2. முது³தரவக்³கோ³

1. படிலாப⁴ஸுத்தவண்ணனா

481. து³தியவக்³க³ஸ்ஸ பட²மே ஸம்மப்பதா⁴னே ஆரப்³பா⁴தி ஸம்மப்பதா⁴னே படிச்ச, ஸம்மப்பதா⁴னே பா⁴வேந்தோதி அத்தோ². ஸதிந்த்³ரியேபி ஏஸேவ நயோ.

2. பட²மஸம்கி²த்தஸுத்தவண்ணனா

482. து³தியே ததோதி விபஸ்ஸனாமக்³க³ப²லவஸேன நிஸ்ஸக்கம் வேதி³தப்³ப³ம். ஸமத்தாநி ஹி பரிபுண்ணானி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி நாம ஹோந்தி. ததோ முது³தரேஹீதி தேஹி அரஹத்தமக்³க³ஸ்ஸ விபஸ்ஸனிந்த்³ரியேஹி முது³தரானி அனாகா³மிமக்³க³ஸ்ஸ விபஸ்ஸனிந்த்³ரியானி நாம ஹோந்தி, ததோ முது³தரானி ஸகதா³கா³மிமக்³க³ஸ்ஸ, ததோ முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி நாம ஹோந்தி, ததோ முது³தரானி த⁴ம்மானுஸாரிமக்³க³ஸ்ஸ, ததோ முது³தரானி ஸத்³தா⁴னுஸாரிமக்³க³ஸ்ஸ விபஸ்ஸனிந்த்³ரியானி நாம ஹோந்தி.

ததா² ஸமத்தானி பரிபுண்ணானி பஞ்சிந்த்³ரியானி அரஹத்தமக்³கி³ந்த்³ரியானி நாம ஹோந்தி, ததோ முது³தரானி அனாகா³மிமக்³கி³ந்த்³ரியானி நாம ஹோந்தி, ததோ முது³தரானி ஸகதா³கா³மிமக்³கி³ந்த்³ரியானி நாம ஹோந்தி, ததோ முது³தரானி ஸோதாபத்திமக்³கி³ந்த்³ரியானி நாம ஹோந்தி, ததோ முது³தரானி த⁴ம்மானுஸாரிமக்³கி³ந்த்³ரியானி, ததோ முது³தரானி ஸத்³தா⁴னுஸாரிமக்³கி³ந்த்³ரியானி நாம ஹோந்தி.

ஸமத்தானி பரிபுண்ணானி பஞ்சிந்த்³ரியானி அரஹத்தப²லிந்த்³ரியானி நாம ஹோந்தி, ததோ முது³தரானி அனாகா³மிப²லிந்த்³ரியானி, ததோ முது³தரானி ஸகதா³கா³மிப²லிந்த்³ரியானி, ததோ முது³தரானி ஸோதாபத்திப²லிந்த்³ரியானி நாம ஹோந்தி. த⁴ம்மானுஸாரிஸத்³தா⁴னுஸாரினோ பன த்³வேபி ஸோதாபத்திமக்³க³ட்ட²புக்³க³லா, மக்³க³ட்ட²புக்³க³லவஸேன நேஸம் நானத்தம் ஜாதந்தி ஆக³மனேனபி மக்³கே³னபி. ஸத்³தா⁴னுஸாரீ புக்³க³லோ ஹி உத்³தி³ஸாபேந்தோ பரிபுச்ச²ந்தோ அனுபுப்³பே³ன மக்³க³ம் பாபுணாதி, த⁴ம்மானுஸாரீ ஏகேன வா த்³வீஹி வா ஸவனேஹி. ஏவம் தாவ நேஸம் ஆக³மனேன நானத்தம் வேதி³தப்³ப³ம்.

த⁴ம்மானுஸாரிஸ்ஸ பன மக்³கோ³ திக்கோ² ஹோதி, ஸூரம் ஞாணம் வஹதி, அஸங்கா²ரேன அப்பயோகே³ன கிலேஸே சி²ந்த³தி கத³லிக்க²ந்த⁴ம் விய திகி²ணா அஸிதா⁴ரா. ஸத்³தா⁴னுஸாரிஸ்ஸ ந தஸ்ஸ விய மக்³கோ³ திக்கோ² ஹோதி, ந ஸூரம் ஞாணம் வஹதி, ஸஸங்கா²ரேன ஸப்பயோகே³ன கிலேஸே சி²ந்த³தி கத³லிக்க²ந்த⁴ம் விய அதிகி²ணா அஸிதா⁴ரா. கிலேஸக்க²யே பன தேஸம் நானத்தம் நத்தி². அவஸேஸா ச கிலேஸா கீ²யந்தி.

3. து³தியஸம்கி²த்தஸுத்தவண்ணனா

483. ததியே ததோதி ப²லவஸேன நிஸ்ஸக்கம் வேதி³தப்³ப³ம். ஸமத்தானி ஹி பரிபுண்ணானி பஞ்சிந்த்³ரியானி அரஹத்தப²லிந்த்³ரியானி நாம ஹோந்தி, அரஹத்தப²லேன ஸமன்னாக³தோ புக்³க³லோ அரஹா நாம ஹோதி. அரஹத்தப²லதோ முது³தரானி அனாகா³மிப²லிந்த்³ரியானி நாம ஹோந்தி, ததோ முது³தரானி ஸகதா³கா³மிப²லிந்த்³ரியானி, ததோ முது³தரானி ஸோதாபத்திப²லிந்த்³ரியானி, ஸோதாபத்திப²லேன ஸமன்னாக³தோ புக்³க³லோ ஸோதாபன்னோ நாம ஹோதி. இந்த்³ரியவேமத்ததா ப²லவேமத்ததா ஹோதீதி இந்த்³ரியனானத்தேன ப²லனானத்தம், ப²லனானத்தேன புக்³க³லனானத்தந்தி.

4. ததியஸம்கி²த்தஸுத்தவண்ணனா

484. சதுத்தே² பரிபூரம் பரிபூரகாரீ ஆராதே⁴தீதி பரிபூரம் அரஹத்தமக்³க³ம் கரோந்தோ அரஹத்தப²லம் ஆராதே⁴தி. பதே³ஸம் பதே³ஸகாரீதி அவஸேஸே தயோ பதே³ஸமக்³கே³ கரோந்தோ பதே³ஸம் ப²லத்தயமத்தமேவ ஆராதே⁴தி. இதி இமேஸு சதூஸுபி ஸுத்தேஸு மிஸ்ஸகானேவ இந்த்³ரியானி கதி²தானி.

5-7. பட²மவித்தா²ரஸுத்தாதி³வண்ணனா

485-487. பஞ்சமே ததோ முது³தரேஹீதி விபஸ்ஸனாவஸேன நிஸ்ஸக்கம் வேதி³தப்³ப³ம். பரிபுண்ணானி ஹி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி ஹோந்தி, ததோ முது³தரானி அந்தராபரினிப்³பா³யிஸ்ஸ விபஸ்ஸனிந்த்³ரியானி, ததோ முது³தரானி உபஹச்சபரினிப்³பா³யிஸ்ஸ, ததோ முது³தரானி அஸங்கா²ரபரினிப்³பா³யிஸ்ஸ, ததோ முது³தரானி ஸஸங்கா²ரபரினிப்³பா³யிஸ்ஸ, ததோ முது³தரானி உத்³த⁴ம்ஸோதஅகனிட்ட²கா³மிஸ்ஸ விபஸ்ஸனிந்த்³ரியானி நாம ஹோந்தி.

இமஸ்மிம் பன டா²னே அரஹத்தமக்³கே³யேவ ட²த்வா பஞ்ச நிஸ்ஸக்கானி நீஹரிதப்³பா³னி. அரஹத்தமக்³க³ஸ்ஸ ஹி விபஸ்ஸனிந்த்³ரியேஹி முது³தரானி பட²மஅந்தராபரினிப்³பா³யிஸ்ஸ விபஸ்ஸனிந்த்³ரியானி, ததோ முது³தரானி து³தியஅந்தராபரினிப்³பா³யிஸ்ஸ, ததோ முது³தரானி ததியஅந்தராபரினிப்³பா³யிஸ்ஸ, ததோ முது³தரானி உபஹச்சபரினிப்³பா³யிஸ்ஸ, ததோ முது³தரானி உத்³த⁴ம்ஸோதஅகனிட்ட²கா³மிஸ்ஸ விபஸ்ஸனிந்த்³ரியானி. அஸங்கா²ரபரினிப்³பா³யிஸ்ஸ ஸஸங்கா²ரபரினிப்³பா³யினோபி ஏதேவ பஞ்ச ஜனா.

இதா³னி தீணி நிஸ்ஸக்கானி. ஸகதா³கா³மிமக்³க³ஸ்ஸ ஹி இந்த்³ரியேஹி முது³தரானி ஸோதாபத்திமக்³கி³ந்த்³ரியானி, ஸோதாபத்திமக்³கே³யேவ இந்த்³ரியேஹி முது³தரானி த⁴ம்மானுஸாரிமக்³கி³ந்த்³ரியானி. தேஹிபி முது³தரானி ஸத்³தா⁴னுஸாரிமக்³கி³ந்த்³ரியானி. ச²ட்ட²ஸத்தமானி வுத்தனயானேவ. இமேஸு பன தீஸுபி ஸுத்தேஸு புப்³ப³பா⁴க³விபஸ்ஸனிந்த்³ரியானேவ கதி²தானி.

8. படிபன்னஸுத்தவண்ணனா

488. அட்ட²மே ததோ முது³தரேஹீதி மக்³க³ப²லவஸேன நிஸ்ஸக்கம் வேதி³தப்³ப³ம். தம் பாளியம் வுத்தமேவ. பா³ஹிரோதி இமேஹி அட்ட²ஹி புக்³க³லேஹி ப³ஹிபூ⁴தோ. புது²ஜ்ஜனபக்கே² டி²தோதி புது²ஜ்ஜனகோட்டா²ஸே டி²தோ. இமஸ்மிம் ஸுத்தே லோகுத்தரானேவ இந்த்³ரியானி கதி²தானி.

9-10. ஸம்பன்னஸுத்தாதி³வண்ணனா

489-490. நவமே இந்த்³ரியஸம்பன்னோதி பரிபுண்ணிந்த்³ரியோ. த³ஸமம் உத்தானமேவ. இமஸ்மிம் ஸுத்தத்³வயே மிஸ்ஸகானி இந்த்³ரியானி கதி²தானீதி.

முது³தரவக்³கோ³ து³தியோ.