9. அனிமித்தபஞ்ஹாஸுத்தவண்ணனா

340. அனிமித்தம் சேதோஸமாதி⁴ந்தி நிச்சனிமித்தாதீ³னி பஹாய பவத்தம் விபஸ்ஸனாஸமாதி⁴ம்யேவ ஸந்தா⁴யேதம் வுத்தந்தி. நிமித்தானுஸாரி விஞ்ஞாணம் ஹோதீதி ஏவம் இமினா விபஸ்ஸனாஸமாதி⁴விஹாரேன விஹரதோ விபஸ்ஸனாஞாணே திக்கே² ஸூரே வஹமானே. யதா² நாம புரிஸஸ்ஸ திகி²ணேன ப²ரஸுனா ருக்க²ம் சி²ந்த³ந்தஸ்ஸ ‘‘ஸுட்டு² வத மே ப²ரஸு வஹதீ’’தி க²ணே க²ணே ப²ரஸுதா⁴ரம் ஓலோகேந்தஸ்ஸ சே²ஜ்ஜகிச்சம் ந நிப்ப²ஜ்ஜதி, ஏவம் தே²ரஸ்ஸாபி ‘‘ஸூரம் வத மே ஹுத்வா ஞாணம் வஹதீ’’தி விபஸ்ஸனம் ஆரப்³ப⁴ நிகந்தி உப்பஜ்ஜதி. அத² விபஸ்ஸனாகிச்சம் ஸாதே⁴தும் நாஸக்கி². தம் ஸந்தா⁴ய வுத்தம் ‘‘நிமித்தானுஸாரி விஞ்ஞாணம் ஹோதீ’’தி. ஸப்³ப³னிமித்தானம் அமனஸிகாரா அனிமித்தம் சேதோஸமாதி⁴ம் உபஸம்பஜ்ஜ விஹாஸிந்தி ஸப்³பே³ஸம் நிச்சஸுக²அத்தனிமித்தானம் அமனஸிகாரேன அனிமித்தம் வுட்டா²னகா³மினிவிபஸ்ஸனாஸம்பயுத்தம் சேதோஸமாதி⁴ம் நிப்³பா³னாரம்மணம் உபரிமக்³க³ப²லஸமாதி⁴ம் உபஸம்பஜ்ஜ விஹாஸிம்.