1. ஆஸீவிஸோபமஸுத்தவண்ணனா

238. ஆஸீவிஸவக்³க³ஸ்ஸ பட²மே பி⁴க்கூ² ஆமந்தேஸீதி ஏகசாரிகத்³விசாரிகதிசாரிகசதுசாரிகபஞ்சசாரிகே ஸபா⁴க³வுத்தினோ காரகே யுத்தபயுத்தே ஸப்³பே³பி து³க்க²லக்க²ணகம்மட்டா²னிகே பரிவாரேத்வா நிஸின்னே யோகா³வசரே பி⁴க்கூ² ஆமந்தேஸி. இத³ஞ்ஹி ஸுத்தம் புக்³க³லஜ்ஜா²ஸயேன வுத்தம். புக்³க³லேஸுபி விபஞ்சிதஞ்ஞூனம் தி³ஸாவாஸிகானம் து³க்க²லக்க²ணகம்மட்டா²னிகானம் உபட்டா²னவேலாய ஆக³ந்த்வா ஸத்தா²ரம் பரிவாரேத்வா நிஸின்னானம் வஸேன வுத்தம். ஏவம் ஸந்தேபி உக்³க⁴டிதஞ்ஞூஆதீ³னம் சதுன்னம்பி புக்³க³லானம் பச்சயபூ⁴தமேவேதம். உக்³க⁴டிதஞ்ஞூ புக்³க³லோ ஹி இமஸ்ஸ ஸுத்தஸ்ஸ மாதிகானிக்கே²பேனேவ அரஹத்தம் பாபுணிஸ்ஸதி, விபஞ்சிதஞ்ஞூ மாதிகாய வித்தா²ரபா⁴ஜனேன, நேய்யபுக்³க³லோ இமமேவ ஸுத்தம் ஸஜ்ஜா²யந்தோ பரிபுச்ச²ந்தோ யோனிஸோ மனஸிகரோந்தோ கல்யாணமித்தே ஸேவந்தோ ப⁴ஜந்தோ பயிருபாஸந்தோ அரஹத்தம் பாபுணிஸ்ஸதி. பத³பரமஸ்ஸேதம் ஸுத்தம் அனாக³தே வாஸனா ப⁴விஸ்ஸதீதி ஏவம் ஸப்³பே³ஸம்பி உபகாரபா⁴வம் ஞத்வா ப⁴க³வா ஸினேரும் உக்கி²பந்தோ விய ஆகாஸம் வித்தா²ரேந்தோ விய சக்கவாளபப்³ப³தம் கம்பேந்தோ விய ச மஹந்தேன உஸ்ஸாஹேன ஸேய்யதா²பி, பி⁴க்க²வேதி இமம் ஆஸீவிஸோபமஸுத்தம் ஆரபி⁴.

தத்த² சத்தாரோ ஆஸீவிஸாதி கட்ட²முகோ², பூதிமுகோ², அக்³கி³முகோ², ஸத்த²முகோ²தி இமே சத்தாரோ. தேஸு கட்ட²முகே²ன த³ட்ட²ஸ்ஸ ஸகலஸரீரம் ஸுக்க²கட்ட²ம் விய த²த்³த⁴ம் ஹோதி, ஸந்தி⁴பப்³பே³ஸு அதி⁴மத்தம் அயஸூலஸமப்பிதம் விய திட்ட²தி. பூதிமுகே²ன த³ட்ட²ஸ்ஸ பக்கபூதிபனஸம் விய விபுப்³ப³கபா⁴வம் ஆபஜ்ஜித்வா பக்³க⁴ரதி, சங்க³வாரே பக்கி²த்தஉத³கம் விய ஹோதி. அக்³கி³முகே²ன த³ட்ட²ஸ்ஸ ஸகலஸரீரம் ஜா²யித்வா ப⁴ஸ்மமுட்டி² விய து²ஸமுட்டி² விய ச விப்பகிரீயதி. ஸத்தமுகே²ன த³ட்ட²ஸ்ஸ ஸகலஸரீரம் பி⁴ஜ்ஜதி, அஸனிபாதட்டா²னம் விய மஹானிகா²த³னேன க²தஸந்தி⁴முக²ம் விய ச ஹோதி. ஏவம் விஸவஸேன விப⁴த்தா சத்தாரோ ஆஸீவிஸா.

விஸவேக³விகாரேன பனேதே ஸோளஸ ஹோந்தி. கட்ட²முகோ² ஹி த³ட்ட²விஸோ, தி³ட்ட²விஸோ, பு²ட்ட²விஸோ, வாதவிஸோதி சதுப்³பி³தோ⁴ ஹோதி. தேன ஹி த³ட்ட²ம்பி தி³ட்ட²ம்பி பு²ட்ட²ம்பி தஸ்ஸ வாதேன பஹடம்பி ஸரீரம் வுத்தப்பகாரேன த²த்³த⁴ம் ஹோதி. ஸேஸேஸுபி ஏஸேவ நயோதி. ஏவம் விஸவேக³விகாரவஸேன ஸோளஸ ஹோந்தி.

புன புக்³க³லபண்ணத்திவஸேன சதுஸட்டி² ஹோந்தி. கத²ம்? கட்ட²முகே²ஸு தாவ த³ட்ட²விஸோ ச ஆக³தவிஸோ நோ கோ⁴ரவிஸோ, கோ⁴ரவிஸோ நோ ஆக³தவிஸோ, ஆக³தவிஸோ சேவ கோ⁴ரவிஸோ ச, நேவாக³தவிஸோ ந கோ⁴ரவிஸோதி சதுப்³பி³தோ⁴ ஹோதி. தத்த² யஸ்ஸ விஸம் ஸம்பஜ்ஜலிததிணுக்காய அக்³கி³ விய ஸீக⁴ம் அபி⁴ருஹித்வா அக்கீ²னி க³ஹேத்வா க²ந்த⁴ம் க³ஹேத்வா ஸீஸம் க³ஹேத்வா டி²தந்தி வத்தப்³ப³தம் ஆபஜ்ஜதி மணிஸப்பாதீ³னம் விஸம் விய, மந்தம் பன பரிவத்தேத்வா கண்ணவாதம் த³த்வா த³ண்ட³கேன பஹடமத்தே ஓதரித்வா த³ட்ட²ட்டா²னேயேவ திட்ட²தி, அயம் ஆக³தவிஸோ நோ கோ⁴ரவிஸோ நாம. யஸ்ஸ பன விஸம் ஸணிகம் அபி⁴ருஹதி, ஆருள்ஹாருள்ஹட்டா²னே பன அயம் ஸீதஉத³கம் விய ஹோதி உத³கஸப்பாதீ³னம் விஸம் விய, த்³வாத³ஸவஸ்ஸச்சயேனாபி கண்ணபிட்டி²க²ந்த⁴பிட்டி²காதீ³ஸு க³ண்ட³பிளகாதி³வஸேன பஞ்ஞாயதி, மந்தபரிவத்தனாதீ³ஸு ச கயிரமானாஸு ஸீக⁴ம் ந ஓதரதி, அயம் கோ⁴ரவிஸோ நோ ஆக³தவிஸோ நாம. யஸ்ஸ பன விஸம் ஸீக⁴ம் அபி⁴ருஹதி, ந ஸீக⁴ம் ஓதரதி அனேளகஸப்பாதீ³னம் விஸம் விய, அயம் ஆக³தவிஸோ சேவ கோ⁴ரவிஸோ ச. யஸ்ஸ பன விஸம் மந்த³ம் ஹோதி, ஓதாரியமானம்பி ஸுகே²னேவ ஓதரதி நீலஸப்பத⁴ம்மனிஸப்பாதீ³னம் விஸம் விய, அயம் நேவாக³தவிஸோ ந கோ⁴ரவிஸோ நாம. இமினா உபாயேன கட்ட²முகே² த³ட்ட²விஸாத³யோ பூதிமுகா²தீ³ஸு ச த³ட்ட²விஸாத³யோ வேதி³தப்³பா³தி. ஏவம் புக்³க³லபண்ணத்திவஸேன சதுஸட்டி².

தேஸு ‘‘அண்ட³ஜா நாகா³’’திஆதி³னா (ஸம். நி. 3.342-344) யோனிவஸேன ஏகேகம் சதுதா⁴ விப⁴ஜித்வா ச²பண்ணாஸாதி⁴கானி த்³வே ஸதானி ஹோந்தி. தே ஜலஜாத²லஜாதி த்³விகு³ணிதா த்³வாத³ஸாதி⁴கானி பஞ்சஸதானி ஹோந்தி, தே காமரூபஅகாமரூபானம் வஸேன த்³விகு³ணிதா சதுவீஸாதி⁴கஸஹஸ்ஸஸங்கா² ஹோந்தி. புன க³தமக்³க³ஸ்ஸ படிலோமதோ ஸம்கி²ப்பமானா கட்ட²முகா²தி³வஸேன சத்தாரோவ ஹோந்தீதி. தே ஸந்தா⁴ய ப⁴க³வா ‘‘ஸேய்யதா²பி, பி⁴க்க²வே, சத்தாரோ ஆஸீவிஸா’’தி ஆஹ. குலவஸேன ஹி ஏதே க³ஹிதா.

தத்த² ஆஸீவிஸாதி ஆஸித்தவிஸாதிபி ஆஸீவிஸா, அஸிதவிஸாதிபி ஆஸீவிஸா, அஸிஸதி³ஸவிஸாதிபி ஆஸீவிஸா. ஆஸித்தவிஸாதி ஸகலகாயே ஆஸிஞ்சித்வா விய ட²பிதவிஸா, பரஸ்ஸ ச அத்தனோ ஸரீரே ச ஆஸிஞ்சனவிஸாதி அத்தோ². அஸிதவிஸாதி யம் யம் ஏதேஹி அஸிதம் ஹோதி பரிபு⁴த்தம், தம் தம் விஸமேவ ஸம்பஜ்ஜதி, தஸ்மா அஸிதம் விஸம் ஹோதி ஏதேஸந்தி ஆஸீவிஸா. அஸிஸதி³ஸவிஸாதி அஸிவிய திகி²ணம் பரமம்மச்சே²த³னஸமத்த²ம் விஸம் ஏதேஸந்தி ஆஸீவிஸாதி ஏவமேத்த² வசனத்தோ² வேதி³தப்³போ³. உக்³க³தேஜாதி உக்³க³ததேஜா ப³லவதேஜா. கோ⁴ரவிஸாதி து³ன்னிம்மத்³த³னவிஸா.

ஏவம் வதே³ய்யுந்தி படிஜக்³கா³பனத்த²ம் ஏவம் வதே³ய்யும். ராஜானோ ஹி ஆஸீவிஸே கா³ஹாபேத்வா – ‘‘ததா²ரூபே சோரே வா ஏதேஹி ட³ம்ஸாபேத்வா மாரேஸ்ஸாம, நக³ரூபரோத⁴காலே பரஸேனாய வா தம் கி²பிஸ்ஸாம, பரப³லம் நிம்மத்³தே³தும் அஸக்கோந்தா ஸுபோ⁴ஜனம் பு⁴ஞ்ஜித்வா வரஸயனம் ஆருய்ஹ ஏதேஹி அத்தானம் ட³ம்ஸாபேத்வா ஸத்தூனம் வஸம் அனாக³ச்ச²ந்தா அத்தனோ ருசியா மரிஸ்ஸாமா’’தி ஆஸீவிஸே ஜக்³கா³பேந்தி. தே யம் சோரம் ஸஹஸாவ மாரேதும் ந இச்ச²ந்தி, ‘‘ஏவமேதே தீ³க⁴ரத்தம் து³க்க²ப்பத்தோ ஹுத்வா மரிஸ்ஸந்தீ’’தி இச்ச²ந்தா தம் புரிஸம் ஏவம் வத³ந்தி இமே தே அம்போ⁴ புரிஸ சத்தாரோ ஆஸீவிஸாதி.

தத்த² காலேன காலந்தி காலே காலே. ஸம்வேஸேதப்³பா³தி நிபஜ்ஜாபேதப்³பா³. அஞ்ஞதரோ வா அஞ்ஞதரோ வாதி கட்ட²முகா²தீ³ஸு யோ கோசி. யம் தே அம்போ⁴ புரிஸ கரணீயம், தம் கரோஹீதி இத³ம் அத்த²சரகஸ்ஸ வசனம் வேதி³தப்³ப³ம். தஸ்ஸ கிர புரிஸஸ்ஸ ஏவம் ஆஸீவிஸே படிபாதே³த்வா ‘அயம் வோ உபட்டா²கோ’தி சதூஸு பேளாஸு ட²பிதானம் ஆஸீவிஸானம் ஆரோசேந்தி. அதே²கோ நிக்க²மித்வா ஆக³ம்ம தஸ்ஸ புரிஸஸ்ஸ த³க்கி²ணபாதா³னுஸாரேன அபி⁴ருஹித்வா த³க்கி²ணஹத்த²ம் மணிப³ந்த⁴தோ பட்டா²ய வேடே²த்வா த³க்கி²ணகண்ணஸோதமூலே ப²ணம் கத்வா ஸுஸூதி கரோந்தோ நிபஜ்ஜி. அபரோ வாமபாதா³னுஸாரேன அபி⁴ருஹித்வா ததே²வ வாமஹத்த²ம் வேடே²த்வா வாமகண்ணஸோதமூலே ப²ணம் கத்வா ஸுஸூதி கரோந்தோ நிபஜ்ஜி, ததியோ நிக்க²மித்வா அபி⁴முக²ம் அபி⁴ருஹித்வா குச்சி²ம் வேடே²த்வா க³லவாடகமூலே ப²ணம் கத்வா ஸுஸூதி கரோந்தோ நிபஜ்ஜி, சதுத்தோ² பிட்டி²பா⁴கே³ன அபி⁴ருஹித்வா கீ³வம் வேடே²த்வா உபரிமுத்³த⁴னி ப²ணம் ட²பேத்வா ஸுஸூதி கரோந்தோ நிபஜ்ஜி.

ஏவம் சதூஸு ஆஸீவிஸேஸு ஸரீரட்ட²கேஸுயேவ ஜாதேஸு ஏகோ தஸ்ஸ புரிஸஸ்ஸ அத்த²சரகபுரிஸோ தம் தி³ஸ்வா ‘‘கிம் தே, போ⁴ புரிஸ, லத்³த⁴’’ந்தி, புச்சி². ததோ தேன ‘‘இமே மே, போ⁴, ஹத்தே²ஸு ஹத்த²கடகம் விய பா³ஹாஸு கேயூரம் விய குச்சி²ம்ஹி குச்சி²வேட²னஸாடகோ விய கண்ணேஸு கண்ணசூளிகா விய க³லே முத்தாவலியோ விய ஸீஸே ஸீஸபஸாத⁴னம் விய கேசி அலங்காரவிஸேஸா ரஞ்ஞா தி³ன்னா’’தி வுத்தே ஸோ ஆஹ – ‘‘போ⁴ அந்த⁴பா³ல, மா ஏவம் மஞ்ஞித்த² ‘ரஞ்ஞா மே துட்டே²னேதம் பஸாத⁴னம் தி³ன்ன’ந்தி. த்வம் ரஞ்ஞோ ஆகு³சாரீ சோரோ, இமே ச சத்தாரோ ஆஸீவிஸா து³ருபட்டா²ஹா து³ப்படிஜக்³கி³யா, ஏகஸ்மிம் உட்டா²துகாமே ஏகோ ந்ஹாயிதுகாமோ ஹோதி, ஏகஸ்மிம் ந்ஹாயிதுகாமே ஏகோ பு⁴ஞ்ஜிதுகாமோ, ஏகஸ்மிம் பு⁴ஞ்ஜிதுகாமே ஏகோ நிபஜ்ஜிதுகாமோ. தேஸு யஸ்ஸேவ இச்சா² ந பூரதி, ஸோ தத்தே²வ ட³ம்ஸித்வா மாரேதீ’’தி. அத்தி² பன, போ⁴, ஏவம் ஸந்தே கோசி ஸோத்தி²மக்³கோ³தி? ஆம, ராஜபுரிஸானம் விக்கி²த்தபா⁴வம் ஞத்வா பலாயனம் ஸோத்தி²பா⁴வோதி வத்வா ‘‘யம் தே கரணீயம், தம் கரோஹீ’’தி வதே³ய்ய.

தம் ஸுத்வா இதரோ சதுன்னம் ஆஸீவிஸானம் பமாத³க்க²ணம் ராஜபுரிஸேஹி ச பவிவித்தம் தி³ஸ்வா, வாமஹத்தே²ன த³க்கி²ணஹத்த²ம் வேடே²த்வா, த³க்கி²ணகண்ணசூளிகாய ப²ணம் ட²பேத்வா, ஸயிதாஸீவிஸஸ்ஸ ஸரீரம் பரிமஜ்ஜந்தோ விய ஸணிகம் தம் அபனேத்வா, ஏதேனேவ உபாயேன ஸேஸேபி அபனேத்வா தேஸம் பீ⁴தோ பலாயேய்ய. அத² நம் தே ஆஸீவிஸா ‘‘அயம் அம்ஹாகம் ரஞ்ஞா உபட்டா²கோ தி³ன்னோ’’தி அனுப³ந்த⁴மானா ஆக³ச்சே²ய்யும். இத³ம் ஸந்தா⁴ய அத² கோ² ஸோ, பி⁴க்க²வே, புரிஸோ பீ⁴தோ சதுன்னம் ஆஸீவிஸானம்…பே… பலாயேதா²தி வுத்தம்.

தஸ்மிம் பன புரிஸே ஏவம் ஆக³தமக்³க³ம் ஓலோகேத்வா ஓலோகேத்வா பலாயந்தே ராஜா ‘‘பலாதோ ஸோ புரிஸோ’’தி ஸுத்வா ‘‘கோ நு கோ² தம் அனுப³ந்தி⁴த்வா கா⁴தேதும் ஸக்கி²ஸ்ஸதீ’’தி விசினந்தோ தஸ்ஸேவ பச்சத்தி²கே பஞ்ச ஜனே லபி⁴த்வா ‘‘க³ச்ச²த² நம் அனுப³ந்தி⁴த்வா கா⁴தேதா²’’தி பேஸேய்ய. அத²ஸ்ஸ அத்த²சரா புரிஸா தம் பவத்திம் ஞத்வா ஆரோசேய்யும். ஸோ பி⁴ய்யோஸோமத்தாய பீ⁴தோ பலாயேத². இமமத்த²ம் ஸந்தா⁴ய தமேனம் ஏவம் வதே³ய்யுந்திஆதி³ வுத்தம்.

ச²ட்டோ² அந்தரசரோ வத⁴கோதி ‘‘பட²மம் ஆஸீவிஸேஹி அனுப³த்³தோ⁴ இதோ சிதோ ச தே வஞ்சேந்தோ பலாயி, இதா³னி பஞ்சஹி பச்சத்தி²கேஹி அனுப³த்³தோ⁴ ஸுட்டு²தரம் பலாயதி, ந ஸக்கா ஸோ ஏவம் க³ஹேதும், உபலாளனாய பன ஸக்கா, தஸ்மா த³ஹரகாலதோ பட்டா²ய ஏகதோ கா²தி³த்வா ச பிவித்வா ச ஸந்த²வம் அந்தரசரம் வத⁴கமஸ்ஸ பேஸேதா²’’தி அமச்சேஹி வுத்தேன ரஞ்ஞா பரியேஸித்வா பேஸிதோ அந்தரசரோ வத⁴கோ.

ஸோ பஸ்ஸேய்ய ஸுஞ்ஞம் கா³மந்தி நிவத்தித்வா ஓலோகேந்தோ பத³ம் கா⁴யித்வா கா⁴யித்வா வேகே³னாக³ச்ச²ந்தே சத்தாரோ ஆஸீவிஸே பஞ்ச வத⁴கே பச்சத்தி²கே ச²ட்ட²ஞ்ச அந்தரசரம் வத⁴கம் ‘‘நிவத்த போ⁴, மா பலாயி, புத்ததா³ரேன ஸத்³தி⁴ம் காமே பரிபு⁴ஞ்ஜந்தோ ஸுக²ம் வஸிஸ்ஸஸீ’’தி வத்வா ஆக³ச்ச²ந்தம் தி³ஸ்வா, பி⁴ய்யோஸோமத்தாய யேன வா தேன வா பலாயந்தோ பச்சந்தரட்டே² அபி⁴முக²க³தம் ஏகம் ச²குடிகம் ஸுஞ்ஞம் கா³மம் பஸ்ஸேய்ய. ரித்தகஞ்ஞேவ பவிஸேய்யாதி த⁴னத⁴ஞ்ஞமஞ்சபீடா²தீ³ஹி விரஹிதத்தா ரித்தகஞ்ஞேவ பவிஸேய்ய. துச்ச²கம் ஸுஞ்ஞகந்தி ஏதஸ்ஸேவ வேவசனம். பரிமஸேய்யாதி ‘‘ஸசே பானீயம் ப⁴விஸ்ஸதி, பிவிஸ்ஸாமி, ஸசே ப⁴த்தம் ப⁴விஸ்ஸதி, பு⁴ஞ்ஜிஸ்ஸாமீ’’தி பா⁴ஜனம் விவரித்வா ஹத்த²ம் அந்தோ பவேஸேத்வா பரிமஸேய்ய.

தமேனம் ஏவம் வதே³ய்யுந்தி ச²ன்னம் க⁴ரானம் ஏகக⁴ரேபி கிஞ்சி அலபி⁴த்வா கா³மமஜ்ஜே² ஏகோ ஸந்த³ச்சா²யோ ருக்கோ² அத்தி², தத்த² வங்கப²லகம் அத்த²தம் தி³ஸ்வா, ‘‘இத⁴ தாவ நிஸீதி³ஸ்ஸாமீ’’தி க³ந்த்வா, தத்த² நிஸின்னம் மந்த³மந்தே³ன வாதேன பீ³ஜியமானம் தத்தகமத்தம்பி ஸுக²ம் ஸந்ததோ அஸ்ஸாத³யமானம், தமேனம் புரிஸம் கேசிதே³வ அத்த²சரகா ப³ஹி பவத்திம் ஞத்வா ஆக³தா ஏவம் வதே³ய்யும். இதா³னி அம்போ⁴ புரிஸாதி அம்போ⁴, புரிஸ, இதா³னி. சோரா கா³மகா⁴தகாதி ‘‘யதே³வேத்த² லபி⁴ஸ்ஸாம, தம் க³ண்ஹிஸ்ஸாம வா கா⁴தேஸ்ஸாம வா’’தி ஆக³தா ச² கா³மகா⁴தகசோரா.

உத³கண்ணவந்தி க³ம்பீ⁴ரம் புது²லம் உத³கம். க³ம்பீ⁴ரம்பி ஹி அபுது²லம், புது²லம் வா அக³ம்பீ⁴ரம், ந அண்ணவோதி வுச்சதி, யம்பன க³ம்பீ⁴ரஞ்ச புது²லஞ்ச, தஸ்ஸேவேதம் நாமம். ஸாஸங்கம் ஸப்படிப⁴யந்தி சதுன்னம் ஆஸீவிஸானம் பஞ்சன்னம் வத⁴கானம் ச²ட்ட²ஸ்ஸ அந்தரசரஸ்ஸ ச²ன்னஞ்ச கா³மகா⁴தகசோரானம் வஸேன ஸாஸங்கம் ஸப்படிப⁴யம். கே²மம் அப்படிப⁴யந்தி தேஸம்யேவ ஆஸீவிஸாதீ³னம் அபா⁴வேன கே²மஞ்ச நிப்³ப⁴யஞ்ச விசித்ரஉய்யானவரம் ப³ஹ்வன்னபானம் தே³வனக³ரஸதி³ஸம். ந சஸ்ஸ நாவா ஸந்தாரணீதி ‘‘இமாய நாவாய ஓரிமதீரதோ பரதீரம் க³மிஸ்ஸந்தீ’’தி ஏவம் ட²பிதா ச ஸந்தாரணீ நாவா ந ப⁴வேய்ய. உத்தரஸேது வாதி ருக்க²ஸேது-ஜங்க⁴ஸேது-ஸகடஸேதூனம் அஞ்ஞதரோ உத்தரஸேது வா ந ப⁴வேய்ய. திட்ட²தி ப்³ராஹ்மணோதி ந கோ² ஏஸ ப்³ராஹ்மணோ. கஸ்மா நம் ப்³ராஹ்மணோதி ஆஹ? ஏத்தகானம் பச்சத்தி²கானம் பா³ஹிதத்தா, தே³ஸனம் வா வினிவத்தேந்தோ ஏகம் கீ²ணாஸவப்³ராஹ்மணம் த³ஸ்ஸேதும்பி ஏவமாஹ.

தஸ்மிம் பன ஏவம் உத்திண்ணே சத்தாரோ ஆஸீவிஸா ‘‘ந லத்³தோ⁴ வதாஸி அம்ஹேஹி, அஜ்ஜ தே முருமுராய ஜீவிதம் கா²தி³த்வா ச²ட்³டே³ய்யாம’’. பஞ்ச பச்சத்தி²கா ‘‘ந லத்³தோ⁴ வதாஸி அம்ஹேஹி, அஜ்ஜ தே பரிவாரேத்வா அங்க³மங்கா³னி சி²ந்தி³த்வா ரஞ்ஞோ ஸந்திகம் க³தா ஸதம் வா ஸஹஸ்ஸம் வா லபே⁴ய்யாம’’. ச²ட்டோ² அந்தரசரோ ‘‘ந லத்³தோ⁴ வதாஸி மயா, அஜ்ஜ தே ப²லிகவண்ணேன அஸினா ஸீஸம் சி²ந்தி³த்வா, ஸேனாபதிட்டா²னம் லபி⁴த்வா ஸம்பத்திம் அனுப⁴வேய்யம்’’. ச² சோரா ‘‘ந லத்³தோ⁴ வதாஸி அம்ஹேஹி, அஜ்ஜ தே விவிதா⁴னி கம்மகாரணானி காரேத்வா ப³ஹுத⁴னம் ஆஹராபேஸ்ஸாமா’’தி சிந்தேத்வா, உத³கண்ணவம் ஓதரிதும் அஸக்கோந்தா ரஞ்ஞோ ஆணாய கோபிதத்தா பரதோ க³ந்தும்பி அவிஸஹந்தா தத்தே²வ ஸுஸ்ஸித்வா மரேய்யும்.

உபமா கோ² ம்யாயந்தி ஏத்த² ஏவம் ஆதி³தோ பட்டா²ய ஓபம்மஸம்ஸந்த³னம் வேதி³தப்³ப³ம் – ராஜா விய ஹி கம்மம் த³ட்ட²ப்³ப³ம், ராஜாபராதி⁴கபுரிஸோ விய வட்டனிஸ்ஸிதோ புது²ஜ்ஜனோ. சத்தாரோ ஆஸீவிஸா விய சத்தாரி மஹாபூ⁴தானி, ரஞ்ஞோ தஸ்ஸ சத்தாரோ ஆஸீவிஸே படிச்சா²பிதகாலோ விய கம்முனா புது²ஜ்ஜனஸ்ஸ படிஸந்தி⁴க்க²ணேயேவ சதுன்னம் மஹாபூ⁴தானம் தி³ன்னகாலோ. ‘‘இமேஸம் ஆஸீவிஸானம் பமாத³க்க²ணே ராஜபுரிஸானஞ்ச விவித்தக்க²ணே நிக்க²மித்வா யம் தே அம்போ⁴, புரிஸ, கரணீயம், தம் கரோஹீ’’தி வசனேன ‘‘பலாயஸ்ஸூ’’தி வுத்தகாலோ விய ஸத்தா²ரா இமஸ்ஸ பி⁴க்கு²னோ மஹாபூ⁴தகம்மட்டா²னம் கதே²த்வா ‘‘இமேஸு சதூஸு மஹாபூ⁴தேஸு நிப்³பி³ந்த³ விரஜ்ஜ, ஏவம் வட்டதோ பரிமுச்சிஸ்ஸஸீ’’தி கதி²தகாலோ, தஸ்ஸ புரிஸஸ்ஸ அத்த²சரகவசனம் ஸுத்வா சதுன்னம் ஆஸீவிஸானம் பமாத³க்க²ணே ராஜபுரிஸானஞ்ச விவித்தக்க²ணே நிக்க²மித்வா யேன வா தேன வா பலாயனம் விய இமஸ்ஸ பி⁴க்கு²னோ ஸத்து² ஸந்திகே கம்மட்டா²னம் லபி⁴த்வா மஹாபூ⁴தாஸீவிஸேஹி பரிமுச்சனத்தா²ய ஞாணபலாயனேன பலாயனம்.

இதா³னி சதுன்னேதம் மஹாபூ⁴தானம் அதி⁴வசனம் பத²வீதா⁴துயா ஆபோதா⁴துயாதிஆதீ³ஸு சதுமஹாபூ⁴தகதா² ச பஞ்சுபாதா³னக்க²ந்த⁴கதா² ச ஆயதனகதா² ச விஸுத்³தி⁴மக்³கே³ வித்தா²ரிதனயேனேவ வேதி³தப்³பா³. ஏத்த² ச கட்ட²முக²ஆஸீவிஸோ விய பத²வீதா⁴து த³ட்ட²ப்³பா³, பூதிமுக²அக்³கி³முக²ஸத்த²முகா² விய ஸேஸதா⁴துயோ. யதே²வ ஹி கட்ட²முகே²ன த³ட்ட²ஸ்ஸ ஸகலகாயோ த²த்³தோ⁴ ஹோதி, ஏவம் பத²வீதா⁴துபகோபேனாபி. யதா² ச பூதிமுகா²தீ³ஹி த³ட்ட²ஸ்ஸ பக்³க⁴ரதி சேவ ஜா²யதி ச சி²ஜ்ஜதி ச, ஏவம் ஆபோதா⁴துதேஜோதா⁴துவாயோதா⁴துபகோபேனாபீதி. தேனாஹு அட்ட²கதா²சரியா –

‘‘பத்த²த்³தோ⁴ ப⁴வதீ காயோ, த³ட்டோ² கட்ட²முகே²ன வா;

பத²வீதா⁴துபகோபேன, ஹோதி கட்ட²முகே²வ ஸோ.

‘‘பூதிகோ ப⁴வதீ காயோ, த³ட்டோ² பூதிமுகே²ன வா;

ஆபோதா⁴துபகோபேன, ஹோதி பூதிமுகே²வ ஸோ.

‘‘ஸந்தத்தோ ப⁴வதீ காயோ, த³ட்டோ² அக்³கி³முகே²ன வா;

தேஜோதா⁴துபகோபேன, ஹோதி அக்³கி³முகே²வ ஸோ.

‘‘ஸஞ்சி²ன்னோ ப⁴வதீ காயோ, த³ட்டோ² ஸத்த²முகே²ன வா;

வாயோதா⁴துபகோபேன, ஹோதி ஸத்த²முகே²வ ஸோ’’தி. –

ஏவம் தாவேத்த² விஸேஸதோ ஸதி³ஸபா⁴வோ வேதி³தப்³போ³.

அவிஸேஸதோ பன ஆஸயதோ விஸவேக³விகாரதோ அனத்த²க்³க³ஹணதோ து³ருபட்டா²னதோ து³ராஸத³தோ அகதஞ்ஞுததோ அவிஸேஸகாரிதோ அனந்ததோ³ஸூபத்³த³வதோதி இமேஹி காரணேஹி ஏதேஸம் ஆஸீவிஸஸதி³ஸதா வேதி³தப்³பா³. தத்த² ஆஸயதோதி ஆஸீவிஸானஞ்ஹி வம்மிகோ ஆஸயோ, தத்தே²வ தே வஸந்தி. மஹாபூ⁴தானம்பி காயவம்மிகோ ஆஸயோ. ஆஸீவிஸானஞ்ச ருக்க²ஸுஸிரதிணபண்ணக³ஹனஸங்காரட்டா²னானிபி ஆஸயோ. ஏதேஸுபி ஹி தே வஸந்தி. மஹாபூ⁴தானம்பி காயஸுஸிரம் காயக³ஹனம் காயஸங்காரட்டா²னம் ஆஸயோதி. ஏவம் தாவ ஆஸயதோ ஸதி³ஸதா வேதி³தப்³பா³.

விஸவேக³விகாரதோதி ஆஸீவிஸா ஹி குலவஸேன கட்ட²முகா²தி³பே⁴த³தோ சத்தாரோ. தத்த² ஏகேகோ விஸவிகாரதோ விப⁴ஜ்ஜமானோ த³ட்ட²விஸாதி³வஸேன சதுப்³பி³தோ⁴ ஹோதி. மஹாபூ⁴தானிபி பச்சத்தலக்க²ணவஸேன பத²வீஆதி³பே⁴த³தோ சத்தாரி. ஏத்த² ஏகேகம் கம்மஸமுட்டா²னாதி³வஸேன சதுப்³பி³த⁴ம் ஹோதி. ஏவம் விஸவேக³விகாரதோ ஸதி³ஸதா வேதி³தப்³பா³.

அனத்த²க்³க³ஹணதோதி ஆஸீவிஸே க³ண்ஹந்தா பஞ்ச அனத்தே² க³ண்ஹந்தி – து³க்³க³ந்த⁴ம் க³ண்ஹந்தி, அஸுசிம் க³ண்ஹந்தி, ப்³யாதி⁴ம் க³ண்ஹந்தி, விஸம் க³ண்ஹந்தி, மரணம் க³ண்ஹந்தி. மஹாபூ⁴தானிபி க³ண்ஹந்தா பஞ்ச அனத்தே² க³ண்ஹந்தி – து³க்³க³ந்த⁴ம் க³ண்ஹந்தி, அஸுசிம் க³ண்ஹந்தி, ப்³யாதி⁴ம் க³ண்ஹந்தி, ஜரம் க³ண்ஹந்தி, மரணம் க³ண்ஹந்தி. தேனாஹு போராணா –

‘‘யேகேசி ஸப்பம் க³ண்ஹந்தி, மீள்ஹலித்தம் மஹாவிஸம்;

பஞ்ச க³ண்ஹந்துனத்தா²னி, லோகே ஸப்பாபி⁴னந்தி³னோ.

‘‘து³க்³க³ந்த⁴ம் அஸுசிம் ப்³யாதி⁴ம், விஸம் மரணபஞ்சமம்;

அனத்தா² ஹோந்தி பஞ்சேதே, மீள்ஹலித்தே பு⁴ஜங்க³மே.

‘‘ஏவமேவம் அகுஸலா, அந்த⁴பா³லபுது²ஜ்ஜனா;

பஞ்ச க³ண்ஹந்துனத்தா²னி, ப⁴வே ஜாதாபி⁴னந்தி³னோ.

‘‘து³க்³க³ந்த⁴ம் அஸுசிம் ப்³யாதி⁴ம், ஜரம் மரணபஞ்சமம்;

அனத்தா² ஹோந்தி பஞ்சேதே, மீள்ஹலித்தேவ பன்னகே³’’தி. –

ஏவம் அனத்த²க்³க³ஹணதோ ஸதி³ஸதா வேதி³தப்³பா³.

து³ருபட்டா²னதோதி தே ஆஸீவிஸா து³ருபட்டா²னா, ஏகஸ்மிம் உட்டா²துகாமே ஏகோ ந்ஹாயிதுகாமோ ஹோதி, தஸ்மிம் ந்ஹாயிதுகாமே அபரோ பு⁴ஞ்ஜிதுகாமோ, தஸ்மிம் பு⁴ஞ்ஜிதுகாமே அஞ்ஞோ நிபஜ்ஜிதுகாமோ ஹோதி. தேஸு யஸ்ஸ யஸ்ஸேவ அஜ்ஜா²ஸயோ ந பூரதி, ஸோ தத்தே²வ ட³ம்ஸித்வா மாரேதி. இமேஹி பன ஆஸீவிஸேஹி பூ⁴தானேவ து³ருபட்டா²னதரானி. பத²வீதா⁴துயா ஹி பே⁴ஸஜ்ஜே கயிரமானே ஆபோதா⁴து குப்பதி, தஸ்ஸேவ பே⁴ஸஜ்ஜம் கரோந்தஸ்ஸ தேஜோதா⁴தூதி ஏவம் ஏகிஸ்ஸா பே⁴ஸஜ்ஜே கயிரமானே அபரா குப்பந்தீதி. ஏவம் து³ருபட்டா²னதோ ஸதி³ஸதா வேதி³தப்³பா³.

து³ராஸத³தோதி து³ராஸதா³ ஹி ஆஸீவிஸா, கே³ஹஸ்ஸ புரிமபா⁴கே³ ஆஸீவிஸம் தி³ஸ்வா பச்சி²மபா⁴கே³ன பலாயந்தி, பச்சி²மபா⁴கே³ தி³ஸ்வா புரிமபா⁴கே³ன, கே³ஹமஜ்ஜே² தி³ஸ்வா க³ப்³ப⁴ம் பவிஸந்தி, க³ப்³பே⁴ தி³ஸ்வா மஞ்சபீட²ம் அபி⁴ருஹந்தி. மஹாபூ⁴தானி ததோபி து³ராஸத³தரானி. ததா²ரூபேன ஹி குட்ட²ரோகே³ன பு²ட்ட²ஸ்ஸ கண்ணனாஸாதீ³னி சி²ந்தி³த்வா பதந்தி, ஸரீரம் ஸம்பு²டதி நீலமக்கி²கா பரிவாரேந்தி, ஸரீரக³ந்தோ⁴ தூ³ரதோவ உப்³பா³ஹதி. தம் புரிஸம் அக்கோஸமானம்பி பரிதே³வமானம்பி நேவ ரோஸவஸேன, ந காருஞ்ஞேன, உபஸங்கமிதும் ஸக்கோந்தி, நாஸிகம் பித³ஹித்வா கே²ளம் பாதேந்தா தூ³ரதோவ நம் விவஜ்ஜேந்தி. ஏவம் அஞ்ஞேஸம்பி ப⁴க³ந்த³ரகுச்சி²ரோக³வாதரோகா³தீ³னம் பீ³ப⁴ச்ச²ஜேகு³ச்ச²பா⁴வகரானஞ்ச ரோகா³னம் வஸேன அயமேவத்தோ² விபா⁴வேதப்³போ³தி. ஏவம் து³ராஸத³தோ ஸதி³ஸதா வேதி³தப்³பா³.

அகதஞ்ஞுததோதி ஆஸீவிஸா ஹி அகதஞ்ஞுனோ ஹோந்தி, ந்ஹாபியமானாபி போ⁴ஜியமானாபி க³ந்த⁴மாலாதீ³ஹி பூஜியமானாபி பேளாயம் பக்கி²பித்வா பரிஹரியமானாபி ஓதாரமேவ க³வேஸந்தி. யத்த² ஓதாரம் லப⁴ந்தி, தத்தே²வ நம் ட³ம்ஸித்வா மாரேந்தி. ஆஸீவிஸேஹிபி மஹாபூ⁴தானேவ அகதஞ்ஞுதரானி. ஏதேஸஞ்ஹி கதம் நாம நத்தி², ஸீதேன வா உண்ஹேன வா நிம்மலேன ஜலேன ந்ஹாபியமானானிபி க³ந்த⁴மாலாதீ³ஹி ஸக்கரியமானானிபி முது³வத்த²முது³ஸயனமுது³யானாதீ³ஹி பரிஹரியமானானிபி, வரபோ⁴ஜனம் போ⁴ஜியமானானிபி, வரபானம் பாயாபியமானானிபி ஓதாரமேவ க³வேஸந்தி. யத்த² ஓதாரம் லப⁴ந்தி, தத்தே²வ குப்பித்வா அனயப்³யஸனம் பாபேந்தீதி. ஏவம் அகதஞ்ஞுததோ ஸதி³ஸதா வேதி³தப்³பா³.

அவிஸேஸகாரிதோதி ஆஸீவிஸா ஹி ‘‘அயம் க²த்தியோ வா ப்³ராஹ்மணோ வா வேஸ்ஸோ வா ஸுத்³தோ³ வா க³ஹட்டோ² வா பப்³ப³ஜிதோ வா’’தி விஸேஸம் ந கரோந்தி, ஸம்பத்தஸம்பத்தமேவ ட³ம்ஸித்வா மாரேந்தி. மஹாபூ⁴தானிபி ‘‘அயம் க²த்தியோ வா ப்³ராஹ்மணோ வா வேஸ்ஸோ வா ஸுத்³தோ³ வா க³ஹட்டோ² வா பப்³ப³ஜிதோ வா தே³வோ வா மனுஸ்ஸோ வா மாரோ வா ப்³ரஹ்மா வா நிக்³கு³ணோ வா ஸகு³ணோ வா’’தி விஸேஸம் ந கரோந்தி. யதி³ ஹி நேஸம் ‘‘அயம் கு³ணவா’’தி லஜ்ஜா உப்பஜ்ஜேய்ய, ஸதே³வகே லோகே அக்³க³புக்³க³லே ததா²க³தே லஜ்ஜம் உப்பாதே³ய்யும். அதா²பி நேஸம் ‘‘அயம் மஹாபஞ்ஞோ அயம் மஹித்³தி⁴கோ அயம் து⁴தவாதோ³’’திஆதி³னா நயேன லஜ்ஜா உப்பஜ்ஜேய்ய, த⁴ம்மஸேனாபதிஸாரிபுத்தத்தே²ராதீ³ஸு லஜ்ஜம் உப்பாதே³ய்யும். அதா²பி நேஸம் ‘‘அயம் நிக்³கு³ணோ தா³ருணோ த²த்³தோ⁴’’தி ப⁴யம் உப்பஜ்ஜேய்ய, ஸதே³வகே லோகே நிக்³கு³ணத²த்³த⁴தா³ருணானம் அக்³க³ஸ்ஸ தே³வத³த்தஸ்ஸ ச²ன்னம் வா ஸத்தா²ரானம் பா⁴யேய்யும், ந ச லஜ்ஜந்தி ந ச பா⁴யந்தி, குப்பித்வா யம்கிஞ்சி அனயப்³யஸனம் ஆபாதே³ந்தியேவ. ஏவம் அவிஸேஸகாரிதோ ஸதி³ஸதா வேதி³தப்³பா³.

அனந்ததோ³ஸூபத்³த³வதோதி ஆஸீவிஸே நிஸ்ஸாய உப்பஜ்ஜனகானஞ்ஹி தோ³ஸூபத்³த³வானம் பமாணம் நத்தி². ததா² ஹேதே ட³ம்ஸித்வா காணம்பி கரோந்தி கு²ஜ்ஜம்பி பீட²ஸப்பிம்பி ஏகபக்க²லம்பீதி ஏவம் அபரிமாணம் விப்பகாரம் த³ஸ்ஸேந்தி. பூ⁴தானிபி குப்பிதானி ந காணாதி³பா⁴வேஸு ந கிஞ்சி விப்பகாரம் ந கரோந்தி, அப்பமாணோ ஏதேஸம் தோ³ஸூபத்³த³வோதி. ஏவம் அனந்ததோ³ஸூபத்³த³வதோ ஸதி³ஸதா வேதி³தப்³பா³.

இதா³னேத்த² சதுமஹாபூ⁴தவஸேன யாவ அரஹத்தா கம்மட்டா²னம் கதே²தப்³ப³ம் ஸியா, தம் விஸுத்³தி⁴மக்³கே³ சதுதா⁴துவவத்தா²னனித்³தே³ஸே கதி²தமேவ.

பஞ்ச வத⁴கா பச்சத்தி²காதி கோ² பி⁴க்க²வே பஞ்சன்னேதம் உபாதா³னக்க²ந்தா⁴னம் அதி⁴வசனந்தி ஏத்த² த்³வீஹி ஆகாரேஹி க²ந்தா⁴னம் வத⁴கபச்சத்தி²கஸதி³ஸதா வேதி³தப்³பா³. க²ந்தா⁴ ஹி அஞ்ஞமஞ்ஞஞ்ச வதே⁴ந்தி, தேஸு ச ஸந்தேஸு வதோ⁴ நாம பஞ்ஞாயதி. கத²ம்? ரூபம் தாவ ரூபம்பி வதே⁴தி அரூபம்பி, ததா² அரூபம் அரூபம்பி வதே⁴தி ரூபம்பி. கத²ம்? அயஞ்ஹி பத²வீதா⁴து பி⁴ஜ்ஜமானா இதரா திஸ்ஸோ தா⁴துயோ க³ஹேத்வாவ பி⁴ஜ்ஜதி, ஆபோதா⁴துஆதீ³ஸுபி ஏஸேவ நயோ, ஏவம் தாவ ரூபம் ரூபமேவ வதே⁴தி. ரூபக்க²ந்தோ⁴ பன பி⁴ஜ்ஜமானோ சத்தாரோ அரூபக்க²ந்தே⁴ க³ஹேத்வாவ பி⁴ஜ்ஜதி, ஏவம் ரூபம் அரூபம்பி வதே⁴தி. வேத³னாக்க²ந்தோ⁴பி பி⁴ஜ்ஜமானோ ஸஞ்ஞாஸங்கா²ரவிஞ்ஞாணக்க²ந்தே⁴ க³ஹேத்வாவ பி⁴ஜ்ஜதி. ஸஞ்ஞாக்க²ந்தா⁴தீ³ஸுபி ஏஸேவ நயோ. ஏவம் அரூபம் அரூபமேவ வதே⁴தி. சுதிக்க²ணே பன சத்தாரோ அரூபக்க²ந்தா⁴ பி⁴ஜ்ஜமானா வத்து²ரூபம்பி க³ஹேத்வாவ பி⁴ஜ்ஜந்தி, ஏவம் அரூபம் ரூபம்பி வதே⁴தி. ஏவம் தாவ அஞ்ஞமஞ்ஞம் வதே⁴ந்தீதி வத⁴கா. யத்த² பன க²ந்தா⁴ அத்தி², தத்த² சே²த³னபே⁴த³னவத⁴ப³ந்த⁴னாத³யோ ஹோந்தி, ந அஞ்ஞத்தா²தி. ஏவம் க²ந்தே⁴ஸு ஸந்தேஸு வதோ⁴ பஞ்ஞாயதீதிபி வத⁴கா.

இதா³னி பஞ்சக்க²ந்தே⁴ ரூபாரூபவஸேன த்³வே கோட்டா²ஸே கத்வா, ரூபவஸேன வா நாமவஸேன வா ரூபபரிக்³க³ஹம் ஆதி³ம் கத்வா, யாவ அரஹத்தா கம்மட்டா²னம் கதே²தப்³ப³ம் ஸியா தம்பி விஸுத்³தி⁴மக்³கே³ கதி²தமேவ.

ச²ட்டோ² அந்தரசரோ வத⁴கோ உக்கி²த்தாஸிகோதி கோ², பி⁴க்க²வே, நந்தீ³ராக³ஸ்ஸேதம் அதி⁴வசனந்தி ஏத்த² த்³வீஹாகாரேஹி நந்தீ³ராக³ஸ்ஸ உக்கி²த்தாஸிகவத⁴கஸதி³ஸதா வேதி³தப்³பா³ பஞ்ஞாஸிரபாதனதோ ச யோனிஸம்படிபாத³னதோ ச. கத²ம்? சக்கு²த்³வாரஸ்மிஞ்ஹி இட்டா²ரம்மணே ஆபாத²க³தே தம் ஆரம்மணம் நிஸ்ஸாய லோபோ⁴ உப்பஜ்ஜதி, ஏத்தாவதா பஞ்ஞாஸீஸம் பதிதம் நாம ஹோதி, ஸோதத்³வாராதீ³ஸுபி ஏஸேவ நயோ. ஏவம் தாவ பஞ்ஞாஸிரபாதனதோ ஸதி³ஸதா வேதி³தப்³பா³. நந்தீ³ராகோ³ பனேஸ அண்ட³ஜாதி³பே⁴தா³ சதஸ்ஸோ யோனியோ உபனேதி. தஸ்ஸ யோனிஉபக³மனமூலகானி பஞ்சவீஸதி மஹாப⁴யானி த்³வத்திம்ஸ கம்மகாரணானி ச ஆக³தானேவ ஹோந்தீதி ஏவம் யோனிஸம்படிபாத³னதோபிஸ்ஸ உக்கி²த்தாஸிகவத⁴கஸதி³ஸதா வேதி³தப்³பா³.

இதி நந்தீ³ராக³வஸேனாபி ஏகஸ்ஸ பி⁴க்கு²னோ கம்மட்டா²னம் கதி²தமேவ ஹோதி. கத²ம்? அயஞ்ஹி நந்தீ³ராகோ³ ஸங்கா²ரக்க²ந்தோ⁴, தம் ஸங்கா²ரக்க²ந்தோ⁴தி வவத்த²பேத்வா தம்ஸம்பயுத்தா வேத³னா வேத³னாக்க²ந்தோ⁴, ஸஞ்ஞா ஸஞ்ஞாக்க²ந்தோ⁴, சித்தம் விஞ்ஞாணக்க²ந்தோ⁴, தேஸம் வத்தா²ரம்மணம் ரூபக்க²ந்தோ⁴தி, ஏவம் பஞ்சக்க²ந்தே⁴ வவத்த²பேதி. இதா³னி தே பஞ்சக்க²ந்தே⁴ நாமரூபவஸேன வவத்த²பேத்வா, தேஸம் பச்சயபரியேஸனதோ பட்டா²ய விபஸ்ஸனம் வட்³டே⁴த்வா, அனுபுப்³பே³ன ஏகோ அரஹத்தம் பாபுணாதீதி ஏவம் நந்தீ³ராக³வஸேன கம்மட்டா²னம் கதி²தம் ஹோதி.

ச²ன்னம் அஜ்ஜ²த்திகாயதனானம் ஸுஞ்ஞகா³மேன ஸதி³ஸதா பாளியம்யேவ ஆக³தா. அயம் பனேத்த² கம்மட்டா²னனயோ – யதா² ச தே ச² சோரா ச²குடிகம் ஸுஞ்ஞம் கா³மம் பவிஸித்வா அபராபரம் விசரந்தா கிஞ்சி அலபி⁴த்வா கா³மேன அனத்தி²கா ஹோந்தி, ஏவமேவம் பி⁴க்கு² ச²ஸு அஜ்ஜ²த்திகாயதனேஸு அபி⁴னிவிஸித்வா விசினந்தோ ‘‘அஹ’’ந்தி வா ‘‘மம’’ந்தி வா க³ஹேதப்³ப³ம் கிஞ்சி அதி³ஸ்வா தேஹி அனத்தி²கோ ஹோதி. ஸோ ‘‘விபஸ்ஸனம் பட்ட²பேஸ்ஸாமீ’’தி உபாதா³ரூபகம்மட்டா²னவஸேன சக்கு²பஸாதா³த³யோ பரிக்³க³ஹேத்வா ‘‘அயம் ரூபக்க²ந்தோ⁴’’தி வவத்த²பேதி, மனாயதனம் ‘‘அரூபக்க²ந்தோ⁴’’தி. இதி ஸப்³பா³னிபேதானி நாமஞ்சேவ ரூபஞ்சாதி நாமரூபவஸேன வவத்த²பேத்வா, தேஸம் பச்சயம் பரியேஸித்வா விபஸ்ஸனம் வட்³டே⁴த்வா, ஸங்கா²ரே ஸம்மஸந்தோ அனுபுப்³பே³ன அரஹத்தே பதிட்டா²தி. இத³ம் ஏகஸ்ஸ பி⁴க்கு²னோ யாவ அரஹத்தா கம்மட்டா²னம் கதி²தம் ஹோதி.

இதா³னி பா³ஹிரானம் கா³மகா⁴தகசோரேஹி ஸதி³ஸதம் த³ஸ்ஸேந்தோ சோரா கா³மகா⁴தகாதி கோ²திஆதி³மாஹ. தத்த² மனாபாமனாபேஸூதி கரணத்தே² பு⁴ம்மம், மனாபாமனாபேஹீதி அத்தோ². தத்த² சோரேஸு கா³மம் ஹனந்தேஸு பஞ்ச கிச்சானி வத்தந்தி – சோரா தாவ கா³மம் பரிவாரேத்வா டி²தா அக்³கி³ம் த³த்வா கடகடஸத்³த³ம் உட்டா²பேந்தி, ததோ மனுஸ்ஸா ஹத்த²ஸாரம் க³ஹேத்வா ப³ஹி நிக்க²மந்தி. ததோ தேஹி ஸத்³தி⁴ம் ப⁴ண்ட³கஸ்ஸ காரணா ஹத்த²பராமாஸம் கரோந்தி. கேசி பனேத்த² பஹாரம் பாபுணந்தி, கேசி பஹாரட்டா²னே பதந்தி, அவஸேஸே பன அரோக³ஜனே ப³ந்தி⁴த்வா அத்தனோ வஸனட்டா²னம் நேத்வா ரஜ்ஜுப³ந்த⁴னாதீ³ஹி ப³ந்தி⁴த்வா தா³ஸபரிபோ⁴கே³ன பரிபு⁴ஞ்ஜந்தி.

தத்த² கா³மகா⁴தகசோரானம் கா³மம் பரிவாரேத்வா அக்³கி³தா³னம் விய ச²ஸு த்³வாரேஸு ஆரம்மணே ஆபாத²க³தே கிலேஸபரிளாஹுப்பத்தி வேதி³தப்³பா³, ஹத்த²ஸாரம் ஆதா³ய ப³ஹி நிக்க²மனம் விய. தங்க²ணே குஸலத⁴ம்மம் பஹாய அகுஸலஸமங்கி³தா, ப⁴ண்ட³கஸ்ஸ காரணா ஹத்த²பராமஸனாபஜ்ஜனம் விய து³க்கடது³ப்³பா⁴ஸிதபாசித்தியது²ல்லச்சயானம் ஆபஜ்ஜனகாலோ, பஹாரலத்³த⁴காலோ விய ஸங்கா⁴தி³ஸேஸம் ஆபஜ்ஜனகாலோ, பஹாரம் லத்³தா⁴ பன பஹாரட்டா²னே பதிதகாலோ விய பாராஜிகம் ஆபஜ்ஜித்வா அஸ்ஸமணகாலோ, அவஸேஸஜனஸ்ஸ ப³ந்தி⁴த்வா வஸனட்டா²னம் நேத்வா தா³ஸபரிபோ⁴கே³ன பரிபு⁴ஞ்ஜனகாலோ விய தமேவ ஆரம்மணம் நிஸ்ஸாய ஸப்³பே³ஸம் பஸ்ஸந்தானம்யேவ சூளஸீலமஜ்ஜி²மஸீலமஹாஸீலானி பி⁴ந்தி³த்வா ஸிக்க²ம் பச்சக்கா²ய கி³ஹிபா⁴வம் ஆபஜ்ஜனகாலோ. தத்ரஸ்ஸ புத்ததா³ரம் போஸேந்தஸ்ஸ ஸந்தி³ட்டி²கோ து³க்க²க்க²ந்தோ⁴ வேதி³தப்³போ³, காலம் கத்வா அபாயே நிப்³ப³த்தஸ்ஸ ஸம்பராயிகோ.

இமானிபி பா³ஹிராயதனானி ஏகஸ்ஸ பி⁴க்கு²னோ கம்மட்டா²னவஸேனேவ கதி²தானி. ஏத்த² ஹி ரூபாதீ³னி சத்தாரி உபாதா³ரூபானி, போ²ட்ட²ப்³பா³யதனம் திஸ்ஸோ தா⁴துயோ, த⁴ம்மாயதனே ஆபோதா⁴துயா ஸத்³தி⁴ம் தா சதஸ்ஸோதி இமானி சத்தாரி பூ⁴தானி, தேஸம் பரிச்சே²த³வஸேன ஆகாஸதா⁴து, லஹுதாதி³வஸேன லஹுதாத³யோதி ஏவமித³ம் ஸப்³ப³ம்பி பூ⁴துபாதா³யரூபம் ரூபக்க²ந்தோ⁴, ததா³ரம்மணா வேத³னாத³யோ சத்தாரோ அரூபக்க²ந்தா⁴. தத்த² ‘‘ரூபக்க²ந்தோ⁴ ரூபம், சத்தாரோ அரூபினோ க²ந்தா⁴ நாம’’ந்தி. நாமரூபம் வவத்த²பேத்வா புரிமனயேனேவ படிபஜ்ஜந்தஸ்ஸ யாவ அரஹத்தா கம்மட்டா²னம் கதி²தம் ஹோதி.

ஓகா⁴னந்தி ஏத்த² து³ருத்தரணட்டோ² ஓக⁴ட்டோ². ஏதே ஹி ‘‘ஸீலஸம்வரம் பூரேத்வா அரஹத்தம் பாபுணிஸ்ஸாமீ’’தி அஜ்ஜா²ஸயம் ஸமுட்டா²பேத்வா கல்யாணமித்தே நிஸ்ஸாய ஸம்மா வாயமந்தேன தரிதப்³பா³, யேன வா தேன வா து³ருத்தரா. இமினா து³ருத்தரணட்டே²ன ஓகா⁴தி வுச்சந்தி. தேபி ஏகஸ்ஸ பி⁴க்கு²னோ கம்மட்டா²னவஸேன கதி²தா. சத்தாரோபி ஹி ஏதே ஏகோ ஸங்கா²ரக்க²ந்தோ⁴ வாதி. ஸேஸம் நந்தீ³ராகே³ வுத்தனயேனேவ யோஜேத்வா வித்தா²ரேதப்³ப³ம்.

ஸக்காயஸ்ஸேதம் அதி⁴வசனந்தி, ஸக்காயோபி ஹி ஆஸீவிஸாதீ³ஹி உத³கண்ணவஸ்ஸ ஓரிமதீரம் விய சதுமஹாபூ⁴தாதீ³ஹி ஸாஸங்கோ ஸப்படிப⁴யோ, ஸோபி ஏகஸ்ஸ பி⁴க்கு²னோ கம்மட்டா²னவஸேனேவ கதி²தோ. ஸக்காயோ ஹி தேபூ⁴மகபஞ்சக்க²ந்தா⁴, தே ச ஸமாஸதோ நாமரூபமேவாதி. ஏவமேத்த² நாமரூபவவத்தா²னம் ஆதி³ம் கத்வா யாவ அரஹத்தா கம்மட்டா²னம் வித்தா²ரேதப்³ப³ந்தி.

நிப்³பா³னஸ்ஸேதம் அதி⁴வசனந்தி நிப்³பா³னஞ்ஹி உத³கண்ணவஸ்ஸ பாரிமதீரம் விய சதுமஹாபூ⁴தாதீ³ஹி கே²மம் அப்படிப⁴யம். வீரியாரம்ப⁴ஸ்ஸேதம் அதி⁴வசனந்தி ஏத்த² சித்தகிரியத³ஸ்ஸனத்த²ம் ஹேட்டா² வுத்தவாயாமமேவ வீரியந்தி க³ண்ஹித்வா த³ஸ்ஸேதி. திண்ணோ பாரங்க³தோதி தரித்வா பாரம் க³தோ.

தத்த² யதா² ஸாஸங்கஓரிமதீரே டி²தேன உத³கண்ணவம் தரிதுகாமேன கதிபாஹம் வஸித்வா ஸணிகம் நாவம் ஸஜ்ஜேத்வா உத³ககீளம் கீளந்தேன விய ந நாவா அபி⁴ருஹிதப்³பா³. ஏவம் கரோந்தோ ஹி அனாருள்ஹோவ ப்³யஸனம் பாபுணாதி. ஏவமேவ கிலேஸண்ணவம் தரிதுகாமேன ‘‘தருணோ தாவம்ஹி, மஹல்லககாலே அட்ட²ங்கி³கமக்³க³குல்லம் ப³ந்தி⁴ஸ்ஸாமீ’’தி பபஞ்சோ ந காதப்³போ³. ஏவம் கரோந்தோ ஹி மஹல்லககாலம் அபத்வாபி வினாஸம் பாபுணாதி, பத்வாபி காதும் ந ஸக்கோதி. ப⁴த்³தே³கரத்தாதீ³னி பன அனுஸ்ஸரித்வா வேகே³னேவ அயம் அரியமக்³க³குல்லோ ப³ந்தி⁴தப்³போ³.

யதா² ச குல்லம் ப³ந்த⁴ந்தஸ்ஸ ஹத்த²பாத³பாரிபூரி இச்சி²தப்³பா³. குண்ட²பாதோ³ ஹி க²ஞ்ஜபாதோ³ வா பதிட்டா²தும் ந ஸக்கோதி, ப²ணஹத்த²காத³யோ திணபண்ணாதீ³னி க³ஹேதும் ந ஸக்கோந்தி. ஏவமிமம்பி அரியமக்³க³குல்லம் ப³ந்த⁴ந்தஸ்ஸ ஸீலபாதா³னஞ்சேவ ஸத்³தா⁴ஹத்த²ஸ்ஸ ச பாரிபூரி இச்சி²தப்³பா³. ந ஹி து³ஸ்ஸீலோ அஸ்ஸத்³தோ⁴ ஸாஸனே அப்பதிட்டி²தோ படிபத்திம் அஸ்ஸத்³த³ஹந்தோ அரியமக்³க³குல்லம் ப³ந்தி⁴தும் ஸக்கோதி. யதா² ச பரிபுண்ணஹத்த²பாதோ³பி து³ப்³ப³லோ ப்³யாதி⁴பீளிதோ குல்லம் ப³ந்தி⁴தும் ந ஸக்கோதி, தா²மஸம்பன்னோவ ஸக்கோதி, ஏவம் ஸீலவா ஸத்³தோ⁴பி அலஸோ குஸீதோ இமம் மக்³க³குல்லம் ப³ந்தி⁴தும் ந ஸக்கோதி, ஆரத்³த⁴வீரியோவ ஸக்கோதீதி இமம் ப³ந்தி⁴துகாமேன ஆரத்³த⁴வீரியேன ப⁴விதப்³ப³ம். யதா² ஸோ புரிஸோ குல்லம் ப³ந்தி⁴த்வா தீரே ட²த்வா யோஜனவித்தா²ரம் உத³கண்ணவம் ‘‘அயம் மயா பச்சத்தபுரிஸகாரம் நிஸ்ஸாய நித்த²ரிதப்³போ³’’தி மானஸம் ப³ந்த⁴தி, ஏவம் யோகி³னாபி சங்கமா ஓருய்ஹ ‘‘அஜ்ஜ மயா சதுமக்³க³வஜ்ஜ²ம் கிலேஸண்ணவம் தரித்வா அரஹத்தே பதிட்டா²தப்³ப³’’ந்தி மானஸம் ப³ந்தி⁴தப்³ப³ம்.

யதா² ச ஸோ புரிஸோ குல்லம் நிஸ்ஸாய உத³கண்ணவம் தரந்தோ கா³வுதமத்தம் க³ந்த்வா நிவத்தித்வா ஓலோகேந்தோ ‘‘ஏககோட்டா²ஸம் அதிக்கந்தோம்ஹி, அஞ்ஞே தயோ ஸேஸா’’தி ஜானாதி, அபரம்பி கா³வுதமத்தம் க³ந்த்வா நிவத்தித்வா ஓலோகேந்தோ ‘‘த்³வே அதிக்கந்தோம்ஹி, த்³வே ஸேஸா’’தி ஜானாதி, அபரம்பி கா³வுதமத்தம் க³ந்த்வா நிவத்தித்வா ஓலோகேந்தோ ‘‘தயோ அதிக்கந்தோம்ஹி, ஏகோ ஸேஸோ’’தி ஜானாதி, தம்பி அதிக்கம்ம நிவத்தித்வா ஓலோகேந்தோ ‘‘சத்தாரோபி மே கோட்ட²ஸா அதிக்கந்தா’’தி ஜானாதி, தஞ்ச குல்லம் பாதே³ன அக்கமித்வா ஸோதாபி⁴முக²ம் கி²பித்வா உத்தரித்வா தீரே திட்ட²தி. ஏவம் அயம்பி பி⁴க்கு² அரியமக்³க³குல்லம் நிஸ்ஸாய கிலேஸண்ணவம் தரந்தோ ஸோதாபத்திமக்³கே³ன பட²மமக்³க³வஜ்ஜே² கிலேஸே தரித்வா மக்³கா³னந்தரே ப²லே டி²தோ பச்சவேக்க²ணஞாணேன நிவத்தித்வா ஓலோகேந்தோ ‘‘சதுமக்³க³வஜ்ஜா²னம் மே கிலேஸானம் ஏகோ கோட்டா²ஸோ பஹீனோ, இதரே தயோ ஸேஸா’’தி ஜானாதி. புன ததே²வ இந்த்³ரியப³லபோ³ஜ்ஜ²ங்கா³னி ஸமோதா⁴னேத்வா ஸங்கா²ரே ஸம்மஸந்தோ ஸகதா³கா³மிமக்³கே³ன து³தியமக்³க³வஜ்ஜே² கிலேஸே தரித்வா மக்³கா³னந்தரே ப²லே டி²தோ பச்சவேக்க²ணஞாணேன நிவத்தித்வா, ஓலோகேந்தோ ‘‘சதுமக்³க³வஜ்ஜா²னம் மே கிலேஸானம் த்³வே கோட்டா²ஸா பஹீனா, இதரே த்³வே ஸேஸா’’தி ஜானாதி. புன ததே²வ இந்த்³ரியப³லபோ³ஜ்ஜ²ங்கா³னி ஸமோதா⁴னேத்வா ஸங்கா²ரே ஸம்மஸந்தோ அனாகா³மிமக்³கே³ன ததியமக்³க³வஜ்ஜே² கிலேஸே தரித்வா மக்³கா³னந்தரே ப²லே டி²தோ பச்சவேக்க²ணஞாணேன நிவத்தித்வா ஓலோகேந்தோ ‘‘சதுமக்³க³வஜ்ஜா²னம் மே கிலேஸானம் தயோ கோட்டா²ஸா பஹீனா, ஏகோ ஸேஸோ’’தி ஜானாதி. புன ததே²வ இந்த்³ரியப³லபோ³ஜ்ஜ²ங்கா³னி ஸமோதா⁴னேத்வா ஸங்கா²ரே ஸம்மஸந்தோ அரஹத்தமக்³கே³ன சதுத்த²மக்³க³வஜ்ஜே² கிலேஸே தரித்வா மக்³கா³னந்தரே ப²லே டி²தோ பச்சவேக்க²ணஞாணேன நிவத்தித்வா ஓலோகேந்தோ ‘‘ஸப்³ப³கிலேஸா மே பஹீனா’’தி ஜானாதி.

யதா² ஸோ புரிஸோ தம் குல்லம் ஸோதே பவாஹேத்வா உத்தரித்வா த²லே டி²தோ நக³ரம் பவிஸித்வா உபரிபாஸாத³வரக³தோ ‘‘ஏத்தகேன வதம்ஹி அனத்தே²ன முத்தோ’’தி ஏகக்³க³சித்தோ துட்ட²மானஸோ நிஸீத³தி, ஏவம் தஸ்மிம்யேவ வா ஆஸனே அஞ்ஞேஸு வா ரத்திட்டா²னதி³வாட்டா²னாதீ³ஸு யத்த² கத்த²சி நிஸின்னோ ‘‘ஏத்தகேன வதம்ஹி அனத்தே²ன முத்தோ’’தி நிப்³பா³னாரம்மணம் ப²லஸமாபத்திம் அப்பேத்வா ஏகக்³க³சித்தோ துட்ட²மானஸோ நிஸீத³தி. இத³ம் வா ஸந்தா⁴ய வுத்தம் திண்ணோ பாரங்க³தோ த²லே திட்ட²தி ப்³ராஹ்மணோதி கோ², பி⁴க்க²வே, அரஹதோ ஏதம் அதி⁴வசனந்தி. ஏவம் தாவேத்த² நானாகம்மட்டா²னானி கதி²தானி, ஸமோதா⁴னேத்வா பன ஸப்³பா³னிபி ஏகமேவ கத்வா த³ஸ்ஸேதப்³பா³னி. ஏகம் கத்வா த³ஸ்ஸேந்தேனாபி பஞ்சக்க²ந்த⁴வஸேனேவ வினிவத்தேதப்³பா³னி.

கத²ம்? ஏத்த² ஹி சத்தாரி மஹாபூ⁴தானி அஜ்ஜ²த்திகானி பஞ்சாயதனானி பா³ஹிரானி பஞ்சாயதனானி த⁴ம்மாயதனே பன்னரஸ ஸுகு²மரூபானி ஸக்காயஸ்ஸ ஏகதே³ஸோதி அயம் ரூபக்க²ந்தோ⁴, மனாயதனம் விஞ்ஞாணக்க²ந்தோ⁴ த⁴ம்மாயதனேகதே³ஸோ சத்தாரோ ஓகா⁴ ஸக்காயேகதே³ஸோதி இமே சத்தாரோ அரூபினோ க²ந்தா⁴. தத்த² ரூபக்க²ந்தோ⁴ ரூபம், சத்தாரோ அரூபினோ க²ந்தா⁴ நாமந்தி இத³ம் நாமரூபம். தஸ்ஸ நந்தீ³ராகோ³ காமோகோ⁴ ப⁴வோகோ⁴ த⁴ம்மாயதனேகதே³ஸோ ஸக்காயேகதே³ஸோதி இமே பச்சயா. இதி ஸப்பச்சயம் நாமரூபம் வவத்த²பேதி நாம. ஸப்பச்சயம் நாமரூபம் வவத்த²பேத்வா திலக்க²ணம் ஆரோபேத்வா விபஸ்ஸனம் வட்³டே⁴த்வா ஸங்கா²ரே ஸம்மஸந்தோ அரஹத்தம் பாபுணாதீதி இத³ம் ஏகஸ்ஸ பி⁴க்கு²னோ நிய்யானமுக²ம்.

தத்த² சத்தாரோ மஹாபூ⁴தா பஞ்சுபாதா³னக்க²ந்தா⁴ அஜ்ஜ²த்திகபா³ஹிரானி ஏகாத³ஸாயதனானி த⁴ம்மாயதனேகதே³ஸோ தி³ட்டோ²கோ⁴ அவிஜ்ஜோகோ⁴ ஸக்காயேகதே³ஸோதி இத³ம் து³க்க²ஸச்சம், நந்தீ³ராகோ³ த⁴ம்மாயதனேகதே³ஸோ காமோகோ⁴ ப⁴வோகோ⁴ ஸக்காயேகதே³ஸோதி இத³ம் ஸமுத³யஸச்சம், பாரிமதீரஸங்கா²தம் நிப்³பா³னம் நிரோத⁴ஸச்சம், அரியமக்³கோ³ மக்³க³ஸச்சம். தத்த² த்³வே ஸச்சானி வட்டம், த்³வே விவட்டம், த்³வே லோகியானி, த்³வே லோகுத்தரானீதி சத்தாரி ஸச்சானி ஸோளஸஹாகாரேஹி ஸட்டி²னயஸஹஸ்ஸேஹி விப⁴ஜித்வா த³ஸ்ஸேதப்³பா³னீதி. தே³ஸனாபரியோஸானே விபஞ்சிதஞ்ஞூ பஞ்சஸதா பி⁴க்கூ² அரஹத்தே பதிட்ட²ஹிம்ஸு. ஸுத்தம் பன து³க்க²லக்க²ணவஸேன கதி²தம்.