7. உபாதா³பரிதஸ்ஸனாஸுத்தவண்ணனா

7. ஸத்தமே உபாதா³பரிதஸ்ஸனந்தி க³ஹணேன உப்பன்னம் பரிதஸ்ஸனம். அனுபாதா³அபரிதஸ்ஸனந்தி அக்³க³ஹணேன அபரிதஸ்ஸனம். ரூபவிபரிணாமானுபரிவத்திவிஞ்ஞாணம் ஹோதீதி ‘‘மம ரூபம் விபரிணத’’ந்தி வா ‘‘அஹு வத மேதம், தா³னி வத மே நத்தீ²’’தி வா ஆதி³னா நயேன கம்மவிஞ்ஞாணம் ரூபஸ்ஸ பே⁴தா³னுபரிவத்தி ஹோதி. விபரிணாமானுபரிவத்திஜாதி விபரிணாமஸ்ஸ அனுபரிவத்திதோ விபரிணாமாரம்மணசித்ததோ ஜாதா. பரிதஸ்ஸனா த⁴ம்மஸமுப்பாதா³தி தண்ஹாபரிதஸ்ஸனா ச அகுஸலத⁴ம்மஸமுப்பாதா³ ச. சித்தந்தி குஸலசித்தம். பரியாதா³ய திட்ட²ந்தீதி பரியாதி³யித்வா திட்ட²ந்தி. உத்தாஸவாதி ஸஉத்தாஸோ. விகா⁴தவாதி ஸவிகா⁴தோ ஸது³க்கோ². அபேக்க²வாதி ஸாலயோ. உபாதா³ய ச பரிதஸ்ஸதீதி க³ண்ஹித்வா பரிதஸ்ஸகோ நாம ஹோதி. ந ரூபவிபரிணாமானுபரிவத்தீதி கீ²ணாஸவஸ்ஸ கம்மவிஞ்ஞாணமேவ நத்தி², தஸ்மா ரூபபே⁴தா³னுபரிவத்தி ந ஹோதீதி வத்தும் வட்டதி. ஸத்தமம்.