6. லாப⁴ஸக்காரஸம்யுத்தம்

1. பட²மவக்³கோ³

1. தா³ருணஸுத்தவண்ணனா

157. லாப⁴ஸக்காரஸம்யுத்தஸ்ஸ பட²மே தா³ருணோதி த²த்³தோ⁴. லாப⁴ஸக்காரஸிலோகோதி ஏத்த² லாபோ⁴ நாம சதுபச்சயலாபோ⁴. ஸக்காரோதி தேஸம்யேவ ஸுகதானம் ஸுஸங்க²தானம் லாபோ⁴. ஸிலோகோதி வண்ணகோ⁴ஸோ. கடுகோதி திகி²ணோ. ப²ருஸோதி க²ரோ. அந்தராயிகோதி அந்தராயகரோ. பட²மம்.

2. ப³ளிஸஸுத்தவண்ணனா

158. து³தியே பா³ளிஸிகோதி ப³ளிஸம் க³ஹேத்வா சரமானோ மச்ச²கா⁴தகோ. ஆமிஸக³தந்தி ஆமிஸமக்கி²தம். ஆமிஸசக்கூ²தி ஆமிஸே சக்கு² த³ஸ்ஸனம் அஸ்ஸாதி ஆமிஸசக்கு². கி³லப³ளிஸோதி கி³லிதப³ளிஸோ. அனயம் ஆபன்னோதி து³க்க²ம் பத்தோ. ப்³யஸனம் ஆபன்னோதி வினாஸம் பத்தோ. யதா²காமகரணீயோதி யதா²காமேன யதா²ருசியா யதே²வ நம் பா³ளிஸிகோ இச்ச²தி, ததே²வஸ்ஸ கத்தப்³போ³தி அத்தோ². யதா²காமகரணீயோ பாபிமதோதி யதா² கிலேஸமாரஸ்ஸ காமோ, ஏவம் கத்தப்³போ³, நிரயம் வா திரச்சா²னயோனிம் வா பேத்திவிஸயம் வா பாபேதப்³போ³. து³தியம்.

3-4. கும்மஸுத்தாதி³வண்ணனா

159-160. ததியே மஹாகும்மகுலந்தி மஹந்தம் அட்டி²கச்ச²பகுலம். அக³மாஸீதி ‘‘ஏத்த² அத்³தா⁴ கிஞ்சி கா²தி³தப்³ப³ம் அத்தி², தம் மச்ச²ராயந்தோ மம் ஏஸ நிவாரேதீ’’தி ஸஞ்ஞாய அக³மாஸி. பபதாயாதி பபதா வுச்சதி தீ³க⁴ரஜ்ஜுகப³த்³தோ⁴ அயகந்தகோஸகே த³ண்ட³கம் பவேஸேத்வா க³ஹிதோ கண்ணிகஸல்லஸண்டா²னோ, அயகண்டகோ, யஸ்மிம் வேகே³ன பதித்வா கடாஹே லக்³க³மத்தே த³ண்ட³கோ நிக்க²மதி, ரஜ்ஜுகோ ஏகாப³த்³தோ⁴ க³ச்ச²தேவ. ஸோ கும்மோதி ஸோ வித்³த⁴கும்மோ. யேன ஸோ கும்மோதி உத³கஸத்³த³ம் ஸுத்வா ஸாஸங்கட்டா²னம் ப⁴விஸ்ஸதீதி நிவத்தித்வா யேன ஸோ அத்த²காமோ கும்மோ. ந தா³னி த்வம் அம்ஹாகந்தி இதா³னி த்வம் அமித்தஹத்த²ம் க³தோ, ந அம்ஹாகம் ஸந்தகோதி அத்தோ². ஏவம் ஸல்லபந்தானம்யேவ ச நேஸம் நாவாய டி²தோ லுத்³தோ³ ரஜ்ஜுகம் ஆகட்³டி⁴த்வா கும்மம் க³ஹேத்வா யதா²காமம் அகாஸி. ஸேஸமேத்த² இதோ அனந்தரஸுத்தே ச உத்தானமேவ. ததியசதுத்தா²னி.

5. மீள்ஹகஸுத்தவண்ணனா

161. பஞ்சமே மீள்ஹகாதி கூ³த²பாணகா. கூ³தா²தீ³தி கூ³த²ப⁴க்கா². கூ³த²பூராதி அந்தோ கூ³தே²ன ப⁴ரிதா. புண்ணா கூ³த²ஸ்ஸாதி இத³ம் புரிமஸ்ஸேவ அத்த²தீ³பனம். அதிமஞ்ஞேய்யாதி பச்சி²மபாதே³ பூ⁴மியம் ட²பேத்வா புரிமபாதே³ கூ³த²ஸ்ஸ உபரி ஆரோபேத்வா டி²தா ‘‘அஹம்ஹி கூ³தா²தீ³’’தி ப⁴ணந்தீ அதிமஞ்ஞேய்ய. பிண்ட³பாதோ சஸ்ஸ பூரோதி அபரோபிஸ்ஸ பத்தபூரோ பணீதபிண்ட³பாதோ ப⁴வேய்ய. பஞ்சமம்.

6. அஸனிஸுத்தவண்ணனா

162. ச²ட்டே² கம், பி⁴க்க²வே, அஸனிவிசக்கந்தி, பி⁴க்க²வே, கம் புக்³க³லம் மத்த²கே பதித்வா மத்³த³மானம் ஸுக்காஸனிசக்கம் ஆக³ச்ச²து. அப்பத்தமானஸந்தி அனதி⁴க³தாரஹத்தம். இதி ப⁴க³வா ந ஸத்தானம் து³க்க²காமதாய, ஆதீ³னவம் பன த³ஸ்ஸேதும் ஏவமாஹ. அஸனிசக்கஞ்ஹி மத்த²கே பதிதம் ஏகமேவ அத்தபா⁴வம் நாஸேதி, லாப⁴ஸக்காரஸிலோகேன பரியாதி³ண்ணசித்தோ நிரயாதீ³ஸு அனந்தது³க்க²ம் அனுபோ⁴தி. ச²ட்ட²ம்.

7. தி³த்³த⁴ஸுத்தவண்ணனா

163. ஸத்தமே தி³த்³த⁴க³தேனாதி க³ததி³த்³தே⁴ன. விஸல்லேனாதி விஸமக்கி²தேன. ஸல்லேனாதி ஸத்தியா. ஸத்தமம்.

8. ஸிங்கா³லஸுத்தவண்ணனா

164. அட்ட²மே ஸிங்கா³லோதி ஜரஸிங்கா³லோ. யதா² ஹி ஸுவண்ணவண்ணோபி காயோ பூதிகாயோ த்வேவ, தம்க²ணம் க³ளிதம்பி ச முத்தம் பூதிமுத்தந்த்வேவ வுச்சதி, ஏவம் தத³ஹுஜாதோபி ஸிங்கா³லோ ஜரஸிங்கா³லோத்வேவ வுச்சதி. உக்கண்டகேன நாமாதி ஏவம்னாமகேன ரோகே³ன. ஸோ கிர ஸீதகாலே உப்பஜ்ஜதி. தஸ்மிம் உப்பன்னே ஸகலஸரீரதோ லோமானி பதந்தி, ஸகலஸரீரம் நில்லோமம் ஹுத்வா, ஸமந்ததோ பு²டதி, வாதப்³பா⁴ஹதா வணா ருஜ்ஜந்தி. யதா² உம்மத்தகஸுனகே²ன த³ட்டோ² புரிஸோ அனவட்டி²தோவ ப⁴மதி, ஏவம் தஸ்மிம் உப்பன்னே ப⁴மிதப்³போ³ ஹோதி, அஸுகட்டா²னே ஸோத்தி² ப⁴விஸ்ஸதீதி ந பஞ்ஞாயதி. அட்ட²மம்.

9. வேரம்ப⁴ஸுத்தவண்ணனா

165. நவமே வேரம்ப⁴வாதாதி ஏவம்னாமகா மஹாவாதா. கீதி³ஸே பன டா²னே தே வாதா வாயந்தீதி? யத்த² டி²தஸ்ஸ சத்தாரோ தீ³பா உப்பலினிபத்தமத்தா ஹுத்வா பஞ்ஞாயந்தி. யோ பக்கீ² க³ச்ச²தீதி நவவுட்டே² தே³வே விரவந்தோ வாதஸகுணோ தத்த² க³ச்ச²தி, தம் ஸந்தா⁴யேதம் வுத்தம். அரக்கி²தேனேவ காயேனாதிஆதீ³ஸு ஹத்த²பாதே³ கீளாபேந்தோ க²ந்த⁴ட்டி²ம் வா நாமேந்தோ காயம் ந ரக்க²தி நாம, நானாவித⁴ம் து³ட்டு²ல்லகத²ம் கதே²ந்தோ வாசம் ந ரக்க²தி நாம, காமவிதக்காத³யோ விதக்கேந்தோ சித்தம் ந ரக்க²தி நாம. அனுபட்டி²தாய ஸதியாதி காயக³தாஸதிம் அனுபட்ட²பேத்வா. நவமம்.

10. ஸகா³த²கஸுத்தவண்ணனா

166. த³ஸமே அஸக்காரேன சூப⁴யந்தி அஸக்காரேன ச உப⁴யேன. ஸமாதீ⁴தி அரஹத்தப²லஸமாதி⁴. ஸோ ஹி தேன ந விகம்பதி. அப்பமாணவிஹாரினோதி அப்பமாணேன ப²லஸமாதி⁴னா விஹரந்தஸ்ஸ. ஸாததிகந்தி ஸததகாரிம். ஸுகு²மம்தி³ட்டி²விபஸ்ஸகந்தி அரஹத்தமக்³க³தி³ட்டி²யா ஸுகு²மதி³ட்டி²ப²லஸமாபத்திஅத்தா²ய விபஸ்ஸனம் பட்ட²பேத்வா ஆக³தத்தா விபஸ்ஸகம். உபாதா³னக்க²யாராமந்தி உபாதா³னக்க²யஸங்கா²தே நிப்³பா³னே ரதம். ஆஹு ஸப்புரிஸோ இதீதி ஸப்புரிஸோதி கதே²ந்தீதி. த³ஸமம்.

பட²மோ வக்³கோ³.

2. து³தியவக்³கோ³

1-2. ஸுவண்ணபாதிஸுத்தாதி³வண்ணனா

167-168. து³தியவக்³க³ஸ்ஸ பட²மே ஸம்பஜானமுஸா பா⁴ஸந்தந்தி அப்பமத்தகேனபி காரணேன ஸம்பஜானமேவ முஸா பா⁴ஸந்தம். ‘‘ஸீலம் பூரேஸ்ஸாமீ’’தி ஸம்விஹிதபி⁴க்கு²ம் ஸினேருமத்தோபி பச்சயராஸி சாலேதும் ந ஸக்கோதி. யதா³ பன ஸீலம் பஹாய ஸக்காரனிஸ்ஸிதோ ஹோதி, ததா³ குண்ட³கமுட்டி²ஹேதுபி முஸா பா⁴ஸதி, அஞ்ஞம் வா அகிச்சம் கரோதி. து³தியம் உத்தானமேவாதி. பட²மது³தியானி.

3-10. ஸுவண்ணனிக்க²ஸுத்தாதி³வண்ணனா

169. ததியாதீ³ஸு ஸுவண்ணனிக்க²ஸ்ஸாதி ஏகஸ்ஸ கஞ்சனனிக்க²ஸ்ஸ. ஸிங்கீ³னிக்க²ஸ்ஸாதி ஸிங்கீ³ஸுவண்ணனிக்க²ஸ்ஸ. பத²வியாதி சக்கவாளப்³ப⁴ந்தராய மஹாபத²வியா. ஆமிஸகிஞ்சிக்க²ஹேதூதி கஸ்ஸசிதே³வ ஆமிஸஸ்ஸ ஹேது அந்தமஸோ குண்ட³கமுட்டி²னோபி. ஜீவிதஹேதூதி அடவியம் சோரேஹி க³ஹேத்வா ஜீவிதே வோரோபியமானே தஸ்ஸபி ஹேது. ஜனபத³கல்யாணியாதி ஜனபதே³ உத்தமித்தி²யா. ததியாதீ³னி.

து³தியோ வக்³கோ³.

3. ததியவக்³கோ³

1-2. மாதுகா³மஸுத்தாதி³வண்ணனா

170-171. ததியவக்³க³ஸ்ஸ பட²மே ந தஸ்ஸ, பி⁴க்க²வே, மாதுகா³மோதி ந தஸ்ஸ ரஹோ ஏககஸ்ஸ நிஸின்னஸ்ஸ தேன த⁴ம்மேன அத்தி²கோபி மாதுகா³மோ சித்தம் பரியாதா³தும் ஸக்கோதி, யஸ்ஸ லாப⁴ஸக்காரஸிலோகோ சித்தம் பரியாதா³தும் ஸக்கோதீதி, அத்தோ². து³தியம் உத்தானமேவாதி. பட²மது³தியானி.

3-6. ஏகபுத்தகஸுத்தாதி³வண்ணனா

172-175. ததியே ஸத்³தா⁴தி ஸோதாபன்னா. ஸேஸமேத்த² உத்தானமேவ. ததா² சதுத்தே² பஞ்சமே ச²ட்டே² ச. ததியாதீ³னி.

7. ததியஸமணப்³ராஹ்மணஸுத்தவண்ணனா

176. ஸத்தமே ஸமுத³யந்திஆதீ³ஸு ஸஹ புப்³ப³கம்மேன அத்தபா⁴வோ கோலபுத்தியம் வண்ணபோக்க²ரதா கல்யாணவாக்கரணதா து⁴தகு³ணாவீகரணம் சீவரதா⁴ரணம் பரிவாரஸம்பத்தீதி ஏவமாதி³ லாப⁴ஸக்காரஸ்ஸ ஸமுத³யோ நாம, தம் ஸமுத³யஸச்சவஸேன நப்பஜானாதி, நிரோதோ⁴ ச படிபதா³ ச நிரோத⁴ஸச்சமக்³க³ஸச்சவஸேனேவ வேதி³தப்³பா³. ஸத்தமம்.

8. ச²விஸுத்தவண்ணனா

177. அட்ட²மே யஸ்மா லாப⁴ஸக்காரஸிலோகோ நரகாதீ³ஸு, நிப்³ப³த்தேந்தோ ஸகலம்பி இமம் அத்தபா⁴வம் நாஸேதி, இதா⁴பி மரணம்பி மரணமத்தம்பி து³க்க²ம் ஆவஹதி, தஸ்மா ச²விம் சி²ந்த³தீதிஆதி³ வுத்தம். அட்ட²மம்.

9. ரஜ்ஜுஸுத்தவண்ணனா

178. நவமே வாளரஜ்ஜுயாதி ஸுத்தாதி³மயா ரஜ்ஜு முது³கா ஹோதி வாளரஜ்ஜு க²ரா ப²ருஸா, தஸ்மா அயமேவ க³ஹிதா. நவமம்.

10. பி⁴க்கு²ஸுத்தவண்ணனா

179. த³ஸமே தி³ட்ட²த⁴ம்மஸுக²விஹாராதி ப²லஸமாபத்திஸுக²விஹாரா. தேஸாஹமஸ்ஸாதி தேஸம் அஹம் அஸ்ஸ. கீ²ணாஸவோ ஹி லாபீ⁴ புஞ்ஞஸம்பன்னோ யாகு³க²ஜ்ஜகாதீ³னி க³ஹேத்வா ஆக³தாக³தானம் அனுமோத³னம் கரோந்தோ த⁴ம்மம் தே³ஸேந்தோ பஞ்ஹம் விஸ்ஸஜ்ஜேந்தோ ப²லஸமாபத்திம் அப்பேத்வா நிஸீதி³தும் ஓகாஸம் ந லப⁴தி, தம் ஸந்தா⁴ய வுத்தந்தி. த³ஸமம்.

ததியோ வக்³கோ³.

4. சதுத்த²வக்³கோ³

1-4. பி⁴ந்தி³ஸுத்தாதி³வண்ணனா

180-183. சதுத்த²வக்³க³ஸ்ஸ பட²மம் உத்தானமேவ. து³தியாதீ³ஸு குஸலமூலந்தி அலோபா⁴தி³திவித⁴குஸலத⁴ம்மோ. ஸுக்கோ த⁴ம்மோதி தஸ்ஸேவ பரியாயதே³ஸனா. அயம் பனேத்த² ஸங்கே²பத்தோ² – யஸ்ஸ குஸலமூலாதி³ஸங்கா²தஸ்ஸ அனவஜ்ஜத⁴ம்மஸ்ஸ அஸமுச்சி²ன்னத்தா தே³வத³த்தோ ஸக்³கே³ வா நிப்³ப³த்தேய்ய, மக்³க³ப²லானி வா அதி⁴க³ச்சே²ய்ய, ஸ்வாஸ்ஸ ஸமுச்சே²த³மக³மா ஸப்³ப³ஸோ ஸமுச்சி²ன்னோ வினட்டோ². பட²மாதீ³னி.

5. அசிரபக்கந்தஸுத்தவண்ணனா

184. பஞ்சமே பராப⁴வாயாதி அவட்³டி⁴யா வினாஸாய. அஸ்ஸதரீதி வளவாய குச்சி²ஸ்மிம் க³த்³ரப⁴ஸ்ஸ ஜாதா. அத்தவதா⁴ய க³ப்³ப⁴ம் க³ண்ஹாதீதி தம் அஸ்ஸேன ஸத்³தி⁴ம் ஸம்பயோஜேந்தி, ஸா க³ப்³ப⁴ம் க³ண்ஹித்வா காலே ஸம்பத்தே விஜாயிதும் ந ஸக்கோதி, பாதே³ஹி பூ⁴மியம் பஹரந்தீ திட்ட²தி, அத²ஸ்ஸா சத்தாரோ பாதே³ சதூஸு கா²ணுகேஸு ப³ந்தி⁴த்வா குச்சி²ம் பா²லேத்வா போதம் நீஹரந்தி, ஸா தத்தே²வ மரதி. தேனேதம் வுத்தம். பஞ்சமம்.

6. பஞ்சரத²ஸதஸுத்தவண்ணனா

185. ச²ட்டே² ப⁴த்தாபி⁴ஹாரோதி அபி⁴ஹரிதப்³ப³ம் ப⁴த்தம். தஸ்ஸ பன பமாணம் த³ஸ்ஸேதும் பஞ்ச ச தா²லிபாகஸதானீதி வுத்தம். தத்த² ஏகோ தா²லிபாகோ த³ஸன்னம் புரிஸானம் ப⁴த்தம் க³ண்ஹாதி. நாஸாய பித்தம் பி⁴ந்தே³ய்யுந்தி அச்ச²பித்தம் வா மச்ச²பித்தம் வாஸ்ஸ நாஸபுடே பக்கி²பேய்யம். ச²ட்ட²ம்.

7-13. மாதுஸுத்தாதி³வண்ணனா

186-187. ஸத்தமே மாதுபி ஹேதூதி ‘‘ஸசே முஸா ப⁴ணஸி, மாதரம் தே விஸ்ஸஜ்ஜேஸ்ஸாம. நோ சே ப⁴ணஸி, ந விஸ்ஸஜ்ஜேஸ்ஸாமா’’தி ஏவம் சோரேஹி அடவியம் புச்ச²மானோ தஸ்ஸா சோரஹத்த²க³தாய மாதுயாபி ஹேது ஸம்பஜானமுஸா ந பா⁴ஸேய்யாதி அத்தோ². இதோ பரேஸுபி ஏஸேவ நயோதி. ஸத்தமாதீ³னி.

லாப⁴ஸக்காரஸம்யுத்தவண்ணனா நிட்டி²தா.