7. க²ஜ்ஜனீயஸுத்தவண்ணனா

79. ஸத்தமே புப்³பே³னிவாஸந்தி ந இத³ம் அபி⁴ஞ்ஞாவஸேன அனுஸ்ஸரணம் ஸந்தா⁴ய வுத்தம், விபஸ்ஸனாவஸேன பன புப்³பே³னிவாஸம் அனுஸ்ஸரந்தே ஸமணப்³ராஹ்மணே ஸந்தா⁴யேதம் வுத்தம். தேனேவாஹ – ‘‘ஸப்³பே³தே பஞ்சுபாதா³னக்க²ந்தே⁴ அனுஸ்ஸரந்தி, ஏதேஸம் வா அஞ்ஞதர’’ந்தி. அபி⁴ஞ்ஞாவஸேன ஹி ஸமனுஸ்ஸரந்தஸ்ஸ க²ந்தா⁴பி உபாதா³னக்க²ந்தா⁴பி க²ந்த⁴படிப³த்³தா⁴பி பண்ணத்திபி ஆரம்மணம் ஹோதியேவ. ரூபம்யேவ அனுஸ்ஸரதீதி ஏவஞ்ஹி அனுஸ்ஸரந்தோ ந அஞ்ஞம் கிஞ்சி ஸத்தம் வா புக்³க³லம் வா அனுஸ்ஸரதி, அதீதே பன நிருத்³த⁴ம் ரூபக்க²ந்த⁴மேவ அனுஸ்ஸரதி. வேத³னாதீ³ஸுபி ஏஸேவ நயோதி. ஸுஞ்ஞதாபப்³ப³ம் நிட்டி²தம்.

இதா³னி ஸுஞ்ஞதாய லக்க²ணம் த³ஸ்ஸேதும் கிஞ்ச, பி⁴க்க²வே, ரூபம் வதே³தா²திஆதி³மாஹ. யதா² ஹி நட்ட²ம் கோ³ணம் பரியேஸமானோ புரிஸோ கோ³க³ணே சரமானே ரத்தம் வா காளம் வா ப³லீப³த்³த³ம் தி³ஸ்வாபி ந ஏத்தகேனேவ ‘‘அயம் மய்ஹம் கோ³ணோ’’தி ஸன்னிட்டா²னம் காதும் ஸக்கோதி. கஸ்மா? அஞ்ஞேஸம்பி தாதி³ஸானம் அத்தி²தாய. ஸரீரபதே³ஸே பனஸ்ஸ ஸத்திஸூலாதி³லக்க²ணம் தி³ஸ்வா ‘‘அயம் மய்ஹம் ஸந்தகோ’’தி ஸன்னிட்டா²னம் ஹோதி, ஏவமேவ ஸுஞ்ஞதாய கதி²தாயபி யாவ ஸுஞ்ஞதாலக்க²ணம் ந கதீ²யதி, தாவ ஸா அகதி²தாவ ஹோதி, லக்க²ணே பன கதி²தே கதி²தா நாம ஹோதி. கோ³ணோ விய ஹி ஸுஞ்ஞதா, கோ³ணலக்க²ணம் விய ஸுஞ்ஞதாலக்க²ணம். யதா² கோ³ணலக்க²ணே அஸல்லக்கி²தே கோ³ணோ ந ஸுட்டு² ஸல்லக்கி²தோ ஹோதி, தஸ்மிம் பன ஸல்லக்கி²தே ஸோ ஸல்லக்கி²தோ நாம ஹோதி, ஏவமேவ ஸுஞ்ஞதாலக்க²ணே அகதி²தே ஸுஞ்ஞதா அகதி²தாவ ஹோதி, தஸ்மிம் பன கதி²தே ஸா கதி²தா நாம ஹோதீதி ஸுஞ்ஞதாலக்க²ணம் த³ஸ்ஸேதும் கிஞ்ச, பி⁴க்க²வே, ரூபம் வதே³தா²திஆதி³மாஹ.

தத்த² கிஞ்சாதி காரணபுச்சா², கேன காரணேன ரூபம் வதே³த², கேன காரணேனேதம் ரூபம் நாமாதி அத்தோ². ருப்பதீதி கோ²தி ஏத்த² இதீதி காரணுத்³தே³ஸோ, யஸ்மா ருப்பதி, தஸ்மா ரூபந்தி வுச்சதீதி அத்தோ². ருப்பதீதி குப்பதி க⁴ட்டீயதி பீளீயதி, பி⁴ஜ்ஜதீதி அத்தோ². ஸீதேனபி ருப்பதீதிஆதீ³ஸு ஸீதேன தாவ ருப்பனம் லோகந்தரிகனிரயே பாகடம். திண்ணம் திண்ணஞ்ஹி சக்கவாளானம் அந்தரே ஏகேகோ லோகந்தரிகனிரயோ நாம ஹோதி அட்ட²யோஜனஸஹஸ்ஸப்பமாணோ. யஸ்ஸ நேவ ஹேட்டா² பத²வீ அத்தி², ந உபரி சந்தி³மஸூரியதீ³பமணிஆலோகோ, நிச்சந்த⁴காரோ. தத்த² நிப்³ப³த்தஸத்தானம் திகா³வுதோ அத்தபா⁴வோ ஹோதி, தே வக்³கு³லியோ விய பப்³ப³தபாதே³ தீ³க⁴புது²லேஹி நகே²ஹி லக்³கி³த்வா அவம்ஸிரா ஓலம்ப³ந்தி. யதா³ ஸம்ஸப்பந்தா அஞ்ஞமஞ்ஞஸ்ஸ ஹத்த²பாஸாக³தா ஹோந்தி, அத² ‘‘ப⁴க்கோ² நோ லத்³தோ⁴’’தி? மஞ்ஞமானா தத்த² ப்³யாவடா விபரிவத்தித்வா லோகஸந்தா⁴ரகே உத³கே பதந்தி, வாதே பஹரந்தேபி மது⁴கப²லானி விய சி²ஜ்ஜித்வா உத³கே பதந்தி, பதிதமத்தாவ அச்சந்தகா²ரே உத³கே தத்ததேலே பதிதபிட்ட²பிண்டி³ விய படபடாயமானா விலீயந்தி. ஏவம் ஸீதேன ருப்பனம் லோகந்தரிகனிரயே பாகடம். மஹிம்ஸகரட்டா²தீ³ஸுபி ஹிமபாதஸீதலேஸு பதே³ஸேஸு ஏதம் பாகடமேவ. தத்த² ஹி ஸத்தா ஸீதேன பி⁴ன்னஸரீரா ஜீவிதக்க²யம்பி பாபுணந்தி.

உண்ஹேன ருப்பனம் அவீசிமஹானிரயே பாகடம் ஹோதி. ஜிக⁴ச்சா²ய ருப்பனம் பேத்திவிஸயே சேவ து³ப்³பி⁴க்க²காலே ச பாகடம். பிபாஸாய ருப்பனம் காலகஞ்ஜிகாதீ³ஸு பாகடம். ஏகோ கிர காலகஞ்ஜிகஅஸுரோ பிபாஸம் அதி⁴வாஸேதும் அஸக்கோந்தோ யோஜனக³ம்பீ⁴ரவித்தா²ரம் மஹாக³ங்க³ம் ஓதரி, தஸ்ஸ க³தக³தட்டா²னே உத³கம் சி²ஜ்ஜதி, தூ⁴மோ உக்³க³ச்ச²தி, தத்தே பிட்டி²பாஸாணே சங்கமனகாலோ விய ஹோதி. தஸ்ஸ உத³கஸத்³த³ம் ஸுத்வா இதோ சிதோ ச விசரந்தஸ்ஸேவ ரத்தி விபா⁴யி. அத² நம் பாதோவ பி⁴க்கா²சாரம் க³ச்ச²ந்தா திம்ஸமத்தா பிண்ட³சாரிகபி⁴க்கூ² தி³ஸ்வா ‘‘கோ நாம த்வம் ஸப்புரிஸா’’தி? புச்சி²ம்ஸு. ‘‘பேதோஹமஸ்மி, ப⁴ந்தே’’தி. ‘‘கிம் பரியேஸஸீ’’தி? ‘‘பானீயம், ப⁴ந்தே’’தி. ‘‘அயம் க³ங்கா³ பரிபுண்ணா, கிம் த்வம் ந பஸ்ஸஸீ’’தி? ‘‘ந உபகப்பதி, ப⁴ந்தே’’தி. தேன ஹி க³ங்கா³பிட்டே² நிபஜ்ஜ, முகே² தே பானீயம் ஆஸிஞ்சிஸ்ஸாமா’’தி. ஸோ வாலிகாபுளினே உத்தானோ நிபஜ்ஜி. பி⁴க்கூ² திம்ஸமத்தே பத்தே நீஹரித்வா உத³கம் ஆஹரித்வா தஸ்ஸ முகே² ஆஸிஞ்சிம்ஸு. தேஸம் ததா² கரோந்தானம்யேவ வேலா உபகட்டா² ஜாதா. ததோ ‘‘பி⁴க்கா²சாரகாலோ அம்ஹாகம் ஸப்புரிஸ, கச்சி தே அஸ்ஸாத³மத்தா லத்³தா⁴’’தி ஆஹம்ஸு. பேதோ ‘‘ஸசே மே, ப⁴ந்தே, திம்ஸமத்தானம் அய்யானம் திம்ஸபத்தேஹி ஆஸித்தஉத³கதோ அட்³ட⁴பஸதமத்தம்பி பரக³லம் க³தம், பேதத்தபா⁴வதோ மோக்கோ² மா ஹோதூ’’தி ஆஹ. ஏவம் பிபாஸாய ருப்பனம் பேத்திவிஸயே பாகடம்.

ட³ம்ஸாதீ³ஹி ருப்பனம் ட³ம்ஸமக்கி²காதி³ப³ஹுலேஸு பதே³ஸேஸு பாகடம். ஏத்த² ச ட³ம்ஸாதி பிங்க³லமக்கி²கா. மகஸாதி மகஸாவ. வாதாதி குச்சி²வாதபிட்டி²வாதாதி³வஸேன வேதி³தப்³பா³. ஸரீரஸ்மிஞ்ஹி வாதரோகோ³ உப்பஜ்ஜித்வா ஹத்த²பாத³பிட்டி²ஆதீ³னி பி⁴ந்த³தி, காணம் கரோதி, கு²ஜ்ஜம் கரோதி, பீட²ஸப்பிம் கரோதி. ஆதபோதி ஸூரியாதபோ. தேன ருப்பனம் மருகந்தாராதீ³ஸு பாகடம். ஏகா கிர இத்தீ² மருகந்தாரே ரத்திம் ஸத்த²தோ ஓஹீனா தி³வா ஸூரியே உக்³க³ச்ச²ந்தே வாலிகாய தப்பமானாய பாதே³ ட²பேதும் அஸக்கோந்தீ ஸீஸதோ பச்சி²ம் ஓதாரேத்வா அக்கமி. கமேன பச்சி²யா உண்ஹாபி⁴தத்தாய டா²தும் அஸக்கோந்தீ தஸ்ஸா உபரி ஸாடகம் ட²பேத்வா அக்கமி. தஸ்மிம்பி ஸந்தத்தே அத்தனோ அங்கேன க³ஹிதபுத்தகம் அதோ⁴முக²ம் நிபஜ்ஜாபேத்வா கந்த³ந்தம்யேவ அக்கமித்வா ஸத்³தி⁴ம் தேன தஸ்மிம்யேவ டா²னே உண்ஹாபி⁴தத்தா காலமகாஸி.

ஸரீஸபாதி யே கேசி தீ³க⁴ஜாதிகா ஸரந்தா க³ச்ச²ந்தி. தேஸம் ஸம்ப²ஸ்ஸேன ருப்பனம் ஆஸீவிஸத³ட்ட²காதீ³னம் வஸேன வேதி³தப்³ப³ம். இதி ப⁴க³வதா யானி இமானி ஸாமஞ்ஞபச்சத்தவஸேன த⁴ம்மானம் த்³வே லக்க²ணானி, தேஸு ரூபக்க²ந்த⁴ஸ்ஸ தாவ பச்சத்தலக்க²ணம் த³ஸ்ஸிதம். ரூபக்க²ந்த⁴ஸ்ஸேவ ஹி ஏதம், ந வேத³னாதீ³னம், தஸ்மா பச்சத்தலக்க²ணந்தி வுச்சதி. அனிச்சது³க்கா²னத்தலக்க²ணம் பன வேத³னாதீ³னம்பி ஹோதி, தஸ்மா தம் ஸாமஞ்ஞலக்க²ணந்தி வுச்சதி.

கிஞ்ச, பி⁴க்க²வே, வேத³னம் வதே³தா²திஆதீ³ஸு புரிமஸதி³ஸம் வுத்தனயேனேவ வேதி³தப்³ப³ம். யம் பன புரிமேன அஸதி³ஸம், தஸ்ஸாயம் விபா⁴வனா – ஸுக²ம்பி வேத³யதீதி ஸுக²ம் ஆரம்மணம் வேதே³தி அனுப⁴வதி. பரதோ பத³த்³வயேபி ஏஸேவ நயோ. கத²ம் பனேதம் ஆரம்மணம் ஸுக²ம் து³க்க²ம் அது³க்க²மஸுக²ம் நாம ஜாதந்தி? ஸுகா²தீ³னம் பச்சயதோ. ஸ்வாயமத்தோ² ‘‘யஸ்மா ச கோ², மஹாலி, ரூபம் ஸுக²ம் ஸுகா²னுபதிதம் ஸுகா²வக்கந்த’’ந்தி இமஸ்மிம் மஹாலிஸுத்தே (ஸம். நி. 3.60) ஆக³தோயேவ. வேத³யதீதி ஏத்த² ச வேத³னாவ வேத³யதி, ந அஞ்ஞோ ஸத்தோ வா புக்³க³லோ வா. வேத³னா ஹி வேத³யிதலக்க²ணா, தஸ்மா வத்தா²ரம்மணம் படிச்ச வேத³னாவ வேத³யதீதி. ஏவமித⁴ ப⁴க³வா வேத³னாயபி பச்சத்தலக்க²ணமேவ பா⁴ஜேத்வா த³ஸ்ஸேஸி.

நீலம்பி ஸஞ்ஜானாதீதி நீலபுப்பே² வா வத்தே² வா பரிகம்மம் கத்வா உபசாரம் வா அப்பனம் வா பாபேந்தோ ஸஞ்ஜானாதி. அயஞ்ஹி ஸஞ்ஞா நாம பரிகம்மஸஞ்ஞாபி உபசாரஸஞ்ஞாபி அப்பனாஸஞ்ஞாபி வட்டதி, நீலம் நீலந்தி உப்பஜ்ஜனஸஞ்ஞாபி வட்டதியேவ. பீதகாதீ³ஸுபி ஏஸேவ நயோ. இதா⁴பி ப⁴க³வா ஸஞ்ஜானனலக்க²ணாய ஸஞ்ஞாய பச்சத்தலக்க²ணமேவ பா⁴ஜேத்வா த³ஸ்ஸேஸி.

ரூபம் ரூபத்தாய ஸங்க²தமபி⁴ஸங்க²ரோந்தீதி யதா² யாகு³மேவ யாகு³த்தாய, பூவமேவ பூவத்தாய பசதி நாம, ஏவம் பச்சயேஹி ஸமாக³ந்த்வா கதபா⁴வேன ஸங்க²தந்தி லத்³த⁴னாமம் ரூபமேவ ரூபத்தாய யதா² அபி⁴ஸங்க²தம் ரூபம் நாம ஹோதி, தத²த்தாய ரூபபா⁴வாய அபி⁴ஸங்க²ரோதி ஆயூஹதி ஸம்பிண்டே³தி, நிப்பா²தே³தீதி அத்தோ². வேத³னாதீ³ஸுபி ஏஸேவ நயோ. அயம் பனேத்த² ஸங்கே²போ – அத்தனா ஸஹ ஜாயமானம் ரூபம் ஸம்பயுத்தே ச வேத³னாத³யோ த⁴ம்மே அபி⁴ஸங்க²ரோதி நிப்³ப³த்தேதீதி. இதா⁴பி ப⁴க³வா சேதயிதலக்க²ணஸ்ஸ ஸங்கா²ரஸ்ஸ பச்சத்தலக்க²ணமேவ பா⁴ஜேத்வா த³ஸ்ஸேஸி.

அம்பி³லம்பி விஜானாதீதி அம்ப³அம்பா³டகமாதுலுங்கா³தி³அம்பி³லம் ‘‘அம்பி³ல’’ந்தி விஜானாதி. ஏஸேவ நயோ ஸப்³ப³பதே³ஸு. அபி சேத்த² தித்தகந்தி நிம்ப³படோலாதி³னானப்பகாரம் கடுகந்தி பிப்பலிமரிசாதி³னானப்பகாரம். மது⁴ரந்தி ஸப்பிபா²ணிதாதி³னானப்பகாரம். கா²ரிகந்தி வாதிங்க³ணனாளிகேர சதுரஸ்ஸவல்லிவேத்தங்குராதி³னானப்பகாரம். அகா²ரிகந்தி யம் வா தம் வா ப²லஜாதம் காரபண்ணாதி³மிஸ்ஸகபண்ணம். லோணிகந்தி லோணயாகு³லோணமச்ச²லோணப⁴த்தாதி³னானப்பகாரம். அலோணிகந்திஅலோணயாகு³அலோணமச்ச²அலோணப⁴த்தாதி³னானப்பகாரம். தஸ்மா விஞ்ஞாணந்தி வுச்சதீதி யஸ்மா இமம் அம்பி³லாதி³பே⁴த³ம் அஞ்ஞமஞ்ஞவிஸிட்டே²ன அம்பி³லாதி³பா⁴வேன ஜானாதி, தஸ்மா விஞ்ஞாணந்தி வுச்சதீதி. ஏவமிதா⁴பி ப⁴க³வா விஜானனலக்க²ணஸ்ஸ விஞ்ஞாணஸ்ஸ பச்சத்தலக்க²ணமேவ பா⁴ஜேத்வா த³ஸ்ஸேஸி.

யஸ்மா பன ஆரம்மணஸ்ஸ ஆகாரஸண்டா²னக³ஹணவஸேன ஸஞ்ஞா பாகடா ஹோதி, தஸ்மா ஸா சக்கு²த்³வாரே விப⁴த்தா. யஸ்மா வினாபி ஆகாரஸண்டா²னா ஆரம்மணஸ்ஸ பச்சத்தபே⁴த³க³ஹணவஸேன விஞ்ஞாணம் பாகடம் ஹோதி, தஸ்மா தம் ஜிவ்ஹாத்³வாரே விப⁴த்தம். இமேஸம் பன ஸஞ்ஞாவிஞ்ஞாணபஞ்ஞானம் அஸம்மோஹதோ ஸபா⁴வஸல்லக்க²ணத்த²ம் ஸஞ்ஜானாதி, விஜானாதி, பஜானாதீதி ஏத்த² விஸேஸா வேதி³தப்³பா³. தத்த² உபஸக்³க³மத்தமேவ விஸேஸோ, ஜானாதீதி பத³ம் பன அவிஸேஸோ. தஸ்ஸபி ஜானனட்டே²ன விஸேஸோ வேதி³தப்³போ³. ஸஞ்ஞா ஹி நீலாதி³வஸேன ஆரம்மணஸஞ்ஜானனமத்தமேவ, அனிச்சம் து³க்க²மனத்தாதி லக்க²ணபடிவேத⁴ம் பாபேதும் ந ஸக்கோதி. விஞ்ஞாணம் நீலாதி³வஸேன ஆரம்மணஞ்சேவ ஜானாதி, அனிச்சாதி³வஸேன லக்க²ணபடிவேத⁴ஞ்ச பாபேதி, உஸ்ஸக்கித்வா பன மக்³க³பாதுபா⁴வம் பாபேதும் ந ஸக்கோதி. பஞ்ஞா நீலாதி³வஸேன ஆரம்மணம்பி ஜானாதி, அனிச்சாதி³வஸேன லக்க²ணபடிவேத⁴ம்பி பாபேதி, உஸ்ஸக்கித்வா மக்³க³பாதுபா⁴வம்பி பாபேதி.

யதா² ஹி ஹேரஞ்ஞிகப²லகே கஹாபணராஸிம்ஹி கதே அஜாதபு³த்³தி⁴தா³ரகோ கா³மிகபுரிஸோ மஹாஹேரஞ்ஞிகோதி தீஸு ஜனேஸு ஓலோகேத்வா டி²தேஸு அஜாதபு³த்³தி⁴தா³ரகோ கஹாபணானம் சித்தவிசித்தசதுரஸ்ஸமண்ட³லாதி³பா⁴வமேவ ஜானாதி, ‘‘இத³ம் மனுஸ்ஸானம் உபபோ⁴க³பரிபோ⁴க³ம் ரதனஸம்மத’’ந்தி ந ஜானாதி. கா³மிகபுரிஸோ சித்தாதி³பா⁴வஞ்ச ஜானாதி, மனுஸ்ஸானம் உபபோ⁴க³பரிபோ⁴க³ரதனஸம்மதபா⁴வஞ்ச, ‘‘அயம் கூடோ, அயம் சே²கோ, அயம் கரடோ, அயம் ஸண்ஹோ’’தி ந ஜானாதி. மஹாஹேரஞ்ஞிகோ சித்தாதி³பா⁴வம்பி ரதனஸம்மதபா⁴வம்பி கூடாதி³பா⁴வம்பி ஜானாதி. ஜானந்தோ ச பன ரூபம் தி³ஸ்வாபி ஸத்³த³ம் ஸுத்வாபி க³ந்த⁴ம் கா⁴யித்வாபி ரஸம் ஸாயித்வாபி ஹத்தே²ன க³ருலஹுபா⁴வம் உபதா⁴ரேத்வாபி ‘‘அஸுககா³மே கதோ’’திபி ஜானாதி, ‘‘அஸுகனிக³மே அஸுகனக³ரே அஸுகபப்³ப³தச்சா²யாய அஸுகனதீ³தீரே கதோ’’திபி, ‘‘அஸுகாசரியேன கதோ’’திபி ஜானாதி. ஏவமேவ ஸஞ்ஞா அஜாதபு³த்³தி⁴தா³ரகஸ்ஸ கஹாபணத³ஸ்ஸனம் விய நீலாதி³வஸேன ஆரம்மணமத்தமேவ ஜானாதி. விஞ்ஞாணம் கா³மிகபுரிஸஸ்ஸ கஹாபணத³ஸ்ஸனம் விய நீலாதி³வஸேன ஆரம்மணம்பி ஜானாதி, அனிச்சாதி³வஸேன லக்க²ணபடிவேத⁴ம்பி பாபேதி. பஞ்ஞா மஹாஹேரஞ்ஞிகஸ்ஸ கஹாபணத³ஸ்ஸனம் விய நீலாதி³வஸேன ஆரம்மணம்பி ஜானாதி, அனிச்சாதி³வஸேன லக்க²ணபடிவேத⁴ம்பி பாபேதி, உஸ்ஸக்கித்வா மக்³க³பாதுபா⁴வம்பி பாபேதி.

ஸோ பன நேஸம் விஸேஸோ து³ப்படிவிஜ்ஜோ². தேனாஹ ஆயஸ்மா நாக³ஸேனோ –

‘‘து³க்கரம், மஹாராஜ, ப⁴க³வதா கதந்தி. கிம், ப⁴ந்தே நாக³ஸேன, ப⁴க³வதா து³க்கரம் கதந்தி? து³க்கரம், மஹாராஜ, ப⁴க³வதா கதம், இமேஸம் அரூபீனம் சித்தசேதஸிகானம் த⁴ம்மானம் ஏகாரம்மணே வத்தமானானம் வவத்தா²னம் அக்கா²தம் ‘அயம் ப²ஸ்ஸோ, அயம் வேத³னா, அயம் ஸஞ்ஞா, அயம் சேதனா, இத³ம் சித்த’’’ந்தி (மி. ப. 2.7.16).

யதா² ஹி திலதேலம் ஸாஸபதேலம் மது⁴கதேலம் ஏரண்ட³கதேலம் வஸாதேலந்தி இமானி பஞ்ச தேலானி ஏகசாடியம் பக்கி²பித்வா தி³வஸம் யமகமந்தே² ஹி மந்தே²த்வா ததோ ‘‘இத³ம் திலதேலம், இத³ம் ஸாஸபதேல’’ந்தி ஏகேகஸ்ஸ பாடியேக்கம் உத்³த⁴ரணம் நாம து³க்கரம், இத³ம் ததோ து³க்கரதரம். ப⁴க³வா பன ஸப்³ப³ஞ்ஞுதஞ்ஞாணஸ்ஸ ஸுப்படிவித்³த⁴த்தா த⁴ம்மிஸ்ஸரோ த⁴ம்மராஜா இமேஸம் அரூபீனம் த⁴ம்மானம் ஏகாரம்மணே வத்தமானானம் வவத்தா²னம் அகாஸி. பஞ்சன்னம் மஹானதீ³னம் ஸமுத்³த³ம் பவிட்ட²ட்டா²னே ‘‘இத³ம் க³ங்கா³ய உத³கம், இத³ம் யமுனாயா’’தி ஏவம் பாடியேக்கம் உத³குத்³த⁴ரணேனாபி அயமத்தோ² வேதி³தப்³போ³.

இதி பட²மபப்³பே³ன ஸுஞ்ஞதம், து³தியேன ஸுஞ்ஞதாலக்க²ணந்தி த்³வீஹி பப்³பே³ஹி அனத்தலக்க²ணம் கதே²த்வா இதா³னி து³க்க²லக்க²ணம் த³ஸ்ஸேதும் தத்ர, பி⁴க்க²வேதிஆதி³மாஹ. தத்த² க²ஜ்ஜாமீதி ந ரூபம் ஸுனகோ² விய மம்ஸம் லுஞ்சித்வா லுஞ்சித்வா கா²த³தி, யதா² பன கிலிட்ட²வத்த²னிவத்தோ² ததோனிதா³னம் பீளம் ஸந்தா⁴ய ‘‘கா²த³தி மம் வத்த²’’ந்தி ப⁴ணதி, ஏவமித³ம்பி பீளம் உப்பாதே³ந்தம் கா²த³தி நாமாதி வேதி³தப்³ப³ம். படிபன்னோ ஹோதீதி ஸீலம் ஆதி³ம் கத்வா யாவ அரஹத்தமக்³கா³ படிபன்னோ ஹோதி. யோ பனேத்த² ப³லவஞாணோ திக்க²பு³த்³தி⁴ ஞாணுத்தரோ யோகா³வசரோ பதா⁴னபூ⁴மியம் வாயமந்தோ கா²ணுனா வா கண்டகேன வா வித்³தோ⁴ ஆவுதே⁴ன வா பஹடோ ப்³யக்³கா⁴தீ³ஹி வா க³ஹேத்வா க²ஜ்ஜமானோ தம் வேத³னம் அப்³போ³ஹாரிகம் கத்வா மூலகம்மட்டா²னம் ஸம்மஸந்தோ அரஹத்தமேவ க³ண்ஹாதி, அயம் வேத³னாய நிப்³பி³தா³ய விராகா³ய நிரோதா⁴ய படிபன்னோ நாம வுச்சதி பீதமல்லத்தே²ரோ விய குடும்பி³யபுத்தமஹாதிஸ்ஸத்தே²ரோ விய வத்தனிஅடவியம் திம்ஸமத்தானம் பி⁴க்கூ²னம் அஞ்ஞதரோ ப்³யக்³க⁴முகே² நிபன்னபி⁴க்கு² விய கண்டகேன வித்³த⁴த்தே²ரோ விய ச.

த்³வாத³ஸஸு கிர பி⁴க்கூ²ஸு க⁴ண்டிம் பஹரித்வா அரஞ்ஞே பதா⁴னமனுயுஞ்ஜந்தேஸு ஏகோ ஸூரியே அத்த²ங்க³தமத்தேயேவ க⁴ண்டிம் பஹரித்வா சங்கமம் ஓருய்ஹ சங்கமந்தோ திரியம் நிம்மதே²ந்தோ திணபடிச்ச²ன்னம் கண்டகம் அக்கமி. கண்டகோ பிட்டி²பாதே³ன நிக்க²ந்தோ. தத்தபா²லேன வினிவித்³த⁴காலோ விய வேத³னா வத்ததி. தே²ரோ சிந்தேஸி – ‘‘கிம் இமம் கண்டகம் உத்³த⁴ராமி, உதா³ஹு பகதியா விஜ்ஜி²த்வா டி²தகண்டக’’ந்தி? தஸ்ஸ ஏவமஹோஸி – ‘‘இமினா கண்டகேன வித்³த⁴த்தா நிரயாதீ³ஸு ப⁴யம் நாம நத்தி², பகதியா விஜ்ஜி²த்வா டி²தகண்டகம்யேவா’’தி. ஸோ தம் வேத³னம் அப்³போ³ஹாரிகம் கத்வா ஸப்³ப³ரத்திம் சங்கமித்வா விபா⁴தாய ரத்தியா அஞ்ஞஸ்ஸ ஸஞ்ஞம் அதா³ஸி. ஸோ ஆக³ந்த்வா ‘‘கிம், ப⁴ந்தே’’தி புச்சி²? ‘‘கண்டகேனம்ஹி, ஆவுஸோ, வித்³தோ⁴’’தி. ‘‘காய வேலாய, ப⁴ந்தே’’தி? ‘‘ஸாயமேவ, ஆவுஸோ’’தி. ‘‘கஸ்மா ந அம்ஹே பக்கோஸித்த², கண்டகம் உத்³த⁴ரித்வா தத்த² தேலம்பி ஸிஞ்சேய்யாமா’’தி? ‘‘பகதியா விஜ்ஜி²த்வா டி²தகண்டகமேவ உத்³த⁴ரிதும் வாயமிம்ஹா, ஆவுஸோ’’தி. ‘‘ஸக்குணித்த², ப⁴ந்தே, உத்³த⁴ரிது’’ந்தி. ‘‘ஏகதே³ஸமத்தேன மே, ஆவுஸோ, உத்³த⁴டோ’’தி. ஸேஸவத்தூ²னி தீ³க⁴மஜ்ஜி²மட்ட²கதா²ஸு (தீ³. நி. அட்ட². 2.373; ம. நி. அட்ட². 1.106) ஸதிபட்டா²னஸுத்தனித்³தே³ஸே வித்தா²ரிதானேவ.

தம் கிம் மஞ்ஞத², பி⁴க்க²வேதி கஸ்மா ஆரத்³த⁴ம்? இமஸ்மிம் பப்³பே³ து³க்க²லக்க²ணமேவ கதி²தம், ந அனிச்சலக்க²ணம். தம் த³ஸ்ஸேதும் இத³மாரத்³த⁴ம். தீணி லக்க²ணானி ஸமோதா⁴னேத்வா த³ஸ்ஸேதும்பி ஆரத்³த⁴மேவ. அபசினாதி நோ ஆசினாதீதி வட்டம் வினாஸேதி, நேவ சினாதி. பஜஹதி ந உபாதி³யதீதி ததே³வ விஸ்ஸஜ்ஜேதி, ந க³ண்ஹாதி. விஸினேதி ந உஸ்ஸினேதீதி விகிரதி ந ஸம்பிண்டே³தி. விதூ⁴பேதி ந ஸந்தூ⁴பேதீதி நிப்³பா³பேதி ந ஜாலாபேதி.

ஏவம் பஸ்ஸம், பி⁴க்க²வேதி இத³ம் கஸ்மா ஆரத்³த⁴ம்? வட்டம் வினாஸேத்வா டி²தம் மஹாகீ²ணாஸவம் த³ஸ்ஸேஸ்ஸாமீதி ஆரத்³த⁴ம். ஏத்தகேன வா டா²னேன விபஸ்ஸனா கதி²தா, இதா³னி ஸஹ விபஸ்ஸனாய சத்தாரோ மக்³கே³ த³ஸ்ஸேதும் இத³ம் ஆரத்³த⁴ம். அத² வா ஏத்தகேன டா²னேன பட²மமக்³கோ³ கதி²தோ, இதா³னி ஸஹ விபஸ்ஸனாய தயோ மக்³கே³ த³ஸ்ஸேதும் இத³மாரத்³த⁴ம். ஏத்தகேன வா டா²னேன தீணி மக்³கா³னி கதி²தானி, இதா³னி ஸஹ விபஸ்ஸனாய அரஹத்தமக்³க³ம் த³ஸ்ஸேதும்பி இத³ம் ஆரத்³த⁴மேவ.

ஸபஜாபதிகாதி ஸத்³தி⁴ம் பஜாபதினா தே³வராஜேன. ஆரகாவ நமஸ்ஸந்தீதி தூ³ரதோவ நமஸ்ஸந்தி, தூ³ரேபி டி²தம் நமஸ்ஸந்தியேவ ஆயஸ்மந்தம் நீதத்தே²ரம் விய.

தே²ரோ கிர புப்ப²ச்ச²ட்³ட³ககுலதோ நிக்க²ம்ம பப்³ப³ஜிதோ, கு²ரக்³கே³யேவ அரஹத்தம் பத்வா சிந்தேஸி – ‘‘அஹம் அஜ்ஜேவ பப்³ப³ஜிதோ அஜ்ஜேவ மே பப்³ப³ஜிதகிச்சம் மத்த²கம் பத்தம், சதுபச்சயஸந்தோஸபா⁴வனாராமமண்டி³தம் மஹாஅரியவம்ஸபடிபத³ம் பூரேஸ்ஸாமீ’’தி. ஸோ பம்ஸுகூலத்தா²ய ஸாவத்தி²ம் பவிஸித்வா சோளகம் பரியேஸந்தோ விசரி. அதே²கோ மஹாப்³ரஹ்மா ஸமாபத்திதோ வுட்டா²ய மனுஸ்ஸபத²ம் ஓலோகேந்தோ தே²ரம் தி³ஸ்வா – ‘‘அஜ்ஜேவ பப்³ப³ஜித்வா அஜ்ஜேவ கு²ரக்³கே³ அரஹத்தம் பத்வா மஹாஅரியவம்ஸபடிபத³ம் பூரேதும் சோளகம் பரியேஸதீ’’தி அஞ்ஜலிம் பக்³க³ய்ஹ நமஸ்ஸமானோ அட்டா²ஸி. தமஞ்ஞோ மஹாப்³ரஹ்மா தி³ஸ்வா ‘‘கம் நமஸ்ஸஸீ’’தி? புச்சி². நீதத்தே²ரம் நமஸ்ஸாமீதி. கிம் காரணாதி? அஜ்ஜேவ பப்³ப³ஜித்வா அஜ்ஜேவ கு²ரக்³கே³ அரஹத்தம் பத்வா மஹாஅரியவம்ஸபடிபத³ம் பூரேதும் சோளகம் பரியேஸதீதி. ஸோபி நம் நமஸ்ஸமானோ அட்டா²ஸி. அத²ஞ்ஞோ, அத²ஞ்ஞோதி ஸத்தஸதா மஹாப்³ரஹ்மானோ நமஸ்ஸமானா அட்ட²ம்ஸு. தேன வுத்தம் –

‘‘தா தே³வதா ஸத்தஸதா உளாரா,

ப்³ரஹ்மா விமானா அபி⁴னிக்க²மித்வா;

நீதம் நமஸ்ஸந்தி பஸன்னசித்தா,

‘கீ²ணாஸவோ க³ண்ஹதி பம்ஸுகூலம்’’’.

‘‘தா தே³வதா ஸத்தஸதா உளாரா,

ப்³ரஹ்மா விமானா அபி⁴னிக்க²மித்வா;

நீதம் நமஸ்ஸந்தி பஸன்னசித்தா,

‘கீ²ணாஸவோ கயிரதி பம்ஸுகூலம்’’’.

‘‘‘கீ²ணாஸவோ தோ⁴வதி பம்ஸுகூலம்’;

‘கீ²ணாஸவோ ரஜதி பம்ஸுகூலம்’;

‘கீ²ணாஸவோ பாருபதி பம்ஸகூல’’’ந்தி.

இதி ப⁴க³வா இமஸ்மிம் ஸுத்தே தே³ஸனம் தீஹி ப⁴வேஹி வினிவத்தேத்வா அரஹத்தஸ்ஸ கூடம் க³ண்ஹி. தே³ஸனாபரியோஸானே பஞ்சஸதா பி⁴க்கூ² அரஹத்தே பதிட்ட²ஹிம்ஸு. ஸத்தமம்.