13. ஸத்³த⁴ம்மப்பதிரூபகஸுத்தவண்ணனா

156. தேரஸமே அஞ்ஞாய ஸண்ட²ஹிம்ஸூதி அரஹத்தே பதிட்ட²ஹிம்ஸு. ஸத்³த⁴ம்மப்பதிரூபகந்தி த்³வே ஸத்³த⁴ம்மப்பதிரூபகானி அதி⁴க³மஸத்³த⁴ம்மப்பதிரூபகஞ்ச பரியத்திஸத்³த⁴ம்மப்பதிரூபகஞ்ச. தத்த² –

‘‘ஓபா⁴ஸே சேவ ஞாணே ச, பீதியா ச விகம்பதி;

பஸ்ஸத்³தி⁴யா ஸுகே² சேவ, யேஹி சித்தம் பவேத⁴தி.

‘‘அதி⁴மோக்கே² ச பக்³கா³ஹே, உபட்டா²னே ச கம்பதி;

உபேக்கா²வஜ்ஜனாய சேவ, உபேக்கா²ய ச நிகந்தியா.

‘‘இமானி த³ஸ டா²னானி, பஞ்ஞா யஸ்ஸ பரிசிதா;

த⁴ம்முத்³த⁴ச்சகுஸலோ ஹோதி, ந ச ஸம்மோஹ க³ச்ச²தீ’’தி. (படி. ம. 2.7); –

இத³ம் விபஸ்ஸனாஞாணஸ்ஸ உபக்கிலேஸஜாதம் அதி⁴க³மஸத்³த⁴ம்மப்பதிரூபகம் நாம. திஸ்ஸோ பன ஸங்கீ³தியோ அனாருள்ஹம் தா⁴துகதா² ஆரம்மணகதா² அஸுப⁴கதா² ஞாணவத்து²கதா² விஜ்ஜாகரண்ட³கோதி இமேஹி பஞ்சஹி கதா²வத்தூ²ஹி பரிபா³ஹிரம் கு³ள்ஹவினயம் கு³ள்ஹவேஸ்ஸந்தரம் கு³ள்ஹமஹோஸத⁴ம் வண்ணபிடகம் அங்கு³லிமாலபிடகம் ரட்ட²பாலக³ஜ்ஜிதம் ஆளவகக³ஜ்ஜிதம் வேத³ல்லபிடகந்தி அபு³த்³த⁴வசனம் பரியத்திஸத்³த⁴ம்மப்பதிரூபகம் நாம.

ஜாதரூபப்பதிரூபகந்தி ஸுவண்ணரஸவிதா⁴னம் ஆரகூடமயம் ஸுவண்ணவண்ணம் ஆப⁴ரணஜாதம். ச²ணகாலேஸு ஹி மனுஸ்ஸா ‘‘ஆப⁴ரணப⁴ண்ட³கம் க³ண்ஹிஸ்ஸாமா’’தி ஆபணம் க³ச்ச²ந்தி. அத² நே ஆபணிகா ஏவம் வத³ந்தி, ‘‘ஸசே தும்ஹே ஆப⁴ரணத்தி²கா, இமானி க³ண்ஹத². இமானி ஹி க⁴னானி சேவ வண்ணவந்தானி ச அப்பக்³கா⁴னி சா’’தி. தே தேஸம் ஸுத்வா, ‘‘காரணம் இமே வத³ந்தி, இமானி பிளந்தி⁴த்வா ஸக்கா நக்க²த்தம் கீளிதும், ஸோப⁴ந்தி சேவ அப்பக்³கா⁴னி சா’’தி தானி க³ஹேத்வா க³ச்ச²ந்தி. ஸுவண்ணப⁴ண்ட³ம் அவிக்கியமானம் நித³ஹித்வா ட²பேதப்³ப³ம் ஹோதி. ஏவம் தம் ஜாதரூபப்பதிரூபகே உப்பன்னே அந்தரதா⁴யதி நாம.

அத² ஸத்³த⁴ம்மஸ்ஸ அந்தரதா⁴னம் ஹோதீதி அதி⁴க³மஸத்³த⁴ம்மஸ்ஸ படிபத்திஸத்³த⁴ம்மஸ்ஸ பரியத்திஸத்³த⁴ம்மஸ்ஸாதி திவித⁴ஸ்ஸாபி ஸத்³த⁴ம்மஸ்ஸ அந்தரதா⁴னம் ஹோதி. பட²மபோ³தி⁴யஞ்ஹி பி⁴க்கூ² படிஸம்பி⁴த³ப்பத்தா அஹேஸும். அத² காலே க³ச்ச²ந்தே படிஸம்பி⁴தா³ பாபுணிதும் ந ஸக்கி²ம்ஸு, ச²ளபி⁴ஞ்ஞா அஹேஸும். ததோ ச² அபி⁴ஞ்ஞா பாபுணிதும் அஸக்கோந்தா திஸ்ஸோ விஜ்ஜா பாபுணிம்ஸு. இதா³னி காலே க³ச்ச²ந்தே திஸ்ஸோ விஜ்ஜா பாபுணிதும் அஸக்கோந்தா ஆஸவக்க²யமத்தம் பாபுணிஸ்ஸந்தி. தம்பி அஸக்கோந்தா அனாகா³மிப²லம், தம்பி அஸக்கோந்தா ஸகதா³கா³மிப²லம், தம்பி அஸக்கோந்தா ஸோதாபத்திப²லம். க³ச்ச²ந்தே காலே ஸோதாபத்திப²லம்பி பத்தும் ந ஸக்கி²ஸ்ஸந்தி. அத² நேஸம் யதா³ விபஸ்ஸனா இமேஹி உபக்கிலேஸேஹி உபக்கிலிட்டா² ஆரத்³த⁴மத்தாவ ட²ஸ்ஸதி, ததா³ அதி⁴க³மஸத்³த⁴ம்மோ அந்தரஹிதோ நாம ப⁴விஸ்ஸதி.

பட²மபோ³தி⁴யஞ்ஹி பி⁴க்கூ² சதுன்னம் படிஸம்பி⁴தா³னம் அனுச்ச²விகம் படிபத்திம் பூரயிம்ஸு. க³ச்ச²ந்தே காலே தம் அஸக்கோந்தா ச²ன்னம் அபி⁴ஞ்ஞானம், தம்பி அஸக்கோந்தா திஸ்ஸன்னம் விஜ்ஜானம், தம்பி அஸக்கோந்தா அரஹத்தப²லமத்தஸ்ஸ. க³ச்ச²ந்தே பன காலே அரஹத்தஸ்ஸ அனுச்ச²விகம் படிபத்திம் பூரேதும் அஸக்கோந்தா அனாகா³மிப²லஸ்ஸ அனுச்ச²விகம் படிபத்திம் பூரேஸ்ஸந்தி, தம்பி அஸக்கோந்தா ஸகதா³கா³மிப²லஸ்ஸ, தம்பி அஸக்கோந்தா ஸோதாபத்திப²லஸ்ஸ. யதா³ பன ஸோதாபத்திப²லஸ்ஸபி அனுச்ச²விகம் படிபத³ம் பூரேதும் அஸக்கோந்தா ஸீலபாரிஸுத்³தி⁴மத்தேவ ட²ஸ்ஸந்தி, ததா³ படிபத்திஸத்³த⁴ம்மோ அந்தரஹிதோ நாம ப⁴விஸ்ஸதி.

யாவ பன தேபிடகம் பு³த்³த⁴வசனம் வத்ததி, ந தாவ ஸாஸனம் அந்தரஹிதந்தி வத்தும் வட்டதி. திட்ட²ந்து தீணி வா, அபி⁴த⁴ம்மபிடகே அந்தரஹிதே இதரேஸு த்³வீஸு திட்ட²ந்தேஸுபி அந்தரஹிதந்தி ந வத்தப்³ப³மேவ. த்³வீஸு அந்தரஹிதேஸு வினயபிடகமத்தே டி²தேபி, தத்ராபி க²ந்த⁴கபரிவாரேஸு அந்தரஹிதேஸு உப⁴தோவிப⁴ங்க³மத்தே, மஹாவினயே அந்தரஹிதே த்³வீஸு பாதிமோக்கே²ஸு வத்தமானேஸுபி ஸாஸனம் அனந்தரஹிதமேவ. யதா³ பன த்³வே பாதிமோக்கா² அந்தரதா⁴யிஸ்ஸந்தி, அத² பரியத்திஸத்³த⁴ம்மஸ்ஸ அந்தரதா⁴னம் ப⁴விஸ்ஸதி. தஸ்மிம் அந்தரஹிதே ஸாஸனம் அந்தரஹிதம் நாம ஹோதி. பரியத்தியா ஹி அந்தரஹிதாய படிபத்தி அந்தரதா⁴யதி, படிபத்தியா அந்தரஹிதாய அதி⁴க³மோ அந்தரதா⁴யதி. கிம் காரணா? அயஞ்ஹி பரியத்தி படிபத்தியா பச்சயோ ஹோதி, படிபத்தி அதி⁴க³மஸ்ஸ. இதி படிபத்திதோபி பரியத்திமேவ பமாணம்.

நனு ச கஸ்ஸபஸம்மாஸம்பு³த்³த⁴காலே கபிலோ நாம அனாராத⁴கபி⁴க்கு² ‘‘பாதிமோக்க²ம் உத்³தி³ஸிஸ்ஸாமீ’’தி பீ³ஜனிம் க³ஹேத்வா ஆஸனே நிஸின்னோ ‘‘அத்தி² இமஸ்மிம் வத்தந்தா’’தி புச்சி², அத² தஸ்ஸ ப⁴யேன யேஸம்பி பாதிமோக்கோ² வத்ததி, தேபி ‘‘மயம் வத்தாமா’’தி அவத்வா ‘‘ந வத்தாமா’’தி வதி³ம்ஸு, ஸோ பீ³ஜனிம் ட²பேத்வா உட்டா²யாஸனா க³தோ, ததா³ ஸம்மாஸம்பு³த்³த⁴ஸ்ஸ ஸாஸனம் ஓஸக்கிதந்தி? கிஞ்சாபி ஓஸக்கிதம், பரியத்தி பன ஏகந்தேனேவ பமாணம். யதா² ஹி மஹதோ தளாகஸ்ஸ பாளியா தி²ராய உத³கம் ந ட²ஸ்ஸதீதி ந வத்தப்³ப³ம், உத³கே ஸதி பது³மாதீ³னி புப்பா²னி ந புப்பி²ஸ்ஸந்தீதி ந வத்தப்³ப³ம், ஏவமேவ மஹாதளாகஸ்ஸ தி²ரபாளிஸதி³ஸே தேபிடகே பு³த்³த⁴வசனே ஸதி மஹாதளாகே உத³கஸதி³ஸா படிபத்திபூரகா குலபுத்தா நத்தீ²தி ந வத்தப்³பா³, தேஸு ஸதி மஹாதளாகே பது³மாதீ³னி புப்பா²னி விய ஸோதாபன்னாத³யோ அரியபுக்³க³லா நத்தீ²தி ந வத்தப்³பா³தி ஏவம் ஏகந்ததோ பரியத்தியேவ பமாணம்.

பத²வீதா⁴தூதி த்³வே ஸதஸஹஸ்ஸானி சத்தாரி ச நஹுதானி ப³ஹலா மஹாபத²வீ. ஆபோதா⁴தூதி பத²விதோ பட்டா²ய யாவ ஸுப⁴கிண்ஹப்³ரஹ்மலோகா உக்³க³தம் கப்பவினாஸகம் உத³கம். தேஜோதா⁴தூதி பத²விதோ பட்டா²ய யாவ ஆப⁴ஸ்ஸரப்³ரஹ்மலோகா உக்³க³தோ கப்பவினாஸகோ அக்³கி³. வாயோதா⁴தூதி பத²விதோ பட்டா²ய யாவ வேஹப்ப²லப்³ரஹ்மலோகா உக்³க³தோ கப்பவினாஸகோ வாயு. ஏதேஸு ஹி ஏகத⁴ம்மோபி ஸத்து² ஸாஸனம் அந்தரதா⁴பேதும் ந ஸக்கோதி, தஸ்மா ஏவமாஹ. இதே⁴வ தே உப்பஜ்ஜந்தீதி லோஹதோ லோஹகா²த³கம் மலம் விய இமஸ்மிம் மய்ஹம்யேவ ஸாஸனே தே உப்பஜ்ஜந்தி. மோக⁴புரிஸாதி துச்ச²புரிஸா.

ஆதி³கேனேவ ஓபிலவதீதி ஏத்த² ஆதி³கேனாதி ஆதா³னேன க³ஹணேன. ஓபிலவதீதி நிமுஜ்ஜதி. இத³ம் வுத்தம் ஹோதி – யதா² உத³கசரா நாவா ப⁴ண்ட³ம் க³ண்ஹந்தீ நிமுஜ்ஜதி, ஏவம் பரியத்திஆதீ³னம் பூரணேன ஸத்³த⁴ம்மஸ்ஸ அந்தரதா⁴னம் ந ஹோதி. பரியத்தியா ஹி ஹாயமானாய படிபத்தி ஹாயதி, படிபத்தியா ஹாயமானாய அதி⁴க³மோ ஹாயதி. பரியத்தியா பூரயமானாய பரியத்தித⁴ரா புக்³க³லா படிபத்திம் பூரேந்தி, படிபத்திபூரகா அதி⁴க³மம் பூரேந்தி. இதி நவசந்தோ³ விய பரியத்தியாதீ³ஸு வட்³ட⁴மானாஸு மய்ஹம் ஸாஸனம் வட்³ட⁴தி யேவாதி த³ஸ்ஸேதி.

இதா³னி யேஹி த⁴ம்மேஹி ஸத்³த⁴ம்மஸ்ஸ அந்தரதா⁴னஞ்சேவ டி²தி ச ஹோதி, தே த³ஸ்ஸேந்தோ பஞ்ச கோ²திஆதி³மாஹ. தத்த² ஓக்கமனீயாதி அவக்கமனீயா, ஹேட்டா²க³மனீயாதி அத்தோ². ஸத்த²ரி அகா³ரவாதிஆதீ³ஸு அகா³ரவாதி கா³ரவரஹிதா. அப்பதிஸ்ஸாதி அப்பதிஸ்ஸயா அனீசவுத்திகா. தத்த² யோ சேதியங்க³ணம் ஆரோஹந்தோ ச²த்தம் தா⁴ரேதி, உபாஹனம் தா⁴ரேதி, அஞ்ஞதோ ஓலோகேத்வா கத²ம் கதே²ந்தோ க³ச்ச²தி, அயம் ஸத்த²ரி அகா³ரவோ நாம.

யோ த⁴ம்மஸ்ஸவனஸ்ஸ காலே ஸங்கு⁴ட்டே² த³ஹரஸாமணேரேஹி பரிவாரிதோ நிஸீத³தி, அஞ்ஞானி வா நவகம்மாதீ³னி கரோதி, த⁴ம்மஸ்ஸவனக்³கே³ நிஸின்னோ நித்³தா³யதி, விக்கி²த்தோ வா அஞ்ஞம் கதே²ந்தோ நிஸீத³தி, அயம் த⁴ம்மே அகா³ரவோ நாம.

யோ தே²ருபட்டா²னம் க³ந்த்வா, அவந்தி³த்வா நிஸீத³தி, ஹத்த²பல்லத்தி²கம் து³ஸ்ஸபல்லத்தி²கம் கரோதி, அஞ்ஞம் வா பன ஹத்த²பாத³குக்குச்சம் கரோதி, வுட்³டா⁴னம் ஸந்திகே அனஜ்ஜி²ட்டோ² கதே²தி, அயம் ஸங்கே⁴ அகா³ரவோ நாம.

திஸ்ஸோ பன ஸிக்கா² அபூரேந்தோவ ஸிக்கா²ய அகா³ரவோ நாம ஹோதி. அட்ட² ஸமாபத்தியோ அனிப்³ப³த்தேந்தோ தாஸம் வா பன நிப்³ப³த்தனத்தா²ய பயோக³ம் அகரோந்தோ ஸமாதி⁴ஸ்மிம் அகா³ரவோ நாம. ஸுக்கபக்கோ² வுத்தவிபல்லாஸேனேவ வேதி³தப்³போ³தி. தேரஸமம்.

கஸ்ஸபஸம்யுத்தவண்ணனா நிட்டி²தா.