8. நாக³ஸம்யுத்தம்

1. ஸுத்³தி⁴கஸுத்தவண்ணனா

342. நாக³ஸம்யுத்தே அண்ட³ஜாதி அண்டே³ ஜாதா. ஜலாபு³ஜாதி வத்தி²கோஸே ஜாதா. ஸம்ஸேத³ஜாதி ஸம்ஸேதே³ ஜாதா. ஓபபாதிகாதி உபபதித்வா விய ஜாதா. இத³ஞ்ச பன ஸுத்தம் அட்டு²ப்பத்தியா வுத்தம். பி⁴க்கூ²னஞ்ஹி ‘‘கதி நு கோ² நாக³யோனியோ’’தி கதா² உத³பாதி³. அத² ப⁴க³வா புக்³க³லானம் நாக³யோனீஹி உத்³த⁴ரணத்த²ம் நாக³யோனியோ ஆவிகரோந்தோ இமம் ஸுத்தமாஹ.

2-50. பணீததரஸுத்தாதி³வண்ணனா

343-391. து³தியாதீ³ஸு வோஸ்ஸட்ட²காயாதி அஹிதுண்டி³கபரிபு³த்³த⁴ம் அக³ணேத்வா விஸ்ஸட்ட²காயா. த்³வயகாரினோதி து³வித⁴காரினோ, குஸலாகுஸலகாரினோதி அத்தோ². ஸசஜ்ஜ மயந்தி ஸசே அஜ்ஜ மயம். ஸஹப்³யதம் உபபஜ்ஜதீதி ஸஹபா⁴வம் ஆபஜ்ஜதி. தத்ரஸ்ஸ அகுஸலம் உபபத்தியா பச்சயோ ஹோதி, குஸலம் உபபன்னானம் ஸம்பத்தியா. அன்னந்தி கா²த³னீயபோ⁴ஜனீயம். பானந்தி யம்கிஞ்சி பானகம். வத்த²ந்தி நிவாஸனபாருபனம். யானந்தி ச²த்துபாஹனம் ஆதி³ம் கத்வா யம்கிஞ்சி க³மனபச்சயம். மாலந்தி யம்கிஞ்சி ஸுமனமாலாதி³புப்ப²ம். க³ந்த⁴ந்தி யம்கிஞ்சி சந்த³னாதி³க³ந்த⁴ம். விலேபனந்தி யம்கிஞ்சி ச²விராக³கரணம். ஸேய்யாவஸத²பதீ³பேய்யந்தி மஞ்சபீடா²தி³ஸேய்யம் ஏகபூ⁴மிகாதி³ஆவஸத²ம் வட்டிதேலாதி³பதீ³பூபகரணஞ்ச தே³தீதி அத்தோ². தேஸஞ்ஹி தீ³கா⁴யுகதாய ச வண்ணவந்ததாய ச ஸுக²ப³ஹுலதாய ச பத்த²னம் கத்வா இமம் த³ஸவித⁴ம் தா³னவத்து²ம் த³த்வா தம் ஸம்பத்திம் அனுப⁴விதும் தத்த² நிப்³ப³த்தந்தி. ஸேஸம் ஸப்³ப³த்த² உத்தானமேவாதி.

நாக³ஸம்யுத்தவண்ணனா நிட்டி²தா.