9-10. பட²மத்³வயஸுத்தாதி³வண்ணனா

92-93. நவமே த்³வயந்தி த்³வே த்³வே கோட்டா²ஸே. த³ஸமே இத்தே²தம் த்³வயந்தி ஏவமேதம் த்³வயம். சலஞ்சேவ ப்³யத²ஞ்சாதி அத்தனோ ஸபா⁴வேன அஸண்ட²ஹனதோ சலதி சேவ ப்³யத²தி ச. யோபி ஹேது யோபி பச்சயோதி சக்கு²விஞ்ஞாணஸ்ஸ வத்தா²ரம்மணம் ஹேது சேவ பச்சயோ ச. குதோ நிச்சம் ப⁴விஸ்ஸதீதி கேன காரணேன நிச்சம் ப⁴விஸ்ஸதி. யதா² பன தா³ஸஸ்ஸ தா³ஸியா குச்சி²ஸ்மிம் ஜாதோ புத்தோ பரோவ தா³ஸோ ஹோதி, ஏவம் அனிச்சமேவ ஹோதீதி அத்தோ². ஸங்க³தீதி ஸஹக³தி. ஸன்னிபாதோதி ஏகதோ ஸன்னிபதனம். ஸமவாயோதி ஏகதோ ஸமாக³மோ. அயம் வுச்சதி சக்கு²ஸம்ப²ஸ்ஸோதி இமினா ஸங்க³திஸன்னிபாதஸமவாயஸங்கா²தேன பச்சயேன உப்பன்னத்தா பச்சயனாமேனேவ ஸங்க³தி ஸன்னிபாதோ ஸமவாயோதி அயம் வுச்சதி சக்கு²ஸம்ப²ஸ்ஸோ.

ஸோபி ஹேதூதி ப²ஸ்ஸஸ்ஸ வத்து² ஆரம்மணம் ஸஹஜாதா தயோ க²ந்தா⁴தி அயம் ஹேது. பு²ட்டோ²தி உபயோக³த்தே² பச்சத்தம், ப²ஸ்ஸேன பு²ட்ட²மேவ கோ³சரம் வேத³னா வேதே³தி, சேதனா சேதேதி, ஸஞ்ஞா ஸஞ்ஜானாதீதி அத்தோ². பு²ட்டோ²தி வா ப²ஸ்ஸஸமங்கீ³புக்³க³லோ, ப²ஸ்ஸேன பு²ட்டா²ரம்மணமேவ வேத³னாதீ³ஹி வேதே³தி சேதேதி ஸஞ்ஜானாதீதிபி வுத்தம் ஹோதி. இதி இமஸ்மிம் ஸுத்தே ஸமதிம்ஸக்க²ந்தா⁴ கதி²தா ஹோந்தி. கத²ம்? சக்கு²த்³வாரே தாவ வத்து² சேவ ஆரம்மணஞ்ச ரூபக்க²ந்தோ⁴, பு²ட்டோ² வேதே³தீதி வேத³னாக்க²ந்தோ⁴, சேதேதீதி ஸங்கா²ரக்க²ந்தோ⁴, ஸஞ்ஜானாதீதி ஸஞ்ஞாக்க²ந்தோ⁴, விஜானாதீதி விஞ்ஞாணக்க²ந்தோ⁴தி. ஸேஸத்³வாரேஸுபி ஏஸேவ நயோ. மனோத்³வாரேபி ஹி வத்து²ரூபம் ஏகந்ததோ ரூபக்க²ந்தோ⁴, ரூபே பன ஆரம்மணே ஸதி ஆரம்மணம்பி ரூபக்க²ந்தோ⁴தி ச² பஞ்சகாதிம்ஸ ஹோந்தி. ஸங்கே²பேன பனேதே ச²ஸுபி த்³வாரேஸு பஞ்சேவ க²ந்தா⁴தி ஸபச்சயே பஞ்சக்க²ந்தே⁴ அனிச்சாதி வித்தா²ரேத்வா வுச்சமானே பு³ஜ்ஜ²னகானம் அஜ்ஜா²ஸயேன இத³ம் ஸுத்தம் தே³ஸிதந்தி.

ச²ன்னவக்³கோ³ நவமோ.