3. கும்மோபமஸுத்தவண்ணனா

240. ததியே கும்மோதி அட்டி²கும்மோ. கச்ச²போதி தஸ்ஸேவ வேவசனம். அனுனதீ³தீரேதி நதி³யா அனுதீரே. கோ³சரபஸுதோதி ‘‘ஸசே கிஞ்சி ப²லாப²லம் லபி⁴ஸ்ஸாமி, கா²தி³ஸ்ஸாமீ’’தி கோ³சரத்தா²ய பஸுதோ உஸ்ஸுக்கோ தன்னிப³ந்தோ⁴. ஸமோத³ஹித்வாதி ஸமுக்³கே³ விய பக்கி²பித்வா. ஸங்கஸாயதீதி அச்ச²தி. ஸமோத³ஹந்தி ஸமோத³ஹந்தோ ட²பேந்தோ. இத³ம் வுத்தம் ஹோதி – யதா² கும்மோ அங்கா³னி ஸகே கபாலே ஸமோத³ஹந்தோ ஸிங்கா³லஸ்ஸ ஓதாரம் ந தே³தி, ந ச நம் ஸிங்கா³லோ பஸஹதி, ஏவம் பி⁴க்கு² அத்தனோ மனோவிதக்கே ஸகே ஆரம்மணகபாலே ஸமோத³ஹந்தோ கிலேஸமாரஸ்ஸ ஓதாரம் ந தே³தி, ந ச நம் மாரோ பஸஹதி.

அனிஸ்ஸிதோதி தண்ஹாதி³ட்டி²னிஸ்ஸயேஹி அனிஸ்ஸிதோ. அஞ்ஞமஹேட²யானோதி அஞ்ஞம் கஞ்சி புக்³க³லம் அவிஹேடே²ந்தோ. பரினிப்³பு³தோதி கிலேஸபரினிப்³பா³னேன பரினிப்³பு³தோ. நூபவதே³ய்ய கஞ்சீதி அஞ்ஞம் கஞ்சி புக்³க³லம் ஸீலவிபத்தியா வா ஆசாரவிபத்தியா வா அத்தானம் உக்கம்ஸேதுகாமதாய வா பரம் வம்பே⁴துகாமதாய வா ந உபவதே³ய்ய, அஞ்ஞத³த்து² பஞ்ச த⁴ம்மே அஜ்ஜ²த்தம் உபட்ட²பேத்வா, ‘‘காலேன வக்கா²மி, நோ அகாலேன, பூ⁴தேன வக்கா²மி, நோ அபூ⁴தேன, ஸண்ஹேன வக்கா²மி, நோ ப²ருஸேன, அத்த²ஸம்ஹிதேன வக்கா²மி, நோ அனத்த²ஸம்ஹிதேன, மேத்தசித்தோ வக்கா²மி, நோ தோ³ஸந்தரோ’’தி ஏவம் உல்லும்பனஸபா⁴வஸண்டி²தேனேவ சித்தேன விஹரதி.