2. பட²மஸம்கி²த்தஸுத்தவண்ணனா

482. து³தியே ததோதி விபஸ்ஸனாமக்³க³ப²லவஸேன நிஸ்ஸக்கம் வேதி³தப்³ப³ம். ஸமத்தாநி ஹி பரிபுண்ணானி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி நாம ஹோந்தி. ததோ முது³தரேஹீதி தேஹி அரஹத்தமக்³க³ஸ்ஸ விபஸ்ஸனிந்த்³ரியேஹி முது³தரானி அனாகா³மிமக்³க³ஸ்ஸ விபஸ்ஸனிந்த்³ரியானி நாம ஹோந்தி, ததோ முது³தரானி ஸகதா³கா³மிமக்³க³ஸ்ஸ, ததோ முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி நாம ஹோந்தி, ததோ முது³தரானி த⁴ம்மானுஸாரிமக்³க³ஸ்ஸ, ததோ முது³தரானி ஸத்³தா⁴னுஸாரிமக்³க³ஸ்ஸ விபஸ்ஸனிந்த்³ரியானி நாம ஹோந்தி.

ததா² ஸமத்தானி பரிபுண்ணானி பஞ்சிந்த்³ரியானி அரஹத்தமக்³கி³ந்த்³ரியானி நாம ஹோந்தி, ததோ முது³தரானி அனாகா³மிமக்³கி³ந்த்³ரியானி நாம ஹோந்தி, ததோ முது³தரானி ஸகதா³கா³மிமக்³கி³ந்த்³ரியானி நாம ஹோந்தி, ததோ முது³தரானி ஸோதாபத்திமக்³கி³ந்த்³ரியானி நாம ஹோந்தி, ததோ முது³தரானி த⁴ம்மானுஸாரிமக்³கி³ந்த்³ரியானி, ததோ முது³தரானி ஸத்³தா⁴னுஸாரிமக்³கி³ந்த்³ரியானி நாம ஹோந்தி.

ஸமத்தானி பரிபுண்ணானி பஞ்சிந்த்³ரியானி அரஹத்தப²லிந்த்³ரியானி நாம ஹோந்தி, ததோ முது³தரானி அனாகா³மிப²லிந்த்³ரியானி, ததோ முது³தரானி ஸகதா³கா³மிப²லிந்த்³ரியானி, ததோ முது³தரானி ஸோதாபத்திப²லிந்த்³ரியானி நாம ஹோந்தி. த⁴ம்மானுஸாரிஸத்³தா⁴னுஸாரினோ பன த்³வேபி ஸோதாபத்திமக்³க³ட்ட²புக்³க³லா, மக்³க³ட்ட²புக்³க³லவஸேன நேஸம் நானத்தம் ஜாதந்தி ஆக³மனேனபி மக்³கே³னபி. ஸத்³தா⁴னுஸாரீ புக்³க³லோ ஹி உத்³தி³ஸாபேந்தோ பரிபுச்ச²ந்தோ அனுபுப்³பே³ன மக்³க³ம் பாபுணாதி, த⁴ம்மானுஸாரீ ஏகேன வா த்³வீஹி வா ஸவனேஹி. ஏவம் தாவ நேஸம் ஆக³மனேன நானத்தம் வேதி³தப்³ப³ம்.

த⁴ம்மானுஸாரிஸ்ஸ பன மக்³கோ³ திக்கோ² ஹோதி, ஸூரம் ஞாணம் வஹதி, அஸங்கா²ரேன அப்பயோகே³ன கிலேஸே சி²ந்த³தி கத³லிக்க²ந்த⁴ம் விய திகி²ணா அஸிதா⁴ரா. ஸத்³தா⁴னுஸாரிஸ்ஸ ந தஸ்ஸ விய மக்³கோ³ திக்கோ² ஹோதி, ந ஸூரம் ஞாணம் வஹதி, ஸஸங்கா²ரேன ஸப்பயோகே³ன கிலேஸே சி²ந்த³தி கத³லிக்க²ந்த⁴ம் விய அதிகி²ணா அஸிதா⁴ரா. கிலேஸக்க²யே பன தேஸம் நானத்தம் நத்தி². அவஸேஸா ச கிலேஸா கீ²யந்தி.