2. அபி⁴ஸமயஸம்யுத்தம்

1. நக²ஸிகா²ஸுத்தவண்ணனா

74. அபி⁴ஸமயஸம்யுத்தஸ்ஸ பட²மே நக²ஸிகா²யந்தி மம்ஸட்டா²னேன விமுத்தே நக²க்³கே³. நக²ஸிகா² ச நாம லோகியானம் மஹதீபி ஹோதி, ஸத்து² பன ரத்துப்பலபத்தகோடி விய ஸுகு²மா. கத²ம் பனேத்த² பம்ஸு பதிட்டி²தோதி? அதி⁴ட்டா²னப³லேன. ப⁴க³வதா ஹி அத்த²ம் ஞாபேதுகாமேன அதி⁴ட்டா²னப³லேன தத்த² பதிட்டா²பிதோ. ஸதிமம் கலந்தி மஹாபத²வியா பம்ஸும் ஸதகோட்டா²ஸே கத்வா ததோ ஏககோட்டா²ஸம். பரதோபி ஏஸேவ நயோ. அபி⁴ஸமேதாவினோதி பஞ்ஞாய அரியஸச்சானி அபி⁴ஸமேத்வா டி²தஸ்ஸ. புரிமம் து³க்க²க்க²ந்த⁴ம் பரிக்கீ²ணம் பரியாதி³ண்ணம் உபனிதா⁴யாதி ஏததே³வ ப³ஹுதரம் து³க்க²ம், யதி³த³ம் பரிக்கீ²ணந்தி ஏவம் பட²மம் வுத்தம் து³க்க²க்க²ந்த⁴ம் உபனிதா⁴ய, ஞாணேன தம் தஸ்ஸ ஸந்திகே ட²பேத்வா உபபரிக்கி²யமானேதி அத்தோ². கதமம் பனேத்த² புரிமது³க்க²ம் நாம? யம் பரிக்கீ²ணம். கதமம் பன பரிக்கீ²ணம்? யம் பட²மமக்³க³ஸ்ஸ அபா⁴விதத்தா உப்பஜ்ஜேய்ய. கதமம் பன உபனிதா⁴ய? யம் ஸத்தஸு அத்தபா⁴வேஸு அபாயே அட்ட²மஞ்ச படிஸந்தி⁴ம் ஆதி³ம் கத்வா யத்த² கத்த²சி உப்பஜ்ஜேய்ய, ஸப்³ப³ம் தம் பரிக்கீ²ணந்தி வேதி³தப்³ப³ம். ஸத்தக்க²த்துந்தி ஸத்த வாரே, ஸத்தஸு அத்தபா⁴வேஸூதி அத்தோ². பரமதாதி இத³மஸ்ஸ பரம் பமாணந்தி த³ஸ்ஸேதி. மஹத்தி²யோதி மஹதோ அத்த²ஸ்ஸ நிப்பா²த³கோ. பட²மம்.

2. போக்க²ரணீஸுத்தவண்ணனா

75. து³தியே போக்க²ரணீதி வாபீ. உப்³பே³தே⁴னாதி க³ம்பீ⁴ரதாய. ஸமதித்திகாதி முக²வட்டிஸமா. காகபேய்யாதி ஸக்கா ஹோதி தீரே டி²தேன காகேன பகதியாபி முக²துண்டி³கம் ஓதாரேத்வா பாதும். து³தியம்.

3. ஸம்பே⁴ஜ்ஜஉத³கஸுத்தாதி³வண்ணனா

76-77. ததியே யத்தி²மாதி யஸ்மிம் ஸம்பி⁴ஜ்ஜட்டா²னே இமா. ஸம்ஸந்த³ந்தீதி ஸமாக³ந்த்வா ஸந்த³ந்தி. ஸமேந்தீதி ஸமாக³ச்ச²ந்தி. த்³வே வா தி வாதி த்³வே வா தீணி வா. உத³கபு²ஸிதானீதி உத³கபி³ந்தூ³னி. ஸம்பே⁴ஜ்ஜஉத³கந்தி அஞ்ஞாஹி நதீ³ஹி ஸத்³தி⁴ம் ஸம்பி⁴ன்னட்டா²னே உத³கம். சதுத்த²ம் உத்தானத்த²மேவ. ததியசதுத்தா²னி.

5. பத²வீஸுத்தாதி³வண்ணனா

78-84. பஞ்சமே மஹாபத²வியாதி சக்கவாளப்³ப⁴ந்தராய மஹாபத²வியா உத்³த⁴ரித்வா. கோலட்டி²மத்தியோதி பத³ரட்டி²பமாணா. கு³ளிகாதி மத்திககு³ளிகா. உபனிக்கி²பேய்யாதி ஏகஸ்மிம் டா²னே ட²பேய்ய. ச²ட்டா²தீ³ஸு வுத்தனயேனேவ அத்தோ² வேதி³தப்³போ³. பரியோஸானே பன அஞ்ஞதித்தி²யஸமணப்³ராஹ்மணபரிப்³பா³ஜகானம் அதி⁴க³மோதி பா³ஹிரகானம் ஸப்³போ³பி கு³ணாதி⁴க³மோ பட²மமக்³கே³ன அதி⁴க³தகு³ணானம் ஸதபா⁴க³ம்பி ஸஹஸ்ஸபா⁴க³ம்பி ஸதஸஹஸ்ஸபா⁴க³ம்பி ந உபக³ச்ச²தீதி. பஞ்சமாதீ³னி.

அபி⁴ஸமயஸம்யுத்தவண்ணனா நிட்டி²தா.