1. பட²மவக்³கோ³

1. மாரஸுத்தவண்ணனா

160. ராத⁴ஸம்யுத்தஸ்ஸ பட²மே மாரோ வா அஸ்ஸாதி மரணம் வா ப⁴வேய்ய. மாரேதா வாதி மாரேதப்³போ³ வா. யோ வா பன மீயதீதி யோ வா பன மரதி. நிப்³பி³த³த்த²ந்தி நிப்³பி³தா³ஞாணத்த²ம். நிப்³பா³னத்தா²தி ப²லவிமுத்தி நாமேஸா அனுபாதா³னிப்³பா³னத்தா²தி அத்தோ². அச்சயாஸீதி அதிக்கந்தோஸி. நிப்³பா³னோக³த⁴ந்தி நிப்³பா³னே பதிட்டி²தம். இத³ம் மக்³க³ப்³ரஹ்மசரியம் நாம நிப்³பா³னப்³ப⁴ந்தரே வுஸ்ஸதி, ந நிப்³பா³னம் அதிக்கமித்வாதி அத்தோ². நிப்³பா³னபரியோஸானந்தி நிப்³பா³னம் அஸ்ஸ பரியோஸானம், நிப்ப²த்தி நிட்டா²தி அத்தோ². பட²மம்.

2-10. ஸத்தஸுத்தாதி³வண்ணனா

161-169. து³தியே ஸத்தோ ஸத்தோதி லக்³க³புச்சா². தத்ர ஸத்தோ தத்ர விஸத்தோதி தத்ர லக்³கோ³ தத்ர விலக்³கோ³. பம்ஸ்வாகா³ரகேஹீதி பம்ஸுக⁴ரகேஹி. கேளாயந்தீதி கீளந்தி. த⁴னாயந்தீதி த⁴னம் விய மஞ்ஞந்தி. மமாயந்தீதி ‘‘மம இத³ம், மம இத³’’ந்தி மமத்தம் கரோந்தி, அஞ்ஞஸ்ஸ பு²ஸிதும்பி ந தே³ந்தி. விகீளனியம் கரோந்தீதி ‘‘நிட்டி²தா கீளா’’தி தே பி⁴ந்த³மானா கீளாவிக³மம் கரோந்தி. ததியே ப⁴வனேத்தீதி ப⁴வரஜ்ஜு. சதுத்த²ம் உத்தானமேவ. பஞ்சமாதீ³ஸு சதூஸு சத்தாரி ஸச்சானி கதி²தானி, த்³வீஸு கிலேஸப்பஹானந்தி. து³தியாதீ³னி.

பட²மோ வக்³கோ³.