6. ஸூகரக²தவக்³கோ³

1. ஸாலஸுத்தவண்ணனா

521. ச²ட்ட²வக்³க³ஸ்ஸ பட²மே ஸூரேனாதி ஸூரபா⁴வேன. போ³தா⁴யாதி பு³ஜ்ஜ²னத்தா²ய.

2. மல்லிகஸுத்தவண்ணனா

522. து³தியே மல்லேஸூதி ஏவம்னாமகே ஜனபதே³. இமஸ்மிம் ஸுத்தே சத்தாரி இந்த்³ரியானி மிஸ்ஸகானி, அரியஞாணம் லோகுத்தரம். தம்பி பன சதுக்கிந்த்³ரியனிஸ்ஸிதம் கத்வா மிஸ்ஸகந்தி பா⁴ஜேதும் வட்டதி.

3. ஸேக²ஸுத்தவண்ணனா

523. ததியே ந ஹேவ கோ² காயேன பு²ஸித்வா விஹரதீதி ந நாமகாயேன பு²ஸித்வா படிலபி⁴த்வா விஹரதி, பு²ஸிதும் படிலபி⁴தும் ந ஸக்கோதி. பஞ்ஞாய ச அதிவிஜ்ஜ² பஸ்ஸதீதி பச்சவேக்க²ணபஞ்ஞாய பன ‘‘உபரி அரஹத்தப²லிந்த்³ரியம் நாம அத்தீ²’’தி பஜானாதி. அஸேக²பூ⁴மியம் பு²ஸித்வா விஹரதீதி படிலபி⁴த்வா விஹரதி. பஞ்ஞாயாதி பச்சவேக்க²ணபஞ்ஞாய ‘‘அரஹத்தப²லிந்த்³ரியம் நாம அத்தீ²’’தி பஜானாதி. ந குஹிஞ்சி கிஸ்மிஞ்சீதி த்³வேபி அஞ்ஞமஞ்ஞவேவசனானேவ, கிஸ்மிஞ்சி ப⁴வே ந உப்பஜ்ஜிஸ்ஸந்தீதி அத்தோ². இமஸ்மிம் ஸுத்தே பஞ்சிந்த்³ரியானி லோகுத்தரானி, ச² லோகிகானி வட்டனிஸ்ஸிதானேவ கதி²தானி.

4-5. பத³ஸுத்தாதி³வண்ணனா

524-525. சதுத்தே² யானி கானிசி பதா³னி போ³தா⁴ய ஸம்வத்தந்தீதி யானி கானிசி த⁴ம்மபதா³னி, யே கேசி த⁴ம்மகோட்டா²ஸா, பு³ஜ்ஜ²னத்தா²ய ஸம்வத்தந்தி. பஞ்சமம் உத்தானமேவ.

6-7. பதிட்டி²தஸுத்தாதி³வண்ணனா

526-527. ச²ட்டே² சித்தம் ரக்க²தி ஆஸவேஸு ச ஸாஸவேஸு ச த⁴ம்மேஸூதி தேபூ⁴மகத⁴ம்மே ஆரப்³ப⁴ ஆஸவுப்பத்திம் வாரேந்தோ ஆஸவேஸு ச ஸாஸவேஸு ச த⁴ம்மேஸு சித்தம் ரக்க²தி நாம. ஸத்தமம் உத்தானமேவ.

8. ஸூகரக²தஸுத்தவண்ணனா

528. அட்ட²மே ஸூகரக²தாயந்தி ஸூகரக²தலேணே. கஸ்ஸபபு³த்³த⁴காலே கிர தம் லேணம் ஏகஸ்மிம் பு³த்³த⁴ந்தரே பத²வியா வட்³ட⁴மானாய அந்தோபூ⁴மிக³தம் ஜாதம். அதே²கதி³வஸம் ஏகோ ஸூகரோ தஸ்ஸ ச²த³னபரியந்தஸமீபே பம்ஸும் க²ணி. தே³வே வுட்டே² பம்ஸு தோ⁴தா, ச²த³னபரியந்தோ பாகடோ அஹோஸி. ஏகோ வனசரகோ தி³ஸ்வா ‘‘புப்³பே³ ஸீலவந்தேஹி பரிபு⁴த்தட்டா²னேன ப⁴விதப்³ப³ம், படிஜக்³கி³ஸ்ஸாமி ந’’ந்தி ஸமந்ததோ பம்ஸும் அபனேத்வா லேணம் ஸோதே⁴த்வா குடிபரிக்கே²பம் கத்வா த்³வாரவாதபானம் யோஜேத்வா ஸுபரினிட்டி²தஸுதா⁴கம்மசித்தகம்மம் ரஜதபட்டஸதி³ஸாய வாலிகாய ஸந்த²ரிதம் பரிவேணம் கத்வா மஞ்சபீட²ம் பஞ்ஞாபேத்வா ப⁴க³வதோ வஸனத்தா²ய அதா³ஸி, லேணம் க³ம்பீ⁴ரம் அஹோஸி ஓதரித்வா ஆருஹிதப்³ப³ம். தம் ஸந்தா⁴யேதம் வுத்தம். பரமனிபச்சகாரந்தி பா⁴வனபும்ஸகம், பரமனிபச்சகாரீ ஹுத்வா பவத்தமானோ பவத்ததீதி வுத்தம் ஹோதி. அனுத்தரம் யோக³க்கே²மந்தி அரஹத்தம். ஸப்பதிஸ்ஸோதி ஸஜேட்ட²கோ. ஸேஸம் ஸப்³ப³த்த² உத்தானத்த²மேவாதி.

ஸூகரக²தவக்³கோ³ ச²ட்டோ².