1. ஸுத்³தி⁴கவக்³கோ³

1. ஸுத்³தி⁴கஸுத்தவண்ணனா

471. இந்த்³ரியஸம்யுத்தஸ்ஸ பட²மே ஸத்³தி⁴ந்த்³ரியம் ஸதிந்த்³ரியம் பஞ்ஞிந்த்³ரியந்தி இமானி தீணி சதுபூ⁴மககுஸலவிபாகேஸு சேவ கிரியாஸு ச லப்³ப⁴ந்தி. வீரியிந்த்³ரியஸமாதி⁴ந்த்³ரியானி சதுபூ⁴மககுஸலே அகுஸலே விபாகே கிரியாயாதி ஸப்³ப³த்த² லப்³ப⁴ந்தி. இதி இத³ம் ஸுத்தம் சதுபூ⁴மகஸப்³ப³ஸங்கா³ஹகத⁴ம்மபரிச்சே²த³வஸேன வுத்தந்தி வேதி³தப்³ப³ம்.

7. து³தியஸமணப்³ராஹ்மணஸுத்தவண்ணனா

477. ஸத்தமே ஸத்³தி⁴ந்த்³ரியம் நப்பஜானந்தீதி து³க்க²ஸச்சவஸேன ந பஜானந்தி. ஸத்³தி⁴ந்த்³ரியஸமுத³யம் நப்பஜானந்தீதி ஸமுத³யஸச்சவஸேன ந பஜானந்தி. ஏவம் நிரோத⁴ம் நிரோத⁴ஸச்சவஸேன, படிபத³ம் மக்³க³ஸச்சவஸேனாதி. ஸேஸேஸுபி ஏஸேவ நயோ.

ஸுக்கபக்கே² பன அதி⁴மோக்க²வஸேன ஆவஜ்ஜனஸமுத³யா ஸத்³தி⁴ந்த்³ரியஸமுத³யோ ஹோதி, பக்³க³ஹவஸேன ஆவஜ்ஜனஸமுத³யா வீரியிந்த்³ரியஸமுத³யோ, உபட்டா²னவஸேன ஆவஜ்ஜனஸமுத³யா ஸதிந்த்³ரியஸமுத³யோ, அவிக்கே²பவஸேன ஆவஜ்ஜனஸமுத³யா ஸமாதி⁴ந்த்³ரியஸமுத³யோ, த³ஸ்ஸனவஸேன ஆவஜ்ஜனஸமுத³யா பஞ்ஞிந்த்³ரியஸமுத³யோ ஹோதி. ததா² ச²ந்த³வஸேன ஆவஜ்ஜனஸமுத³யா ஸத்³தி⁴ந்த்³ரியஸமுத³யோ ஹோதி, ச²ந்த³வஸேன ஆவஜ்ஜனஸமுத³யா வீரியஸதிஸமாதி⁴பஞ்ஞிந்த்³ரியஸமுத³யோ ஹோதி. மனஸிகாரவஸேன ஆவஜ்ஜனஸமுத³யா ஸத்³தி⁴ந்த்³ரியஸமுத³யோ ஹோதி. மனஸிகாரவஸேன ஆவஜ்ஜனஸமுத³யா வீரியஸதிஸமாதி⁴பஞ்ஞிந்த்³ரியஸமுத³யோ ஹோதீதி ஏவம்பி அத்தோ² வேதி³தப்³போ³. இமேஸு படிபாடியா ச²ஸு ஸுத்தேஸு சதுஸச்சமேவ கதி²தம்.

8. த³ட்ட²ப்³ப³ஸுத்தவண்ணனா

478. அட்ட²மே கத்த² ச, பி⁴க்க²வே, ஸத்³தி⁴ந்த்³ரியம் த³ட்ட²ப்³ப³ம், சதூஸு ஸோதாபத்தியங்கே³ஸூதிஆதி³ இமேஸம் இந்த்³ரியானம் ஸவிஸயே ஜேட்ட²கபா⁴வத³ஸ்ஸனத்த²ம் வுத்தம். யதா² ஹி சத்தாரோ ஸேட்டி²புத்தா ராஜாதி ராஜபஞ்சமேஸு ஸஹாயேஸு ‘‘நக்க²த்தம் கீளிஸ்ஸாமா’’தி வீதி²ம் ஓதிண்ணேஸு ஏகஸ்ஸ ஸேட்டி²புத்தஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ – ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. து³தியஸ்ஸ, ததியஸ்ஸ, சதுத்த²ஸ்ஸ கே³ஹம் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ – ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. அத² ஸப்³ப³பச்சா² ரஞ்ஞோ கே³ஹம் க³தகாலே கிஞ்சாபி ராஜா ஸப்³ப³த்த² இஸ்ஸரோ, இமஸ்மிம் பன காலே அத்தனோ கே³ஹேயேவ – ‘‘இமேஸம் கா²த³னீயம் போ⁴ஜனீயம் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. ஏவமேவ ஸத்³தா⁴பஞ்சமகேஸு இந்த்³ரியேஸு தேஸு ஸஹாயேஸு ஏகதோ வீதி²ம் ஓதரந்தேஸு விய ஏகாரம்மணே உப்பஜ்ஜமானேஸுபி யதா² பட²மஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸோதாபத்தியங்கா³னி பத்வா அதி⁴மோக்க²லக்க²ணம் ஸத்³தி⁴ந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² து³தியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸம்மப்பதா⁴னானி பத்வா பக்³க³ஹலக்க²ணம் வீரியிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² ததியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஸதிபட்டா²னானி பத்வா உபட்டா²னலக்க²ணம் ஸதிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. யதா² சதுத்த²ஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவம் ஜா²னவிமோக்கே² பத்வா அவிக்கே²பலக்க²ணம் ஸமாதி⁴ந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தி. ஸப்³ப³பச்சா² ரஞ்ஞோ கே³ஹம் க³தகாலே பன யதா² இதரே சத்தாரோ துண்ஹீ நிஸீத³ந்தி, ராஜாவ கே³ஹே விசாரேதி, ஏவமேவ அரியஸச்சானி பத்வா பஜானனலக்க²ணம் பஞ்ஞிந்த்³ரியமேவ ஜேட்ட²கம் ஹோதி புப்³ப³ங்க³மம், ஸேஸானி தத³ன்வயானி ஹோந்தீதி.

9-10. பட²மவிப⁴ங்க³ஸுத்தாதி³வண்ணனா

479-480. நவமே ஸதினேபக்கேனாதி ஏத்த² நிபகஸ்ஸ பா⁴வோ நேபக்கம், பஞ்ஞாயேதம் நாமம். கஸ்மா பன ஸதிபா⁴ஜனே பஞ்ஞா வுத்தாதி? ஸதியா ப³லவபா⁴வத³ஸ்ஸனத்த²ம். ப³லவஸதி ஹி இத⁴ அதி⁴ப்பேதா. ஸா ச பஞ்ஞாஸம்பயுத்தாவ ப³லவதீ ஹோதி, ந விப்பயுத்தாதி பஞ்ஞாஸம்பயுத்தஸதிம் த³ஸ்ஸேந்தோ ஏவமாஹ. சிரகதந்தி சிரகாலம் கதம் தா³னம் வா ஸீலம் வா உபோஸத²கம்மம் வா. சிரபா⁴ஸிதந்தி ‘‘அஸுகஸ்மிம் டா²னே அஸுகம் நாம பா⁴ஸித’’ந்தி ஏவம் சிரகாலே பா⁴ஸிதம். வோஸ்ஸக்³கா³ரம்மணம் கத்வாதி நிப்³பா³னாரம்மணம் கத்வா. உத³யத்த²கா³மினியாதி உத³யஞ்ச அத்த²ஞ்ச க³ச்ச²ந்தியா, உத³யப்³ப³யபரிக்³க³ஹிகாயாதி அத்தோ². இமஸ்மிம் ஸுத்தே ஸத்³தா⁴ஸதிபஞ்ஞிந்த்³ரியானி புப்³ப³பா⁴கா³னி, வீரியிந்த்³ரியம் மிஸ்ஸகம், ஸமாதி⁴ந்த்³ரியம் நிப்³ப³த்திதலோகுத்தரமேவ கதி²தம். த³ஸமேபி அயமேவ த⁴ம்மபரிச்சே²தோ³தி.

ஸுத்³தி⁴கவக்³கோ³ பட²மோ.