10. புப்ப²வக்³கோ³

1. நதீ³ஸுத்தவண்ணனா

93. புப்ப²வக்³க³ஸ்ஸ பட²மே பப்³ப³தேய்யாதி பப்³ப³தே பவத்தா. ஓஹாரினீதி ஸோதே பதிதபதிதானி திணபண்ணகட்டா²தீ³னி ஹேட்டா²ஹாரினீ. தூ³ரங்க³மாதி நிக்க²ந்தட்டா²னதோ பட்டா²ய சதுபஞ்சயோஜனஸதகா³மினீ. ஸீக⁴ஸோதாதி சண்ட³ஸோதா. காஸாதிஆதீ³னி ஸப்³பா³னி திணஜாதானி. ருக்கா²தி ஏரண்டா³த³யோ து³ப்³ப³லருக்கா². தே நம் அஜ்ஜோ²லம்பே³ய்யுந்தி தே தீரே ஜாதாபி ஓனமித்வா அக்³கே³ஹி உத³கம் பு²ஸந்தேஹி அதி⁴ஓலம்பே³ய்யும், உபரி லம்பே³ய்யுந்தி அத்தோ². பலுஜ்ஜேய்யுந்தி ஸமூலமத்திகாய ஸத்³தி⁴ம் ஸீஸே பதேய்யும். ஸோ தேஹி அஜ்ஜோ²த்த²டோ வாலுகமத்திகோத³கேஹி முக²ம் பவிஸந்தேஹி மஹாவினாஸம் பாபுணேய்ய.

ஏவமேவ கோ²தி ஏத்த² ஸோதே பதிதபுரிஸோ விய வட்டஸன்னிஸ்ஸிதோ பா³லபுது²ஜ்ஜனோ த³ட்ட²ப்³போ³, உப⁴தோதீரே காஸாத³யோ விய து³ப்³ப³லபஞ்சக்க²ந்தா⁴, ‘‘இமே க³ஹிதாபி மம் தாரேதும் ந ஸக்கி²ஸ்ஸந்தீ’’தி தஸ்ஸ புரிஸஸ்ஸ அஜானித்வா க³ஹணம் விய இமே க²ந்தா⁴ ‘‘ந மய்ஹம் ஸஹாயா’’தி பா³லபுது²ஜ்ஜனஸ்ஸ அஜானித்வா சதூஹி கா³ஹேஹி க³ஹணம், க³ஹிதக³ஹிதானம் பலுஜ்ஜனத்தா புரிஸஸ்ஸ ப்³யஸனப்பத்தி விய சதூஹி கா³ஹேஹி க³ஹிதானம் க²ந்தா⁴னம் விபரிணாமே பா³லபுது²ஜ்ஜனஸ்ஸ ஸோகாதி³ப்³யஸனப்பத்தி வேதி³தப்³பா³. பட²மம்.

2. புப்ப²ஸுத்தவண்ணனா

94. து³தியே விவத³தீதி ‘‘அனிச்சம் து³க்க²ம் அனத்தா அஸுப⁴’’ந்தி யதா²ஸபா⁴வேன வத³ந்தேன ஸத்³தி⁴ம் ‘‘நிச்சம் ஸுக²ம் அத்தா ஸுப⁴’’ந்தி வத³ந்தோ விவத³தி. லோகத⁴ம்மோதி க²ந்த⁴பஞ்சகம். தஞ்ஹி லுஜ்ஜனஸபா⁴வத்தா லோகத⁴ம்மோதி வுச்சதி. கிந்தி கரோமீதி கத²ம் கரோமி? மய்ஹஞ்ஹி படிபத்திகத²னமேவ பா⁴ரோ, படிபத்திபூரணம் பன குலபுத்தானம் பா⁴ரோதி த³ஸ்ஸேதி. இமஸ்மிம் ஸுத்தே தயோ லோகா கதி²தா. ‘‘நாஹம், பி⁴க்க²வே, லோகேனா’’தி ஏத்த² ஹி ஸத்தலோகோ கதி²தோ, ‘‘அத்தி², பி⁴க்க²வே, லோகே லோகத⁴ம்மோ’’தி ஏத்த² ஸங்கா²ரலோகோ, ‘‘ததா²க³தோ லோகே ஜாதோ லோகே ஸம்வட்³டோ⁴’’தி ஏத்த² ஓகாஸலோகோ கதி²தோ. து³தியம்.

3. பே²ணபிண்டூ³பமஸுத்தவண்ணனா

95. ததியே க³ங்கா³ய நதி³யா தீரேதி அயுஜ்ஜ²புரவாஸினோ அபரிமாணபி⁴க்கு²பரிவாரம் சாரிகம் சரமானம் ததா²க³தம் அத்தனோ நக³ரம் ஸம்பத்தம் தி³ஸ்வா ஏகஸ்மிம் க³ங்கா³ய நிவத்தனட்டா²னே மஹாவனஸண்ட³மண்டி³தப்பதே³ஸே ஸத்து² விஹாரம் கத்வா அத³ம்ஸு. ப⁴க³வா தத்த² விஹரதி. தம் ஸந்தா⁴ய வுத்தம் ‘‘க³ங்கா³ய நதி³யா தீரே’’தி. தத்ர கோ² ப⁴க³வா பி⁴க்கூ² ஆமந்தேஸீதி தஸ்மிம் விஹாரே வஸந்தோ ப⁴க³வா ஸாயன்ஹஸமயம் க³ந்த⁴குடிதோ நிக்க²மித்வா க³ங்கா³தீரே பஞ்ஞத்தவரபு³த்³தா⁴ஸனே நிஸின்னோ க³ங்கா³ய நதி³யா ஆக³ச்ச²ந்தம் மஹந்தம் பே²ணபிண்ட³ம் தி³ஸ்வா, ‘‘மம ஸாஸனே பஞ்சக்க²ந்த⁴னிஸ்ஸிதம் ஏகம் த⁴ம்மம் கதே²ஸ்ஸாமீ’’தி சிந்தேத்வா பரிவாரேத்வா நிஸின்னே பி⁴க்கூ² ஆமந்தேஸி.

மஹந்தம் பே²ணபிண்ட³ந்தி உட்டா²னுட்டா²னே ப³த³ரபக்கப்பமாணதோ பட்டா²ய அனுஸோதாக³மனேன அனுபுப்³பே³ன பவட்³டி⁴த்வா பப்³ப³தகூடமத்தம் ஜாதம், யத்த² உத³கஸப்பாத³யோ அனேகபாணயோ நிவஸந்தி, ஏவரூபம் மஹந்தம் பே²ணபிண்ட³ம். ஆவஹேய்யாதி ஆஹரேய்ய. ஸோ பனாயம் பே²ணபிண்டோ³ உட்டி²தட்டா²னேபி பி⁴ஜ்ஜதி, தோ²கம் க³ந்த்வாபி, ஏகத்³வியோஜனாதி³வஸேன தூ³ரம் க³ந்த்வாபி, அந்தரா பன அபி⁴ஜ்ஜந்தோபி மஹாஸமுத்³த³ம் பத்வா அவஸ்ஸமேவ பி⁴ஜ்ஜதி. நிஜ்ஜா²யேய்யாதி ஓலோகேய்ய. யோனிஸோ உபபரிக்கே²ய்யாதி காரணேன உபபரிக்கே²ய்ய. கிஞ்ஹி ஸியா, பி⁴க்க²வே, பே²ணபிண்டே³ ஸாரோதி, பி⁴க்க²வே, பே²ணபிண்ட³ம்ஹி ஸாரோ நாம கிம் ப⁴வேய்ய? விலீயித்வா வித்³த⁴ம்ஸேய்யேவ.

ஏவமேவ கோ²தி யதா² பே²ணபிண்டோ³ நிஸ்ஸாரோ, ஏவம் ரூபம்பி நிச்சஸாரது⁴வஸாரஅத்தஸாரவிரஹேன நிஸ்ஸாரமேவ. யதா² ச ஸோ ‘‘இமினா பத்தம் வா தா²லகம் வா கரிஸ்ஸாமீ’’தி க³ஹேதும் ந ஸக்கா, க³ஹிதோபி தமத்த²ம் ந ஸாதே⁴தி, பி⁴ஜ்ஜதி ஏவ, ஏவம் ரூபம்பி நிச்சந்தி வா து⁴வந்தி வா அஹந்தி வா மமந்தி வா க³ஹேதும் ந ஸக்கா, க³ஹிதம்பி ந ததா² திட்ட²தி, அனிச்சம் து³க்க²ம் அனத்தா அஸுப⁴ஞ்ஞேவ ஹோதீதி ஏவம் பே²ணபிண்ட³ஸதி³ஸமேவ ஹோதி. யதா² வா பன பே²ணபிண்டோ³ சி²த்³தா³வசி²த்³தோ³ அனேகஸந்தி⁴க⁴டிதோ ப³ஹூனம் உத³கஸப்பாதீ³னம் பாணானம் ஆவாஸோ, ஏவம் ரூபம்பி சி²த்³தா³வசி²த்³த³ம் அனேகஸந்தி⁴க⁴டிதம், குலவஸேனேவேத்த² அஸீதி கிமிகுலானி வஸந்தி, ததே³வ தேஸம் ஸூதிக⁴ரம்பி வச்சகுடிபி கி³லானஸாலாபி ஸுஸானம்பி, ந தே அஞ்ஞத்த² க³ந்த்வா க³ப்³ப⁴வுட்டா²னாதீ³னி கரோந்தி, ஏவம்பி பே²ணபிண்ட³ஸதி³ஸம்.

யதா² ச பே²ணபிண்டோ³ ஆதி³தோ ப³த³ரபக்கமத்தோ ஹுத்வா அனுபுப்³பே³ன பப்³ப³தகூடமத்தோபி ஹோதி, ஏவம் ரூபம்பி ஆதி³தோ கலலமத்தம் ஹுத்வா அனுபுப்³பே³ன ப்³யாமமத்தம்பி கோ³மஹிம்ஸஹத்தி²ஆதீ³னம் வஸேன பப்³ப³தகூடாதி³மத்தம் ஹோதி மச்ச²கச்ச²பாதீ³னம் வஸேன அனேகயோஜனஸதபமாணம்பி, ஏவம்பி பே²ணபிண்ட³ஸதி³ஸம். யதா² ச பே²ணபிண்டோ³ உட்டி²தமத்தோபி பி⁴ஜ்ஜதி, தோ²கம் க³ந்த்வாபி, தூ³ரம் க³ந்த்வாபி, ஸமுத்³த³ம் பத்வா பன அவஸ்ஸமேவ பி⁴ஜ்ஜதி, ஏவமேவம் ரூபம்பி கலலபா⁴வேபி பி⁴ஜ்ஜதி அப்³பு³தா³தி³பா⁴வேபி, அந்தரா பன அபி⁴ஜ்ஜமானம்பி வஸ்ஸஸதாயுகானம் வஸ்ஸஸதம் பத்வா அவஸ்ஸமேவ பி⁴ஜ்ஜதி, மரணமுகே² சுண்ணவிசுண்ணம் ஹோதி, ஏவம்பி பே²ணபிண்ட³ஸதி³ஸம்.

கிஞ்ஹி ஸியா, பி⁴க்க²வே, வேத³னாய ஸாரோதிஆதீ³ஸு வேத³னாதீ³னம் புப்³பு³ளாதீ³ஹி ஏவம் ஸதி³ஸதா வேதி³தப்³பா³. யதா² ஹி புப்³பு³ளோ அஸாரோ ஏவம் வேத³னாபி. யதா² ச ஸோ அப³லோ அக³ய்ஹூபகோ³, ந ஸக்கா தம் க³ஹேத்வா ப²லகம் வா ஆஸனம் வா காதும், க³ஹிதோபி பி⁴ஜ்ஜதேவ, ஏவம் வேத³னாபி அப³லா அக³ய்ஹூபகா³, ந ஸக்கா நிச்சாதி வா து⁴வாதி வா க³ஹேதும், க³ஹிதாபி ந ததா² திட்ட²தி, ஏவம் அக³ய்ஹூபக³தாயபி வேத³னா புப்³பு³ளஸதி³ஸா. யதா² பன தஸ்மிம் தஸ்மிம் உத³கபி³ந்து³ம்ஹி புப்³பு³ளோ உப்பஜ்ஜதி சேவ பி⁴ஜ்ஜதி ச, ந சிரட்டி²திகோ ஹோதி, ஏவம் வேத³னாபி உப்பஜ்ஜதி சேவ பி⁴ஜ்ஜதி ச, ந சிரட்டி²திகா ஹோதி. ஏகச்ச²ரக்க²ணே கோடிஸதஸஹஸ்ஸஸங்கா² உப்பஜ்ஜித்வா நிருஜ்ஜ²தி. யதா² ச புப்³பு³ளோ உத³கதலம், உத³கபி³ந்து³ம், உத³கஜல்லம், ஸங்கட்³டி⁴த்வா புடம் கத்வா க³ஹணவாதஞ்சாதி சத்தாரி காரணானி படிச்ச உப்பஜ்ஜதி, ஏவம் வேத³னாபி வத்து²ம் ஆரம்மணம் கிலேஸஜல்லம் ப²ஸ்ஸஸங்க⁴ட்டனஞ்சாதி சத்தாரி காரணானி படிச்ச உப்பஜ்ஜதி. ஏவம்பி வேத³னா புப்³பு³ளஸதி³ஸா.

ஸஞ்ஞாபி அஸாரகட்டே²ன மரீசிஸதி³ஸா. ததா² அக³ய்ஹூபக³ட்டே²ன. ந ஹி ஸக்கா தம் க³ஹேத்வா பிவிதும் வா ந்ஹாயிதும் வா பா⁴ஜனம் வா பூரேதும். அபிச யதா² மரீசி விப்ப²ந்த³தி, ஸஞ்ஜாதூமிவேகா³ விய கா²யதி, ஏவம் நீலஸஞ்ஞாதி³பே⁴தா³ ஸஞ்ஞாபி நீலாதி³அனுப⁴வனத்தா²ய ப²ந்த³தி விப்ப²ந்த³தி. யதா² ச மரீசி மஹாஜனம் விப்பலம்பே⁴தி ‘‘புண்ணவாபி விய புண்ணனதீ³ விய தி³ஸ்ஸதீ’’தி வதா³பேதி, ஏவம் ஸஞ்ஞாபி விப்பலம்பே⁴தி, ‘‘இத³ம் நீலகம் ஸுப⁴ம் ஸுக²ம் நிச்ச’’ந்தி வதா³பேதி. பீதகாதீ³ஸுபி ஏஸேவ நயோ. ஏவம் ஸஞ்ஞா விப்பலம்ப⁴னேனாபி மரீசிஸதி³ஸா.

அகுக்குகஜாதந்தி அந்தோ அஸஞ்ஜாதக⁴னத³ண்ட³கம். ஸங்கா²ராபி அஸாரகட்டே²ன கத³லிக்க²ந்த⁴ஸதி³ஸா, ததா² அக³ய்ஹூபக³ட்டே²ன. யதே²வ ஹி கத³லிக்க²ந்த⁴தோ கிஞ்சி க³ஹேத்வா ந ஸக்கா கோ³பானஸிஆதீ³னம் அத்தா²ய உபனேதும், உபனீதம்பி ந ததா² ஹோதி, ஏவம் ஸங்கா²ராபி ந ஸக்கா நிச்சாதி³வஸேன க³ஹேதும், க³ஹிதாபி ந ததா² ஹோந்தி. யதா² ச கத³லிக்க²ந்தோ⁴ ப³ஹுபத்தவட்டிஸமோதா⁴னோ ஹோதி, ஏவம் ஸங்கா²ரக்க²ந்தோ⁴ ப³ஹுத⁴ம்மஸமோதா⁴னோ. யதா² ச கத³லிக்க²ந்தோ⁴ நானாலக்க²ணோ. அஞ்ஞோயேவ ஹி பா³ஹிராய பத்தவட்டியா வண்ணோ, அஞ்ஞோ ததோ அப்³ப⁴ந்தரஅப்³ப⁴ந்தரானம், ஏவமேவ ஸங்கா²ரக்க²ந்தே⁴பி அஞ்ஞதே³வ ப²ஸ்ஸஸ்ஸ லக்க²ணம், அஞ்ஞா சேதனாதீ³னம், ஸமோதா⁴னேத்வா பன ஸங்கா²ரக்க²ந்தோ⁴வ வுச்சதீதி ஏவம்பி ஸங்கா²ரக்க²ந்தோ⁴ கத³லிக்க²ந்த⁴ஸதி³ஸோ.

சக்கு²மா புரிஸோதி மம்ஸசக்கு²னா சேவ பஞ்ஞாசக்கு²னா சாதி த்³வீஹி சக்கூ²ஹி சக்கு²மா. மம்ஸசக்கு²ம்பி ஹிஸ்ஸ பரிஸுத்³த⁴ம் வட்டதி அபக³தபடலபிளகம், பஞ்ஞாசக்கு²ம்பி அஸாரபா⁴வத³ஸ்ஸனஸமத்த²ம். விஞ்ஞாணம்பி அஸாரகட்டே²ன மாயாஸதி³ஸம், ததா² அக³ய்ஹூபக³ட்டே²ன. யதா² ச மாயா இத்தரா லஹுபச்சுபட்டா²னா, ஏவம் விஞ்ஞாணம். தஞ்ஹி ததோபி இத்தரதரஞ்சேவ லஹுபச்சுபட்டா²னதரஞ்ச. தேனேவ ஹி சித்தேன புரிஸோ ஆக³தோ விய க³தோ விய டி²தோ விய நிஸின்னோ விய ஹோதி. அஞ்ஞதே³வ ச ஆக³மனகாலே சித்தம், அஞ்ஞம் க³மனகாலாதீ³ஸு. ஏவம்பி விஞ்ஞாணம் மாயாஸதி³ஸம். மாயா ச மஹாஜனம் வஞ்சேதி, யம்கிஞ்சிதே³வ ‘‘இத³ம் ஸுவண்ணம் ரஜதம் முத்தா’’தி கா³ஹாபேதி, விஞ்ஞாணம்பி மஹாஜனம் வஞ்சேதி. தேனேவ ஹி சித்தேன ஆக³ச்ச²ந்தம் விய க³ச்ச²ந்தம் விய டி²தம் விய நிஸின்னம் விய கத்வா கா³ஹாபேதி. அஞ்ஞதே³வ ச ஆக³மனே சித்தம், அஞ்ஞம் க³மனாதீ³ஸு. ஏவம்பி விஞ்ஞாணம் மாயாஸதி³ஸம்.

பூ⁴ரிபஞ்ஞேனாதி ஸண்ஹபஞ்ஞேன சேவ விபுலவித்த²தபஞ்ஞேன ச. ஆயூதி ஜீவிதிந்த்³ரியம். உஸ்மாதி கம்மஜதேஜோதா⁴து. பரப⁴த்தந்தி நானாவிதா⁴னம் கிமிக³ணாதீ³னம் ப⁴த்தம் ஹுத்வா. ஏதாதி³ஸாயம் ஸந்தானோதி ஏதாதி³ஸீ அயம் பவேணீ மதகஸ்ஸ யாவ ஸுஸானா க⁴ட்டீயதீதி. மாயாயம் பா³லலாபினீதி ய்வாயம் விஞ்ஞாணக்க²ந்தோ⁴ நாம, அயம் பா³லமஹாஜனலபாபனிகமாயா நாம. வத⁴கோதி த்³வீஹி காரணேஹி அயம் க²ந்த⁴ஸங்கா²தோ வத⁴கோ அஞ்ஞமஞ்ஞகா⁴தனேனபி, க²ந்தே⁴ஸு ஸதி வதோ⁴ பஞ்ஞாயதீதிபி. ஏகா ஹி பத²வீதா⁴து பி⁴ஜ்ஜமானா ஸேஸதா⁴துயோ க³ஹேத்வாவ பி⁴ஜ்ஜதி, ததா² ஆபோதா⁴துஆத³யோ. ரூபக்க²ந்தோ⁴ ச பி⁴ஜ்ஜமானோ அரூபக்க²ந்தே⁴ க³ஹேத்வாவ பி⁴ஜ்ஜதி, ததா² அரூபக்க²ந்தே⁴ஸு வேத³னாத³யோ ஸஞ்ஞாதி³கே. சத்தாரோபி சேதே வத்து²ரூபந்தி ஏவம் அஞ்ஞமஞ்ஞவத⁴னேனேத்த² வத⁴கதா வேதி³தப்³பா³. க²ந்தே⁴ஸு பன ஸதி வத⁴ப³ந்த⁴னச்சே²தா³தீ³னி ஸம்ப⁴வந்தி, ஏவம் ஏதேஸு ஸதி வத⁴பா⁴வதோபி வத⁴கதா வேதி³தப்³பா³. ஸப்³ப³ஸம்யோக³ந்தி ஸப்³ப³ம் த³ஸவித⁴ம்பி ஸம்யோஜனம். அச்சுதம் பத³ந்தி நிப்³பா³னம். ததியம்.

4-6. கோ³மயபிண்ட³ஸுத்தாதி³வண்ணனா

96-98. சதுத்தே² ஸஸ்ஸதிஸமந்தி ஸினேருமஹாபத²வீசந்தி³மஸூரியாதீ³ஹி ஸஸ்ஸதீஹி ஸமம். பரித்தம் கோ³மயபிண்ட³ந்தி அப்பமத்தகம் மது⁴கபுப்ப²ப்பமாணம் கோ³மயக²ண்ட³ம். குதோ பனானேனேதம் லத்³த⁴ந்தி. பரிப⁴ண்ட³கரணத்தா²ய ஆப⁴ததோ க³ஹிதந்தி ஏகே. அத்த²ஸ்ஸ பன விஞ்ஞாபனத்த²ம் இத்³தி⁴யா அபி⁴ஸங்க²ரித்வா ஹத்தா²ருள்ஹம் கதந்தி வேதி³தப்³ப³ந்தி. அத்தபா⁴வபடிலாபோ⁴தி படிலத்³த⁴அத்தபா⁴வோ. ந யித³ம் ப்³ரஹ்மசரியவாஸோ பஞ்ஞாயேதா²தி அயம் மக்³க³ப்³ரஹ்மசரியவாஸோ நாம ந பஞ்ஞாயேய்ய. மக்³கோ³ ஹி தேபூ⁴மகஸங்கா²ரே விவட்டேந்தோ உப்பஜ்ஜதி. யதி³ ச ஏத்தகோ அத்தபா⁴வோ நிச்சோ ப⁴வேய்ய, மக்³கோ³ உப்பஜ்ஜித்வாபி ஸங்கா²ரவட்டம் விவட்டேதும் ந ஸக்குணேய்யாதி ப்³ரஹ்மசரியவாஸோ ந பஞ்ஞாயேத².

இதா³னி ஸசே கோசி ஸங்கா²ரோ நிச்சோ ப⁴வேய்ய, மயா மஹாஸுத³ஸ்ஸனராஜகாலே அனுபூ⁴தா ஸம்பத்தி நிச்சா ப⁴வேய்ய, ஸாபி ச அனிச்சாதி தம் த³ஸ்ஸேதும் பூ⁴தபுப்³பா³ஹம் பி⁴க்கு² ராஜா அஹோஸிந்திஆதி³மாஹ. தத்த² குஸாவதீராஜதா⁴னிப்பமுகா²னீதி குஸாவதீராஜதா⁴னீ தேஸம் நக³ரானம் பமுகா², ஸப்³ப³ஸேட்டா²தி அத்தோ². ஸாரமயானீதி ரத்தசந்த³னஸாரமயானி. உபதா⁴னம் பன ஸப்³பே³ஸம் ஸுத்தமயமேவ. கோ³ணகத்த²தானீதி சதுரங்கு³லாதி⁴கலோமேன காளகோஜவேன அத்த²தானி, யம் மஹாபிட்டி²யகோஜவோதி வத³ந்தி. படகத்த²தானீதி உப⁴தோலோமேன உண்ணாமயேன ஸேதகம்ப³லேன அத்த²தானி. படலிகத்த²தானீதி க⁴னபுப்பே²ன உண்ணாமயஅத்த²ரணேன அத்த²தானி. கத³லிமிக³பவரபச்சத்த²ரணானீதி கத³லிமிக³சம்மமயேன உத்தமபச்சத்த²ரணேன அத்த²தானி. தம் கிர பச்சத்த²ரணம் ஸேதவத்த²ஸ்ஸ உபரி கத³லிமிக³சம்மம் அத்த²ரித்வா ஸிப்³பே³த்வா கரோந்தி. ஸஉத்தரச்ச²தா³னீதி ஸஹ உத்தரச்ச²தே³ன, உபரி ப³த்³தே⁴ன ரத்தவிதானேன ஸத்³தி⁴ந்தி அத்தோ². உப⁴தோலோஹிதகூபதா⁴னீதி ஸீஸூபதா⁴னஞ்ச பாதூ³பதா⁴னஞ்சாதி பல்லங்கானம் உப⁴தோலோஹிதகூபதா⁴னானி. வேஜயந்தரத²ப்பமுகா²னீதி ஏத்த² வேஜயந்தோ நாம தஸ்ஸ ரஞ்ஞோ ரதோ², யஸ்ஸ சக்கானம் இந்த³னீலமணிமயா நாபி⁴, ஸத்தரதனமயா அரா, பவாளமயா நேமி, ரஜதமயோ அக்கோ², இந்த³னீலமணிமயம் உபக்க²ரம், ரஜதமயம் குப்³ப³ரம். ஸோ தேஸம் ரதா²னம் பமுகோ² அக்³கோ³. து³கூலஸந்தா³னானீதி து³கூலஸந்த²ரானி. கம்ஸூபதா⁴ரணானீதி ரஜதமயதோ³ஹபா⁴ஜனானி. வத்த²கோடிஸஹஸ்ஸானீதி யதா²ருசிதம் பரிபு⁴ஞ்ஜிஸ்ஸதீதி ந்ஹத்வா டி²தகாலே உபனீதவத்தா²னேவ ஸந்தா⁴யேதம் வுத்தம். ப⁴த்தாபி⁴ஹாரோதி அபி⁴ஹரிதப்³ப³ப⁴த்தம்.

யமஹம் தேன ஸமயேன அஜ்ஜா²வஸாமீதி யத்த² வஸாமி, தம் ஏகஞ்ஞேவ நக³ரம் ஹோதி, அவஸேஸேஸு புத்ததீ⁴தாத³யோ சேவ தா³ஸமனுஸ்ஸா ச வஸிம்ஸு. பாஸாத³கூடாகா³ராதீ³ஸுபி ஏஸேவ நயோ. பல்லங்காதீ³ஸு ஏகம்யேவ ஸயம் பரிபு⁴ஞ்ஜதி, ஸேஸா புத்தாதீ³னம் பரிபோ⁴கா³ ஹோந்தி. இத்தீ²ஸு ஏகாவ பச்சுபட்டா²தி, ஸேஸா பரிவாரமத்தா ஹோந்தி. வேலாமிகாதி க²த்தியஸ்ஸ வா ப்³ராஹ்மணியா, ப்³ராஹ்மணஸ்ஸ வா க²த்தியானியா குச்சி²ஸ்மிம் ஜாதா. பரித³ஹாமீதி ஏகம்யேவ து³ஸ்ஸயுக³ம் நிவாஸேமி, ஸேஸானி பரிவாரேத்வா விசரந்தானம் அஸீதிஸஹஸ்ஸாதி⁴கானம் ஸோளஸன்னம் புரிஸஸதஸஹஸ்ஸானம் ஹோந்தீதி த³ஸ்ஸேதி. பு⁴ஞ்ஜாமீதி பரமப்பமாணேன நாளிகோத³னமத்தம் பு⁴ஞ்ஜாமி, ஸேஸம் பரிவாரேத்வா விசரந்தானம் சத்தாலீஸஸஹஸ்ஸாதி⁴கானம் அட்ட²ன்னம் புரிஸஸதஸஹஸ்ஸானம் ஹோதீதி த³ஸ்ஸேதி. ஏகதா²லிபாகோ ஹி த³ஸன்னம் ஜனானம் பஹோதி.

இதி இமம் மஹாஸுத³ஸ்ஸனகாலே ஸம்பத்திம் த³ஸ்ஸேத்வா இதா³னி தஸ்ஸா அனிச்சதம் த³ஸ்ஸேந்தோ இதி கோ² பி⁴க்கூ²திஆதி³மாஹ. தத்த² விபரிணதாதி பகதிஜஹனேன நிப்³பு³தபதீ³போ விய அபண்ணத்திகபா⁴வம் க³தா. ஏவம் அனிச்சா கோ² பி⁴க்கு² ஸங்கா²ராதி ஏவம் ஹுத்வாஅபா⁴வட்டே²ன அனிச்சா. ஏத்தாவதா ப⁴க³வா யதா² நாம புரிஸோ ஸதஹத்து²ப்³பே³தே⁴ சம்பகருக்கே² நிஸ்ஸேணிம் ப³ந்தி⁴த்வா அபி⁴ருஹித்வா சம்பகபுப்ப²ம் ஆதா³ய நிஸ்ஸேணிம் முஞ்சந்தோ ஓதரேய்ய, ஏவமேவம் நிஸ்ஸேணிம் ப³ந்த⁴ந்தோ விய அனேகவஸ்ஸகோடிஸதஸஹஸ்ஸுப்³பே³த⁴ம் மஹாஸுத³ஸ்ஸனஸம்பத்திம் ஆருய்ஹ ஸம்பத்திமத்த²கே டி²தம் அனிச்சலக்க²ணம் ஆதா³ய நிஸ்ஸேணிம் முஞ்சந்தோ விய ஓதிண்ணோ. ஏவம் அத்³து⁴வாதி ஏவம் உத³கபுப்³பு³ளாத³யோ விய து⁴வபா⁴வரஹிதா. ஏவம் அனஸ்ஸாஸிகாதி ஏவம் ஸுபினகே பீதபானீயம் விய அனுலித்தசந்த³னம் விய ச அஸ்ஸாஸவிரஹிதா. இதி இமஸ்மிம் ஸுத்தே அனிச்சலக்க²ணம் கதி²தம். பஞ்சமே ஸப்³ப³ம் வுத்தனயமேவ. ச²ட்ட²ம் ததா² பு³ஜ்ஜ²னகஸ்ஸ அஜ்ஜா²ஸயேன வுத்தம். சதுத்தா²தீ³னி.

7. க³த்³து³லப³த்³த⁴ஸுத்தவண்ணனா

99. ஸத்தமே யம் மஹாஸமுத்³தோ³தி யஸ்மிம் ஸமயே பஞ்சமே ஸூரியே உட்டி²தே மஹாஸமுத்³தோ³ உஸ்ஸுஸ்ஸதி. து³க்க²ஸ்ஸ அந்தகிரியந்தி சத்தாரி ஸச்சானி அப்படிவிஜ்ஜி²த்வா அவிஜ்ஜாய நிவுதானம்யேவ ஸதம் வட்டது³க்க²ஸ்ஸ அந்தகிரியம் பரிச்சே²த³ம் ந வதா³மி. ஸா க³த்³து³லப³த்³தோ⁴தி க³த்³து³லேன ப³த்³த⁴ஸுனகோ². கீ²லேதி பத²வியம் ஆகோடிதே மஹாகீ²லே. த²ம்பே⁴தி நிக²ணித்வா ட²பிதே த²ம்பே⁴. ஏவமேவ கோ²தி ஏத்த² ஸுனகோ² விய வட்டனிஸ்ஸிதோ பா³லோ, க³த்³து³லோ விய தி³ட்டி², த²ம்போ⁴ விய ஸக்காயோ, க³த்³து³லரஜ்ஜுயா த²ம்பே⁴ உபனிப³த்³த⁴ஸுனக²ஸ்ஸ த²ம்பா⁴னுபரிவத்தனம் விய தி³ட்டி²தண்ஹாய ஸக்காயே ப³த்³த⁴ஸ்ஸ புது²ஜ்ஜனஸ்ஸ ஸக்காயானுபரிவத்தனம் வேதி³தப்³ப³ம். ஸத்தமம்.

8. து³தியக³த்³து³லப³த்³த⁴ஸுத்தவண்ணனா

100. அட்ட²மே தஸ்மாதி யஸ்மா தி³ட்டி²க³த்³து³லனிஸ்ஸிதாய தண்ஹாரஜ்ஜுயா ஸக்காயத²ம்பே⁴ உபனிப³த்³தோ⁴ வட்டனிஸ்ஸிதோ பா³லபுது²ஜ்ஜனோ ஸப்³பி³ரியாபதே²ஸு க²ந்த⁴பஞ்சகம் நிஸ்ஸாயேவ பவத்ததி, யஸ்மா வா தீ³க⁴ரத்தமித³ம் சித்தம் ஸம்கிலிட்ட²ம் ராகே³ன தோ³ஸேன மோஹேன, தஸ்மா. சித்தஸம்கிலேஸாதி ஸுன்ஹாதாபி ஹி ஸத்தா சித்தஸம்கிலேஸேனேவ ஸம்கிலிஸ்ஸந்தி, மலக்³க³ஹிதஸரீராபி சித்தஸ்ஸ வோதா³னத்தா விஸுஜ்ஜ²ந்தி. தேனாஹு போராணா –

‘‘ரூபம்ஹி ஸம்கிலிட்ட²ம்ஹி, ஸம்கிலிஸ்ஸந்தி மாணவா;

ரூபே ஸுத்³தே⁴ விஸுஜ்ஜ²ந்தி, அனக்கா²தம் மஹேஸினா.

‘‘சித்தம்ஹி ஸம்கிலிட்ட²ம்ஹி, ஸம்கிலிஸ்ஸந்தி மாணவா;

சித்தே ஸுத்³தே⁴ விஸுஜ்ஜ²ந்தி, இதி வுத்தம் மஹேஸினா’’தி.

சரணம் நாம சித்தந்தி விசரணசித்தம். ஸங்கா² நாம ப்³ராஹ்மணபாஸண்டி³கா ஹோந்தி, தே படகோட்ட²கம் கத்வா தத்த² நானப்பகாரா ஸுக³திது³க்³க³திவஸேன ஸம்பத்திவிபத்தியோ லேகா²பேத்வா, ‘‘இமம் கம்மம் கத்வா இத³ம் படிலப⁴தி, இத³ம் கத்வா இத³’’ந்தி த³ஸ்ஸேந்தா தம் சித்தம் க³ஹேத்வா விசரந்தி. சித்தேனேவ சித்திதந்தி சித்தகாரேன சிந்தேத்வா கதத்தா சித்தேன சிந்திதம் நாம. சித்தஞ்ஞேவ சித்ததரந்தி தஸ்ஸ சித்தஸ்ஸ உபாயபரியேஸனசித்தம் ததோபி சித்ததரம். திரச்சா²னக³தா பாணா சித்தேனேவ சித்திதாதி கம்மசித்தேனேவ சித்திதா. தம் பன கம்மசித்தம் இமே வட்டகதித்திராத³யோ ‘‘ஏவம் சித்தா ப⁴விஸ்ஸாமா’’தி ஆயூஹந்தா நாம நத்தி². கம்மம் பன யோனிம் உபனேதி, யோனிமூலகோ தேஸம் சித்தபா⁴வோ. யோனிஉபக³தா ஹி ஸத்தா தம்தம்யோனிகேஹி ஸதி³ஸசித்தாவ ஹோந்தி. இதி யோனிஸித்³தோ⁴ சித்தபா⁴வோ, கம்மஸித்³தா⁴ யோனீதி வேதி³தப்³பா³.

அபிச சித்தம் நாமேதம் ஸஹஜாதம் ஸஹஜாதத⁴ம்மசித்ததாய பூ⁴மிசித்ததாய வத்து²சித்ததாய த்³வாரசித்ததாய ஆரம்மணசித்ததாய கம்மனானத்தமூலகானம் லிங்க³னானத்தஸஞ்ஞானானத்தவோஹாரனானத்தாதீ³னம் அனேகவிதா⁴னம் சித்தானம் நிப்பா²த³னதாயபி திரச்சா²னக³தசித்ததோ சித்ததரமேவ வேதி³தப்³ப³ம்.

ரஜகோதி வத்தே²ஸு ரங்கே³ன ரூபஸமுட்டா²பனகோ. ஸோ பன அசே²கோ அமனாபம் ரூபம் கரோதி, சே²கோ மனாபம் த³ஸ்ஸனீயம், ஏவமேவ புது²ஜ்ஜனோ அகுஸலசித்தேன வா ஞாணவிப்பயுத்தகுஸலேன வா சக்கு²ஸம்பதா³தி³விரஹிதம் விரூபம் ஸமுட்டா²பேதி, ஞாணஸம்பயுத்தகுஸலேன சக்கு²ஸம்பதா³தி³ஸம்பன்னம் அபி⁴ரூபம். அட்ட²மம்.

9. வாஸிஜடஸுத்தவண்ணனா

101. நவமே ஸேய்யதா²பி, பி⁴க்க²வே, குக்குடியா அண்டா³னீதி இமா கண்ஹபக்க²ஸுக்கபக்க²வஸேன த்³வே உபமா வுத்தா. தாஸு கண்ஹபக்க²உபமா அத்த²ஸ்ஸ அஸாதி⁴கா, இதரா ஸாதி⁴காதி. ஸுக்கபக்க²உபமாய ஏவம் அத்தோ² வேதி³தப்³போ³ – ஸேய்யதா²தி ஓபம்மத்தே² நிபாதோ, அபீதி ஸம்பா⁴வனத்தே². உப⁴யேனாபி ஸேய்யதா² நாம, பி⁴க்க²வேதி த³ஸ்ஸேதி. குக்குடியா அண்டா³னி அட்ட² வா த³ஸ வா த³ஸ வா த்³வாத³ஸ வாதி ஏத்த² பன கிஞ்சாபி குக்குடியா வுத்தப்பகாரதோ ஊனாதி⁴கானிபி அண்டா³னி ஹோந்தி, வசனஸிலிட்ட²தாய பன ஏவம் வுத்தம். ஏவஞ்ஹி லோகே ஸிலிட்ட²வசனம் ஹோதி. தானஸ்ஸூதி தானி அஸ்ஸு, தானி ப⁴வேய்யுந்தி அத்தோ². குக்குடியா ஸம்மா அதி⁴ஸயிதானீதி தாய ச ஜனேத்தியா குக்குடியா பக்கே² பஸாரேத்வா தேஸம் உபரி ஸயந்தியா ஸம்மா அதி⁴ஸயிதானி. ஸம்மா பரிஸேதி³தானீதி காலேன காலம் உதும் க³ண்ஹாபேந்தியா ஸுட்டு² ஸமந்ததோ ஸேதி³தானி உஸ்மீகதானி. ஸம்மா பரிபா⁴விதானீதி காலேன காலம் ஸுட்டு² ஸமந்ததோ பா⁴விதானி, குக்குடக³ந்த⁴ம் கா³ஹாபிதானீதி அத்தோ². கிஞ்சாபி தஸ்ஸா குக்குடியாதி தஸ்ஸா குக்குடியா இமினா திவித⁴கிரியாகரணேன அப்பமாத³ம் கத்வா கிஞ்சாபி ந ஏவம் இச்சா² உபஜ்ஜேய்ய. அத² கோ² ப⁴ப்³பா³வ தேதி அத² கோ² தே குக்குடபோதகா வுத்தனயேன ஸோத்தி²னா அபி⁴னிப்³பி⁴ஜ்ஜிதும் ப⁴ப்³பா³வ. தே ஹி யஸ்மா தாய குக்குடியா ஏவம் தீஹாகாரேஹி தானி அண்டா³னி பரிபாலியமானானி ந பூதீனி ஹோந்தி, யோ நேஸம் அல்லஸினேஹோ, ஸோபி பரியாதா³னம் க³ச்ச²தி, கபாலம் தனுகம் ஹோதி, பாத³னக²ஸிகா² ச முக²துண்ட³கஞ்ச க²ரம் ஹோதி, ஸயம்பி பரிணாமம் க³ச்ச²ந்தி, கபாலஸ்ஸ தனுத்தா ப³ஹி ஆலோகோ அந்தோ பஞ்ஞாயதி, தஸ்மா ‘‘சிரம் வத மயம் ஸங்குடிதஹத்த²பாதா³ ஸம்பா³தே⁴ ஸயிம்ஹா, அயஞ்ச ப³ஹி ஆலோகோ தி³ஸ்ஸதி, ஏத்த² தா³னி நோ ஸுக²விஹாரோ ப⁴விஸ்ஸதீ’’தி நிக்க²மிதுகாமா ஹுத்வா கபாலம் பாதே³ன பஹரந்தி, கீ³வம் பஸாரேந்தி, ததோ தம் கபாலம் த்³வேதா⁴ பி⁴ஜ்ஜதி. அத² தே பக்கே² விது⁴னந்தா தம்க²ணானுரூபம் விரவந்தா நிக்க²மந்தியேவ, நிக்க²மித்வா ச கா³மக்கே²த்தம் உபஸோப⁴யமானா விசரந்தி.

ஏவமேவ கோ²தி இத³ம் ஓபம்மஸம்படிபாத³னம். தம் ஏவம் அத்தே²ன ஸம்ஸந்தி³த்வா வேதி³தப்³ப³ம் – தஸ்ஸா குக்குடியா அண்டே³ஸு திவித⁴கிரியாகரணம் விய ஹி இமஸ்ஸ பி⁴க்கு²னோ பா⁴வானுயோக³ம் அனுயுத்தகாலோ, குக்குடியா திவித⁴கிரியாஸம்பாத³னேன அண்டா³னம் அபூதிபா⁴வோ விய பா⁴வனானுயோக³மனுயுத்தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன விபஸ்ஸனாஞாணஸ்ஸ அபரிஹானி, தஸ்ஸா திவித⁴கிரியாகரணேன அல்லஸினேஹபரியாதா³னம் விய தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன ப⁴வத்தயானுக³தனிகந்திஸினேஹபரியாதா³னம், அண்ட³கபாலானம் தனுபா⁴வோ விய தஸ்ஸ பி⁴க்கு²னோ அவிஜ்ஜண்ட³கோஸஸ்ஸ தனுபா⁴வோ, குக்குடபோதகானம் பாத³னக²ஸிக²முக²துண்ட³கானம் த²த்³த⁴க²ரபா⁴வோ விய பி⁴க்கு²னோ விபஸ்ஸனாஞாணஸ்ஸ திக்க²க²ரவிப்பஸன்ன ஸூரபா⁴வோ, குக்குடபோதகானம் பரிணாமகாலோ விய பி⁴க்கு²னோ விபஸ்ஸனாஞாணஸ்ஸ பரிணாமகாலோ வட்³டி⁴தகாலோ க³ப்³ப⁴க்³க³ஹணகாலோ, குக்குடபோதகானம் பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா பக்கே² பப்போ²டேத்வா ஸோத்தி²னா அபி⁴னிப்³பி⁴தா³காலோ விய தஸ்ஸ பி⁴க்கு²னோ விபஸ்ஸனாஞாணக³ப்³ப⁴ம் க³ண்ஹாபேத்வா விசரந்தஸ்ஸ தஜ்ஜாதிகம் உதுஸப்பாயம் வா போ⁴ஜனஸப்பாயம் வா புக்³க³லஸப்பாயம் வா த⁴ம்மஸ்ஸவனஸப்பாயம் வா லபி⁴த்வா ஏகாஸனே நிஸின்னஸ்ஸேவ விபஸ்ஸனம் வட்³டே⁴ந்தஸ்ஸ அனுபுப்³பா³தி⁴க³தேன அரஹத்தமக்³கே³ன அவிஜ்ஜண்ட³கோஸம் பதா³லேத்வா அபி⁴ஞ்ஞாபக்கே² பப்போ²டேத்வா ஸோத்தி²னா அரஹத்தபத்தகாலோ வேதி³தப்³போ³. யதா² பன குக்குடபோதகானம் பரிணதபா⁴வம் ஞத்வா மாதாபி அண்ட³கோஸம் பி⁴ந்த³தி, ஏவம் ததா²ரூபஸ்ஸ பி⁴க்கு²னோ ஞாணபரிபாகம் ஞத்வா ஸத்தா²பி –

‘‘உச்சி²ந்த³ ஸினேஹமத்தனோ, குமுத³ம் ஸாரதி³கம்வ பாணினா;

ஸந்திமக்³க³மேவ ப்³ரூஹய, நிப்³பா³னம் ஸுக³தேன தே³ஸித’’ந்தி. (த⁴. ப. 285) –

ஆதி³னா நயேன ஓபா⁴ஸம் ப²ரித்வா கா³தா²ய அவிஜ்ஜண்ட³கோஸம் பஹரதி. ஸோ கா³தா²பரியோஸானே அவிஜ்ஜண்ட³கோஸம் பி⁴ந்தி³த்வா அரஹத்தம் பாபுணாதி. ததோ பட்டா²ய யதா² தே குக்குடபோதகா கா³மக்கே²த்தம் உபஸோப⁴யமானா தத்த² விசரந்தி, ஏவம் அயம்பி மஹாகீ²ணாஸவோ நிப்³பா³னாரம்மணம் ப²லஸமாபத்திம் அப்பேத்வா ஸங்கா⁴ராமம் உபஸோப⁴யமானோ விசரதி.

பலக³ண்ட³ஸ்ஸாதி வட்³ட⁴கிஸ்ஸ. ஸோ ஹி ஓலம்ப³கஸங்கா²தம் பலம் தா⁴ரேத்வா தா³ரூனம் க³ண்ட³ம் ஹரதீதி பலக³ண்டோ³தி வுச்சதி. வாஸிஜடேதி வாஸித³ண்ட³கஸ்ஸ க³ஹணட்டா²னே. ஏத்தகம் வத மே அஜ்ஜ ஆஸவானம் கீ²ணந்தி பப்³ப³ஜிதஸ்ஸ ஹி பப்³ப³ஜ்ஜாஸங்கே²பேன உத்³தே³ஸேன பரிபுச்சா²ய யோனிஸோ மனஸிகாரேன வத்தபடிபத்தியா ச நிச்சகாலம் ஆஸவா கீ²யந்தி. ஏவம் கீ²யமானானம் பன தேஸம் ‘‘ஏத்தகம் அஜ்ஜ கீ²ணம், ஏத்தகம் ஹிய்யோ’’தி ஏவமஸ்ஸ ஞாணம் ந ஹோதீதி அத்தோ². இமாய உபமாய விபஸ்ஸனாயானிஸம்ஸோ தீ³பிதோ. ஹேமந்திகேனாதி ஹேமந்தஸமயேன. படிப்பஸ்ஸம்ப⁴ந்தீதி தி²ரபா⁴வேன பரிஹாயந்தி.

ஏவமேவ கோ²தி ஏத்த² மஹாஸமுத்³தோ³ விய ஸாஸனம் த³ட்ட²ப்³ப³ம், நாவா விய யோகா³வசரோ, நாவாய மஹாஸமுத்³தே³ பரியாதா³னம் விய இமஸ்ஸ பி⁴க்கு²னோ ஊனபஞ்சவஸ்ஸகாலே ஆசரியுபஜ்ஜா²யானம் ஸந்திகே விசரணம், நாவாய மஹாஸமுத்³தோ³த³கேன க²ஜ்ஜமானானம் ப³ந்த⁴னானம் தனுபா⁴வோ விய பி⁴க்கு²னோ பப்³ப³ஜ்ஜாஸங்கே²பேன உத்³தே³ஸபரிபுச்சா²தீ³ஹி சேவ ஸம்யோஜனானம் தனுபா⁴வோ, நாவாய த²லே உக்கி²த்தகாலோ விய பி⁴க்கு²னோ நிஸ்ஸயமுச்சகஸ்ஸ கம்மட்டா²னம் க³ஹேத்வா அரஞ்ஞே வஸனகாலோ, தி³வா வாதாதபேன ஸம்ஸுஸ்ஸனம் விய விபஸ்ஸனாஞாணேன தண்ஹாஸ்னேஹஸம்ஸுஸ்ஸனம், ரத்திம் ஹிமோத³கேன தேமனம் விய கம்மட்டா²னம் நிஸ்ஸாய உப்பன்னேன பீதிபாமோஜ்ஜேன சித்ததேமனம், ரத்திந்தி³வம் வாதாதபேன சேவ ஹிமோத³கேன ச பரிஸுக்க²பரிதிந்தானம் ப³ந்த⁴னானம் து³ப்³ப³லபா⁴வோ விய ஏகதி³வஸம் உதுஸப்பாயாதீ³னி லத்³தா⁴ விபஸ்ஸனாஞாணபீதிபாமோஜ்ஜேஹி ஸம்யோஜனானம் பி⁴ய்யோஸோமத்தாய து³ப்³ப³லபா⁴வோ, பாவுஸ்ஸகமேகோ⁴ விய அரஹத்தமக்³க³ஞாணம், மேக⁴வுட்டி²உத³கேன நாவாய ப³ந்தே⁴ பூதிபா⁴வோ விய ஆரத்³த⁴விபஸ்ஸகஸ்ஸ ரூபஸத்தகாதி³வஸேன விபஸ்ஸனம் வட்³டே⁴ந்தஸ்ஸ ஓக்கா²யமானே பக்கா²யமானே கம்மட்டா²னே ஏகதி³வஸம் உதுஸப்பாயாதீ³னி லத்³தா⁴ ஏகபல்லங்கேன நிஸின்னஸ்ஸ அரஹத்தப²லாதி⁴க³மோ, பூதிப³ந்த⁴னாவாய கஞ்சி காலம் டா²னம் விய கீ²ணஸம்யோஜனஸ்ஸ அரஹதோ மஹாஜனம் அனுக்³க³ண்ஹந்தஸ்ஸ யாவதாயுகம் டா²னம், பூதிப³ந்த⁴னாவாய அனுபுப்³பே³ன பி⁴ஜ்ஜித்வா அபண்ணத்திகபா⁴வூபக³மோ விய கீ²ணாஸவஸ்ஸ உபாதி³ண்ணக்க²ந்த⁴பே⁴தே³ன அனுபாதி³ஸேஸாய நிப்³பா³னதா⁴துயா பரினிப்³பு³தஸ்ஸ அபண்ணத்திகபா⁴வூபக³மோதி இமாய உபமாய ஸம்யோஜனானம் து³ப்³ப³லதா தீ³பிதா. நவமம்.

10. அனிச்சஸஞ்ஞாஸுத்தவண்ணனா

102. த³ஸமே அனிச்சஸஞ்ஞாதி அனிச்சம் அனிச்சந்தி பா⁴வேந்தஸ்ஸ உப்பன்னஸஞ்ஞா. பரியாதி³யதீதி கே²பயதி. ஸப்³ப³ம் அஸ்மிமானந்தி நவவித⁴ம் அஸ்மிமானம். மூலஸந்தானகானீதி ஸந்தானேத்வா டி²தமூலானி. மஹானங்க³லம் விய ஹி அனிச்சஸஞ்ஞா, கு²த்³தா³னுகு²த்³த³கானி மூலஸந்தானகானி விய கிலேஸா, யதா² கஸ்ஸகோ கஸந்தோ நங்க³லேன தானி பதா³லேதி, ஏவம் யோகீ³ அனிச்சஸஞ்ஞம் பா⁴வேந்தோ அனிச்சஸஞ்ஞாஞாணேன கிலேஸே பதா³லேதீதி இத³மேத்த² ஓபம்மஸம்ஸந்த³னம்.

ஓது⁴னாதீதி ஹேட்டா² து⁴னாதி. நித்³து⁴னாதீதி பப்போ²டேதி. நிச்சோ²டேதீதி பப்போ²டேத்வா ச²ட்³டே³தி. இதா⁴பி பப்³ப³ஜானி விய கிலேஸா, லாயனம் நிச்சோ²டனம் விய அனிச்சஸஞ்ஞாஞாணந்தி இமினா அத்தே²ன உபமா ஸம்ஸந்தே³தப்³பா³.

வண்டச்சி²ன்னாயாதி திண்ஹேன கு²ரப்பேன வண்டச்சி²ன்னாய. தத³ன்வயானி ப⁴வந்தீதி தம் அம்ப³பிண்டி³ம் அனுக³ச்ச²ந்தி, தஸ்ஸா பதமானாய அம்பா³னி பூ⁴மியம் பதந்தி. இதா⁴பி அம்ப³பிண்டி³ விய கிலேஸா, திண்ஹகு²ரப்போ விய அனிச்சஸஞ்ஞா, யதா² கு²ரப்பேன சி²ன்னாய அம்ப³பிண்டி³யா ஸப்³பா³னி அம்பா³னி பூ⁴மியம் பதந்தி, ஏவம் அனிச்சஸஞ்ஞாஞாணேன கிலேஸானம் மூலபூ⁴தாய அவிஜ்ஜாய சி²ன்னாய ஸப்³ப³கிலேஸா ஸமுக்³கா⁴தம் க³ச்ச²ந்தீதி, இத³ம் ஓபம்மஸம்ஸந்த³னம்.

கூடங்க³மாதி கூடம் க³ச்ச²ந்தி. கூடனின்னாதி கூடம் பவிஸனபா⁴வேன கூடே நின்னா. கூடஸமோஸரணாதி கூடே ஸமோஸரித்வா டி²தா. இதா⁴பி கூடம் விய அனிச்சஸஞ்ஞா, கோ³பானஸியோ விய சதுபூ⁴மககுஸலத⁴ம்மா, யதா² ஸப்³ப³கோ³பானஸீனம் கூடம் அக்³க³ம், ஏவம் குஸலத⁴ம்மானம் அனிச்சஸஞ்ஞா அக்³கா³. நனு ச அனிச்சஸஞ்ஞா லோகியா, ஸா லோகியகுஸலானம் தாவ அக்³க³ம் ஹோது, லோகுத்தரானம் கத²ம் அக்³க³ந்தி? தேஸம்பி படிலாப⁴கரணத்தே²ன அக்³க³ந்தி வேதி³தப்³பா³. இமினா உபாயேன ஸப்³பா³ஸு உபமாஸு ஓபம்மஸம்ஸந்த³னம் வேதி³தப்³ப³ம். புரிமாஹி பனேத்த² தீஹி அனிச்சஸஞ்ஞாய கிச்சம், பச்சி²மாஹி ப³லந்தி. த³ஸமம்.

புப்ப²வக்³கோ³ த³ஸமோ.

மஜ்ஜி²மபண்ணாஸகோ ஸமத்தோ.