7. ராஹுலஸம்யுத்தம்

1. பட²மவக்³கோ³

1-8. சக்கு²ஸுத்தாதி³வண்ணனா

188-195. ராஹுலஸம்யுத்தஸ்ஸ பட²மே ஏகோதி சதூஸு இரியாபதே²ஸு ஏகவிஹாரீ. வூபகட்டோ²தி விவேகட்டோ² நிஸ்ஸத்³தோ³. அப்பமத்தோதி ஸதியா அவிப்பவஸந்தோ. ஆதாபீதி வீரியஸம்பன்னோ. பஹிதத்தோ விஹரேய்யந்தி விஸேஸாதி⁴க³மத்தா²ய பேஸிதத்தோ ஹுத்வா விஹரேய்யம். அனிச்சந்தி ஹுத்வா அபா⁴வாகாரேன அனிச்சம். அத² வா உப்பாத³வயவந்ததாய தாவகாலிகதாய விபரிணாமகோடியா நிச்சபடிக்கே²பதோதி இமேஹிபி காரணேஹி அனிச்சம். து³க்க²ந்தி சதூஹி காரணேஹி து³க்க²ம் து³க்க²மனட்டே²ன து³க்க²வத்து²கட்டே²ன ஸததஸம்பீளனட்டே²ன ஸுக²படிக்கே²பேனாதி. கல்லந்தி யுத்தம். ஏதம் மமாதி தண்ஹாகா³ஹோ. ஏஸோஹமஸ்மீதி மானகா³ஹோ. ஏஸோ மே அத்தாதி தி³ட்டி²கா³ஹோ. தண்ஹாகா³ஹோ சேத்த² அட்ட²ஸததண்ஹாவிசரிதவஸேன, மானகா³ஹோ நவவித⁴மானவஸேன, தி³ட்டி²கா³ஹோ த்³வாஸட்டி²தி³ட்டி²வஸேன வேதி³தப்³போ³. நிப்³பி³ந்த³ம் விரஜ்ஜதீதி ஏத்த² விராக³வஸேன சத்தாரோ மக்³கா³ கதி²தா, விராகா³ விமுச்சதீதி ஏத்த² விமுத்திவஸேன சத்தாரி ஸாமஞ்ஞப²லானி.

ஏத்த² ச பஞ்சஸு த்³வாரேஸு பஸாதா³வ க³ஹிதா, மனோதி இமினா தேபூ⁴மகம் ஸம்மஸனசாரசித்தம். து³தியே பஞ்சஸு த்³வாரேஸு ஆரம்மணமேவ. ததியே பஞ்சஸு த்³வாரேஸு பஸாத³வத்து²கசித்தமேவ, மனோவிஞ்ஞாணேன தேபூ⁴மகம் ஸம்மஸனசாரசித்தம் க³ஹிதம். ஏவம் ஸப்³ப³த்த² நயோ நேதப்³போ³. ச²ட்டே² தேபூ⁴மகத⁴ம்மா. அட்ட²மே பன தண்ஹாதி தஸ்மிம் தஸ்மிம் த்³வாரே ஜவனப்பத்தாவ லப்³ப⁴தி. பட²மாதீ³னி.

9. தா⁴துஸுத்தவண்ணனா

196. நவமே விஞ்ஞாணதா⁴துவஸேன நாமம், ஸேஸாஹி ரூபந்தி நாமரூபம் கதி²தம். நவமம்.

10. க²ந்த⁴ஸுத்தவண்ணனா

197. த³ஸமே ரூபக்க²ந்தோ⁴ காமாவசரோ, ஸேஸா சத்தாரோ ஸப்³ப³ஸங்கா³ஹிகபரிச்சே²தே³ன சதுபூ⁴மகா. இத⁴ பன தேபூ⁴மகாதி க³ஹேதப்³பா³. த³ஸமம்.

பட²மோ வக்³கோ³.

2. து³தியவக்³கோ³

1-10. சக்கு²ஸுத்தாதி³வண்ணனா

198-199. து³தியே த³ஸ உத்தானத்தா²னேவ. பட²மாதீ³னி.

11. அனுஸயஸுத்தவண்ணனா

200. ஏகாத³ஸமே இமஸ்மிஞ்ச ஸவிஞ்ஞாணகே காயேதி அத்தனோ ஸவிஞ்ஞாணககாயம் த³ஸ்ஸேதி, ப³ஹித்³தா⁴ சாதி பரஸ்ஸ ஸவிஞ்ஞாணகம் வா அவிஞ்ஞாணகம் வா. புரிமேன வா அத்தனோ ச பரஸ்ஸ ச விஞ்ஞாணமேவ த³ஸ்ஸேதி, பச்சி²மேன ப³ஹித்³தா⁴ அனிந்த்³ரியப³த்³த⁴ரூபம். அஹங்காரமமங்காரமானானுஸயாதி அஹம்காரதி³ட்டி² ச மமம்காரதண்ஹா ச மானானுஸயா ச. ந ஹோந்தீதி ஏதே கிலேஸா கத²ம் ஜானந்தஸ்ஸ ஏதேஸு வத்தூ²ஸு ந ஹோந்தீதி புச்ச²தி. ஸம்மப்பஞ்ஞாய பஸ்ஸதீதி ஸஹ விபஸ்ஸனாய மக்³க³பஞ்ஞாய ஸுட்டு² பஸ்ஸதி. ஏகாத³ஸமம்.

12. அபக³தஸுத்தவண்ணனா

201. த்³வாத³ஸமே அஹங்காரமமங்காரமானாபக³தந்தி அஹம்காரதோ ச மமம்காரதோ ச மானதோ ச அபக³தம். விதா⁴ ஸமதிக்கந்தந்தி மானகோட்டா²ஸே ஸுட்டு² அதிக்கந்தம். ஸந்தம் ஸுவிமுத்தந்தி கிலேஸவூபஸமேன ஸந்தம், கிலேஸேஹேவ ஸுட்டு² விமுத்தம். ஸேஸம் உத்தானமேவாதி. த்³வாத³ஸமம்.

து³தியோ வக்³கோ³.

த்³வீஸுபி அஸேக்க²பூ⁴மி கதி²தா. பட²மோ பனேத்த² ஆயாசந்தஸ்ஸ தே³ஸிதோ, து³தியோ அனாயாசந்தஸ்ஸ. ஸகலேபி பன ராஹுலஸம்யுத்தே தே²ரஸ்ஸ விமுத்திபரிபாசனீயத⁴ம்மாவ கதி²தாதி.

ராஹுலஸம்யுத்தவண்ணனா நிட்டி²தா.