15. நவபுராணவக்³கோ³

1. கம்மனிரோத⁴ஸுத்தவண்ணனா

146. நவபுராணவக்³க³ஸ்ஸ பட²மே நவபுராணானீதி நவானி ச புராணானி ச. சக்கு², பி⁴க்க²வே, புராணகம்மந்தி ந சக்கு² புராணம், கம்மமேவ புராணம், கம்மதோ பன நிப்³ப³த்தத்தா பச்சயனாமேன ஏவம் வுத்தம். அபி⁴ஸங்க²தந்தி பச்சயேஹி அபி⁴ஸமாக³ந்த்வா கதம். அபி⁴ஸஞ்சேதயிதந்தி சேதனாய பகப்பிதம். வேத³னியம் த³ட்ட²ப்³ப³ந்தி வேத³னாய வத்தூ²தி பஸ்ஸிதப்³ப³ம். நிரோதா⁴ விமுத்திம் பு²ஸதீதி இமஸ்ஸ திவித⁴ஸ்ஸ கம்மஸ்ஸ நிரோதே⁴ன விமுத்திம் பு²ஸதி. அயம் வுச்சதீதி அயம் தஸ்ஸா விமுத்தியா ஆரம்மணபூ⁴தோ நிரோதோ⁴ கம்மனிரோதோ⁴தி வுச்சதி. இதி இமஸ்மிம் ஸுத்தே புப்³ப³பா⁴க³விபஸ்ஸனா கதி²தா.

2-5. அனிச்சனிப்³பா³னஸப்பாயஸுத்தாதி³வண்ணனா

147-150. து³தியே நிப்³பா³னஸப்பாயந்தி நிப்³பா³னஸ்ஸ ஸப்பாயம் உபகாரபடிபத³ம். ததியாதீ³ஸுபி ஏஸேவ நயோ. படிபாடியா பன சதூஸுபி ஏதேஸு ஸுத்தேஸு ஸஹ விபஸ்ஸனாய சத்தாரோ மக்³கா³ கதி²தா.

6-7. அந்தேவாஸிகஸுத்தாதி³வண்ணனா

151-152. ச²ட்டே² அனந்தேவாஸிகந்தி அந்தோ வஸனககிலேஸவிரஹிதம். அனாசரியகந்தி ஆசரணககிலேஸவிரஹிதம். அந்தஸ்ஸ வஸந்தீதி அந்தோ அஸ்ஸ வஸந்தி. தே நம் ஸமுதா³சரந்தீதி தே ஏதம் அதி⁴ப⁴வந்தி அஜ்ஜோ²த்த²ரந்தி ஸிக்கா²பேந்தி வா. ‘‘ஏவம் வேஜ்ஜகம்மம் கரோஹி, ஏவம் தூ³தகம்ம’’ந்தி இதி ஸிக்கா²பனஸங்கா²தேன ஸமுதா³சரணத்தே²னஸ்ஸ தே ஆசரியா நாம ஹோந்தி, தேஹி ஆசரியேஹி ஸாசரியகோதி வுச்சதி. ஸேஸமேத்த² வுத்தனயேனேவ வேதி³தப்³ப³ம். ஸத்தமம் ஹேட்டா² கதி²தனயமேவ.

8. அத்தி²னுகோ²பரியாயஸுத்தவண்ணனா

153. அட்ட²மே யம் பரியாயம் ஆக³ம்மாதி யம் காரணம் ஆக³ம்ம. அஞ்ஞத்ரேவ ஸத்³தா⁴யாதி வினா ஸத்³தா⁴ய ஸத்³த⁴ம் அபனேத்வா. ஏத்த² ச ஸத்³தா⁴தி ந பச்சக்கா² ஸத்³தா⁴. யோ பன பரஸ்ஸ ஏவம் கிர ஏவம் கிராதி கதே²ந்தஸ்ஸ ஸுத்வா உப்பன்னோ ஸத்³த³ஹனாகாரோ, தம் ஸந்தா⁴யேதம் வுத்தம். ருசிஆதீ³ஸுபி ருசாபேத்வா க²மாபேத்வா அத்தே²தந்தி க³ஹணாகாரோ ருசி நாம, ஏவம் கிர ப⁴விஸ்ஸதீதி அனுஸ்ஸவனம் அனுஸ்ஸவோ, நிஸீதி³த்வா ஏகம் காரணம் சிந்தேந்தஸ்ஸ காரணம் உபட்டா²தி, ஏவம் உபட்டி²தஸ்ஸ அத்தே²தந்தி க³ஹணம் ஆகாரபரிவிதக்கோ நாம, காரணவிதக்கோதி அத்தோ². காரணம் சிந்தேந்தஸ்ஸ பாபிகா லத்³தி⁴ உப்பஜ்ஜதி, தம் அத்தே²ஸாதி க³ஹணாகாரோ தி³ட்டி²னிஜ்ஜா²னக்க²ந்தி நாம. அஞ்ஞம் ப்³யாகரேய்யாதி இமானி பஞ்ச டா²னானி முஞ்சித்வா அரஹத்தம் ப்³யாகரேய்ய. இமஸ்மிம் ஸுத்தே ஸேகா²ஸேகா²னம் பச்சவேக்க²ணா கதி²தா.

9-10. இந்த்³ரியஸம்பன்னஸுத்தாதி³வண்ணனா

154-155. நவமே இந்த்³ரியஸம்பன்னோதி பரிபுண்ணிந்த்³ரியோ. தத்த² யேன ச² இந்த்³ரியானி ஸம்மஸித்வா அரஹத்தம் பத்தம், ஸோ தேஹி நிப்³பி³ஸேவனேஹி இந்த்³ரியேஹி ஸமன்னாக³தத்தா, சக்கா²தீ³னி வா ச² இந்த்³ரியானி ஸம்மஸந்தஸ்ஸ உப்பன்னேஹி ஸத்³தா⁴தீ³ஹி இந்த்³ரியேஹி ஸமன்னாக³தத்தா பரிபுண்ணிந்த்³ரியோ நாம ஹோதி, தம் ஸந்தா⁴ய ப⁴க³வா சக்கு²ந்த்³ரியே சேதிஆதி³னா நயேன தே³ஸனம் வித்தா²ரேத்வா ஏத்தாவதா கோ² பி⁴க்கு² இந்த்³ரியஸம்பன்னோ ஹோதீதி ஆஹ. த³ஸமம் ஹேட்டா² வுத்தனயமேவாதி.

நவபுராணவக்³கோ³ பஞ்சத³ஸமோ.

ததியோ பண்ணாஸகோ.