3. ஹாலித்³தி³கானிஸுத்தவண்ணனா

3. ததியே அவந்தீஸூதி அவந்தித³க்கி²ணாபத²ஸங்கா²தே அவந்திரட்டே². குரரக⁴ரேதி ஏவம்னாமகே நக³ரே. பபாதேதி ஏகதோ பபாதே. தஸ்ஸ கிர பப்³ப³தஸ்ஸ ஏகம் பஸ்ஸம் சி²ந்தி³த்வா பாதிதம் விய அஹோஸி. ‘‘பவத்தே’’திபி பாடோ², நானாதித்தி²யானம் லத்³தி⁴பவத்தட்டா²னேதி அத்தோ². இதி தே²ரோ தஸ்மிம் ரட்டே² தம் நக³ரம் நிஸ்ஸாய தஸ்மிம் பப்³ப³தே விஹரதி. ஹாலித்³தி³கானீதி ஏவம்னாமகோ. அட்ட²கவக்³கி³யே மாக³ண்டி³யபஞ்ஹேதி அட்ட²கவக்³கி³கம்ஹி மாக³ண்டி³யபஞ்ஹோ நாம அத்தி², தஸ்மிம் பஞ்ஹே. ரூபதா⁴தூதி ரூபக்க²ந்தோ⁴ அதி⁴ப்பேதோ. ரூபதா⁴துராக³வினிப³த்³த⁴ந்தி ரூபதா⁴தும்ஹி ராகே³ன வினிப³த்³த⁴ம். விஞ்ஞாணந்தி கம்மவிஞ்ஞாணம். ஓகஸாரீதி கே³ஹஸாரீ ஆலயஸாரீ.

கஸ்மா பனேத்த² ‘‘விஞ்ஞாணதா⁴து கோ², க³ஹபதீ’’தி ந வுத்தந்தி? ஸம்மோஹவிகா⁴தத்த²ம். ‘‘ஓகோ’’தி ஹி அத்த²தோ பச்சயோ வுச்சதி, புரேஜாதஞ்ச கம்மவிஞ்ஞாணம் பச்சா²ஜாதஸ்ஸ கம்மவிஞ்ஞாணஸ்ஸபி விபாகவிஞ்ஞாணஸ்ஸபி விபாகவிஞ்ஞாணஞ்ச விபாகவிஞ்ஞாணஸ்ஸபி கம்மவிஞ்ஞாணஸ்ஸபி பச்சயோ ஹோதி, தஸ்மா ‘‘கதரம் நு கோ² இத⁴ விஞ்ஞாண’’ந்தி? ஸம்மோஹோ ப⁴வேய்ய, தஸ்ஸ விகா⁴தத்த²ம் தம் அக³ஹேத்வா அஸம்பி⁴ன்னாவ தே³ஸனா கதா. அபிச ஆரம்மணவஸேன சதஸ்ஸோ அபி⁴ஸங்கா²ரவிஞ்ஞாணட்டி²தியோ வுத்தாதி தா த³ஸ்ஸேதும்பி இத⁴ விஞ்ஞாணம் ந க³ஹிதம்.

உபயுபாதா³னாதி தண்ஹூபயதி³ட்டூ²பயவஸேன த்³வே உபயா, காமுபாதா³னாதீ³னி சத்தாரி உபாதா³னானி ச. சேதஸோ அதி⁴ட்டா²னாபி⁴னிவேஸானுஸயாதி அகுஸலசித்தஸ்ஸ அதி⁴ட்டா²னபூ⁴தா சேவ அபி⁴னிவேஸபூ⁴தா ச அனுஸயபூ⁴தா ச. ததா²க³தஸ்ஸாதி ஸம்மாஸம்பு³த்³த⁴ஸ்ஸ. ஸப்³பே³ஸம்பி ஹி கீ²ணாஸவானம் ஏதே பஹீனாவ, ஸத்து² பன கீ²ணாஸவபா⁴வோ லோகே அதிபாகடோதி உபரிமகோடியா ஏவம் வுத்தம். விஞ்ஞாணதா⁴துயாதி இத⁴ விஞ்ஞாணம் கஸ்மா க³ஹிதம்? கிலேஸப்பஹானத³ஸ்ஸனத்த²ம். கிலேஸா ஹி ந கேவலம் சதூஸுயேவ க²ந்தே⁴ஸு பஹீனா பஹீயந்தி, பஞ்சஸுபி பஹீயந்தியேவாதி கிலேஸப்பஹானத³ஸ்ஸனத்த²ம் க³ஹிதம். ஏவம் கோ², க³ஹபதி, அனோகஸாரீ ஹோதீதி ஏவம் கம்மவிஞ்ஞாணேன ஓகம் அஸரந்தேன அனோகஸாரீ நாம ஹோதி.

ரூபனிமித்தனிகேதவிஸாரவினிப³ந்தா⁴தி ரூபமேவ கிலேஸானம் பச்சயட்டே²ன நிமித்தம், ஆரம்மணகிரியஸங்கா²தனிவாஸனட்டா²னட்டே²ன நிகேதந்தி ரூபனிமித்தனிகேதம். விஸாரோ ச வினிப³ந்தோ⁴ ச விஸாரவினிப³ந்தா⁴. உப⁴யேனபி ஹி கிலேஸானம் பத்த²டபா⁴வோ ச வினிப³ந்த⁴னபா⁴வோ ச வுத்தோ, ரூபனிமித்தனிகேதே விஸாரவினிப³ந்தா⁴தி ரூபனிமித்தனிகேதவிஸாரவினிப³ந்தா⁴, தஸ்மா ரூபனிமித்தனிகேதம்ஹி உப்பன்னேன கிலேஸவிஸாரேன சேவ கிலேஸப³ந்த⁴னேன சாதி அத்தோ². நிகேதஸாரீதி வுச்சதீதி ஆரம்மணகரணவஸேன நிவாஸனட்டா²னம் ஸாரீதி வுச்சதி. பஹீனாதி தே ரூபனிமித்தனிகேதகிலேஸவிஸாரவினிப³ந்தா⁴ பஹீனா.

கஸ்மா பனேத்த² பஞ்சக்க²ந்தா⁴ ‘‘ஓகா’’தி வுத்தா, ச² ஆரம்மணானி ‘‘நிகேத’’ந்தி? ச²ந்த³ராக³ஸ்ஸ ப³லவது³ப்³ப³லதாய. ஸமானேபி ஹி ஏதேஸம் ஆலயட்டே²ன விஸயபா⁴வே ஓகோதி நிச்சனிவாஸனட்டா²னகே³ஹமேவ வுச்சதி, நிகேதந்தி ‘‘அஜ்ஜ அஸுகட்டா²னே கீளிஸ்ஸாமா’’தி கதஸங்கேதட்டா²னம் நிவாஸட்டா²னம் உய்யானாதி³. தத்த² யதா² புத்ததா³ரத⁴னத⁴ஞ்ஞபுண்ணகே³ஹே ச²ந்த³ராகோ³ ப³லவா ஹோதி, ஏவம் அஜ்ஜ²த்திகேஸு க²ந்தே⁴ஸு. யதா² பன உய்யானட்டா²னாதீ³ஸு ததோ து³ப்³ப³லதரோ ஹோதி, ஏவம் பா³ஹிரேஸு ச²ஸு ஆரம்மணேஸூதி ச²ந்த³ராக³ஸ்ஸ ப³லவது³ப்³ப³லதாய ஏவம் தே³ஸனா கதாதி வேதி³தப்³போ³.

ஸுகி²தேஸு ஸுகி²தோதி உபட்டா²கேஸு த⁴னத⁴ஞ்ஞலாபா⁴தி³வஸேன ஸுகி²தேஸு ‘‘இதா³னாஹம் மனாபம் போ⁴ஜனம் லபி⁴ஸ்ஸாமீ’’தி கே³ஹஸிதஸுகே²ன ஸுகி²தோ ஹோதி, தேஹி பத்தஸம்பத்திம் அனுப⁴வமானோ விய சரதி. து³க்கி²தேஸு து³க்கி²தோதி தேஸம் கேனசிதே³வ காரணேன து³க்கே² உப்பன்னே ஸயம் த்³விகு³ணேன து³க்கே²ன து³க்கி²தோ ஹோதி. கிச்சகரணீயேஸூதி கிச்சஸங்கா²தேஸு கரணீயேஸு. தேஸு யோக³ம் ஆபஜ்ஜதீதி உபயோக³ம் ஸயம் தேஸம் கிச்சானம் கத்தப்³ப³தம் ஆபஜ்ஜதி. காமேஸூதி வத்து²காமேஸு. ஏவம் கோ², க³ஹபதி, காமேஹி அரித்தோ ஹோதீதி ஏவம் கிலேஸகாமேஹி அரித்தோ ஹோதி அந்தோ காமானம் பா⁴வேன அதுச்சோ². ஸுக்கபக்கோ² தேஸம் அபா⁴வேன ரித்தோ துச்சோ²தி வேதி³தப்³போ³.

புரக்க²ரானோதி வட்டம் புரதோ குருமானோ. ஏவம்ரூபோ ஸியந்திஆதீ³ஸு தீ³க⁴ரஸ்ஸகாளோதா³தாதீ³ஸு ரூபேஸு ‘‘ஏவம்ரூபோ நாம ப⁴வேய்ய’’ந்தி பத்தே²தி. ஸுகா²தீ³ஸு வேத³னாஸு ஏவம்வேத³னோ நாம; நீலஸஞ்ஞாதீ³ஸு ஸஞ்ஞாஸு ஏவம் ஸஞ்ஞோ நாம; புஞ்ஞாபி⁴ஸங்கா²ராதீ³ஸு ஸங்கா²ரேஸு ஏவம்ஸங்கா²ரோ நாம; சக்கு²விஞ்ஞாணாதீ³ஸு விஞ்ஞாணேஸு ‘‘ஏவம் விஞ்ஞாணோ நாம ப⁴வேய்ய’’ந்தி பத்தே²தி.

அபுரக்க²ரானோதி வட்டம் புரதோ அகுருமானோ. ஸஹிதம் மே, அஸஹிதம் தேதி துய்ஹம் வசனம் அஸஹிதம் அஸிலிட்ட²ம், மய்ஹம் ஸஹிதம் ஸிலிட்ட²ம் மது⁴ரபானஸதி³ஸம். அதி⁴சிண்ணம் தே விபராவத்தந்தி யம் துய்ஹம் தீ³கே⁴ன காலேன பரிசிதம் ஸுப்பகு³ணம், தம் மம வாத³ம் ஆக³ம்ம ஸப்³ப³ம் க²ணேன விபராவத்தம் நிவத்தம். ஆரோபிதோ தே வாதோ³தி துய்ஹம் தோ³ஸோ மயா ஆரோபிதோ. சர வாத³ப்பமோக்கா²யாதி தம் தம் ஆசரியம் உபஸங்கமித்வா உத்தரி பரியேஸந்தோ இமஸ்ஸ வாத³ஸ்ஸ மோக்கா²ய சர ஆஹிண்டா³ஹி. நிப்³பே³டே²ஹி வா ஸசே பஹோஸீதி அத² ஸயமேவ பஹோஸி, இதே⁴வ நிப்³பே³டே²ஹீதி. ததியம்.