதிமா சரேய்ய.

ராஜாவ ரட்ட²ம் விஜிதந்தி யதா² அத்தனோ விஜிதம் ரட்ட²ம் மஹாஜனகராஜா ச அரிந்த³மமஹாராஜா ச பஹாய ஏககா சரிம்ஸு; ஏவம் சரேய்யாதி அத்தோ². மாதங்க³ரஞ்ஞேவ நாகோ³தி மாதங்கோ³ அரஞ்ஞே நாகோ³வ. மாதங்கோ³தி ஹத்தீ² வுச்சதி; நாகோ³தி மஹந்தாதி⁴வசனமேதம். யதா² ஹி மாதுபோஸகோ மாதங்க³னாகோ³ அரஞ்ஞே ஏகோ சரி, ந ச பாபானி அகாஸி. யதா² ச பாலிலேய்யகோ, ஏவம் ஏகோ சரே, ந ச பாபானி கயிராதி வுத்தம் ஹோதி.

பாலிலேய்யகக³மனகதா²

467. பாலிலேய்யகே விஹரதி ரக்கி²தவனஸண்டே³தி பாலிலேய்யகம் உபனிஸ்ஸாய ரக்கி²தவனஸண்டே³ விஹரதி. ஹத்தி²னாகோ³தி மஹாஹத்தீ². ஹத்தி²கலபே⁴ஹீதி ஹத்தி²போதகேஹி. ஹத்தி²ச்சா²பேஹீதி கீ²ரூபகேஹி த³ஹரபோதகேஹி. சி²ன்னக்³கா³னீதி தேஹி புரதோ புரதோ க³ச்ச²ந்தேஹி சி²ன்னக்³கா³னி கா²யிதாவஸேஸானி கா²ணுஸதி³ஸானி திணானி கா²த³தி. ஓப⁴க்³கோ³ப⁴க்³க³ந்தி தேன ஹத்தி²னாகே³ன உச்சட்டா²னதோ ப⁴ஞ்ஜித்வா ப⁴ஞ்ஜித்வா பாதிதம். அஸ்ஸ ஸாகா²ப⁴ங்க³ந்தி ஏதஸ்ஸ ஸந்தகம் ஸாகா²ப⁴ங்க³ம் தே கா²த³ந்தி. ஆவிலானீதி தேஹி பட²மதரம் ஓதரித்வா பிவந்தேஹி ஆலுலிதானி கத்³த³மோத³கானி பிவதி. ஓகா³ஹாதி தித்த²தோ.

நாக³ஸ்ஸ நாகே³னாதி ஹத்தி²னாக³ஸ்ஸ பு³த்³த⁴னாகே³ன. ஈஸாத³ந்தஸ்ஸாதி ரத²ஈஸாஸதி³ஸத³ந்தஸ்ஸ. யதே³கோ ரமதீ வனேதி யஸ்மா பு³த்³த⁴னாகோ³ விய அயம்பி ஹத்தி²னாகோ³ ஏகோ பவிவித்தோ வனே ரமதி; தஸ்மாஸ்ஸ நாக³ஸ்ஸ நாகே³ன சித்தம் ஸமேதி, ஏகீபா⁴வரதியா ஏகஸதி³ஸம் ஹோதீதி அத்தோ².

யதா²பி⁴ரந்தம் விஹரித்வாதி ஏத்த² தேமாஸம் ப⁴க³வா தத்த² விஹாஸீதி வேதி³தப்³போ³. ஏத்தாவதா கோஸம்ப³கேஹி கிர உப்³பா³ள்ஹோ ப⁴க³வா தேமாஸம் அரஞ்ஞம் பவிஸித்வா வஸீதி ஸப்³ப³த்த² கதா² பத்த²டா அஹோஸி.

அத² கோ² கோஸம்ப³கா உபாஸகாதி அத² கோ² இமம் கதா²ஸல்லாபம் ஸுத்வா கோஸம்பி³வாஸினோ உபாஸகா.

அட்டா²ரஸவத்து²கதா²

468. அத⁴ம்மம் த⁴ம்மோதிஆதீ³னி அட்டா²ரஸ பே⁴த³கரவத்தூ²னி ஸங்க⁴பே⁴த³கக்க²ந்த⁴கே வண்ணயிஸ்ஸாம.

475. தம் உக்கி²த்தகம் பி⁴க்கு²ம் ஓஸாரேத்வாதி தம் க³ஹேத்வா ஸீமம் க³ந்த்வா ஆபத்திம் தே³ஸாபேத்வா கம்மவாசாய ஓஸாரேத்வா. தாவதே³வ உபோஸதோ²தி தம்தி³வஸமேவ உபோஸத²க்க²ந்த⁴கே வுத்தனயேனேவ ஸாமக்³கீ³உபோஸதோ² காதப்³போ³.

476. அமூலா மூலம் க³ந்த்வாதி ந மூலா மூலம் க³ந்த்வா; தம் வத்து²ம் அவினிச்சி²னித்வாதி அத்தோ². அயம் வுச்சதி உபாலி ஸங்க⁴ஸாமக்³கீ³ அத்தா²பேதா ப்³யஞ்ஜனூபேதாதி அத்த²தோ அபக³தா, ‘‘ஸங்க⁴ஸாமக்³கீ³’’தி இமம் பன ப்³யஞ்ஜனமத்தம் உபேதா.

477. ஸங்க⁴ஸ்ஸ கிச்சேஸூதி ஸங்க⁴ஸ்ஸ கரணீயேஸு உப்பன்னேஸு. மந்தனாஸூதி வினயமந்தனாஸு. அத்தே²ஸு ஜாதேஸூதி வினயஅத்தே²ஸு உப்பன்னேஸு. வினிச்ச²யேஸூதி தேஸம்யேவ அத்தா²னம் வினிச்ச²யேஸு. மஹத்தி²கோதி மஹாஉபகாரோ. பக்³க³ஹாரஹோதி பக்³க³ண்ஹிதும் வுத்தோ.

அனானுவஜ்ஜோ பட²மேன ஸீலதோதிஆதி³ம்ஹியேவ தாவ ஸீலதோ ந உபவஜ்ஜோ. அவேக்கி²தாசாரோதி அபேக்கி²தாசாரோ; ஆலோகிதே விலோகிதே ஸம்பஜானகாரீதிஆதி³னா நயேன உபபரிக்கி²தாசாரோ. அட்ட²கதா²ஸு பன ‘‘அப்படிச்ச²ன்னாசாரோ’’தி வுத்தம்.

விஸய்ஹாதி அபி⁴ப⁴வித்வா. அனுய்யுதம் ப⁴ணந்தி அனுஞ்ஞாதம் அனபக³தம் ப⁴ணந்தோ. யஸ்மா ஹி ஸோ அனுய்யுதம் ப⁴ணதி, உஸூயாய வா அக³திக³மனவஸேன வா காரணாபக³தம் ந ப⁴ணதி, தஸ்மா அத்த²ம் ந ஹாபேதி. உஸூயாய பன அக³திக³மனவஸேன வா ப⁴ணந்தோ அத்த²ம் ஹாபேதி, காரணம் ந தே³தி, தஸ்மா ஸோ பரிஸக³தோ ச²ம்ப⁴தி சேவ வேத⁴தி ச. யோ ஈதி³ஸோ ந ஹோதி, அயம் ‘‘பக்³க³ஹாரஹோ’’தி த³ஸ்ஸேதி.

கிஞ்ச பி⁴ய்யோ ‘‘ததே²வ பஞ்ஹ’’ந்தி கா³தா², தஸ்ஸத்தோ² – யதா² ச அனுய்யுதம் ப⁴ணந்தோ அத்த²ம் ந ஹாபேதி, ததே²வ பரிஸாய மஜ்ஜே² பஞ்ஹம் புச்சி²தோ ஸமானோ ந சேவ பஜ்ஜா²யதி, ந ச மங்கு ஹோதி. யோ ஹி அத்த²ம் ந ஜானாதி, ஸோ பஜ்ஜா²யதி. யோ வத்தும் ந ஸக்கோதி, ஸோ மங்கு ஹோதி. யோ பன அத்த²ஞ்ச ஜானாதி, வத்துஞ்ச ஸக்கோதி; ஸோ ந பஜ்ஜா²யதி, ந மங்கு ஹோதி. காலாக³தந்தி கதே²தப்³ப³யுத்தகாலே ஆக³தம். ப்³யாகரணாரஹந்தி பஞ்ஹஸ்ஸ அத்தா²னுலோமதாய ப்³யாகரணானுச்ச²விகம். வசோதி வத³ந்தோ; ஏவரூபம் வசனம் ப⁴ணந்தோதி அத்தோ². ரஞ்ஜேதீதி தோஸேதி. விஞ்ஞூபரிஸந்தி விஞ்ஞூனம் பரிஸம்.

ஆசேரகம்ஹி ச ஸகேதி அத்தனோ ஆசரியவாதே³. அலம் பமேதுந்தி வீமம்ஸிதும் தம் தம் காரணம் பஞ்ஞாய துலயிதும் ஸமத்தோ². பகு³ணோதி கதபரிசயோ லத்³தா⁴ஸேவனோ. கதே²தவேதி கதே²தப்³பே³. விரத்³தி⁴கோவிதோ³தி விரத்³த⁴ட்டா²னகுஸலோ.

பச்சத்தி²கா யேன வஜந்தீதி அயம் கா³தா² யாதி³ஸே கதே²தப்³பே³ பகு³ணோ, தம் த³ஸ்ஸேதும் வுத்தா. அயஞ்ஹேத்த² அத்தோ² – யாதி³ஸேன கதி²தேன பச்சத்தி²கா ச நிக்³க³ஹம் க³ச்ச²ந்தி, மஹாஜனோ ச ஸஞ்ஞபனம் க³ச்ச²தி; ஸஞ்ஞத்திம் அவபோ³த⁴னம் க³ச்ச²தீதி அத்தோ². யஞ்ச கதே²ந்தோ ஸகம் ஆதா³யம் அத்தனோ ஆசரியவாத³ம் ந ஹாபேதி, யஸ்மிம் வத்து²ஸ்மிம் அதி⁴கரணம் உப்பன்னம், தத³னுரூபம் அனுபகா⁴தகரம் பஞ்ஹம் ப்³யாகரமானோ தாதி³ஸே கதே²தப்³பே³ பகு³ணோ ஹோதீதி.

தூ³தேய்யகம்மேஸு அலந்தி அட்ட²ஹி தூ³தங்கே³ஹி ஸமன்னாக³தத்தா ஸங்க⁴ஸ்ஸ தூ³தேய்யகம்மேஸு ஸமத்தோ². ஸுட்டு² உக்³க³ண்ஹாதீதி ஸமுக்³க³ஹோ. இத³ம் வுத்தம் ஹோதி – யதா² நாம ஆஹுனம் ஆஹுதிபிண்ட³ம் ஸமுக்³க³ண்ஹந்தி, ஏவம் பீதிஸோமனஸ்ஸஜாதேனேவ சேதஸா ஸங்க⁴ஸ்ஸ கிச்சேஸு ஸமுக்³க³ஹோ, ஸங்க⁴ஸ்ஸகிச்சேஸு தஸ்ஸ தஸ்ஸ கிச்சஸ்ஸ படிக்³கா³ஹகோதி அத்தோ². கரம் வசோதி வசனம் கரோந்தோ. ந தேன மஞ்ஞதீதி தேன வசனகரணேன ‘‘அஹம் கரோமி, ஸங்க⁴பா⁴ரம் நித்த²ராமீ’’தி ந மானாதிமானம் ஜப்பேதி.

ஆபஜ்ஜதி யாவதகேஸு வத்தூ²ஸூதி யத்தகேஸு வத்தூ²ஸு ஆபத்திம் ஆபஜ்ஜமானோ ஆபஜ்ஜதி. ஹோதி யதா² ச வுட்டி²தீதி தஸ்ஸா ச ஆபத்தியா யதா² வுட்டா²னம் ஹோதி. ஏதே விப⁴ங்கா³தி யேஸு வத்தூ²ஸு ஆபஜ்ஜதி, யதா² ச வுட்டா²னம் ஹோதி, இமேஸம் அத்தா²னம் ஜோதகா ஏதே விப⁴ங்கா³. உப⁴யஸ்ஸாதி உப⁴யே அஸ்ஸ. ஸ்வாக³தாதி ஸுட்டு² ஆக³தா. ஆபத்திவுட்டா²னபத³ஸ்ஸ கோவிதோ³தி ஆபத்திவுட்டா²னகாரணகுஸலோ.

யானி சாசரந்தி யானி ச ப⁴ண்ட³னகாரணாதீ³னி ஆசரந்தோ தஜ்ஜனீயகம்மாதி³வஸேன நிஸ்ஸாரணம் க³ச்ச²தி. ஓஸாரணம் தம்வுஸிதஸ்ஸ ஜந்துனோதி தம் வத்தம் வுஸிதஸ்ஸ ஜந்துனோ, யா ஓஸாரணா காதப்³பா³, ஏதம்பி ஜானாதி. ஸேஸம் ஸப்³ப³த்த² உத்தானமேவாதி.

கோஸம்ப³கக்க²ந்த⁴கவண்ணனா நிட்டி²தா.

ஸமந்தபாஸாதி³காய வினயஸம்வண்ணனாய

மஹாவக்³க³வண்ணனா ஸமத்தா.

மஹாவக்³க³-அட்ட²கதா² நிட்டி²தா.