5. ஜராவக்³கோ³

1. ஜராத⁴ம்மஸுத்தவண்ணனா

511. பஞ்சமவக்³க³ஸ்ஸ பட²மே பச்சா²தபேதி பாஸாத³ச்சா²யாய புரத்தி²மதி³ஸம் படிச்ச²ன்னத்தா பாஸாத³ஸ்ஸ பச்சி²மதி³ஸாபா⁴கே³ ஆதபோ ஹோதி, தஸ்மிம் டா²னே பஞ்ஞத்தவரபு³த்³தா⁴ஸனே நிஸின்னோதி அத்தோ². பிட்டி²ம் ஓதாபயமானோதி யஸ்மா ஸம்மாஸம்பு³த்³த⁴ஸ்ஸபி உபாதி³ன்னகஸரீரே உண்ஹகாலே உண்ஹம் ஹோதி, ஸீதகாலே ஸீதம், அயஞ்ச ஹிமபாதஸீதஸமயோ. தஸ்மா மஹாசீவரம் ஓதாரேத்வா ஸூரியரஸ்மீஹி பிட்டி²ம் ஓதாபயமானோ நிஸீதி³.

கிம் பன பு³த்³த⁴ரஸ்மியோ மத்³தி³த்வா ஸூரியரஸ்மி அந்தோ பவிஸிதும் ஸக்கோதீதி? ந ஸக்கோதி. ஏவம் ஸந்தே கிம் தாபேதீதி? ரஸ்மிதேஜம். யதே²வ ஹி டி²தமஜ்ஜ²ன்ஹிகே பரிமண்ட³லாய சா²யாய ருக்க²மூலே நிஸின்னஸ்ஸ கிஞ்சாபி ஸூரியரஸ்மியோ ஸரீரம் ந பு²ஸந்தி, ஸப்³ப³தி³ஸாஸு பன தேஜோ ப²ரதி, அக்³கி³ஜாலாஹி பரிக்கி²த்தோ விய ஹோதி, ஏவம் ஸூரியரஸ்மீஸு பு³த்³த⁴ரஸ்மியோ மத்³தி³த்வா அந்தோ பவிஸிதும் அஸக்குணந்தீஸுபி ஸத்தா² தேஜம் தாபேந்தோ நிஸின்னோதி வேதி³தப்³போ³.

அனோமஜ்ஜந்தோதி பிட்டி²பரிகம்மகரணவஸேன அனுமஜ்ஜந்தோ. அச்ச²ரியம் ப⁴ந்தேதி தே²ரோ ப⁴க³வதோ பிட்டி²தோ மஹாசீவரம் ஓதாரேத்வா நிஸின்னஸ்ஸ த்³வின்னம் அம்ஸகூடானம் அந்தரே ஸுவண்ணாவட்டம் விய கேஸக்³க³ப்பமாணம் வலியாவட்டம் தி³ஸ்வா – ‘‘ஏவரூபேபி நாம ஸரீரே ஜரா பஞ்ஞாயதீ’’தி ஸஞ்ஜாதஸம்வேகோ³ ஜரம் க³ரஹந்தோ ஏவமாஹ. க³ரஹனச்ச²ரியம் நாம கிரேதம்.

ந சேவம் தா³னி, ப⁴ந்தே, ப⁴க³வதோ தாவ பரிஸுத்³தோ⁴தி யதா² பகதியா ச²விவண்ணோ பரிஸுத்³தோ⁴, ந ஏவமேதரஹீதி தீ³பேந்தோ ஏவமாஹ. ததா²க³தஸ்ஸ ஹி த³ஹரகாலே ஸங்குஸதஸமப்³பா⁴ஹதம் உஸப⁴சம்மம் விய விஹதவலிகோ காயோ ஹோதி, தஸ்மிம் ட²பிதோ ஹத்தோ² ப⁴ஸ்ஸதேவ, ந ஸந்திட்ட²தி, தேலபுஞ்ச²னாகாரப்பத்தோ விய ஹோதி. மஹல்லககாலே பன ஸிராஜாலா மிலாயந்தி, ஸந்தி⁴பப்³பா³னி ஸிதி²லானி ஹோந்தி, மம்ஸம் அட்டி²தோ முச்சித்வா ஸிதி²லபா⁴வம் ஆபஜ்ஜித்வா தத்த² தத்த² ஓலம்ப³தி. பு³த்³தா⁴னம் பன ஏவரூபம் ந ஹோதி. அஞ்ஞேஸம் அபாகடம், ஸந்திகாவசரத்தா ஆனந்த³த்தே²ரஸ்ஸேவ பாகடம் ஹோதி, தஸ்மா ஏவமாஹ.

ஸிதி²லானி ச க³த்தானீதி அஞ்ஞேஸம் முகே² அம்ஸகூடந்தரேஹி தேஸு தேஸு டா²னேஸு வலியோ ஸந்திட்ட²ந்தி, ஸத்து² பனேதம் நத்தி², தே²ரோ ச த்³வின்னம் அம்ஸகூடானம் அந்தரே வலியாவட்டகம் தி³ஸ்வா ஏவமாஹ. ஸப்³பா³னி வலியஜாதானீதி இத³ம்பி அத்தனோ பாகடவஸேன ஏவமாஹ – ஸத்து² பன அஞ்ஞேஸம் விய வலியோ நாம நத்தி². புரதோ பப்³பா⁴ரோ ச காயோதி ஸத்தா² ப்³ரஹ்முஜுக³த்தோ, தே³வனக³ரே ஸமுஸ்ஸிதஸுவண்ணதோரணம் வியஸ்ஸ காயோ உஜுகமேவ உக்³க³தோ. மஹல்லககாலே பன காயோ புரதோ வங்கோ ஹோதி, ஸ்வாயம் அஞ்ஞேஸம் அபாகடோ, ஸந்திகாவசரத்தா பன தே²ரஸ்ஸேவ பாகடோ, தஸ்மா ஏவமாஹ. தி³ஸ்ஸதி ச இந்த்³ரியானம் அஞ்ஞத²த்தந்தி இந்த்³ரியானி நாம ந சக்கு²விஞ்ஞேய்யானி. யதோ பன பகதியா பரிஸுத்³தோ⁴ ச²விவண்ணோ, இதா³னி ந ததா² பரிஸுத்³தோ⁴, அம்ஸகூடந்தரே வலி பஞ்ஞாயதி, ப்³ரஹ்முஜுகாயோ புரதோ வங்கோ, இமினாவ காரணேன சக்கா²தீ³னஞ்ச இந்த்³ரியானம் அஞ்ஞத²த்தேன ப⁴விதப்³ப³ந்தி நயக்³கா³ஹதோ ஏவமாஹ. தீ⁴ தம் ஜம்மி ஜரே அத்தூ²தி லாமகே ஜரே தீ⁴ தம் துய்ஹம் ஹோது, தி⁴க்காரோ தம் பு²ஸது. பி³ம்ப³ந்தி அத்தபா⁴வோ.

2. உண்ணாப⁴ப்³ராஹ்மணஸுத்தவண்ணனா

512. து³தியே கோ³சரவிஸயந்தி கோ³சரபூ⁴தம் விஸயம். அஞ்ஞமஞ்ஞஸ்ஸாதி சக்கு² ஸோதஸ்ஸ, ஸோதம் வா சக்கு²ஸ்ஸாதி ஏவம் ஏகம் ஏகஸ்ஸ கோ³சரவிஸயம் ந பச்சனுபோ⁴தி. ஸசே ஹி நீலாதி³பே⁴த³ம் ரூபாரம்மணம் ஸமோதா⁴னேத்வா ஸோதிந்த்³ரியஸ்ஸ உபனேய்ய – ‘‘இங்க⁴ த்வம் தாவ நம் வவத்த²பேஹி விபா⁴வேஹி ‘கின்னாமேதம் ஆரம்மண’’’ந்தி. சக்கு²விஞ்ஞாணம் வினாபி முகே²ன அத்தனோ த⁴ம்மதாய ஏவம் வதே³ய்ய – ‘‘அரே, அந்த⁴பா³ல, வஸ்ஸஸதம்பி வஸ்ஸஸஹஸ்ஸம்பி வஸ்ஸஸதஸஹஸ்ஸம்பி பரிதா⁴வமானோ அஞ்ஞத்ர மயா குஹிம் ஏதஸ்ஸ ஜானனகம் லபி⁴ஸ்ஸஸி, தம் ஆஹர, சக்கு²பஸாதே³ உபனேஹி, அஹமேதம் ஆரம்மணம் ஜானிஸ்ஸாமி – யதி³ வா நீலம், யதி³ வா பீதகம். ந ஹி ஏஸோ அஞ்ஞஸ்ஸ விஸயோ, மய்ஹமேவேஸோ விஸயோ’’தி. ஸேஸத்³வாரேஸுபி ஏஸேவ நயோ. ஏவமேதானி அஞ்ஞமஞ்ஞஸ்ஸ கோ³சரவிஸயம் ந பச்சனுபோ⁴ந்தி நாம.

கிம் படிஸரணந்தி ஏதேஸம் கிம் படிஸரணம், கிம் ஏதானி படிஸரந்தீதி புச்ச²தி. மனோ படிஸரணந்தி ஜவனமனோ படிஸரணம். மனோவ நேஸந்தி மனோத்³வாரிகஜவனமனோவ ஏதேஸம் கோ³சரவிஸயம் ரஜ்ஜனாதி³வஸேன அனுபோ⁴தி. சக்கு²விஞ்ஞாணஞ்ஹி ரூபத³ஸ்ஸனமத்தமேவ, ஏத்த² ரஜ்ஜனம் வா து³ஸ்ஸனம் வா முய்ஹனம் வா நத்தி². ஏகஸ்மிம் பன த்³வாரே ஜவனம் ரஜ்ஜதி வா து³ஸ்ஸதி வா முய்ஹதி வா. ஸோதவிஞ்ஞாணாதீ³ஸுபி ஏஸேவ நயோ.

தத்ராயம் உபமா – பஞ்ச கிர து³ப்³ப³லபோ⁴ஜகா ராஜானம் ஸேவித்வா கிச்சே²ன கஸிரேன ஏகஸ்மிம் பஞ்சகுலிகே கா³மே பரித்தகம் ஆயம் லபி⁴ம்ஸு. தேஸம் தத்த² மச்ச²பா⁴கோ³ மம்ஸபா⁴கோ³, அத்³து³கஹாபணோ வா யோத்தகஹாபணோ வா மாஸகஹாபணோ வா அட்ட²கஹாபணோ வா ஸோளஸகஹாபணோ வா சதுஸட்டி²கஹாபணோ வா த³ண்டோ³தி ஏத்தகமத்தமேவ பாபுணாதி, ஸதவத்து²கம் பஞ்சஸதவத்து²கம் ஸஹஸ்ஸவத்து²கம் மஹாப³லிம் ராஜாவ க³ண்ஹாதி.

தத்த² பஞ்சகுலிககா³மா விய பஞ்சபஸாதா³ த³ட்ட²ப்³பா³, பஞ்ச து³ப்³ப³லபோ⁴ஜகா விய பஞ்சவிஞ்ஞாணானி; ராஜா விய ஜவனம், து³ப்³ப³லபோ⁴ஜகானம் பரித்தகஆயபாபுணனம் விய சக்கு²விஞ்ஞாணாதீ³னம் ரூபத³ஸ்ஸனாதி³மத்தம், ரஜ்ஜனாதி³ பன ஏதேஸு நத்தி². ரஞ்ஞோ மஹாப³லிக்³க³ஹணம் விய தேஸு த்³வாரேஸு ஜவனஸ்ஸ ரஜ்ஜனாதீ³னி வேதி³தப்³பா³னி. ஏவமேத்த² மனோதி குஸலாகுஸலஜவனம் வுத்தம்.

ஸதி படிஸரணந்தி மக்³க³ஸதி படிஸரணம். ஜவனமனோ ஹி மக்³க³ஸதிம் படிஸரதி. விமுத்தீதி ப²லவிமுத்தி. படிஸரணந்தி ப²லவிமுத்தியா நிப்³பா³னம் படிஸரணம். தஞ்ஹி ஸா படிஸரதி. நாஸக்கி² பஞ்ஹஸ்ஸ பரியந்தம் க³ஹேதுந்தி பஞ்ஹஸ்ஸ பரிச்சே²த³ம் பமாணம் க³ஹேதும் நாஸக்கி², அப்படிஸரணம் த⁴ம்மம் ‘‘ஸப்படிஸரண’’ந்தி புச்சி². நிப்³பா³னம் நாமேதம் அப்படிஸரணம், ந கிஞ்சி படிஸரதி. நிப்³பா³னோக³த⁴ந்தி நிப்³பா³னப்³ப⁴ந்தரம் நிப்³பா³னம் அனுபவிட்ட²ம். ப்³ரஹ்மசரியந்தி மக்³க³ப்³ரஹ்மசரியம். நிப்³பா³னபராயணந்தி நிப்³பா³னம் பரம் அயனமஸ்ஸ பரா க³தி, ந ததோ பரம் க³ச்ச²தீதி அத்தோ². நிப்³பா³னம் பரியோஸானம் அவஸானம் அஸ்ஸாதி நிப்³பா³னபரியோஸானம்.

மூலஜாதா பதிட்டி²தாதி மக்³கே³ன ஆக³தஸத்³தா⁴ வுச்சதி. இமம்ஹி சே, பி⁴க்க²வே, ஸமயேதி கிம் ஸந்தா⁴யாஹ? ஜா²னஅனாகா³மிதம். தஸ்மிஞ்ஹி ஸமயே ப்³ராஹ்மணஸ்ஸ பட²மமக்³கே³ன பஞ்ச அகுஸலசித்தானி பஹீனானி, பட²மஜ்ஜா²னேன பஞ்ச நீவரணானீதி ஜா²னஅனாகா³மிட்டா²னே டி²தோ. ஸோ அபரிஹீனஜ்ஜா²னோ காலம் கத்வா தத்தே²வ பரினிப்³பா³யேய்ய. ஸசே பனஸ்ஸ புத்ததா³ரம் அனுஸாஸந்தஸ்ஸ கம்மந்தே விசாரேந்தஸ்ஸ ஜா²னம் நஸ்ஸதி, நட்டே² ஜா²னே க³தி அனிப³த்³தா⁴ ஹோதி, அனட்டே² பன நிப³த்³தா⁴தி இமம் ஜா²னஅனாகா³மிதம் ஸந்தா⁴ய ஏவமாஹ.

3. ஸாகேதஸுத்தவண்ணனா

513. ததியே அஞ்ஜனவனேதி அஞ்ஜனவண்ணபுப்பா²னம் ருக்கா²னம் ரோபிதவனே. யம், பி⁴க்க²வே, ஸத்³தி⁴ந்த்³ரியம், தம் ஸத்³தா⁴ப³லந்தி தஞ்ஹி அதி⁴மோக்க²லக்க²ணே இந்த³ட்டே²ன ஸத்³தி⁴ந்த்³ரியம், அஸ்ஸத்³தி⁴யே அகம்பனேன ஸத்³தா⁴ப³லம். இதரேஸம் பக்³க³ஹஉபட்டா²னஅவிக்கே²பபஜானனலக்க²ணேஸு இந்த³ட்டே²ன இந்த்³ரியபா⁴வோ, கோஸஜ்ஜமுட்ட²ஸச்சவிக்கே²பாவிஜ்ஜாஸு அகம்பனேன ப³லபா⁴வோ வேதி³தப்³போ³. ஏவமேவ கோ²தி தஸ்ஸா நதி³யா ஏகஸோதம் விய ஸத்³தா⁴வீரியஸதிஸமாதி⁴பஞ்ஞாவஸேன ஏதேஸம் நின்னானாகரணம் வேதி³தப்³ப³ம், த்³வே ஸோதானி விய இந்த³ட்ட²அகம்பனட்டே²ஹி இந்த்³ரியப³லவஸேன நானாகரணம் வேதி³தப்³ப³ம்.

4. புப்³ப³கோட்ட²கஸுத்தவண்ணனா

514. சதுத்தே² அமதோக³த⁴ந்தி அமதப்³ப⁴ந்தரம். அமதபராயணந்தி அமதனிப்³ப³த்திகம். அமதபரியோஸானந்தி அமதனிட்ட²ம். ஸாது⁴ ஸாதூ⁴தி தே²ரஸ்ஸ ப்³யாகரணம் பஸம்ஸந்தோ ஸாது⁴காரம் தே³தி.

5. பட²மபுப்³பா³ராமஸுத்தவண்ணனா

515. பஞ்சமே தத³ன்வயாதி தம் அனுக³ச்ச²மானா, அனுவத்தமானாதி அத்தோ². புப்³ப³கோட்ட²கம் ஆதி³ம் கத்வா படிபாடியா ச²ஸு ஸுத்தேஸு ப²லிந்த்³ரியானேவ கதி²தானி.

10. ஆபணஸுத்தவண்ணனா

520. த³ஸமே இமே கோ² தே த⁴ம்மாதி உபரி ஸஹ விபஸ்ஸனாய தயோ மக்³கா³. யே மே புப்³பே³ ஸுதாவ அஹேஸுந்தி யே த⁴ம்மா மயா புப்³பே³ ‘‘அரஹத்தப²லிந்த்³ரியம் நாம அத்தீ²’’தி கதே²ந்தானம்யேவ ஸுதா அஹேஸும். காயேன ச பு²ஸித்வாதி நாமகாயேன ச பு²ஸித்வா படிலபி⁴த்வா. பஞ்ஞாய ச அதிவிஜ்ஜ² பஸ்ஸாமீதி பச்சவேக்க²ணபஞ்ஞாய ச அதிவிஜ்ஜி²த்வா பஸ்ஸாமி. யா ஹிஸ்ஸ, ப⁴ந்தே, ஸத்³தா⁴தி அயம் கதரஸத்³தா⁴? சதூஹி இந்த்³ரியேஹி ஸம்பயுத்தா ஸத்³தா⁴ ஹேட்டா² கதி²தாவ, அயம் பன பச்சவேக்க²ணஸத்³தா⁴. ஸம்பயுத்தஸத்³தா⁴ ஹி மிஸ்ஸகா, பச்சவேக்க²ணஸத்³தா⁴ லோகியாவ. ஸேஸம் ஸப்³ப³த்த² உத்தானமேவாதி.

ஜராவக்³கோ³ பஞ்சமோ.