7. ஆனாபானவக்³கோ³

1. அட்டி²கமஹப்ப²லஸுத்தாதி³வண்ணனா

238. ஸத்தமாதீ³ஸு அட்டி²கஸஞ்ஞாதி அட்டி²கம் அட்டி²கந்தி பா⁴வேந்தஸ்ஸ உப்பன்னஸஞ்ஞா. தம் பனேதம் பா⁴வயதோ யாவ நிமித்தம் ந உப்பஜ்ஜதி, தாவ ச²விபி சம்மம்பி உபட்டா²தி. நிமித்தே பன உப்பன்னே ச²விசம்மானி நேவ உபட்ட²ஹந்தி, ஸங்க²வண்ணோ ஸுத்³த⁴அட்டி²கஸங்கா⁴டோவ உபட்டா²தி ஹத்தி²க்க²ந்த⁴க³தம் த⁴ம்மிகதிஸ்ஸராஜானம் ஓலோகேந்தஸ்ஸ ஸாமணேரஸ்ஸ விய, படிமக்³கே³ ஹஸமானம் இத்தி²ம் ஓலோகேந்தஸ்ஸ சேதியபப்³ப³தவாஸினோ திஸ்ஸத்தே²ரஸ்ஸ விய சாதி. வத்தூ²னி விஸுத்³தி⁴மக்³கே³ (விஸுத்³தி⁴. 1.15) வித்தா²ரிதானி. ஸதி வா உபாதி³ஸேஸேதி க³ஹணஸேஸே உபாதா³னஸேஸே விஜ்ஜமானம்ஹி.

2-10. புளவகஸுத்தாதி³வண்ணனா

239-247. புளவகஸஞ்ஞாதி புளவம் புளவந்தி பா⁴வேந்தஸ்ஸ உப்பன்னஸஞ்ஞா. வினீலகஸஞ்ஞாதீ³ஸுபி ஏஸேவ நயோ. வினிச்ச²யகதா² பனேத்த² ஸத்³தி⁴ம் பா⁴வனானயேன விஸுத்³தி⁴மக்³கே³ (விஸுத்³தி⁴. 1.102) வுத்தா. மேத்தாத³யோ திகசதுக்கஜ்ஜா²னவஸேன வேதி³தப்³பா³, உபேக்கா² சதுத்த²ஜ்ஜா²னவஸேனேவ.