6. பாதிமோக்க²ஸம்வரஸுத்தவண்ணனா

412. ச²ட்டே² பாதிமோக்க²ஸம்வரஸம்வுதோதி சதுன்னம் ஸீலானம் ஜேட்ட²கஸீலம் த³ஸ்ஸேந்தோ ஏவமாஹ. திபிடகசூளனாக³த்தே²ரோ பனாஹ – ‘‘பாதிமோக்க²ஸம்வரோவ ஸீலம், இதரானி தீணி ஸீலந்தி வுத்தட்டா²னம் நாம நத்தீ²’’தி. வத்வா தம் அனுஜானந்தோ ஆஹ – ‘‘இந்த்³ரியஸம்வரோ நாம ச²த்³வாரரக்க²ணமத்தமேவ, ஆஜீவபாரிஸுத்³தி⁴ த⁴ம்மேனேவ ஸமேன பச்சயுப்பத்திமத்தகம், பச்சயஸன்னிஸ்ஸிதம் படிலத்³த⁴பச்சயே இத³மத்த²ந்தி பச்சவேக்கி²த்வா பரிபு⁴ஞ்ஜனமத்தகம். நிப்பரியாயேன பாதிமோக்க²ஸம்வரோவ ஸீலம். யஸ்ஸ ஸோ பி⁴ன்னோ, அயம் சி²ன்னஸீஸோ விய புரிஸோ ஹத்த²பாதே³, ஸேஸானி ரக்கி²ஸ்ஸதீதி ந வத்தப்³போ³. யஸ்ஸ பன ஸோ அரோகோ³, அயம் அச்சி²ன்னஸீஸோ விய புரிஸோ ஜீவிதம், ஸேஸானி புன பாகதிகானி கத்வா ரக்கி²தும்பி ஸக்கோதீ’’தி. தஸ்மா பாதிமோக்க²ஸம்வரோவ ஸீலம், தேன பாதிமோக்க²ஸம்வரேன ஸம்வுதோதி பாதிமோக்க²ஸம்வரஸம்வுதோ, உபேதோ ஸமன்னாக³தோதி அத்தோ².

ஆசாரகோ³சரஸம்பன்னோதி ஆசாரேன ச கோ³சரேன ச ஸம்பன்னோ. அணுமத்தேஸூதி அப்பமத்தகேஸு. வஜ்ஜேஸூதி அகுஸலத⁴ம்மேஸு. ப⁴யத³ஸ்ஸாவீதி ப⁴யத³ஸ்ஸீ. ஸமாதா³யாதி ஸம்மா ஆதி³யித்வா. ஸிக்க²ஸ்ஸு ஸிக்கா²பதே³ஸூதி ஸிக்கா²பதே³ஸு தம் தம் ஸிக்கா²பத³ம் ஸமாதி³யித்வா ஸிக்க², யம் யம் பன கிஞ்சி ஸிக்கா²பதே³ஸு ஸிக்கா²கோட்டா²ஸேஸு ஸிக்கி²தப்³ப³ம் காயிகம் வா வாசஸிகம் வா, தம் தம் ஸப்³ப³ம் ஸம்மா ஆதா³ய ஸிக்க²ஸ்ஸூதி அயமேத்த² ஸங்கே²பத்தோ². வித்தா²ரோ பன விஸுத்³தி⁴மக்³கே³ (விஸுத்³தி⁴. 1.14) வுத்தோ. இதி இமஸ்மிம் ஸுத்தே பாதிமோக்க²ஸம்வரஸீலமேவ கதி²தம்.