3. ச²ளிந்த்³ரியவக்³கோ³

2. ஜீவிதிந்த்³ரியஸுத்தவண்ணனா

492. ததியவக்³க³ஸ்ஸ து³தியே இத்தி²ந்த்³ரியந்திஆதீ³ஸு இத்தி²பா⁴வே இந்த³ட்ட²ம் கரோதீதி இத்தி²ந்த்³ரியம். புரிஸபா⁴வே இந்த³ட்ட²ம் கரோதீதி புரிஸிந்த்³ரியம். ஜீவிதே இந்த³ட்ட²ம் கரோதீதி ஜீவிதிந்த்³ரியம். அத்து²ப்பத்திகம் கிரேதம் ஸுத்தம். ஸங்க⁴மஜ்ஜ²ஸ்மிஞ்ஹி ‘‘கதி நு கோ² வட்டிந்த்³ரியானீ’’தி கதா² உத³பாதி³, அத² ப⁴க³வா வட்டிந்த்³ரியானி த³ஸ்ஸேந்தோ தீணிமானி பி⁴க்க²வேதிஆதி³மாஹ.

3. அஞ்ஞிந்த்³ரியஸுத்தவண்ணனா

493. ததியே அனஞ்ஞாதஞ்ஞஸ்ஸாமீதிந்த்³ரியந்தி ‘‘அனமதக்³கே³ ஸம்ஸாரே அஜானிதபுப்³ப³ம் த⁴ம்மம் ஜானிஸ்ஸாமீ’’தி படிபன்னஸ்ஸ ஸோதாபத்திமக்³க³க்க²ணே உப்பன்னம் இந்த்³ரியம். அஞ்ஞிந்த்³ரியந்தி தேஸம்யேவ ஞாதத⁴ம்மானம் ஆஜானனாகாரேன ஸோதாபத்திப²லாதீ³ஸு ச²ஸு டா²னேஸு உப்பன்னம் இந்த்³ரியம். அஞ்ஞாதாவிந்த்³ரியந்தி அஞ்ஞாதாவீஸு அரஹத்தப²லத⁴ம்மேஸு உப்பன்னம் இந்த்³ரியம். தத்த² தத்த² தேன தேனாகாரேன உப்பன்னஸ்ஸ ஞாணஸ்ஸேவேதம் அதி⁴வசனம். இத³ம்பி ஸுத்தம் அத்து²ப்பத்திகமேவ. ஸங்க⁴மஜ்ஜ²ஸ்மிஞ்ஹி ‘‘கதி நு கோ² லோகுத்தரிந்த்³ரியானீ’’தி கதா² உத³பாதி³, அத² ப⁴க³வா தானி த³ஸ்ஸேந்தோ தீணிமானி, பி⁴க்க²வே, இந்த்³ரியானீதிஆதி³மாஹ.

4. ஏகபீ³ஜீஸுத்தவண்ணனா

494. சதுத்தே² ததோ முது³தரேஹீதி விபஸ்ஸனதோ நிஸ்ஸக்கம் வேதி³தப்³ப³ம். ஸமத்தானி ஹி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி நாம ஹோந்தி, ததோ முது³தரானி அந்தராபரினிப்³பா³யிஸ்ஸ விபஸ்ஸனிந்த்³ரியானி, ததோ முது³தரானி உபஹச்சபரினிப்³பா³யிஸ்ஸ, ததோ முது³தரானி அஸங்கா²ரபரினிப்³பா³யிஸ்ஸ, ததோ முது³தரானி ஸஸங்கா²ரபரினிப்³பா³யிஸ்ஸ, ததோ முது³தரானி உத்³த⁴ம்ஸோதஅகனிட்ட²கா³மிஸ்ஸ விபஸ்ஸனிந்த்³ரியானி நாம. இதா⁴பி புரிமனயேனேவ அரஹத்தமக்³கே³ ட²த்வா பஞ்ச நிஸ்ஸக்கானி நீஹரிதப்³பா³னி.

யதா² பன புரிமனயே ஸகதா³கா³மிமக்³கே³ ட²த்வா தீணி நிஸ்ஸக்கானி, ஏவமித⁴ பஞ்ச நீஹரிதப்³பா³னி. ஸகதா³கா³மிமக்³க³ஸ்ஸ ஹி விபஸ்ஸனிந்த்³ரியேஹி முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி, ஸோதாபத்திமக்³க³ஸ்ஸ ச தேஹி விபஸ்ஸனிந்த்³ரியேஹி முது³தரானி ஏகபீ³ஜிஆதீ³னம் மக்³க³ஸ்ஸ விபஸ்ஸனிந்த்³ரியானி.

ஏத்த² ச ஏகபீ³ஜீதிஆதீ³ஸு யோ ஸோதாபன்னோ ஹுத்வா ஏகமேவ அத்தபா⁴வம் ஜனேத்வா அரஹத்தம் பாபுணாதி, அயம் ஏகபீ³ஜீ நாம. யதா²ஹ ‘‘கதமோ ச புக்³க³லோ ஏகபீ³ஜீ, இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ ஏகஞ்ஞேவ மானுஸகம் ப⁴வம் ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி. அயம் வுச்சதி புக்³க³லோ ஏகபீ³ஜீ’’தி (பு. ப. 33).

யோ பன த்³வே தயோ ப⁴வே ஸம்ஸரித்வா து³க்க²ஸ்ஸந்தம் கரோதி, அயம் கோலம்கோலோ நாம. யதா²ஹ ‘‘கதமோ ச புக்³க³லோ கோலம்கோலோ. இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ த்³வே வா தீணி வா குலானி ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி. அயம் வுச்சதி புக்³க³லோ கோலம்கோலோ’’தி (பு. ப. 32). தத்த² குலானீதி ப⁴வா வேதி³தப்³பா³. ‘‘த்³வே வா தீணி வா’’தி இத³ம் தே³ஸனாமத்தமேவ, யாவ ச²ட்ட²ப⁴வா ஸம்ஸரந்தோ பன கோலம்கோலோவ ஹோதி.

யஸ்ஸ ஸத்தக்க²த்தும் பரமா உபபத்தி, அட்ட²மம் ப⁴வம் நாதி³யதி, அயம் ஸத்தக்க²த்துபரமோ நாம. யதா²ஹ ‘‘கதமோ ச புக்³க³லோ ஸத்தக்க²த்துபரமோ. இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ ஸத்தக்க²த்தும் தே³வே ச மனுஸ்ஸே ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி, அயம் வுச்சதி புக்³க³லோ ஸத்தக்க²த்துபரமோ’’தி (பு. ப. 31).

ப⁴க³வதா க³ஹிதனாமவஸேனேவ சேதானி தேஸம் நாமானி. ‘‘ஏத்தகஞ்ஹி டா²னம் க³தோ ஏகபீ³ஜீ நாம ஹோதி, ஏத்தகம் கோலம்கோலோ, ஏத்தகம் ஸத்தக்க²த்துபரமோ’’தி ப⁴க³வதா ஏதேஸம் நாமம் க³ஹிதம். நியமதோ பன ‘‘அயம் ஏகபீ³ஜீ, அயம் கோலம்கோலோ, அயம் ஸத்தக்க²த்துபரமோ’’தி நத்தி².

கோ பன நேஸம் ஏதம் பபே⁴த³ம் நியமேதீதி? கேசி பன தே²ரா ‘‘புப்³ப³ஹேது நியமேதீ’’தி வத³ந்தி, கேசி ‘‘பட²மமக்³கோ³’’, கேசி ‘‘உபரிம தயோ மக்³கா³’’, கேசி ‘‘திண்ணம் மக்³கா³னம் விபஸ்ஸனா’’தி. தத்த² ‘‘புப்³ப³ஹேது நியமேதீ’’தி வாதே³ பட²மமக்³க³ஸ்ஸ உபனிஸ்ஸயோ கதோ நாம ஹோதி, உபரி தயோ மக்³கா³ அனுபனிஸ்ஸயா உப்பன்னாதி வசனம் ஆபஜ்ஜதி. ‘‘பட²மமக்³கோ³ நியமேதீ’’தி வாதே³ உபரி திண்ணம் மக்³கா³னம் நிரத்த²கதா ஆபஜ்ஜதி. ‘‘உபரி தயோ மக்³கா³ நியமேந்தீ’’தி வாதே³ பட²மமக்³கே³ அனுப்பன்னேவ உபரி தயோ மக்³கா³ உப்பன்னாதி ஆபஜ்ஜதி. ‘‘திண்ணம் மக்³கா³னம் விபஸ்ஸனா நியமேதீ’’தி வாதோ³ பன யுஜ்ஜதி. ஸசே ஹி உபரி திண்ணம் மக்³கா³னம் விபஸ்ஸனா ப³லவதீ ஹோதி, ஏகபீ³ஜீ நாம ஹோதி, ததோ மந்த³தராய கோலம்கோலோ, ததோ மந்த³தராய ஸத்தக்க²த்துபரமோதி.

ஏகச்சோ ஹி ஸோதாபன்னோ வட்டஜ்ஜா²ஸயோ ஹோதி வட்டாபி⁴ரதோ புனப்புனம் வட்டஸ்மிம்யேவ விசரதி ஸந்தி³ஸ்ஸதி. அனாத²பிண்டி³கோ ஸேட்டி², விஸாகா² உபாஸிகா, சூளரத²மஹாரதா² தே³வபுத்தா, அனேகவண்ணோ தே³வபுத்தோ, ஸக்கோ தே³வராஜா, நாக³த³த்தோ தே³வபுத்தோதி இமே ஹி ஏத்தகா ஜனா வட்டஜ்ஜா²ஸயா வட்டாபி⁴ரதா ஆதி³தோ பட்டா²ய ச² தே³வலோகே ஸோதே⁴த்வா அகனிட்டே² ட²த்வா பரினிப்³பா³யிஸ்ஸந்தி, இமே இத⁴ ந க³ஹிதா. ந கேவலஞ்சிமே, யோபி மனுஸ்ஸேஸுயேவ ஸத்தக்க²த்தும் ஸம்ஸரித்வா அரஹத்தம் பாபுணாதி, யோபி தே³வலோகே நிப்³ப³த்தோ தே³வேஸுயேவ ஸத்தக்க²த்தும் அபராபரம் ஸம்ஸரித்வா அரஹத்தம் பாபுணாதி, இமேபி இத⁴ ந க³ஹிதா. காலேன தே³வே, காலேன மனுஸ்ஸே ஸம்ஸரித்வா பன அரஹத்தம் பாபுணந்தோவ இத⁴ க³ஹிதோ. தஸ்மா ஸத்தக்க²த்துபரமோதி இத³ம் இத⁴ட்ட²கவோகிண்ணஸுக்க²விபஸ்ஸகஸ்ஸ நாமம் கதி²தந்தி வேதி³தப்³ப³ம்.

த⁴ம்மானுஸாரீ ஸத்³தா⁴னுஸாரீதி ஏத்த² பன இமஸ்மிம் ஸாஸனே லோகுத்தரத⁴ம்மம் நிப்³ப³த்தேந்தஸ்ஸ த்³வே து⁴ரானி, த்³வே ஸீஸானி, த்³வே அபி⁴னிவேஸா – ஸத்³தா⁴து⁴ரம், பஞ்ஞாது⁴ரம், ஸத்³தா⁴ஸீஸம், பஞ்ஞாஸீஸம், ஸத்³தா⁴பி⁴னிவேஸோ, பஞ்ஞாபி⁴னிவேஸோதி. தத்த² யோ பி⁴க்கு² ‘‘ஸசே ஸத்³தா⁴ய ஸக்கா நிப்³ப³த்தேதும், நிப்³ப³த்தேஸ்ஸாமி லோகுத்தரமக்³க³’’ந்தி ஸத்³த⁴ம் து⁴ரம் கத்வா ஸோதாபத்திமக்³க³ம் நிப்³ப³த்தேதி, ஸோ மக்³க³க்க²ணே ஸத்³தா⁴னுஸாரீ நாம ஹோதி. ப²லக்க²ணே பன ஸத்³தா⁴விமுத்தோ நாம ஹுத்வா ஏகபீ³ஜீ கோலம்கோலோ ஸத்தக்க²த்துபரமோதி திவிதோ⁴ ஹோதி. தத்த² ஏகேகோ து³க்கா²படிபதா³தி³வஸேன சதுப்³பி³த⁴பா⁴வம் ஆபஜ்ஜதீதி ஸத்³தா⁴து⁴ரேன த்³வாத³ஸ ஜனா ஹோந்தி.

யோ பன ‘‘ஸசே பஞ்ஞாய ஸக்கா நிப்³ப³த்தேதும், நிப்³ப³த்தேஸ்ஸாமி லோகுத்தரமக்³க³’’ந்தி பஞ்ஞம் து⁴ரம் கத்வா ஸோதாபத்திமக்³க³ம் நிப்³ப³த்தேதி, ஸோ மக்³க³க்க²ணே த⁴ம்மானுஸாரீ நாம ஹோதி. ப²லக்க²ணே பன பஞ்ஞாவிமுத்தோ நாம ஹுத்வா ஏகபீ³ஜிஆதி³பே⁴தே³ன த்³வாத³ஸபே⁴தோ³வ ஹோதி. ஏவம் த்³வே மக்³க³ட்டா² ப²லக்க²ணே சதுவீஸதி ஸோதாபன்னா ஹோந்தீதி.

திபிடகதிஸ்ஸத்தே²ரோ கிர ‘‘தீணி பிடகானி ஸோதே⁴ஸ்ஸாமீ’’தி பரதீரம் க³தோ. தம் ஏகோ குடும்பி³கோ சதூஹி பச்சயேஹி உபட்டா²ஸி, தே²ரோ ஆக³மனகாலே ‘‘க³ச்சா²மி உபாஸகா’’தி ஆஹ. ‘‘கஹம் ப⁴ந்தே’’தி? ‘‘அம்ஹாகம் ஆசரியுபஜ்ஜா²யானம் ஸந்திக’’ந்தி. ‘‘ந ஸக்கா, ப⁴ந்தே, மயா க³ந்தும், ப⁴த்³த³ந்தம் பன நிஸ்ஸாய மயா ஸாஸனஸ்ஸ கு³ணோ ஞாதோ, தும்ஹாகம் பரம்முகா² கீதி³ஸம் பி⁴க்கு²ம் உபஸங்கமாமீ’’தி? அத² நம் தே²ரோ ஆஹ – ‘‘யோ பி⁴க்கு² சதுவீஸதி ஸோதாபன்னே த்³வாத³ஸ ஸகதா³கா³மீ அட்ட²சத்தாலீஸ அனாகா³மீ த்³வாத³ஸ அரஹந்தே த³ஸ்ஸேத்வா த⁴ம்மகத²ம் கதே²தும் ஸக்கோதி, ஏவரூபம் பி⁴க்கு²ம் உபட்டா²தும் வட்டதீ’’தி. இமஸ்மிம் ஸுத்தே விபஸ்ஸனா கதி²தாதி.

5-10. ஸுத்³த⁴கஸுத்தாதி³வண்ணனா

495-500. பஞ்சமே சக்கு² ச தம் சக்கு²த்³வாரே நிப்³ப³த்தானம் த⁴ம்மானம் ஆதி⁴பதேய்யஸங்கா²தேன இந்த³ட்டே²ன இந்த்³ரியஞ்சாதி சக்கு²ந்த்³ரியம். ஸோதிந்த்³ரியாதீ³ஸுபி ஏஸேவ நயோ. ஸேஸம் ஸப்³ப³த்த² உத்தானமேவ. இமஸ்மிம் வக்³கே³ பட²மஸுத்தஞ்சேவ ச²ட்டா²தீ³னி ச பஞ்சாதி ச² ஸுத்தானி சதுஸச்சவஸேன கதி²தானீதி.

ச²ளிந்த்³ரியவக்³கோ³ ததியோ.